Għamos*

1 Kliem Għamos, wieħed fost dawk li kienu jrabbu n-nagħaġ minn Tekogħa,+ li semaʼ f’viżjoni dwar Israel+ fi żmien Użżija+ s-sultan taʼ Ġuda u fi żmien Ġerobogħam+ bin Ġowas,+ is-sultan taʼ Israel, sentejn qabel it-terremot.+ 2 U hu qal:

“Ġeħova—minn Sijon se jgħajjat bħal iljun,+ u minn Ġerusalemm se jsemmaʼ leħnu;+ u l-mergħat tar-rgħajja jitnikktu, u l-quċċata tal-Karmel tinxef.”+

3 “Hekk qal Ġeħova, ‘“Minħabba tliet irvellijiet taʼ Damasku,+ minħabba erbgħa, m’iniex se rreġġaʼ dan lura, għax huma dirsu lil Gilegħad+ saħansitra b’għodod tad-dris tal-ħadid. 4 U se nibgħat nar+ fuq id-dar taʼ Ħażagħel,+ u jiblaʼ t-torrijiet mgħammrin taʼ Ben-ħadad.+ 5 Inkisser l-istaneg taʼ Damasku+ u neqred lill-abitant minn Bikat-awen, u lil dak li jżomm ix-xettru minn Bet-għeden; u n-nies tas-Sirja jiġu eżiljati f’Kir,”+ qal Ġeħova.’

6 “Hekk qal Ġeħova, ‘“Minħabba tliet irvellijiet taʼ Gaża,+ minħabba erbgħa, m’iniex se rreġġaʼ dan lura, għax huma ħadu fl-eżilju ġemgħa sħiħa t’eżiljati+ biex jagħtuhom f’idejn Edom.+ 7 Se nibgħat nar fuq is-sur taʼ Gaża,+ u jiblaʼ t-torrijiet mgħammrin tagħha. 8 U neqred lill-abitanti minn Asdod,+ u lil dak li jżomm ix-xettru minn Askelon;+ u mmidd idi+ fuq Għekron,+ u dawk li jifdal mill-Filistin jgħibu,”+ qal il-Mulej Sovran Ġeħova.’

9 “Hekk qal Ġeħova, ‘Minħabba tliet irvellijiet taʼ Tir,+ minħabba erbgħa, m’iniex se rreġġaʼ dan lura, għax huma taw ġemgħa sħiħa t’eżiljati f’idejn Edom, u għax ma ftakrux fil-patt taʼ l-aħwa.+ 10 Se nibgħat nar fuq is-sur taʼ Tir, u jiblaʼ t-torrijiet mgħammrin tagħha.’+

11 “Hekk qal Ġeħova, ‘Minħabba tliet irvellijiet t’Edom,+ minħabba erbgħa, m’iniex se rreġġaʼ dan lura, għax hu ġera wara ħuh stess bis-sejf,+ u għax aġixxa bla ħniena,+ u r-rabja tiegħu dejjem tqattaʼ l-priża tiegħu; u qilltu tħeġġeġ bla waqfien.+ 12 Se nibgħat nar f’Teman,+ u jiblaʼ t-torrijiet mgħammrin taʼ Bosra.’+

13 “Hekk qal Ġeħova, ‘“Minħabba tliet irvellijiet taʼ wlied Għammon,+ minħabba erbgħa, m’iniex se rreġġaʼ dan lura,+ għax huma jċarrtu beraħ lin-nisa tqal taʼ Gilegħad, bl-iskop li jkabbru t-territorju tagħhom stess.+ 14 Se nagħti n-nar lis-sur taʼ Rabba,+ u jiblaʼ t-torrijiet mgħammrin tagħha, b’għajta taʼ gwerra f’jum il-battalja, b’tempesta f’jum ir-riefnu.+ 15 U s-sultan tagħhom imur fl-eżilju, hu u l-prinċpijiet tiegħu flimkien,”+ qal Ġeħova.’

2 “Hekk qal Ġeħova, ‘“Minħabba tliet irvellijiet taʼ Mowab,+ minħabba erbgħa, m’iniex se rreġġaʼ dan lura, għax hu ħaraq l-għadam tas-sultan t’Edom għall-ġir.+ 2 Se nibgħat nar f’Mowab, u jiblaʼ t-torrijiet mgħammrin taʼ Kerjot;+ u Mowab imut f’nofs l-istorbju, l-għajat tal-gwerra, u l-ħoss taʼ qarn.+ 3 Neqred l-imħallef minn nofsu, u lill-prinċpijiet kollha tiegħu noqtolhom miegħu,”+ qal Ġeħova.’

