Yehova ononroromeliha wi elabo ela eneere okala parayizu

1. Muthenga baani Izayiya aawaddenliye amwaana Izarayeli?

NAMAVUHULELA Izayiya ohuwoga wihina Yehova ‘Mulugu anawoga ebaribari.’ Madhu ewogiwe vala owi ‘ebaribari’ enatapulela “amém.” (Isa. 65:16, nota) “Amém” enatapulela “dhikale ndo,” obe “mwebaribarene.” Madhu ala owi “amém” yalabihedhiwaga mBibiliyani yagiwagana Yehova ni Yesu, etonyihedho yowihina ethuya enawogiwa ebaribari. Bumwahaya muthenga namavuhulela Izayiya awogiliye awaddelaga amwaana Ezarayeli, waali wowoneleyamo. Malabo aamatene Yehova apaganya werana ethu-sithu, siyeyo enaapadduwe. Ebaribariya sowihina Yehova onowakwanihedha dhithu dhatedhene anapaganyiye.

2. Mwahaya bwaddi nigahowela ororomela mpaganyo Yehova eriliyena wodhela osogolo, ki makoho baani nnafunihu wawakula muwari mwa yohudhera ela?

² Nerege iyo podi ororomela wihina mpaganyo dhatedhene Yehova awogiliye wodhela osogolo dhinere wakwanela? Nuuvira yaka 800 Izayiya agakwile, murumiwi Pawulo ahitapulela mwahaya bwaddi nigahowela okanna ebaribari wihina mpaganyo dhatedhene Yehova awogiliye kadhinalepela wakwanela. Murumiwi Pawulo owoga egi: ‘Mulugu kanoota.’ (Heb. 6:18) Motajhiha, kadhinenyeya ntxela nimodhave waakumiha manjhe oothapila ni manjhe a mwinnyu mudhidhi mmodhave. Ni makalelo mamodhave Yehova ntxela neebaribari, Oliye kanadha oota. Bumwahaya iyo podi ororomela dhatedhene Yehova anawogiye. Eyo enovolowelavo mpaganyo Oliye eriliyena wodhela osogolo. Ohudhera wula nnere wawakula makoho menddi: Ethu baani Yehova apaganyiliye onivaha osogolo? Ki ethu baani enanivaha ebaribari wihina Yehova anere wakaneliha mpaganyo dhaye dhatedhene?

ETHU BAANI YEHOVA APAGANYILIYE?

3. (a) Mpaganyo baani wa Yehova othambwe okala wavayekiwa wa iyovano? (Apocalipse 21:3, 4) (b) Athu amodhaya enakala aavi nawaddelaga mpaganyo ola?

³ Kabeni noone mpaganyo wavayekiwa onanipatha iyo aatene. (Omwileri Apocalipse 21:3, 4.) Yehova anopaganya wihina nlabo nimodha: ‘Kawindha wikala okwa, kutho, wibulela, naari widdela.’ Owinjhiva wa iyo, nnowileri yolebela ela wihina naalibihena athu mmalaleyelo, teto wi nawonihe makalelo enaakale egumi mparayizu. Mbwenye athu owinjhiva enakala aavi yiiwaga mpaganyo ola? Podi wera aliwa enowoga yegi: ‘Ndho kadhinaapadduwe.’

4. (a) Yehova numpaganya parayizu, ethu baani aanonniye wihina yeere opadduwa? (b) Ohiya onipaganyave parayizu ethu baani emodhaya Yehova eriliye?

⁴ Yehova nunvethela murumiwi Juwawu wihina alebe mpaganyo ola wodhela parayizu, Oliye ahinona wihina neerege olabihedha versu ndha naaparaga mabasa oolaleya. Teto Yehova ahinona wi athu owinjhiva yerege warusa orumedha mpaganyo ola wihina dhithudha dhinere owomela osogolo. (Isa. 42:9; 60:2; 2 Cor. 4:3, 4) Ki vano nnaakavihere aavi athu amodhaya okanna ebaribari wihina mareeliho enapaganyiwa va Apocalipse 21:3 ni 4 enere wakwanela? Ki iyo Nnande aavi olibiha nroromelo ninnihuna ni Yehova vamodha ni mpaganyo dhaye? Yehova ohuwoga dhithu dhinanthukulela orumedha wi Oliye anere wakwanihedha mpaganyo dhaye. Dhithu ndho siivi?

