Barkiet jew Maledizzjonijiet​—Hemm Għażla!

“Il-​ħajja u l-​mewt, li jien illum qegħidt quddiemek, il-​barka u s-​saħta. Agħżel il-​ħajja biex tgħix.”—DEWTERONOMJU 30:19.

1. Il-​bnedmin ġew imżejnin b’liema kapaċità?

ALLA JEHOVAH iddisinja lilna​—il-​ħlejjaq umani intelliġenti tiegħu—​biex inkunu aġenti morali ħielsa. Ma ġejniex maħluqin bħala sempliċi magni, jew robots, imma ġejna mogħtijin il-​privileġġ u r-​responsabbiltà li nagħmlu għażliet. (Salm 100:3) L-​ewwel bnedmin​—Adam u Eva—​kienu ħielsa li jagħżlu l-​korsa t’azzjoni tagħhom, u riedu jagħtu kont lil Alla għall-​għażla tagħhom.

2. Adam liema għażla għamel, u b’liema riżultat?

² Il-​Ħallieq ipprovda b’mod abbundanti għal ħajja umana taʼ barka perpetwa fuq l-​art magħmula ġenna. Għala għadu ma ntlaħaqx dak l-​iskop? Għaliex Adam għamel l-​għażla żbaljata. Jehovah kien poġġa dan il-​kmand fuq il-​bniedem: “Mis-​siġar kollha tal-​ġnien tistaʼ tiekol, imma mis-​siġra taʼ tagħrif it-​tajjeb u l-​ħażin, la tiekolx minnha, għax dak in-​nhar li tiekol minnha żgur li tmut.” (Ġenesi 2:16, 17) Li kieku Adam għażel li jobdi, l-​ewwel ġenituri tagħna kienu jiġu mberkin. Id-​diżubbidjenza ġabet il-​mewt. (Ġenesi 3:6, 18, 19) Għalhekk id-​dnub u l-​mewt ġew trasmessi lin-​nisel kollu t’Adam.—Rumani 5:12.

Barkiet Magħmulin Possibbli

3. Alla kif ipprovda assiguranza li l-​iskop tiegħu għall-​umanità kellu jitwettaq?

³ Alla Jehovah stabbilixxa mezz li bih l-​iskop tiegħu biex ibierek lill-​umanità kellu eventwalment jitwettaq. Hu nnifsu bassar Żerriegħa, billi pprofetizza f’Għeden: “Jien inqajjem mibegħda bejnek u bejn il-​mara, bejn nislek u nisilha, u hu jisħaqlek rasek u int tisħaqlu għarqubu.” (Ġenesi 3:15) Alla iktar tard wiegħed li barkiet kellhom jiġu lill-​bnedmin ubbidjenti permezz taʼ dan iż-​Żerriegħa, dixxendent t’Abraham.—Ġenesi 22:15-18.

4. Jehovah x’arranġament għamel biex ibierek lill-​umanità?

⁴ Dak iż-​Żerriegħa mwiegħed taʼ barka wera li kien Ġesù Kristu. Rigward l-​irwol taʼ Ġesù fl-​arranġament taʼ Jehovah għat-​tberik taʼ l-​umanità, l-​appostlu Kristjan Pawlu kiteb: “Alla wriena l-​imħabba tiegħu meta Kristu miet għalina, aħna li konna għadna midinbin.” (Rumani 5:8) Barkiet se jitgawdew minn dawk fost il-​bnedmin midinbin li jobdu lil Alla u jieħdu vantaġġ mill-​mertu tas-​sagrifiċċju bħala rahan taʼ Ġesù Kristu. (Atti 4:12) Se tagħżel int l-​ubbidjenza u l-​barkiet? Diżubbidjenza se tirriżulta f’xi ħaġa ferm differenti.

Xi Ngħidu Dwar Il-​Maledizzjonijiet?

