SAK 57
Y sã n wa maan yel-wẽn-kãsenga
Baa y nonga a Zeova ne y sũur fãa, la y maand y sẽn tõe fãa sẽn na yɩl n da wa sãam a sũuri, y na n mi n kongame. Yaa sɩd tɩ yel-wẽn kẽer wẽnem yɩɩda a taaba. (1 Korẽnt rãmbã 6:9, 10) Y sã n wa maan yel-wẽn-kãsenga, tẽeg-y tɩ pa rat n yeel t’a Zeova pa le nong-y ye. A rat n kõ-y-la sugr la a sõng-yã.
1. Bõe la d segd n maan n paam t’a Zeova kõ-d sugri?
Neb nins sẽn nong a Zeova wã sã n wa bãng tɩ b maana yel-wẽn-kãsẽnga, b sũur sãamda wʋsgo. La bũmb ning a Zeova sẽn pʋlem a nin-buiidã belsd-b lame. A yeelame yaa: “Baa yãmb yel-wẽnã sã n yaa moomde, b na n lebga pɛɛlg wa sa-lamdo.” (Ezayi 1:18) D sã n sɩd tek yam n kos sugri, a Zeova na n kõ-d-la sugr zãnga. Bõe n wilgd tɩ ned teka yam? Yaa a sũur sẽn na n sãam wʋsg ne yell ning a sẽn maanã, t’a bas n pa le maandẽ, la a yõk a Zeova sɛɛg t’a kõ-a sugri. Rẽ poore, a maanda a sẽn tõe fãa n bas tags-wẽns la minim-wẽns nins sẽn kɩt t’a wa maan yel-wẽndã, la a modg n tũud a Zeova no-tɩrsã.—Karm-y Ezayi 55:6, 7.
2. D sã n wa maan yel-wẽnde, wãn to la a Zeova na n tũnug ne kãsem-dãmbã n sõng-do?
A Zeova yeta tõnd tɩ d sã n wa maan yel-wẽn-kãsenga, bɩ d “bool tigingã kãsem-dãmbã.” (Karm-y Zak 5:14, 15.) Kãsem-dãmbã nonga a Zeova, la b nong neb nins sẽn tũud-a wã me. B paama zãmsgo, n tar minim n tõe n sõng-d tɩ d lebg n maneg tõnd ne a Zeova zoodã.—Karm-y Galat-rãmb 6:1.
D sã n wa maan yel-wẽn-kãsenga, bõe la kãsem-dãmbã maand n sõngd tõndo? Kãsem-dãmb a yiib bɩ a tãab n na n sõng-d ne Biiblã maasem tɩ d bãng tɩ d sẽn maanã yaa wẽnga. B leb n na n kõ-d-la sagls sẽn na n sõng-d tɩ d ra maan yel-wẽndã n yɩlem ye. Sẽn na yɩl n kogl tigingã, kãsem-dãmbã yiisda ned ning fãa sẽn maan yel-wẽnde, n pa rat n tek yam n kos sugri.
D BAO N BÃNG N PAASE
D maneg n ges a Zeova sẽn maand to-to n sõngd tõndo, d sã n wa maan yel-wẽn-kãsenga.
3. D sã n vẽneg d yel-wẽndã n togse, na n sõng-d lame tɩ d le paam a Zeova zoodo
D sã n maan yel-wẽnde, yaa a Zeova la d beeg-yã. Dẽnd segdame tɩ d vẽneg n togs-a. Karm-y Yɩɩn-sõamyã 32:1-5, tɩ rẽ poor bɩ y leok sogsgã:
Bõe yĩng tɩ d segd n vẽneg d yel-wẽnã n togs a Zeova, la d ra bao n solg-ba?
Vẽneg d yel-wẽnã n togs a Zeova wã sẽn yãk a toogo, d sã n bao kãsem-dãmbã sõngre, d paamda yolsgo. Ges-y VIDEO wã, tɩ rẽ poor bɩ y leok sogsgã.
Video wã pʋgẽ, bõe la kãsem-dãmbã maan n sõng a Kano t’a lebg n wa a Zeova nengẽ?
D segd n pelga d pʋg ne kãsem-dãmbã. B bee tõnd sõngr yĩnga. Karm-y Zak 5:16, tɩ rẽ poor bɩ y leok sokrã:
D sã n pelg d pʋg ne kãsem-dãmbã, bõe yĩng tɩ na n yɩ nana ne-b tɩ b sõng tõndo?
