Omukavihere namahudhera awo othoma omulabela Yehova

1-2. a) Mwahaya bwaddi anamahudhera a Bibiliya egoova okala Anamoona a Yehova? b) Ohudhera wula, nnoone ddi?

WAHINATHI okala Namoona a Yehova, dhahikalawo dhithu dhuthuwathuwiha ni dhuthukulela woova okala Namoona a Yehova? Podi wera wowawoova akwawo avamuruddani, ooskola, oomabasani obe amudhaawo wurugunuwela. Obe wowoova ohanda waparihedha mabasa malagano a mBibiliyani mwigumini mwawo. Akala ethu ninga yela yahupadduwela, ohunona makalelo enakala anamahudhera a Bibiliya yubuwelaga okala anamoona a Yehova ni makalelo eliwa yorusa werana yothoma ela.

² Yesu ahinona wihina makalelo ala owoova podi omuthukulela muthu ohunnuwelavo epaddi yomuzimuni. (Mat. 13:20-22) Mbwenye ohiya Yesu waanyanyala ale yadidela omuhara, oliye wawoniha makalelo owunnuwelavo epaddi yomuzimuni. Yesu ahakavihera anamahara aye mwamakalelo mannayi, (1) yafwanyiwaga makathamiho wihina yunnuwelevo epaddi yomuzimuni, (2) wenjhedhedha odhivela enniwana ni Yehova, (3) ompweha Yehova mburo woobajha mwigumini mwewa, ni (4) onona ethu enahoweliwa werana yafwanyiwa yoweha. Nnande aavi oparihedha mabasa pontu ndha nayi Yesu asorihiliye mudhidhi naakaviheraga anamahudhera ehu nlabihedhaga livuru Ofwanye egumi yohagalasa ya malabo aamatene! ki nnaamukavihere aavi namahudhera ehu othoma omulabela Yehova?

OMUKAVIHERE NAMAHUDHERA AWO ONONA ETHU ENAMUTHUKULELA WOOVA OSAKULA OMULABELA YEHOVA

3. Makathamiho baani Nikodemu awanniyena wihina akale namahara a Yesu?

³ Nikodemu aali namasogolela anoniwe pamadhene ni maJudewu, ahawanana makathamiho oohiyana-iyana wihina akale namahara a Yesu. Teto muwari mwa mweri 6 Yesu agaambele wapara mabasa aye oolaleya, Nikodemu wonelamo wi Yesu aali mwimeleli a Mulugu. (Juwa. 3:1, 2) Mbwenye, Nikodemu othoma ogumana ni Yesu mowipiteya mwaha “wawoova maJudewu.” (Juwa. 7:13; 12:42) Mwebaribarene Nikodemu ahafune, eerege wubuwela wi okala namahara a Yesu were omuthukulela oyelela dhithu dhowinjhiva.a

4. Nimakalelo baani Yesu aamukaviheriye Nikodemu wihina oonelemo ethu Yehova ajhehiye wa oliye?

⁴ Nikodemu ahanona pamadhene malamulo a Moyizeji, mbwenye oliye ohowela okaviheriwa wihina oonelemo ethu baani Yehova ajhehiye wa oliye. Yesu aamukavihere nimakalelo baani? Yesu ahilabihedha pamadhene mudhidhi waye naarive Nikodemu agadhonwe othapanya nuliye ni mahiyu. Teto Yesu omwaddela Nikodemu dhithu baani ahoweliye werana wihina akale namahara. Yesu owoga eegi: othwaruwe mwaha wa dhothega dhawo, obaddiziwe ni omuroromele Mwaana a Mulugu. — Juwa. 3:5, 14-21.

5. Nnaamukavihere aavi anamahudhera ehu wonelamo ethu enamuhiha ohunnuwelavo epaddi ya omuzimuni?

⁵ Naarive namahudhera a Bibiliya aganonne Dholebela, oliye anohowela okaviheriwa wihina anone ethu enamuthukulela ohunnuwelavo epaddi yomuzimuni. Motajhiha, mabasa aye podi ompinyaminyaga ofiyedha ohukanna mudhidhi, obe emudhi yaye podi ohufunaga wi akale Namoona a Yehova. Bumwahaya, omutajhihe Yesu wodhela omukavihera namahudhera awo. We podi omwithana namahudhera awo wihina mwaaredhe mburo bu mburo. Waredha nnamahudhera awo podi omuthukulela oliye owoga dhithu dhinamukathamiha wihina athome omulabela Yehova. Teto, omukongomedhege namahudhera awo wawerana masadduwo enahoweleya ohiya wihina iihagalase mbwenye wihina oonihe wi onomudhivela Yehova.

