A DÃNIYƐLL SEBRE

1 Zida rĩm a Zowakim+ naamã yʋʋm a tãab-n-soabã, Babilon rĩm a Nebukadnezaar wa n gũbga Zerizalɛm n na n zabe.+ 2 Wẽnnaam sɩd-sɩd a Zeova wa n dɩka Zida rĩm a Zowakim n ning Babilon rĩmã nugẽ,+ n paas a doogã* teed kẽere. A tall-b lame n kẽng a wẽnnaamã roogẽ,* Sineyaar* soolmẽ wã.+ A bĩnga teedã a wẽnnaamã laog bĩngr zĩigẽ.+

3 Dẽ, rĩmã yeela a Aspenaaz sẽn yaa na-yirã tʋm-tʋmdbã naabã t’a tall Israyɛll neb* kẽer n wa, sẽn yɩɩd fãa na-biisã, n paas nin-kãsemsã kambã.+ 4 Segd n yɩɩ kom-bɩɩs* sẽn pa tar zanga, n yaa rasãmba, n tar yam, bãngr la yam-vẽenem,+ la sẽn tõe n tʋm na-yirã. A segd n zãms-b-la Kalde nebã gʋlsem la b buud-gomdã. 5 Sẽn paase, rĩmã yeelame tɩ daar fãa, b segd n yãkda yẽ rɩ-noodã la divẽ ning yẽ sẽn yũudã n kõt-ba. B segd n zãms-b-la* yʋʋm a tãabo, tɩ wakat kãng sã n pid bɩ b yaool n sɩng n tʋmd rĩmã tʋʋmã.

6 Zida buudã neb* kẽer n da be kom-bɩɩsã sʋka: Yaa a Dãniyɛlle,*+ a Hananiya,* a Misayɛll* la a Azariya.*+ 7 Na-yirã tʋm-tʋmdbã naab kõ-b-la yʋya.* A pʋda a Dãniyɛll t’a Bɛltesazaare,+ n pʋd a Hananiya t’a Sadrake, n pʋd a Misayɛll t’a Mesake, la a pʋd a Azariya t’a Abɛɛdnego.+

8 La a Dãniyɛll yãka yam a sũurẽ n pa na n dẽgem a meng ne rĩmã rɩ-noodã wall ne divẽ wã rĩmã sẽn yũudã ye. Rẽ n so t’a kos na-yirã tʋm-tʋmdbã naab sẽn na yɩl t’a kõ-a sore, t’a ra rɩ bõn-kãensã sẽn na n dẽgm-a wã ye. 9 Wẽnnaam kɩtame tɩ na-yirã tʋm-tʋmdbã naab maan a Dãniyɛll neere, la a zoe a nimbãanega.+ 10 La na-yirã tʋm-tʋmdbã naab yeela a Dãniyɛll yaa: “Mam zoeta rĩmã sẽn yaa mam zu-soabã, soab ning sẽn wilg yãmb sẽn segd n dɩ rɩɩb ning la y yũ bũmb ningã. Rĩmã sã n yã tɩ yãmb faagame n pa ta kom-bɩɩs* a taabã yʋʋm sẽn zems yãmbã, mam na n kẽe yɛ? Yãmb na n kɩtame tɩ mam* paam taal rĩmã taoore.” 11 La a Dãniyɛll yeela gũud ning na-yirã tʋm-tʋmdbã naab sẽn yãk t’a get yẽ ne a Hananiya, a Misayɛll la a Azariya yellã yaa: 12 “M bõos tɩ y mak tõnd sẽn yaa y tʋm-tʋmdbã rasem piig pʋgẽ, n kɩt tɩ b kõt tõnd rɩɩb sẽn pa naag nemd la zĩm, la b kõt-d koom. 13 Rẽ poore, bɩ y mak tõnd yalẽ wã ne kom-bɩɩs* nins sẽn dɩt rĩmã rɩ-noodã yalẽ, la y maan tõnd sẽn yaa y tʋm-tʋmdbã wa sẽn zems bũmb ning y sẽn na n yã wã.”

14 Dẽ, a saka b sẽn yeelã, n mak-b rasem piig pʋgẽ. 15 Rasem piigã poore, a mikame tɩ b yaa neeb la b tar laafɩ n yɩɩd kom-bɩɩs* nins fãa sẽn dɩt rĩmã rɩ-noodã. 16 Dẽ, gũudã ra basda rɩ-noodã la divẽ wã, n kõt-b rɩɩb sẽn pa naag nemd la zĩm. 17 Wẽnnaam kõo kom-bɩɩs* a naasã yam, bãngr la yam-vẽenem gʋlsem buud fãa wɛɛngẽ. Sẽn paase, a kõo a Dãniyɛll tõog t’a n tõe n wʋm vẽnegr la zãmsd buud fãa võore.+

18 Wakat ning rĩmã sẽn yãk tɩ b segd n tall-b n wa wã sẽn wa n ta,+ na-yirã tʋm-tʋmdbã naab tall-b lame n kẽng a Nebukadnezaar taoore. 19 Rĩmã sẽn gom ne-bã, a mikame tɩ sullã tõr pʋgẽ, ned baa a ye kae n yaa wa a Dãniyɛlle, a Hananiya, a Misayɛll la a Azariya ye.+ Woto, b kell n tʋma rĩmã tʋʋma. 20 Rĩmã sã n sok-b yell buud fãa wɛɛngẽ, tɩ yaa yell sẽn baood yam la bãngre, a mikdame tɩ b yɩɩda soolmã tõr maan-kʋʋdb nins sẽn maand tɩtã, la bag-bʋgdbã+ naoor piiga. 21 A Dãniyɛll kell n paa be n tãag rĩm a Sirus naamã pipi yʋʋmdã.+

2 A Nebukadnezaar naamã yʋʋm a yiib-n-soabã, a zãmsa zãmsd wʋsgo. A ra maanda yɩɩre,+ hal n pa le tõe n gũs ye. 2 Dẽ, rĩmã yeelame tɩ b bool maan-kʋʋdb nins sẽn maand tɩtã, bag-bʋgdbã, tɩtã rãmb la Kalde ãds-bagbã,* sẽn na yɩl tɩ b togs rĩmã a zãmsd toor-toorã. Dẽ, b wa n kẽeme n yaas rĩmã taoore.+ 3 Rĩmã yeel-b lame yaa: “Mam zãmsa zãmsdo, n maand yɩɩre, bala m dat n bãnga zãmsdã sẽn yaa a soaba.” 4 Kalde ãds-bagbã leoka rĩmã ne Arameyẽ buud-gomdã yaa:*+ “N-na, Wẽnd na kaoos-yã! Togs-y tõnd sẽn yaa y tʋm-tʋmdbã y zãmsdã, tɩ d na n bilg-y-la a võore.”

5 Rĩmã leoka Kalde ãds-bagbã yaa: “Ad mam sẽn yãk yam ningã: Yãmb sã n pa togs maam zãmsdã, la y bilg a võore, b na n beesa yãmba, la b kɩt tɩ y zagsã lebg zãma wã we-kɛɛng zĩisi.* 6 La yãmb sã n sɩd togs maam zãmsdã la y bilg a võore, mam na n kõo yãmb kũun toor-toore, keoor la waoogr sẽn yaa kãsenga.+ Woto wã, togs-y maam zãmsdã la y bilg a võore.”

7 B leoka naoor a yiib-n-soab yaa: “Bɩ rĩmã togs tõnd sẽn yaa a tʋm-tʋmdbã a zãmsdã, tɩ d na n bilga a võore.”

8 Dẽ, rĩmã yeelame yaa: “Mam mii vẽeneg tɩ yãmb baooda weere, bala yãmb bãnga mam sẽn yãk yam ningã. 9 Yãmb sã n pa togs maam zãmsdã, y fãa na n paama sɩbg-yɛnga. La yãmb zemsa taab n na n togs maam bũmb sẽn pa sɩd n belg maam hal tɩ yɛlã wa toeeme. Woto wã, togs-y maam zãmsdã tɩ rẽ la m na n bãng tɩ y tõe n bilga a võore.”

10 Kalde ãds-bagbã leoka rĩmã yaa: “Ned kae tẽngã* zug n tõe n maan rĩmã sẽn kosã ye. Bala rĩm-kãseng wall guvɛrneer nan pa kos maan-kʋʋdb nins sẽn maand tɩtã, pa rẽ bɩ bag-bʋgdbã wall Kalde ãds-bagbã tɩ b maan bũmb a woto ye. 11 Rĩmã sẽn kot bũmb ningã yaa toogo. Sẽn paase, ned kae n tõe n togs rĩmã bõn-kãnga, sã n pa wẽnnaam-dãmbã sẽn pa be ninsaalbã sẽn yaa kiidbã sʋkã.”

12 Rẽ la rĩmã sũur puug wʋsg t’a yiis noor n yeel tɩ b kʋ Babilon yam dãmbã fãa.+ 13 B sẽn wa n moon noorã tɩ b rat n kʋ yam dãmbã, b ra gẽesda a Dãniyɛll ne a tũud-n-taasã me n na n kʋ.

14 Wakat kãnga, a Dãniyɛll soosame n tɩ gom ne a Ariok sẽn yaa rĩmã gũudbã naabã ne waoogre. A ra yiime n na n tɩ kʋ Babilon yam dãmbã. 15 A Dãniyɛll soka rĩmã soda-naab a Ariok yaa: “Bõe yĩng tɩ rĩmã yiis noor sẽn yaa toaag a woto?” T’a Ariok togs-a yellã.+ 16 Dẽ, a Dãniyɛll kẽngame n tɩ kos rĩmã t’a kõ-a weere, t’a wa bilg-a zãmsdã võore.

17 Rẽ poore, a Dãniyɛll kuila a yiri. A rɩka yellã n togs a Hananiya, a Misayɛll ne a Azariya sẽn yaa a tũud-n-taasã. 18 A kos-b lame tɩ b pʋʋs saasẽ Wẽnnaamã t’a zoe b nimbãaneg n vẽneg-b yel-soalgdgã, sẽn na yɩl tɩ b ra wa naag yẽ ne a tũud-n-taasã la Babilon yam dãmbã sẽn ketã n kʋ ye.

19 A Dãniyɛll paama vẽnegr ne yʋngo, n bãng yel-soalgdgã.+ Dẽ, a pẽga saasẽ Wẽnnaamã. 20 A Dãniyɛll yeelame yaa:

24 A Dãniyɛll kẽnga a Ariok sẽn yaa ned ning rĩmã sẽn yãk t’a kʋ Babilon yam dãmbã nengẽ,+ n yeel-a yaa: “Ra kʋ Babilon yam soab baa a yembr ye. Tall maam n kẽng rĩmã taoore, tɩ m na n bilg-a-la zãmsdã võore.”

25 A Ariok talla a Dãniyɛll tao-tao n kẽng rĩmã taoore, n yeel-a yaa: “Mam yãa ned sẽn tõe n bilg rĩmã zãmsdã võor Zida yembsã sʋka.”+ 26 Rĩmã soka a Dãniyɛll b sẽn boond me t’a Bɛltesazaarã+ yaa: “Fo sɩd tõe n togsa maam zãmsdã m sẽn zãmsã, la f bilg a võore?”+ 27 A Dãniyɛll leoka rĩmã yaa: “Yam dãmbã, bag-bʋgdbã, maan-kʋʋdb nins sẽn maand tɩtã, la ãds-bagbã baa a ye pa tõe n wilg rĩmã yel-soalgdg ning a sẽn yeel tɩ b togsã ye.+ 28 La Wẽnnaam n be saasẽ, n yaa Soab ning sẽn vẽnegd yel-solgdsã.+ A kɩtame tɩ rĩm a Nebukadnezaar bãng bũmb ning sẽn na n maan beoog sẽn wate. Ad zãmsd ning yãmb sẽn zãmsã, la vẽnegr nins yãmb sẽn yã y sẽn wa n gãe y gãagã zugã:

29 “M dĩma, yãmb sẽn wa n gãe y gãagã zugã, yãmb tagsa bũmb ning sẽn na n maan beoog-daarã yelle, tɩ Soab ning sẽn vẽnegd yel-solgdsã kɩt tɩ yãmb bãng bũmb ning sẽn na n maanã. 30 Sã n yaa ne maam, b pa vẽneg maam yel-soalgdgã, mam yamã sẽn yɩɩd neb a taabã yĩng ye. Yaa sẽn na yɩl tɩ rĩmã bãng zãmsdã võore. Woto, yãmb na n bãnga tagsa nins sẽn da be y sũurẽ wã.+

31 “M dĩma, yãmb sẽn wa n getẽ wã, yãmb yãa bõn-naandg sẽn yaa kãsenga. Bõn-naandgã ra yaa parwẽnde, n pɩnd wʋsgo. A ra yasa yãmb taoore, t’a yalẽ wã kẽesd rabeem. 32 Bõn-naandgã zugã maana ne sãnem halaale,+ t’a yãoogã ne a nusã maan ne wanzuri,+ t’a pʋgã ne a gɛyã yaa ne zũudu.+ 33 A karsã maana ne kutu,+ t’a naoã zĩis kẽer yaa ne kutu, tɩ zĩis sãnda yaa ne yagdo.*+ 34 Yãmb sẽn wa n getẽ wã, kugr n wa n luk tãng zugu. La pa yɩ ned nug n luk kugrã ye. A wa n wẽe bõn-naandgã naoã sẽn maan ne kut la yagdã, n wã-ba.+ 35 Wakat kãnga, kutã, yagdã, zũudã, wanzuri wã la sãnemã fãa naaga taab n wã zõm-zõme, n lebg wa wudg sẽn be zɛɛgẽ sɩpaolgo. Sobgã rɩk-b lame n loog hal tɩ baa fʋɩ pa kell ye. La kugr ning sẽn wẽ bõn-naandgã lebga tãn-kẽeng n pid dũniyã tõre.

