Bas-y ziri tũudmã n kẽ tũudum hakɩɩkã pʋgẽ

1. Tũudmã wɛɛngẽ, bõe la ned kam fãa segd n yãke?

AZEEZI yeelame: “Ned ning sẽn pa be ne maam kɩɩsda maam.” (Matiye 12:30) D sã n pa be a Zeova poorẽ, d bee a Sʋɩtãan poorẽ. Neb wʋsg tẽedame tɩ b sẽn tũud Wẽnnaam to-to wã tata a yam, la Biiblã yetame t’a Sʋɩtãan yaa “soab ning sẽn kẽesd dũniyã fãa moogã.” (Vẽnegre 12:9) Neb milyõ-rãmb tẽedame tɩ b tũuda Wẽnnaam, la sɩd-sɩda, yaa a Sʋɩtãan la b tũuda! Rũndã-rũndã, ned buud fãa segd n yãka a sã n na n tũu a Zeova sẽn yaa “sɩdã Wẽnnaam,” bɩ a sã n na n tũu a Sʋɩtãan sẽn yaa “ziri wã ba” wã.—Yɩɩn-sõamyã 31:5; Zã 8:44.

Lak-y y meng ne ziri tũudmã

2. Bõe la a Sʋɩtãan mi n maand sẽn na yɩl n gɩdg nebã tɩ b ra tũ a Zeova?

² Ned sã n yãk yam n na n tũ a Zeova, rẽ la sõma n yɩɩda. A yam-yãkrã na n kɩtame t’a ta Wẽnnaam yam. La a Sʋɩtãan sũur pa noom ne ned sẽn tũud Wẽnnaam ye. A kɩtdame tɩ sẽn tũud-b Wẽnnaamã paamd zu-loeese. A mi n kɩtame tɩ neb a taabã yaand tõnd wall b namsd tõndo. Tõe n yɩɩ d zo-rãmb wall d zakã neb menga. A Zeezi yeelame: “Hakɩɩka, ned meng zak rãmb na n yɩɩ a bɛɛba.”—Matiye 10:36.

3. Yãmb zakã rãmb bɩ y zo-rãmb sã n gɩdgd yãmb tɩ y ra tũ Wẽnnaam, bõe la y na n maane?

³ A buud sã n paam yãmba, y manesem na n yɩɩ wãna? Neb wʋsg miime tɩ b sẽn tũud Wẽnnaam to-to wã pa sõma ye. La b pa rat n bas ye. B tagsdame tɩ b sã n bas b tũudmã, b zãmba b zakã rãmba. Tagsg a woto zemsame bɩ? Yãmb sã n bãng tɩ y zakã neb n yũud dorge, y pa na n yeel-b tɩ dorgã yũubã na n waa ne yell sɩda? Yãmb na n naag-b lame n yũ dorgã sɩda?

4. Bõe la a Zozuwe yeel Israyɛll nebã tũudmã wɛɛngẽ?

⁴ A Zozuwe sagla Israyɛll nebã tɩ b bas b yaab-rãmbã tũudmã yɛl la b rog-n-migsã sẽn pa tat Wẽnnaam yamã. A yeel-b lame: “Woto yĩnga, bɩ y zoe a Zeova la y tũ-a ne sũur sẽn yaa yɩlemde, la ne sɩda. Yiis-y wẽnnaam-dãmb nins yãmb yaab-rãmbã sẽn tũ Kʋɩlgã rʋʋndẽ wã la Ezɩpt soolmẽ wã, la y tũ a Zeova.” (Zozuwe 24:14) A Zozuwe maana sɩd ne Wẽnnaam a Zeova, t’a ning-a barka. Tõnd me sã n maan sɩd ne a Zeova, a na n ning-d-la barka.—2 Sãmwɛll 22:26.

Lob-y ziri tũudmã teed nins y sẽn tarã

5. Bõe yĩng tɩ d segd n lob bũmb nins fãa sẽn tar loees ne tɩtã?

⁵ Lak f meng ne ziri tũudmã rat n yeelame me tɩ f sãam tɩɩm teoog fãa f sẽn tare. Tõe n yaa tɩ-gãna, tɩ-yoada, nug-bĩnsi, zũyã, bɩ teed a taaba. Rẽ maaneg tara yõodo, bala wilgdame tɩ d teega a Zeova zãng-zãnga.

6. Bõe la pipi kiris-neb kẽer maan ne b tɩtã sɛba?

⁶ Ges-y pipi kiris-neb kẽer sẽn maan bũmb ninga, b sẽn wa n yãk yam n na n kẽ tũudum hakɩɩkã pʋgẽ wã. Ad Biiblã sẽn yete: “Neb nins sẽn da tar tɩt n maand yel-soalmã wʋsg talla b sɛbã n wa naag taab n yõog bugum nebã fãa taoore.”—Tʋʋma 19:19.