YEHOVA ANONIROROMELIHA WI ANERE WAKWANELIHA MPAGANYO DHAYE

5. Versu baani dhinanikavihera ororomela mpaganyo dha Yehova, ki versu ndha dhinawoga ddi?

⁵ Va Apocalipse 21:5, 6a nnofwanyavo dhithu dhinanithukulela ororomela mpaganyo dhaye wodhela parayizu. Versu nda dhinihina: ‘Ole akiratile vampaddoni wera: Kasugwa! “Gihisaddula dhithu dhatedhene vano dhixa.” Wenjhedhedha eraga: “Olebe, mwaha madhu ala boororomeleya ni beebaribari.” Ni ogaddela egi: “Dhihakwanela! Miyo gili Alfa [oobajha] ni Omega [oogomihedha].”’

6. Mwahaya bwaddi madhu enafwanyeya va Apocalipse 21:5 ni 6 egalibiha nroromelo nehu ni mpaganyo dha Yehova?

⁶ Mwahaya bwaddi versu ndha mBibiliyani dhigalibiha nroromelo nehu wodhela mpaganyo dha Mulugu? Livuru Clímax de Revelação nnawoga negi: “Enakala ninga Yehova mwinnyene uhasinari dukumentu apaganyaga wihina anere wadhana mareeliho wi aavahe athu a velaboni yavati enakale oororomeleya.”b Apocalipse 21:3, 4 anowoga ethu Yehova apaganyiliye. Mbwenye va versu 5 ni 6, enakala ninga nnonfwanyavo asinatura a Yehova ananivaha ebaribari wi mpaganyo ola onere wakwanela. Vano kabeni noone makalelo Yehova ananikaviheriye wonelamo wihina iyo podi omuroromela.

7. Madhu enafwanyeya va versu 5 bawani, ki mwahaya bwaddi madhu ala bavayekiwa?

⁷ Omambelelo wa versu 5 vinihina: ‘Ole akiratile vampaddoni wera.’ (Apo. 21:5a) Madhu ala bavayekiwa mwaha wihina mwinnyene Yehova uhasoriha dila tharu mu livuru na Apocalipse. Kahiyo Yesu newene mungero anaasoriha madhu ala, mbwenye di mwinnyene Yehova aasorihile! Eyo enowoniha pamadhene wi iyo podi waroromela madhu enafwanyeya omagomihedho wa versu 5. Mwaha wa ddi? Mwaha wihina Yehova ‘kahiyo Mulugu owoota.’ (Tito 1:2) Bumwahaya iyo podi waroromela madhu enadha va Apocalipse 21:5 ni 6.

‘GIHISADDULA DHITHU DHATEDHENE VANO DHIXA’

8. Madhu baani Yehova analabihedhiye enoniha wihina mpaganyo waye onere wakwanela? (Isaías 46:10)

⁸ Madhu ooharela Yehova anawogiye baala, ‘kasugwa!’ (Apo. 21:5) Madhu owi ‘kasugwa!’ ni egerego enolabihedhiwa dila dhowinjhivadhene mulivuru na Apocalipse. Livuru dhaala na referensiya, nnawoga negi madhu ala owi, kasugwa ni eskalamasawu, enalabihedhiwa wihina ‘emukavihere namileri wapwasedha madhu enaharela.’ Ki ethu baani Mulugu awogiliye voharela? Oliye anowoga egi: ‘Gihisaddula dhithu dhatedhene vano dhixa.’ Masadduwo ala, Yehova anawerena osogolo, mbwenye Oliye ohukanna ebaribari wihina anere wakwaneliha mpaganyo ndha onfiyedha owoga ninga dhinna wakwanela. — Omwileri Isaías 46:10.

9. (a) Madhu owi ‘Gihisaddula dhithu dhatedhene vano dhixa’ enatapulela ddi? (b) Ethu baani enafuna opadduwa ni ‘elabo yodhulu’ vamodha ni ‘elabo yavati’ eliwo peeno?