36 “Zãmsdã la woto. Masã, d na n bilga rĩmã a võore. 37 M dĩma, yãmb yaa rĩm-dãmb rĩma, soab ning saasẽ Wẽnnaamã sẽn kõ rĩungã,+ tõogã, pãngã, la ziirã. 38 A rɩka ninsaalbã n ning yãmb nugẽ, baa b sẽn be zĩig ning fãa, n paas we-rũmsã sẽn be weoogẽ wã, la liuuli wã sẽn yɩgd yĩngrã. A kɩtame tɩ yãmb rɩt naam b fãa zutu.+ Yãmb n yaa zugã sẽn yaa ne sãnemã.+

39 “La yãmb loogr poore, rĩung sẽn pa ta yãmb n na n wa.+ Rẽ poore, rĩung a tãab-n-soab n na n wa, n yaa ne zũudu. A na n dɩɩ naam dũniyã gill zugu.+

40 “Sã n yaa ne rĩung a naas-n-soabã, a na n talla pãng wa kutu.+ A na n wãa rĩun-kãens fãa n sãam-b zãnga, wa kut sẽn wãad bũmb fãa la a neemd to-to wã, rat n yeel tɩ wa kut sẽn sãamd bũmb zãng to-to wã.+

41 “Yãmb sẽn yã tɩ naoã ne nao-bi wã zĩis kẽer yaa ne yagd tɩ zĩis sãnda yaa ne kutã, rĩungã na n welgame. La kut pãng n na n zĩnd a pʋgẽ, yãmb sẽn yã tɩ kutã kalma ne yagd sẽn yaa maasrã yĩnga. 42 Nao-bi wã zĩis kẽer sẽn yaa ne kut tɩ zĩis sãnda yaa ne yagdã, rĩungã zĩis kẽer na n talla pãnga, tɩ zĩis sãnda pa tar pãng ye. 43 Yãmb sẽn yã tɩ kutã kalma ne yagd sẽn yaa maasrã, b na n naaga nin-buiidã,* la b pa na n tabend taaba, wa kut sẽn pa tõe n kalem yagdã.

44 “Rĩm-dãmb-kãens wakate, saasẽ Wẽnnaamã na n lugla rĩung+ sẽn pa na n tol n sãame.+ Buud baa a ye pa na n tol n deeg rĩun-kãng ye.+ A na n wãa rĩun-kãensã fãa,+ n kɩt tɩ b meneme, tɩ yẽ a ye pa wakat fãa.+ 45 Yaa rẽ la yãmb sẽn yã kugr sẽn luk tãngã zugu, tɩ pa ned nug n luk-a wã, t’a wa wẽ kutã, zũudã, yagdã, wanzuri wã la sãnemã n wã wã.+ Wẽnnaam-kãsengã kɩtame tɩ rĩmã bãng bũmb ning sẽn na n maan beoog-daarã.+ Zãmsdã yaa sɩda. A võorã bilgr me zemsa reegre.”

46 Dẽ, rĩm a Nebukadnezaar lʋɩɩme n fõgen a neng tẽng a Dãniyɛll taoore, n waoog-a. Rĩmã yeelame tɩ b kõ-a kũuni, la b yõog wisd a yĩnga. 47 Rĩmã yeela a Dãniyɛll yaa: “Sɩd-sɩda, fo Wẽnnaamã yaa wẽnnaam-dãmb Wẽnnaam, rĩm-dãmb Zu-soaba, la Soab ning sẽn vẽnegd yel-solgdse. Bala fo tõog n vẽnega yel-soalgdgã.”+ 48 Rẽ poore, rĩmã kõo a Dãniyɛll naam, la a kõ-a kũun-sõma wʋsgo. A kɩtame t’a lebg Babilon soolmã tõr taoor soaba,+ la Babilon yam dãmbã fãa naaba. 49 Sẽn paase, a Dãniyɛll kosame tɩ rĩmã yãk a Sadrak ne a Mesak la a Abɛɛdnego+ tɩ b lebg Babilon soolmã yel-gɛtba. La a Dãniyɛll ra tʋmda na-yirã.

3 Rĩm a Nebukadnezaar maana sãnem bõn-naandg woglem sẽn yaa kãntɩɩg pis-yoobe,* t’a yalmã yaa kãntɩɩg a yoobe.* A lugl-a-la Duura tẽn-nabrẽ wã Babilon soolmã pʋgẽ. 2 Rẽ poore, rĩm a Nebukadnezaar tʋmame tɩ b bool guvɛrneer-dãmbã taoor dãmbã, nanambsã, guvɛrneer-dãmbã, sagendbã, laogã gũudbã, bʋ-kaoodbã, bʋ-kaood-sõngdbã, la soolem toor-toorã yel-gɛtbã fãa tɩ b wa bõn-naandgã rĩm a Nebukadnezaar sẽn luglã tigrã.

3 Dẽ, guvɛrneer-dãmbã taoor dãmbã, nanambsã, guvɛrneer-dãmbã, sagendbã, laogã gũudbã, bʋ-kaoodbã, bʋ-kaood-sõngdbã, la soolem toor-toorã yel-gɛtbã fãa tigma taab bõn-naandgã rĩm a Nebukadnezaar sẽn luglã tigr yĩnga. B yaasa bõn-naandgã a Nebukadnezaar sẽn luglã taoore. 4 Koe-taasdã zẽka a koɛɛg n yeel yaa: “B yeta yãmb sẽn yaa buud toɛy-toɛy neba, n yit tẽns toɛy-toɛy pʋsẽ, la y gomd buud-goam toor-toorã 5 tɩ y sã n wa wʋm baorg rãamde, wɩɩga, kʋnde, pɛndg sẽn tar kɩrems a tãabo, yʋʋm-teed sẽn tar rissi, wɩɩg sẽn sẽ ne korg la yʋʋm-teed a taabã fãa rãamde, yãmb segd n wõgemdame n waoog sãnem bõn-naandgã rĩm a Nebukadnezaar sẽn luglã. 6 Ned sã n pa wõgemd n waoog bõn-naandgã, b na n yɩɩ tao-tao n lob-a wʋngã sẽn wɩng wʋsgã pʋgẽ.”+ 7 Dẽ, nebã sẽn wa n wʋm baorgã rãamde, wɩɩgã, kʋndã, pɛndg sẽn tar kɩrems a tãabã, yʋʋm-teed sẽn tar rissã, la yʋʋm-teed a taabã fãa rãamdã, buud toɛy-toɛyã fãa nebã, sẽn yit tẽns toɛy-toɛy pʋsẽ, la sẽn gomd buud-goam toor-toorã wõgemdame n waoog sãnem bõn-naandgã rĩm a Nebukadnezaar sẽn luglã.

8 Wakat kãnga, Kalde neb n kolg rĩmã n kãneg Zʋɩf-rãmbã. 9 B yeela rĩm a Nebukadnezaar yaa: “N-na, Wẽnd na kaoos-yã! 10 N-na, yãmb yiisa noor n yeel tɩ ned ning fãa sẽn na n wʋm baorg rãamde, wɩɩga, kʋnde, pɛndg sẽn tar kɩrems a tãabo, yʋʋm-teed sẽn tar rissi, wɩɩg sẽn sẽ ne korg la yʋʋm-teed a taabã fãa rãamd segd n wõgemdame n waoog sãnem bõn-naandgã, 11 la tɩ ned sã n pa wõgemd n waoog bõn-naandgã, b segd n lob-a-la wʋngã sẽn wɩng wʋsgã pʋgẽ.+ 12 La Zʋɩf-rãmb kẽer la yãmb yãk tɩ b yaa Babilon soolmã yel-gɛtba: Yaa a Sadrak ne a Mesak la a Abɛɛdnego.+ N-na, nin-kãensã pa nand yãmb baa bilf ye. B pa waoogd yãmb wẽnnaam-dãmbã ye. Sẽn paase, b zãgsame tɩ b kõn waoog sãnem bõn-naandgã yãmb sẽn luglã ye.”

13 A Nebukadnezaar sũurã puuga wʋsgo, t’a yeel tɩ b tɩ tall a Sadrak ne a Mesak la a Abɛɛdnego n wa. Dẽ, b tɩ tall-b lame n wa rĩmã taoore. 14 A Nebukadnezaar sok-b lame yaa: “A Sadrak ne a Mesak la a Abɛɛdnego, yaa sɩd tɩ yãmb pa tũud mam wẽnnaam-dãmbã,+ la tɩ y zãgsame tɩ y kõn waoog sãnem bõn-naandgã mam sẽn luglã? 15 Masã, yãmb sã n segl n saame tɩ y sã n wʋm baorg rãamde, wɩɩga, kʋnde, pɛndg sẽn tar kɩrems a tãabo, yʋʋm-teed sẽn tar rissi, wɩɩg sẽn sẽ ne korg la yʋʋm-teed a taabã fãa rãamde, bɩ y na n wõgemd n waoog bõn-naandgã mam sẽn maanã, yell kae ye. La yãmb sã n zãgs tɩ y kõn waoog bõn-naandgã, zĩig pʋgẽ, b na n lob-y-la wʋngã sẽn wɩng wʋsgã pʋgẽ. Wẽnnaam-bʋg n tõe n fãag yãmb mam nugẽ?”+

16 A Sadrak ne a Mesak la a Abɛɛdnego leoka rĩmã yaa: “Rĩm a Nebukadnezaare, pa tɩlɛ tɩ tõnd gom ne yãmb yel-kãngã wɛɛngẽ ye. 17 N-na, b sã n segd n loba tõnd wʋngã sẽn wɩng wʋsgã pʋgẽ, tõnd Wẽnnaamã tõnd sẽn waoogdã tõe n fãaga tõnd wʋngã pʋgẽ, la yãmb nugẽ.+ 18 N-na, baa a sã n pa na n fãag tõndo, bãng-y tɩ tõnd pa na n tũ yãmb wẽnnaam-dãmbã, wall d waoog sãnem bõn-naandgã yãmb sẽn luglã ye.”+

19 Dẽ, a Nebukadnezaar sũurã puuga wʋsg ne a Sadrake, a Mesak la a Abɛɛdnego, hal t’a nengã teke.* A yeelame tɩ b wɩng wʋngã naoor a yopoe n yɩɩd raasenkamã. 20 A yeela a tãb-biis kẽer sẽn tar pãng wʋsg tɩ b sẽb a Sadrak ne a Mesak la a Abɛɛdnego, n tɩ lob wʋngã sẽn wɩng wʋsgã pʋgẽ.

21 Dẽ, b sẽb-b-la ne b koabã, b fu-yordã, b pugli wã, la b fut a taabã fãa n lob-b wʋngã sẽn wɩng wʋsgã pʋgẽ. 22 Rĩmã noorã sẽn yɩ toaag tɩ wʋngã me ra tolg n wɩng wʋsgã yĩnga, bugmã kʋʋ neb nins sẽn dɩk a Sadrak ne a Mesak la a Abɛɛdnego n lobã. 23 La a Sadrak ne a Mesak la a Abɛɛdnego sẽn yaa neb a tãab nins b sẽn sẽbã lʋɩɩ wʋngã sẽn wɩng wʋsgã pʋgẽ.

24 Rẽ poore, rabeem yõka rĩm a Nebukadnezaar t’a yik tao-tao n sok a tʋm-tʋmd-kãsemsã yaa: “Pa neb a tãab la tõnd sẽn sẽb n lob bugmẽ wã sɩda?” Tɩ b leok rĩmã yaa: “N-ye, naaba.” 25 T’a yeel yaa: “Mam nee rap a naas sẽn kẽnd bugmã pʋgẽ tɩ bũmb pa sẽb-b ye. Baa fʋɩ pa maan-b me ye. Sẽn paase, naas-n-soabã wõnda wẽnnaam-dãmbã biiga.”

26 A Nebukadnezaar kolga wʋngã sẽn wɩng wʋsgã noor n yeele: “A Sadrak ne a Mesak la a Abɛɛdnego, yãmb sẽn yaa Wẽnnaam Sẽn ka to wã tʋm-tʋmdba,+ wa n yi-y ka!” A Sadrak ne a Mesak la a Abɛɛdnego yii bugmẽ wã. 27 Guvɛrneer-dãmbã taoor dãmbã, nanambsã, guvɛrneer-dãmbã ne rĩmã tʋm-tʋmd-kãsemsã sẽn da tigim be wã+ yãame tɩ bugmã pa maan nin-kãensã yĩnsã bũmb ye.+ B zutã zoobg baa a ye pa yõoge, tɩ b koabã me ket n yaa wa pĩndã. Bugmã yũug meng ra pa be b zut ye.