6. Onande aavi omukavihera namahudhera awo okanna kopolo yoparihedha mabasa dhithu anahudheriye? (1 Korintiyu 16:13)

⁶ Namahudhera a Bibiliya oonelamo wihina Yehova anere omukavihera oparihedha mabasa malagano a mBibiliyani mwigumini mwaaye, anere wanda okanna kopolo wihina aparihedhe mabasa ndhe anahudheriye. (Mmwileri 1 Korintiyu 16:13.) Mutholo wawo ninga namahudhiha podi oliganihiwa ni purusori ooskola. Kubuwela mudhidhi ohudheraga oskola. Purusori baani wathabwiwe omudhivela? Podi wera ali purusori athabwa wukavihera nuuvilela wihina odhowegeve ohudheraga. Nimakalelo mamodhave, namahudhiha apama kanahudhiha baahi dhithu Yehova anafuniye wihina namahudhera aye eeregena, mbwenye anomulibiha namahudhera aye wi nnikavihero na Yehova oliye anere wanda wawerana masadduwo enahoweleya mwigumini mwaaye. Nimakalelo baani?

OMUKAVIHERE NAMAHUDHERA AWO WENJHEDHEDHA ODHIVELA ANNIYENA NI YEHOVA

7. Yesu aakavihere aavi ale yanvuruwana wenjhedhedha odhivela yanniwana ni Yehova?

⁷ Yesu ahinona wihina omudhivela Mulugu were wakavihera anamahara aye oparihedha mabasa ndhe yahudheriwa. Dila dhowinjhivadhene, Yesu owakavihera wenjhedhedha odhivela yanniwana ni Baabi ewa oodhivela Yehova. Motajhiha, Yesu ahimuliganiha Yehova ni Baabi oodhivela anaavaha anaaye dhithu dhapama. (Mat. 7:9-11) Athu owinjhiva yanvuruwana Yesu mudhidhi yole, podi wera kiyanna baabi awooniha odhivela. Kubuwela makalelo yaali athu yaale yanvuruwana Yesu, nuvuruwana yoladdaniha Yesu awogiliye yawoga wodhela baabi athagaraga amwakenle mwanaye aathomme ohogolowela vaade! Aliwa yowanda woona thagaraga Yehova aanniyena wodhela athu a velaboni yavati. — Luk. 15:20-24.

8. Onande aavi omukavihera namahudhera awo wenjhedhedhe odhivela anniyena ni Yehova?

⁸ We podi omukavihera namahudhera awo a Bibiliya wenjhedhedha odhivela aanniyena ni Yehova, wodhela omukavihera woonelamo dhikalelo dhotikiniha anna Yehova mudhidhi mwahudheraga. Kadda musolo munahudheriginyu, we podi omukavihera namahudhera awo oliganiha ndhe anahudheriye ni odhivela wa Yehova. Mwahudheraga wodhela yowobola, omukavihere namahudhera awo wonelamo wi Yehova kamulenve mwanaye mwaha wadhivela baahi athu aatene, mbwenye, mwaha onomudhivela vanlubale namahudhera awo. (Rom. 5:8; 1 Juwa. 4:10) Werana eyo podi omuthukulela namahudhera awo omudhivela Yehova mwaha oliye wubuwela makalelo Yehova anamudhiveliye. — Gal. 2:20.

9. Ddiniyani yamuthukulele Migeli osaddula egumi yaye?

⁹ Osugwe yopadduwa ya ddibila dhaala anithaniwa Migeli, anakala ohIndoneziya. Oliye aleliwe mwibaribarini, mbwenye aali ahinathi obaddiziwa. Nuwakwaniha yaka 18, oliye otamela elabo emodha wihina alabege ninga motorista a kamiyawu. Nuuvira mudhidhi oliye otela, mbwenye ohiya emudhaye wihina aahogolowele mabasa aye oweddiha karo. Mbwenye nuuhiya emudhaaye, mwadhiye ni mwanaye wambela omuhudhera Bibiliya ni obajha wunnuwelavo epaddi yomuzimuni. Vano, amaye Migeli nuukwa, oliye ohogolowela vaade wihina aasamalelege ababe. Teto oliye orumedha omuhudhera BIbiliya. Nufiya epaddi “Ohudhere dhithu dhimodha” na livuru Ofwanye egumi yohagalasa ya malabo aamatene! epaddi 27, Migeli odhiveliwa vanlubale, mwaha epaddi ele yahimudahinya murima. Mudhidhi ubuwelaga makalelo Yehova aaliye Yesu oonihiwaga goyi, oliye wambela wunla. Mwaha wa yeyo, ddibila Migeli othoma omooniha Yehova wihina onomutamalela mwaha wa yowobola ni osaddula egumi yaye wihina abaddiziwe.

