“Fo yaa ned sẽn tar yõod wʋsgo”

1-2. Bõe la d tõe n maan n kɩs sɩd tɩ d tara yõod a Zeova nifẽ?

NEB nins sẽn tũud a Zeova wã tara yõod wʋsg a nifẽ. La b sʋkã kẽer n pa nand b mense. Tõe tɩ yaa neb a taab sẽn nams-b yĩng n kɩt tɩ b tagsdẽ tɩ b ka võor ye. Y mi n tagsdame tɩ y ka võor bɩ? Sã n yaa woto, bõe n tõe n sõng-y tɩ y kɩs sɩd tɩ y tara yõod a Zeova nifẽ?

² Bũmb a ye y sẽn tõe n maan tɩ sõng-y yaa y sẽn na n karemd Biiblã kibay sẽn wilgd a Zeova sẽn dat tɩ d tall tagsg ning d mengã la d taabã zugu. A Biigã a Zeezi ra waoogda nebã la a maand-b neere. A sẽn maan woto wã, a wilgame tɩ yẽ ne a Ba wã nanda sik-m-mens rãmbã wʋsgo, baa sẽn get-b tɩ b ka võorã. (Zã 5:19; Ebre. 1:3) Sõs-kãngã pʋgẽ d na n deng n yãa a Zeezi sẽn sõng nebã to-to tɩ b bãng tɩ b tara yõodo, la d bao n bãng d sẽn tõe n maan to-to n kɩs sɩd tɩ d tara yõod wʋsg Wẽnnaam nifẽ.—Aaze 2:7.

A ZEEZI SẼN SÕNG NEBÃ TO-TO TƖ B BÃNG TƖ B TARA YÕODO

3. Bõe la a Zeezi maan n sõng Galile nebã sẽn wa a nengẽ n dat sõngrã?

³ A Zeezi sẽn wa n gilgd Galile naoor a tãab-n-soab n moond koɛɛgã, neb kʋʋng n da yit zĩig fãa n watẽ n na n kelg-a la b paam t’a sãoog b bãasã. A Zeezi yãame tɩ b ra “yaa wa piis sẽn pa tar pe-kɩɩma, n namsdẽ la b pa tar ned sẽn get b yell ye.” (Mat. 9:36) B tũudmã taoor dãmb da tagsdame tɩ b yaa zɩtb n pa get b yelle, hal n da yetẽ tɩ b yaa “neb kãab-wẽng sẽn be b zutu.” (Zã 7:47-49) La a Zeezi ra nand-b lame. A baoo sẽk n zãms-b bũmb wʋsg la a sãoog b bãasã. (Mat. 9:35) Sẽn paase, a sẽn da rat n sõng neb wʋsgã kɩtame t’a zãms a karen-biisã koɛɛgã moonego.—Mat. 10:5-8.

4. A Zeezi manesem sẽn da yaa to-to ne neb nins sẽn kelgd-a wã wilgda tõnd bõe?

⁴ A Zeezi sẽn da waoogd neb nins sẽn kelgd-a wã la a maand-b neerã, a wilgame tɩ yẽ ne a Ba wã getame tɩ neb nins nebã sẽn pa nandã tara yõod wʋsgo. Y sã n tũud a Zeova n pa kɩs sɩd tɩ y tara yõod a nifẽ bɩ y tags a Zeezi manesem sẽn yɩ to-to ne neb nins sẽn da rat t’a zãms-bã zugu. Y sã n maan woto, tõe n kɩtame tɩ y bãng tɩ y sɩd tara yõod a Zeova nifẽ.

