A Zeezi yaa d maan-kʋʋdb kãsem sẽn yaa nimbãan-zoɛta

1-2. a) Bõe yĩng t’a Zeova tʋm a Biigã tẽngã zugu? b) Bõe yell la d na n gom sõs-kãngã pʋgẽ? (Ebre-rãmbã 5:7-9)

NA MAAN yʋʋm tus a yi rũndã, Wẽnnaam a Zeova tʋma a Biig ning a sẽn nong n yɩɩdã tẽngã zugu. Bõe yĩnga? Bũmb a ye yaa t’a wa ki tɩ ninsaalbã paam b meng ne yel-wẽndã la kũumã, la a pak sor tɩ b tõe n wa kɩt tɩ yɛl nins fãa a Sʋɩtãan sẽn wa ne wã sa. (Zã 3:16; 1 Zã 3:8) La a Zeova ra miime me tɩ bũmb nins a Zeezi sẽn na n yã tẽngã zugã na n sõngame t’a wa lebg maan-kʋʋdb kãsem sẽn kʋmd tõndo, sẽn zoet d nimbãanega. A Zeezi lebga maan-kʋʋdb kãsem yʋʋmd 29 soabã, a lisgã poore.a

² Wãn to la bũmb nins a Zeezi sẽn yã tẽngã zugã sõng-a t’a wa lebg maan-kʋʋdb kãsem sẽn yaa nimbãan-zoɛta? D na n goma rẽ yell sõs-kãngã pʋgẽ. D sã n bãng a Zeezi sẽn yã bũmb ninsã sẽn kɩt t’a “zems zãng” to-to tʋʋm-kãng yĩngã n paase, na n yɩɩ nana tɩ d pelgd d pʋg n pʋʋsd a Zeova, baa d sã n wa koms raood d yel-wẽnã bɩ d pãn-komsem yĩnga.—Karm-y Ebre-rãmb 5:7-9.

WẼNNAAM BI-NONGRÃ WAA TẼNGÃ ZUGU

3-4. A Zeezi sẽn wa tẽngã zugã, wãn to la yɛlã toeem-yã?

³ Tõnd sʋkã neb wʋsg yɛl zoe n toeemame. Wala makre, kẽer yik n toeema tẽng n bas b zakã rãmb la b zo-rãmbã, baa b sẽn da beẽ wã vɩɩm sẽn da noom-bã. Toeeng a woto pa nana ye. La ned baa a ye yɛl zɩ n toeem wʋsg wa a Zeezi ye. A sẽn wa n be saasẽ wã, yẽ n da yaa a Zeova pipi malɛka, n yaa malɛk ning sẽn tar ziir n yɩɩdã. A Zeova ra nong-a-la wʋsgo, t’a ra maand sũ-noog wakat fãa, bala a ra bee Wẽnnaam “nug-rɩtg” n tʋmd a tʋʋmã. (Yɩɩn. 16:11; Yel. 8:30) La Filip rãmb 2:7 yeelame t’a sak n “basa bũmb nins fãa a sẽn da tar” saasẽ wã, n wa vɩɩmd tẽngã zug ne ninsaalbã sẽn pa zems zãngã.

⁴ D tags a Zeezi rogmã sẽn yɩ to-to wã me yelle, la bũmb nins sẽn maan a sẽn wa n ket n yaa bilfã. A roagdbã ra yaa naong rãmba. Bũmb sẽn wilgd rẽ yaa t’a rogmã poore, yaa marwan-bi a yiib bal la b kõ tɩ yɩ maoongo. (Maan. 12:8; Luk 2:24) Rĩm-wẽng a Erood sẽn wa n wʋm a rogmã kibarã, a makame n na n kʋ-a. Sẽn na yɩl t’a Erood ra paam a Zeezi, a Zozɛf talla a zakã rãmb n tɩ zĩnd Ezɩpt wakat bilfu. (Mat. 2:13, 15) A Zeezi vɩɩmã sɩd ra lebga toor fasɩ ne sẽn da yaa to-to saasẽ wã.

5. Bõe la a Zeezi yã a sẽn wa n be tẽngã zugã, la wãn to la sẽn yã bũmb ninsã sõng-a t’a lebg maan-kʋʋdb kãsem sẽn yaa nimbãan-zoɛta? (Ges-y fotã me.)