4 “Hekk qal Ġeħova, ‘Minħabba tliet irvellijiet taʼ Ġuda,+ minħabba erbgħa, m’iniex se rreġġaʼ dan lura, għax huma ċaħdu l-liġi taʼ Ġeħova,+ u għax ma żammewx ir-regolamenti tiegħu; imma baqaʼ jiżvijahom il-gideb+ tagħhom, li warajh imxew missirijiethom.+ 5 Se nibgħat nar f’Ġuda, u jiblaʼ t-torrijiet mgħammrin taʼ Ġerusalemm.’+

6 “Hekk qal Ġeħova, ‘Minħabba tliet irvellijiet taʼ Israel,+ minħabba erbgħa, m’iniex se rreġġaʼ dan lura, għax huma jbigħu lill-ġust għall-fidda, u lill-fqir għall-prezz taʼ par sandli.+ 7 Huma jilhġu u jixxennqu li t-trab taʼ l-art ikun fuq ras il-batuti;+ iwarrbu+ lill-ġwejdin; raġel u missieru marru għand l-istess tfajla,+ bl-iskop li jkasbru l-isem qaddis tiegħi.+ 8 U jimteddu maġenb kull artal+ fuq ilbiesi maħtufin bħala rahan;+ u fid-dar taʼ l-allat tagħhom huma jixorbu l-inbid+ taʼ dawk li ġew immultati.’

9 “‘Imma minħabba fihom jien qridt għalkollox lill-Amurri,+ li l-għoli tiegħu kien bħall-għoli taċ-ċedri u li kien b’saħħtu bħas-siġar immensi;+ jien qridt għalkollox il-frott tiegħu minn fuq u għeruqu minn taħt.+ 10 Ħriġtkom mill-art taʼ l-Eġittu,+ u mexxejtkom fix-xagħri għal erbgħin sena,+ sabiex tieħdu f’idejkom l-art taʼ l-Amurri.+ 11 U bqajt inqajjem lil xi wħud minn uliedkom bħala profeti+ u lil xi wħud mill-irġiel żgħażagħ tagħkom bħala Nażiriti.+ Jaqaw dan m’għandux ikun, O wlied Israel?’ hija l-kelma taʼ Ġeħova.

12 “‘Imma intom bqajtu tagħtu l-inbid lin-Nażiriti biex jixorbuh,+ u kkmandajtu lill-profeti billi għedtulhom: “Tipprofetizzawx.”+ 13 Ara! Qed inġiegħel l-art taʼ taħtkom titbandal, bħalma jitbandal il-karru mimli b’dak li nġabar minn ringiela qmuħ li jkunu għadhom kif inqatgħu. 14 Il-ħafif ma jkollux iktar post fejn jaħrab,+ u ebda wieħed b’saħħtu ma jsaħħaħ il-qawwa tiegħu, u ebda setgħan ma jeħles lil ruħu.+ 15 Ħadd minn dawk li jużaw il-qaws ma jibqaʼ wieqaf, ebda wieħed b’saqajh ħfief ma jaħrab, u ebda rikkieb taż-żwiemel ma jeħles lil ruħu.+ 16 U l-qalbieni fost l-irġiel setgħanin se jaħrab għarwien f’dak il-jum,’+ hija l-kelma taʼ Ġeħova.”

3 “Isimgħu din il-kelma li Ġeħova qal dwarkom,+ O wlied Israel, dwar il-familja sħiħa li jien ħriġt mill-art taʼ l-Eġittu.+ Hu qal, 2 ‘Lilkom biss kont naf+ mill-familji kollha taʼ l-art.+ Huwa għalhekk li se nitlob kont minnkom għall-iżbalji kollha tagħkom.+

3 “‘Sejrin tnejn jimxu flimkien jekk ma jkunux ftiehmu minn qabel biex jiltaqgħu?+ 4 Jgħajjat iljun fil-foresta meta ma jkollux priża?+ Iljun b’saħħtu se jsemmaʼ leħnu mill-moħba tiegħu jekk ma jkun qabad xejn? 5 Se jaqaʼ għasfur f’nasba fl-art meta m’hemmx xbiek għalih?+ Titlaʼ nasba mill-art meta ma tkun qabdet assolutament xejn? 6 Jekk qarn jindaqq f’belt, ma jitregħdux in-nies?+ Jekk jinqalaʼ gwaj fil-belt, ma jkunx Ġeħova li aġixxa? 7 Għax il-Mulej Sovran Ġeħova ma jagħmel xejn jekk ma jkunx irrivela l-ħaġa kunfidenzjali tiegħu lill-qaddejja tiegħu l-profeti.+ 8 Għajjat iljun!+ Min ma jibżax? Tkellem il-Mulej Sovran Ġeħova! Min ma jipprofetizzax?’+