28 Dẽ, a Nebukadnezaar yeelame yaa: “Bɩ a Sadrak ne a Mesak la a Abɛɛdnego Wẽnnaamã paam pẽgre.+ A tʋma a malɛkã t’a fãag a tʋm-tʋmdbã. B kɩs-a-la sɩda, n kɩɩs maam a rĩmã noore. B saka kũum n yɩɩd b sẽn na n waoog wall n tũ wẽnnaam a to tɩ pa bãmb Wẽnnaamã ye.+ 29 Woto wã, ad noor mam sẽn yiisi: Ned sã n gom n paoog a Sadrak ne a Mesak la a Abɛɛdnego Wẽnnaamã, baa a sẽn yaa buud ning neda, a sẽn yit tẽng ning wall a sẽn gomd buud-gomd ninga, b segd n bees-a lame, la b kɩt t’a zakã lebg zãma wã we-kɛɛng zĩiga.* Bala wẽnnaam a to kae n tõe n fãag ned wa Wẽnnaam-kãng ye.”+

30 Rẽ poore, rĩmã paasa a Sadrak ne a Mesak la a Abɛɛdnego naam Babilon soolmã pʋgẽ.+

4 “Ad koɛɛg rĩm a Nebukadnezaar sẽn toond buud toɛy-toɛyã fãa neba, sẽn be tẽns toɛy-toɛy pʋsẽ, la sẽn gomd buud-goam toɛy-toɛya, n be dũniyã gill zugu: Wẽnd na kõ-y laafɩ wʋsgo! 2 Mam sũur yaa noog tɩ m dat n wilg yãmb bãn la yel-soalem nins Wẽnnaam sẽn ka to wã sẽn maan mam yĩnga. 3 A bãnã sɩd yaa kãsemse, t’a yel-soalmã me sɩd tar pãnga! A rĩungã yaa rĩung sẽn paad wakat fãa, t’a naamã kaoosd zãmaan woo zãmaana.+

4 “Maam a Nebukadnezaar ra zĩi bãan m doogẽ wã, tɩ m yɛlã yaa sõma na-yirã. 5 Mam zãmsa zãmsd sẽn kẽes-m rabeem. Mam sẽn wa n gãe m gãagã zugã, mam sẽn yã bũmb ninsã, la vẽnegr nins m sẽn paamã kɩtame tɩ m yɛɛse.+ 6 Rẽ n so tɩ mam yiis noor n yeel tɩ b tall Babilon yam dãmbã fãa n wa mam taoore, tɩ b bilg maam zãmsdã võore.+

7 “Wakat kãnga, maan-kʋʋdb nins sẽn maand tɩtã, bag-bʋgdbã, Kalde ãds-bagbã* la ãds-bagb a taabã waame.+ Mam sẽn togs-b zãmsdã, b pa tõog n bilg maam a võor ye.+ 8 Sẽn na n baase, a Dãniyɛll waa mam taoore. B boond-a lame me t’a Bɛltesazaare,+ sẽn yaa yʋʋr b sẽn pʋd-a mam wẽnnaamã waoogr yĩnga.+ Nin-kãng tara wẽnnaam-dãmb nins sẽn yaa sõamyã wã vʋʋsem.+ Mam togs-a-la zãmsdã, n yeele:

9 “‘Foom a Bɛltesazaar sẽn yaa maan-kʋʋdb nins sẽn maand tɩtã naaba,+ mam mii vẽeneg tɩ fo tara wẽnnaam-dãmb nins sẽn yaa sõamyã wã vʋʋsem,+ la tɩ yel-soalgdg kae n yaa toog wʋsg ne foo ye.+ Rẽ wã, bilg maam vẽnegr nins mam sẽn yã m zãmsdã pʋgẽ wã, la f bilg a võore.

10 “‘Mam sẽn wa n gãe m gãagã zugã, m paama vẽnegr toor-toor n yã tɩɩg+ sẽn be dũniyã tẽn-sʋka, t’a woglmã pa tõe n bãng n bilg ye.+ 11 Tɩɩgã bɩɩme n paam pãnga, t’a zugã tat saasã. B ra tõe n paa dũniyã kɩremsã fãa n yã-a. 12 A vãadã ra yaa neeba, t’a biisã yaa zembala, tɩ rɩɩb be a zug bõn-vɩɩsã fãa yĩnga. We-rũmsã sẽn be weoogẽ wã ra wat n soondeda a maasmẽ wã, tɩ bõn-yɩgdɩ wã sẽn yɩgd yĩngrã wat n zao a wilẽ wã. Bõn-vɩɩsã fãa* ra rɩta a biisã.

13 “‘Mam sẽn wa n ket n gãe m gãagã zug n get vẽnegr toor-toorã, mam yãa gũuda. Yaa koe-taasd sẽn yaa sõng sẽn yi saasẽ n sigda.+ 14 A zẽka a koɛɛgã wʋsg n yeel yaa: “Lub-y tɩɩgã+ la y kɛ a wilã! Fãr-y-yã a vãadã, la y sãeeg a biisã! Bɩ we-rũmsã zoe n yi a tẽngre, tɩ bõn-yɩgdɩ wã me yɩg n yi a wilẽ wã. 15 Bas-y-yã a viukã ne a yẽgã tẽng la y sẽbg-a ne kut la zũudu, weoogã mood sʋka. Bɩ meenemã sẽn yit saasẽ wã rʋʋg-a. Bɩ a pa ne rũmsã moodã sʋka.+ 16 Bɩ a sũurã sẽn yaa ninsaal sũurã toeem n lebg rũng sũuri, hal tɩ wakat a yopoe+ looge.+ 17 Woto yaa noor gũudbã sẽn moone,+ la kosg koe-taasdb nins sẽn yaa sõamyã wã sẽn togse, sẽn na yɩl tɩ sẽn vɩ-bã bãng tɩ Sẽn ka-a to wã yaa Naab ninsaalbã soolmẽ,+ la t’a kõta soolmã ned ning fãa a sẽn date. A yãkda baa ned ning sẽn pa ta a taabã t’a rɩ naam ninsaalbã soolem zugu.”

18 “‘Zãmsd ning maam a rĩm a Nebukadnezaar sẽn zãmsã la woto. Masã, foom a Bɛltesazaare, bilg maam a võore, bala mam rĩungã yam dãmb a taabã fãa pa tõe n bilg maam a võor ye.+ La fo tõeeme, bala fo tara wẽnnaam-dãmb nins sẽn yaa sõamyã wã vʋʋsem.’

19 “Wakat kãnga, a Dãniyɛll b sẽn boond me t’a Bɛltesazaarã+ yɛɛsa wakat bilfu, t’a tagsa wã kẽesd-a rabeem.

“Rĩmã yeelame yaa: ‘Foom a Bɛltesazaare, ra bas tɩ zãmsdã ne a võorã yɛɛs foo ye.’

“A Bɛltesazaar leokame yaa: ‘M zu-soaba, bɩ zãmsdã yɩ sẽn kis-b yãmbã yĩnga, t’a võorã yɩ y bɛɛbã rẽnda.

20 “‘Tɩɩgã yãmb sẽn yã t’a bɩ n lebg wok n tar pãnga, t’a zugã tat saasã, tɩ b tõe n pa dũniyã fãa n yã-a wã,+ 21 tɩɩg ning vãad sẽn yaa neeba, t’a biisã yaa zembala, tɩ rɩɩb be a zug bõn-vɩɩsã fãa yĩnga, tɩ we-rũmsã sẽn be weoogẽ wã wat n soonded a tẽngre, tɩ bõn-yɩgdɩ wã sẽn yɩgd yĩngrã wat n zao a wilẽ wã,+ 22 n-na, yaa yãmb la tɩ-kãnga. Bala yãmb lebga kãseng n tar pãnga. Yãmb ziirã zẽk n taa saasã,+ tɩ y naamã tat dũniyã kɩremsã.+

23 “‘Rĩmã yãa gũud sẽn yaa koe-taasd sẽn yaa sõng+ sẽn yi saasẽ n sigda. A ra yetame yaa: “Lub-y tɩɩgã la y sãam-a! Bas-y-yã a viukã ne a yẽgã tẽng la y sẽbg-a ne kut la zũudu, weoogã mood sʋka. Bɩ meenemã sẽn yit saasẽ wã rʋʋg-a. Bɩ a pa ne rũmsã sẽn be weoogẽ wã, hal tɩ wakat a yopoe looge.”+ 24 N-na, ad a võorã: Yaa bũmb ning Sẽn ka-a to wã sẽn yãk yam n na n maane. Bõn-kãng n na n paam rĩmã sẽn yaa mam zu-soabã. 25 B na n diga yãmb n yiis ninsaalbã sʋka. Yãmb na n tɩ zĩnda ne rũmsã sẽn be weoogẽ wã. Yãmb na n wãba yamd wa lolsã. Meenemã sẽn yit saasẽ wã na n dʋʋga yãmba.+ Wakat a yopoe+ na n loogame,+ hal tɩ y wa bãng tɩ Sẽn ka-a to wã yaa Naab ninsaalbã soolmẽ, la t’a kõta soolmã ned ning fãa a sẽn date.+

26 “‘La b sẽn yeel tɩ b bas tɩɩgã viukã ne a yẽgã,+ y sã n wa bãng tɩ Wẽnnaam rɩta naam saasẽ, y na n le paama y rĩungã n sooge. 27 Woto wã, n-na, bɩ y tũ mam saglgã. Bas-y y yel-wẽnã la y maan sẽn yaa tɩrga. Bas-y y tʋʋm-beedã, la y zoe naong rãmbã nimbãanega. Tõe tɩ rẽ la y yɛlã na n kell n yɩ sõma.’”+

28 Bõn-kãensã fãa paama rĩm a Nebukadnezaare.

29 Kiuug piig la a yiib poore, a wa n kẽnda Babilon na-yirã roog zugu. 30 Rĩmã ra yetame: “Pa Babilon sẽn yaa kãsengã mam mengã sẽn me na-yirã yĩngã la woto sɩda? Mam me-a-la ne m meng pãng la m tõogo, mam naamã ziir yĩnga.”

31 Rĩmã sẽn wa n ket n gomdã, koɛɛg n yi saasẽ n yeele: “Foom a rĩm a Nebukadnezaare, b yeta foo yaa: ‘B reega rĩungã n bas foo,+ 32 la b rig-f n yiis ninsaalbã sʋka. Fo na n tɩ zĩnda ne rũmsã sẽn be weoogẽ wã. Fo na n wãba yamd wa lolsã. Wakat a yopoe na n loogame, hal tɩ fo wa bãng tɩ Sẽn ka-a to wã yaa Naab ninsaalbã soolmẽ, la t’a kõta soolmã ned ning fãa a sẽn date.’”+

33 Wakat kãng bala, gomdã pidsa a Nebukadnezaar zugu. B rig-a lame n yiis ninsaalbã sʋka, t’a sɩng yamd wãbr wa lolsã. Meenemã sẽn yit saasẽ wã rʋʋg-a lame. A zoobdã wa n lebga wogd wa sɩlsã kõbdo, t’a nug-yẽesã lebg wa bõn-yɩgdɩ wã nao-yẽese.+

34 “Wakatã sẽn wa n sa wã,+ maam a Nebukadnezaar zẽka m neng n ges saasẽ, tɩ m yamã lebg n wa. Mam pẽga Sẽn ka-a to wã. Mam pẽga Soab ning sẽn vɩ wakat fãa wã la m kõ-a ziiri, bala a naamã yaa naam sẽn paad wakat fãa, t’a rĩungã kaoosd zãmaan woo zãmaana.+ 35 Ninsaalbã fãa sẽn be tẽngã zugã yaa wa zaalem yẽ taoore. A maanda a sẽn dat saasẽ tãb-biisã ne ninsaalbã sẽn be tẽngã zugã sʋka. Ned kae n tõe n gɩdg-a,+ wall a sok-a yaa: ‘Yaa bõe la yãmb sẽn maanã?’+

36 “Wakat kãnga, mam yamã lebg n waame. B lebs n kõo maam m rĩungã ziiri, m naamã la m waoogrã.+ Mam tʋm-tʋmd-kãsemsã ne m nin-kãsemsã yɩɩ tao-tao n bao mam zĩiga. B lebs n zĩniga maam m naamẽ wã. Mam pʋd n paama ziir n paase.