5. Pag ning sẽn wa a Zeezi nengẽ Galile wã yɛlã ra yaa wãn to?

⁵ Pa neb kʋʋng bal la a Zeezi zãms ye. A sõnga neb kẽer yembr-yembr me. Wala makre, a sẽn wa n moond koɛɛgã Galile wã, pag sẽn da bẽed bãag hal yʋʋm piig la a yiib t’a zɩɩmã yit n wa a nengẽ. (Mark 5:25) Tõogã ra wilgame tɩ ned sẽn bẽed a bãagã buud yaa rẽgdo, tɩ ned ning fãa sẽn sɩɩs-a me na n lebg rẽgdo. Rẽ ra segd n kɩtame t’a ra pa tõe n kolg neb a taabã wʋsg ye. Sẽn paase, a ra pa tõe n naag neb a taabã n maan bũmb kẽer n waoog Wẽnnaam tigã sasa la wakat a taab sasa ye. (Maan. 15:19, 25) Rẽnd pʋg-kãng ra pa bãad bal ye. Tõe t’a ra getame t’a pa tar yõod ye.—Mark 5:26.

6. Bõe la pagã maan n paam laafɩ?

⁶ Pagã ra ratame t’a Zeezi sãoog a bãagã. La a pa tɩ kos a Zeezi t’a sãoog-a ye. Bõe yĩnga? Tõe t’a bãagã yãnd n da tar-a. Pa rẽ bɩ a ra yɛɛsda a Zeezi na wa n dig-a, Tõogã sẽn da pa kõt-a sor t’a kẽ kʋʋngã sʋkã yĩnga. Rẽ n so t’a sɩɩs a zugẽ fuugã, n kɩs sɩd tɩ rẽ bal seka a na paam laafɩ. (Mark 5:27, 28) A sẽn tall tẽebã pa yɩ zaalem ye. A bãagã sãoogame. Rẽ poore, a Zeezi sokame tɩ ãnd n sɩɩs yẽ, tɩ pagã kolg n togs-a bũmb ning a sẽn maanã. A Zeezi manesem yɩɩ wãn ne-a?

7. A Zeezi manesem yɩɩ wãn ne pag ning sẽn da namsd wʋsgã? (Mark 5:34)

⁷ A Zeezi bʋka a meng ne pagã, la a gom ne-a ne waoogre. A yãame tɩ pagã “yɛɛsame n digda.” (Mark 5:33) Rẽ n so t’a gom ne-a ne bʋgsem n keng a raoodo. A pʋd n bool-a lame t’a “biiga.” A sẽn yeel woto wã pa wilgd t’a waoogd-a lame bal ye. Wilgdame t’a nong-a lame, la t’a rata a neere. (Karm-y Mark 5:34.) Yaa kiba-kãngã pʋgẽ bal la a Zeezi bool pag t’a biiga. Tõe tɩ yaa a sẽn yã tɩ pagã yɛɛsa wʋsgã yĩng la a sẽn bool-a woto wã. Mams-y n ges-y pagã sũur sẽn yɩ noog to-to! A Zeezi sã n da pa gom ne-a ne bʋgsem, tõe t’a ra na n looga ne laafɩ la a ra na n ningda a meng taal a sẽn kẽ kʋʋngã sʋkã yĩnga. La a Zeezi pa sõng-a t’a paam laafɩ bal ye. A ra ratame me t’a bãng t’a yaa d Ba sẽn be saasẽ wã sẽn yaa nonglmã bi-pugl sẽn tar yõod wʋsg a nifẽ.

8. Bõe n da namsd Berzill saam-bi-poak a yembre?

⁸ Rũndã-rũndã, neb kẽer sẽn tũud Wẽnnaam bẽeda bãas sẽn sãamd b sũur wʋsgo, la kɩt tɩ b getẽ tɩ b ka yõod ye. A Mariyaa yaa wakat fãa so-pakd sẽn be Berzilli. A rogame n pa tar nao, t’a goabg nugã me pa be ye. A yeelame: “M sẽn wa n karemdẽ wã, m karen-bi-taasã ra namsda maam wakat fãa m komslmã yĩnga. B ra pʋta maam yʋy n yaand maam. Tõnd zakã neb kẽer meng mi n tara manesem sẽn kɩt tɩ m tagsdẽ tɩ m ka võor ye.”