9 “‘Xandru dan fuq it-torrijiet mgħammrin f’Asdod u fuq it-torrijiet mgħammrin fl-art taʼ l-Eġittu,+ u għidu: “Inġabru flimkien kontra l-muntanji tas-Samarija,+ u araw il-ħafna diżordnijiet f’nofsha u l-imbrolji li jsiru fiha.+ 10 Ma jafux jagħmlu s-sewwa,”+ hija l-kelma taʼ Ġeħova, “dawk li qed jimlew it-torrijiet mgħammrin tagħhom bil-priża li ħadu bil-vjolenza.”’+

11 “Għaldaqstant, hekk qal il-Mulej Sovran Ġeħova, ‘Hemm avversarju madwar il-pajjiż,+ u se jneħħilek saħħtek u jaħtaf il-priża tat-torrijiet mgħammrin tiegħek.’+

12 “Hekk qal Ġeħova, ‘Bħalma r-ragħaj jaħtaf żewġ riġlejn* jew biċċa widna minn ħalq l-iljun,+ hekk jinħatfu wlied Israel, dawk li qegħdin bil-qiegħda fis-Samarija fuq friex impressjonanti+ u fuq xi divan+ taʼ Damasku.’

13 “‘Isimgħu u agħtu xiehda+ fid-dar taʼ Ġakobb,’ hija l-kelma tal-Mulej Sovran Ġeħova, l-Alla taʼ l-armati. 14 ‘Għax dakinhar li nitlob kont+ minn Israel taʼ l-irvellijiet tiegħu, jien se nitlob kont ukoll mill-artali taʼ Betel;+ u l-qrun taʼ l-artal jitqaċċtu u jaqgħu fl-art.+ 15 U nġarraf id-dar tax-xitwa+ kif ukoll id-dar tas-sajf.’+

“‘U d-djar taʼ l-avorju se jkollhom jgħibu,+ u bosta djar se jkollhom jiġu fi tmiemhom,’+ hija l-kelma taʼ Ġeħova.”

4 “Isimgħu din il-kelma, intom baqar taʼ Basan,+ li qegħdin fuq il-muntanja tas-Samarija,+ li qed timbroljaw lill-batuti,+ li qed tgħakksu lill-foqra, u li qed tgħidu lis-sidien tagħkom, ‘Ġibu ħa nixorbu!’ 2 Il-Mulej Sovran Ġeħova ħalef bi qdusitu,+ ‘“Ara! Ġej fuqkom żmien meta hu jtellagħkom bil-ganċijiet tal-biċċier u lil dak li jifdal minnkom bis-snanar.+ 3 U mit-tiċrit fis-swar se toħorġu,+ kull waħda mit-tiċrita taʼ quddiemha; u tintefgħu ’l barra lejn Ħarmon,” hija l-kelma taʼ Ġeħova.’

4 “‘Ejjew lejn Betel u iksru l-liġi.+ Komplu iksru l-liġi f’Gilgal,+ u ġibu s-sagrifiċċji tagħkom fil-għodu, u l-għexur tagħkom fit-tielet jum.+ 5 Aħarqu* sagrifiċċju taʼ radd il-ħajr minn dak li hu mħemmer,+ u pproklamaw offerti volontarji;+ xandru dan, għax hekk jogħġobkom, O wlied Israel,’+ hija l-kelma tal-Mulej Sovran Ġeħova.

6 “‘U jien ukoll, min-naħa tiegħi, bi snien nodfa+ ħallejtkom fi blietkom kollha u b’nuqqas taʼ ħobż fil-postijiet kollha tagħkom;+ imma ma ġejtux lura lejja,’+ hija l-kelma taʼ Ġeħova.

7 “‘U wkoll, jien żammejt lura minnkom ix-xita bil-qliel meta kien għad baqaʼ tliet xhur għall-ħsad;+ u bgħatt ix-xita fuq belt waħda, imma fuq belt oħra ma bgħatthiex. Kien hemm medda art fejn għamlet ix-xita, imma l-medda art fejn ma bgħattx xita nixfet.+ 8 U żewġt ibliet jew tlieta ġew jitkaxkru lejn belt waħda sabiex jixorbu l-ilma,+ u ma xebgħux; imma intom ma ġejtux lura lejja,’+ hija l-kelma taʼ Ġeħova.