37 “Masã, maam a Nebukadnezaar pẽgda saasẽ Rĩmã, n waoogd-a la m kõt-a ziiri,+ bala a tʋʋmã fãa yaa sɩda, t’a manesmã me yaa tɩrga.+ Sẽn paase, a tõe n sika sẽn kẽnd-b ne wuk-m-mengã.”+

5 Rĩm a Bɛlsazaar+ maana tig-kãseng a nin-kãsems tusr yĩnga. A ra zĩi b taoor n yũud divẽ.+ 2 Divẽ wã sẽn wa n yilimd a Bɛlsazaar nengã, a yeelame tɩ b tɩ tall sãnem la wanzuri teed nins a ba a Nebukadnezaar sẽn wʋk Zerizalɛm wẽnd-doogẽ wã+ n wa, tɩ yẽ ne a nin-kãsemsã, a pʋg-rɩkdsã* la a pagb a taabã tall-b n yũ. 3 Dẽ, b tɩ talla sãnem teed nins b sẽn wʋk Wẽnnaam doogẽ wã Zerizalɛmmã n wa, tɩ rĩmã ne a nin-kãsemsã, a pʋg-rɩkdsã la a pagb a taabã tall n yũ. 4 B yũu divẽ, la b pẽg wẽnnaam-dãmb sẽn maan ne sãnem, wanzuri, zũudu, kutu, raad la kuga.

5 Wakat kãng bala, ninsaal nug n puk n sɩng na-yirã lalgã zug gʋlsgo, zĩig ning sẽn tees fɩtl-doagendgã, tɩ rĩmã ne nug ning sẽn gʋlsdã poore. 6 Rĩmã yɛɛsame t’a nengã pelge.* A tagsa wã kẽes-a-la rabeem t’a karsã gĩin maage,+ t’a rũmã pãbd taaba.

7 Rĩmã zẽka a koɛɛg n yeel tɩ b bool bag-bʋgdbã, Kalde ãds-bagbã* la ãds-bagb a taabã.+ Rĩmã yeela Babilon yam dãmbã yaa: “Ned ning sẽn na n karem gʋlsmã, la a bilg maam a võore, b na n yeelg-a-la fuug sẽn yaa miuug-miuugu, la b pid a yublã sãnem yãndo.+ A na n lebga rĩm a tãab-n-soab soolmã pʋgẽ.”+

8 Dẽ, rĩmã yam dãmbã fãa waame. La b pa tõog n karem gʋlsmã wall b bilg rĩmã a võor ye.+ 9 Rẽ kɩtame tɩ rĩm a Bɛlsazaar yɛɛs wʋsgo, hal t’a nengã pelge. A nin-kãsemsã me ra pa mi b sẽn maandg ye.+

10 Rĩm-poakã sẽn wʋm bũmb ning rĩmã ne a nin-kãsemsã sẽn yetã, a kẽe tigrã roogẽ. Rĩm-poakã yeelame yaa: “N-na, Wẽnd na kaoos-yã! Ra bas-y tɩ y tagsa wã kẽes-y rabeem, wall y bas tɩ y nengã pelg ye. 11 Rao n be yãmb soolmẽ wã n tar wẽnnaam-dãmb nins sẽn yaa sõamyã wã vʋʋsem. Yãmb ba wã naamã wakate, b yãame tɩ ra-kãng tara bãngre, yam-vẽenem la yam wa wẽnnaam-dãmbã.+ Rĩm a Nebukadnezaar sẽn yaa yãmb ba wã ra yãk-a lame t’a yaa maan-kʋʋdb nins sẽn maand tɩtã, bag-bʋgdbã, Kalde ãds-bagbã,*+ la ãds-bagb a taabã naaba. N-na, yãmb ba wã maana woto. 12 Bala a Dãniyɛll sẽn yaa soab ning rĩmã sẽn da pʋd t’a Bɛltesazaarã+ ra tara yam-kãsenga, bãngr la yam-vẽenem n tõe n bilg zãmsd võore, n bilg goam sẽn gom ne pagd võore, la a welg yel-gĩtim.*+ Masã, kɩt-y tɩ b bool a Dãniyɛll t’a wa, t’a na n bilg-y-la a võore.”

13 Dẽ, b talla a Dãniyɛll n wa rĩmã taoore, tɩ rĩmã sok-a yaa: “Yaa foo la a Dãniyɛll sẽn naag Zida yembsã,+ mam ba wã sẽn yaa rĩmã sẽn tall n yi Zida n wa wã bɩ?+ 14 Mam wʋmame tɩ b gomd tɩ fo tara wẽnnaam-dãmbã vʋʋsem,+ la tɩ b yãame tɩ fo tara bãngre, yam-vẽenem la yam-kãsenga.+ 15 B talla yam dãmbã la bag-bʋgdbã n wa mam taoor sẽn na yɩl tɩ b karem gʋlsmã la b bilg maam a võore, la b pa tõe n bilg maam a võor ye.+ 16 La mam wʋmame tɩ b gomd tɩ fo tõe n bilga bũmb võore,+ la tɩ f tõe n welga yel-gĩtim.* Fo sã n tõog n karem gʋlsmã, la f bilg maam a võore, b na n yeelga foo fuug sẽn yaa miuug-miuugu, la b pid f yublã sãnem yãndo. Fo na n lebga rĩm a tãab-n-soab soolmã pʋgẽ.”+

17 A Dãniyɛll leoka rĩmã yaa: “Yãmb tõe n talla y kũunã, la y rɩk y keoorã n kõ neb a taaba. Baasgo, mam na n karma gʋlsmã la m bilg yãmb a võore. 18 N-na, Wẽnnaam sẽn ka to wã ra kõo yãmb ba a Nebukadnezaar rĩungu, waoogr la naam, la a kɩt t’a lebg kãsenga.+ 19 Wẽnnaam sẽn da kɩt t’a lebg kãsengã yĩnga, buud toɛy-toɛyã fãa nebã, sẽn be tẽns toɛy-toɛy pʋsẽ, la sẽn gomd buud-goam toor-toorã ra rigda a taoore.+ A ra kʋʋda ned ning a sẽn date, la a basd a sẽn dat a soab t’a vɩɩmde. A ra zẽkda ned ning a sẽn date, la a paoogd a sẽn dat a soaba.+ 20 A sẽn wa n lebg wuk-m-meng soaba, t’a sũurã riglim hal t’a tʋm tɩta-tʋʋmã,+ Wẽnnaam sik-a-la a naamã geer zugu, la a reeg a ziirã n bas-a. 21 A rig-a lame n yiis ninsaalbã sʋka, la a kɩt t’a sũurã lebg wa rũng sũuri. A zĩnda ne we-bõensã, n da wãbd yamd wa lolsã. Meenemã sẽn yit saasẽ wã rʋʋg-a lame, hal t’a wa bãng tɩ Wẽnnaam sẽn ka to wã yaa Naab ninsaalbã soolmẽ, la t’a yãkda a sẽn dat a soab t’a rɩ naam ninsaalbã soolem zugu.+

22 “La yãmb a Bɛlsazaar sẽn yaa a biigã pa sik y menga, baa ne y sẽn mi bõn-kãensã fãa wã. 23 Yãmb pʋd n zẽka y meng saasẽ Zu-soabã taoore,+ n kɩt tɩ b tɩ tall a roogã teed n wa.+ Dẽ, yãmb ne y nin-kãsemsã, y pʋg-rɩkdsã la y pagb a taabã tall-b lame n yũ divẽ, la y pẽg wẽnnaam-dãmb sẽn maan ne wanzuri, sãnem, zũudu, kutu, raad la kuga. Yaa wẽnnaam-dãmb sẽn pa ne baa fʋɩ, sẽn pa wʋmde, la sẽn pa mi baa fʋɩ ye.+ Yãmb pa waoog Wẽnnaam ning sẽn so yãmb vɩɩmã+ la bũmb ning fãa y sẽn maandã ye. 24 Yaa rẽ yĩng la a sẽn tʋm nugã t’a wa gʋls bõn-kãnga wã.+ 25 Ad b sẽn gʋls bũmb ningã: MENE, MENE, TEKƐL la PARSIN.

26 “Ad goamã võore: MENE, rat n yeelame tɩ Wẽnnaam sõda yãmb rĩungã ray sõore, n kɩt t’a ta a tɛka.+

27 “TEKƐL, rat n yeelame tɩ b maka yãmb ne zɩslem makdga, n mik tɩ y yaa faasga.

28 “PERƐS, rat n yeelame tɩ b welga yãmb rĩungã n kõ Meed-rãmbã la Pɛrs-rãmbã.”+

29 Dẽ, a Bɛlsazaar kõo noore, tɩ b yeelg a Dãniyɛll fuug sẽn yaa miuug-miuugu, la b pid a yublã sãnem yãndo. Sẽn paase, b mooname n yeel t’a lebga rĩm a tãab-n-soab soolmã pʋgẽ.+

30 Yʋn-kãng bala, b kʋʋ rĩm a Bɛlsazaar sẽn yaa Kalde nedã,+ 31 tɩ Medi ned a Daryuus+ reeg naamã. Rẽ t’a tara yʋʋm pis-yoob la a yiibu.

6 Taa a Daryuus yam t’a yãk neb koabg la pisi, tɩ b yɩ guvɛrneer-dãmbã taoor dãmb soolmã tõr pʋgẽ.+ 2 A yãka tʋm-tʋmd-kãsems a tãab tɩ b na n ges nin-kãensã yelle. A Dãniyɛll+ ra naaga bãmb b tãabã sʋka. Guvɛrneer-dãmbã taoor dãmbã+ ra segd n wat n wilgd-b-la b sẽn tʋmd to-to wã, sẽn na yɩl tɩ rĩmã ra paam bõn ye. 3 A Dãniyɛll ra wilgdame t’a tara minim n yɩɩd tʋm-tʋmd-kãsems a taabã la guvɛrneer-dãmbã taoor dãmbã. Bala a ra tara yam-kãsenga,+ tɩ rĩmã ra magd n na n kõ-a tõog soolmã fãa zugu.

4 Wakat kãnga, tʋm-tʋmd-kãsemsã la guvɛrneer-dãmbã taoor dãmb ra baooda bũmb n na n tik n dõd a Dãniyɛll a sẽn get soolmã yɛl to-to wã wɛɛngẽ, la b pa tõog n yã bũmb b sẽn tõe n tik n dõd-a ye. B pa yã zãmb a nengẽ me ye. Bala a ra yaa ned b sẽn tõe n kɩs sɩda. Sẽn paase, a ra pa tʋmd ne laas-laase, wall a maand zãmb ye. 5 Dẽ, nin-kãensã yeelame yaa: “Tõnd pa na n yã bũmb baa bilf a Dãniyɛll nengẽ n tik n dõd-a, sã n pa d gẽes bũmb a Wẽnnaamã tõogã wɛɛngẽ.”+

6 Tʋm-tʋmd-kãsemsã la guvɛrneer-dãmbã taoor dãmb tũu taab n kẽng rĩmã nengẽ, n yeel-a yaa: “Rĩm a Daryuusi, Wẽnd na kaoos-yã! 7 N-na, rĩmã tʋm-tʋmdbã, nanambsã, guvɛrneer-dãmbã taoor dãmbã, rĩmã tʋm-tʋmd-kãsemsã la guvɛrneer-dãmbã fãa yẽsa ne taab n na n kos rĩmã t’a yiis noor sẽn wilgd tɩ rasem pis-tã pʋgẽ, ned ning fãa sẽn na n pʋʋs wẽnd wall ninsaal tɩ pa yãmba, b segd n lob-a-la gɩgma wã bokẽ.+ 8 Woto wã, n-na, bɩ y yiis noorã, la y tik y nug+ tɩ ned ra tõog n toeem-a, wa sẽn zems Meed-dãmbã ne Pɛrs-rãmbã tõogã ned sẽn pa tõe n toeemã.”+

9 Dẽ, rĩm a Daryuus tika a nug noorã b sẽn gʋlsã zugu.

10 La a Dãniyɛll sẽn bãng tɩ rĩmã tika a nug noorã b sẽn gʋlsã zugã bala, a tɩ kẽe a roogẽ wã. A yĩngr doogã feneta wã ra pak n teesa Zerizalɛm.+ A ra yĩgimdida a rũmã zut naoor a tãab daar fãa, n pʋʋsd a Wẽnnaamã la a pẽgd-a, wa a sẽn da minim n maandẽ wã. 11 Wakat kãnga, nin-kãens yɩɩ tao-tao n kẽ, n yã a Dãniyɛll t’a pʋʋsdẽ la a yõkd Wẽnnaam sɛɛga.