⁹ Vano kabeni naapwasedhe madhu enafwanyeya va Apocalipse 21:5: ‘Gihisaddula dhithu dhatedhene vano dhixa.’ Eyo enatapulela ddi? Muwari mwa kapitulu ela, madhu ala enagiwana dhithu biili Yehova anafuniye werana osogolo. Yobajha, Yehova anere ogujhula elabo ela yabure. Yanabiili Oliye anere odhana elabo exa. Va Apocalipse 21:1, nnowafwanyavo madhu ala owi: ‘Elabo yodhulu yakale ni elabo yavati yakale yahivira.’ ‘Elabo yodhulu yakale’ enagiwana anamathonga enasugweriwa ni Saddana vamodha ni ademoniyu. (Mat. 4:8, 9; 1 João 5:19) Madhu owi ‘elabo’ yalabihedhiwaga mBibiliyani, podi otapulela athu enakala elabo yavati. (Gén. 11:1; Sal. 96:1) Mowindala, ‘elabo yavati yakale’ enagiwana athu abure. Yehova kanaawomihedhe ‘elabo yavati’ ni ‘elabo yodhulu’ ya peeno. Mbwenye Oliye anere ogujhula ni mukalakala. Ni vamburo vewa Yehova anere opwehavo ‘elabo yodhulu exa’ ni ‘elabo yavati exa,’ obe neere onamathonga muxa onafuna wathongaga athu owogowa.

10. Nimakalelo baani Yehova anafuniye osaddula dhithu dhatedhene wi dhikale dhixa?

¹⁰ Makalelo mamodhaya baavi Yehova anafuniye ‘asaddule dhithu dhatedhene wihina dhikale dhixa?’ (Apocalipse 21:5) Yehova anere owomihedha elabo yavati ni anere weriha wihina athu ekale oologomana. Ninga munawogela yovuhulela ya Izayiya Yehova anere osaddula elabo yaatene wi ekale yowoma ninga aali munda wo Ideni. Owomihedhiwa wula onere wapatha ni athuya. Yehova anopaganya wi nnere ovulumusiwa wa dhiredda dhatedhene. Aliba oohona, oohiwa ni ooragala enere ovulumusiwa ni anookwaya enere ovenyihiwa. — Isa. 25:8; 35:1-7.

‘MADHU ALA BOOROROMELEYA NI BEBARIBARI. . . . ENERE WAKWANELA!’

11. Ethu baani Yehova amulobiliye Juwawu wihina erena, ki ethu banni Yehova amuroromelihiye?

¹¹ Ethu baani emodhaya Mulugu awogiliye enanivaha ebaribari wi iyo podi ororomela mpaganyo dhaye? Yehova ahimwaddela murumiwi Juwawu egi: ‘Olebe, mwaha madhu ala boororomeleya ni ebaribari.’ (Apo. 21:5) Ohiya omulobave wihina Juwawu aalebe madhu ala, Yehova owoga mwahaya bwaddi ahoweliye waleba. Yehova owoga egi: ‘Mwaha madhu ala boororomeleya ni ebaribari.’ Eyo enatapulela wihina madhu a Mulugu boororomeleya. Iyo nnotamalela vanlubale mwaha Juwawu wiwelela nlamulo nna nowaleba madhu ala. Mwaha wa yeyo peeno iyo podi wileri wodhela ejhehedhelo ya parayizu ni wapendda mareeliho ooriya vanlubale nnafunihu wawakela osogolo.

12. Mwahaya bwaddi Yehova adhe erege: ‘Ehimala wakwanela!’?

¹² Ethu baani emodhaya Yehova awogiliye? Oliye ohuwoga egi: ‘Dhihakwanela!’ (Apo. 21:6) Versu ela Yehova anawoga wodhela dhithu anafuniye werana osogolo, mbwenye anawoga ninga dhithudha dhihimala wakwanela. Yehova baahi podi owoga ni makalelo yaala mwaha wihina kaavo ethu enamuthukulela ohaakwaneliha efunelo yaye. Vasogolova Yehova anowoga ethu emodhaya enanivaha ebaribari wihina mpaganyo dhaye mwebaribarene dhinere wakwanela. Ddiniyani?

