Ndina na Yehova nnatapulela ddi, mwigumini mwa Yesu?

1-2. a) Ethu baani Yesu eeriliyena emahiyu ahinathi okwa? b) Makoho baani nnafunihu wawakula muwari mwa ohudhera wula?

AALI Txinayi nlabo na 14 a Nisa yaka ya 33 M.W., vihalaga neena wihina viribe. Teto wahanle mudhidhi vang’ono wihina Yesu atorihiwe, athongeliwe okwa, onihihiwe goyi ni apiwe. Yesu vamodha ni anamahara aye oororomeleya, yahimala wajha mathanga owubuwela okwa waye. Vano numala wajha mathanga ale avayeka, Yesu wavaha anamahara aye dholaga dhogomihedha wihina awegeredhe ni aalibihe. Ehalaga neena wihina evenyevo mburo ole yajhiwa mathanga owubuwela okwa waye, Yesu werana nlobelo na vati vamurima. Nlobelo nna nnafwanyeya va Juwawu kapitulu 17.

² Yesu athuwathuwela ddi nuwerana nlobelo nna? Ki nlobelo erilena Yesu mudhidhi yoole, nnanikavihera aavi wonelamo ethu Yesu athabwiye ovaha thima agaali velaboni yavati? Nnere woona dhowakula dha makoho ala muwari mwa ohudhera wula.

“MIYO GIHANONIHA NDINA NENYU”

3. Yesu afuna awoge ddi nuwasoriha madhu ala owi “miyo gihanoniha ndina nenyu?” (Juwawu 17:6, 26)

³ Va nlobelo Yesu eriliyena, oliye owoga eegi: “Miyo gihanoniha ndina nenyu.” Ela enowooniha wihina muselu ola waali wathima mwigumini mwa Yesu, mwaha oliye ahiwoga wodhela muselu yola dila biili. (Mmwileri Juwawu 17:6, 26.) Yesu afuna awoge ddi nuwasoriha madhu ala owi “miyo gihanoniha ndina nenyu?” Nerege oliye aahudhiha anamahara aye wi ndina na Mulugu di Yehova? Naari, mwaha wihina anamahara a Yesu yaali maJudewu, bumwahaya aliwa yahinona wihina ndina na Mulugu di Yehova. Teto ndina na Yehova noofwanyeya mu Dholebela dhEbarayiku dila dhowakwana 7 000. Bumwahaya Yesu nuwasoriha madhu owi “miyo gihanoniha ndina nenyu,” kiyatapulela wi oliye aahudhiha wi ndina na Mulugu di Yehova, mbwenye oliye afuna awoge wi ahahudhiha yotapulela ya ndina na Mulugu. Eyo enatapulela wi Yesu ahakavihera anamahara aye omunona pama Yehova ni onona efunelo yaye wodhela elabo yavati ni athu. Teto ahakavihera wonelamo dhithu Yehova eeriliyena ni dhithu anafuniye werana vamodha ni dhikalelo dhaaye. Kaavo muthu ande oninoniha dhithu ndha, ahili Yesu. Mwaha oliye ohumunona pamadhene Yehova omukwaranya muthu di muthu.

4-5. a) Owoge yoladdaniha enooniha wi ndina na muthu podi okala nathima mwigumini mwehu? b) Mwahaya bwaddi ndina na Yehova ndhe nikalege nathima mwigumini mwa Yesu?

⁴ Kubuwela mmulogoni mwawo mugaali namaholela mulogo anithaniwa Davidi, oliye mediku, teto omunonne kale. Vano nlabo nimodha we okala muredda ni othoma odhowa ospitale oliye analabiyewo. Nufiya ospitale wule, oliye wuvaha murombwe wukavihenre ovulumuwa. Mohanganyedha eyo yere wenjhedhedha odhivela onniwena ni namaholela mulogo awo. Teto wiwaga ndina naaye, onerege wubuwela ethu uwereliye. Ebaribari wi nivanove oliye di namaholela mulogo omunonniwe muwari mwa yakadhene, mbwenye vano oliye di mediku avulunse egumi yawo.

⁵ Ni makalelo mamodhave anamahara a Yesu yahinona ndina na Yehova, mbwenye mwaha mabasa oolaleya aapara Yesu, aliwa yahanda wonelamo pamadhene yotapulela ya ndina na Yehova. Ddiniyani yakavihenre wonelamo ndina nna ni makalelo yaala? Mwaha Yesu owatajhiha Ababe wodhela dhithu dhaatene eeriyena ni awogiye. Vano anamahara aye yavuruwanaga dhithu Yesu aahudhiye ni makalelo aweddihiye athu, aliwa yowanda omunona pama Yehova. — Juwawu 14:9; 17:3.