12 Dẽ, b kolga rĩmã n tẽeg-a noor ning a sẽn da yiisã n soke: “N-na, yãmb pa tik y nug n wilg tɩ rasem pis-tã pʋgẽ, ned ning fãa sẽn na n pʋʋs wẽnd wall ninsaal tɩ pa yãmba, b segd n lob-a-la gɩgma wã bokẽ sɩda?” Tɩ rĩmã leok yaa: “Noorã lugla sõma wa sẽn zems Meed-dãmbã ne Pɛrs-rãmbã tõogã ned sẽn pa tõe n toeemã.”+ 13 B yɩɩ tao-tao n yeel rĩmã yaa: “N-na, a Dãniyɛll sẽn yaa Zida yembsã sʋk nedã+ pa nand yãmb baa bilf ye. A toor kae me ne noor ning zug yãmb sẽn tik y nugã ye. A pʋʋsda naoor a tãab daar fãa.”+ 14 Rĩmã sẽn wʋm dẽ wã, a sũurã sãama zĩig pʋgẽ, t’a ra tagsd a sẽn na n maan to-to n fãag a Dãniyɛlle. Hal n tãag wĩntoogã kõom, a maana a sẽn tõe fãa n na n fãag-a. 15 Sẽn na n baase, rapã tũu taab n kẽng rĩmã nengẽ, n yeel-a yaa: “N-na, tẽeg-y tɩ Meed-dãmbã ne Pɛrs-rãmbã tõogã wilgdame tɩ noor ning fãa rĩmã sẽn lugl pa tõe n toeem ye.”+

16 Dẽ, rĩmã kõo noor tɩ b tall a Dãniyɛll n tɩ lob gɩgma wã bokẽ.+ Rĩmã yeela a Dãniyɛll yaa: “Wẽnnaam ning fo sẽn tũud wakat fãa wã na n fãaga foo.” 17 B talla kugr n wa yẽd bokã noore, tɩ rĩmã ning bãnd ne a nugbĩng sẽn tar n ningd bãndã, la ne a nin-kãsemsã nugbĩng sẽn tar n ningd bãndã, sẽn na yɩl tɩ yam ning b sẽn yãk a Dãniyɛll wɛɛngẽ wã ra toeem ye.

18 Rẽ poore, rĩmã kẽnga na-yirã. Yʋngã tõre, a pa rɩ ye. A zãgsa yõ-noogr buud fãa.* Sẽn paase, a pa tõog n gũs ye.* 19 Zĩigã sẽn wa n sɩng yẽegrã, rĩmã yikame n kẽng gɩgma wã bokẽ tao-tao. 20 A sẽn wa n kolg bokã, a zẽka a koɛɛg n bool a Dãniyɛll ne sũ-sãanga. Rĩmã sok-a lame yaa: “Dãniyɛlle, Wẽnnaam ning sẽn vɩ wã tʋm-tʋmda, fo Wẽnnaamã fo sẽn tũud wakat fãa wã tõog n fãaga foo ne gɩgma wã bɩ?” 21 Zĩig pʋgẽ, a Dãniyɛll leoka rĩmã yaa: “N-na, Wẽnd na kaoos-yã! 22 Mam Wẽnnaamã tʋma a malɛk t’a wa mum gɩgma wã noy+ tɩ b pa maan maam bũmb ye.+ Bala a yãame tɩ mam pa tar taal ye. N-na, mam pa beeg yãmb me ye.”

23 Rĩmã sũur yɩɩ noog wʋsgo, t’a yeel tɩ b yiis a Dãniyɛll bokã pʋgẽ. B sẽn yiis a Dãniyɛllã, b mikame tɩ baa fʋɩ pa maan-a ye. Bala a ra teega a Wẽnnaamã.+

24 Rẽ poore, rĩmã kõo noor tɩ b tall neb nins sẽn dõd* a Dãniyɛllã n wa. B lob-b-la gɩgma wã bokẽ ne b kambã la b pagbã. B pa yã n ta bokã tẽngr la gɩgma wã kogs-ba, n kao b kõabã zãnga.+

25 Dẽ, rĩm a Daryuus gʋlsa sebr n tool buud toɛy-toɛyã fãa neba, sẽn be tẽns toɛy-toɛy pʋsẽ, la sẽn gomd buud-goam toɛy-toɛy n be dũniyã gill zugã,+ n yeel yaa: “Wẽnd na kõ-y laafɩ wʋsgo! 26 Mam yiisa noor n wilg tɩ mam soolmã zĩig fãa, nebã segd n zoee a Dãniyɛll Wẽnnaamã la b waoog-a.+ Bala yẽ n yaa Wẽnnaam ning sẽn vɩ wã. A paada wakat fãa yĩnga. A rĩungã pa na n tol n sãame, t’a naamã me paad wakat sẽn kõn sa yĩnga.+ 27 A kogendame,+ n fãagdẽ, la a maand bãn la yel-soalem saasẽ la tẽngã zugu.+ Bala a fãaga a Dãniyɛll gɩgma wã nao-yẽesẽ.”

28 Woto, a Dãniyɛll yɛlã yɩɩ sõma a Daryuus naamã wakate,+ la Pɛrs ned a Sirus naamã wakate.+

7 Babilon rĩm a Bɛlsazaar+ naamã pipi yʋʋmdã, a Dãniyɛll zãmsa zãmsd la a yã vẽnegr toor-toor a sẽn wa n gãe a gãagã zugu.+ Rẽ poore, a gʋlsa zãmsdã.+ A gʋlsa bũmb nins a sẽn yã wã fãa zãnga. 2 A Dãniyɛll yeelame yaa:

“Mam sẽn wa n get vẽnegr toor-toorã ne yʋngã, mam yãa saasẽ sobd a naasã sẽn dãmbd mogrã sẽn yalmã,+ 3 tɩ rũm-bɛd a naas+ yi mogrẽ wã. B baa a ye ra pa wõnd a to ye.

4 Pipi soabã ra wõnda gɩgemde.+ A ra tara sɩlg pɩgsa.+ Mam gesame hal tɩ b wa võ a pɩgsã, la b yik-a n yals nao a yiib zug wa ninsaala. Sẽn paase, b kõ-a-la ninsaal sũuri.

5 “Rẽ poore, mam yãa rũng a to. Yaa rũng a yiib-n-soab sẽn wõnd urse.*+ A ra kɩll n yasame, tɩ sĩif kõab a tãab be a noorẽ wã, a yẽnã sʋka. B yeel-a lame yaa: ‘Yik n wãb nemd wʋsgo.’+

6 “Mam da ket n getame, n wa yã rũng a to sẽn wõnd ãbga.+ La pɩgs a naas sẽn wõnd bõn-yɩgdg pɩgs n da be a poorã zugu. Rũngã ra tara zut a naase.+ B kõ-a-la tõog sẽn na yɩl t’a rɩ naam.

7 “Rẽ poore, mam kell n gesa vẽnegr toor-toorã mam sẽn paam ne yʋngã. Mam yãa rũng a naas-n-soab sẽn kẽesd rabeem, sẽn yɩkd pɛleng la sẽn tar pãng wʋsgo. A ra tara yẽn-bɛd sẽn yaa kutu. A ra wãbda bũmb ning fãa sẽn gũbg-a wã la a neemd-ba. A ra tabda sẽn kellã ne a naoã.+ A ra yaa toor ne rũms nins fãa sẽn deng-a wã, n tar yɩɩl piiga. 8 Mam sẽn wa n maag m yĩng n get yɩɩlã, mam yãa yɩɩll a to sẽn yi b sʋka. Yaa yɩɩn-bila.+ Pipi yɩɩlã sʋka, b võo yɩɩl a tãab yẽ taoore. Mam yãa nin sẽn wõnd ninsaal nin yɩɩllã zugu, la noor sẽn gomd gom-bɛda.*+

9 “Mam kell n gesame, hal tɩ b wa rɩgl gɛya, tɩ Soab ning sẽn be wakat fãa yĩngã+ zĩndi.+ A futã ra yaa peels wa sa-lamdo,+ t’a zugã zoobd yaa wa rũms kõbd sẽn yaa peelse. A geerã ra yaa bug-witim. A geerã naoã ra yaa bugum sẽn wita.+ 10 Bugum kʋɩlg n da yit a taoorã n zoetẽ.+ Malɛgs tusr naoor tusa n da tʋmd a yĩng wakat fãa, tɩ malɛgs tus-piig naoor tus-piig yas a taoore.+ Bʋ-kaoodã*+ zĩndame, tɩ b lags sɛba.

11 “Wakat kãnga, mam da ket n getame, yɩɩllã gom-bɛdã* rãamd yĩnga.+ Mam kell n gesame hal tɩ b wa kʋ rũngã n sãam a yĩngã, la b rɩk-a n lob bugmẽ wã sẽn na yɩl t’a rɩ. 12 La sã n yaa ne rũms nins sẽn ketã,+ b reega b naamã, la b bas-b lame tɩ b kell n vɩɩmd wakat a wãn yĩnga.

13 “Mam sẽn da ket n get vẽnegr toor-toorã mam sẽn paam ne yʋngã, mam wa n yãa bũmb sẽn wõnd ninsaal bi-ribla,+ n wat ne sawatã sẽn be saasẽ wã. B kõ-a-la sor t’a kẽ Soab ning sẽn be wakat fãa yĩngã nengẽ.+ B tall-a lame n kolg-a. 14 B kõ-a-la naam,+ ziir+ la rĩungu, tɩ buud toɛy-toɛyã sẽn be tẽns toɛy-toɛyã, la sẽn gomd buud-goam toɛy-toɛyã fãa segd n sak-a.+ A naamã yaa naam sẽn paad wakat fãa n pa na n tol n loog ye. A rĩungã pa na n tol n sãam ye.+

15 “La maam a Dãniyɛll sũurã sãama wʋsgo, bala vẽnegr toor-toorã mam sẽn yã wã kẽesa maam rabeem.+ 16 Mam kolga malɛgs nins sẽn da yas be wã a ye n na n sok n bãng bõn-kãensã võor meng-menga. Dẽ, a leoka maam n bilg maam bõn-kãensã võore, n yeele:

17 “‘Rũm-bɛd a naasã+ yaa rĩm-dãmb a naas sẽn na n yik dũniyã zugu.+ 18 La b na n dɩka rĩungã n kõ+ Wẽnnaam ning sẽn ka to wã nin-sõamyã wã.+ Bãmb na n soog-a-la+ wakat fãa yĩnga, n-ye, wakat sẽn kõn sa yĩnga.’

19 “Mam da baood n bãnga bũmb wʋsg rũng a naas-n-soabã zugu. A ra yaa toor ne a taabã fãa. A ra kẽesda rabeem wʋsgo, n tar yẽn sẽn yaa kutu, la nao-yẽes sẽn yaa zũudu. A ra wãbda bũmb ning fãa sẽn gũbg-a wã la a neemd-ba. A ra tabda sẽn kellã ne a naoã.+ 20 Sẽn paase, m da rat n bãnga bũmb wʋsg yɩɩl piigã+ sẽn be a zugẽ wã wɛɛngẽ, la yɩɩll a to wã sẽn yi tɩ yɩɩl a tãab lʋɩ a taoorã wɛɛngẽ,+ rat n yeel tɩ yɩɩll ning sẽn tar nin la noor sẽn gomd gom-bɛda,* la bedrem sẽn yɩɩd yɩɩl a taabã.

21 “Mam da ket n getame, n ne yɩɩlã sẽn zabd ne nin-sõamyã wã, n tõogd-ba,+ 22 hal tɩ Soab ning sẽn be wakat fãa yĩngã+ wa, n kao bʋʋd n kõ Wẽnnaam sẽn ka to wã nin-sõamyã wã bʋʋm,+ tɩ wakat ning b sẽn yãk tɩ nin-sõamyã wã na n deeg rĩungã ta.+

23 “Ad a sẽn yeele: ‘Sã n yaa ne rũng a naas-n-soabã, yaa rĩung a naas-n-soab sẽn na n zĩnd tẽngã zugu. A na n yɩɩ toor ne rĩmd a taabã fãa. A na n tõoga dũniyã gilli, n tab-a n bedse.+ 24 Sã n yaa ne yɩɩl piigã, yaa rĩm-dãmb piig sẽn na n yi rĩun-kãng pʋgẽ. La rĩm a to n na n pʋgl rĩm-kãens n yi. A na n yɩɩ toor ne pipi rãmbã. A na n ninga rĩm-dãmb a tãab yãnde.+ 25 A na n goma Sẽn ka-a to wã wẽnga.+ A na n namsa Wẽnnaam ning sẽn ka to wã nin-sõamyã wã wakat fãa. A na n baoo n toeema wakatã la tõogã. B na n basa nin-sõamyã wã a nugẽ wakat a ye, wakat a yiibu, la wakat pʋɩ-sʋka.*+ 26 La bʋ-kaoodã* zĩndame. B reega a naamã n bas-a, sẽn na yɩl n sãam-a la b menes-a zãnga.+

27 “‘B rɩka rĩungã, naamã la rĩmd nins fãa sẽn be saasã tẽngrã ziir n kõ Wẽnnaam ning sẽn ka to wã nin-sõamyã wã.+ B rĩungã yaa rĩung sẽn paad wakat fãa.+ Soolem toor-toorã fãa neb na n tʋm n kõ-b lame la b sak-ba.’

28 “Kibarã baasg la woto. Sã n yaa ne maam a Dãniyɛlle, mam tagsa wã kẽes-m-la rabeem wʋsgo, hal tɩ m nengã pelge.* La mam kell n bĩnga kibarã m sũurẽ.”

