Ndala ninga Peduru kuselele

1. Peduru aali aavi Yesu nuwawerana matikiniho wihina ahidde oba dhowinjhiva?

PEDURU ahivireliwa emahiyu yantero amezaga, mbwenye kandile ohidda ethu. Bumwahaya oliye ahitikina Yesu nuwoga egi: “Kadhowa vooddiha, ni kaavoke mathavi awo wihina nitote oba.” (Luc. 5:4) Peduru kaarumedha wihina eere ohidda oba. Naarive dhigali ndo, oliye aherana ele Yesu aamurumiliye. Vano nuwavokedha mathavi ale mmanjheni, obajha ohidda oba dhowinjhiva ofiyedha mathaviya wambela otaala. Nuwonelamo wihina ale yaali matikiniho, Peduru vamodha ni alobwana ale yaali nuliye “otikina vanlubale.” Peduru owoga egi: “Nabwiya, kamugaddamele mwaha miyo gili muthu oothega.” (Luc. 5:6-9) Podi wera Peduru ubuwela wihina kafwanelela omwaddamela Yesu.

2. Mwahaya bwaddi sathima ohudhera yopadduwa ya Peduru?

² Peduru awoga ebaribari, oliye aali “muthu oothega.” Teto Bibiliya anowoniha wihina oliye ahiwoga ni aherana dhithu dhaamuthukulele othwaruwa vasogolova. Enowupadduwelaga emodhave? We onoofuna owomihedha emuthu yawo, obe onoofuna ogonjhiha ethu-sithu enurusa epaddi yomuzimuni? Akala siyeyo ohudhera yopadduwa ya Peduru, podi wukavihera ohuyelela ejhehedhelo. Ni makalelo baani? Kabiha wubuwela: Ahere Yehova afuna keenye wihina dhoviriganiha dha Peduru dhilebiwe mBibiliyani, mbwenye dhoviriganiha dhaye dhihilebiwa mBibiliyani wihina dhinihudhihe. (2 Tim. 3:16, 17) Ohudhera ni yopadduwa ya mulobwana ola anna mubuwelo ninga wehu teto anna dhithu dhamurusa, enonikavihera wonelamo wi Yehova kanajheha wihina iyo nikale athu oologomana. Ethu Yehova anafuniye sowihina nahiselele teto ndidele niilibihedhaga naarive niganna dhithu dhinanirusa.

3. Mwahaya bwaddi kannahowela oselela?

³ Mwahaya bwaddi ekala ethu yathima ohuselela? Mwaha weragana ethu emodhave dila dhowinjhivadhene onolemela werana pama. Motajhiha, podi ovira mudhidhi wowinjhivene namwiba ilibihedhaga wihina anone orumiha pamadhene epano yaye, mudhidhi anilibihedhegiye wihina anone orumiha pamadhene epano ele podi wera oliye anere oviriganiha dila dhowinjhivadhene. Mbwenye oliye adidela wixagiha ni wilibihedha, mwebaribarene oliye anere wanda orumiha pamadhene epano ele. Mbwenye naarive oliye aganonne orumiha pamadhene epanoya malabo mamodha anerege oviriganiha, naarive dhigali ndo, oliye kanaselela. Oliye anere wilibihedha wihina awomihedhe pama makalelo oorumiha epano ele. Ni makalelo mamodhave naarive nigamanle ogonjhiha ethu enanikwerebeyiha epaddi yomuzimuni, podi wera malabo mamodha nnere ohogolowela oviriganiha. Naarive dhigaali ndo, nnodidela nilibihedhaga wihina nigonjhihe ethu ele enanikwerebeyiha epaddi yomuzimuni. Aatene iyo nnowoga obe nnowerana dhithu dhinanithukulela othwaruwa vasogolova, mbwenye yathimaya fuuhuselela, mwaha nahiselela Yehova anere onikavihera odhowagave niwomihedhaga emuthu yehu. (1 Ped. 5:10) Vano kabeni noone makalelo Peduru oonihiliye ovilela. Thagaraga Yesu amonihedhiye Peduru podi onikavihera odidela nimulabelaga Yehova.

