We podi okanna murenddele naarive ofwanyiwaga makathamiho

1. ‘Murenddele onadhela wa Mulugu’ ddi, ki enapadduwa ddi nakanna murenddele yoyo? (Filipenses 4:6,7)

OHUKALAWO murenddele athu amwilaboni yahinafwanyegiwa. ‘Murenddele wa Mulugu,’ murenddele oyo onovolowela okanna mubuwelo wapama ni wopwaseya ni enanda ofwanya baale enna wandana wapama ni Yehova. Nakanna wandana wapama ni Mulugu nnakala obareleyene. (Omwileri Filipenses 4:6, 7.) Teto podi okanna wandana ni athu amodha enamulabela Yehova, Yathimaya fukanna wandana ni ‘Mulugu amurenddele.’ (1 Tes. 5:23) Namunona, naamwiwelelaga ni nimuroromelaga, murenddele onadhela wa Yehova onere opwaseyiha murima wehu naafwanyiwaga dhoweha dhorusa.

2. Nnonile addi wihina enowedheya okanna murenddele wa Mulugu?

² Enowandeya okanna murenddele naarive nifwanyiwaga makathamiho mwigumini mwehu ninga dhiredda dhorurumusa, ngovi, ohiwanana waathu ni naharahariwaga? Dhaapadduwaga dhithu ninga dhendha iyo podi woovaga. Naarive dhigaali ndo nnohowela ohidduwala yolaga Yesu avahiliye anamahara aye. Vano Yesu walaga anamaharaye egi: ‘Kamusegedheye, newene kamoove.’ (João 14:27) Addibila owinjhiva vamodha naarogola enohara yotajhiha ya Yesu. Nnikavihero na Yehova aliwa enowanda okanna murenddele naarive efwanyiwaga makathamiho.

NNANDE ADDI OKANNA MURENDDELE WAKUMELELA OREDDA WORURUMUSA

3. Nimakalelo baani mutipa podi onitotela makathamiho?

³ Mutipa onavaliwa ni onagaweya mowaguva podi onirurumusa mwigumini mwehu. Motajhiha, mutipa wa koronaviru wahasegedheyiha athu owinjhiva. Anamasanyiha ehiwoga wihina athu owinjhiva yakohiwe, owoga wihina ehikanna makathamiho ogona mwaha wa mutipa yola, teto makathamihoya yakumelele bowihina athu owinjhiva obajha wikubanyedha, ofiyedha ojhaga murombwe woviriganiha ogoogo, ong’wa, waavada ahiyaniiwa ni wubuwelaga wipa. Akala onopadduwa oredda worulumusa vamuruddani vawo, onere ddi wihina wahikubanyedhege ni okanne murenddele wa Mulugu?

4. Mwahaya bwaddi yovuhulela ya Yesu wodhela malabo okuthula enanivahiwa murenddele?

⁴ Yesu ahiwoga wihina malabo okuthula dherege okalawo dhiredda dhowopiha, obe mutipa ‘murudda ni murudda.’ (Luc. 21:11) Onona eyo, enaanivahe murenddele ni makalelo baani? Iyo kannatikinege dhakumelelaga dhiredda dhorurumusa, mwaha nihinona wihina dhinna wakwanela ndhe awogile Yesu. Mwaha wa yeyo, nnowanda ohara ni ovaha thima yolaga ya Yesu wodhela ale yakalegewo malabo okuthula ‘Pole-pole wihina munoove.’ — Mat. 24:6.

5. a) Mowiwanana ni Filipenses 4:8,9, naalobelaga dhithu baani nnahowelihu oloba nafwanyiwaga dhiredda dhorurumusa? b)Onvuruwana awudiyu oogaravariwa enaanikavihere nimakalelo baani?