8 Rĩm a Bɛlsazaar+ naamã yʋʋm a tãab-n-soabã, maam a Dãniyɛll yãa vẽnegre, vẽnegr ning mam sẽn yã pĩndã poore.+ 2 Mam yãa vẽnegrã, la mam sẽn gesã, mam da bee Suuz+ sẽn yaa na-yirã* sẽn be Elam soolmẽ wã.+ Mam sẽn wa n get vẽnegrã, m da bee Ulayi ko-soogã noore. 3 Mam sẽn zẽk m nengã, m yãa pe-raoog+ sẽn yas ko-soogã noore, n tar yɩɩl a yiibu.+ Yɩɩl a yiibã ra yaa wogdo, la a yembr woglem n da yɩɩd a to wã. Sẽn yaa-a wok n yɩɩdã n yɩ yaoolem n yi.+ 4 Mam yãa pe-raoogã sẽn tãad nin-taoor sẽnese, rɩtg la goabg sẽnese, tɩ we-rũng baa a ye pa tõe n yals a taoor ye. Ned baa a ye ra pa tõe n fãag a to a nugẽ* ye.+ A ra maanda sẽn noom-a, la a wukd a menga.

5 Mam sẽn wa n ket n getẽ wã, mam yãa boɛɛg+ sẽn yi nin-taoor* n watẽ. A ra gilgda dũniyã gilli, t’a naoã pa sɩɩsd tẽngã ye. Boɛɛgã ra tara yɩɩll sẽn yaa bedr a ninã sʋka.+ 6 A ra wata pe-raoog ning sẽn tar yɩɩl a yiibã mam sẽn da yã t’a yas ko-soogã noorã sẽnese. A ra tees-a lame n zoet n wat ne sũ-pu-kãsenga.

7 Mam yãa a sẽn kolgd pe-raoogã, t’a sũurã ra yik wʋsg ne-a. A tãa pe-raoogã n kao a yɩɩl a yiibã, tɩ pe-raoogã pa tõog n maan-a bũmb ye. A luba pe-raoogã tẽng n tab-a, tɩ ned ra kae n na n fãag-a a nugẽ* ye.

8 Rẽ poore, boɛɛgã wuka a meng hal wʋsgo, la a sẽn wa n paam pãngã bala, a yɩɩn-bedrã kaoogame. Yɩɩn-bɛd a naas n yi n ledg yɩɩn-yɛngã zĩigẽ, n tees ween-vɩɩs a naasã.*+

9 Yɩɩll a to n yi yɩɩn-kãens a yembr zugu. Yaa yɩɩn-bila. A bɩɩme n lebg wok wʋsgo, n tees goabga, yaang* la Tẽn-neerã.+ 10 A bɩɩme n lebg wok hal n ta saasẽ tãb-biisã. A kɩtame tɩ tãb-biis la ãds kẽer lʋɩ t’a tab-ba. 11 A wuka a meng ne tãb-biisã Naab menga, n gɩdg tɩ b ra le maan maand daar fãa* n kõ-a* ye. Sẽn paase, a tusa a zĩ-sõngã b sẽn da lugl kãn-kãe wã n lubi.+ 12 Yel-wẽnã yĩnga, b basa tãb-biis a nugẽ la b bas daar fãa* maandã maanego. A ra lobda sɩdã tẽnga. A tõog n maana a sẽn da rat bũmb ningã.

13 Mam wʋma malɛk sẽn gomde, tɩ malɛk a to sok sẽn gomd-a wã yaa: “Vẽnegr ning sẽn gomd daar fãa* maandã ne yel-wẽndã sẽn wat ne sãoongã yellã,+ n paas zĩ-sõngã ne tãb-biisã tabrã na n kaoosa wakat a wãna?” 14 Rẽ la a yeel maam yaa: “A na n kaoosa zaabr la yibeoog tus a yi la kobs-tã. Rẽ poore, b na n kɩtame tɩ zĩ-sõngã le yɩ wa a sẽn segd n yɩ to-to wã.”

15 Maam a Dãniyɛll sẽn wa n get vẽnegrã, n baood n na n wʋm a võorã, zĩig pʋgẽ, mam yãa bũmb sẽn wõnd ninsaal t’a yas mam taoore. 16 Dẽ, mam wʋma ned koɛɛg Ulayi ko-soogã sʋka.+ A zẽka a koɛɛg n yeele: “Gabriyɛlle,+ wilg ra-kãngã a sẽn yã bũmb ningã võore.”+ 17 A kolga zĩig ning mam sẽn da yasã. La a sẽn ta wã, rabeem yõka maam wʋsg hal tɩ m lʋɩ n fõgen m neng tẽnga. A yeela maam yaa: “Foom a ninsaal biiga, bãng tɩ vẽnegrã yaa saabã wakat yĩnga.”+ 18 La a sẽn wa n gomd ne maamã, mam gũsa tamm tɩ m nengã fõg tẽnga. Rẽ n so t’a sɩɩs maam n kɩt tɩ m yik n yaas zĩig ning m sẽn da yasã.+ 19 Rẽ poore, a yeelame yaa: “Mam na n wilga foo bũmb ning sẽn na n maan Wẽnnaam sũ-puugrã wakat baasgẽ, bala vẽnegrã yaa wakat ning b sẽn yãk tɩ na n yɩ saabã wakatã yĩnga.+

20 “Pe-raoog ning sẽn tar yɩɩl a yiibã fo sẽn yã wã makda Medi ne Pɛrs rĩm-dãmbã.+ 21 Boɛɛg ning sẽn tar kõbd wʋsgã makda Gɛrɛs rĩmã,+ tɩ yɩɩn-bedrã sẽn da be a ninã sʋkã makd pipi rĩmã.+ 22 Yɩɩllã sẽn kaoog tɩ yɩɩl a naas yi a zĩigẽ wã,+ rat n yeelame tɩ rĩmd a naas n na n yi bu-kãng pʋgẽ, la b pãngã pa na n ta-a ye.

23 B rĩungã baasg wakate, yel-wẽn-maandbã tʋʋmã sã n wa pidi,* rĩm sẽn yaa toaag wʋsg n na n wa. Yaa rĩm sẽn wʋmd gom-bɩndem. 24 A na n lebga kãsenga, la pa na n tũ ne a mengã pãng ye. A na n waa ne sãoong wʋsgo. A na n tõoga bũmb ning fãa a sẽn maande. A na n waa ne sãoong pãens rãmbã sʋka, la nin-sõamyã wã sʋka.+ 25 A sɩlmã yĩnga, a na n tũnuga ne belgr n tõog n maan a sẽn datã. A na n wuka a meng a sũurẽ wã. A na n sãama neb wʋsg b sẽn wat n zĩ bãan wakate.* A na n yikame meng n zab ne nanambsã Naaba, la b na n sãam-a lame* tɩ pa tũ ne ninsaal nug ye.

26 “Bũmb ning b sẽn yeel vẽnegrã pʋgẽ zaabr la yibeoogã wɛɛngẽ wã yaa sɩda, la fo segd n solga vẽnegrã, bala a gomda wakat sẽn ket n zãr yelle.”+

27 La sã n yaa ne maam a Dãniyɛlle, mam yaamsã yɩɩ wʋsgo. Mam lʋɩɩ bãag rasem a wãna.+ Rẽ poore, mam yikame n tʋm rĩmã tʋʋma.+ La bũmb ning mam sẽn yã wã kɩtame tɩ m gĩinã maage. Sẽn paase, ned baa a ye ra pa tõe n wʋm a võor ye.+

9 A Asuerus biig a Daryuus naamã pipi yʋʋmdã,+ (a yaa Medi ned b sẽn kɩt t’a lebg Kalde nebã soolmã rĩma,)+ 2 a naamã pipi yʋʋmdã pʋgẽ, maam a Dãniyɛll karma sɛbã,* n bãng yʋʋm nins sõor a Zeova sẽn da togs no-rɛɛs a Zeremi tɩ Zerizalɛm na n kell n yɩɩ raboogã,+ rat n yeel tɩ yʋʋm pis-yopoe wã.+ 3 Rẽ n so tɩ mam wẽnemd m neng n tees Wẽnnaam a Zeova, n na n pʋʋs-a n yõk a sɛɛga. Mam loee noore,+ n sẽgen bot la m yug m meng ne tompɛglem. 4 Mam pʋʋsa m Wẽnnaam a Zeova la m vẽneg d yel-wẽnã n togse, n yeel yaa:

“Yãmb a Zeova sẽn yaa Wẽnnaam sɩd-sɩdã, yãmb n yaa Soab ning sẽn yaa kãsenga, tɩ nebã segd n zoe yãmb la b waoog-yã. Yãmb pidsda y kaoolã, la y maand neb nins sẽn nong yãmb la b tũud yãmb noyã neere.+ 5 Tõnd maana yel-wẽna. Tõnd maana sẽn yaa wẽnga. D tʋma tʋʋm-wẽnse. D yɩɩ tõatba.+ Sẽn paase, tond bʋdgame n bas yãmb noyã la y tõodã. 6 Tõnd pa kelg no-rɛɛsdbã sẽn yaa yãmb tʋm-tʋmdbã+ sẽn da gomd yãmb yʋʋr yĩngã ye. B goma ne tõnd rĩm-dãmbã, d nanambsã, d yaab-rãmbã la ne soolmã nin-buiidã fãa. 7 Yãmb a Zeova n so tɩrlem, tɩ tõnd so yãnd wa sẽn yaa to-to rũndã-rũndã wã. Yaa Zida nebã, Zerizalɛm nebã la Israyɛll nebã fãa, sẽn pẽ-b la sẽn zãr-bã, n be soolem nins fãa pʋsẽ yãmb sẽn sãeeg-bã, b sẽn pa maan sɩd ne yãmbã yĩnga.+

8 “Zeova, tõnd n so yãnde, tõnd ne d rĩm-dãmbã, d nanambsã la d yaab-rãmbã, bala tõnd maana yel-wẽn n beeg yãmba. 9 Tõnd Wẽnnaam a Zeova n so nimbãan-zoeer la sugri,+ bala tõnd kɩɩs-a lame.+ 10 Tõnd pa sak d Wẽnnaam a Zeova koɛɛgã, n tũ a tõodã a sẽn tũnug ne no-rɛɛsdbã sẽn yaa a tʋm-tʋmdbã n kõ-dã ye.+ 11 Israyɛll nebã fãa kɩɩsa yãmb Tõogã, la b wẽnemd n pa sak yãmb koɛɛgã, hal tɩ yãmb kɩt tɩ kãab-wẽng ning sẽn naag ne wẽenegã wa tõnd zutu, tõnd sẽn maan yel-wẽn n beeg yãmbã yĩnga. B gʋlsa kãab-wẽn-kãng Wẽnnaam tʋm-tʋmd a Moyiiz Tõogã pʋgẽ.+ 12 Yãmb pidsa y sẽn da yeel tɩ y na n sɩbga tõnd+ ne d taoor dãmbã sẽn da so tõndã,* n kɩt tɩ yel-beed sẽn yaa kãseng wa tõnd zutu. Saasã tẽngr fãa, bũmb ning sẽn maan Zerizalɛmmã buud ra nan zɩ n maan ye.+ 13 Yel-be-kãngã fãa waa tõnd zut+ wa b sẽn gʋls a Moyiiz Tõogã pʋgẽ wã. Baa ne rẽ, tõnd pa yõk d Wẽnnaam a Zeova sɛɛg sẽn na yɩl t’a maan-d lohorem ye. Tõnd pa tek yam n bas d kongrã,+ la d maag d yĩng n kelg sɩdã ye.*

14 “Rẽ n so t’a Zeova kell n gũusi, n kɩt tɩ yel-beed wa tõnd zutu, bala tõnd Wẽnnaam a Zeova yaa tɩrg tʋʋm nins fãa a sẽn tʋmã pʋgẽ. Baasgo, tõnd pa sak a koɛɛgã ye.+

15 “Masã, tõnd Wẽnnaam a Zeova sẽn yaa Soab ning sẽn yiis a nin-buiidã Ezɩpt soolmẽ wã ne nug sẽn tar pãnga,+ n kɩt t’a yʋʋrã yi hal n tãag rũndã wã,+ tõnd maana yel-wẽna, la d tʋm tʋʋm-wẽnse. 16 Zeova, yãmb sẽn maand tɩrg wakat fãa wã,+ m bõos tɩ y kɩt tɩ y sũurã sẽn yik wʋsg ne Zerizalɛm tẽngã sẽn yaa yãmb tãn-sõngã sigi. Bala tõnd yel-wẽnã la d yaab-rãmbã kongrã yĩnga, Zerizalɛm ne yãmb nin-buiidã lebga bũmb neb nins fãa sẽn gũbg tõndã sẽn yaande.+ 17 Tõnd Wẽnnaam, kelg-y y tʋm-tʋmdã pʋʋsg la a se-yõkrã. Zeova, kɩt-y tɩ y nengã vẽenem yãg y roogã sẽn sãamã zugu,+ yãmb mengã yĩnga. 18 Mam Wẽnnaam, kɩll-y y tʋbr n kelge! Puk-y y nin n ges tõnd yɛlã sẽn sãam to-to wã, la y ges tẽng ning sẽn da zãad yãmb yʋʋrã. Bala tõnd pa yõkd yãmb sɛɛg d tʋʋm-tɩrs yĩng ye. Yaa yãmb nimbãan-zoeerã sẽn yaa kãsengã yĩnga.+ 19 Zeova, kelg-y-yã. Zeova, maan-y sugri.+ Zeova, maag-y y yĩng n ges la y maan bũmbu! Mam Wẽnnaam, yãmb mengã yĩng bɩ y ra bas tɩ kaoos ye. Bala yãmb tẽngã ne y nin-buiidã zãada yãmb yʋʋrã.”+

20 Mam sẽn wa n ket n gomda, n pʋʋsdẽ, n vẽnegd m yel-wẽnã ne Israyɛll nin-buiidã yel-wẽn n togsdẽ, la m yõkd m Wẽnnaam a Zeova sɛɛg a tãn-sõngã wɛɛngẽ wã,+ 21 n-ye, mam sẽn wa n ket n pʋʋsdẽ wã, rao a Gabriyɛll+ mam sẽn da yã vẽnegrã pʋgẽ wã+ waa mam nengẽ. Rẽ tɩ mam da yaa wʋsgo. Ra yaa zaabr maoongã kũun wakat sẽnese. 22 A sõnga maam tɩ m wʋm bũmb nins sẽn na n maanã võore, n yeele:

“Foom a Dãniyɛlle, mam waame n na n kõ foo yam-vẽenem la bãngre. 23 Fo sẽn wa n sɩng f se-yõkrã, gomd n yi Wẽnnaam nengẽ, tɩ m wa n na n togs foo gom-kãnga, bala fo yaa ned sẽn tar yõod wʋsgo.*+ Woto wã, kelg mam sẽn na n yeel foo bũmb ningã neere, n wʋm vẽnegrã võore.

