OHUDHERA 23
JHIBO 2 Ndina nenyu di Yehova
Ndina na Yehova, nnatapulela ddi mwigumini mwawo?
‘Nyu muli anamoona aaga, anawoga di Yehova.’ — ISA. 43:10.
DHITHU NNAAHUDHERIHU
Nnere woona makalelo ootxeniha ni owakihedha ndina na Yehova.
1-2. Nnone aavi wi Yesu onothabwa ovaha thima ndina na Yehova?
NDINA na Yehova, ethu Yesu anathabwiye ovaha thima mwigumini mwaaye. Yesu dinathabwa obarela ndina na Yehova ompitha muthu di muthu. Ninga nonilihu ohudhera wivirile, Yesu ahirumedha okwa wihina oonihe wi Yehova Mulugu ooweela ni dhatedhene aneriyena sowogowa. (Mar. 14:36; Ebe. 10:7-9) Teto nihoona wihina omakuthulo wa Onamathonga waye wa yaka 1000, Yesu anere wahogolosela Omwene Ababe, mwaha oliye anafuna wi Yehova baahi athithimihiwege. (1 Kor. 15:26-28) Makalelo Yesu anavahiye thima ndina na Yehova, enowooniha wihina oliye onowadhivela vanlubale Ababe.
2 Yesu aadhile velaboni yavati ninga mwimeleli a Yehova. (Juwa. 5:43; 12:13) Teto Yesu ahahudhiha anamahara aye ndina na Yehova. (Juwa. 17:6, 26) Ohiya eyo, oliye ahihudhiha ni ahawerana matikiniho alabihedhaga ndina na Ababe. (Juwa. 10:25) Teto Yesu ahimuloba Yehova wihina aasugwerege anamahara aye “mwaha wa ndina naye” obe neere, mwaha wa ndina na [Yehova.] (Juwa. 17:11) Dhithu dhaatedhene ndha dhinowoniha wihina ndina na Yehova ethu yathima vanlubale mwigumini mwa Yesu opitha ethu-sithu. Bumwahaya kabiha wubuwela: Nerege enowandeya muthu owoga wihina mukiristawu, wula ahinonne newene ahilabihedhaga ndina na Yehova?
3. Ohudhera wula nnoone ddi?
3 Woona wihina nili makiristawu eebaribari, nnomutajhiha Yesu ni nnowoniha wi nnodhivela ni nnoriha ndina na Yehova. (1 Ped. 2:21) Bumwahaya ohudhera wula, nnere woona nimakalelo baani ndina na Yehova, nnatonyihedhiwa makiristawu ebaribari enalaleya muthenga dhapama peeno? (Mat. 24:14) Teto nnere woona makalelo owoniha wi kadda muthu wa iyo, onovaha thima ndina na Yehova.
“NLOGO NIITHANIWEGE NI NDINA NAAYE”
4. a) Ddiniyani Yesu awaddeliye anamahara aye ohalaga mudhidhi vang’ono wihina ahogolowele odhulu? b) Nikoho baani nnafunihu wakula?
4 Ohalaga mudhidhi vang’ono wihina Yesu ahogolowele odhulu, oliye owoga ni anamahara aye eegi: “Mwaakela muzimu wotxena, munere ovahiwa kopolo ni munere okala anamoona aaga okumana oJeruzale, oJudeya watewene ni oSamariya ofiyedha wigomele elabo.” (Dho. 1:8) Ela enatapulela wi muthenga dhapama dhere olaleyiwa ohiya baahi elabo ya Ezarayeli, mbwenye wapela elabo yaatene. Mwaha eyo yere wathukulela aathu aatene okanna ofuru wokala anamahara a Yesu. (Mat. 28:19, 20) Mbwenye we ohanda wonelamo madhu aasorihile Yesu enihina: “Munere okala anamoona aaga?” Nerege madhu ala enatapulela wi anamahara ala, yaakale baahi anamoona a Yesu, obe aliwa yohowela onona ndina na Yehova? Yowakulaya enafwanyeya livuru na Dhowera Dhaarumiwi kapitulu 15.
5. Ddiniyani arumiwi ni anamaholela ooJeruzale yeriliwana nuwonelamo wi ndina na Yehova nohowela ovuwihiwa? (Osugwe fotu.)
