‘Kɩt-y tɩ zems-n-taar ning y sẽn paam vʋʋsem sõngã maasem yĩngã kell n zĩnd y sʋka’
TẼN-TƲMD a Poll sagla Efɛɛz kiris-nebã n yeel-b yaa: “Maand-y sũ-mar ne taab nonglem pʋgẽ. Mao-y tɩ laafɩ kell n zĩnd yãmb ne taab sʋka, la tɩ zems-n-taar ning y sẽn paam vʋʋsem sõngã maasem yĩngã kell n zĩnd y sʋka.”—Efɛɛ. 4:2, 3.
“Zems-n-taar” ning sẽn be d sʋkã yaa “vʋʋsem sõngã maasem yĩngã.” Woto rat n yeelame tɩ yaa Wẽnnaam pãngã tʋʋmde. La d sã n dat tɩ zems-n-taar kell n zĩnd d sʋka, baooda modgr wa a Poll sẽn wilgã. Yaa ãnda n segd n modge? Sɩd-sɩda, kiris-ned kam fãa tara a sẽn segd n maan tɩ ‘zems-n-taar ning d sẽn paam vʋʋsem sõngã maasem yĩngã kell n zĩnd d sʋka.’
D rɩk makre. Mams-y wa ned sẽn na n da mobil-paall n kõ yãmba. Ãnda n segd n ges mobillã yell sẽn na yɩl t’a ra sãame? D fãa mii sok-kãngã leoore. Y sã n pa ges mobillã yell sõma t’a sãame, y pa tõe n ning sẽn kõ-a yãmb mobillã taal ye.
Woto me, baa zems-n-taar ning sẽn be d sʋkã sẽn yaa Wẽnnaam kũunã, yaa tõnd ned kam fãa n segd n modg tɩ bũmb ra sãam-a ye. Tõnd ne d tẽed-n-taag sã n pa zemsd taaba, d segd n soka d meng yaa: ‘Mam maanda m sẽn tõe fãa n na n welg yellã tɩ zems-n-taar kell n zĩnd tigingã pʋgẽ bɩ?’
“MAO-Y” TƖ ZEMS-N-TAAR KELL N ZĨNDI
A Poll goamã wilgdame tɩ wakat ninga, tõe n yɩɩ toog tɩ d tõog tɩ laafɩ kell n zĩnd tõnd ne d tẽed-n-taasã sʋka, sẽn yɩɩd fãa b nin-yɛng sã n wa maan bũmb tɩ d sũur yiki. Sã n wa yaa woto, yaa tɩlɛ tɩ d tɩ gom ne a soabã bũmb ning a sẽn maanã yell bɩ? Pa wakat fãa la d segd n maan woto ye. Sok-y y meng yaa: ‘M sã n na n tɩ gom ne a soaba, na n welga yellã bɩ, bɩ na n zẽn-a lame n paase?’ Wakat ninga yɩta sõma tɩ d yĩm a sẽn maan bũmb ningã yelle, wall tɩ d kõ-a sugri.—Yel. 19:11; Mark 11:25.
Sok-y y meng yaa: ‘M sã n na n tɩ gom ne a soaba, na n welga yellã bɩ, bɩ na n zẽn-a lame n paase?’
Bɩ d ket n “maand sũ-mar ne taab nonglem pʋgẽ” wa tẽn-tʋmd a Poll sẽn yeelã. (Efɛɛ. 4:2) Sebr a yembr pʋgẽ, b yeelame t’a Poll gomdã rat n yeelame tɩ d “sak-b wa b sẽn yaa a soabã.” Woto rat n yeelame tɩ d segd n sak n deegame tɩ d tẽed-n-taasã yaa koangdb wa tõndo. Yaa sɩd tɩ d modgd n yeelgda “nin-paalgã.” (Efɛɛ. 4:23, 24) La ned kae tõnd sʋkã n tõe n maan dẽ tɩ zems zãng ye. (Rom. 3:23) D sã n sak n deeg rẽ, yɩta nana tɩ d maand sũ-mar ne taab la d kõt taab sugri, tɩ kɩt tɩ ‘zems-n-taar ning d sẽn paam vʋʋsem sõngã maasem yĩngã kell n zĩnd d sʋka.’
D sã n kõt d taabã sugri, la d yĩmd bũmb nins b sẽn maand tɩ yikd d sũurã, d na n tõogame tɩ ‘laafɩ kell n zĩnd tõnd ne taab sʋka.’ Efɛɛz rãmb 4:3 pʋgẽ, a Poll pʋda Gɛrkã gom-bil sẽn bilgd bũmb sẽn gãt bũmb a yiib ne taaba, sẽn loete. Gom-bi-kãng bee Kolos rãmb 2:19 pʋgẽ, tɩ b lebg-a tɩ “gĩina.” Gĩin yaa bũmb sẽn tar pãng sẽn kɩtd tɩ yĩngã kõab sog taab sõma. Woto me, laafɩ la nonglem sẽn be tõnd ne d tẽed-n-taasã sʋkã kɩtame tɩ d zemsd taaba, baa b sẽn mi n maand yɛl kẽer sẽn pa noom-dã.
Woto wã, d tẽed-n-taag sã n wa beeg-y wall a maana bũmb n sãam y sũur bɩ y modg n zoe a nimbãanega, la y ra ning-a taal ye. (Kolo. 3:12) D fãa sẽn yaa neb sẽn pa zems zãngã yĩnga, yaa vẽeneg tɩ yãmb me mi n maana bũmb n sãam y to sũuri. Y sã n ning woto y yamẽ, na n kɩtame tɩ y modg n sõng tɩ ‘zems-n-taar ning d sẽn paam vʋʋsem sõngã maasem yĩngã kell n zĩnd d sʋka.’