5. X’inhu t-​tifsir tal-​kelma “maledizzjoni”?

⁵ L-​oppost taʼ barka hija maledizzjoni. Il-​kelma “maledizzjoni” tfisser li titkellem ħażin dwar xi ħadd jew li tippronunzja deni kontrih. Il-​kelma Ebrajka qela·lahʹ ġejja mill-​verb taʼ l-​għerq qa·lalʹ, li litteralment ifisser “kun ħafif.” Meta wżata f’sens figurattiv, madankollu, din tfisser li ‘tidgħi’ jew li ‘tistma bi stmerrija.’—Levitiku 20:9; 2 Samwel 19:44 [2 Samwel 19:43, NW].

6. Liema inċident li kien jinvolvi lil Eliżew seħħ ħdejn Betel tal-​qedem?

⁶ Ikkunsidra eżempju drammatiku t’azzjoni fil-​pront li tinvolvi maledizzjoni. Dan seħħ meta l-​profeta t’Alla Eliżew kien sejjer bil-​mixi minn Ġeriko għal Betel. Ir-​rakkont jistqarr: “Kif kien tielaʼ fit-​triq, ħarġu xi tfal żgħar mill-​belt u bdew jiddieħku bih u jgħidulu: ‘Itlaʼ, ja qargħi! Itlaʼ ja qargħi!’ U hu dar lura, ħares lejhom, u seħithom f’isem il-​Mulej. U ħarġu żewġ orsijiet mill-​foresta u sbranaw tnejn u erbgħin tifel minnhom.” (2 Slaten 2:23, 24) X’qal eżattament Eliżew meta lissen dik il-​maledizzjoni billi seħet lil dawk it-​tfal li kienu qegħdin jiżżufjettaw m’huwiex irrivelat. Minkejja dan, dik il-​pronunzja verbali kellha riżultati għaliex ġiet mitkellma f’isem Jehovah minn profeta t’Alla li kien qiegħed jaġixxi fi qbil mar-​rieda divina.

7. Xi ġralhom it-​tfal li rredikolaw lil Eliżew, u għala?

⁷ Ir-​raġuni ewlenija għaż-​żufjettar jidher li kienet għax Eliżew kien liebes l-​ilbies uffiċċjali familjari t’Elija, u t-​tfal ma riedu lil ebda suċċessur taʼ dak il-​profeta mas-​saqajn. (2 Slaten 2:13) Biex iwieġeb għall-​isfida dwar jekk kienx is-​suċċessur t’Elija u biex jgħallem lil dawn iż-​żgħażagħ u lill-​ġenituri tagħhom rispett xieraq għall-​profeta taʼ Jehovah, Eliżew seħet f’isem dak Alla t’Elija lill-​folla li kienet qiegħda tiżżufjetta. Jehovah wera li kien japprova lil Eliżew bħala l-​profeta tiegħu billi ġagħal liż-​żewġ orsijiet nisa joħorġu mill-​bosk u jqattgħu biċċiet 42 minn dawk ir-​redikolaturi. Jehovah aġixxa b’mod deċiżiv minħabba n-​nuqqas sfaċċat tagħhom taʼ rispett għall-​mezz taʼ komunikazzjoni li hu kien qiegħed juża fuq l-​art dak iż-​żmien.

8. Il-​poplu taʼ Israel x’qabel li jagħmel, u b’liema prospetti?

⁸ Snin qabel, l-​Israeliti kienu wrew nuqqas simili taʼ rispett lejn l-​arranġamenti t’Alla. Dan huwa kif żviluppa: Fl-​1513 Q.E.K., Jehovah wera favur lill-​poplu taʼ Israel billi ħelishom mill-​jasar Eġizzjan bħal li kieku “fuq il-​ġwienaħ taʼ l-​ajkli.” Ftit wara dan, taw il-​kelma tagħhom li jobdu lil Alla. Innota kif l-​ubbidjenza kienet marbuta b’mod inseparabbli maʼ li jirċievu l-​approvazzjoni t’Alla. Jehovah qal permezz taʼ Mosè: “Jekk tisimgħu leħni u żżommu l-​patt tiegħi, intom tkunu l-​wirt tiegħi minn fost il-​popli kollha, għax l-​art kollha tiegħi.” Wara dan, il-​poplu wieġeb fl-​affermattiv, billi qalu: “Kull ma qal il-​Mulej aħna nagħmluh.” (Eżodu 19:4, 5, 8; 24:3) L-​Israeliti sostnew li kienu jħobbuh lil Jehovah, kienu ddedikati lilu, u ħalfu li jobdu minn leħnu. Li jagħmlu dan kellu jirriżulta f’barkiet kbar.