5 Yaka 49 M.W., arumiwi ni anamaholela mulogo otugumana oJeruzale wihina ethapanyedhe muselu wa ale yahaali maJudewu wi yoone ethu aliwa yahoweliwa werana wihina ekale makiristawu. Mutugumano ole ohalaga neena numala, Tiyagu ddibile Yesu owoga eegi: “[Peduru] ohuwoga pamadhene wi dila yobajha, Mulugu wawubuwela athu amalogo, wihina asakule nlogo niithaniwege ni Ndina naaye.” Tiyagu aagana ndina nawani? Asorihaga wodhela yovuhulela ya Amoji, oliye ohogolowela owoga eegi: “Wihina athu aatene yande omusayela Yehova ni murima wamutene vamodha ni athu amalogo amatene, “athu enithaniwa ni ndina naaga, anawoga di Yehova.” (Dho. 15:14-18) Anamahara ala axa, kayahudherege baahi wodhela ndina na Yehova, mbwenye aliwa yerege ‘withaniwa ni ndina nna.’ Eyo enatapulela wi aliwa yerege ovuwiha ndina na Yehova wi athu amodha enone ni yerege withaniwana ndina nna.
Nsaka noobajha nikuru nolamulela nigatugumane, aliwa wonelamo wi makiristawu yohowela withaniwana ndina na Yehova (Osugwe ddima 5)
6-7. a) Yesu adheele ddi velaboni yavati? b) Ki muselu baani wathima onavolowelavo?
6 Ndina na Yesu nnatapulela, ‘Yehova ovulusa.’ Eyo enowoneleyamo mwaha Yehova amulabihedhe Yesu wihina aavuluse ale enna nroromelo. Bumwahaya Yesu ohudha velaboni yavati wihina apeleke egumi yaye wi awobole aathu aatene. (Mat. 20:28) Mwaha oleva egumi yaye wihina awobole athu, Yesu ohavaha ofuru athu aatene wihina ekanne egumi yohimala. — Juwa. 3:16.
7 Mwahaya bwaddi athu egahowela woboliwa? Mwaha wa ele epadduwile mmuddani mwa Ideni. Ninga nonilihu ohudhera wivirile, Adawu ni Eva yahithoma omurugunuwela Yehova. Mwaha wa yeyo, aliwa oyelela ofuru wokalawo ni mukalakala. (Gén. 3:6, 24) Mbwenye Yesu ohudha velaboni yavati ni werana ethu yathima opitha wawobola athu. Saddana ahimwinkedha Yehova wodhela owoga dhithu dhohufwanelela. (Gén. 3:4, 5) Bumwahaya woboliwa wa athu wovolowelavo muselu ola wathima vanlubale, eli otxenihiwa wa ndina na Yehova. Yesu aali mwimeleli a Yehova, teto oliye ohakwanihedha mwadhatedhene efunelo ya Yehova. Bumwahaya Yesu muthu oofwanelela wihina atxenihe ndina na Yehova.
Nerege enowandeya muthu owoga wihina mukiristawu, wula ahinonne newene ahilabihedhaga ndina na Yehova?
8. Athu aatene yafuna okala anamahara a Yesu yahowela wonelamo ddi?
8 Aatene yafuna okala anamahara a Yesu, maJudewu ni ale yahaali maJudewu, yohowela onona wi Yehova Ababe Yesu, dili ntxela neegumi. (Juwa. 17:3) Teto ninga Yesu, aliwa yere ononiwa ni ndina na Yehova. Ohiya eyo, aliwa yohowela onona wi otxeniha ndina na Yehova ethu yathima vanlubale. Ovulusiwa wewa, wadhela mwaha wa ndina nna. (Dho. 2:21, 22) Bumwahaya anamahara aatene oororomeleya a Yesu yohowela ohudhera wodhela Yehova ni Yesu. Ela enonikavihera wonelamo mwahaya bwaddi Yesu adhe akuthulege nlobelo naaye nnafwanyeya va Juwawu 17 ni madhu ala enihina: “Miyo gihanoniha ndina nenyu ni gineerege wanonihave, wihina odhivela mugidhivelinyuna okale naaliwa, miyo naaliwa nikale mwimodhani.”—Juwa. 17:26.