9 “‘Jien ilqattkom bit-taħsir taʼ riħ jaħraq u bil-moffa.+ Kattartu l-ġonna tagħkom u l-għelieqi tad-dwieli tagħkom, imma s-siġar tat-tin tagħkom u s-siġar taż-żebbuġ tagħkom se jiblagħhom ix-xagħat;+ madankollu, ma ġejtux lura lejja,’+ hija l-kelma taʼ Ġeħova.

10 “‘Bgħatt fostkom pesta bħal dik taʼ l-Eġittu.+ Qtilt lill-irġiel żgħażagħ tagħkom bis-sejf,+ kif ukoll ħadtilkom iż-żwiemel tagħkom.+ U bqajt intellaʼ fi mnifsejkom l-intiena tal-kampijiet tagħkom;+ imma ma ġejtux lura lejja,’+ hija l-kelma taʼ Ġeħova.

11 “‘Jien qridt lil xi wħud minnkom, bħal meta Alla qered lil Sodoma u Gomorra.+ Sirtu bħal zokk maħtuf minn ġon-nar;+ imma ma ġejtux lura lejja,’+ hija l-kelma taʼ Ġeħova.

12 “Għaldaqstant, hekk se nagħmillek, O Israel. Minħabba dak li se nagħmillek, lesti ruħek biex tiltaqaʼ m’Alla tiegħek,+ O Israel. 13 Għax, ara! Dak li sawwar il-muntanji+ u li ħalaq ir-riħ,+ u li jgħid lill-bniedem x’inhuma ħsibijietu,+ li qed idallam+ iż-żerniq, u li qed jirfes fuq il-postijiet għoljin taʼ l-art,+ Ġeħova l-Alla taʼ l-armati jismu.”+

3 “Għax hekk qal il-Mulej Sovran Ġeħova, ‘Dik il-belt li ħarġet b’elf jibqgħalha mija; u dik li ħarġet b’mija jibqgħalha għaxra. Hekk jiġrilha d-dar taʼ Israel.’+

4 “Għax hekk qal Ġeħova lid-dar taʼ Israel, ‘Fittxuni+ u tibqgħu tgħixu.+ 5 Tfittxux lil Betel,+ u tiġux lejn Gilgal,+ u lejn Bir-xeba la tgħaddux;+ għax bla dubju Gilgal tmur fl-eżilju;+ u inkwantu għal Betel, din se ssir post taʼ qawwiet mill-agħar.+ 6 Fittxu lil Ġeħova, u ibqgħu għixu,+ li ma jmurx isir bħal nar+ li jiblaʼ, O dar Ġużeppi,+ u Betel ma jkollha ’l ħadd li jitfih,+ 7 O intom li qed iddawru l-ġustizzja fi pjanta morra*+ u li xħettu s-sewwa maʼ l-art.+ 8 Dak li għamel il-kostellazzjoni Kima*+ u l-kostellazzjoni Kesil,*+ u li qed ibiddel id-dlam ċappa+ fl-għodwa, u li dallam il-jum daqs il-lejl,+ li qed isejjaħ l-ilmijiet tal-baħar, biex iferragħhom fuq wiċċ l-art+—Ġeħova jismu;+ 9 hu li qed iġib rovina f’daqqa fuq xi ħadd b’saħħtu, biex ir-rovina tiġi saħansitra f’post fortifikat.

10 “‘F’bieb il-belt huma bagħdu lil min iwiddeb,+ u stkerrhu lil min jgħid affarijiet perfetti.+ 11 Għalhekk, talli qed tisolħu l-kera tar-rabaʼ mingħand il-batut, u tibqgħu tieħdu l-ħaraġ tal-qmuħ mingħandu;+ bnejtu djar taʼ ġebel minġur,+ imma mhux se tibqgħu tgħammru fihom; ħawwiltu għelieqi mill-isbaħ bid-dwieli, imma mhux se tibqgħu tixorbu l-inbid tagħhom.+ 12 Għax jien naf kemm huma kotrana l-irvellijiet tagħkom+ u kemm huma kbar dnubietkom,+ O intom li tobogħdu lill-ġust,+ intom li qed taċċettaw flus tas-skiet+ u li warrabtu lill-foqra+ saħansitra fil-bieb.+ 13 Għalhekk, il-bniedem taʼ dehen se jibqaʼ sieket f’dak iż-żmien, għax se jkun żmien taʼ gwaj.+

