‘Onodha okale ni miyo mparayizu’

1. Mudhidhi Yesu ahinakwe, ethu baani aampaganyiliye mpanga ole ali mmambalo mwaaye? (Lucas 23:39-43)

YESU vamodha ni apanga yali mmambalo mwaaye, yahisegedheya vanlubale ehalaga mudhidhi vang’ono wihina ekwe. (Luc. 23:32, 33) Alobwana ala yahinakwe yahimunyemula Yesu, eyo enowoniha wihina kiyaali anamahara a Yesu. (Mat. 27:44; Mar. 15:32) Mbwenye mmodha wa aliwa osaddula mubuwelo. Oliye ofiyedha owoga ni Yesu egihina: ‘Yesu, onagidduwale wavolowa mumweneni mwawo.’ Vano Yesu omwakula: ‘Mweebaribarene, ginowuwaddela peeno, We onodha okale ni miyo mparayizu.’ (Omwileri Lucas 23:39-43.) Kavo ethu enoniha wi mpanga ole ahirumedha muthenga wowihina ‘Omwene wa Mulugu ohaddamela.’ Teto, kawo epaddi enoniha wihina mulobwana ole ahirumedha muthenga alaleya Yesu agaali mwilaboni ya vati. (Mat. 4:17) Mwebaribarene Yesu amwagana parayizu anaakale mwilaboni yela ya vati. Nnonne addi?

2. Ethu baani enoniha wihina mulobwana ole athwaruwe aali mu Judewu?

² Mpanga ole athwaruwe, podi wera aali mu Judewu. Oliye owoga ni mpanga mukwaye egi: ‘We kunamova Mulugu, vano nnakelihu otorihiwa wimodhave?’ (Luc. 23:40) AJudewu yamulabela Mulugu mmodha baahi, mbwenye athu amalogo yowarumedha amulugu owinjhiva. (Êxo. 20:2, 3; 1Cor. 8:5,6) Mulobwana ole ahere ahikala mu Judewu, podi wera eere owoga egihina, ‘We kunawova amulugu?’ Ethu emodha enoniha wihina mulobwana ole aali mu Judewu sowihina Yesu karumiwe vaari va athu a malogo, mbwenye wa ‘mambila erimele aamwaana Ezarayeli.’ (Mat. 15:24) Ninga mu Judewu mulobwana ole ahinona wihina Yehova ahapaganya amwaana Ezarayeli wihina anere wavenyiha anookwa. Teto, madhu awogiliye ni Yesu enowoniha wihina oliye ahinona wi Yehova eere onvenyiha Yesu wi athongege mumweneni wodhulu, ninga enonihiwa podi wera mulobwana ole ahikanna ebaribari wi eere ovenyihiwa.

3. Ethu baani mulobwana ole ubuweliye Yesu nuwoga wodhela parayizu? Owogemo. (Génesis 2:15)

³ Mwaha wokala mu Judewu mpanga ole ahinona yopadduwa ya Adawu ni Eva vamodha ni parayizu Yehova ampaddusiliye. Vano nuwawiwa madhu a Yesu, podi wera mulobwana ole omubuwela parayizu owoma mwilaboni yela ya vati. — Omwileri Génesis 2:15.

4. Madhu Yesu aawogiliye ni mpanga ole enanikavihera wubuwelaga ddi?

⁴ Madhu awonge Yesu ni mpanga ole, enithukulele wubuwela makalelo anakale parayizu. Ethu enaanikavihere wubuwela makalelo anakale parayizu, fupendda wodhela Omwene wa Salomawu. Mwahaya bwaddi? Mwaha wi Bibiliya onowoga wihina Yesu munlubale ohumukwaranya Salomawu. Bumwahaya iyo podi ojheha wihina mwene ehu Yesu vamodha ni a 144 000 enere werana ethu yootikiniha mparayizu mwilaboni yela ya vati. (Mat. 12:42) Ebaribari wihina ‘mambila mamodha’ enna ejhehedho yokala ni mukalakala elabo yela ya vati, enohowela onona dhithu baani enahoweliwa wera yegi ekale mparayizu.— João 10:16.

EGUMI MPARAYIZU ENAAKALE AAVI?