⁵ A Zeezi sẽn wa n be tẽngã zugã, a yãa neb wʋsg sẽn namsde. Yaa vẽeneg tɩ bũmb toor-toor n maan t’a bãng ned sũur sẽn sãamd to-to, a ned sã n wa maan kaalem. Tõe t’a ba-wubdg a Zozɛf la neb a taab a sẽn da nong n maan kaalem a sẽn wa n be tẽngã zugã. A koe-moonegã sasa a sega wãooba, zoense, koms-rãmba, la neb kamb sẽn ki. Nin-kãens fãa nimbãaneg yõk-a lame. (Mat. 9:2, 6; 15:30; 20:34; Mark 1:40, 41; Luk 7:13) Yaa sɩd t’a sẽn wa n be saasẽ wã a ra nee nebã sẽn namsdã. La a sẽn wa n be tẽngã zug n yaa ninsaalã, a ra nee nebã sẽn namsd to-to wã n yɩɩda. (Eza. 53:4) A Zeezi sẽn yã bũmb nins tẽngã zugã sõng-a lame t’a bãng ninsaalbã tagsg sẽn yaa a soab yɛl buud toor-toor taoore, la b zu-loeesã sẽn namsd to-to wã sõma. Sẽn paase, bũmb kẽer n nams-a wa ninsaalb a taabã. Wala makre, wakat n zĩnd t’a ya, yɛl n kɩt t’a maan yɩɩre, la kɩt t’a sũur sãam wʋsgo.

A ZEEZI WILGAME T’A KƲMDA NEBÃ

6. No-rɛɛs a Ezayi sẽn gom a Zeezi nimbãan-zoeerã yell to-to wã wilgda tõnd bõe? (Ezayi 42:3)

⁶ A Zeezi koe-moonegã fãa sasa, a ra wilgdame t’a kʋmda ka pãng rãmbã, la neb nins b sẽn da namsdã. A sẽn maan woto wã, a pidsa bãngr-gomde. Biiblã babg ning b sẽn da gʋls ne Ebre wã pʋgẽ, b wae n makda rakãag-rãmbã la neb nins sẽn tar pãngã ne zẽed zĩig sẽn paamd koom sõma, la tɩɩs sẽn yaa wogd la sẽn tar pãnga. (Yɩɩn. 92:12; Eza. 61:3; Zer. 31:12) La b maka naong rãmbã la neb nins b sẽn maand pãngã ne tãnwĩig sẽn gõd la fɩtl laong sẽn nusdi, bala bõn-kãens pa le tar yõod wʋsg ye. (Karm-y Ezayi 42:3; Mat. 12:20) A Zeova vẽnega no-rɛɛs a Ezayi t’a rɩk makr a woto, n na n wilg t’a Zeezi na n wa nonga neb nins neb a taabã sẽn pa nandã, la a zoet b nimbãanega.

7-8. Bõe la a Zeezi maan n pids a Ezayi bãngr-gomdã?

⁷ A Matiye evãnzillã pʋgẽ, a wilgame t’a Zeezi pidsa goam nins a Ezayi sẽn da pĩnd n togsã, n yeel yaa: “A pa na n kaoog tãnwĩig sẽn gõde, la a pa na n kiis fɩtl laong sẽn nusd me ye.” Yel-soalem wʋsg a Zeezi sẽn maan yaa sẽn na n sõng neb nins b sẽn namsde, tɩ b getẽ tɩ b yaa wa tãnwĩig sẽn gõde, pa rẽ bɩ sẽn pa le tar saagre, n tagsdẽ tɩ b yaa wa fɩtl laong sẽn nusdi, tɩ pa na n le kaoos la a ki wã. Wala makre, daar a yembre a Zeezi yãa rao sẽn yaa wãoore, t’a yĩngã pid ne noada. Tõe t’a ra tagsdame t’a pa na n tol n paam laafɩ, n le tõog n zĩnd ne a zakã rãmb la a zo-rãmbã ye. (Luk 5:12, 13) Daar a to me, a yãa rao sẽn yaa wʋnga, la sẽn pa tõe n gom sõma. Mams-y n ges-y ra-kãng tagsg sẽn da yaa to-to, a sã n da ne nebã sẽn sõsd ne taab tɩ noomẽ t’a pa wʋmd baa fʋɩ wã. (Mark 7:32, 33) La a Zeezi sẽn maanã pa tek woto bal ye.