14 “‘Fittxu dak li hu tajjeb, mhux dak li hu ħażin,+ sabiex tibqgħu tgħixu;+ u biex b’hekk Ġeħova l-Alla taʼ l-armati jkun magħkom, bħalma għedtu.+ 15 Obogħdu dak li hu ħażin, u ħobbu dak li hu tajjeb,+ u agħmlu l-wisaʼ għall-ġustizzja f’bieb il-belt.+ Għandu mnejn Ġeħova l-Alla taʼ l-armati juri ħniena+ mal-fdal taʼ Ġużeppi.’+

16 “Għaldaqstant, hekk qal Ġeħova l-Alla taʼ l-armati, Ġeħova, ‘Fil-pjazez kollha se jkun hemm tinwiħ,+ u fit-toroq kollha n-nies se jgħidu: “Jaħasra, jaħasra!” U se jkollhom isejħu lil bidwi għan-niket,+ u lil dawk esperti fil-biki għat-tinwiħ.’+ 17 ‘U fl-għelieqi tad-dwieli kollha se jkun hemm tinwiħ;+ għax se ngħaddi minn ġo nofsok,’+ qal Ġeħova.

18 “‘Gwaj għal dawk li jixxennqu għall-jum taʼ Ġeħova!+ Allura, x’se jkun ifisser għalikom il-jum taʼ Ġeħova?+ Se jkun dlam, u mhux dawl,+ 19 bħal meta raġel jaħrab minħabba l-iljun, u jiltaqaʼ miegħu l-ors; u bħal meta hu daħal fid-dar u serraħ idu mal-ħajt, u gidmu s-serp.+ 20 Mhux dlam minflok dawl se jkun il-jum taʼ Ġeħova? U mhux swidija minflok dija se jkollu?+ 21 Jien bgħadt il-festi tagħkom,+ ma lqajthomx, u mhux se nieħu pjaċir bir-riħa taʼ l-assembleat solenni tagħkom.+ 22 U jekk intom toffruli offerti sħaħ tal-ħruq,+ lanqas b’dawn l-offerti bħala għotja ma nieħu gost,+ u lejn is-sagrifiċċji taʼ sħubija* tagħkom t’annimali msemmnin ma nħarisx.+ 23 Neħħili l-konfużjoni taʼ l-għanjiet tiegħek; u ma rridx nismaʼ l-ħoss melodjuż taʼ l-istrumenti tal-korda tiegħek.+ 24 U ħalli l-ġustizzja tgelgel bħall-ilmijiet,+ u s-sewwa bħal kurrent li dejjem għaddej.+ 25 Ġibtuli intom sagrifiċċji u offerti bħala għotja fix-xagħri għal erbgħin sena, O dar taʼ Israel?+ 26 Intom se ġġorru lis-sultan tagħkom+ Sikkut* u lil Kewan,* ix-xbihat tagħkom, il-kewkba t’alla tagħkom, li għamiltu għalikom.+ 27 U jien inġegħelkom tmorru fl-eżilju lil hinn minn Damasku,’+ qal dak li ismu hu Ġeħova l-Alla taʼ l-armati.”+

6 “Gwaj għal dawk f’Sijon li huma moħħhom mistrieħ+ u għal dawk li qed jafdaw fil-muntanja tas-Samarija! Huma l-uħud distinti tal-ġens ewlieni, u lejhom ġiet id-dar taʼ Israel. 2 Morru Kalne, u araw; minn hemmhekk morru Ħamat+ li hi miżgħuda bin-nies, u inżlu Gat+ tal-Filistin. Huma aħjar minn dawn is-saltniet, jew huwa t-territorju tagħhom akbar mit-territorju tagħkom?+ 3 Qegħdin intom tinsew jum il-gwaj,+ u tqarrbu l-post fejn tgħammar il-vjolenza?+ 4 Intom li timteddu fuq sodod taʼ l-avorju+ u tintelqu fuq id-divani tagħkom, u tieklu l-imtaten mill-merħla u l-għoġiela minn fost l-imsemmnin;+ 5 li tqabblu għanjiet skond il-ħoss taʼ l-istrument tal-korda;+ li, bħal David, ħloqtu għalikom strumenti għall-kant;+ 6 intom li tixorbu minn skutelli bl-inbid,+ u tindilku bi żjut mill-ifjen,+ u li ma mradtux minħabba l-katastrofi taʼ Ġużeppi.+

7 “Għalhekk, issa se jkunu l-ewwel eżiljati fost dawk li jmorru fl-eżilju,+ u żmien ix-xalar irid jitlaq.