9, 10. Waqt li Mosè kien fuq il-​Muntanja Sinaj, x’għamlu l-​Israeliti, u b’liema konsegwenzi?

⁹ Qabel ma ġew imnaqqxin fil-​ġebel “bis-​sabaʼ taʼ Alla” r-​regolamenti bażiċi taʼ dak il-​ftehim, iżda, maledizzjonijiet divini saru neċessarji. (Eżodu 31:18) Għala kienu mistħoqqa konsegwenzi traġiċi bħal dawn? Ma kinux l-​Israeliti indikaw xewqa li jagħmlu dak kollu li Jehovah kien tkellem? Iva, bil-​kliem fittxew barkiet, imma bl-​azzjonijiet tagħhom għażlu korsa li kien jixirqilha maledizzjonijiet.

¹⁰ Matul perijodu taʼ 40 jum meta Mosè kien fuq il-​Muntanja Sinaj jirċievi l-​Għaxar Kmandamenti, l-​Israeliti kisru l-​wegħda tagħhom taʼ lealtà lejn Jehovah li kienu għamlu iktar kmieni. “Il-​poplu,” jgħid ir-​rakkont, “meta ra li Mosè ddawwar ma niżel minn fuq il-​muntanja, inġabar madwar Aron u qallu: ‘Qum u agħmlilna allat li jimxu quddiemna, għax dan Mosè, il-​bniedem li tellagħna mill-​art taʼ l-​Eġittu, ma nafux x’sar minnu.’” (Eżodu 32:1) Dan hu eżempju ieħor t’attitudni bla rispett murija lejn l-​aġenzija umana li Jehovah kien qiegħed juża dak iż-​żmien biex tmexxi u tidderieġi lill-​poplu tiegħu. L-​Israeliti ġew imħajrin f’li jimitaw idolatrija Eġizzjana u ħasdu riżultati koroh meta madwar 3,000 minnhom inqatlu bis-​sejf f’jum wieħed.—Eżodu 32:2-6, 25-29.

Pronunzja Taʼ Barkiet u Maledizzjonijiet

11. Liema istruzzjonijiet rigward barkiet u maledizzjonijiet ġew imwettqin minn Ġożwè?

¹¹ Lejn it-​tmiem tal-​vjaġġ strapazzuż t’40 sena taʼ Israel fix-​xagħri, Mosè semma waħda waħda l-​barkiet li setgħu jaħsdu billi jagħżlu korsa t’ubbidjenza lejn Alla. Għaddilhom ukoll il-​maledizzjonijiet li l-​Israeliti kellhom jesperjenzaw kieku kellhom jagħżlu li ma jobdux minn Jehovah. (Dewteronomju 27:11–28:10) Ftit wara li Israel daħal fl-​Art Imwiegħda, Ġożwè wettaq l-​istruzzjonijiet taʼ Mosè li kienu jinvolvu dawn il-​barkiet u l-​maledizzjonijiet. Sitt tribujiet taʼ Israel waqfu taħt il-​Muntanja Għebal, u s-​sitta l-​oħra ħadu pożizzjonijiet quddiem il-​Muntanja Geriżim. Il-​Leviti waqfu fil-​wied taʼ bejniethom. Apparentement, it-​tribujiet weqfin quddiem il-​Muntanja Għebal qalu “Amen” għall-​maledizzjonijiet, jew saħtiet, moqrijin lejn dik id-​direzzjoni. Oħrajn wieġbu għall-​barkiet li l-​Leviti qraw lejn id-​direzzjoni tagħhom taħt il-​Muntanja Geriżim.—Ġożwè 8:30-35.

