Kell-y n tall-y sũ-noogo, y sã n get y ned sẽn bẽed wall sẽn kʋʋl yelle

1-2. A Zeova tagsg yaa wãn ne neb nins sẽn get b ned sẽn bẽed bɩ sẽn kʋʋl yellã? (Yel-bũnã 19:17) (Ges-y fot-rãmbã me.)

KOORE saam-biig yʋʋr sẽn boond t’a Kim yeelame yaa: “Maam ne m pagã sẽn kẽ kãadem yʋʋm 32 la woto. Yʋʋm a nu la woto a sẽn bẽed tɩ mam get a yelle. A bẽeda bã-kɛgeng n pa tõe n maan baa fʋɩ ye. Mam nonga m pagã la m nand-a wʋsgo, n get a yell ne yamleoogo. D raa gãag b sẽn maan bãad-rãmbã yĩng t’a gãe be yʋng fãa. M gãandeda a sɛɛgẽ, n gãd a nugã tɩ d gõe.”

² Tõe tɩ y geta y ba, y ma, y sɩda, y paga, y biig wall y zoa yelle. Sã n yaa woto, yaa vẽeneg tɩ y sũur nooma y sẽn paam n get a yellã. Sẽn paase, y sẽn get a yellã wilgdame tɩ y nonga a Zeova. (1 Tɩm. 5:4, 8; Zak 1:27) La ges ned sẽn bẽed wall sẽn kʋʋl yell pa nana wakat fãa ye. Y tõe n maooda ne zu-loees tɩ neb a taabã pa miẽ ye. Y tõe n wa tagsdame meng tɩ neb a taabã pa mi tɩ pa nana ne-y ye. Y sã n be neb sʋka y tõe n laadame, tɩ y sã n wa yaa y yembr bɩ y yãbda. (Yɩɩn. 6:6) Baa neb a taabã sẽn tõe n pa mi zu-loeesã sẽn namsd-y to-to wã, a Zeova yẽ mii rẽ. (Ges-y Yikr 3:7.) A Zeova nee y sẽn daagd nintãmã la y sẽn mongd y meng bũmb ninsã, n nong-y wʋsg rẽ yĩnga. (Yɩɩn. 56:8; 126:5) A nee bũmb nins fãa y sẽn maand n sõngd y nedã. A getame tɩ y sẽn maand woto wã yaa yẽ la y pengda, n pʋlem t’a na n keo-y lame.—Karm-y Yel-bũn 19:17.

3. A Abrahaam ne Saara sẽn wa n get a Teera yellã, tõe tɩ bõe n pa yɩ nana ne-ba?

³ Biiblã tara kibay sẽn gomd neb sẽn da get b neb sẽn bẽed wall sẽn kʋʋl yelle. Yɩɩ woto ne a Abrahaam la a pag a Saara. B sẽn wa n na n yi Ʋʋrã tɩ b ba a Teera kolga yʋʋm kobs-yi. Baa ne rẽ, a tũ-b lame. B toga sor n keng Haran sẽn da be na maan kɩlo kobs-wɛ la pis-yoob zĩigẽ wã. (Sɩng. 11:31, 32) Sãmbg sẽn kae, a Abrahaam ne Saara ra nonga a Teera. La mams-y n ges-y-yã a yell gesg sẽn yɩ toog to-to, sẽn yɩɩd fãa so-toakã sasa. Tõe tɩ b zomba yʋgma wall bõens n tog sorã. Yaa vẽeneg tɩ yɩɩ toog wʋsg ne a Teera sẽn da kʋʋlã. Sãmbg kae t’a Abrahaam la a Saara ra mi n yaa wʋsg ye. Sẽn yaa soab fãa, yaa vẽeneg t’a Zeova kõ-b-la pãng ning b sẽn da ratã. A Zeova na n sõnga yãmb wa a sẽn sõng a Abrahaam ne a Saara wã.—Yɩɩn. 55:22.

4. Bõe yell la d na n gom sõs-kãngã pʋgẽ?

⁴ Sũ-noog tõe n sõng-y lame tɩ y kell n ges y ned sẽn bẽed bɩ sẽn kʋʋl yell sõma. (Yel. 15:13) Y tõe n kell n talla sũ-noogo, baa y yɛlã sẽn yaa to-to. (Zak 1:2, 3) Bõe la y tõe n maan n paam sũ-noog a woto? Pʋʋsd-y-yã a Zeova n kotẽ t’a sõng-y tɩ y yã bũmb nins sẽn kɩt tɩ y segd n maan sũ-noogã. Sõs-kãngã pʋgẽ, d na n yãa bũmb a taab y sẽn tõe n maan n kell n tall sũ-noogo. D leb n na n yãa neb a taabã sẽn tõe n maan n sõng-yã. La d na n deng n yãa bũmb ning sẽn kɩt tɩ y segd n kell n tall sũ-noogã, la zu-loees nins sẽn tõe n boog y sũ-noogã.