OMUKAVIHERE NAMAHUDHERA AWO ONONA OPWEHA DHITHU DHOMUZIMUNI MBURO WOOBAJHA

10. Yesu aakavihere aavi anamahudhera aye onona opweha dhithu dhomuzimuni mburo woobajha? (Lukaji 5:5-11) (Osugwe fotu.)

¹⁰ Anamahara a Yesu yahonelamo wihina oliye aali Mesiya aapaganyiwe, mbwenye yohowela okaviheriwa wi yande wapweha mabasa oolaleya mburo woobajha mwigumini mwewa. Motajhiha, Peduru ni Andere yaali anamahara a Yesu naarive ehinathi withaniwa wihina emuharege mudhidhi waamutene. (Mat. 4:18, 19) Teto aliwa yaaparesa mabasa oomeza, podi wera yaaparesa mabasa ala ni Tiyago vamodha ni Juwawu. (Mar. 1:16-20) Mbwenye Peduru ni Andere “ohiya dhaatedhene,” podi wera aliwa yahubuwela makalelo oosamalela emudhi yewa naarive emuharaga Yesu. Ddiniyani yamuthukulele Peduru ni Andere wapweha mabasa oolaleya mburo woobajha? Yolebela ya Lukaji enawoga wihina Yesu ahawerana matikiniho wihina awonihe anamahara aye wi Yehova eerege wasamalela naarive epadduwaga ethu-siithu. Matikiniho ale yahakavihera anamahara a Yesu ororomela wihina Yehova eerege wasamalela yadidela ompweha dhithu dhomuzimuni mburo woobajha mwigumini mwewa. — Mmwileri Lukaji 5:5-11.

11. Nnande aavi olabihedha dhopadduwa dhehu wihina nlibihe nroromelo na namahudhera ehu?

¹¹ Ebaribari wi kannahowela wawerana matikiniho ninga Yesu aweriliyena wihina nimukavihere namahudhera ehu. Mbwenye iyo podi owoga dhopadduwa dha addibila yawakenle mareeliho owinjhiva mwaha ompweha Yehova mburo woobajha mwigumini mwewa. Motajhiha, onowubuwela makalelo Yehova uukaviheriye nuwambela woona mutugumano? Podi wera wahithoma othapanya ni patarawu awo wihina uvahege mwanamudhidhi wi ohujhombege omutugumanoni. Wawogaga yopadduwa yawo ni namahudhera awo, omonelihemo makalelo nroromelo nawo niliwa nooliba mwaha omoona Yehova akaviheraga yothoma yawo yompweha oliye mburo woobajha mwigumini mwawo.

12. a) Mwahaya bwaddi nigahowela wawithana addibila oohiyana-iyana wihina nihudhere ni anamahudhera ehu? b) Ethu emodhaya onahoweliwe olabihedha wihina omukavihere namahudhera awo siivi? Owoge yotajhiha.

¹² Namahudhera awo anere olibiha nroromelo naaye avuruwanaga dhopadduwa dha makiristawu amodha, yawerilena masadduwo mwigumini mwewa wihina empwehe Yehova mburo woobajha. Bumwahaya wawithanege addibila oohiyana-iyana wihina muhudhere vamodha. Teto we podi waloba addibila ala wihina ewogemo dhithu yeriliwana wihina erumedhe ebaribari ni dhithu yeriliwana wihina empwehe Yehova mburo woobajha mwigumini mwewa. Ohiya eyo, mukumihege mudhidhi wihina moone vidiyu dhinafwanyeya epaddi “Ohudhere dhithu dhimodha” obe “Wegi onone dhithu dhimodha” mu livuruni Ofwanye egumi yohagalasa ya malabo amatene! motajhiha, mwahudheraga musolo 37, mwafwanya vidiyu enna musolo Yehova anere osamalela dhofuna dhehu malabo amatene, we podi omukavihera namahudhera awo wonelamo wihina ampweha Yehova mburo woobajha mwigumini mwaaye, oliye anere omusamalela.