12. Liema kienu xi ftit mill-​maledizzjonijiet ippronunzjati mil-​Leviti?

¹² Immaġina li int tismaʼ lil-​Leviti jgħidu: “Misħut il-​bniedem li jagħmel xi xbieha minquxa jew imdewba, li l-​Mulej jistkerrah, xogħol taʼ bniedem tas-​sengħa, u jqegħidha fil-​moħbi. . . . Misħut il-​bniedem li jżeblaħ lil missieru u lil ommu. . . . Misħut il-​bniedem li jċaqlaq il-​plieri tar-​rabaʼ taʼ għajru. . . . Misħut il-​bniedem li joħroġ l-​agħma ’l barra mit-​triq. . . . Misħut il-​bniedem li jgħawweġ il-​ġustizzja tal-​barrani, taʼ l-​iltima u taʼ l-​armla. . . . Misħut il-​bniedem li jimtedd mal-​mara taʼ missieru, għax ikun jikxef truf il-​friex taʼ missieru. . . . Misħut il-​bniedem li jimtedd maʼ xi bhima, tkun xi tkun. . . . Misħut il-​bniedem li jimtedd maʼ oħtu, bint missieru jew bint ommu. . . . Misħut il-​bniedem li jimtedd maʼ omm martu. . . . Misħut il-​bniedem li jidrob lil għajru bil-​moħbi. . . . Misħut il-​bniedem li jieħu l-​ħlas biex jidrob għall-​mewt lil min ikun bla ħtija. . . . Misħut il-​bniedem li ma jżommx il-​kliem taʼ din il-​liġi u jagħmilhom.” Wara kull maledizzjoni, it-​tribujiet quddiem il-​Muntanja Għebal jgħidu, “Amen.”—Dewteronomju 27:15-26.

13. Fi kliemek stess, kif tesprimi ċerti barkiet li ppronunzjaw il-​Leviti?

¹³ Issa immaġina li int tismaʼ lil dawk quddiem il-​Muntanja Geriżim iwieġbu b’leħen għoli għal kull barka hekk kif il-​Leviti jgħajtu: “Imbierek tkun fil-​belt u mbierek fir-​rabaʼ. Imbierek ikun il-​frott taʼ ġufek, il-​frott taʼ artek, il-​frott tal-​bhejjem tiegħek; il-​frieħ tal-​baqar tiegħek, u l-​frieħ taʼ l-​imrieħel tiegħek. Imbierka l-​qoffa tal-​ħobż tiegħek, u l-​imgħaġna tiegħek. Imbierek tkun fi dħulek, u mbierek fi ħruġek.”—Dewteronomju 28:3-6.

14. L-​Israeliti fuq liema bażi kellhom jirċievu barkiet?

¹⁴ X’kien il-​bażi biex jirċievu dawn il-​barkiet? Ir-​rakkont jgħid: “Jekk int tassew tismaʼ l-​leħen tal-​Mulej, Alla tiegħek, biex tħares u tagħmel l-​ordnijiet kollha tiegħu, li jien illum qiegħed nordnalek, jerfgħek il-​Mulej, Alla tiegħek, fil-​għoli ’l fuq mill-​ġnus kollha taʼ l-​art. U jiġu fuqek dawn il-​barkiet kollha, għax tkun smajt il-​leħen tal-​Mulej, Alla tiegħek.” (Dewteronomju 28:1, 2) Iva, iċ-​ċavetta biex igawdu barkiet divini kienet ubbidjenza lejn Alla. Imma xi ngħidu għalina llum? Se nagħżlu aħna individwalment barkiet u ħajja billi nibqgħu ‘nisimgħu mil-​leħen tal-​Mulej’?—Dewteronomju 30:19, 20.