‘NYU MULI ANAMOONA AAGA’
9. Nnonihe aavi wihina ndina na Yehova ethu yathima mwigumini mwehu?
9 Ofiyedha vala, nihoona wi anamahara aatene a Yesu enohowela otxeniha ndina na Yehova. (Mat. 6:9, 10) Ndina na Yehova nnohowela okala ethu yathima mwigumini mwehu. Teto iyo nnohowela wooniha wi nnovaha thima ndina na Yehova wodhela dhithu nnerihuna mwigumini mwehu. Ki vano, nnere ddi wihina ntxenihe ndina na Yehova ni wooniha wi Saddana muliba woota?
10. Dholebela dha Isaías 42-44, dhinanikavihera aavi wonelamo makalelo muselu wotxeniha ndina na Yehova onanipathiwa? (Isaías 43:9; 44:7-9) (Osugwe fotu.)
10 Dholebela dha Isaías 42-44, dhinonikavihera wonelamo makalelo muselu wotxeniha ndina na Yehova onanipathiwa. Va dholebela ndha, Yehova onowawithana athu ehinamulabela wihina yonihe akala amulugu enawebedhiwa beebaribari. Teto ninga enapadduwa otiribunale, Yehova onowakoha akala ohukalawo namoona di namoona wihina awoge akala amulugu ewa beebaribari obe ehikalawo. Mbwenye kaavo ananda ovaha onamoona!—Mmwileri Isaías 43:9; 44:7-9.a
Enakala ninga nili otiribunale teto nihikanna ofuru wovaha onamoona wodhela Yehova (Osugwe ddima 10-11)
11. Ddiniyani Yehova anawogiye ni nlogo naaye va Isaías 43:10-12?
11 Mmwileri Isaías 43:10-12.b Vano Yehova onowoga ni nlogo naye eegi: ‘Nyu muli anamoona aaga, . . . teto miyo gili Mulugu.’ Nuwindo Yehova anowaloba adhaari aye wihina yaakule nikoho nna: ‘Ohukalawo Mulugu mmodha ahili miyo?’ (Isa. 44:8) Oneti winlubale iyo wakula nikoho nna! Teto iyo podi wakula nikoho nna wodhela ovaha onamoona wihina Yehova di Mulugu mmodha baahi eebaribari ni dhithu nnerihuna vamodha ni ndhe nnawogihu. Ndina naaye nili vadhulu va mandina aatene. Dhithu dhaatedhene nnerihuna mwigumini mwehu dhinowooniha wi nnomudhivela Yehova, teto nnodidela okala oororomeleya wa Yehova naarive nehiwaga vanlubale ni Saddana. Ni makalelo yaala nihikanna oneti wokavihera otxeniha ndina na Yehova.
12. Yovuhulela enafwanyeya va Isaías 40:3, 5, yakwanenle aavi?
12 Naatxenihaga ndina na Yehova, ninna omutajhiha Yesu Kiristu. Namavuhulela Izayiya ahivuhulela wi ohukala muthu ‘aaninonihe [obe “aamwegeredhele,” nota.] dila Yehova.’ (Isa. 40:3) Yovuhulela ela yakwanenle aavi? Juwawu Namabaddiza aahimwegeredhela dila Yesu, aadhile ninga mwimeleli a Yehova. (Mat. 3:3; Mar. 1:2-4; Luk. 3:3-6) Izayiya ahenjhedhedhave eegi: ‘Nthithimiho na Yehova nnere ononiwa.’ (Isa. 40:5) Yovuhulela, yakwanenle aavi? Yesu nuudha velaboni yavati ahimutajhiha pamadhene Yehova, ofiyedha okalaga ninga mwinnyene Yehova dadhile velaboni yavati.—Juwa. 12:45.
13. Nnande aavi omutajhiha Yesu?
13 Ndala ninga Yesu, iyo nili Anamoona enabarela ndina na Yehova. Iyo nnothukula ndina na Yehova ni nnowawaddela athu wodhela dhithu dhotikiniha oliye aneriyena. Mbwenye wihina nikale anamoona apama, nnohowela odidela owoga dhithu dhaatedhene Yesu eriliyena wihina atxenihe ndina na Yehova. (Dho. 1:8) Yesu di Namoona a Yehova ilibihedhe vanlubale wihina abarele ndina na Yehova, bumwahaya nihiyoya nnohowela ohara yotajhiha yaye. (Ovuhu. 1:5) Ki ethu emodha nnahowelihu werana wihina noonihe wi nnovaha thima ndina na Yehova siivi?
NNONIHE AAVI WI NNOVAHA THIMA NDINA NA YEHOVA?