“NDINA NENYU, NDINA MUGIVAHILINYU”

6. Mwahaya bwaddi Yesu adhe awogege wi oliye ahivahiwa ndina na Mulugu? (Juwawu 17:11, 12)

⁶ Va nlobelo Yesu eriliyena, oliye ahimuloba Yehova wi aasugwerege anamahara aye eegi: “Mwasugwerege mwaha wa ndina nenyu, ndina mugivahilinyu.” (Mmwileri Juwawu 17:11, 12.) Nerege ela enatapulela wi ndina na Yesu neere osadduliwa wi ithaniwege Yehova? Naari. Mwaha Yesu alabihedhe madhu owi “ndina nenyu.” Ela enowooniha wi Yesu kaaloba wi ithaniwege Yehova. Ki vano, mwahaya bwaddi Yesu adhe awogege wi oliye ahivahiwa ndina na Mulugu? Ethu yoobajha sowihina Yesu aali mwimeleli ni namafihedha a muthenga dha Yehova. Teto oliye aadhile velaboni yavati mwaha Yehova damurumile ni ahawerana matikiniho alabihedhaga ndina na Yehova. (Juwa. 5:43; 10:25) Yanabili, ndina na Yesu nnatapulela “Yehova ovulusa.” Bumwahaya ndina na Yesu, nnowiwanana ni ndina na Yehova.

7. Owoge yoladdaniha enooniha wi Yesu ahikanna oneti wowoga ninga mwimeleli a Yehova?

⁷ Wihina noonelemo pama, kabeni nubuwele yoladdaniha ela: Embaxadore muthu anawoga vamburoni va namathonga, teto awogaga anolabihedha ndina na namathongaya anamwimeleliye. Ni makalelo mamodhave Yesu amwimelela Yehova ni awoga alabihedhaga ndina na Yehova.— Mat. 21:9; Luk. 13:35.

8. Ni makalelo baani ndina na Yehova naaliwa ni Yesu naarive oliye ahinathi odha velaboni yavati? (Êxodo 23:20, 21)

⁸ Bibiliya anomwithana Yesu ninga “Ndhu” mwaha wihina Yehova onomulabihedha Yesu wihina awaddele angero ni athu muthenga ni dhoholela dhaye. (Juwa. 1:1-3) Podi wera mungero Yehova aamulabihedhiye wihina aaholele amwaana Ezarayeli mudhidhi egaali mwiddeddereni, aali Yesu. Teto nuwaruma amwaana Ezarayeli wi emwiwelelege mungero ole, Yehova wawaddela mwahaya bwaddi aliwa yahoweliwa werana eyo eegihina: ‘Ndina naaga niri nuliye.’a (Mmwileri Êxodo 23:20, 21.)b Yehova aawogile madhu ala mwaha Yesu dili mwimeleli aye, teto duliyene anathabwa obarela ni otxeniha ndina na Yehova.

“BABANI, MUTHITHIMIHE NDINA NENYU”

9. Ni makalelo baani Yesu oonihiliye wi oovaha thima ndina na Yehova?

⁹ Ninga noonilihu Yesu ambele ovaha thima ndina na Yehova ahinathi odha velaboni yavati. Teto mudhidhi agaali velaboni yavati dhithu dhaatedhene eeriyena, dhowooniha wi oliye oothabwa ovaha thima ndina na Yehova. Vano omakuthulo wa mabasa aye oolaleya Yesu omuloba Yehova eegi: “Babani, muthithimihe ndina nenyu.” Mohilegela Yehova omwakula ni ndhu nootaama eegi: “Miyo gihithithimiha ni ginere othithimihave dila biili.”—Juwa. 12:28.

10-11. a) Yesu aathithimihile aavi ndina na Yehova? (Osugwe fotu.) b) Mwahaya bwaddi ndina na Yehova nnohowela otxenihiwa ni wakihedhiwa?

¹⁰ Yesu ahithithimiha ndina na Ababe. Nimakalelo baani? Oliye ahiwoga wodhela dhikalelo ni dhithu dhotikiniha Yehova eeriliyena. Ohiya eyo, Yesu aherana dhithu dhimodha. Motajhiha, Yesu oohowela woniha wi dhithu dhaatedhene anerana Yehova sapama ni ohowela otxeniha ndina na Yehova.c Yesu ahoniha wihina otxeniha ndina na Yehova ethu yathima, nuwahudhiha athu nlobelo nna nnihina: “Baabihu muli odhulu, ndina nenyu ntxenihiwe.”—Mat. 6:9.