Nagħtu Ħarsa Iżjed Mill-​Qrib

15. Liema punt intgħamel fil-​barka ddokumentata f’Dewteronomju 28:3, u kif nistgħu nibbenefikaw minnu?

¹⁵ Ejjew nirriflettu fuq ċerti barkiet li Israelit setaʼ jgawdi talli jkun obda lil Jehovah. Per eżempju, Dewteronomju 28:3 jgħid: “Imbierek tkun fil-​belt u mbierek fir-​rabaʼ.” Li tkun imbierek minn Alla ma jiddependix fuq xi post jew inkarigu. Xi wħud għandhom mnejn iħossuhom maqbudin fiċ-​ċirkostanzi tagħhom, forsi għaliex jgħixu fi nħawi mħarbtin materjalment jew f’xi pajjiż imtertaq bil-​gwerer. Oħrajn jistgħu jixxennqu biex jaqdu lil Jehovah f’xi post differenti. Xi rġiel Kristjani jistgħu jiġu skuraġġiti għaliex ma jkunux ġew maħturin bħala qaddejja ministerjali jew bħala anzjani fil-​kongregazzjoni. Xi drabi, nisa Kristjani jħossuhom skuraġġiti għaliex m’humiex f’pożizzjoni li jieħdu sehem fil-​ministeru full-time bħala pijunieri jew missjunarji. Madankollu, kulmin ‘jismaʼ minn leħen il-​Mulej u bir-​reqqa jagħmel kulma jirrikjedi’ se jiġi mbierek issa u għall-​eternità kollha.

16. Il-​prinċipju taʼ Dewteronomju 28:4 kif qiegħed jiġi esperjenzat mill-​organizzazzjoni taʼ Jehovah illum?

¹⁶ Dewteronomju 28:4 jgħid: “Imbierek ikun il-​frott taʼ ġufek, il-​frott taʼ artek, il-frott tal-​bhejjem tiegħek; il-​frieħ tal-​baqar tiegħek, u l-​frieħ taʼ l-​imrieħel tiegħek.” L-​użu tal-​pronom Ebrajk fis-​singular tradott “tiegħek” jindika li din kellha tkun l-​esperjenza persunali taʼ Israelit ubbidjent. Xi ngħidu dwar il-​qaddejja ubbidjenti taʼ Jehovah illum? Iż-​żjieda u l-​espansjoni mad-​dinja kollha li qegħdin iseħħu fl-​organizzazzjoni tax-​Xhieda taʼ Jehovah huma r-​riżultat tal-​barka t’Alla fuq l-​isforzi ħerqana taʼ iktar minn 5,000,000 xandâr taʼ l-​aħbar tajba tas-​Saltna. (Mark 13:10) U l-​potenzjal għal żjieda akbar huwa evidenti għaliex ’il fuq minn 13,000,000 attendew l-​osservanza taʼ l-​Ikla taʼ fil-​Għaxija tal-​Mulej għas-​sena 1995. Qiegħed int tgawdi barkiet tas-​Saltna?

L-​Għażla Taʼ Israel Għamlet Differenza

17. Li tkun ‘milħuq’ minn barkiet jew minn maledizzjonijiet kien jiddependi fuq liema ħaġa?

¹⁷ Effettivament, barkiet kellhom isegwu lil Israelit ubbidjent. Kien imwiegħed: “U jiġu fuqek dawn il-​barkiet kollha.” (Dewteronomju 28:2) B’mod simili, intqal dwar maledizzjonijiet: “Dawn is-​saħtiet jiġu fuqek u jilħquk.” (Dewteronomju 28:15) Li kieku kont Israelit tal-​qedem, kont tkun int ‘milħuq’ minn barkiet jew minn maledizzjonijiet? Dak kien jiddependi fuq jekk kontx tobdi lil Alla jew le.