⁵ Dhaapadduwaga dhiredda dhorurumusa ninga mutipa, iyo podi othuwathuwaga ofiyedha woovaga. Siyeyo epadduwile ni murogola anithaniwa Desi.b Titiyu aye, ddibile ni mediku aye nuukwa ni oredda wa koronaviru, oliye obajha woova ovala oredda ole wa koronaviru ni wavaliha amaye eli anakalaba. Mwaha wa mutipa wa koronaviru oliye ahithuwathuwa oovaga wayelela mabasaaye, oovaga ohikanna makalelo ojhiha emudhaye ni oliva korowa nyumba yalugariwa. Oliye ahithabwa othuwathuwela dhithu dhendha ofiyedha ohandaga ogona, mbwenye Desi ahiwedha ofwanya murenddele. Oliye olobela alobaga wihina Yehova amukavihere wihina akanne mubuwelo wapama ni afwaseye. (Omwileri Filipenses 4:8, 9.) Oliye omwiwa Yehova “awogaga” wodhela onvuruwanaga awudiyu aBibiliya. Gavuruwanaga madhu apama aaliba “yamugaravare” Bibiliya yogipwaseyiha ni yogubusedha wihina Yehova oogithuwathuwela.— Sal. 94:19.

6. Nimakalelo baani ohudhera wawo wavayeka ni mutugumano dhinukaviheriwa?

⁶ Dhiredda dhorurumusa podi onuukula, mbwenye kanihiye wihina dhinikwerebeyihe ofiyedha ohukanna ohudhera wavayeka ni ohoona mutugumano. Dhopadduwa nnafwanyihu mmalivuruni ni vidiyu dhinapanddiwa munikuruni na Yehova, dhinowoniha wihina addibilihu vamodha ni arogola enowanda ovilela naarive efwanyiwaga makathamiho. (1 Ped. 5:9) Ohiya eyo, mutugumano dhinonikavihera odhaliha mubuwelo wehu ni dhohudhiha dholibiha dha mBibiliyani. Mudhidhi yoyo nnokanna gari yolibihana naaddibilihu. (Rom. 1:11, 12) Wapenddaga makalelo Yehova anaakaviheriye adhaari aye owanana oredda, woova ni wukuuwa nroromelo naawo nnooliba, teto kunanganyedhege wihina Yehova anere wukavihera.

7. Ethu baani nnahudherihu ni murumiwi Juwawu?

⁷ Okanne numero na addibila ammulogoni. Mwaha wa mutipa iyo podi ohikala vamodha nonanaga thoo-thoo naaddibila. Mudhidhi ninga yoyo, iyo podi wiwoonaga ninga murumiwi Juwawu. Oliye ofuna omoona ni mentwaaye mukwaye Gayu. (3 João 13, 14) Mbwenye Juwawu ahinona wihina mudhidhi yole kadhawedheye, bumwahaya oliye ahaja makalelo mamodha othapanya nuliye amulebelaga karta. Yahandeyaga othapanya naaddibila ammulogoni, waaje makalelo othapanya naliwa wodhela telefoni vidiyu-xamada obe mensaje. Nathapanyaga naaddibilihu omuzimuni nnokanna murenddele ni kanniwona ninga nili yekihu, akala we ohuthabwa osegedheya, waaje nikavihero nanamaholela mulogo ni orumedhe nikavihero newa. — Isa. 32:1, 2.

NNANDE ADDI OKANNA MURENDDELE NAFWANYIWA NGOVI

8. Nimakalelo baani ofwanyiwa ngovi winanukuliwa?

⁸ Akala we onofwanyiwaga ngovi ninga xeya, oddiginyeya weelabo ni mootho wohisugweriwa, podi wera wahukuwa vanlubale mudhidhi wowinjhivene. Teto akala ohukwa muthu wamudhiveliwe mwaha ngovi dhendha, obe akala ohuyelela dhithu wanniwena, podi wera wahitakaleliwa vanlubale. Okala ndo kinatapulela wi onothabwa odhiveliwa dhithu dhomwilini obe kunna nroromelo,mbwenye we ofwanyiwe dhithu dhorusa, teto kahi ethu yokweya owanana dhithu dhorusa ninga dhendha. (Jó 1:11) Mbwenye naarive ofwanyiwaga dhithu dhorusa, we podi okanna murenddele.