Y NED YELL GESG TÕE N BOOGA Y SŨ-NOOGÃ

5. Y sã n get ned yelle, bõe yĩng tɩ y segd n kell n tall sũ-noogo?

⁵ Y sã n get y ned yell n tagsd zu-loees nins rẽ sẽn wat ne wã yell bala, y tõe n yaa nana-nana. (Yel. 24:10) Y pãngã sã n booge, y pa na n tõog n ges a yell sõma wa y sẽn datã ye. Bõe yĩng tɩ tõe n yɩ toog tɩ y kell n tall sũ-noogo, y sã n wa get y ned yelle?

6. Bõe yĩng tɩ ned yell gesg mi n wat ne yaams wʋsgo?

⁶ Ned yell gesg wata ne yaams wʋsgo. Saam-bi-poak yʋʋr sẽn boond t’a Leya yeelame: “Baa yɛlã sã n yaa sõma, zĩigã sẽn wat n na n sobg tɩ m mi n yaa wʋsgo. Wakat ninga, m pa tõe n tags sõma n leok mesaaz ned sẽn tool-m meng ye.” Kẽer getame tɩ yaa toog tɩ b paam sẽk n gũs tɩ seke, wall b paam sẽk n vʋʋs baa b sẽn mi tɩ rẽ yaa tɩlɛ ne-bã. Saam-bi-poak yʋʋr sẽn boond t’a Inɛs yeelame: “M pa paamd n gũs tɩ sek ye. Yʋngo, m nekda lɛɛr a yiib fãa n na n ges m sɩdã ma yelle. Maana yʋʋm wʋsg tɩ maam ne m sɩdã pa tõog n kẽng zĩig n tɩ vʋʋs ye.” Kẽer pa tõe n tɩ naag b zo-rãmb n kok pemsem wall b tʋm tʋʋm kẽer tigingã pʋgẽ, b sẽn segd n ges b nedã yell wakat fãa wã yĩnga. Rẽ tõe n kɩtame tɩ b getẽ tɩ b yaa b yembre, tɩ yɛlã sẽn yaa to-to wã sãamd b sũur wʋsgo.

7. Bõe yĩng tɩ neb kẽer sẽn get b ned yell ningd b mens taale, wall b kẽnd ne sũ-sãamse?

⁷ Y sã n get y ned yelle, y tõe n wa ningda y meng taale, wall y kẽnd ne sũ-sãamse. Saam-bi-poak yʋʋr sẽn boond t’a Zesika yeelame: “Wakat ninga, m mi n tagsdame tɩ m segd n sõnga m baaba n yɩɩd woto. M sã n mi n bao zĩig n na n vʋʋs bilfu, m ningda m meng taale, n tagsdẽ tɩ m yaa rat-m-ye soaba.” Kẽer mi n ningda b mens taale, bala wakat ninga b sũurã yikda ne yɛlã sẽn yaa to-to wã. Sãnda maanda yɩɩre, bala b getame tɩ b pa sõngd b nedã tɩ sek ye. Kẽer me ningda b mens taale, b sũur sẽn yik tɩ b gom goam sẽn tõe n sãam ned ning yell b sẽn getã sũur yĩnga. (Zak 3:2) Sãnda me sũur sãamda b sẽn nee b nedã sẽn da tar keelem la laafɩ wã pãng sẽn tar boogrã. Saam-bi-poak yʋʋr sẽn boond t’a Barbara yeelame: “Bũmb sẽn sãamd m sũur n yɩɩd yaa m sẽn ne m zoa wã bãagã sẽn tar kengr daar fãa wã.”