Vẽneg-y y yel-wẽnã n togse, pelg-y y pʋg ne kãsem-dãmbã, la y sak t’a Zeova sõng-y ne nonglem
4. A Zeova zoeta yel-wẽn-maandbã nimbãanega
Ned sẽn maan yel-wẽn-kãseng sã n tõdg t’a kõn tũ a Zeova noyã, b yiisda a soab tigingã pʋgẽ, tɩ d pa le tõe n maan tũud-n-taar ne-a, bɩ n gom ne-a ye. Karm-y 1 Korẽnt rãmb 5:6, 11, tɩ rẽ poor bɩ y leok sokrã:
Wa rabɩll sẽn wukd zom-nagdgã, tigingã neb sã n maand tũud-n-taar ne yel-wẽn-maand sẽn pa rat n tek yam, wãn to la rẽ tõe n wa ne yelle?
Kãsem-dãmbã rɩkda a Zeova sẽn yaa nimbãan-zoɛtã togs-n-taare, n modgd n baood neb nins b sẽn yiis tigingã pʋgẽ wã, sẽn na yɩl n sõng-ba. Neb wʋsg b sẽn da yiis tigingã pʋgẽ lebg n waame, bala baa ne kiblgã sẽn pa yɩ nana ne-bã, sõng-b lame tɩ b rɩk yam.—Yɩɩn-sõamyã 141:5.
• Bõe yĩng tɩ d tõe n yeel t’a Zeova manesem sẽn yaa to-to ne yel-wẽn-maandbã wilgdame t’a yaa wʋmda, nimbãan-zoɛt la nonglem soaba?
5. D sã n tek yam n kos sugri, a Zeova kõt-d-la sugri
A Zeezi rɩka makr sẽn sõngd tõnd tɩ d bãng a Zeova manesem sẽn yaa to-to, yel-wẽn-maand sã n wa tek yam. Karm-y Luk 15:1-7, tɩ rẽ poor bɩ y leok sokrã:
Bõe la woto sõngd tõnd tɩ d bãng a Zeova zugu?
Karm-y Ezekɩyɛll 33:11, tɩ rẽ poor bɩ y leok sokrã:
Bõe la d segd n maane, tɩ wilg tɩ d sɩd teka yam n kot sugri?
A Zeova geta a nin-buiidã yell neere, wa pe-kɩɩm sẽn get a piis yell to-to wã
NEB KẼER SẼN YETE: “M yɛɛsda m na n togs kãsem-dãmbã yel-wẽnd ning m sẽn maanã, tɩ b wa yiis-ma.”
Bõe la y tõe n yeel ned sẽn tagsd woto?
KƲMSGO
D sã n maan yel-wẽn-kãsenga, tɩ d sũur sãam wʋsg ne d sẽn maanã, tɩ d yãk yam n bas wẽngã maanego, a Zeova na n kõ-d-la sugri.
Lebg-n-gese
Bõe yĩng tɩ d segd n vẽneg d yel-wẽnã n togse?
Bõe la d segd n maan t’a Zeova sak n kõ tõnd d yel-wẽnã sugri?
D sã n wa maan yel-wẽn-kãsenga, bõe yĩng tɩ d segd n bao kãsem-dãmbã sõngre?
BŨMB A TAABA
Rao sẽn paam t’a Zeova kõ-a sugri, wa Ezayi 1:18 sẽn wilgdã.
Tigingã ned sã n wa maan yel-wẽn-kãsenga, wãn to la kãsem-dãmbã modgd sẽn na yɩl n sõng-a?
Ges-y d sẽn tõe n wilg neb nins b sẽn yiis tigingã pʋgẽ wã to-to tɩ d nong-b lame la tɩ d zoeta b nimbãanega.
Rao a ye kibare. A ra zãag n basa tigingã. Bõe n kɩt t’a kɩs sɩd tɩ yaa a Zeova n tak yẽ t’a lebg n wa? A kibarã gom-zug yaa: “M da ratame n lebg n wa a Zeova nengẽ.”
“Biiblã toeemda neba” (Yʋʋmd 2012 tʋʋl-nif kiuug pipi daar Gũusg Gasgã)