MAKATHAMIHO NI MARELIHO AWAKENLE PEDURU

4. Peduru iwoona aavi, mbwenye Yesu aamukurumunse aavi? Lucas 5:5-10.

⁴ Bibiliya kanawoga mwahaya bwaddi Peduru adhe ubuwelege wihina aali “muthu oothega,” newene kanawoga yothegaya eriliyena yamuthukulela oliye wubuwela ndo. (Omwileri Lucas 5:5-10.) Mbwenye podi wera oliye aherana dhoviriganiha dhinlubale. Yesu ahoonelamo wihina Peduru owoova ni kiwonelamo okala muthu apama, mbwenye Yesu ahinona wihina Peduru eere wanda okala oororomeleya. Vano ni makalelo apama Yesu owoga ni Peduru egi: “Kuwoove.” Madhu ala yowoniha wihina Yesu oomuroromela Peduru, vano mwaha wa yeyo madhu ala yahimuthukulela Peduru osaddula egumaye, vasogolova Peduru vamodha ni ddibile Andere wahiya mabasa ale oomeza, obajha wakavihera mabasa oolaleya ninga anamahara a Yesu. Mwaha wa yeyo yahaawakela mareeliho owinjhiva a Yehova. — Marku 1:16-18.

5. Mareeliho baani Peduru awakenliye mwaha ogonjhiha woova waye ni orumedha okala namahara a Yesu?

⁵ Peduru ahikanna egumi yohagalasa ninga namahara a Yesu, oliye ahikanna gari yoomoona Yesu aavulumusaga aredda, awigaraga ademoniyu ni aavenyihaga anookwa.b (Mat. 8:14-17; Mar. 5:37, 41, 42) Peduru ahikanna yowoona aamooniliye Yesu ninga mwene oOmwene wa Mulugu, yowoona ele yahimpatha vanlubale Peduru. (Mar. 9:1-8; 2 Ped. 1:16-18) Peduru ahoona dhithu dhowinjhiva mwaha okala namahara a Yesu. Ahere ahikala namahara a Yesu Peduru kaande woona dhithu ndhe. Mwebaribarene Peduru ahihagalala vanlubale mwaha wanda ogonjhiha mubuwelo wohivaha thima ni okanna oneti wowakela mareeliho owinjhiva!

6. Nerege Peduru ahigonjhiha dhoviriganiha dhaye mowaguva? Owogemo.

⁶ Naarive agoonile ni agiwale dhithu dhowinjhiva dhapama ni Yesu, dhahikalawo dhithu dhamurusa Peduru epaddi yomuzimuni. Kasugwa dhotajhiha ndha: Yesu nuwoga wihina oohowela okwa wihina akwanelihe dhovuhulela dha mBibiliyani, Peduru omwakula Yesu wihina eyo kiyapadduwe. (Mar. 8:31-33) Teto dila dhowinjhivadhene Peduru vamodha ni anamahara amodha yookanganesa wihina enone baani aali athima vaari vewa. (Mar. 9:33, 34) Emahiyu Yesu ahinathi okwa Peduru ahikanna marulu ofiyedha ogwadda nibaru na mulobwana dhaala. (João 18:10) Teto emahiyu yele, Peduru obajha woova ofiyedha omukoodda Yesu dila tharu. (Mar. 14:66-72) Ele yahimuthukulela oliye wunla vanlubale. — Mat. 26:75.

7. Yesu nuvenyihiwa muukwani, ofuru baani anvahiliye Peduru?

⁷ Peduru ahithabwa wukuuwa, naarive dhigali ndo Yesu kaamusukumme. Nuvenyihiwa muukwani Yesu ahinvaha Peduru ofuru wihina oonihe odhivela anniyena ni Yesu. Ohiya eyo Yesu ahinvaha Peduru mutholo muxa, wihina akale namakukula owiyeviha teto aasamalelege mambila aye. (João 21:15-17) Peduru werana ele Yesu aamulobiliye.

