Omakuthulo wa Musano Abure

Akabe agaali palasiyu yoJezreyeli owanda woona mundda wa mulobwana dhaala ithaniwa Naboti. Akabe ookalela murogo mundda ole ni ahixixa ogula. Mbwenye Naboti kaafuna omugulihedha mwaha nlamulo na Yehova kaneenya. Naboti aherana ethu yapama. Ki Akabe aali aavi? Oliye ahitakaleliwa vanlubale, ahukuwa ofiyedha ohufunaga okuma okwartu teto kaafuna ojha ethu.

Jezabeli, mwadhiye Akabe owoga egi: ‘Akabe we oli mwene owIzarayeli. Podi okanna ethu-siithu onafuniwe. Miyo ginere wanda othukula mundda ole wihina okale wawo.’ Vano, Jezabeli waaja makalelo oompa Naboti wi athukule mundda ole. Oliye waruma alobwana athima a luwani yele wihina emwinkedhe Naboti wi ahimuruwana Mulugu. Bumwahaya, Naboti opiwa. Nuwindo, Jezabeli owoga ni Akabe egi: ‘Naboti ohukwa vano we podi ohalana mundda waye.’

Jezabeli ahaapa athu owinjhiva apama ni yamudhivela Yehova ninga Naboti. Oliye awebedha amulugu owoota ni owerana dhithu dhowinjhiva dhabure. Mbwenye Yehova owoona dhithu ndhe eeriyena. Nerege oliye keerena ethu-siithu?

Nuuvira mudhidhi Akabe okwa. Vano mwanaye Jeyorawu okala mwene. Mudhidhi yole, Yehova omuruma mulobwana dhaala ithaniwa Jewu wihina ampe Jezabeli vamodha ni emudhaye.

Jewu ogwela mukaroni mwaye ni odhowa murudda withaniwa Jezreyeli. Teto Jeyorawu ogwela karo yaye odhowa ogumana ni Jewu. Nugumana, Jeyorawu omukoha Jewu egi: ‘We onadha ni murenddele?’ Jewu waakula egi: ‘Naari Jeyorawu, kanidha nikanna murenddele wula ammawo Jezabeli yeragana dhithu dhabure.’ Nuwiwa madhu aawogile Jewu, Jeyorawu oxixa othawa. Mbwenye Jewu omulata ni mwaalago, nuwindo Jeyorawu okwa.

Vano, Jewu odhowa opalasiyu wa Jezabeli. Jezabeli nunona wihina Jewu aanna ofiya, oliye wimakiyari, wawegeredha mathithi ni omujhehaga vajanelani na kwartu yodhulu. Jewu nufiya, Jezabeli obajha omweddiha nuubure. Nuwindo, Jewu owoga ni ndhu nootaama ni adhari yamwaddamele Jezabeli egi: ‘Munvokedhe muhiyana oyo vajanelani!’ Adhaari ale omutukumela Jezabeli vajanelani omothela vati ni okwa.

Nuwindo, Jewu waapa ahima 70 a Akabe. Teto omariha webedha wa Bahali wIzarayeli. Nnahudhera ddi? Nnahudhera wihina Yehova ohunona dhithu dhaathedhene dhinapadduwa teto mudhidhi wofwanelela aneere waatoriha ale enerana dhithu dhabure.