9. Bõe n sõng a Mariya t’a sak n deeg t’a tara yõod wʋsg a Zeova nifẽ?

⁹ Bõe n sõng a Mariya? A sẽn wa n lebg a Zeova Kaset soabã, a tẽed-n-taasã bels-a lame la b sõng-a t’a ges a mengã wa a Zeova sẽn get-a to-to wã. A yeelame: “Saam-biis la saam-bi-pogs ka tɛk n sõng-ma. M pʋʋsda a Zeova bark ne m sũur fãa a sẽn sõng-m tɩ m naag tigingã neb sẽn yaa wa zak-yɛng nebã.” A Mariya tẽed-n-taasã sõng-a lame t’a bãng t’a tara yõod wʋsg Wẽnnaam nifẽ.

10. Bõe n da namsd a Maari sẽn yit Magdala wã? (Ges-y fot-rãmbã me.)

¹⁰ D gom a Zeezi sẽn sõng ned a to yelle. Yaa a Maari sẽn yit Magdala wã. Zĩn-dãmb a yopoe n da tar-a. Yaa vẽeneg tɩ zĩn-dãmbã sẽn da tar-a wã ra kɩtame t’a maand yɛl kẽer tɩ pa wõnd neb a taabã, tɩ kɩt tɩ nebã ra zãagd b meng ne-a. (Luk 8:2) Tõe t’a ra yɛɛsda wʋsg n da tagsdẽ tɩ ned kae n nong-a wall sẽn tõe n sõng-a ye. A Zeezi riga zĩn-dãmbã sẽn da namsd-a wã t’a lebg a karen-biiga. Bõe me la a Zeezi maan n sõng a Maari sẽn yit Magdala wã t’a bãng t’a tara yõod wʋsg Wẽnnaam nifẽ?

11. Bõe la a Zeezi maan n wilg a Maari sẽn yit Magdala wã t’a tara yõod wʋsg Wẽnnaam nifẽ? (Ges-y fot-rãmbã me.)

¹¹ A Zeezi sakame t’a Maari sẽn yit Magdala wã ra yãagd yẽ ne a karen-biisã tɩ b gilgd n moond koɛɛgã.b Rẽ kɩtame t’a ra paamd n kelgd a Zeezi sẽn zãmsd nebã bũmb ninsã. Sẽn paase, a Zeezi vẽneg a meng ne-a a vʋʋgrã daar bala. A naaga pipi karen-biis nins a Zeezi sẽn gom ne baraarã. A Zeezi pʋd n yeel-a lame t’a tɩ togs a tẽn-tʋmdbã t’a vʋʋgame. Woto fãa pa wilgd t’a sɩd ra tara yõod wʋsg a Zeova nifẽ sɩda?—Zã 20:11-18.

12. Bõe n wa n kɩt t’a Lidiya tagsdẽ tɩ ned kae n nong-a?

¹² Rũndã-rũndã me, neb wʋsg tagsda wa a Maari sẽn yit Magdala wã tɩ ned kae n nong-b ye. Ra yaa woto ne Ɛspayn saam-bi-poak yʋʋr sẽn boond t’a Lidiya. A yeelame t’a ma wã sẽn wa n tar a pʋgã, a ra rat n yiisa pʋgã. A tẽrame tɩ baa a sẽn wa n yaa bilfã, a ma wã ra pa get a yell sõma, n da nong n tʋʋd-a. A yeelame: “M sẽn da rat bal yaa neb a taabã nong maam, la b sak n yɩ m zo-rãmba. M da tagsdame tɩ m pa na n tol n paam ned sẽn nong-ma, bala m ma ra maaname tɩ m tagsdẽ tɩ m yaa nin-wẽnga.”