9. Madhu baani a Yesu enanikavihera okala owiwegeredhene nafwanyiwaga ngovi?

⁹ Onowubuwela, Yesu ahiwoga wihina Malabo okuthula dherege opadduwa dhithu dhowinjhiva ninga ‘oddiginyeya wa elabo’ ni ngovi dhimodha omakuthulo wahinafiye. (Luc. 21:11) Bumwahaya moohiyana ni athu amwilaboni enubuwela wihina kinadha efwanyiwaga ngovi, iyo nihinona wihina dhinerege opadduwa ngovi ni ndho podi onuukula. Yesu ahiwoga wihina wodhela okalawo ‘dhithu dhowinjhiva dhihiniwanana ni malamulo’ athu yerege waalupa malamulo. Eyo enowoneya mwaha peeno opanga onna othabwa winjhiva, athu enna othabwa okanna owali ni ogwalagwambi. (Mat. 24:12) Yesu kawogile wihina ngovi ndha dhinaafwanyege baahi ale yahinamwebedha Mulugu. Mwebaribarene adhaari owinjhiva a Yehova ehikwa mwaha ngovi. (Isa. 57:1; 2 Cor. 11:25) Yehova Podi ohinibarela ni matikiniho wihina nivuluwe vangovini, mbwenye Yehova podi onivaha ele nnahowelihu wihina nikanne murenddele ni nikale oopwaseya.

10. Mwahaya bwaddi nigawogaga wihina omuroromela Yehova ovanene yahinathi opadduwa ngovi makalelo owohina nroromelo? (Provérbios 22:3)

¹⁰ Nafwanyiwaga ngovi morurumusa, enere okala yokweya okala oopwaseya akala nihiwegeredha. Mbwenye eyo enatapulela wihina nerana ndo kannamuroromela Yehova? Naari. Mwebaribarene wiwegeredha Yahinathi opadduwa ngovi si ngovi Makalelo owoniha wihina nihikanna nroromelo mwa makalelo Yehova ananikaviheriye. Nimakalelo baani? Madhu a Mulugu enonikongomedha wiwegeredha yahinathi opadduwa ethu-sithu yowopiha. (Omwileri Provérbios 22:3.) Teto nikuru na Yehova nnonikavihera ni malivuru, mutugumano dhinanubusedha ni dhovuwiha dhinakumelela mudhidhi wofwanelela, malabo owinjhivene dhinonikavihera ohidduwala wodhela dhithu dhinahoweleya wi niwegeredhe yakumelela ngovi si ngovi.c Nnomuroromela Yehova? Namuroromela nnere ohara dhoholela ovanene — yahinathi opadduwa ngovi.

11. Ohudhere ddi ni yopadduwa ya Margaret?

¹¹ Kasugwa epadduwe ni murogola dhaala anithaniwa Margaret. Mwaha mootho munlubale wohisugweriwa wapadduwile waddamela murudda waye, Margaret ohowela otamavo vadevaye mowaguva. Woona wihina athu owinjhiva yere othawa mmavaade mwiwa mowaguva, opanga ni wiyelana othabwa ofiyedha athu woovaga okumela ode. Teto mwiisi othabwaga ofiyedha Margaret ohandaga okumamo mukaroni mwaaye. Mbwenye oliye ahanda ovuluwa mwaha ahiwegeredha, pasta anniyena yahikalamo mapa yamukavihere ofwanya dila ahoweliye othawelawo. Teto oliye ahirajhiha ohara dila yeyo mudhidhi iwegeredhiye yakumelela ngovi. Margaret andile ovuluwa mudhidhi yoole mwaha ahiwegeredha pamadhene.

