LEZZJONI 32
Is-Saltna t’Alla Qiegħda Tmexxi!
Is-Saltna t’Alla bdiet tmexxi fis-sema fl-1914. Fl-istess sena bdew l-aħħar jiem li se jmexxu n-nies fuq l-art. Kif nafu? Se tara profeziji mill-Bibbja, u kif mill-1914 inbidlet id-dinja u l-attitudni tan-nies.
1. Il-Bibbja x’qalet minn qabel?
Il-ktieb taʼ Danjel wera li s-Saltna t’Alla se tibda tmexxi fl-aħħar taʼ perjodu taʼ żmien jgħidulu “sebaʼ żminijiet.” (Danjel 4:16, 17) Mijiet taʼ snin wara, Ġesù tkellem fuq l-istess perjodu taʼ żmien u rrefera għalih bħala “ż-żminijiet stabbiliti tal-ġnus.” Hu għallem li dak iż-żmien kien għadu ma spiċċax. (Luqa 21:24) Kif se tara, dawn is-sebaʼ żminijiet spiċċaw fl-1914.
2. Mill-1914 ’l hawn kif inbidlet id-dinja u l-attitudni tan-nies?
Id-dixxipli taʼ Ġesù saqsewh: “X’se jkun is-sinjal tal-preżenza tiegħek u tal-konklużjoni tas-sistema?” (Mattew 24:3) Ġesù qalilhom ħafna affarijiet li kienu se jiġru wara li jibda jmexxi fis-sema bħala s-Sultan tas-Saltna t’Alla. Dawn jinkludu gwerer, nuqqas taʼ ikel u terremoti. (Aqra Mattew 24:7.) Il-Bibbja qalet ukoll li l-ħajja “fl-aħħar jiem” se tkun “diffiċli” minħabba l-attitudni tan-nies. (2 Timotju 3:1-5) Mill-1914 ’l hawn, dawn qed narawhom iżjed u iżjed.
3. Id-dinja għala marret għall-agħar mill-1914 ’l hawn?
Ftit wara li Ġesù sar is-Sultan tas-Saltna t’Alla, hu kellu gwerra fis-sema kontra Satana u d-dimonji. Satana tilef u “twaddab ’l isfel lejn l-art, u l-anġli tiegħu twaddbu għal isfel miegħu.” (Rivelazzjoni 12:9, 10, 12) Ix-Xitan hu rrabjat ħafna għax jaf li se jinqered. Allura hu qed iġib tbatija u wġigħ fuq l-art kollha. Dan jgħinna nifhmu għala d-dinja hi mimlija bil-ħażen. Is-Saltna t’Alla se ssolvi dawn il-problemi kollha.
TGĦALLEM IŻJED
Ara kif nafu li s-Saltna t’Alla bdiet tmexxi fl-1914 u xi jfisser għalina.
4. Il-profeziji fil-Bibbja juru li s-Saltna t’Alla bdiet tmexxi fl-1914
Is-Sultan Nebukadnessar taʼ Babilonja kellu ħolma mingħand Alla. Fiha hu ra x’se jiġri fil-futur. Il-ħolma u kif spjegaha Danjel nistgħu naqrawha fil-Bibbja. Din turina ċar li l-ħolma kienet dwar is-saltna taʼ Nebukadnessar u s-Saltna t’Alla.—Aqra Danjel 4:17.a
Aqra Danjel 4:20-26, u mbagħad uża l-istampi biex twieġeb il-mistoqsijiet:
(A) Nebukadnessar x’ra fil-ħolma? —Ara versi 20 u 21.
(B) X’kien se jiġrilha s-siġra? —Ara vers 23.
(C) X’kien se jiġri fl-aħħar tas-“sebaʼ żminijiet”?—Ara vers 26.
Il-Ħolma tas-Siġra u s-Saltna t’Alla
IL-PROFEZIJA (Danjel 4:20-36)
It-tmexxija
(A) Siġra kbira
It-tmexxija tieqaf
(B) “Qaċċtu s-siġra” u ħallu “sebaʼ żminijiet” jgħaddu
It-tmexxija tkompli
(C) ‘Saltnatek żgur terġaʼ tkun tiegħek’
Meta ġrat l-ewwel darba . . .
(D) Is-siġra lil min kienet tirrappreżenta? —Ara vers 22.
(E) Meta waqaf imexxi?—Aqra Danjel 4:29-33.
(F) X’ġaralu Nebukadnessar fl-aħħar tas-“sebaʼ żminijiet”?—Aqra Danjel 4:34-36.
META ĠRAT L-EWWEL DARBA
It-tmexxija
(D) Nebukadnessar, is-sultan taʼ Babilonja
It-tmexxija tieqaf
(E) Wara s-606 QK, Nebukadnessar jitlef moħħu u ma jkunx jistaʼ jsaltan għal sebaʼ snin letterali
It-tmexxija tkompli
(F) Nebukadnessar jiġi f’sensih u jerġaʼ jibda jmexxi
Meta ġrat it-tieni darba . . .