⁸ A Zeezi wakatẽ wã, Zʋɩf-rãmb wʋsg sã n da yã ned sẽn namsde, b tagsdame tɩ yaa Wẽnnaam n sɩbgd-a yel-wẽn yẽ mengã wall a roagdbã sẽn maan yĩnga. (Zã 9:2) Nebã sẽn da tudg n tagsd woto wã kɩtame tɩ b ra paoogd sẽn namsd-bã, tɩ kɩt tɩ b mi n tagsdẽ tɩ b ka yõod ye. La a Zeezi saooga b bãasã, n sõng-b tɩ b bãng tɩ b yell paka Wẽnnaam, tɩ pids a Ezayi bãngr-gomdã. Rẽ kɩtame tɩ d tõe n bas d yam ne bõe?

9. Wãn to la Ebre-rãmb 4:15, 16 wilgd tɩ d maan-kʋʋdb kãsmã sɩd zoeta ninsaalbã sẽn pa zems zãngã nimbãanega?

⁹ Karm-y Ebre-rãmb 4:15, 16. D tõe n basa d yam t’a Zeezi na n kʋmda d nimbãaneg wakat fãa. Bõe n wilgd tɩ ned yaa nimbãan-zoɛta? Nimbãan-zoɛt sã n yã ned a to sẽn namsde, sãamda a sũuri. Gɛrk gom-bil ning b sẽn lebg tɩ “kʋm nedã” rat n yeelame tɩ d ning d meng a soabã zĩigẽ, t’a soabã sã n namsdẽ bɩ namsd tõnd me. D sã n karemd kibay nins sẽn gomd yel-soalem nins a Zeezi sẽn maanã yelle, d yãta vẽeneg tɩ nebã sẽn da namsdã ra sãamda a sũur wʋsgo. A pa maag nebã bãase, a sẽn da tagsd t’a segd n maana woto yĩng bal ye. Nebã yell sɩd ra pak-a lame, t’a ra rat n sõng-ba. Wala makre, a sẽn wa n na n sãoog wãoorã, a ra tõe n paa yɩɩg n maan dẽ. La a sɩɩs-a lame. Tõe tɩ ra kaoosa wʋsg tɩ ned pa sɩɩs wãoorã ye! A sẽn wa n na n kɩt tɩ wʋngã tʋb yoosa me, a maan-a-la neer n tall-a n yi kʋʋngã sʋka. Daar a to me, pag sẽn da yaa yel-wẽn-maand la sẽn tek yam n kos sugr n madg a Zeezi naoã ne a nintãm, la a yẽes ne a zoobdã. Fariziyẽ a ye n paoog pagã. La a Zeezi gom n teel-a lame, n yeel tɩ Fariziyẽ wã ka bʋʋm ye. (Mat. 8:3; Mark 7:33; Luk 7:44) A Zeezi pa zãag a meng ne bãad-dãmbã la neb nins sẽn da maan yel-wẽn-kãsemsã ye. A pʋd n da boonda neb a woto tɩ b wa a nengẽ, la a ra wilgdẽ t’a zoeta b nimbãanega. D tõe n basa d yam t’a zoeta tõnd me nimbãanega.