OMUKAVIHERE NAMAHUDHERA AWO ONONA ETHU ANAFUNIYE WERANA AFWANYIWA YOWEHA

13. Yesu awegeredhile aavi anamahara aye wihina yandege owanana dhoweha?

¹³ Yesu ahiwoga dila dhowinjhivadhene wihina anamahara aye yerege oharahariwa, teto malabo mamodha naamudhiwa. (Mat. 5:11; 10:22, 36) Yesu ahalaga neena nuupiwa, wawaddela anamahara aye wihina yerege oharahariwa ofiyedha opiwa mwaha omwebedha Yehova. (Mat. 24:9; Juwa. 15:20; 16:2) Oliye ahawegeredha anamahara aye wodhela wawaddela wihina yohowela okala pasope yaaparaga mabasa oolaleya. Oliye wawaddela wihina kikanganege naale enafuna mpikisano. Teto wihina ekale pasope ni ndhe enawogiwa ni eneriwana wihina edidele wapara mabasa oolaleya.

14. Nnande aavi omwegeredha namahudhera ehu wihina andege owanana dhoweha? (2 Timotiyu 3:12)

¹⁴ Iyo podi wakavihera anamahudhera ehu wihina ekale owegeredheyene wodhela wawaddela dhithu akwiwa ooskola, oomabasani ni amudhiwa enafuniwa wawogela mwaha othoma okala Namoona a Yehova. (Mmwileri 2 Timotiyu 3:12.) Motajhiha, akwawo ooskola podi wuteyaga mwaha wa dhikalelo dhawo. Teto amudhawo amodha podi wuteyaga mwaha orumedhaga ndhe anawoga Bibiliya. Naaxagihaga anamahudhera ehu mutaneene, enerege wanda wawanana makathamiho bi makathamiho enaafwanyege osogolo.

15. Ddiniyani enamukavihera anamahudhera awo a Bibiliya wawanana makathamiho a vemudhini vaye?

¹⁵ Niwogaga wodhela oharahariwa vemudhini, omukavihere namahudhera awo onona ethu enaathukulela amudhaaye otakaleliwa nuliye. Podi wera amudhaaye enubuwela wi oliye eere opupuruwa, obe amudhaaye enowawidda Anamoona a Yehova. Teto ethu ninga yela yahimpadduwela Yesu, oliye ahiharahariwa ni emudhi yaye. (Mar. 3:21; Juwa. 7:5) Bumwahaya, omukavihere namahudhera awo okala oovilela aathapanyaga ni amudhaaye vamodha ni athu amodha.

16. Onande aavi omukavihera namahudhera awo othapanyedha dhithu anahudheriye mBibiliyani mwamakalelo okweya?

¹⁶ Naarive emudhaye yonihaga wi enofuna omuhudhera Bibiliya, oliye anohowela okala pasope wihina ahiwoge dhithu dhaatedhene anahudheriye. Mwaha awoga dhithu dhowinjhiva, podi wathukulela amudhaaye ohufunaga omuhudhera Bibiliya obe ofunaga osaddula museluya. Bumwahaya omukavihere namahudhera awo wi aathapanyaga ahiyedhedhege museluya wi ethapanye labo nimodha. (Kol. 4:6) Oliye podi oloba emudhaye wihina yoone muselu dhinafwanyeya mu jw.org. Eyo enere othukulela emudhaye ohudhera dhithu dhowinjhiva wodhela Anamoona a Yehova mudhidhi enafuniwa ni muselu enafuniwa onona.

17. Onande aavi omukavihera namahudhera awo a Bibiliya wihina andege wawakula mwamakalelo apama ale enna mubuwelo wabure wodhela Anamoona a Yehova? (Osugwe fotu.)

¹⁷ We podi olabihedha seriye enafwanyeya mu jw.org enna musolo “Makoho enawerana athu amodha wodhela Anamoona a Yehova” wihina omukavihere namahudhera awo wegeredha dhowakula dhokweya wihina aandege wakula akwaye ooskola, oomabasani ni amudhaaye yamukoha ethu-sithu. (2 Tim. 2:24, 25) Omakuthulo wa kadda ohudhera, muthapanyedhege epaddi enihina “Athu amodha enawoga yegi” na livuru Ofwanye egumi yohagalasa ya malabo amatene! Omukongomedhe namahudhera awo onona waakula ni madhu aye. Teto ahanda waakula mwamakalelo apama, kuwoove omukavihera namahudhera awo wi ande wakula pama nikoho nna. Omuxagiha nimakalelo yala, winere omukavihera namahudhera wakihedha ebaribari nuuliba murima.