¹¹ Mbwenye mwahaya bwaddi ndina na Yehova nnohowela otxenihiwa ni wakihedhiwa? Mwaha Saddana ahimunyemula Yehova ni ahivuwiha dhowoota wodhela oliye mmunddani wo Ideni. Saddana owoga wi Yehova muliba woota ni kaanvaha Adawu ni Eva dhithu dhapama. (Gén. 3:1-5) Enakala ninga Saddana afuna awoge wi makalelo oothonga a Yehova kiyaali apama. Teto mwaha wa dhowoota Saddana avuwihiliye, dhinowathukulela athu wubuwelaga wi Yehova muthu abure. Vasogolova mudhidhi wa Jo, Saddana owooga wihina athu enamulabela Yehova mwaha wa dhithu dhapama oliye anaavahiye. Teto owooga wi yafwanyiwa makathamiho, enere ohiya omulabela Yehova mwaha kinamudhivela ni murima wewa waatene. (Jó 1:9-11; 2:4) Bumwahaya were ohoweleya mwana mudhidhi wihina athu aatene emunone muliba woota, akala di Yehova obe Saddana.

“GIHIVELELA EGUMAAGA”

12. Ethu baani Yesu aathomiliye werana mwaha wa odhivela anniyena ni Yehova?

¹² Mwaha wa odhivela Yesu anniyena ni Yehova, oliye ahithoma werana dhithu dhatedhene andiye wihina aakihedhe ni atxenihe ndina na Yehova. Yesu ahirumedha okwa wihina onihe wi Yehova Mulugu oweela ni makalelo aye owerana dhithudha bapama.d Bumwahaya oliye adhe awogege eegi. “Gihivelela egumaaga.” (Juwa. 10:17, 18) Adawu ni Eva yaali ologomana, mbwenye aliwa yaasakunle omurugunuwela Yehova ni okala epaddi ya Saddana. Mohiyana ni Adawu ni Eva, Yesu ahirumedha odha velaboni yavati wihina oonihe wi owadhivela Ababe. Oliye ahoniha odhivela wula wodhela omwiwelela Yehova mwadhatedhene. (Ebe. 4:15; 5:7-10) Yesu ahididela okala oororomeleya egumi yaye yaatene ofiyedha opiwa vantxikwani na goyi. (Ebe. 12:2) Nimakalelo yaala, Yesu ohooniha wi oowadhivela Ababe ni odhivela ndina na Yehova.

13. Mwahaya bwaddi Yesu aali muthu oofwanelela wihina atxenihe ni aakihedhe ndina na Yehova? (Osugwe fotu.)

¹³ Dhithu dhaatedhene Yesu eriliyena agaali velaboni yavati, dhihoniha wihina Saddana muliba woota, omuhiya Yehova! (Juwa. 8:44) Yesu ahimunona pamadhene Yehova ompitha muthu di muthu. Bumwahaya dhithu Saddana amwinkedhiliye Yehova dhahakale ebaribari Yesu eere onona. Mbwenye ebaribariya sowihina dhithu dhaatedhene Saddana awogiliye wodhela Yehova sowoota. Bumwahaya Yesu ahithoma wakihedha ndina na Yehova. Teto naarive ekalaga ninga Yehova ahimusukuma Yesu mudhidhi ahalaga neena nuukwa, Yesu ahirumedha okwa ohiya omurugunuwela Baabi aye oodhivela Yehova.—Mat. 27:46.e

“GIHAMARIHA MABASA MUGIVAHILINYU”

14. Mareeliho baani Yehova anvahiliye Yesu mwaha okala oororomeleya?

¹⁴ Va nlobelo nne Yesu eriliyena emahiyu ahinathi okwa, oliye ahiwoga eegi: “Gihamariha mabasa mugivahilinyu wi gaapare.” Yesu ahikanna ebaribari wihina ahadidele okala oororomeleya, Yehova eere omureeliha. (Juwa. 17:4, 5) Teto eyo yaali ebaribari. Mwaha wi Yesu nuukwa, Yehova kaamuhiile mmahame. (Dho. 2:23, 24) Ohiya eyo, Yehova ahinvenyiha Yesu muukwani ni onvaha mutholo munlubale odhulu. (Fil. 2:8, 9) Nuuvira mudhidhi, Yesu okala Mwene Oomwene wa Mulugu. Ki dhithu baani onerena Omwene ola? Yesu ahiwoga dhithu Omwene ola onafuniwa werana va nlobelo aahudhihiye athu, nuwoga eegi: “Omwene weenyu odhe. Efunelo yenyu yereye, [obe neere efunelo ya Yehova yereye] elabo yavati, ni odhulu.”—Mat. 6:10.