24 “B yãka rasem a yopoe* naoor pis-yopoe fo buudã yĩnga, la f tẽn-sõngã yĩnga,+ n na n kɩt tɩ beegrã ne yel-wẽndã sa,+ la b maan paasg* kongrã yĩnga,+ n kɩt tɩ tɩrlem sẽn pa sat wa,+ n wilg tɩ vẽnegrã la bãngr-gomdã* yaa sɩda,+ la b zae Zĩ-sõng sẽn yɩɩdã. 25 Ad fo sẽn segd n bãng bũmb ning la f wʋm a võore: Wakat ning b sẽn na n yiis noor n yeel tɩ b lebs n maneg Zerizalɛm la b lebs n me-a wã+ n tãag Mesi*+ sẽn yaa Taoor soabã waoongo,+ rasem a yopoe naoor a yopoe n na n zĩndi. Rasem a yopoe naoor pis-yoob la a yiib me n na n zĩndi.+ B na n lebs n maneg-a lame la b lebs n me-a t’a tar zãma zĩiga, la b tu bok n gilg-a. La na n yɩɩ sũ-sãang wakate.

26 “Rasem a yopoe naoor pis-yoob la a yiibã poore, b na n kʋʋ Mesi wã,+ n pa bas-a ne bũmb ye.+

“Rẽ poore, taoor soab sẽn wat tãb-biis n na n sãam tẽngã ne zĩ-sõngã.+ A saabã na n yɩɩ wa sa-kãseng sẽn sãamd to-to wã. Hal n tãag saabã, na n yɩɩ zaba. Wẽnnaam yãka yam tɩ sãoong na n zĩnd be.+

27 “A na n kell n talla kaoolã neb wʋsg nafr yĩng rasem a yopoe. Rasem a yopoe wã pʋɩ-sʋka, a na n kɩtame tɩ maoong la kũun sa.+

“Sẽn wat-a ne sãoongã+ na n zĩnda bõn-yoodã pɩgsr zugu. B na n kiiga bũmb nins b sẽn yãk yam n na n maanã me sẽn yaa-a raboogã zugu, hal t’a wa sãam zãnga.”

10 Pɛrs rĩm a Sirus+ naamã yʋʋm a tãab-n-soabã, a Dãniyɛll b sẽn boond me t’a Bɛltesazaarã paama vẽnegre.+ Koɛɛgã yaa sɩda, n gomd zab-kãseng yelle. A wʋma koɛɛgã võore. B kɩtame t’a wʋm bũmb ning a sẽn yã wã võore.

2 Wakat kãng tɩ maam a Dãniyɛll ra maanda sũ-sãang+ hal rasem pisi la a ye tõre. 3 Rasem pisi la a ye wã tõre, mam pa rɩ rɩ-noog ye. Nemd wall divẽ pa kẽ mam noorẽ wã ye. Mam pa zae m yĩngã kaam me ye. 4 Pipi kiuugã rasem pisi la a naas-n-soabã daare, mam sẽn wa n be kʋɩl-kãsengã b sẽn boond tɩ Tɩɩgrã*+ noore, 5 mam zẽka m neng n yã rao sẽn yer lẽ gĩs fuugu,+ n sẽb Ufaaz sãnem sẽbdg a sɛɛgẽ. 6 A yĩngã ra yaa wa kirzolit kugri,+ t’a nengã yalẽ yaa wa sa-yãgbo. A ninã ra yaa wa bug-vɩlense. A nusã ne a naoã ra yaa wa zũud b sẽn tẽg tɩ pɩnda,+ t’a koɛɛgã rãamd yaa wa neb kʋʋng koees rãamde. 7 Yaa maam a Dãniyɛll bal n yã vẽnegrã. Rap nins sẽn da be ne maamã pa yã-a ye.+ La b yɛɛsa wʋsgo, n zoe n tɩ solge.

8 Dẽ, mam paa m yembre. Mam sẽn yã vẽneg-kãngã sẽn yaa kãsengã, mam pãngã yi n bas-m lame. Mam nengã pelga wʋsgo, tɩ mam pãngã fãa sa.+ 9 Mam wʋma sẽn da gomd-a wã koɛɛgã rãamde. La mam sẽn wʋm a sẽn gomdã, mam gũsa tamm tɩ m nengã fõg tẽnga.+ 10 La ned nug n sɩɩs maam+ n kɩt tɩ m yĩgimd m rũmã zut tɩ m nusã tik tẽnga. 11 Rẽ poore, a yeela maam yaa:

“Foom a Dãniyɛlle, fo yaa ned sẽn tar yõod wʋsgo.*+ Maag f yĩng n kelg goam nins mam sẽn na n togs-fã. Masã, yik n yals f zĩigẽ wã, bala b tʋma maam fo nengẽ.”

A sẽn togs maam bõn-kãnga wã, mam yikame n yas n digda.

12 Dẽ, a yeela maam yaa: “Dãniyɛlle, ra zoe rabeem ye.+ Hal pipi daarã fo sẽn yãk yam n na n bao bãngre, la f sik f meng f Wẽnnaamã taoorã, a wʋma fo pʋʋsgã. Yaa fo pʋʋsgã yĩng la mam wa-yã.+ 13 La Pɛrs rĩungã naab+ gɩdga maam rasem pisi la a ye. La a Mikayɛll*+ sẽn yaa na-kãseng a ye wã* wa n sõnga maam. Mam paa be, Pɛrs rĩm-dãmbã sɛɛgẽ. 14 Mam waame n na n sõng foo tɩ f bãng bũmb ning sẽn na n paam fo buudã beoog sẽn wate.+ Bala yaa vẽnegr sẽn gomd bũmb ning sẽn na n maan beoog-daarã yelle.”+

15 A sẽn wa n togsd maam gom-kãensa wã, mam sulga m nengã tẽng n pa tõe n gom ye. 16 Bũmb sẽn wõnd ninsaal n sɩɩs mam no-bɩmsã,+ tɩ mam yaag m noorã n yeel sẽn da yas-a mam taoorã yaa: “M zu-soaba, vẽnegrã kɩtame tɩ mam digda. Mam pa le tar pãng ye.+ 17 Woto wã, mam sẽn yaa m zu-soabã tʋm-tʋmdã na n yɩɩ wãn n gom ne m zu-soabã?+ Bala mam pa le tar pãng ye. Vʋʋsem me pa le be mam pʋgẽ ye.”+

18 Sẽn wõnd-a ninsaalã le sɩɩsa maam n kõ-m pãnga.+ 19 Rẽ poore, a yeela maam yaa: “Foom a ned sẽn tar yõod wʋsgo,*+ ra zoe rabeem ye.+ Bɩ laafɩ zĩnd ne foo!+ Tall raoodo, n-ye, tall raoodo.” A sẽn wa n gomd ne maamã mam paama pãnga, n yeel yaa: “Bɩ m zu-soabã gome, bala yãmb kõo maam pãnga.”

20 A yeelame yaa: “Fo mii mam sẽn wa fo nengẽ wã võore? Masã, m na n lebg n tɩ zaba ne Pɛrs naabã.+ Mam sã n looge, Gɛrɛs naabã na n waame. 21 La mam na n togsa foo bũmb nins sẽn gʋls sɩdã sebr pʋgẽ wã. Ned kae n sõngd maam bõn-kãensã wɛɛngẽ, n zʋʋg a Mikayɛll+ sẽn yaa yãmb naabã ye.+

11 “Sã n yaa ne maam, Medi ned a Daryuus+ naamã pipi yʋʋmdã pʋgẽ, mam yikame n na n keng a raood la m paas-a pãnga.* 2 Mam sẽn na n togs foo masã wã yaa sɩda:

“Kelge! Rĩm-dãmb a tãab n na n le yik Pɛrs soolmã pʋgẽ, la naas-n-soabã na n paama arzɛgs wʋsg n yɩɩd a taabã fãa. A sã n wa paam pãng a arzɛgsã yĩnga, a na n kɩtame tɩ nebã fãa zab ne Gɛrɛs rĩungã.+

3 “Rĩm sẽn tar pãng n na n yik n dɩ naam ne pãn-kãsenga.+ A na n maana a sẽn date. 4 La a sã n wa paam pãng wʋsgo, a rĩungã na n wãame, n welg n tees ween-vɩɩs a naasã,*+ la rĩungã pa na n lebg a kambã ne a yagensã rẽnd ye. Sẽn paase, rĩungã pa na n kell n tall pãng wa yẽ sẽn wa n dɩt naamã sasa wã ye. Bala b na n deega* a rĩungã n kõ neb a taab sẽn pa a kamb wall a yagense.

5 “Goabg rĩmã na n paama pãnga, rat n yeel t’a naab a yembr n na n paam pãnga. La ned n na n tõog-a, n dɩ naam ne pãn-kãsenga, naam sẽn yɩɩd yẽ rẽndã.

6 “Yʋʋm a wãn poore, b na n maana kaoole, tɩ goabg rĩmã bi-puglã kẽng rɩtg rĩmã nengẽ* sẽn na yɩl n bao zems-n-taar sẽn zemse. La a kangã pa na n kell n tall pãng ye. Rĩmã meng na n lʋɩɩme. A na n konga a pãngã fãa me. B na n dɩk-a lame n ning neb a taab nusẽ, yẽ ne neb nins sẽn tall-a n wa wã n paas ned ning sẽn dog-a wã, la ned ning sẽn da kõt-a pãng wakat kãngã. 7 Tobeng n na n yi a yẽgẽ wã, n yik n ledg-a. A na n wa zaba ne tãb-biisã, la a zab ne rɩtg rĩmã tẽngã sẽn gũbg ne lalsã. A na n zaba ne-b n tõoge. 8 A na n lebg n waa Ezɩpt ne b wẽnnaam-dãmbã, b bõn-naands nins sẽn dõogã, b wanzuri la b sãnem te-neebã* la ne yembse. Yʋʋm a wãn pʋgẽ, a na n zãaga a meng ne rɩtg rĩmã. 9 Rɩtg rĩmã na n wa zaba ne goabg rĩmã rĩungã, la a na n lebg n leba a meng soolmẽ.

10 “Sã n yaa ne a kambã, b na n segla b mens zabr yĩnga, la b tigim tãb-biis ka tɛka. Sãmbg sẽn kae, b nin-yend* na n kẽe soolmã n kãag bũmb fãa wa sa-kãseng koom. La a na n lebg n waame, n zab hal n tãag a galʋ-tẽngã sẽn gũbg ne lalsã.

11 “Goabg rĩmã sũurã na n yika wʋsgo, t’a yi n na n tɩ zab ne-a, rat n yeel tɩ ne rɩtg rĩmã. A* na n tigma neb kʋʋngo, la b na n ninga kʋʋngã rĩm-kãng nugẽ. 12 B na n talla kʋʋngã n looge. A na n lebga wuk-m-meng soaba. A na n kɩtame tɩ neb tus ka tɛk lʋɩ. A na n paama pãng wʋsgo, la a pa na n dɩ a pãngã yõod ye.

13 “Rɩtg rĩmã na n lebg n waame. A na n tigma neb kʋʋng sẽn yɩɩd pipi rãmbã. Wakat a wãn loogr poore, rat n yeel tɩ yʋʋm a wãn loogr poore, a na n waa ne tãb-biis wʋsg la ne zab-teed wʋsgo. 14 Wakat kãnga, neb wʋsg na n yik n zaba ne goabg rĩmã.