18. Onande aavi omukavihera namahudhera awo okanna yoluba yokala namalaleya ohibaddiziwa? (Matewuji 10:27)

¹⁸ Yesu aharuma anamahara aye walaleya athu muthenga dhapama. (Mmwileri Matewuji 10:27.) Namahudhera ehu ambela owoga mutaneene dhithu anahudheriye mBibiliyani, anere ohudhera omuroromela Yehova. Onande aavi omukavihera namahudhera awo okanna yoluba yokala namalaleya ohibaddiziwa? Yavuwihiwa kampanya yowapara mabasa oolaleya, omukongomedhe namahudhera awo wiwegeredha wi arumedhiwe ninga namalaleya. Omukavihere wonelamo mwahaya bwaddi addibila amodha egakweyela obajha olaleya mudhidhi wa kampanya. Teto oliye podi oxagihiwa wodhela woona dhipaddi dha anamalaleya, dhineriwana va mutugumano dha vaari va sumana. Namahudhera awo ilibihedhaga wakwanihedha yoluba ela, oliye anere ohudhera wakihedha nroromelo naye nuuliba murima.

WOONIHE WIHINA ONOMUROROMELA NAMAHUDHERA AWO

19. Yesu onihile aavi wi owaroromela anamahara aaye, ki iyo nnaamutajhihe aavi?

¹⁹ Yesu ahinathi odhowa odhulu ahawaddela anamahara aye wihina nlabo nimodha yere ohogolowela okala vamodha. Aliwa kayonelamo wihina Yesu awoga wodhela ogumana odhulu. Naarive dhigaali ndo, Yesu aapwasedhe olibiha nroromelo newa, ohiya dhithu yanganyedhiwa. (Juwa. 14:1-5, 8) Yesu ahinona wi aliwa yere ohowela mwanamudhidhi wihina yonelemo ejhehedho yanniwana yodhowa odhulu. (Juwa. 16:12) Nimakalelo mamodhave, iyo podi wooniha wi nnomuroromela namahudhera ehu. Mwaha aliwa ehikanna efunelo yomuhagalasa Mulugu.

20. Murogola Chifundo oonihile aavi wi oomuroromela namahudhera aye Alinafe?

²⁰ Iyo nihikanna ebaribari wihina namahudhera ehu anere werana ele eli yapama. Kasugwa yopadduwa ya murogola Chifundo anakala oMalawi. Oliye ofugula ohudhera wa Bibiliya alabihedhaga livuru Ofwanye egumi yohagalasa ya malabo amatene! ni muhiyana dhaala aali mukatolika anithaniwa Alinafe. Numala ohudhera musolo 14, murogola Chifundo omukoha namahudhera aye dhithu ubuweliye wodhela olabihedha dhikwamuthu. Alinafe waakula eegi, “ela yosakula ya kadda muthu!” Vano, murogola Chifundo wambela wubuwela ogwadda ohudhera wula. Mbwenye nuuvilela oliye odidela omuhudhiha Alinafe ajhehaga wi nlabo nimodha oliye eere osaddula mubuwelo waye. Nuuvira mweri dhowinjhiva, aliwa ofiya ohudhera 34, vano murogola Chifundo werana nikoho nna: “Nimakalelo baani ohudhera wodhela Yehova ni Bibiliya wukaviheriwa ofiyedha peeno?” Murogola Chifundo onowoga makalelo Alinafe aakunliye nikoho nna, oliye onosoriha eegi: “Alinafe owoga dhithu dhowinjhiva dhohagalasa, ethu emodha aawogiliye sowihina Anamoona a Yehova kinerana dhithu Yehova aniddiye.” Nuuvira mudhidhi, Alinafe ohiya olabihedha dhikwamuthu ni othoma obaddiziwa.

21. Nnande aavi omukavihera namahudhera ehu othoma omulabela Yehova?

²¹ Ebaribari wi Yehova “dinunnuwiha,” mbwenye di iyo anna mutholo womukavihera namahudhera ehu wunnuwelavo epaddi yomuzimuni. (1 Kor. 3:7) Ohiya baahi omuhudhiha dhithu Yehova anafuniye wihina eerena, iyo podi nnomukavihera namahudhera ehu omudhivela Yehova. Teto nnohowela omukavihera wi oonihe odhivela waye wodhela ompweha Yehova mburo woobajha mwigumini mwaaye. Ohiya eyo, nnafuna nimuhudhihe namahudhera ehu omuroromela Yehova aafwanyiwaga makathamiho bi makathamiho. Mwaha nooniha wi nnomuroromela namahudhera ehu, nroromelo naye nnolibiha ni kananganyedhege wi anere wanda waparihedha mabasa malagano a mBibiliyani mwigumini mwaaye ni okala txithi wihina aakihedhe ebaribari aafwanyiwaga yoweha si yoweha.