Onere wanda wakwanihedha dholuba dhawo dhomuzimuni

1. Makathamiho baani enafwanya athu owinjhiva?

ONOKANNAGA yoluba yomuzimuni yurusile wakwanihedha?b Onone wihina kuli wekawo. Motajhiha, Filipi wonelamo wi ohowela olobela dila dhowinjhivadhene ni owomihedha makalelo aye oolobela, mbwenye yomurusa ofwanya mudhidhi wihina alobele wa Yehova. Vano Erika yoluba yaye yaali ofiya mambeseene omutugumanoni wa mmalaleyelo, mbwenye malabo amatene afiyesa vosavene. Tomaji ahikanna yoluba yomwileri Bibiliya aamutene, mbwenye oliye onowoga egi: “Miyo kagadhiveliwa omwileri Bibiliya. Miyo gihixixa dila tharu, mbwenye gafiya livuru na Levitico miyo ohiya omwileri.”

2. Mwahaya bwaddi kannahowela wukuuwa akala kannakwanihedhe yoluba yehu?

² Akala we onna wilibihedha wihina wakwanihedhe yoluba mbwenye kunaakwanihedhe, kuwukuwe wubuwelaga wihina kunande. Wakwanihedha yoluba naarive egaali eng’ono enohoweleya mudhidhi ni wilibihedha. Teto, woona wi onna wilibihedha eyo enowoniha wi onovaha thima wandana wawo ni Yehova ni onofuna omulabela nuviheya. Kudduwale wi Yehova onovaha thima wilibihedha wawo. Ebaribari wihina Yehova kanajheha wihina nerana ndhe nahinandihu. (Sal. 103:14; Miq. 6:8) Bumwahaya waasakulaga yoluba yawo, ekale yowedheya ni okanne ebaribari wi onere wakwanihedha. Mbwenye wamala osakula yolubaya onere ddi wihina wakwanihedhe? Kabeni noone dhithu dhinanikavihere.

SATHIMA OKANNA EFUNELO YOWAKWANIHEDHA YOLUBA YAWO

3. Mwahaya bwaddi sofuneya okanna efunelo yowakwanihedha dholuba dhawo?

³ Neegi nakwanihe dholuba dhehu dhomuzimuni, nnohowela okanna efunelo yoowakwaniha yolubaya. Efunelo ethu enanithukulela iyo wilibihedha wakwanihedha yoluba yehu. Iyo podi oladdaniha efunelo nnipevo nnamuthunya baruku a vela ofiya mburo winadhowiye. Nipevo nne nahimaala omuthunya barkuya, aneere ofiya winadhowiye. Teto nipevona nakanna kopolo barkuya anere ofiya mowaguva. Nimakalelo mamodhave, nakanna efunelo yinlubale yowakwanihedha mutholo dhehu, nnere wakwanihedha mohilegela. Ddibila dhaala anithaniwa Davidi anakala elabo ya EL Salvador anihina: “We wakanna efunelo yinlubale onowilibihedha, ohuhiya ethu-sithu wuhiha wakwanihedha yoluba yawo.” Onere ddi wihina okanne efunelo yinlubale yowakwanihedha dholuba dhawo?