14. Nnakala aavi mwaha withaniwana ndina na Yehova? (Salmo 105:3)
14 Iyo nnowithukula mwaha withaniwana ndina na Yehova. (Mmwileri Salmo 105:3.)c Yehova anohagalala vanlubale aanoonaga niithukulaga mwaha wa ndina naaye. (Jer. 9:23, 24; 1 Kor. 1:31; 2 Kor. 10:17) Iyo nnovaha thima oneti ninnihuna wooriha ni obarela ndina na Yehova. Bumwahaya kanikannege manyazo wawaddela akwihu oomabasani, ooskola, amwanddamani ehu ni athu amodha wi nili Anamoona a Yehova! Saddana anafuna wihina nihiwogege naathu amodha wodhela ndina na Yehova. (Jer. 11:21; Ovuhu. 12:17) Ebaribariya sowihina Saddana ni ale enamukavihera ovuwiha dhowoota dhaaye, enafuna wi athu edduwale ndina na Yehova. (Jer. 23:26, 27) Mbwenye mwaha wa odhivela ninnihuna ni Yehova vamodha ni ndina naaye, iyo nnodidela onvuwiha mudhidhi wamutene.—Sal. 5:11; 89:16.
15. Ovuwiha ndina na Yehova enatapulela ddi?
15 Iyo nnodidela ovuwiha ndina na Yehova. (Joel 2:32; Rom. 10:13, 14) Ovuwiha ndina na Yehova kinatapulela baahi onona ni olabihedha ndinana, mbwenye enatapulela omunona mwinnya a ndina nna, ni omuroromela wodhela omuloba nikavihero ni dhoholela. (Sal. 20:7; 99:6; 116:4; 145:18) Ohiya eyo, enovolowelavo wawaddela athu amodha ndina na Yehova ni dhikalelo dhaaye ni wakavihera werana masadduwo mwigumini mwewa wihina emuhagalase Yehova ni evuluwe.—Isa. 12:4; Dho. 2:21, 38.
16. Nnande aavi wooniha wi Saddana muliba woota?
16 Iyo nnorumedha wonihiwa goyi mwaha wa ndina na Yehova. (Tiya. 5:10, 11) Nafwanyiwaga makathamiho ni nadidela okala oororomeleya wa Yehova, nnowoniha wi Saddana muliba woota. Mudhidhi wa Jo, Saddana owoga wodhela adhaari a Yehova eegi: ‘Muthu onere oleva dhaatedhene dhinniyena mwaha wa egumaye.’ (Jó 2:4) Madhu ala enatapulela wihina Saddana afuna awoge wi muthu di muthu, aadidele omulabela Yehova, dhaye dhamweddelaga pama. Mbwenye aafwanyiwaga makathamiho, eere ohiya omulabela Yehova. Jo wooniha wi ele awogile Saddana kiyaali ebaribari. Nihiyoya nihikanna ofuru wowoniha wi naarive Saddana anitotelaga makathamiho bi makathamiho, kannadha nimurugunuwelaga Yehova. Teto iyo podi okanna ebaribari wi Yehova anere onisamalela ni anerege onisugwera mwaha wa ndina naye.—Juwa. 17:11.
17. Mowiwanana ni 1 Peduru 2:12 makalelo mamodha oothithimiha ndina na Yehova baavi?
17 Iyo nnoriha ndina na Yehova. (Pro. 30:9; Jer. 7:8-11) Woona wihina nili amwimeleli a Yehova, dhowera dhehu podi omuthithimiha obe podi omutota manyazo Yehova. (Mmwileri 1 Peduru 2:12.)d Bumwahaya nnafuna ninvuwihe Yehova wodhela dhithu nnawogihu ni dhithu dhaatedhene nnerihuna. Nerana ndo, naarive nigaali athu ohilogomana, nnere othithimiha ndina na Yehova.
18. Makalelo mamodha owooniha wi ndina na Yehova ethu yathima mwigumini mwehu baavi? (Osugwe nota.)
18 Iyo nnothuwathuwela ndina na Yehova opitha dhithu enubuwela athu amodha. (Sal. 138:2) Mwahaya bwaddi sathima othuwathuwela ndina na Yehova? Mwaha odhivela ninnihuna ni ndina na Yehova, podi wathukulela athu amodha oniwoga obure.e Kubuwela ethu yapadduwile ni Yesu. Oliye ahirumedha wonihiwa goyi ofiyedha opiwa ninga mpanga wihina athithimihe ndina na Yehova. Yesu ‘kaapwathile manyazo’ obe neere, oliye kathabwa othuwathuwela dhithu athu amodha yafuniwa wubuwela wodhela oliye. (Ebe. 12:2-4) Ohiya eyo, ethu yathima mwigumini mwaaye yaali werana efunelo ya Yehova.—Mat. 26:39.