15. Dhithu baani Yesu anafuniye werana mohilegela wi aakihedhe ndina na Yehova?

¹⁵ Mohilegela Yesu anere wagujhula amwiddani aatene a Yehova va koddoni ya Armajedo. (Ovuhu. 16:14, 16; 19:11-16) Voharela Yesu aneere ovonkedha Saddana mu “abismuni,” wengo Saddana kanandege werana ethu-sithu mwaha enakalege ninga ohukwa. (Ovuhu. 20:1-3) Nuwindo Yesu anere odhana murenddele velaboni yaatene yavati, ni anere wakavihera athu aatene okala oologomana muwari wa Onamathonga waye wa yaka 1000. Ohiya eyo, oliye anere wavenyiha anookwa ni anere osaddula elabo yaatene wihina ekale Parayizu. Mwaha wa yeyo efunelo ya Yehova enere wakwanela!—Ovuhu. 21:1-4.

16. Egumi enaakale aavi Onamathonga wa Yesu wa yaka 1000 wamala?

¹⁶ Egumi enaakale aavi Onamathonga wa Yesu wa yaka 1000 wamala? Yothega ni ohulogomana kawindha okalawo. Athu kinahowelege oloba nlevelelo mwaha wa dhoothega dhewa. Teto kinahowelege yowobola newene kinamuhowelege namafihedha obe anamakutha wihina awandanihe ni Yehova. Vano omagomihedhowa, ‘mwiddani oogomihera, okwa, [odhele mwaha wa Adawu ni Eva] onere ogujhuliwa.’ Teto mmahame kamunakale athu ookwa mwaha enere ovenyihiwamo. Ohiya eyo, athu aatene velaboni yavati enakale oologomana.—1 Kor. 15:25, 26.

17-18. a) Enaapadduwe ddi omakuthulo wa onamathonga wa yaka 1000? b) Yesu anere ddi Onamathonga waye wa yaka 1000 wafiya omakuthulo? (1 Korintiyu 15:24, 28) (Osugwe fotu.)

¹⁷ Ethu emodha enaapadduwe omakuthulo wa Onamathonga wa yaka 1000, enakale ddi? Kaavo muthu ananganyedhege wi Yehova Mulugu oweela ni owogowa. Ni makalelo baani? Kubuwela, mmunddani wo Ideni Saddana ahimwinkedha Yehova wi namathonga ahinna odhivela, teto muliba woota. Vano okuma mudhidhi yoole ofiyedha peeno, ndina na Yehova ninna otxenihiwa ni athu enna omwebedha ni omuriha. Teto omakuthulo wa Onamathonga wa Yaka Txikwi ndina na Yehova nnere wakihedhiwa mwa dhaatedhene. Ohiya eyo, Yehova anere wooniha wi oliye Baabi oodhivela.

¹⁸ Omagomihedhowa athu aatene enere okanna ebaribari wihina Saddana muliba woota. Ki Yesu anere ddi Onamathonga waye wa yaka 1000 wafiya omakuthulo? Nerege Yesu anere omutajhiha Saddana ni amurugunuwele Yehova? Naari! (Mmwileri 1 Korintiyu 15:24, 28.) Yesu anere omuhogolosela Omwene Yehova ni anerege wiwelela onamathonga wa Ababe. Mohiyana ni Saddana, Yesu anere oleva dhithu dhaatedhene mwaha anowadhivela vanlubale Ababe.

19. Ndina na Yehova nnatapulela ddi mwigumini mwa Yesu?

¹⁹ Mohanganyedha dhihikalawo dhithu dhowinjhiva dhimuthukulele Yehova onvaha ndina nna nowi, Yesu. Teto Yesu onomutajhiha pamadhene Yehova. Ki vano ndina na Yehova nnatapulela ddi mwigumini mwa Yesu? Nnatapulela wi kaavo ethu yathima mwigumini mwa Yesu opitha ndina na Yehova. Yesu ohufiyedha opeleka egumaye mwaha wa ndina nna. Teto omakuthulo wa onamathonga wa yaka 1000, Yesu anere wavahedha dhithu dhaatedhene Ababe. Ki vano nnande aavi omutajhiha Yesu? Yowakulaya nnere woona ohudhera onaharela.