D RƖKDA D MAAN-KƲƲDB KÃSMÃ TOGS-N-TAAR RŨNDÃ-RŨNDÃ

10. Bõe la d tõe n tall n sõng zoensã la mugsã rũndã-rũndã? (Ges-y fot-rãmbã me.)

¹⁰ D sẽn yaa a Zeezi karen-biis sẽn maand sɩdã yĩnga, d modgd n dɩkda a togs-n-taar nonglmã la nimbãan-zoeerã wɛɛngẽ. (1 Pɩy. 2:21; 3:8) Yaa sɩd tɩ d pa tõe n kɩt tɩ wʋng tʋb yoose, wall tɩ zoang nin puk ye. La d tõe n sõnga neb a woto tɩ b bãng a Zeova, la b bao a zoodo. Wala makre, b yiisa bũmb toor-toor sẽn tik Biiblã zug mugsa goam koabg la zak pʋsẽ rũndã-rũndã. Sẽn paase, b yiisa sɛb buud-goam pis-yoob la zak pʋgẽ ne bray neb nins sẽn pa ne sõma wã, la zoensã yĩnga. Buud-goam koabg la zak pʋsẽ me, tõnd video-rãmbã naagda ne goam sẽn bilgd bũmb nins sẽn be video wã pʋgẽ wã. Bõn-kãensã fãa sõngda mugsã la zoensã tɩ b bãngd a Zeova ne a Biigã.

11. Bõe la a Zeova siglgã maand tɩ wilgdẽ t’a rɩka a Zeezi togs-n-taare, n zoet neb buud fãa nimbãanega? (Tʋʋma 2:5-7, 33) (Ges-y fot-rãmbã me.)

¹¹ A Zeova siglgã maanda modgr sẽn na yɩl n sõng neb buud fãa. Tẽeg-y t’a Zeezi vʋʋgrã poore, a pʋdga vʋʋsem sõngã a karen-biisã zut sẽn na yɩl tɩ neb nins fãa sẽn da tigim taab Pãntekotã tigr yĩngã tõog n wʋm koe-noogã, ned kam fãa a “meng buud-gomdã pʋgẽ.” (Karm-y Tʋʋm 2:5-7, 33.) A Zeezi wilgda a Zeova siglgã sor rũndã-rũndã, tɩ b yiisd sɛb la bũmb a taab buud-goam tusr la zak pʋgẽ. Buud-gom-kãens sʋkã, kẽer nebã sõor pa waoog ye. Wala makre, neb nins sẽn gomd Amerik Ẽndiyẽ-rãmbã buud-goamã sõor pa waoog ye. B bee Amerikdinoor ne Amerikdisiide. La a Zeova siglgã yiisa bũmb toor-toor Amerik Ẽndiyẽ-rãmbã buud-goam koabg la pis-yoob la zak pʋgẽ, sẽn na yɩl tɩ b tõog n paam n wʋm koe-noogã. Tõnd sɛbã bee Romani buud-goam pisi la zak pʋsẽ me. Neb tusa sẽn gomd buud-goam a woto n bãng sɩdã.

12. Bõe me la a Zeova siglgã maand n sõngd nebã rũndã-rũndã?

¹² A Zeova siglgã sẽn modgd woto sẽn na yɩl n taas nebã koe-noogã sẽn yãk a toogo, a wae n siginda sõngr n sõngd neb nins sabab-wẽng sẽn paamã. A Zeova Kaset rãmb tusa n kõt b mens ne yamleoogo, n sõngd b tẽed-n-taas nins sẽn dat sõngrã. A Zeova siglgã sõngda a nebã tɩ b paamd zĩis n tigimd taab me, n zãmsd Biiblã sẽn na yɩl n bãng Wẽnnaam sẽn nong-b to-to wã n paase.

D MAAN-KƲƲDB KÃSMÃ TÕE N SÕNGA YÃMBA

13. Bõe ne bõe la a Zeezi maand n sõngd tõndo?

¹³ A Zeezi sẽn yaa d pe-kɩɩm-sõngã, a getame tɩ d ned kam fãa paamd bũmb nins sẽn yaa tɩlɛ sẽn na yɩl tɩ yẽ ne a Zeova zoodã kell n tall pãngã. (Zã 10:14; Efɛɛ. 4:7) Wakat ninga d mi n komsa raoodo, n getẽ tɩ d yaa wa fɩtl laong sẽn nusdi, pa rẽ bɩ tãnwĩig sẽn gõde. Tõe n yaa bã-kɛgeng yĩnga, d sẽn tudgd n maan bũmbu, wall tõnd ne d tẽed-n-taag moor sẽn yõsg taab yĩnga. Tõe tɩ yaa toog tɩ d zʋʋg zu-loees nins sẽn namsd tõnd rũndã-rũndã wã, n tagsd bõn-sõma nins Wẽnnaam sẽn pʋlem tõnd tɩ watẽ wã yelle. La tẽeg-y t’a Zeezi mii zu-loees nins y sẽn tarã, la a wʋmd sẽn pa nana ne-yã võore. A nimbãan-zoeerã kɩtame t’a sõngd-yã. A tõe n tũnuga ne vʋʋsem sõngã n kõ-y pãnga, y sã n wa koms raoodo. (Zã 16:7; Tɩt 3:6) Sẽn paase a Zeezi tõe n tũnuga ne “kũun sẽn yaa rapã” la y tẽed-n-taas a taab n keng y raood la a sõng-yã.—Efɛɛ. 4:8.

