Warã sẽn tar pãng zĩis wʋsgã: Bõe la Biiblã yet rẽ wɛɛngẽ?

• “Sin tẽngã taoor dãmb wilgame tɩ roandã yʋʋmdã n yɩ tʋʋlg n yɩɩd yʋʋm a taabã, la tɩ yʋʋm a yiib bal war n yɩɩd roandã warã.”—The Guardian, yʋʋmd 2022 bõn-bɩʋʋng kiuug rasem a 7.

• “Siãnsã bãngdb yeelame tɩ warã sẽn be Afirik zĩis kẽerã na n kell n kaoosa yʋʋm a nu.”—UN News, yʋʋmd 2022 sa-sik kiuug rasem 26.

• “Erop soolmã sã n pʋɩ babs a tãabo, babs a yi pʋsẽ la war tõe n zĩndi. La wõnda yʋʋm kobs-nu wã sẽn loogã pʋgẽ, war a woto buud zɩ n zĩnd ye.”—BBC News, yʋʋmd 2022 sa-sik kiuug rasem 23.

Bãngdb wʋsg yetame tɩ war a woto na n ket n watame, la tɩ b na n paamda pãng menga. D tõe n saagame tɩ yellã na n wa paama tɩɩm bɩ? Bõe la Biiblã yeta?

Biiblã sẽn pĩnd n yeel bũmb nins warã wɛɛngẽ

Ad Biiblã sẽn pĩnd n togs bũmb nins sẽn na n zĩnd tõnd wakatã:

• ‘Kom . . . na n zĩnda zĩig-zĩiga.’—Luk 21:11.

Naoor wʋsgo, warã wata ne kom. Komã wata ne namsg la a kʋʋd neba, tɩ rẽ fãa pidsd Biiblã bãngr-gomde.—Vẽnegre 6:6, 8.

Warã sẽn paamd pãngã võore

Biiblã wilgda bõn-kãseng a ye sẽn kɩt tɩ warã pãng tar paasgã. A yetame:

• “Ninsaal sẽn kẽnd pa tõe n wilg a meng sor ye.”—Zeremi 10:23.

Woto rat n yeelame tɩ ninsaalbã pa tõe n bãng n “wilg [b] mens sor” bɩ n soog b mens tɩ zems ye. B yam-yãkr toor-toorã sẽn pa sõma wã wae n wata ne war la koom kaalem.

• Siãnsã bãngdb fãa la bal sak n deegame tɩ ninsaalbã sẽn maand bũmb ninsã kɩtame tɩ tʋʋlgã paasd dũniyã gill zugu, tɩ rẽ wat ne war zĩis wʋsgo.

• Rat-tɩ-loogã la ninsaalbã sẽn pa tagsd tɩ bɩ la b yaool n maan bũmbã kɩtame tɩ b kɛɛd weoogã, n dẽgemd pemsmã la tẽn-gãongã la b sãamd tẽngã bõn-sõma wã. Rẽ tõe n kɩtame tɩ d wa bõn ko-rãmb sẽn be rũndã-rũndã.

La Biiblã wilgdame tɩ d tõe n tẽe manegre.

D tõe n saagame tɩ yellã na n wa paama tɩɩm bɩ?

Biiblã pʋlmame tɩ Wẽnnaam na n wa kɩtame tɩ koomã kaalem zu-loeesã sa. Wãn to la a na n maan dẽ?

1. 1. Wẽnnaam na n “sãama neb nins sẽn sãamd tẽngã.” (Vẽnegre 11:18) A na n kɩtame tɩ bũmb a ye sẽn wat ne koomã kaalmã sa. Neb nins sẽn yaa nin-wẽns la rat-tɩ-loog rãmb tɩ b tʋʋmã sãamd tẽn-gãongã pa na n le zĩnd ye.—2 Tɩmote 3:1, 2.

2. 2. “Tẽn-koɛɛng na n lebga bãk sẽn tar tãn-wĩisi.” (Ezayi 35:1, 6, 7) Wẽnnaam na n manega warã sẽn sãam bũmb ninsã, la a kɩt tɩ tẽn-kãngã lebg arzãna, tɩ koomã sekd zĩig fãa.

3. 3. “Yãmb geta tẽngã yelle, n kɩtdẽ t’a womd biis zembal la a tar noosem wʋsgo.” (Yɩɩn-sõamyã 65:9) Ne Wẽnnaam barkã maasem yĩnga, tẽngã na n pida ne rɩbd buud toor-toor la koom sẽn yaa yɩlemde, tɩ bõn-naandsã fãa tõe n paame.