8. Yoviriganiha baani yinlubale Peduru eriliyena agaali wAntiyokiya?

⁸ Peduru aali oJeruzale nlabo na pentekoste. Teto aali mmodha wa athu oobajha wakela muzimu wotxena. Naarive nuukala mukiristawu oothikitheliwa omuzimuni, Peduru oohowela owanana dhithu dhamurusa epaddi yoomuzimuni. Yaka ya 36 M.W., Mulugu omuruma vade va Korneliyu ahaali muJudewu, numala Korneliyu othikitheliwa ni muzimu wotxena. Vano obajha woneya pamadhene wihina “Mulugu kanna nsakulo” teto ale yahali maJudewu yere okanna ofuru wokala makiristawu. (At. 10:34, 44, 45) Voharela Peduru obajha ojha ni ale yahali maJudewu, ethu ahineregiyena egumaye yatene. (Gál. 2:12) Mbwenye makiristawu amodha yahali majudewu nivanove yubuwela wihina maJudewu kiyafwanela ojha vamodha ni ale yahali maJudewu. Vano makiristawu dhaala yaali maJudewu yanna mubuwelo yola nufiya wAntiyokiya, Peduru ohiya ojha naaddibila ale yahali maJudewu. Podi wera oliye oova wihina makiristawu ale yaali majudewu etakaleliwe nuliye. Murumiwi Pawulo wonelamo wi ndhe Peduru eeriye dhaali dhogwalagwambi, vano omusumulula vaari vaanamwinjhi. (Gál. 2:13, 14) Naarive agaviriganihe Peduru kaaselele. Oliye ahididelave wilibihedha wihina awomihedhe emuthu yaye. Ki yaamukavihere ddi?

DDINIYANI YAMUKAVIHENRE PEDURU OVILELA?

9. João 6:68, 69 anoniha aavi wihina Peduru aali muthu oororomeleya?

⁹ Peduru aali muthu oororomeleya. Oliye keenyile wihina muthu obe ethu-sithu emuhihe omuhara Yesu. Motajhiha dila modha Peduru ahoniha ororomeleya waye Yesu nuwoga ethu anamahara aye yahandiliwa wonelamo mudhidhi yoole. (Omwileri João 6:68, 69.) Mbwenye athu owinjhiva yamuhara Yesu yahihiya omuhara mudhidhi yole, newene kayajhehile wihina Yesu atapulele pamadhene muselu yole. Mbwenye Peduru kaahiile omuhara Yesu, ohiya eyo oliye owoga wihina Yesu baahi dinna “muthenga dha egumi yohimala.”

10. Yesu onihile aavi wihina oomuroromela Peduru? (Osugwe fotu.)

¹⁰ Yesu kaamusukumme Peduru. Emahiyu yogomihedha ya Yesu velaboni yavati Yesu ahinona wihina Peduru vamodha ni anamahara amodha yere omuthawa. Mbwenye naarive dhigali ndo, Yesu owoga ni Peduru wihina ahinona wi oliye eere okala oororomeleya. (Luc. 22:31, 32) Bumwahaya Yesu kaamusukumme murumiwi aye amudhiveliye, Peduru. Naarive oliye agamukoddile dila tharu, Yesu ahinona wi “muzimu onofuna, mbwenye mwiili oli wokwerebeyene.” (Mar. 14:38). Vano Yesu numala ovenyihiwa Bibiliya anowoniha wihina Yesu ahimuthwanyuwela Peduru agaali yeka. (Mar. 16:7; Luc. 24:34; 1 Cor. 15:5) Eyo yahimulibiha vanlubale Peduru aali owukuwene, ubuwelaga dhithu eriliyena!