4. Ethu baani nnahowelihu oloba naalobelaga? (Filipenses 2:13) (Osugwe fotu.)

⁴ Olobele olobaga efunelo yowakwanihedha yoluba yawo. Yehova podi olabihedha muzimu waye wotxena wihina wukavihere wakwanihedha yoluba yawo. (Omwileri Filipenses 2:13.) Malabo mamodha iyo podi okanna dholuba mwaha onona wi siyeyo nnahowelihu werana. Teto kahi yabure wubuwela ndo, mbwenye malabo mamodha podi wera kannakanna efunelo yowakwanihedha dholuba dhehu. Siyeyo yapadduwile ni murogola dhaala anakala elabo yo Uganda anithaniwa Norina. Yoluba yaye yali okanna namahudhera, mbwenye kanna efunelo wihina akwanihedhe yoluba yaye mwaha oliye iwoona wihina kahi namahudhiha apama. Mbwenye oliye erile ddi? Oliye onowoga egi: “Miyo wambela olobela wa Yehova malabo amatene gilobaga wi gikanne efunelo yowahudhiha athu Bibiliya. Gaherana epaddaaga wodhela wilibihedha wihina giwomihedhe makalelo aaga ohudhiha. Nuuvira mweri, miyo woona wi gahikanna efunelo yowahudhiha athu Bibiliya. Yaka yele miyo okanna anamahudhera abiili.”

5. Neegi nenjhedhedhe efunelo yehu nnahowela nipenddege ddi?

⁵ Openddege dhithu Yehova uwereliye. (Sal. 143:5) Murumiwi Pawulo oopendda wodhela opama wohufwanelela Yehova amonihiliye. Eyo yomuthukulela murumiwi Pawulo omulabela Yehova nuviheya. (1 Cor. 15:9, 10; 1 Tim. 1:12-14) Nimakalelo mamodhave wapenddaga wodhela dhithu Yehova anuwereliye, onere okanna efunelo yowakwanihedha dholuba dhawo. (Sal. 116:12) Kasugwa ethu emukavihere murogola dhaala wakwanihedha yoluba yokala piyonera regulare. Oliye anihina: “Goopenddesa wodhela makalelo Yehova anagidhiveliye. Oliye ohugikavihera ofwanya nlogo naaye. Oliye onogisamalela ni onogibarela. Opendda dhithu ndha wihigikavihera wenjhedhedha odhivela waaga nuliye ni okanna efunelo yokala piyonera.”

6. Ethu emodha enaanikavihere wenjhedhedha efunelo yehu ddi?

⁶ Wawubuwelege mareeliho onawakeliwe mwaha wakwanihedha yoluba yawo. Wubuwele ethu yamukavihere Erika asorihiwe mundduli wakwanihedha yoluba yaye yofiya mambeseene omutugumanoni wa mmalaleyelo. Oliye anihina: “Miyo wonelamo wihina gafiyaga vosavene goyelela dhithu dhowinjhiva. Mbwenye gafiya mambeseene gowanda walojhela addibila ni ojha mudhidhi ni aliwa. Miyo gowanda opurelamo mutugumano dha mmalaleyelo.” Erika athabwa wawubuwela mareeliho awakeliye mwaha ofiya omutugumanoni mambeseene. Mwaha wa yeyo ahanda wakwaneliha yoluba yaye. Onowabiha wawubuwela mareeliho onawakeliwe mwaha wakwaneliha yoluba yawo? Motajhiha, akala yoluba yawo enovolowelavo omwileri Bibiliya obe olobela, wubuwelege makalelo olobela ni omwileri Bibiliya winalibihiiwa wandana wawo ni Yehova. (Sal. 145:18, 19) Akala yoluba yawo fukanna dhikalelo dhomuzimuni, wubuwele makalelo winukaviheriwa okanna wandana wapama ni athu amodha. (Col. 3:14) Ononamo aavi olebela vapapelini mareeliho onawakeliwe mwaha wakwanihedha dholuba dhawo? Wavira mudhidhi osugwege listana. Tomaji asorihiwe mundduli, anihina: “Gakanna efunelo yowakwanihedha dholuba dhaaga kinakweya oselela wakwanihedha yolubaya.”

7. Ethu baani emukavihere Juliyu ni mwariye wakwanihedha dholuba dhewa?

⁷ Ojhege mudhidhi naathu enuukavihere wakwanihedha dholuba dhawo. (Pro. 13:20) Kasugwa emukavihere Juliyu ni mwariye okanna efunelo yowawenjhedhedha mabasa olaleya. Oliye onowoga egi: “Iyo nihisayela wandana naathu nnathapanyihuna wodhela dholuba dhehu ni enanikavihera. Teto owinjhiva wa aliwa yahikanna dholuba dhimodhave ninnihuna ni yahanda wakwanihedha. Ohiya eyo, aliwa enosayela onona makalelo dhineedda dholuba dhehu ni enonikongomedha ohiselela.”