7. Zĩn-dãmbã sã n namsd yãmba, bõe la y tõe n maane?

⁷ Kẽer da maanda tɩt wʋsgo. B sẽn bas rẽ n sɩng a Zeova tũubã, tõe tɩ zĩn-dãmbã nams-b lame. Sã n yaa woto ne yãmba, bɩ y zẽk y koɛɛg n pʋʋs a Zeova n kos sõngre, n pʋd a yʋʋrã, t’a na n sõng-y lame.—Yel-bũnã 18:10; Zak 4:7.

8. Kiris-nebã tagsg yaa bõe ne bõn-naandsã la imaaz-rãmbã neb kẽer sẽn tũnugd ne n pʋʋsdẽ wã?

⁸ Neb nins sẽn dat n tũ a Zeova wã pa segd n maan wa ziri tũudmã neb ye. B pa segd n tar bõn-naandg wall imaaz baa a yembr n pʋʋsdẽ ye. Kiris-neb hakɩɩkã ‘kẽnda ne tẽebo, la b pa get bũmb nins nin sẽn ne wã n kẽnd ye.’ (2 Korẽnt rãmbã 5:7) B sakda Wẽnnaam tõogã, n pa tũnugd ne bõn-naandg baa a yembr n pʋʋsdẽ ye.—Yikri 20:4, 5.

Bao-y-yã a Zeova nin-buiidã zĩiga

9. Sagl-bʋg la Biiblã kõt ned ning fãa sẽn dat n yɩ yam soaba?

⁹ Biiblã yetame: “Sẽn kẽnd-a ne yam dãmb na n lebga yam soaba, la sẽn tũud-a yalemb na n paama zu-loeese.” (Yel-bũnã 13:20) D sã n dat n yɩ yam soaba, rẽnda d tũud a Zeova Kaset rãmbã, bɩ n baood b zĩigẽ. Bãmb n yaa neb nins sẽn tũud sor ning sẽn tar n dabd vɩɩm zĩigẽ wã.—Matiye 7:14.

10. Wãn to la a Zeova Kaset rãmbã tõe n sõng yãmb tɩ y tũ Wẽnnaam?

¹⁰ A Zeova Kaset rãmbã sɩd rata nebã neere. B tʋʋmd yaa sõng pʋ-peelem dãmbã tɩ b bãng sɩdã sẽn be Biiblã pʋgẽ wã. Yaa sɩd ning sẽn na n kɩt tɩ b wa paam vɩɩm sẽn pa satã. A Zeova Kaset rãmbã tõe n sõnga yãmba, n zãms-y Biiblã tɩ pa tũ ne yaood ye. B na n leoka y sogsgã, la b wilg-y y sẽn tõe n tũ bũmb nins y sẽn bãng Biiblã pʋgẽ wã to-to.—Zã 17:3.

11. Y sã n kẽnd tigissã, wãn to la na n sõng-yã?

¹¹ Y sã n kẽnd b tigissã b sẽn wae n maand Rĩungã rotẽ wã, y na n bãnga a Zeova raabã n paase. Y na n maneg n tʋllame n kẽ tũudum hakɩɩkã pʋgẽ. Y leb n na n paama zãmsgo, n tõog n sõng neb a taab tɩ b bãng sɩdã sẽn be Biiblã pʋgẽ wã.—Ebre-rãmbã 10:24, 25.

12. Wãn to la pʋʋsgã tõe n sõng-y tɩ y tũ Wẽnnaam?

¹² Y sã n bãngd a Zeova raabã n paasdẽ, y sũur na n maneg n yɩɩ noog ne a noyã sẽn wilgd a nonglmã. Sẽn paase, y segd n maneg n tʋll n maana sẽn tat a yam, la y lak y meng ne bũmb nins sẽn pa noom-a wã. Tẽeg-y tɩ y tõe n pʋʋsa a Zeova n kos-a t’a sõng-y tɩ y maan sẽn yaa tɩrga, la y lak y meng ne sẽn yaa wẽnga.—1 Korẽnt rãmbã 6:9, 10; Filip rãmbã 4:6.

13. Bõe la y tõe n maan t’a Zeova sũur yɩ noogo?

¹³ Y tẽebã pãng sã n paasdẽ, sãmbg sẽn ka be, y na n wa rat n dɩka y meng n kõ a Zeova n deeg lisgu, n lebg a Kaset soaba. Y sã n lebg a Zeova Kaset soaba, y na n nooga a sũuri. (Yel-bũnã 27:11) Y na n zĩnda Wẽnnaam nin-buiidã sʋka. Wẽnnaam ra goma b yell n yeele: “Mam na n zĩnda bãmb sʋka, la m kẽn b sʋka. Mam na n yɩɩ bãmb Wẽnnaam, tɩ bãmb me yɩ mam neba.”—2 Korẽnt rãmbã 6:16.