11. Nimakalelo baani Yesu amukavihenriye Peduru woonelamo wihina Yehova eere omusamalela?

¹¹ Yesu omuroromeliha Peduru wihina Yehova eere omusamalela. Numala ovenyihiwa Yesu wawerana matikiniho dila yanabili wihina Peduru vamodha ni anamahara amodha ehidde oba dhowinjhiva. (João 21:4-6) Matikiniho ale yahimukavihera Peduru wonelamo wihina Yehova eere wanda omusamalela epaddi yomwilini. Podi wera Peduru ahawubuwela madhu a Yesu aawogiliye wihina Yehova anere wasamalela ale “enapweha mburo wobajha Omwene wa Mulugu.” (Mat. 6:33) Dhatedhene ndhe dhahimukavihera Peduru opweha mabasa oolaleya mburo wobajha mwigumini mwaaye, ohiya wasogoliha mabasa aye oomeza. Oliye ahoniha oliba murima ni ahilaleya nlabo na pentekoste yaka ya 33 M.W., aakaviheraga matxikwi ni matxikwi aathu orumedha muthenga dhapama. (At. 2:14, 37-41) Nuuvira mudhidhi Peduru ahakavihera aSamaritanu ni athu amodha yahali maJudewu wihina ekale anamahara a Yesu. (At. 8:14-17; 10:44-48) Mohanganyedha Yehova ahimulabihedha murumiwi Peduru mwamakalelo ootikiniha wihina aakavihere athu ohiyanahiyana omunona Mulugu.

NNAHUDHERA DDI NI PEDURU?

12. Yoviriganiha ya Peduru enanikavihera aavi akala nnowanana dhoviriganiha dhehu muwari mwa yakadhene?

¹² Yehova podi onikavihera ovilela. Ebaribari wihina kahiyo ethu yokweya odidelave omulabela Yehova, thabwathabwa naviriganihaga. Malabo mamodha, dhoviriganiha dhehu podi okala dhinlubale opitha dhoviriganiha dha Peduru. Mbwenye Yehova podi onivaha kopolo wihina nahiselele. (Sal. 94:17-19) Motajhiha, kasugwa yopadduwa ya ddibila dhaala aanna mweddelo wabure wogonihana alobwanave muwari mwa yakadhene, mbwenye oliye osaddula egumi yaye ni obajha ohara ndhe Bibiliya anahudhihiye. Naarive dhigaali ndo, malabo mamodha oliye anohowela owanana munigwa dhabure. Enamukavihera ovilela ddi? Oliye anowoga egi: “Yehova anogilibiha. Nnikavihero na muzimu wotxena, gihudhera wi enowandeya odidela weedda dila yeebaribari. Naarive ngaali muthu ohulogomana Yehova anna ogilabihedhave ni anogilibiha.”

13. Nnaatajhihe aavi yopadduwa ya Peduru enafwanyeya va Atos 4:13, 29, 31? (Osugwe fotu.)

¹³ Ninga nonilihu, Peduru ahiviriganiha dila dhowinjhivadhene mwaha wawoova athu. Mbwenye oliye oolobela alobaga kopolo, ni ahanda okala ooliba murima. (Omwileri Atos 4:13, 29, 31.) Ni iyoya podi ogonjhiha woova wehu. Kasugwa epadduwile ni Horst, muzombwe dhaala akala elabo yowAlemanya. Mudhidhi wa koddo yanabiili, oliye owaddihediwa owaga “Heil Hitler!” mwaha wa yeyo oliye ahifiyedha owoga “Heil Hitler!” Vano Horst nuwawaddela makolo aye aliwa kiyatakaleliwe, ohiya eyo, aliwa olobela ni oliye elobaga wihina Yehova anvahe oliba murima. Nnikavihero na makolo aye ni amuroromelaga Yehova, Horst ahanda okanna kopolo wihina ande okala txithi. Nuuvira mudhidhi Horst owoga egihina: “Yehova kanagisukumege.”c