12. Mwahaya bwaddi nigiwelela dhoholela dhinanibarela?

¹² Yaajaga makalelo oonibarela, anamathonga podi oloba wihina ohivenyevo vaade mudhidhi bu mudhidhi, obe otama murudda nnakalihu obe werana ethu-sithu. Athu amodha kinafuna wiwelela dhoholela mwaha kinafuna oyelela dhithu dhomwilini. Mbwenye ki iyo nili makiristawu nnere ddi? Bibiliya anihina: ‘Mwaha wa nabwiya mwawiwelelege athu aatene, mamwene ni ale ele anlubale, anamathonga ni aleya enarumiwa.’ (1 Ped. 2:13, 14) Nikuru na Yehova, nnonivaha dhoholela wihina dhinibarele. Motajhiha, nnokongomedhiwa wawaddela anamaholela mulogo makalelo oonifwanya wodhela wavaha numero na telefoni nehu obe wawaddela murudda nnakalihu. Nimakalelo yaala, aliwa podi othapanya ni iyo yapadduwa ngovi obe ethu-sithu. Anamaholela mulogo yakanna manumero ehu, aliwa podi onaddela yapadduwa ethu-sithu wihina nikale vaade obe otama murudda nnakalihu wihina nakale murudda mmodha, makalelo owaja yoojha ni mudhidhi nnahowelihu wakavihera athu amodha. Nahiwelela dhoholela ndha, iyo podi ohela egumi yehu ni egumi yanamaholela mulogo vangovini. Kaniddiwaale wihina anamaholela mulogo ehikanna mutholo wonisamalela. (Heb. 13:17) Margaret anihina: “Miyo ginowonelamo wihina ohara dhoholela dha anamaholela mulogo ni dha nikuru na Yehova ehigivulusa.”

13. Ethu baani yakavihere addibila yahowela othawa mmavaade mwiwa okanna murenddele ni ohagalala?

¹³ Addibila ni arogola owinjhiva ehiye nyumbadhiwa mwaha wa koddo obe ngovi si ngovi, yahihudhera makalelo mamodha owerana dhithudha ni kiyaselele wapara mabasa omuzimuni. Ndala ninga makiristawu obajha yathawile mwaha oharahariwa, addibilihu ennodhowave ‘elaleyaga muthenga dha pama.’ (At. 8:4) Olaleya winowakavihera addibila ala odidela osugwera omwene wa Yehova, ohiya osugwera dhithu dhinarusa. Mwaha wa eyo, aliwa enowanda okanna murenddele ni ohagalala.

NNANDE ADI OKANNA MURENDDELE NAAHARAHARIWAGA

14. Nimakalelo baani oharahariwa wunanakiwa murenddele?

¹⁴ Mwaha wa oharahariwa iyo podi oyelela dhithu dhowinjhiva dhinanivaha murenddele. Iyo nnohagalala vanlubale natugumanaga ni addibilihu, nadhowaga mmalaleyelo, nakanna egumi yokweya ni nihovaga ovokeriwa mukambura. Naakoddihiwaga werana dhithu dhendha, iyo podi obajha wukuuwa noovaga enanipadduwele. Wubuwela ndo kahi yabure, mbwenye nnohowela okala pasope. Yesu ohuwoga wihina oharahariwa were wakwakwathusa athu owinjhiva. (João 16:1, 2) Ki vano nnande addi okanna murenddele naharahariwaga?