8. Neb kẽer tagsg yaa wãna, b sã n pʋʋs-b barka?

⁸ Y tõe n wa getame tɩ ned ning yell y sẽn getã pa nand y modgrã ye. Bõe yĩnga? Bala a pa wae n pʋʋsd-y bark wall a pẽgd-y y sẽn tʋmd wʋsgo, la y mongd y meng bũmb kẽer n get a yellã yĩng ye. Rẽ n so tɩ ned sã n pʋʋs-y barka, baa a pa gom wʋsgo, kengda y raoodo. (1 Tes. 5:18) Saam-bi-poak yʋʋr sẽn boond t’a Melisa yeelame: “Wakat ninga, m sũurã mi n sãama wʋsg hal tɩ m daag nintãm. La ned ning yell m sẽn getã sã n yeel yaa: ‘M pʋʋsd-f-la bark bũmb nins fãa f sẽn maand n kõt-mã yĩnga,’ kengda m raood wʋsgo. Goam a woto kõt-m-la pãng la raoodo, tɩ m dat n kell n ges a yelle.” Saam-biig yʋʋr sẽn boond t’a Amadu wilga bark pʋʋsgã sẽn noom-a to-to. A pagã yao bi-pugl n be ne-ba, tɩ b get a yelle. Kisĩnkiir n tar-a. A Amadu yeelame: “Tõe t’a pa mi modgr ning fãa d sẽn maand n get a yellã ye. La a sã n pʋʋs-d barka, wall a yeel t’a nong-d lame, noom-d-la wʋsgo.”

BÕE LA Y TÕE N MAAN N KELL N TALL SŨ-NOOGO?

9. Wãn to la y tõe n wilg tɩ y pa baood n na n maan tɩ yɩɩg y pãnga?

⁹ Ra bao-y n maan-y tɩ yɩɩg y pãng ye. (Yel. 11:2) Ned baa a ye pa tõe n maan bũmb nins fãa a sẽn dat n maanã ye. Rẽ n so tɩ y segd n bao n bãng bũmb nins y sẽn tõe n maanã, tɩ wakat ninga b sã n kos-y tɩ y maan bũmb bɩ y zãgse. Sã n wa yaa woto, y pa segd n sãam y sũur ye. Wilgdame tɩ y yaa sik-m-meng soaba. Neb a taabã sã n dat n sõng-y bɩ y sak ne yamleoogo. Saam-biig yʋʋr sẽn boond t’a Zak yeelame: “D sẽn tõe n maan daar fãa wã tara koaka. Y sã n pa modgd n maand tɩ yɩɩg y pãnga, y na n kell n talla sũ-noogo.”

10. Y sã n get ned sẽn bẽed wall sẽn kʋʋl yelle, bõe yĩng tɩ yaa tɩlɛ tɩ y tall yam-vẽenem? (Yel-bũnã 19:11)

¹⁰ Tall-y yam-vẽenem. (Karm-y Yel-bũn 19:11.) Y sã n tar yam-vẽenem, ned ning yell y sẽn getã sã n wa yeel gomd wall a maan bũmb sẽn tõe n yik y sũuri, y na n tõoga y menga. Ned sã n yeel gomd wall a maan bũmbu, yam-vẽenem soab na n bao n wʋma a manesmã võore. Bãas kẽer tõe n kɩtame tɩ ned manesem toeem fasɩ. (Koɛ. 7:7) Wala makre, bãag tõe n kɩtame tɩ ned sẽn da yaa nin-bʋgsg lebg ned sẽn nong no-koɛɛma, pa rẽ bɩ a lebg ned sẽn nong yẽgengo, wall sũur sẽn yikd tao-tao. Y sã n get ned sẽn bẽed yelle, yɩta sõma tɩ y bao n bãng bãag ning a sẽn bẽedã sõma. Y sã n bãng a bãagã sõma, tõe n sõng-y lame tɩ y bãng t’a pa maan ne pʋ-toog ye.—Yel. 14:29.

11. Y sã n get ned sẽn bẽed wall sẽn kʋʋl yelle, bõe la y segd n maand daar fãa? (Yɩɩn-sõamyã 132:4, 5)

¹¹ Baood-y sẽk n paasd yãmb ne a Zeova zoodã pãnga. Wakat ninga, na n yɩɩ tɩlɛ tɩ y bas tʋʋm kẽer sẽn na yɩl n maan “bũmb nins sẽn tar yõod n yɩɩdã.” (Fili. 1:10) Bũmb a ye sẽn tar yõod n yɩɩd yaa paas yãmb ne a Zeova zoodã pãnga. Rĩm a Davɩɩd ra lʋɩɩsda a Zeova tũudmã taoore. (Karm-y Yɩɩn-sõamyã 132:4, 5.) Baa y sẽn tar tʋʋm wʋsgã, yãmb me segd n baooda sẽk n karemd Biiblã daar fãa la y pʋʋsdẽ. Saam-bi-poak yʋʋr sẽn boond t’a Elisa yeelame: “M sã n pʋʋsd a Zeova la m karemd Yɩɩn-sõamyã goamã sẽn kengd raoodã la m bʋgsdẽ, m yam gãee bãan tɩ m tar sũ-noogo. Pʋʋsgã sɩd sõngd-m-la wʋsgo. M pʋʋsda a Zeova naoor wʋsg daar fãa, n kot-a t’a sõng-m tɩ m yam gãand bãane.”