14. Anamakukula oodhivela enaakavihere aavi ale ekwerebeyile?

¹⁴ Yehova ni Yesu kidha enisukumaga. Peduru numukoodda Yesu ohowela werana yothoma yathima. Oliye eere ohiya okala namahara a Yesu obe eere odidela avilelaga? Yesu ahimpigireyela Yehova amulobaga wihina nroromelo na Peduru nnaridhe. Teto Yesu ahimwaddela Peduru wihina ahimulobelela. Yesu woniha wi oororomela wi Peduru eere wanda walibiha addibile. (Luc. 22:31, 32) Podi wera Peduru akala oolibeene ubuwelaga ndhe Yesu aawogiliye! Ni makalelo mamodhave, naafunaga werana yothoma yathima mwigumini mwehu, Yehova podi onikavihera odidela okala oororomeleya. Oliye podi werana eyo aalabihedhaga anamakukula oodhivela. (Efé. 4:8, 11) Ddibila dhaala anithaniwa Paul analaba ninga namaholela mulogo muwari mwa yakadhene, anowoga wihina akala ddibila anowubuwela oselela omulabela Yehova oliye anomulibiha, wodhela omukavihera muthuya wubuwela ethu emuthukulele Yehova omwithanela mwibaribarini. Amala oliye anomubusedha wihina mwaha wa odhivela waye wohimala, Yehova kanadha amusukuma oliye. Paul anowogave egi: “Miyo ginowawoona addibila owinjhiva yakwerebeyihe yandaga ovilela nnikavihero na Yehova.”

15. Yopadduwa ya Peduru ni ya Horst enoniha aavi wihina iyo podi waroromela madhu enafwanyeya va Matewuji 6:33?

¹⁵ Ndala ninga Yehova amusamaleliye Peduru vamodha ni anamahara amodha epaddi yomwilini, Yehova aneere onisamalela naapwehaga Omwene waye mburo wobajha mwigumini mwehu. (Mat. 6:33) Horst asorihiwe mundduli, obajha wubuwela wavolowela mabasa oopiyonero koddo yanabiili nuuvira. Mbwenye oliye ahithabwa ohawa, bumwahaya oliye ubuwela wihina kaande okala piyonero mudhidhi mmodhave isamalelaga. Ethu baani oliye eeriliyena? Oliye othoma ohiya dhatedhene mmadani mwa Yehova wihina oone akala mwebaribareene Yehova eere omusamalela. Vano sumana yavayeka, nameeddela mulogo nuufiya mulogo waye, Horst othoma okavihera sumana yatene mmabasani oolaleya. Omagomihedho wa sumana ele oliye ahitikina vanlubale nameeddela mulogo nunvahedha envelopi mwaali korowa, mbwenye muthuya anvahile korowaya kaalebilevo ndina naye. Mu envelopini mune mwahikala korowa dhaamukavihere Horst wisamalela muwari mwa mweridhene wula alabaga ninga piyonero. Horst oonile envelopi ele ninga nvaho wa Yehova watonyihedha wi Yehova eere omusamalela. Mwaha wa yeyo oliye othoma opweha Omwene wa Mulugu mburo wobajha mwigumini mwaaye.— Mal. 3:10.

16. Mwahaya bwaddi ekala yapama ohudhera wodhela yopadduwa ya Peduru ni ndhe oliye alebiliye mmakartani mwaaye?

¹⁶ Peduru ahihagalala vanlubale mwaha Yesu ohimusukuma ninga oliye aalobiliye dila modha! Yesu ahididela omuxagiha Peduru wihina akale murumiwi oororomeleya ni wihina akale yotajhiha yapama ya makiristawu. Makalelo Peduru aaxagihiwiye podi onihudhiha dhithu dhathima. Mwinnyene Peduru ohuleba wodhela dhithu ahudheriye mmakartani mwaaye menddi aalebenliye makiristawu a nsaka noobajha. Makarta ayo enokosa epaddi ya Bibiliya peeno. Ohudhera winaharela nnere woona dholaga dhinafwanyeya mmakartani mmo ni makalelo nnafunihu oparihedha mabasa peeno.