(G) Is-siġra lil min kienet tirrappreżenta?—Aqra l-1 Kronaki 29:23.
(H) Meta waqfu jmexxu? Kif nafu li ma kinux għadhom imexxu meta Ġesù kien fuq l-art?—Aqra Luqa 21:24.
(I) Fejn u meta reġgħet bdiet tmexxi din is-Saltna?
META ĠRAT IT-TIENI DARBA
It-tmexxija
(G) Slaten t’Iżrael imexxu f’isem Alla
It-tmexxija tieqaf
(H) Ġerusalemm tinqered, u għal 2,520 sena ma jkunx hemm sultan minn Iżrael
It-tmexxija tkompli
(I) Ġesù jibda jmexxi fis-sema bħala s-Sultan tas-Saltna t’Alla
Kemm damu s-sebaʼ żminijiet?
Il-Bibbja stess tgħinna nifhmu x’hemm fiha. Pereżempju, f’Rivelazzjoni naqraw li tliet żminijiet u nofs huma 1,260 ġurnata. (Rivelazzjoni 12:6, 14) Mela sebaʼ żminijiet huma d-doppju, jiġifieri 2,520 ġurnata. Il-Bibbja ġieli tirreferi għal sena bħala ġurnata. (Eżekjel 4:6) Allura, fil-ktieb taʼ Danjel is-sebaʼ żminijiet huma 2,520 sena.
5. Id-dinja nbidlet mill-1914 ’l hawn
Ġesù qal minn qabel kif se tkun id-dinja wara li jsir Sultan. Aqra Luqa 21:9-11, u mbagħad iddiskuti:
Liema minn dawn l-affarijiet rajt jew smajt bihom?
L-appostlu Pawlu ddeskriva kif se jkunu n-nies fl-aħħar jiem. Aqra t-2 Timotju 3:1-5, u mbagħad iddiskuti:
Liema minn dawn l-attitudnijiet qed tara?
6. Uri li temmen li s-Saltna t’Alla qed tmexxi
Aqra Mattew 24:3, 14, u mbagħad iddiskuti:
Liema xogħol importanti juri li s-Saltna t’Alla qed tmexxi?
Int kif tistaʼ tieħu sehem f’dan ix-xogħol?
Is-Saltna t’Alla qed tmexxi fis-sema u dalwaqt se tibda tmexxi fuq l-art kollha. Aqra Ebrej 10:24, 25, u mbagħad iddiskuti:
Iktar ma nersqu qrib taʼ dik il-ġurnata, xi rridu nagħmlu?
Jekk tkun taf b’xi ħaġa li se tgħin lil oħrajn u ssalvahom, int x’se tagħmel?
XI ĦADD JISTAʼ JSAQSI: “Ix-Xhieda taʼ Ġeħova għala jgħidu li s-sena 1914 hija importanti ħafna?”
Int kif twieġeb?
XI DDISKUTEJNA?
Il-profeziji tal-Bibbja u l-kundizzjonijiet tad-dinja juru li s-Saltna t’Alla qiegħda tmexxi. Aħna nuru li nemmnu dan billi nippritkaw dwarha u mmorru l-laqgħat.
X’Tgħallimt
X’ġara fl-aħħar tas-sebaʼ żminijiet li tkellem fuqhom il-ktieb taʼ Danjel?
X’jikkonvinċik li s-Saltna t’Alla bdiet tmexxi fl-1914?
Jekk temmen li s-Saltna qed tmexxi, kif tistaʼ turi dan?
ARA IŻJED
Ara x’jgħidu n-nies li jiktbu l-istorja u oħrajn dwar kif inbidlet id-dinja mill-1914 ’l hawn.
“Meta d-Dinja Marret għall-Agħar f’Daqqa” (Artiklu minn Stenbaħ!)
Aqra kif il-profezija f’Mattew 24:14 effettwat lil raġel.
“Kont inħobb il-baseball iktar minn kull ħaġa oħra!” (It-Torri tal-Għassa Nru. 3 2017)
Kif nafu li l-profezija f’Danjel 4 għandha x’taqsam mas-Saltna t’Alla?
“Meta Bdiet Tmexxi s-Saltna t’Alla? (L-1 Parti)” (Artiklu minn Torri tal-Għassa)
X’juri li s-“sebaʼ żminijiet” f’Danjel 4 spiċċaw fl-1914?
“Meta Bdiet Tmexxi s-Saltna t’Alla? (It-2 Parti)” (Artiklu minn Torri tal-Għassa)
a Ara l-aħħar żewġ artikli fil-parti Ara Iżjed taʼ din il-lezzjoni.