Makoho aanamileri
Nuumuleba Salmos 61:8, nerege Davidi eere othabwiha obe awoga ebaribari nuwoga wihina eere okala oororomeleya wa Yehova ni “mukalakala”?
Naari. Mbwenye dhithu Davidi alebiliye dhowooneleyamo.
Kasugwa dhithu oliye alebiliye vala ni versu dhimodha: ‘Ginere wibela ndina nenyu ni mukalakala gakwanihedhaga dhothoma dhaaga kadda labo.’ ‘Miyo ginowuthithimihani ni murimaga wamuteene Yehova Mulugwaga, ginere othithimiha ndina ninyu nimukalakala.’ ‘Ginere wibela ndina nenyu malabo amatene.’ — Sal. 61:8; 86:12; 145:1,2.
Davidi kere othabwiha, mwaha oliye ahinona wihina nlabo nimodha eere okwa. Oliye ahinona wihina athu aatene enookwa mwaha othega, teto oliye ahirumedha wihina namathega. (Gén. 3:3, 17-19; Sal. 51:4, 5) Oliye ahinona wihina alobwana Mulugu aarumedhiye ninga Abarawu, Izaki ni Jako ehikwa. Teto Davidi ahinona wihina labo nimodha eere okwa. (Sal. 37:25; 39:4) Mbwenye madhu oliye alebiliye va Salmos 61:8 enowoniha oviheya ni efunelo anna Davidi yomuthithimiha Yehova ni mukalakala, obe mwigumini mwaaye yaatene. — 2Sam. 7:12.
Dhithu dhimodha Davidi alebiliye, dhinowoga wodhela dhopadduwa dha mwigumini mwaaye, ninga motajhiha musolo onafwanyeya va Salmos 18, 51 ni 52. Va Salmos 23 Davidi anomuwoga Yehova ninga namakukula anasamalela, ni anabarela mambila aye. Ni Davidi ya aali namakukula. Teto oliye afuna amulabele Yehova ‘egumi yaye yaatene.’ — Sal. 23:6.
Sapama ohidduwala wihina dhatedhene Davidi alebiliye avetheliwe ni Yehova. Mwa dhatedhene oliye alebiliye, dhihikalamo dhovuhulela wodhela dhinaapadduwe osogolo. Motajhiha, Salmo 110, Davidi omoona Nabwiya ‘agakaratile mono woojha wa Mulugu’ odhulu aakelaga kopolo. Kopolo wihina erena ddi? Wihina aagonjhihe amwiddani a Mulugu ‘ni wihina atorihe athu aatene’ a velaboni ya vati. Davidi aali a nihimo na Mesiya, aathonge odhulu ni aakale ‘namakutha ni mukalakala.’ (Sal. 110:1-6) Yesu owoga wihina yovuhulela enafwanyeya va Salmos 110 agiwana oliye ni yere wakwanela osogolo. — Mat. 22:41-45.
Yehova onvethela Davidi wihina alebe dhithu dhalabihedhiwe mudhidhi yole ni osogolo. Teto avenyihiwa anere okanna gari yomuthithimiha Yehova ni mukalakala. Ni makalelo yala, Salmos 37:10, 11, 29, anonikavihera woonelamo wihina malabo amwaana Ezarayeli aliwa yahikanna murenddele teto anowoniha dhithu dhinereye osogolo Mulugu akwanihedha mpaganyo ola. —Osugwe ddima 8 va musolo onawoga ‘We onodha okale ni miyo mParayizu’ va namasugwera yola.
Madhu a va Salmos 61:8 ni versu dhimodha dhinowoniha wihina Davidi afuna amuthithimihe Yehova egumi yaye yaatene, teto madhu yaala enowoniha ni makalelo okweya ethu Davidi anafuniye werana avenyihiwa mukwani.