13. Bõe n sõng a Lidiya t’a bãng t’a tara yõod a Zeova nifẽ?

¹³ La a Lidiya sẽn wa n lebg a Zeova Kaset soabã, yɛlã toeemame. A sẽn da pʋʋsd a Zeova la a karemd Biiblã, n paas a tẽed-n-taasã sẽn da maand-a neer la b gomd gom-nood ne-a wã sõng-a lame t’a kɩs sɩd t’a tara yõod a Zeova nifẽ. A yeelame: “M sɩdã wae n yeta maam t’a nong-m-la wʋsgo. A tẽegda maam zʋg-sõma nins m sẽn tarã wakat fãa. M zo-rãmb a taabã me maanda woto.” Yãmb mii ned sẽn tagsd t’a ka yõod a Zeova nifẽ tɩ y tõe n sõng-a bɩ?

D SẼN TÕE N MAAN TO-TO N GES D MENG WA A ZEOVA

14. Wãn to la 1 Sãmwɛll 16:7 sõngd tõnd tɩ d ges d mengã wa a Zeova sẽn get-d to-to wã? (Ges-y zĩ-gũbrã: “Bõe yĩng t’a Zeova nin-buiidã tar yõod wʋsg a nifẽ?”)

¹⁴ Tẽeg-y t’a Zeova sẽn get yãmb to-to wã yaa toor ne dũniyã nebã. (Karm-y 1 Sãmwɛll 16:7.) Dũniyã neb wʋsg getame tɩ yaa ned neerem, a paoong wall a sẽn karem n zãag n kɩtd t’a tar yõodo. La a Zeova pa woto ye. (Eza. 55:8, 9) Woto wã, modg-y n ges-y y mengã wa a Zeova, la pa wa dũniyã nebã ye. Biiblã goma neb sẽn wa n tags tɩ b pa tar yõod yelle. Wala makre, a Eli, a Naomi, la a Anne. Y sã n wa karemd b kibayã bɩ y gũus n ges a Zeova sẽn wilg to-to t’a nong-b lame. Y leb n tõe n baoo sebr n gʋlsd bũmb kẽer sẽn maande, tɩ wilgdẽ t’a Zeova nong-y lame la t’a nand-y lame. Sẽn paase, y tõe n baoo sõss sẽn be tõnd sɛbã pʋsẽ n wilgdẽ tɩ d tar yõod n karme.c

15. Bõe n kɩt t’a Dãniyɛll ra yaa “ned sẽn tar yõod wʋsg” Wẽnnaam nifẽ? (Dãniyɛll 9:23)

¹⁵ Sak-y n deeg-y tɩ y sẽn maand sɩdã kɩtame tɩ y tar yõod wʋsg a Zeova nifẽ. Wakat n zĩnd tɩ no-rɛɛs a Dãniyɛll ra ya wʋsg la a koms raoodo. Tõe tɩ rẽ t’a ra kolga yʋʋm koabga. (Dãn. 9:20, 21) Bõe la a Zeova maan n keng a raoodo? Wẽnnaam tʋma malɛk a Gabriyɛll t’a tɩ tẽeg-a t’a yaa “ned sẽn tar yõod wʋsgo,” la t’a wʋma a pʋʋsgã. (Karm-y Dãniyɛll 9:23.) Bõe n kɩt t’a Dãniyɛll ra tar yõod wʋsg woto Wẽnnaam nifẽ? A ra tara zʋg-sõma wʋsgo. Wala makre, a ra nonga tɩrlem la a maand sɩd ne a Zeova. (Eze. 14:14) A Zeova kɩtame tɩ b gʋls a kibarã a Gomdã pʋgẽ tõnd belsg yĩnga. (Rom. 15:4) A Zeova kelgda yãmb me pʋʋsgã, la a nand-y y sẽn nong sẽn yaa tɩrg la y tũud-a ne y sũur fãa wã yĩnga.—Mis. 6:8, not-rãmbã; Ebre. 6:10.