19. Nnakala aavi mwaha withaniwana ndina na Yehova, ki mwahaya bwaddi?
19 Iyo nnowithukula mwaha withaniwana ndina na Yehova. Teto oneti winlubale ononiwa ninga Anamoona a Yehova. Bumwahaya nnorumedha oruwaniwa ni onyoziwa naathu amodha, mwaha wi nnothuwathuwela ndina na Yehova opitha dhithu enubuwela athu amodha. Teto naarive Saddana asayelaga werana ethu-sithu wihina anikwerebeyihe, nihithoma odidela othithimiha ndina na Yehova. Nerana eyo, ndala ninga Yesu nnere wooniha wihina ndina na Yehova ethu yathima mwigumini mwehu.
JHIBO 10 Ninvuwihe Yehova Mulugu!
a Isaías 43:9 Athu aatene a velaboni etugumane mburo mmodha baahi, malogo etugumaniwe. Baani wa aliwa anaavuwihe muselu ola? Baani ananaaddele dhithu dhoobajha? Anoonihe anamoona aye wihina enaaddele ebaribari wi niwe ni naakule neegi: ‘Eyo ebaribari!” 44:7 Baani analigana ni miyo? Agaakule ni oonihe dhithu dhinanivaha ebaribari. Awoge dhithu dhinadha ni dhinafuna opadduwa osogolo, ndala ninga gerilimina okuma mudhidhi wa kale. 8 Kamuthuwathuwe newene kamugurumele mwaha woova. Kaguwaddeleni dhithu ndha, dhihinathi wambela opadduwa? Nyu muli anamoona aaga. Ohukalawo Mulugu mmodhaya ahili miyo? Kaawo Nibwe nimodha newene kaginonne nimodha. 9 Aatene enaasasanya dhikwamuthu dhosemiwa, kahi ethu. Teto dhikwamuthu enathabwiwa odhivela kadhinakavihere, ndala ninga anamoona ewa, aliwa kinoona ethu newene kinonne ethu. Bumwahaya ale enasasanya dhikwamuthu enere ototiwa manyazo.
b Isaías 43:10 Nyu muli anamoona aaga,” anawoga di Yehova, “hee, mudhaari aaga gimusakunlimi wi eginone ni ekalena nroromelo ni miyo wihina enonelemo wi gili mmodhave. Gihinakalewo, kaaliwo Mulugu mmodhaya ni osogolo kanadha akalawo Mulugu mmodhaya. 11 Miyo gili Yehova, teto kaawo namavulusa ahili miyo. 12 Miyo gihivuwiha, gihivulusa ni gihilaleya eyo yahinathi okalawo amulugu amodha enafwanyeya vaari veenyu. Bumwahaya nyu muli anamoona aaga, anawoga di Yehova, teto miyo gili Mulugu.
c Salmo 105:3 Muwogege nuuwithukula ndina naaye noweela. Murima waale enamusayela Yehova ohagalalege
d 1 Peduru 2:12 Mweeddelo weenyu okale wapama vaari vaathu oode, wihina mwinkedhiwa ni dhithu dhabure, aliwa ekale anamoona a dhowera dhenyu dhapama, ni emuthithimihe Mulugu nlabo anafuniye wazondda athu.
e Naarive mulobwana Jo agaali muthu oororomeleya, oliye ahithuwathuwa mwaha wa dhithu yubuwela athu amodha, nuwinkedhiwa ni akwaaye araru yawoga wi oliye aherana ethu yabure. Omambelelowene Jo nuwayelela anaaye ni dhithu dhatedhene anniyena, ‘Jo katheegile, newene kamwinkedhile Mulugu werana yego yabure.’ (Jó 1:22; 2:10) Mbwenye, Jo nuwinkedhiwa wi aherana ethu yabure, oliye obajha wiwakihedha ni wambela wawoga ‘madhu ahabihile wubuwela.’ Oliye aasayenle wiwakihedha ohiya otxeniha ndina na Yehova. — Jó 6:3; 13:4, 5; 32:2; 34:5.