8 “‘Il-Mulej Sovran Ġeħova ħalef b’ruħu stess,’+ hija l-kelma taʼ Ġeħova l-Alla taʼ l-armati, ‘“Nistmerr il-kburija taʼ Ġakobb,+ u t-torrijiet mgħammrin tiegħu bgħadthom,+ u l-belt b’kulma fiha nagħtiha lill-għedewwa.+ 9 U jiġri li jekk jibqaʼ għaxart irġiel f’dar waħda, iridu jmutu wkoll.+ 10 U ħu missier wieħed minnhom ikollu jġorrhom wieħed wieħed, u jaħraqhom wieħed wieħed, sabiex joħroġ l-għadam minn ġod-dar.+ U jkollu jistaqsi lil min ikun fl-iktar partijiet ġewwinin tad-dar, ‘Hemm xi ħadd ieħor miegħek?’ U hu jgħid, ‘Ħadd!’ U jkollu jgħid, ‘Iskot! Għax mhux il-waqt li jissemma l-isem taʼ Ġeħova.’”+

11 “‘Għax, ara, Ġeħova qed jikkmanda,+ u hu jaħbat għad-dar il-kbira u jagħmilha borġ ġebel u d-dar iż-żgħira terrapien.+

12 “‘Jaqaw iż-żwiemel jiġru fuq blat għoli, jew wieħed jaħrat hemmhekk bil-baqar? Għax il-ġustizzja biddiltuha fi pjanta velenuża,+ u l-frott tas-sewwa fi pjanta morra,* 13 intom li qed tifirħu b’xi ħaġa li ma teżistix;+ li qed tgħidu: “Mhux bis-saħħa tagħna ħadna qrun* għalina?”+ 14 Ara! Qed inqajjem kontrikom, O dar taʼ Israel,’ hija l-kelma taʼ Ġeħova l-Alla taʼ l-armati, ‘ġens,+ u jaħqarkom mid-daħla taʼ Ħamat+ ’l isfel sal-wied* taʼ l-Għaraba.’”

7 Dan urieni l-Mulej Sovran Ġeħova, u, ara, hu kien qed jibgħat qatgħa ġurati fil-bidu taż-żrigħ imwaħħar* li kien wasal.+ U, ara, kien iż-żrigħ imwaħħar wara l-ħsad tal-ħaxix tas-sultan. 2 U ġara li meta kienu kielu l-ħxejjex taʼ l-art, jien għedt: “O Mulej Sovran Ġeħova, aħfer, jekk jogħġbok.+ Min se jibqaʼ ħaj mill-poplu taʼ Ġakobb? Għax hu żgħir!”+

3 Ġeħova ddispjaċieh għal dan.+ “Mhux se jseħħ,” qal Ġeħova.

4 Dan urieni l-Mulej Sovran Ġeħova, u, ara, il-Mulej Sovran Ġeħova ried li ssir tilwima permezz tan-nar;+ u dan belaʼ l-ilmijiet fondi u vasti u kiel il-medda taʼ l-art. 5 U jien għedt: “O Mulej Sovran Ġeħova, tkomplix, jekk jogħġbok.+ Min se jibqaʼ ħaj mill-poplu taʼ Ġakobb? Għax hu żgħir!”+

6 Ġeħova ddispjaċieh għal dan.+ “Dan ukoll mhux se jseħħ,” qal il-Mulej Sovran Ġeħova.

7 Dan urieni, u, ara! Ġeħova kien qiegħed fuq ħajt mibni biċ-ċomb tal-bennejja,+ u f’idu kellu ċ-ċomb tal-bennejja. 8 Imbagħad Ġeħova qalli: “X’qed tara, Għamos?” Għalhekk, jien għedt: “Ċomb tal-bennejja.” U Ġeħova qalli: “Ara, qed inqiegħed iċ-ċomb tal-bennejja f’nofs il-poplu tiegħi Israel.+ M’iniex se niskużah iktar.+ 9 U l-postijiet għall-qima* taʼ Iżakk+ se jiġu abbandunati, u s-santwarji+ taʼ Israel se jiġu mħarbtin;+ u jien se nqum kontra d-dar taʼ Ġerobogħam* b’sejf.”+

10 U Amażija l-qassis taʼ Betel+ bagħat jgħid lil Ġerobogħam+ is-sultan taʼ Israel: “Għamos ikkonfoffa kontrik proprju fid-dar taʼ Israel.+ Il-pajjiż ma jiflaħx għall-kliem kollu tiegħu.+ 11 Għax dan qal Għamos, ‘Bis-sejf se jmut Ġerobogħam; u Israel bla dubju se jiġi eżiljat minn artu stess.’”+

12 U Amażija qal lil Għamos: “O viżjonarju,+ mur, itlaq iġri lejn l-art taʼ Ġuda, u kul il-ħobż hemmhekk, u pprofetizza hemmhekk. 13 Imma m’għandekx tipprofetizza iktar+ f’Betel, għax hija s-santwarju taʼ sultan+ u d-dar taʼ saltna.”