15. Mwahaya bwaddi kanna oweela woova oharahariwa? (João 15:20; 16:33)

¹⁵ Bibiliya anihina: ‘Aatene ale anafuna waparihedha mabasa malagano a Yehova mwigumini mwewa mowiwanana ni Yesu Kiristu, enere oharahariwa.’ (2 Tim. 3:12) Ddibila dhaala anithaniwa Andrei Yahimurusa orumedha wihina anamoona aatene enakala elabo anakaliiye yere oharahariwa. Oliye wubuwela, asaa: “Wuno ehikalawo anamoona owinjhiva, ki anamathonga enande addi wamaga anamoona aatene?” Teto mubuwelo ola, kawanfwaseyiha Andrei ni womuthuwathuwiha. Mbwenye addibila amodha othoma omuroromela Yehova ni ohubuwela wi kinadha emagiwaga. Aliwa yahinona wihina yere ovolosihiwa mukambura mudhidhi bu mudhidhi, ni kiyathuwathuwa ninga Andrei. Vano oliye othoma watajhiha addibila ale wodhela omuroromela Yehova. Wahinavire mudhidhi wowinjhivene Andrei obajha okanna murenddele. Vano oliye onohagalala naarive afwanyiwaga makathamiho. Ni iyoya podi onipadduwela emodhave. Ebaribari wihina Yesu ohuwoga wihina nnere oharahariwa, mbwenye ohuniroromeliha wihina iyo podi woniha ororomeleya wehu.— Omwileri João 15:20; 16:33.

16. Dhoholela baani nnahowelihu wiwelela mabasa ehu yakoddihiwaga?

¹⁶ Mabasa ehu Yakoddihiwaga, iyo podi wakela dhoholela oBeteli ni nanamaholela mulogo. Dhoholela ndha dhinonibarela wihina nidhowegeve naakelaga dhoojha dhomuzimuni ni olaleya mwa makalelo enandeya. Bumwahaya wiwelelege dhoholela ndo naarive wahonelagamo. (Tia. 3:17) Teto kuwawaddele athu amodha wodhela murudda enafwanyeya addibila ni arogola obe wodhela mabasa enapariwa munikuruni, ale yahinna ofuru wonona wodhela muselu yoola. — Ecl. 3:7.

17. Ndala ninga arumiwi we othomile wera ddi?

¹⁷ Ethu enamuthukulela Saddana wawidda anamoona a Yehova, sowihina aliwa ‘ehivahiwa mutholo woovaha onamona wodhela Yesu.’ (Apo. 12:17) kuhiye wihina Saddana ni elabwaaye yuthukulele we woova. Olaleya ni wakosa anamahara a Yesu, mabasa enadhana murenddele ni ohagalala. Anamaholela gereja yahawadeliha arumiwi olaleya. Mbwenye naarive dhigaali ndo, alobwana ale ororomeleya yahisakula omwiwelela Mulugu wodhela odidela olaleya, mwaha wa yeyo yahireelihiwa. (At. 5:27-29, 41, 42) Ebaribari wihina mabasa ehu yakoddihiwaga nnohowela okala pasope nalaleyaga. (Mat. 10:16) Mbwenye neerana nde nnandihu naalaleyaga nnere wanda okanna murenddele mwaha onona wi nnerana efunelo ya Yehova ni onona wihina nnaapara mabasa enavulusa dhigumi.

‘MURENDDELE WA MULUGU ONAKALE NI WE’

18. Anaanivahe murenddele webaribari baani?

¹⁸ Kuwanganyedhe wihina naarive dhithudha dhirusaga we onere okanna murenddele. Teto bumudhidhi yoyo nnonelihumo wihina nnohowela murenddele wa Mulugu, murenddele onadha baahi wa Yehova. Bumwahaya omuroromele oliye dhaapadduwaga dhiredda morulumusa, ngovi obe oharahariwa. Teto kukale wolapela nnikuru na Yehova. Malabo aamatene kuddiwale ejhehedho yohagalasa enadha osogolo. Werana ndo ‘Mulugu amurenddele anakale ni we.’ (Fil. 4:9) Ohudhera winaharela nnere woona nimakalelo baani nnandihu wakavihera addibilihu yaafwanyiwaga makathamiho wanda okanna murenddele wa Mulugu.