“La sã n yaa ne fo buudã sʋk nen-kɛglem dãmbã,* b na n bao n kɩtame tɩ vẽnegr pidsi. La b pa na n tõog ye.

15 “Rɩtg rĩmã na n waame, n zam tãnd sẽn na yɩl n zab ne tẽng sẽn gũbg lalse. A na n tõog n deeg-a lame. Goabg rĩmã tãb-biisã* pa na n tõog n yals ye. Na n yɩɩ woto me ne a rap nins sẽn mi zabr sõma wã. B pa na n paam pãng n tõog n yals ye. 16 Sẽn wat-a n na n zab ne goabg rĩmã na n maana a sẽn date. Ned baa a ye pa na n tõog n yaas a taoor ye. A na n yalsa Tẽn-neerã pʋgẽ.+ A na n paama pãng n tõog n sãam neba. 17 A na n wẽnemda a neng* n wa ne a rĩungã pãng fãa. A na n maana kaool ne rĩm-kãnga. A na n tõoga bũmb ning fãa a sẽn maande. Sã n yaa ne pagbã bi-puglã, b na n dɩk-a lame n kõ-a t’a kʋ. Bi-puglã pa na n tõog toog ye. A pa na n kell n yɩ a rẽnd ye. 18 A na n wẽnemda a neng n tees tẽns nins sẽn be mogrã noorã, n dees tẽns wʋsgo. Tãb-biis taoor soab n na n kɩt t’a sẽn da paoogd yẽ wã sa, sẽn na yɩl t’a ra le paam paoogr ye. A na n kɩtame t’a paoogrã wẽneg n leb a meng zugu. 19 Rẽ poore, a na n wẽnemda a neng n lebg n wa a meng soolmã tẽns nins sẽn gũbg ne lalsã sẽnese. A na n lakame n lʋɩ, n meneme.

20 “Ned n na n yik n ledg-a. Yẽ soabã na n kɩtame tɩ ned sẽn deegd yõor-yaood* gilg rĩung ning sẽn yaa neerã. La rasem bilf poore, a na n kiime, la pa na n yɩ sũ-puugr pʋgẽ wall zabr pʋgẽ ye.

21 “La ned b sẽn kis n na n yik n ledg-a. B pa na n kõ yẽ soabã rĩungã naam ye. A na n waa nebã sẽn wat n zĩ ne bãan wakate,* n maan sɩlem n deeg rĩungã. 22 A na n tõoga tãb-biis* nins sẽn yaa wa koom sẽn zoet ne pãngã, n sãam-ba. Na n yɩɩ woto me ne kaoolã+ Taoor soabã.+ 23 Kaoolã b sẽn maan ne-a wã yĩnga, a na n maana zãmbo, la a zẽk n paam pãnga, buud sẽn yaa bilf maasem yĩnga. 24 Nebã sẽn wat n zĩ ne bãan wakate,* a na n kẽe soolmã zĩis nins sẽn tar arzɛgs n yɩɩdã, n maan bũmb a ba-rãmbã ne a yaab-rãmbã sẽn pa maane. A na n pʋɩɩ nebã te-zɛɛdem la teed a taaba. A na n maana sɩlem sẽn na yɩl n zab ne zĩis sẽn gũbg ne lalse, la na n yɩɩ wakat a wãn yĩng bala.

25 “A na n yika ne tãb-biis wʋsgo, n wɩsg a meng n zab ne goabg rĩmã ne a sũur fãa. Goabg rĩmã na n segla a meng zabrã yĩng ne tãb-biis ka tɛk la sẽn tar pãng wʋsgo. A pa na n tõog n yals ye. Bala b na n maana sɩlem n zãmb-a. 26 Neb nins sẽn dɩt a rɩ-noodã n na n wa ne a lʋɩɩse.

“Sã n yaa ne a tãb-biisã, b na n kãag-b lame.* B na n kʋʋ neb wʋsgo.

27 “Sã n yaa ne rĩm-dãmb a yiibã, b sũyã na n bee wẽng maanego. B na n zĩi taabl-yɛngẽ n gomd zirẽ-be-goam ne taaba. La baa fʋɩ pa na n yɩ wa b sẽn datã ye. Bala saabã na n waa wakat ning Wẽnnaam sẽn yãkã.+

28 “A* na n lebg n leba a soolmẽ wã ne teed wʋsgo. A sũurã na n kisga kaool sẽn yaa sõngã. A na n tõoga bũmb ning fãa a sẽn maande, la a lebg n leb a soolmẽ wã.

29 “Wakat ning Wẽnnaam sẽn yãkã sã n ta, a na n lebgame n wa zab ne goabg soolmã. La wakat kãnga, pa na n yɩ wa pĩndã ye. 30 Bala Kitim koom-kogendã+ na n wa zaba ne-a, n ning-a yãnde.

“A na n lebgame, n sik a sũ-puugrã kaoolã sẽn yaa sõngã+ zugu. A na n tõoga bũmb ning fãa a sẽn maande. A na n lebg n waame, n kelg neb nins sẽn basd kaool sẽn yaa sõngã. 31 Tãb-biis* sẽn yit yẽ nengẽ n na n yiki. B na n dẽgma wẽnd-doogã+ sẽn yaa pãng zĩigã, la b kɩt tɩ b bas daar fãa* maandã maanego.+

“B na n lugla bõn-yook ning sẽn wat ne sãoongã.+

32 “A na n goma gom-nood* n kɩt tɩ neb nins sẽn kɩɩsd kaoolã n tʋmd tʋʋm-wẽnsã lebg wẽn-kɩɩsdba. La neb nins sẽn mi b Wẽnnaamã na n tõogame. B na n tõoga bũmb ning fãa b sẽn maande. 33 Neb nins sẽn tar yam-vẽenem+ nin-buiidã sʋkã na n sõnga neb wʋsg tɩ b paam bãngre. Rasem a wãn pʋgẽ, b na n leng-b lame: B na n kʋʋ kẽer ne sʋʋse, n yõog sãnda bugmẽ, n yõg kẽer n kẽng yembdo, la b zɛ sãnda teedo. 34 La b sã n wa lengd-ba, b na n paama sõngr bilfu. Neb wʋsg na n goma gom-nood* n paam n naag-ba. 35 B na n lenga sẽn tar-b yam-vẽenemã kẽer sẽn na yɩl tɩ nebã paam makr bãmb yĩnga, la b kell n yɩlg nebã+ hal n tãag saabã wakate. Bala saabã na n waa wakat ning Wẽnnaam sẽn yãkã.

36 “Rĩmã na n maana a sẽn date. A na n wuka a menga, n zẽk a meng n yɩɩg wẽnnaam buud fãa. A na n goma gom-bɛd n paoog wẽnnaam-dãmb Wẽnnaamã.+ A na n tõoga bũmb ning fãa a sẽn maande, hal n tãag sũ-puugrã saabo. Bala Wẽnnaam sẽn yãk yam ningã na n pidsame. 37 A na n maana a toog kae ne a yaab-rãmbã Wẽnnaam. A toog pa na n zĩnd ne pagbã tʋlsem, wall ne wẽnnaam a to me ye. La a na n zẽka a meng n yɩɩg ned buud fãa. 38 A na n waooga tãn-soben-dotã wẽnnaam. A na n talla sãnem, wanzuri, kug-neeb la bõn-sõma a taab* n waoog wẽnnaam a yaab-rãmbã sẽn pa bãnge. 39 A na n zaba ne soondg zĩis nins sẽn tar pãng wʋsgã ne wẽn-sãang sõngre, n tõoge. A na n kõo neb nins sẽn teend-a wã ziir-kãsenga, la a kɩt tɩ b rɩ naam neb wʋsg sʋka. A na n pasa* tẽngã n kõ ned ning fãa sẽn na n yao.

40 “Saabã wakate, goabg rĩmã na n yikame tɩ b teeg taaba.* Rɩtg rĩmã na n kẽ-a-la ne pãng wa sob-kãsenga. A na n waa ne saar-dãmba,* wed-rʋʋdb la koom-kogend wʋsgo. A na n kẽe soolem toɛy-toɛyã n kãag bũmb fãa wa sa-kãseng koom. 41 A na n kẽe Tẽn-neerẽ wã+ me. Soolem wʋsg na n lʋɩɩme. La ad soolem nins sẽn na n põs a nugẽ wã: Yaa Edom ne Mowaab la Amon nebã soolmã babg ning sẽn tar yõod n yɩɩdã. 42 A na n ket n tẽegda a nug n zabd ne soolem toɛy-toɛyã. Ezɩpt soolmã meng pa na n põs ye. 43 A na n sooga Ezɩpt paoongã sẽn solgã sẽn yaa sãnem ne wanzuri wã, la a soog a bõn-sõma wã* fãa. Libi ne Etiyopi nebã na n tũu a naoã.*

44 “La kibay sẽn yit yaang* ne rɩtg n na n yik a sũuri, t’a yi ne sũ-pu-kãseng n na n sãam neb wʋsg la a menes-ba. 45 A na n tilga a naam fu-rotã mog-kãsengã ne Tẽn-neerã+ tãn-sõngã sʋka. A na n kell n taa a saabã, tɩ ned baa a ye kae n na n sõng-a ye.

12 “Wakat kãnga, a Mikayɛll*+ sẽn yaa na-kãsengã+ sẽn yas fo buudã neb* yĩngã na n yikame. Toog wakat n na n zĩndi. Sẽn sɩng buud sẽn be tẽngã zug tɛk n tãag wakat kãnga, toog a woto buud zɩ n zĩnd ye. Wakat kãnga, fo buudã neb na n põsame,+ rat n yeel tɩ ned ning fãa yʋʋr b sẽn na n yã sebrã+ pʋgẽ na n põsame. 2 Sẽn gõe-b tẽngã tomẽ wã wʋsg me na n nekame. Kẽer na n yik n paama vɩɩm sẽn pa sate, tɩ sãnda paam paoogr la yaalg sẽn pa sate.

3 “Sẽn tar-b yam-vẽenemã na n yãga wʋsg wa sa-gãongã, tɩ sẽn sõngd-b neb wʋsg tɩ b lebgd tɩrsã yãg wa ãdsã wakat sẽn kõn sa yĩnga.

4 “La sã n yaa ne foom a Dãniyɛlle, solg gom-kãensã, la f sog sebrã hal n tãag saabã wakate.+ Neb wʋsg na n vaees-a lame,* la bãngr hakɩɩkã na n lebga wʋsgo.”+

5 Rẽ poore, maam a Dãniyɛll zẽka m neng n yã malɛgs a yiib a taab sẽn yase. A ye wã ra yasa kʋɩlgã noor a ye, t’a to wã yas kʋɩlgã noor a to wã.+ 6 A yembr soka rao ning sẽn yer lẽ gĩs fuug+ n be kʋɩlgã koom zugã yaa: “Na n kaoosa wakat a wãn tɩ yaool n ta bõn-kãensã sẽn yaa kãsemsã saabo?” 7 Dẽ, mam yãa rao ning sẽn yer lẽ gĩs fuug n be kʋɩlgã koom zugã sẽn zẽk a rɩtg nugã ne a goabg nugã n tees saasã, n wẽen ne Soab ning sẽn vɩ wakat fãa yĩngã+ n yeel yaa: “B yãka wakat a ye, wakat a yiibu, la wakat pʋɩ-sʋk* bõn-kãens yĩnga. B sã n wa kɩt tɩ nin-sõamyã wã pãng sa bala,+ bõn-kãensã fãa na n taa b tɛka.”

8 Sã n yaa ne maam, mam wʋmame, la m da pa tõe n wʋm a võor ye.+ Dẽ, mam sokame yaa: “M zu-soaba, bõn-kãensã baasg na n yɩɩ wãna?”

9 T’a yeel yaa: “Dãniyɛlle, kẽnge. Bala b segd n kell n solga gom-kãensã la b sog-b hal n tãag saabã wakate.+ 10 Neb wʋsg na n yɩlga b mense. B na n maanda sẽn yaa tɩrga, la b vɩɩmd vɩɩm sẽn yaa yɩlemde.+ Nin-wẽnsã na n tʋmda tʋʋm-wẽnse. Nin-wẽnsã baa a ye pa na n wʋm a võor ye. La sẽn tar-b yam-vẽenemã na n wʋma a võore.+

11 “Sẽn sɩng wakat ning b sẽn kɩt tɩ b bas daar fãa* maandã maanego,+ ne bõn-yook ning sẽn wat ne sãoongã luglgu,+ rasem tusr la kobs-yi la pis-wɛ n na n zĩndi.

12 “Sũ-noog soab la ned ning sẽn na n kell n gũ,* la sẽn na n ta rasem tusr la kobs-tã la pis-tã la a nu wã!

13 “La sã n yaa ne foo, kell n yals kãn-kãe n tãag saabã. Fo na n vʋʋsame, la fo na n wa yika wakatã saabẽ+ n deeg f pʋɩɩrã.”*