14. D sã n wa koms raoodo, bõe la d tõe n maane?

¹⁴ Y sã n wa koms raood bɩ y tẽeg t’a Zeezi yaa d maan-kʋʋdb kãsma, la y bʋgs tʋʋmd ning a sẽn tʋmdã zugu. Tẽeg-y t’a Zeova pa tʋm-a tẽngã zug t’a wa kõ a vɩɩmã tɩ yɩ maoong bal ye. Ra yaa sẽn na n sõng-a t’a bãng zu-loeesã sẽn namsd ninsaalbã sẽn pa zems zãngã to-to wã me. D sã n wa koms raood yel-wẽn d sẽn maan yĩnga, pa rẽ bɩ d pãn-koms yĩnga, a Zeezi na n sõnga tõnd ne yamleoog tɩ zems a wakate.—Ebre. 4:15, 16.

15. Bõe n sõng saam-biig a ye t’a lebg n wa tigingã pʋgẽ?

¹⁵ A Zeezi sõngda a nin-buiidã me tɩ b gẽesd neb nins sẽn lak n bas a Zeova bãgrã, sẽn na yɩl n sõng-b tɩ b lebg n wa. (Mat. 18:12, 13) D gom a Ɛstefano yelle.b B sẽn yiis-a tigingã pʋgẽ yʋʋm piig la a yiib poore, a wa n yãka yam n na n kẽng tigsga. A yeelame: “Pa yɩ nana ne-m ye. La m da rat le naaga a Zeova zakã nebã sẽn nong taabã. Kãsem-dãmb nins sẽn sõs ne maamã wilg-m lame tɩ b sũur nooma m sẽn dat n lebg n wa wã. Wakat ninga m sũur da sãamda m sẽn bas a Zeova wã, hal tɩ m dat n koms raood n base. La kãsem-dãmbã ra tẽegd-m lame t’a Zeova ne a Zeezi pa rat tɩ m koms raood n bas ye. B sẽn wa n lebs n deeg maam tigingã pʋgẽ wã, tigingã nebã fãa reega maam ne m zakã rãmb ne sũ-noogo. Mam pagã wa n sak n sɩnga Biiblã zãmsgo. Rũndã-rũndã, d naaga taab n tũud a Zeova.” D maan-kʋʋdb kãsmã sẽn nong nebã sã n ne tigingã nebã fãa sẽn sõngd sẽn tek-b yam n kos sugrã sẽn na yɩl tɩ b lebg n wa tigingã pʋgẽ wã, segd n noom-a-la wʋsgo.

16. Bõe yĩng tɩ y sũur yaa noogo, d sẽn tar maan-kʋʋdb kãsem sẽn yaa nimbãan-zoɛtã yĩnga?

¹⁶ A Zeezi sẽn wa n be tẽngã zugã, a sõnga neb ka tɛk tɩ zems a wakate. Rũndã-rũndã me, d tõe n basa d yam zãng-zãng t’a na n sõnga tõnd wakat ning fãa d sẽn dat sõngre. La dũni-paalgã sẽn wat ka la bilfã pʋgẽ, a na n sõnga neb nins sẽn yaa sakdbã tɩ b lebg neb sẽn zems zãnga, n paam b meng ne yɛl nins fãa yel-wẽndã sẽn wat ne wã. D pʋʋsda d Wẽnnaam a Zeova barka, a sẽn nong tõnd wʋsg hal n kõ a Biigã t’a yaa d maan-kʋʋdb kãsem sẽn yaa nimbãan-zoɛtã yĩnga.