12. Y sã n get y ned yelle, bõe yĩng tɩ tar yõod tɩ y ges y mengã laafɩ yelle?

¹² Ges-y y laafɩ wã yelle. Tõe tɩ y getame tɩ yɩl n paam sẽk n tɩ ra zẽ-biis n wa segl rɩ-tɩrg n dɩ yaa toogo. La yɩl n paam laafɩ la y ket n tagsd sõma, yaa tɩlɛ tɩ y rɩt sõma la y mi n wɩsgd y yĩnga. (Efɛɛ. 5:15, 16) Modgd-y n gõe tɩ sekdẽ me. (Koɛ. 4:6) Bãngdbã wilgame tɩ y sã n gõe tɩ sekdẽ, sõngdame tɩ y zugã tʋmd sõma. Sebr a yembr logtoɛɛmb sẽn gʋls pʋgẽ, b yeelame tɩ ned sã n gõe tɩ sekdẽ, boogda a yɩɩrã la sõngdẽ t’a sũurã pa yikd tao-tao ye. Yɩta sõma tɩ y mi n bao weer n kok pemsem me. (Koɛ. 8:15) Saam-bi-poak a ye wilga bũmb ning sẽn sõngd-a t’a ket n tar sũ-noogã n yeel yaa: “Zĩigã sã n mi n bʋgsa, m modgdame n yi n kok pemsem. M modgdame tɩ baa yaa vugr kiuug fãa, bɩ m tũ m zoa tɩ d tɩ maan bũmb sẽn noom-do.”

13. Bõe yĩng tɩ laad yaa sõma? (Yel-bũnã 17:22)

¹³ Mi n maand-y laado. (Karm-y Yel-bũn 17:22; Koɛ. 3:1, 4) Y sã n laadẽ, boogda y yɩɩrã. Y sã n get ned sẽn bẽed wall sẽn kʋʋl yelle, pa wakat fãa la yɛlã na n yɩ wa y sẽn da magdã ye. La y sã n tõe n kɩt tɩ bũmb sẽn pa yɩ wa y sẽn datã lebg laad bũmbu, na n sõngame tɩ y sũurã ra yik wʋsg ye. Sẽn paase, yãmb ne ned ning yell y sẽn getã sã n laad ne taaba, tõe n kɩtame tɩ y maneg n nong taaba.

14. Y sã n sõs ne y zoa hakɩɩka, wãn to la na n naf-yã?

¹⁴ Pelg-y y pʋg n sõs ne y zoa. Baa y sẽn modgd to-to, y tõe n wa getame tɩ yɛlã yɩɩda y nugu. Sã n wa yaa woto, yɩta sõma tɩ y gom rẽ yell ne y zoa hakɩɩka, zoa sẽn pa na n ning-y taale. (Yel. 17:17) A na n maaga a yĩng n kelg-y la a keng-y raoodo. Tõe tɩ rẽ sõng-y tɩ y le paam sũ-noogo.—Yel. 12:25.

15. D sã n tagsd bõn-sõma nins d sẽn na n paam dũni-paalgã pʋgẽ wã yelle, wãn to la na n sõng-d tɩ d kell n tall sũ-noogo?

¹⁵ Mams-y yãmb ne ned ning yell y sẽn getã vɩɩmã sẽn na n yɩ to-to arzãnã pʋgẽ wã. Tẽeg-y tɩ y sẽn get a yellã tara tɛka, la t’a Zeova ra pa naan ninsaal t’a tʋm tʋʋmd a woto buud ye. (2 Kor. 4:16-18) “Vɩɩm hakɩɩkã” yaa bũmb sẽn nan wate. (1 Tɩm. 6:19) Yãmb ne y nedã sã n gomd bũmb nins y sẽn magd n na n maan arzãnã pʋgẽ wã yelle, yaa vẽeneg tɩ na n kõ-y-la sũ-noog wʋsgo. (Eza. 33:24; 65:21) Saam-bi-poak yʋʋr sẽn boond t’a Elɛnn yeelame: “M wae n yeta neb nins yell m sẽn getã tɩ ka la bilfu, d na n naaga taab n sẽ futu, n zoe, la d zomb wiidi n gilgi. D na n wẽe buri, la d segl rɩɩb n kõ d neb nins sẽn na n vʋʋgã. D wae n naagda taab n pʋʋsd a Zeova bark bõn-sõma nins a sẽn pʋlm-dã yĩnga.”