16. Bõe n tõe n kɩt tɩ y kɩs sɩd t’a Zeova yaa y Ba sẽn nong-yã?

¹⁶ Kis-y sɩd t’a Zeova yaa y Ba sẽn nong-yã. A rat n sõng-y lame. A pa get y kongrã ye. (Yɩɩn. 130:3; Mat. 7:11; Luk 12:6, 7) Neb wʋsg sẽn da tagsd tɩ b ka yõod bʋgsa rẽ zug tɩ sõng-ba. Wala makre, a Miselin yaa Ɛspayn saam-bi-poaka. A ra tagsdame tɩ ned kae n nong-a, la t’a pa tar yõodo, a sɩdã sẽn da yaand-a yʋʋm wʋsgã yĩnga. A yeelame: “M sã n wa tagsdẽ tɩ m ka yõodo, m mamsda m yamẽ wã tɩ yaa wa a Zeova zãad-m-la a nusẽ n wilgdẽ t’a nong-m lame la a kogend-ma.” (Yɩɩn. 28:9) A Lorɛnn sẽn yaa Afirikdisiid saam-bi-poakã wae n yetame yaa: “A Zeova sã n taka maam ne nonglem wiyã, n sõng maam yʋʋm wʋsg woto tɩ m ket n tũud-a, hal n tũnug ne maam n zãms neb Biiblã, yaa vẽeneg t’a nong-m lame la t’a getame tɩ m tara yõodo.”—Ooze 11:4.

17. Bõe n tõe n sõng-y tɩ y kɩs sɩd tɩ y tata a Zeova yam? (Yɩɩn-sõamyã 5:12) (Ges-y fotã me.)

¹⁷ Kis-y sɩd tɩ y tata a Zeova yam. (Karm-y Yɩɩn-sõamyã 5:12.) A Davɩɩd rɩka a Zeova maan-neerã n mak ne “gãong sẽn yaa yaleng” sẽn kogend nin-tɩrsã. Y sã n kɩs sɩd tɩ y tata a Zeova yam la t’a teend-y lame, tõe n sõng-y lame tɩ ra wa tagsdẽ tɩ y ka yõod ye. Bõe n tõe n sõng-d tɩ d kɩs sɩd tɩ d tata a Zeova yam? A Zeova kõo tõnd Biiblã n na n sõng-d tɩ d bãng a sẽn get-d to-to wã wa d sẽn zoe n yã wã. Sẽn paase, a tũnugda ne kãsem-dãmbã, d zo-rãmba, la neb a taab n tẽegd tõnd tɩ d tara yõod wʋsg a nifẽ. Ned sã n keng y raood woto, y manesem segd n yɩɩ wãna?

18. Bõe yĩng tɩ neb a taabã sã n pẽg-y bɩ y segd n sak n deege?

¹⁸ Ned sẽn mi yãmb la a nong-y sã n pelg a pʋg n pẽg-y bɩ y sak n deege. Tẽeg-y tɩ tõe tɩ yaa a Zeova n tũnugd ne-a n na n sõng-y tɩ y kɩs sɩd tɩ y tata a yam. A Miselin sẽn yaa saam-bi-poak ning yell d sẽn zoe n gomã yeelame: “M modgdame n na n tẽ tɩ gom-nood nins neb a taabã sẽn mi n yet maamã yaa sɩda. Pa nana ye. La m miime tɩ yaa woto la a Zeova rat tɩ m maane.” A Miselin paamame me tɩ kãsem-dãmbã sõng-a t’a bãng t’a Zeova nong-a lame. Rũndã-rũndã a yaa so-pakda, n mi n sõngd ne Betɛllã tʋʋm me.

19. Bõe n kɩt tɩ d tõe n bas d yam tɩ d tara yõod Wẽnnaam nifẽ?

¹⁹ A Zeezi yeelame tɩ d tara yõod wʋsg d Ba sẽn be saasẽ wã nifẽ. (Luk 12:24) Rẽnd d tõe n basa d yam tɩ d tara yõod wʋsg a Zeova nifẽ. Bɩ d ra tol n yĩm rẽ ye. Bɩ d maan d sẽn tõe fãa me n sõng neb a taabã tɩ b bãng tɩ b tara yõod wʋsg Wẽnnaam nifẽ.