NAYELELA EFUNELO YOWAKWANIHA DHOLUBA DHEHU

8. Enaapadduwe ddi najhehaga okanna efunelo wihina nakwanihedhe dholuba dhehu? (Osugwe fotu.)

⁸ Owoga ebaribari, nnokanna labo nihinakannihu efunelo yowerana ethu-sithu. Ki vano, eyo enatapulela wihina nihiye efunelo eyo enihihe wakwanihedha dholuba dhehu? Naari, kabeni nimuubuwele baruku ole avela. Nipevo thinamuthukulela baruku ole odhowa mburo onafuniye, mbwenye malabo mamodha nipevo nne podi ohikanna kopolo obe ohikalawowene nipevo. Vano nerege baruku ole onohowela okala owimelene? Naari, Oliye podi odhowagave vasogolo. Motajhiha, abarku amodha ehikanna motori obe ng’ombo dhinalabihedhiwa wihina baruku eeddege. Nimakalelo yala efunelo yehu yowakwanihedha yoluba podi oliganihiwa nnipevo. Mwaha malabo mamodha iyo podi okanna efunelo malabo mamodha naari. Akala onajheha okanna efunelo yowakwanihedha yoluba yawo, podi weera kunadha wandaga wakwanihedha. Ndala niga baruku onandiye ofiya mburo onadhowiye, alabihedhaga motori obe ng’ombo, nihiyoya podi wakwanihedha dholuba dhehu naarive nahinna efunelo. Ebaribari wi werana eyo kahiyo ethu yokweya, mbwenye sinahoweleya. Kabeni nawone makoho athu amodha eniikohesiwa, namala nnere woona dhithu nnahowelihu werana.

9. Yeere okala yapama wilibihedha wihina naakwanihedha dholuba dhehu nihinna efunelo?

⁹ Yehova kanafuna wihina neregena dhithu mwaha owaddihedhiwa, mbwenye anafuna wihina neregena ni murima wehu waatene. (Sal. 100:2; 2 Cor. 9:7) Akala kunna efunelo yowakwanihedha yoluba yawo, yere owomela wiiwaddihedha wihina wakwanihedhe? Kasugwa yotajhiha ya murumiwi Pawulo, oliye ohuwoga egi: ‘Ginosumulula mwiili waaga ni ginoweddiha ninga mudhaari.’ (1 Cor. 9:25-27, ni osugwe nota nohudherana na versu 27) Pawulo owiwaddihedha werana ele eli yapama naarive ahinna efunelo yowerana. Ki Yehova oonamo aavi? Yehova ahihagalala vanlubale wodhela ndhe erana Pawulo ni ahimureeliha mwaha wilibihedha waye. — 2 Tim. 4:7, 8.

10. Mwahaya bwaddi sapama wilibihedha wihina nakwanihedhe yoluba yehu naarive nahinna efunelo?

¹⁰ Yehova onohagalala anonaga nilibihedhaga wihina naakwanihedha dholuba dhehu naarive nihinna efunelo. Enamuthukulela ohagalala sowihina, oliye ohunona wihina kannerana wihina nakwanihe baahi mutholoya, mbwenye mwaha nnomudhivela oliye. Ndala ninga Yehova amurelihiye Pawulo, Yehova aneere onreeliha mwaha wilibihedha wehu. (Sal. 126:5) Noonaga wihina Yehova ononireeliha eyo enonithukulela iyo wilibihedha. Murogola dhaala anakala okoloniya anithaniwa Lucyna, anihina: “Malabo mamodha kaginakanna kopolo yodhowa mmalaleyelo, thabwathabwa gakala oogomeene. Mbwenye ohagalala ginakannimina gahogolowelaga vaade, nvaho wathima onadhela wa Yehova.” Vano kabeni noone ethu baani nnahowelihu werana nahikanna efunelo yowakwanihedha dholuba dhehu.