5. Onoona wihina egumi mparayizu enaakale aavi?

⁵ Onoonamo aavi wodhela egumi mparayizu? Podi wera onowubuwela mburo woriya ninga mundda wo Ideni. (Gén. 2:7-9) Podi wera onowawubuwela madhu a Mikeya awogiliye egihina ‘kadda muthu anerege okarati vati va nfigera ni va nvidera waye.’ (Miq. 4:3,4) Teto, podi wera onowubuwela versu dhimodha dha mBibiliyani dhinawoga wihina dhinere okalawo dhoojha dhowinjhiva. (Sal. 72:16; Isa. 65:21,22) Bumwahaya, podi wera onowubuwela ogakiratile va meza dhigadhanlevo dhoojha dhowinjhiva. Enakala ninga onowoona onukwela wa folori ni wa muthanko. Teto wiwaga oteya wamudhawo ni wakwaawo — vamodha naale evenyihiwe muukwani — mwaredhaga ni muthapanyaga. Yapamaya sowihina eyo, kahi yoroha. Mohanganyedha, dhatedhene dhendha dhinere wakwanela mwilaboni ya vati. Teto, mparayizu olaba enakale ethu yapama ni yooriya.

6. Ethu baani nnahowelihu werana mparayizu? (Osugwe fotu.)

⁶ Yehova anipaddusile ni ekalelo yodhiveliwa olaba ni ohagalala ni mabasihu. (Ecl. 2:24) Muwari mwa Onamathonga wa Yaka Txikwi aatene yaale enaavuluwe muhoseyani winlubale, matxikwi ni matxikwi aathu enaavenyihiwe muukwani enere ohowela guwo, dhoojha ni mburo wihina ekalegewo. Eyo enatapulela wihina nnere okanna mabasa owinjhiva, teto mabasa yayo enerege onihagalasa vanlubale! Yehova ahiwoga ni Adawu ni Eva wihina emusamalele ni elime mundda waatene wo Ideni. Ni makalelo mamodhave, iyo nnere okanna ofuru winlubale wa osaddula elabo yatene wihina ekale parayizu. Kabiha wubuwela, makalelo enakaliwa yohagalasa wahudhiha athu aatene enaavenyihiwe muukwani wihina ehudhere wodhela Yehova ni efunelo yaye. Teto, kubuwela makalelo enakaliwa yohagalasa wawubusedha adhaari a Yehova akale wodhela dhatedhene dhipadduwile aliwa nuukwa.

7. Ethu baani nihinahowelihu wanganyedha, ki mwahaya bwaddi?

⁷ Iyo podi okanna ebaribari wihina egumi mparayizu enakale ya murenddele, yowegeredheya ni nnere okanna dhatedhene nnahoweligihu. Mwahaya bwaddi? Mwaha Yehova ohunivaha mweddelo wodhela onamathonga wa Salomawu wodhela makalelo enakale egumi mwilaboni exa.

ONAMATHONGA WA SALOMAWU — YOWONIHA YA MPARAYIZU

8. Madhu enafwanyeya va Salmos 37:10, 11, 29, yakwanele aavi? (Osugwe “Makoho aanamileri” muwari mwa revista nna.)

⁸ Mwene Davidi ahivetheliwa wihina alebe wodhela makalelo yaakale egumi mparayizu mwene a thotho ni eenonelo abajha othonga. (Omwileri Salmos 37:10, 11, 29.) Malabo owinjhivene nnomulabihedha Salmos 37:11 nadhowaga owoga naathu amodha wodhela parayizu. Ni enowoneleyamo mwaha Yesu ohulabihedha madhu ala awogaga Mwaha waye wa Vamwangoni, oonihaga wihina ndha mpaganyo dhinaakwanele osogolo. (Mat. 5:5) Mbwenye, madhu a Davidi enowoniha makalelo yaakale egumi muwari mwa onamathonga wa Salomawu. Salomawu nuukala mwene aamwaana Ezarayeli, nlogo na Mulugu nahikanna murenddele ni ohagalala ‘mwilaboni yavaha mukaka ni enwi.’ Mulugu owoga egihina: ‘Mwadidela oparihedha mabasa malagano aaga mwigumini mweenyu . . . , ginere wuvahani murenddele mwilaboni ya vati ni munerege oginanti mwahovaga wihina muthu uwereleni ethu yabure.’ (Lev. 20:24; 26:3, 6) Teto, onamathonga wa Salomawu waali ndala. (1 Cró. 22:9; 29:26-28) Yehova ahiwoga wihina athu yahawebedhege amulugu amodha ‘kiyakele egumi yohimala.’ (Sal. 37:10) Bumwahaya, madhu enafwanyeya va Salmos 37:10, 11, 29 yahakwanela kale teto enere wakwanela osogolo.