18. L-​Israeliti kif setgħu jevitaw il-​maledizzjonijiet?

¹⁸ F’Dewteronomju 28:15-68, il-​konsegwenzi li jweġġgħu tad-​diżubbidjenza huma mniżżlin bħala maledizzjonijiet. Ftit minnhom huma eżatt l-​oppost tal-​barkiet imsemmijin waħda waħda f’Dewteronomju 28:3-14. Taʼ spiss, il-​poplu taʼ Israel kien jaħsad ir-​riżultati ibsin taʼ maledizzjonijiet għaliex ikun għażel li jieħu sehem f’qima falza. (Esdra 9:7; Ġeremija 6:6-8; 44:2-6) Xi traġedja! Konsegwenzi bħal dawn setgħu ġew evitati li kieku saret l-​għażla t-​tajba, dik t’ubbidjenza għal-​liġijiet u l-​prinċipji bnini taʼ Jehovah, li b’mod ċar jiddefinixxu t-​tajjeb u l-​ħażin. Ħafna llum isofru wġigħ u traġedja għaliex ikunu għażlu li jaġixxu kuntrarju għal prinċipji tal-​Bibbja billi jipprattikaw reliġjon falza, jieħdu sehem f’immoralità sesswali, jużaw drogi illegali, jabbużaw mix-​xorb alkoħoliku, u affarijiet bħal dawn. Bħal f’Israel u Ġuda tal-​qedem, li wieħed jagħmel għażliet ħżiena bħal dawn jirriżulta f’diżapprovazzjoni divina u wġigħ tal-​qalb bla bżonn.—Isaija 65:12-14.

19. Iddeskrivi l-​kundizzjonijiet gawduti meta Ġuda u Israel għażlu li jobdu lil Jehovah.

¹⁹ Barkiet kienu abbundanti u kienet tirrenja t-​trankwillità biss meta Israel obda lil Jehovah. Per eżempju, rigward l-​era tas-​Sultan Salamun, naqraw: “Il-​poplu taʼ Ġuda u Israel kien kotran bħar-​ramel tal-​baħar; u kienu lkoll ferħana jieklu u jixorbu. . . . Il-​poplu taʼ Ġuda u Israel kien igħix fiż-​żgur, kulħadd taħt id-​dielja u t-​tina tiegħu, minn Dân sa Birsaba, iż-​żmien kollu taʼ Salamun.” (1 Slaten 4:20–5:5 [1 Slaten 4:20-25, NW]) Saħansitra fi żmien is-​Sultan David, li kien immarkat b’ħafna oppożizzjoni minn għedewwa t’Alla, il-​ġens ħass l-​appoġġ u l-​barka taʼ Jehovah meta huma għażlu li jobdu lil dak Alla taʼ verità.—2 Samwel 7:28, 29; 8:1-15.

20. Alla hu kunfidenti dwar liema ħaġa rigward xi bnedmin?

²⁰ Se tobdih int lil Alla, jew le? L-​Israeliti kellhom għażla. Għalkemm ilkoll kemm aħna writna inklinazzjoni midinba minn Adam, irċevejna wkoll l-​għotja t’għażla ħielsa. Minkejja Satana, din id-​dinja mill-​agħar, u l-​imperfezzjonijiet tagħna, aħna nistgħu nagħmlu l-​għażla t-​tajba. Iktar minn hekk, il-​Ħallieq tagħna hu fiduċjuż li quddiem kull prova u tentazzjoni, se jkun hemm dawk li jagħmlu l-​għażla t-​tajba, mhux biss bil-​kliem imma wkoll bl-​azzjoni. (1 Pietru 5:8-10) Se tkun int fosthom?

21. X’se jiġi eżaminat fl-​artiklu li jmiss?

²¹ Fl-​artiklu li jmiss, se nkunu nistgħu niżnu l-​attitudnijiet u l-​azzjonijiet tagħna fid-​dawl t’eżempji tal-​passat. Jalla kull wieħed minna jwieġeb bi gratitudni għall-​kliem t’Alla permezz taʼ Mosè: “Il-​ħajja u l-​mewt, li jien illum qegħidt quddiemek, il-​barka u s-​saħta. Agħżel il-​ħajja biex tgħix.”—Dewteronomju 30:19. (w96 6/15)

Kif Twieġeb Int?

◻ Jehovah kif għamel barkiet possibbli għal bnedmin midinbin?

◻ X’inhuma l-​maledizzjonijiet?

◻ L-​Israeliti kif setgħu jirċievu barkiet minflok maledizzjonijiet?

◻ Israel liema barkiet gawda talli obda lil Alla?

[Stampa f’paġna 7]

L-​Israeliti nġemgħu quddiem il-​Muntanja Geriżim u l-​Muntanja Għebal

[Sors]

Pictorial Archive (Near Eastern History) Est.