11. Nnahowela neere ddi neegi nikale athu owihiha?

¹¹ Olobela olobaga wi onone wihiha. Wihiha ekalelo enamuthukulela muthu osugwera dhowera dhaye ni mubuwelo waye. Dila dhowinjhivadhene enatapulela wiisugwera wihina waherena ethu yabure. Mbwenye nnohowela wiisugwera wihina nikanne efunelo yowerana dhithu dhapama. Thabwathabwa yakala ethu yorusa obe nahinadhiveliwihu werana. Kuddiwale wihina yowima yomuzimuni. Bumwahaya olobele wa Yehova olobaga muzimu wotxena wihina wukavihere okanna ekalelo ela yathima. (Luc. 11:13; Gál. 5:22, 23) Davidi asorihiwe mundduli kaanda werana ohudhera waye wavayeka sumana dhatedhene. Oliye onowoga makalelo malobelo emukaviheriwa egi: “Miyo goolobelesa wa Yehova gimulobaga wihina agikavihere okala muthu owihiha, nnikavihero naaye gahanda ompandda porogarama ni omuhara pamadhene.”

12. Eclesiastes 11:4, ananikavihera aavi wakwanihedha dholuba dhehu?

¹² Kujhehege baahi mudhidhi wofwanelela. Mwilaboni muna nnakalihu kanijhehedhege wihina dhatedhene dhinerege oneeddela pama. Nakalaga ojhehave baahi mudhidhi wofwanelela, kannande wakwanihedha dholuba dhehu. (Omwileri Eclesiastes 11:4.) Ddibila dhaala anithaniwa Daniyeli ohuwoga egi: “Kawiwo mudhidhi wofwanelela, mbwenye nabajha werana ndhe nnafunihu nnere woona mudhidhiya.” Ddibila dhaala anakala elabo yo Uganda anithaniwa Pawulo ohuwoga egi: “Kahi yapama okala muthu oyere. Nabajha werana ethu-sithu naarive yahili yokweya, nnavaha Yehova ofuru wihina areelihe wilibihedha wehu.” — Mal. 3:10.

13. Mwahaya bwaddi sapama wakwanihedha yoluba yawo vang’ono vang’ono?

¹³ Obajhe vang’ono vang’ono. Podi wera kunakanna efunelo mwaha onona wi yoluba yawo soorusa wakwanihedha. Akala dhili ndo, ononamo aavi wakwanihedhaga vang’ono vang’ono? Akala onofuna okanna ekalelo ya omuzimuni ononamo aavi wooniha weragana ethu-sithu? Obe akala yoluba yawo fumwileri Bibiliya aatene ononamo aavi kadda labo omwilerigi mutala vang’onove? Tomaji, asorihiwe mundduli kaanda wakwanihedha yoluba yaye yomwileri Bibiliya aatene muwari mwa yaka modha. Oliye anihina: “Miyo wonelamo wihina gera othabwa wileri dhithu dhowinjhiva. Mbwenye miyo othoma ohogolowela omwileri Bibliya. Kadda labo giileri versu vang’ono gipenddaga. Eyo yahigithukulela odhiveliwa omwileri Bibiliya.” Mwaha omwilerigi Bibiliya vang’ono vang’ono oliye obajha odhiveliwa wileri ni omwileri Bibiliya aatene.c