9. Musano oOsaba awogile ddi wodhela onamathonga wa Salomawu?

⁹ Musano oOsaba ahaddeliwa wihina onamathonga wa Salomawu woodhana murenddele ni ohagalala nlogo naamwaana Ezarayeli. Oliye othoma weedda olenddo woolapa wihina oone dhapadduwa ni mento aye. (1 Reis 10:1) Agamanle waredha oliye owoga ni mwene Salomawu egi: ‘kagaddeliwe dhatedhene. . . . Ohagalala balobwana enyu ni ohagalala badhari eenyu enakala vaade veenyu nabwiya, evuruwanaga enonelo yenyu!’ (1 Reis 10:6-8) Dhithu dhaapadduwe mumweneni mwa Salomawu yali yowoniha wa dhithu dhinafuna wereya Yesu abajha othonga mwilaboni ya vati.

10. Nimakalelo baani Yesu aliye munlubale ompitha Salomawu?

¹⁰ Yesu munlubale ompitha Salomawu mwa dhatedhene, Salomawu kaali ologomana ni aherana dhothega dhinlubale, mwaha wa yeyo ahitotela makathamiho nlogo na Mulugu. Mbwenye Yesu, namathonga ologomana, oliye kanadha atheegaga. (Luc. 1:32; Heb. 4:14, 15) Yesu ahididelave okala ororomeleya wa Yehova naarive Saddana agerilena dhatedhene wihina akale ohiroromeleya. Yesu uhoniha wihina kanadha atheegaga ni kanadha eragana ethu enantotele makathamiho. Mohaganyedha, Yesu mwene nnahowelihu okanna.

11. Nikavihero baani Yesu anaakanniyena?

¹¹ Yesu aneere okaviheriwa ni nikuru noothikitheliwa na 144 000 wi yaasamalele athu ni yakwanihedhe efunelo ya Yehova wodhela elabo ya vati. (Apo. 14:1-3) Alobwana ala othikitheliwa, ehinona enatapulela wehiwa ni woona goyi, mwaha aliwa yaali athu yakala mwilaboni ya vati. Bumwahaya, aliwa enerege wonelamo dhofuna dhehu. Mbwenye alobwana ala a 144 000 enaparege mabasa baani?

MABASA BAANI ENAPAREGE MAKIRISTAWU OTHIKITHELIWA?

12. Gari baani Yehova aavahiliye alobwana ala a 144 000?

¹² Yesu vamodha ni alobwana othikitheliwa, eneere okanna mabasa ompitha Salomawu. Salomawu oosamalela muthithi ni muthithi waathu wakala murudda mmodha baahi, mbwenye a 144 000 eneere osamalela mbwabwadda ni mbwabwadda waathu onakalege mwilaboni yaatene yavati. Ela gari enlubale Yehova aavahiliye alobwana ala othikitheliwa!

13. Mutholo baani mmodha munlubale makiristawu othikitheliwa enakanniwana?

¹³ Ndala ninga Yesu, a 144 000 eneere okala mamwene ni anamakutha. (Apo. 5:10) Kale nlamulo nawoga wihina anamakutha yohowela obarela nlogo, epaddi yomwilini ni yomuzimuni. Nlamulo nna yaali ‘yowoniha wa dhithu dhinereye osogolo.’ Bumwahaya, iyo podi owoga wihina a 144 000, eneere osamalela nlogo na Mulugu epaddi yomwilini ni yomuzimuni. (Heb. 10:1) Nivano kannanone makalelo mamwene ayo enaawogegiwa ni iyo elabo yeela yavati. Mbwenye nnonnihu sowihina Yehova anafuna wihina aatene ekanne dhoholela enahoweliwa. — Apo. 21:3, 4.

‘MAMBILA MAMODHA’ ENAHOWELA YEERE DDI WIHINA EKALE MPARAYIZU?

14. Dhithu baani dhinawiwananiha ‘mambila mamodha’ ni addibila a Kiristu?

¹⁴ Yesu onowawithana ale enathongege nuliye ninga ‘nikuru ning’ono.’ (Luc. 12:32) Oliye ohithana nikuru nanabili ninga ‘mambila mamodha.’ Makuru ala menddi, enakosa epaddi ya nikuru nimodha baani. (João 10:16) Ale enakosa epaddi ya makuru ala peeno enolaba vamodha ni enerege olaba vamodha elabo ela yakala parayizu. Mwilaboni exa ‘nikuru nig’ono’ nnakale odhulu. Mbwenye ‘mambila mamodha’ ehikanna ejhehedho yokala mwilaboni yeela yavati nimukalakala. Mbwenye wihina ‘mambila mamodha’ ekale mwilaboni exa enohowela werana dhithu movanene.

15. a) Mambila mamodha enakavihera aavi makiristawu othikitheliwa? b) Onaamutajhihe addi ddibila ali ofaramasiya? (Osugwe fotu.)