14 Imbagħad Għamos wieġeb u qal lil Amażija: “Jien la kont profeta u lanqas iben profeta;+ imma kont ragħaj+ u noqros it-tin tas-siġar tal-ġummajż. 15 U Ġeħova ħadni minn wara l-merħla, u Ġeħova qalli, ‘Mur, ipprofetizza lill-poplu tiegħi Israel.’+ 16 U issa ismaʼ l-kelma taʼ Ġeħova, ‘Qiegħed int tgħid: “M’għandekx tipprofetizza kontra Israel,+ u m’għandek tlissen ebda kelma kontra dar Iżakk”?+ 17 Għaldaqstant, hekk qal Ġeħova: “Martek se ssir prostituta fil-belt.+ Uliedek subien u bniet bis-sejf se jaqgħu. Artek se tiġi mqassma bil-ħabel tal-kejl. U int fuq art mhix nadifa se tmut;+ inkwantu għal Israel, bla dubju se jiġi eżiljat minn artu stess.”’”+

8 Dan urieni l-Mulej Sovran Ġeħova, u, ara, kien hemm qoffa frott tas-sajf.+ 2 Imbagħad hu qal: “X’qed tara,+ Għamos?” Għalhekk, jien għedt: “Qoffa frott tas-sajf.”*+ U Ġeħova qalli: “Wasal it-tmiem* għall-poplu tiegħi Israel.+ M’iniex se niskużahom iktar.+ 3 ‘U l-għanjiet tat-tempju se jkunu tinwiħ f’dak il-jum,’+ hija l-kelma tal-Mulej Sovran Ġeħova. ‘Se jkun hemm ħafna iġsma mejtin.+ F’kull post, se jitwaddbu ’l barra—skiet!’

4 “Isimgħu dan, intom li qed taħtfu f’ħalqkom lil xi ħadd fqir+ biex teqirdu lill-ġwejdin taʼ l-art,+ 5 billi tgħidu, ‘Kemm baqaʼ biex jgħaddi l-qamar ġdid+ ħalli nbigħu ċ-ċereali?+ U s-Sabat*+ ukoll, biex inbigħu l-qmuħ; sabiex inċekknu l-efa+ u nkabbru x-xekel u niffalsifikaw il-miżien tal-qerq;+ 6 sabiex nixtru lill-batuti għal sempliċi fidda u lill-fqir għall-prezz taʼ par sandli, u biex inbigħu l-karfa tal-qmuħ?’+

7 “Ġeħova ħalef bis-Superjorità taʼ Ġakobb,+ ‘Qatt ma se ninsa l-għemejjel kollha tagħhom.+ 8 Jaqaw mhux minħabba f’dan li l-art se titheżżeż,+ u kull abitant fiha se jkollu jitnikket;+ u kollha kemm hi se togħla l-istess bħan-Nil u titqalleb u tbatti bħan-Nil taʼ l-Eġittu?’+

9 “‘U jrid iseħħ f’dak il-jum,’ hija l-kelma tal-Mulej Sovran Ġeħova, ‘li nniżżel ix-xemx sewwasew f’nofsinhar,+ u ndallam l-art f’jum imdawwal. 10 Inbiddel il-festi tagħkom f’vistu+ u l-għanjiet kollha tagħkom f’għanja taʼ niket, u nġib ilbies taʼ l-ixkora fuq il-ġenbejn kollha u l-irjus kollha qargħin;+ nagħmel is-sitwazzjoni bħall-vistu għal iben waħdieni,+ u t-tmiem tagħha bħal jum taʼ mrar.’

11 “‘Ara! Ġej żmien,’ hija l-kelma tal-Mulej Sovran Ġeħova, ‘meta se nibgħat ġuħ fuq l-art, ġuħ, mhux għall-ħobż, u għatx, mhux għall-ilma, imma għas-smigħ tal-kliem taʼ Ġeħova.+ 12 U se jiġu jitkaxkru minn baħar sa baħar, u mit-tramuntana sa tlugħ ix-xemx. Se jibqgħu jiġru ’l hemm u ’l hawn waqt li jfittxu l-kelma taʼ Ġeħova, imma ma jsibuhiex.+ 13 F’dak il-jum ix-xebbiet sbieħ se jħosshom ħażin, u l-ġuvintur ukoll, minħabba l-għatx;+ 14 dawk li qed jaħilfu bil-ħtija tas-Samarija,+ u li jgħidu: “Daqskemm hu ħaj l-alla tiegħek, O Dan!”+ u li jaħilfu bit-triq taʼ Bir-xeba.+ Jaqgħu u ma jqumux iktar.’”+

