प्रेषितांची कार्यं
६ त्या दिवसांत, शिष्यांची संख्या वाढत चालली होती. तेव्हा असं झालं की ग्रीक बोलणारे यहुदी, इब्री बोलणाऱ्‍या यहुद्यांच्या विरोधात तक्रार करू लागले. कारण दररोजच्या अन्‍नाच्या वाटपात त्यांच्या विधवांकडे दुर्लक्ष केलं जात होतं.+ २ म्हणून १२ प्रेषितांनी शिष्यांना एकत्र जमवलं आणि ते त्यांना म्हणाले: “देवाचं वचन सोडून आम्ही जेवणाचं वाटप करणं योग्य ठरणार नाही.+ ३ तेव्हा भावांनो, तुमच्यामध्ये चांगलं नाव असलेल्या* अशा सात पुरुषांना निवडा,+ जे बुद्धीने आणि पवित्र शक्‍तीने* भरलेले आहेत,+ म्हणजे या आवश्‍यक कामासाठी आपल्याला त्यांची नेमणूक करता येईल.+ ४ पण आम्ही स्वतःला प्रार्थना आणि देवाच्या वचनाची सेवा यांसाठी वाहून घेऊ.” ५ त्यांचं हे बोलणं सगळ्या शिष्यांना पटलं. म्हणून त्यांनी विश्‍वासाने आणि पवित्र शक्‍तीने परिपूर्ण असलेला स्तेफन, तसंच फिलिप्प,+ प्रखर, नीकानुर, तीमोन, पार्मिना आणि यहुदी धर्म स्वीकारलेला अंत्युखियाचा नीकलाव यांना निवडलं. ६ त्यांनी त्यांना प्रेषितांजवळ आणलं आणि प्रार्थना केल्यावर प्रेषितांनी त्यांच्यावर हात ठेवले.+
७ याचा परिणाम असा झाला, की देवाच्या वचनाचा प्रसार होत गेला+ आणि यरुशलेममध्ये शिष्यांची संख्या झपाट्याने वाढत गेली.+ तसंच, याजकांपैकीही बऱ्‍याच जणांनी विश्‍वास स्वीकारला.+
८ स्तेफन हा देवाची कृपा आणि सामर्थ्य यांनी परिपूर्ण होऊन लोकांमध्ये बरीच अद्‌भुत कार्यं आणि चिन्हं करत होता. ९ पण “स्वतंत्र माणसांच्या सभास्थानाचे” काही सदस्य, कुरेनेचे आणि आलेक्सांद्रियाचे काही जण, तसंच किलिकिया आणि आशिया इथले काही जण पुढे येऊन स्तेफनशी वाद घालू लागले. १० पण तो बुद्धीने आणि पवित्र शक्‍तीच्या मदतीने बोलत असल्यामुळे त्याच्यापुढे त्यांचं काहीच चाललं नाही.+ ११ तेव्हा त्यांनी गुपचूप काही माणसांना असं म्हणायला चिथवलं: “आम्ही याला मोशेची आणि देवाची निंदा करताना ऐकलंय.” १२ मग त्यांनी लोकांना, वडीलजनांना आणि शास्त्र्यांना भडकवलं. त्या सगळ्यांनी अचानक जाऊन त्याला पकडलं आणि बळजबरीने न्यायसभेसमोर* नेलं. १३ त्यांनी खोट्या साक्षीदारांना उभं केलं. ते साक्षीदार असं म्हणाले: “हा माणूस सतत या पवित्र मंदिराच्या आणि नियमशास्त्राच्या विरोधात बोलत राहतो. १४ उदाहरणार्थ, आम्ही याला असं म्हणताना ऐकलंय, की नासरेथचा येशू हे मंदिर खाली पाडेल आणि मोशेने आमच्यासाठी लावून दिलेल्या प्रथा बदलून टाकेल.”
१५ जेव्हा न्यायसभेत बसलेल्या सगळ्यांनी त्याच्याकडे निरखून पाहिलं, तेव्हा त्याचा चेहरा एखाद्या स्वर्गदूताच्या चेहऱ्‍यासारखा त्यांना दिसला.