‘MIYO GILI ALFA NI OMEGA’

13. Mwahaya bwaddi Yehova adhe erege: ‘Miyo gili Alfa ni Omega’?

¹³ Ninga nonilihu mundduli, Yehova mwinnyene ohuwoga dila tharu mu dhowoona oonile Juwawu. (Apo. 1:8; 21:5, 6; 22:13) Kadda mudhidhi Yehova awogiliye, Oliye ohalabihedha madhu mamodhave owi: ‘Miyo gili Alfa ni Omega.’ Madhu owi alfa letira noobajha na alfabetu eegerego vano omega letira nogomihedha. Yehova nuwoga wi miyo gili ‘Alfa ni Omega,’ Oliye onowoniha wihina ambela werana ethu, onofiiha omakuthulo ni onoweriha wihina dhatedhene dhakwanele.

14. (a) Fihalini Yehova awogiliye ‘Alfa’ ki anaawoge ‘Omega’ alini? (b) Ebaribari baani nnafwanyihu va Génesis 2:1-3?

¹⁴ Yehova numpaddusa Adawu ni Eva, ahiwoga efunelo anniyena ni athu vamodha ni elabo yavati. Bibiliya anowoga egi: ‘Mulugu ahareeliha egihina: “Mwaabale ahima mwinjhivane, mudhale elabo yatene yavati.”’ (Gén. 1:28) Yehova nuwoga efunelo yaye, yakala ninga awogile egi: ‘Alfa.’ Vano efunelo ya Yehova enere wakwanela odhuulu wowiwelela wa Adawu wakala wologomana, wadhaala elabo yaatene yavati ni wasaddula elabo yaatene wi ekale parayizu. Eyo yapadduwa enakalege ninga Yehova eere wawoga madhu owi: ‘Omega.’ Yehova nuumala opaddusa elabo yodhulu ni yavati ni dhithu dhaatene dhilimo, Oliye ahiwoga ethu enanivaha ebaribari enafwanyeya va Génesis 2:1-3. (Omwileri.) Yehova owoga wihina nlabo na neetanu nabiili nlabo noweela. Eyo enatapulela ddi? Eyo enowoniha wihina efunelo Yehova anniyena ni athu vamodha ni elabo yavati, enere wakwanela pamadhene omakuthulo na labo na netanu nabiili.

15. Podi wera Saddana ubuwela ddi wodhela efunelo ya Yehova ni elabo yavati Adawu ni Eva nuuthega?

¹⁵ Adawu ni Eva nuuhiya omwiwelela Yehova aliwa okala athu oothega ni wavaliha aniwa yothega ni okwa. (Rom. 5:12) Yakala ninga Saddana ahanda ovunganyedha efunelo Yehova anniyena wihina mwilaboni mwidhaliwemo ni athu oologomana ni owiwelela. Teto yakala ninga Yehova kaande wakwaneleliha efunelo yaye wihina awoge madhu owi: ‘Omega.’ Podi wera Saddana ubuwela wi Yehova kaande wakwaneliha mpaganyo waye. Obe podi wera ubuwela wihina Yehova eere omugujhula Adawu ni Eva, nuwindo aapadduse anamatelana amodhaya oologomana yaamwiwelelege, wihina efunelo yaye yakwanele. Mbwenye ahere Yehova eerana ndo, Saddana eere omwinkedha Yehova ninga muliba woota. Mwaha wa ddi? Mwaha wihina mowiwana ni Génesis 1:28, Yehova ahimpaganya Adawu wihina anaaye yeere odhaala mwilaboni yavati.

16. Mwahaya bwaddi Saddana podi wera ahubuwela wihina eere omwinkedha Yehova ninga Mulugu ahinna kopolo yowakwaneliha efunelo yaye?

¹⁶ Ethu baani emodhaya Saddana ubuweliye wihina Yehova eere werana? Podi weera oliye ubuwela wihina eere wawenya Adawu ni Eva okanna ahima, mbwenye ahimaya kiyaadhe ekala oologomana. (Ecl. 7:20; Rom. 3:23) Dhahereye ndo, Saddana eere omwinkedha Yehova ninga muthu ahinna kopolo yowakwaneliha efunelo. Mwaha wa ddi? Mwaha eyo yahapadduwe, Mulugu kaande wakwaneliha efunelo yaye, eli osaddula elabo yaatene wi ekale parayizu ni mudhaaliwemo ni athu owiwelela ni oologomana.