¹⁵ Mpanga ole akwile ahinathi wooniha otamalela mwaha dhithu Yesu amwereliye. Mbwenye peeno ‘mambila mamodha’ ehikanna gaari yotamalela mwaha dhithu Yesu awereliye. Motajhiha, iyo podi wooniha wihina nnotamalela wodhela makalelo nnaweddihihu addibile Yesu. Mwinnyene Yesu ahiwoga wihina eere watoriha ‘mambila mamodha’ mowiwanana ni makalelo yaweddihegiwa makiristawu othikitheliwa. (Mat. 25:31-40) Iyo podi wakavihera addibila a Yesu wodhela wapara mabasa olaleya. (Mat. 28:18-20) Makalelo apama owerana eyo fulabihedha pama livuru Ofwanye egumi yohagalasa ya malabo amatene! Akala kunna namahudhera ononamo aavi okanna yoluba wihina ofugule ohudhera ni athu owinjhiva.

16. Ethu baani nnahowelihu weera ovanene wihina niwegeredhe wi nikale mwilaboni exa?

¹⁶ Iyo kanna oweela ojheha okala mparayizu wihina nilibihedhe okala athu apama, okuma ovanene iyo podi wilibihedha okala ororomeleya mwa dhatedhene ni owooga ebaribari ni okanna egumi yojajala. Nnohowela okala ororomeleya wa Yehova vamodha ni wa amamunihu obe wa mwarihu ni addibilihu. Nanda omwiwelela Yehova ovanene mwilaboni ela yabure, enere okala ethu yokweya omwiwelela mwilaboni exa. Bumwahaya, nnohowela woniha ovanene dhikalelo dhinoniha wihina nihimala wiwegeredha wihina nakale mparayizu. Osugwe ohudhera winafwanyeya muwari mwa namasugwera ola onihina “Ohiwegeredha wihina ‘okale mwilaboni exa’?”

17. Mwahaya bwaddi kannahowela wikubanyedha wodhela dhoothega nerilihuna kale?

¹⁷ Sapama wilibihera wihina nahihiye mubuwelo onnyemela mwaha wa yothega nerilihuna kale. Mbwenye eyo kinatapulela wihina nnohowela ‘werana yothega yapudhave,’ mwaha Yesu okwela dhothega dhehu. (Heb. 10:26-31) Mbwenye nikanne ebaribari wihina nathwaruwa mwaha yothega nerilihuna wodhela waaja nikavihero na Yehova ni namaholela mulogo ni osaddula makalelo ehu owubuwela mohanganyedha Yehova enere onilevelela. (Isa. 55:7; At. 3:19) Kuddiwale Yesu awogiliye ni afarizewu egihina: ‘Mwaha miyo kagidhele wawithana athu owogowa, mbwenye athu oothega.’ (Mat. 9:13) Mukutho wa Yesu bwathima vanlubale ni podi okuneela dhoothega dhehu.

WE PODI OKALA MPARAYIZU NI MUKALAKALA

18. Ethu baani onafuniwe omukoha mulobwana okwile mmambalo mwa Yesu?

¹⁸ Kabiha wubuwela ogaali mparayizu ni mpanga ole aakwile agaali mmambalo mwa Yesu! Mwebaribarene nyu munere othapanyedha muselu wotamalela wodhela nde Yesu uwereliyeni. Podi weera onere ofuna omukoha makalelo dhithudha dha aliwa mudhidhi aaliye mmambalo mwa Yesu, ki oliye aali aavi Yesu nuwoga wihina onere okala ni miyo mparayizu. Teto, podi weera oliye anere wukoha makalelo yaali egumi malabo okuthula mwilaboni ele ya Saddana. Enere okala gari enlubale wahudhiha wodhela madhu a Mulugu athu ninga mulobwana yoola! — Efé. 4:22-24.

19. Mwahaya bwaddi egumi mparayizu kinadha egomihaga? (Osugwe fotu ya vakapani.)

¹⁹ Egumi mparayizu kinadha egomihaga, mwaha malabo aamatene nnerege okanna mabasa owapara ni nnere wanona athu owinjhiva. Teto yathimaya kadda labo nnere omunona pamadhene babihu Yehova. Nnere wajhavo mareeliho aamatene Yehova aneegeredheliye, teto kadda labo nnerege ohudhera wodhela Yehova ni dhopaddusa dhaye. Mudhidhi nnakalegihuwo odhivela ninnihuna ni Yehova winerege oliba. Iyo nnomutamalela Yehova ni Yesu mwaha onivaha ejhehedho yokala mparayizu mwilaboni ya vati.