Mapoka Yeriwena Vamwangoni Karmelu

Omwene wa mahimo kumi wahithongiwa ni mamwene owinjhiva yaali abure, mbwenye aathabwile aali Akabe. Oliye ahimutela muhiyana dhaala abure iithaniwa Jezabeli. Jezabeli ni Akabe wathukulela amwaana Ezarayeli wihina emwebedhege mulugu owoota iithaniwa Bahali. Teto yahaapa anamavuhulela owinjhiva a Yehova. Yehova eerile ddi? Oliye omuruma namavuhulela Eliyaji wi awoge ni Akabe.

Eliyaji owoga wihina mwaha wa dhoothega eerilena Akabe, muzong’we kaarubwege wIzarayeli muwari mwa yaka tharu. Bumwahaya, wahirameyawo dhoojha vano nlogo okanna dala. Nuuvira mudhidhi, Yehova omuruma Eliyaji wihina awoge dila biili ni Akabe. Akabe numoona Eliyaji owoga egi: ‘Dhithu dhaatedhene ndha dhinapadduwa mwaha wa we!’ Vano Eliyaji waakula egi: ‘Miyo? Di nyu mwaathukulele athu aatene omwebedha Bahali. Muwoge ni nlogo vamodha ni anamavuhulela aatene a Bahali wihina natugumane omwangoni Karmelu wi namoone Mulugu eebaribari baani.’

Nlogo odhowa omwangoni Karmelu. Wewule, Eliyaji owoga egi: ‘Munohowela omuthoma baani munafuninyu omwebedha: Akala di Yehova obe Bahali. Kabeni nawerena mapoka wi nimunone Mulugu eebaribari. Nyu anamavuhulela 450 a Bahali, mmukuthele mukutho mulugu enyu. Miyo ginere omukuthela mukutho Mulugu aaga Yehova. Mulugu anamothihe mootho odhulu wihina opahe mukuthoya dili mulugu eebaribari.’

Anamakutha a Bahali wegeredha mukutho wewa. Aliwa ovireliwa labo nantero emwithanaga Bahali, mbwenye Bahaliya kaakula. Numala, Eliyaji obajha wateya anamavuhulela ale ni owoga egi: ‘Podi wera Bahali onogona. Mukuwe ni kopolo dhaatedhene podi wera aneere ovenya.’ Vati oribavo anamakutha a Bahali yeraga okuwa, mbwenye kaavo yapadunwe.

Vano Eliyaji opweha mukutho waye valtareni, nikomena onyethiha ni manjhe. Nuwindo oliye olobela egi: ‘Yehova, kamwerena, mwawonihe athu aatene wi nyu Nabwiya dili Mulugu eebaribari.’ Mudhidhi yoole, Yehova omothihedha mootho vadhulu va altare. Vano amwaana Ezarayeli okanna ebaribari wihina Yehova Mulugu eebaribari. Nlabo nenne anamavuhulela ale 450 a Bahali opiwa.

Nuwindo Eliyaji woona murabo mung’ono waddamelaga, vano oliye omwaddela Akabe egi: ‘Aneere orubwa muzongwe owinjhiva. Bumwahaya, waguve, wegeredhe karo yawo wihina omuthawe muzongwe.’ Vano odhulu odhalawo murabo dhooriba, okalawo nipevo ninlubale nuwindo muzongwe obajha orubwa. Akabe ogwela mukaroni mwaye othamagaga adhowaga owaniwe. Nnikavihero na Yehova, Eliyaji wanda othamaga okwaranya karo ya Akabe. Vano muzongwe ohogolowela orubwa wIzarayeli. Mbwenye Eliyaji eere wawanana makathamiho mamodha.