17. Nimakalelo baani Yehova amarihiliye muladdu okumelenle omundda wo Ideni wohiiwelela wa Saddana vamodha ni Adawu ni Eva, ki yokumelelavoya enakale eevi? (Osugwe Fotu)

¹⁷ Mbwenye Saddana kanda wubuwela ethu Yehova afuniye werana. Yehova ohuwomihedha dhithudha mwamakalelo owogowa wihina efunelo yaye yakwanele. (Sal. 92:5) Yehova ahenya wihina Adawu ni Eva ekanne anamwani. Mwaha werana eyo, Oliye uhoniha wihina kahi muliba woota. Teto Yehova ahimwegeredha muthu wihina awobole aana owiwelela a Adawu ni Eva wihina efunelo yaye yakwanele. (Gén. 3:15; 22:18) Nimakalelo yaala Yehova kinkedhiwe ninga muthu ahinna kopolo yowakwaneliha efunelo yaye. Muthu Yehova amusakuliye eere ovaha egumaye wihina awobole athu aatene velaboni yavati. Mwebaribarene Saddana aali ahinathi wubuwela wihina Yehova eere werana ethu ninga yeela. Mwaha wa ddi? Mwaha wihina nikoma na yowobola fuudhivela winlubale Yehova anniyena ni athu a velaboni yavati. (Mat. 20:28; João 3:16) Saddana kanna ekalelo ela ya odhivela, mwaha wihina oliye muliba nrima. Ki vano ethu baani enafuna opadduwa mwaha wa yowobola? Omakuthulo wa yaka txikwi wa onamathonga wa Yesu, odhuulu wowiwelela ni wologomana wa Adawu ni Eva, onere odhaala velaboni yavati ni onere osaddula elabo yavati wihina ekale parayizu. Ndala ninga Yehova apaganyiliye wihina yeere opadduwa. Enakalege ninga Yehova awogile madhu ala owi: ‘Omega.’

NNANDE AAVI OLIBIHA NROROMELO NEHU NI MPAGANYO WA YEHOVA WONIVAHA PARAYIZU?

18. Dhithu baani thaaru Yehova awogiliye dhinanithukulela orumedha mpaganyo dhaye? (Osugwe kwaduru enna musolo: “Dhithu thaaru dhinanithukulela orumedha mpaganyo dha Yehova.”)

¹⁸ Muwari mwa yohudhera ela nihoona dhithu dhowinjhiva dhinanthukulela orumedha wi elabo ela enere okala parayizu. Ki vano ethu baani nnafunihu wawaddela athu ale enanganyedha wi mpaganyo ola onere wakwanela? Ethu yoobajha, di mwinnyene Yehova aneerana mpaganyo ola. Livuru na Apocalipse nnihina: ‘Ole akiratile vampaddoni wera: Kasugwa! “Gihisaddula dhithu dhatedhene vano dhixa.”’ Yehova ohukanna thotho, kopolo ni efunelo yowakwaneliha ele apaganyiliye. Yanabiili, vamentoni va Yehova dhithu dhaatedhene apaganyiliye dhinakala ninga dhihimala wakwanela. Bumwahaya Oliye ohuwoga egi: ‘Olebe, mwaha madhu ala boororomeleya ni ebaribari. . . . Dhihakwanela!’ Yanatharu, kaavo ethu enamuhihe Yehova wakwaneliha ethu ambeliye werana. Bumwahaya Oliye ohuwoga miyo gili: ‘Alfa ni Omega.’ Omakuthulo athu aatene enere woona wihina di Saddana ahinna kopolo ni ali muliba woota, omuhiya Yehova.

19. Akala athu kinarumedha mpaganyo wa Yehova wonivaha Parayizu onere ddi?

¹⁹ Kudduwale: malabo aamatene onamwaddeliwe muthu ogaali mmalaleyelo wihina oliye podi ororomela mpaganyo dha Yehova, mwebaribarene we onna olibiha nroromelo naawo ni mpaganyo dha Yehova. Bumwahaya nlabo onafuniwe wileri mpaganyo woriya wa ejhehedhelo ninnihuna onafwanyeya va Apocalipse 21:4, vano muthuya awoga egi: ‘Eyo kinadha epadduwa,’ onere ddi? We podi omwilerela versu 5 ni 6 ni omutapulele, openddaga ni oliye omwaddelaga wihina enakala ninga Yehova ohasinari wihina anere wakwaneliha dhithu dhaatedhene. — Isa. 65:16.