9 Jien rajt lil Ġeħova ’l fuq mill-artal,+ u hu qal: “Olqot ras il-kolonna, sabiex l-għetiebi jitriegħdu. U qaċċtilhom rashom, ilkoll kemm huma.+ U dawk li jifdal mill-poplu noqtolhom bis-sejf. Ebda wieħed minnhom ma se jirnexxilu jaħrab, u ħadd minn dawk li qed jaħarbu ma se jeħlisha.+ 2 Jekk iħaffru fil-Qabar,* minn hemmhekk idi stess se tiħodhom;+ u jekk jitilgħu sas-smewwiet, minn hemmhekk se nniżżilhom.+ 3 Jekk jinħbew fuq il-quċċata tal-Karmel, se nfittex bir-reqqa u niħodhom minn hemmhekk.+ U jekk jinsatru minn quddiem għajnejja f’qiegħ il-baħar,+ hemm isfel nikkmanda lis-serp, u jigdimhom. 4 Jekk imorru fil-jasar quddiem l-għedewwa tagħhom, minn hemmhekk se nikkmanda lis-sejf, u dan irid joqtolhom;+ u se nitfaʼ għajnejja fuqhom għad-deni u mhux għall-ġid.+ 5 U l-Mulej Sovran, Ġeħova taʼ l-armati, hu Dak li qed imiss l-art, sabiex iddub;+ u l-abitanti kollha tagħha se jkollhom jitnikktu;+ u se togħla bħan-Nil, kollha kemm hi, u tbatti bħan-Nil taʼ l-Eġittu.+

6 “‘Hu li qed jibni t-taraġ tiegħu fis-smewwiet,+ u l-bini tiegħu ’l fuq mill-art li sejjes;+ hu li qed isejjaħ l-ilmijiet tal-baħar+ biex iferragħhom fuq wiċċ l-art+—Ġeħova jismu.’+

7 “‘M’intomx għalija bħal ulied il-Kusin, O wlied Israel?’ hija l-kelma taʼ Ġeħova. ‘Ma tellajtx jien lil Israel mill-art taʼ l-Eġittu,+ u lill-Filistin+ minn Kreta, u lis-Sirja minn Kir?’+

8 “‘Ara! Għajnejn il-Mulej Sovran Ġeħova huma fuq is-saltna midinba,+ u hu se jeqridha minn fuq wiċċ l-art.+ Madankollu, m’iniex se neqred għalkollox id-dar taʼ Ġakobb,’+ hija l-kelma taʼ Ġeħova. 9 ‘Għax, ara! Jien qed nikkmanda, u se nheżżeż id-dar taʼ Israel fost il-ġnus kollha,+ bħal meta wieħed jheżżeż l-għarbiel, sabiex lanqas ċagħqa waħda ma taqaʼ fl-art. 10 Bis-sejf imutu—il-midinbin kollha tal-poplu tiegħi,+ dawk li qed jgħidu: “Il-gwaj ma jersaqx u ma jasalx sa ħdejna.”’+

11 “‘F’dak il-jum se nqajjem+ l-għarix+ taʼ David li ġġarraf,+ u se nsewwi t-tiċrit tagħhom. U ntellaʼ r-rovini tiegħu, u nibnih bħal fil-jiem taʼ żmien twil ilu,+ 12 bl-għan li jieħdu f’idejhom dak li baqaʼ minn Edom,+ u lill-ġnus kollha li ssejjaħ ismi fuqhom,’+ hija l-kelma taʼ Ġeħova, li qed jagħmel dan.

13 “‘Ara! Ġej żmien,’ hija l-kelma taʼ Ġeħova, ‘meta dak li jaħrat jilħaq lill-ħassâd,+ u dak li jgħaffeġ l-għeneb, lil dak li jġorr iż-żerriegħa;+ u l-muntanji joqtru bi nbid ħelu,+ u l-għoljiet kollha jdubu.+ 14 U niġbor lura lill-imjassrin tal-poplu tiegħi Israel,+ u huma jibnu l-bliet abbandunati u joqogħdu fihom,+ u jħawlu għelieqi bid-dwieli u jixorbu l-inbid tagħhom, u jagħmlu ġonna u jieklu frotthom.’+

15 “‘U jien inħawwilhom fuq arthom, u ma jkunux iktar maqlugħin mill-għeruq mill-art tagħhom li jien tajthom,’+ qal Ġeħova Alla tiegħek.”