NAARIVE OFWANYIWAGA MAKATHAMIHO KUSELELE

14. Makathamiho baani yaanifwanye?

¹⁴ Yowukulihaya sowihina naarive niganna efunelo obe nimuharihedhaga pamadhene porogarama ehu, iyo podi ofwanyiwa makathamiho yanthukulele ohakwanihedha dholuba dhehu. Motajhiha, podi opadduwa ethu ‘yorulumusa’ enanthukulele ohakwanihedha yoluba yehu. (Ecl. 9:11) Obe podi okumelela makathamiho enanukuula obe enanthukulela okala ookwerebeyene. (Pro. 24:10) Teto mwaha okala athu ohulogomana iyo podi oviriganiha ofiyedha ohakwaneliha dholuba dhehu. (Rom. 7:23) Obe iyo podi okala oogomeene. (Mat. 26:43) Enaanikavihere ddi wagonjhiha makathamiho ni okanna efunelo labo nihinakannihuna kopolo?

15. Mwahaya bwaddi kuhiye makathamiho wukwerebeyiha? Owogamo. (Salmos 145:14)

¹⁵ Ofwanyiwa makathamiho kawuthukulele ohakwanihedha yoluba yawo. Bibiliya anowoga wihina naarive nifwanyiwaga makathamiho iyo podi okanna kopolo dhowerana ndhe nnafunihu thabwathabwa nnikavihero na Yehova. (Omwileri Salmos 145:14.) Filipi asorihiwe mundduli anowoga egi: “Gegi goone akala dhithudha dhinna ogeddela pama miyo kaginathabwa osugwa dila ngasi dhithudha dhihigeddenliwa pama. Mbwenye ginathabwa wubuwela dila gandilimi wakwanihedha.” Davidi, anowoga egi: “Miyo kaginawoona makathamiho ni malabo orusa ninga ethu enagikwerebeyiha, mbwenye ninga gari ginnimina wihina goonihe odhivela ginnimina ni Yehova.” Nahiselela wakwanihedha dholuba dhehu naarive nifwanyiwaga makathamiho nnomoniha Yehova wihina nnofuna omuhagalasa. Teto Yehova anohagalala uwoonaga wilibihedhaga wihina wakwanihedhe yoluba yawo.

16. Makathamiho podi onihudhiha ddi?

¹⁶ Ohudhere ni makathamiho. We podi wikoha wegi: ‘Mwahaya bwaddi makathamiho ala edhe egifwanyege?’ ‘Ethu baani ginahowelimi werana wihina ehigihogolowele?’ (Pro. 27:12) Malabo mamodha, makathamiho podi ononiha wihina yoluba nerilihuna kannande wakwanihedha. Akala siyeyo enupadduwela kabiha wubuwela yoluba yawo wihina woone akala onere wanda wakwanihedha.d Yehova kanahiye wuvaha thima mwaha ohanda wakwanihedha yoluba othomiliwe ohubuwenle pama. — 2 Cor. 8:12.

17. Mwahaya bwaddi sapama wubuwela dhithu wandiliwe wakwanihedha?

¹⁷ Wubuwelege dhithu wandiliwe wakwanihedha. Bibiliya anihina: ‘Mulugu dororomeleya, bumwahaya kadha aaddiwala mabasa enyu.’ (Heb. 6:10) Bumwahaya kuddiwale, wubuwelege dhatedhene wandiliwe wakwanihedha ninga wandana wawo ni Yehova, owoga naathu amodha wodhela oliye ni obaddiziwa. Ndala ninga wandiliwe wakwanihedha dholuba weriliwena kale, onere wanda wakwanihedha dholuba onniwena. — Fil. 3:16.

18. Ethu baani nnahowelihu werana wihina nande wakwanihedha dholuba dhehu? (Osugwe fotu.)

¹⁸ Ndala ninga muthu aneedda ni baruku anahagalaliye mwaha ofiya mburo winayiye. Nnikavihero na Yehova onere wanda wakwanihedha dholuba dhawo. (2 Cor. 4:7) Wahiselela wakwanihedha dholuba dhawo dhomuzimuni onere wajhavo mareeliho owinjhiva.— Gál. 6:9.