NEB A TAABÃ SẼN TÕE N SÕNG TO-TO

16. Bõe la y tõe n maan n sõng y tigingã ned sẽn get a ned sẽn bẽed wall sẽn kʋʋl yelle? (Ges-y fotã me.)

¹⁶ Y tẽed-n-taasã tõe n sõng-y lame tɩ y paam n vʋʋse. Y tigingã neb a taab tõe n wa ledg-y lame n ges y nedã yell wakat bilfu. Rẽ na n kõ-y-la weer tɩ y vʋʋs bilfu, wall y maan bũmb y sẽn segd n maane. (Gal. 6:2) Koe-moondb kẽer zemsa taaba, n maand dẽ n deesd taab semen fãa. Saam-bi-poak yʋʋr sẽn boond t’a Natalya sɩdã komsame t’a get a yelle. A yeelame: “Tigingã saam-biig a ye n wat vugr bɩ naoor a yiib semen fãa mam sɩdã nengẽ. B nagda taab n moond koɛɛgã, n sõsd ne taaba, la b get filim-dãmb menga. Rẽ nooma mam sɩdã wʋsgo, la kõt-m weer tɩ m tõe n vʋʋse, wall m maan bũmb a to. Wala makre, yi n kẽne.” Wakat ninga, y tõe n tɩ gãanda ne bãadã bɩ sẽn kʋʋl-a wã sẽn na yɩl tɩ ned ning sẽn get a yellã paam weer n gũs sõma.

17. Bõe la y tõe n maan n sõng neb nins sẽn get b ned sẽn bẽed bɩ sẽn kʋʋl yellã sẽn na yɩl tɩ b paam n dɩ tigissã yõod sõma?

¹⁷ Y tẽed-n-taasã tõe n sõng-y lame tɩ y rɩ tigissã yõod sõma. Tõe n yɩɩ toog ne neb kẽer tɩ b tõog n kelg sõma tigissã la tigis-kãsemsã sasa, b sẽn segd n maan bũmb wʋsg n ges b nedã yellã yĩnga. Tigingã neb a taab tõe n zĩnda ne bãadã bɩ sẽn kʋʋl-a wã tigissã la tigis-kãsemsã sasa wall b babs kẽer sasa n sõng n ges a yelle. Sã n mik tɩ sẽn kʋʋl-a wã bɩ sẽn bẽed-a wã pa tõe n yi a zakẽ wã, y tõe n kẽnga a zakẽ wã n tɩ maan tigsgã ne-a ne videokõnferãns maasem, tɩ ned ning sẽn get a yellã paam n kẽng Rĩungã roogẽ.

18. Bõe me la d tõe n maan n sõng neb nins sẽn get b ned sẽn bẽed bɩ sẽn kʋʋl yellã?

¹⁸ Pẽgd-y neb nins sẽn get b ned sẽn bẽed bɩ sẽn kʋʋl yellã, la y pʋʋsd b yĩnga. Kãsem-dãmbã segd n kẽnd n kaagda neb nins sẽn get b ned sẽn bẽed bɩ sẽn kʋʋl yellã wakat fãa. (Yel. 27:23) Baa d yɛlã sẽn yaa to-to, d fãa segd n minim n pẽgda neb nins sẽn get b ned sẽn bẽed bɩ sẽn kʋʋl yellã. Sẽn paase, d tõe n pʋʋsa a Zeova t’a kõ-b raoodo, la a sõng-b tɩ b kell n tall sũ-noogo.—2 Kor. 1:11.

19. Bõe la d gũuda?

¹⁹ Ka la bilfu, a Zeova na n menesa bũmb nins fãa sẽn wat ne namsg la sũ-sãamsã. Bãasã ne kũumã pa na n le zĩnd ye. (Vẽn. 21:3, 4) “Põor na n yɩk n tĩimsa wa walga.” (Eza. 35:5, 6) Kʋʋlmã sẽn wat ne zu-loees ninsã fãa na n saame. Pa na n le yɩ tɩlɛ tɩ d ges d ned sẽn bẽed bɩ sẽn kʋʋl yell ye. Bõn-kãens fãa naaga bũmb nins yell d sẽn ‘pa na n le tẽegã.’ (Eza. 65:17) La baa rũndã-rũndã, nand t’a Zeova sẽn pʋlem bõn-sõma nins tɩ watẽ n wã pidsi, d tõe n basa d yam t’a pa na n daag tõnd n bas ye. D sã n kell n teeg-a t’a kõ-d pãnga, a na n sõng-d lame tɩ d “tõog toog bũmb fãa pʋgẽ ne sũ-mar la ne sũ-noogo.”—Kolo. 1:11.