Min Se Jibqaʼ Ħaj F’“Jum il-​Mulej”?

“Araw daqsxejn kif għandkom iġġibu ruħkom, kemm għandha tkun qaddisa u tajba ħajjitkom, waqt li tistennew b’ħerqa kbira l-​miġja tal-​Jum taʼ Alla.”—2 PIETRU 3:11, 12.

1. Min ħadem bl-​ispirtu u l-​qawwa t’Elija?

ALLA JEHOVAH għażel minn fost il-​bnedmin individwi li se jsiru werrieta sħab maʼ Ibnu, Ġesù Kristu, fis-​Saltna tas-​sema. (Rumani 8:16, 17) Waqt li għadhom fuq l-​art, Kristjani midlukin ħadmu bl-​ispirtu u l-​qawwa t’Elija. (Luqa 1:17) Fl-​artiklu taʼ qabel, innotajna ċerti paralleli bejn l-​attivitajiet tagħhom u dawk tal-​profeta Elija. Imma xi ngħidu għax-​xogħol tas-​suċċessur t’Elija, il-​profeta Eliżew?—1 Slaten 19:15, 16.

2. (a) X’kien l-​aħħar miraklu t’Elija, u l-​ewwel wieħed t’Eliżew? (b) Liema prova hemm li Elija ma marx is-​sema?

² L-​aħħar miraklu mwettaq minn Elija kien dak taʼ li jifred l-​ilmijiet tax-​Xmara Ġordan billi jolqothom bil-​libsa uffiċjali tiegħu. Dan ippermetta lil Elija u lil Eliżew biex jaqsmu fuq art niexfa. Waqt li mxew fuq in-​naħa tal-​Lvant tax-​xmara, maltempata tar-​riħ ġarret lil Elija lil hemm lejn lokalità oħra fuq l-​art. (Ara l-​kaxxa f’paġna 15 intitolata “Lejn Liema Smewwiet Telaʼ Elija?”) Il-​libsa uffiċjali t’Elija tħalliet warajh. Meta Eliżew użaha biex jolqot il-​Ġordan, l-​ilmijiet tagħha għal darb’oħra nfirdu, u ħallewh jirritorna fuq art niexfa. Dan il-​miraklu għamilha ċara li Eliżew kien sar is-​suċċessur t’Elija f’li jippromwovi l-​qima vera ġewwa Iżrael.—2 Slaten 2:6-15.

Kwalitajiet Bħal T’Alla Essenzjali

3. Pawlu u Pietru x’qalu dwar il-​preżenza taʼ Ġesù u dwar “jum il-​Mulej”?

³ Sekli wara żmien Elija u Eliżew, l-​appostli Pawlu u Pietru assoċjaw “jum il-​Mulej” li ġej mal-​preżenza taʼ Ġesù Kristu u s-​“smewwiet ġodda u art ġdida” li dak iż-​żmien kienu għadhom fil-​futur. (2 Tessalonikin 2:1, 2; 2 Pietru 3:10-13) Biex nibqgħu ħajjin fil-​jum il-​kbir taʼ Jehovah​—meta Alla jeqred lill-​għedewwa u jsalva lill-​poplu tiegħu—​irridu nfittxu lil Jehovah u nuru li aħna ġwejdin u li nħobbu t-​tjieba. (Sofonija 2:1-3) Imma jispikkaw ukoll kwalitajiet oħrajn hekk kif nikkunsidraw xi ġrajjiet li jinvolvu lill-​profeta Eliżew.

4. Xi rwol għandu ż-​żelu fis-​servizz taʼ Jehovah?

⁴ Żelu għas-​servizz t’Alla huwa vitali jekk irridu nibqgħu ħajjin f’“jum il-​Mulej.” Elija u Eliżew kienu żelużi fis-​servizz taʼ Jehovah. B’żelu simili, il-​fdal taʼ Kristjani midlukin illum jagħtu servizz sagru lil Jehovah u jieħdu l-​inizjattiva fl-​ippridkar taʼ l-​aħbar tajba.a Minn nofs is-​snin tletin, huma inkuraġġew lil dawk kollha li jaċċettaw il-​messaġġ tas-​Saltna u li jittamaw li jgħixu fuq l-​art biex jiddedikaw lilhom infushom lil Jehovah u jitgħammdu. (Mark 8:34; 1 Pietru 3:21) Miljuni aġixxew b’mod favorevoli għal dan l-​inkuraġġiment. Darba huma kienu fi dlam spiritwali u mejtin fid-​dnub, imma issa tgħallmu l-​verità t’Alla, ħaddnu t-​tama taʼ ħajja eterna f’ġenna fuq l-​art, u huma żelużi fis-​servizz taʼ Jehovah. (Salm 37:29; Apokalissi 21:3-5) Biż-​żelu, il-​koperazzjoni, l-​ospitalità tagħhom, u xogħlijiet tajbin oħrajn, huma jagħtu serħan kbir lill-​aħwa spiritwali taʼ Kristu li għad hawn fuq l-​art.—Mattew 25:31-46.

5. Għala hu tant importanti li nagħmlu t-​tajjeb maʼ ‘ħut’ Ġesù, u liema eżempju għandna minn żmien Eliżew?

⁵ Dawk li jagħmlu t-​tajjeb maʼ ‘ħut’ Ġesù għaliex dawn l-​uħud midlukin huma s-​segwaċi tiegħu għandhom it-​tama li jibqgħu ħajjin f’“jum il-​Mulej.” Koppja miżżewġa fir-​raħal taʼ Sunem ġiet imbierka bil-​kbir talli wriet qalb tajba u ospitalità m’Eliżew u l-​qaddej tiegħu. Din il-​koppja ma kellha ebda iben, u r-​raġel kien xiħ. Imma Eliżew wiegħed lill-​mara Sunamija li hi għad twelled iben, u dan veru seħħ. Meta dan l-​uniku iben miet xi snin wara, Eliżew mar Sunem u qajmu mill-​mewt. (2 Slaten 4:8-17, 32-37) Kemm ġew ippremjati b’mod għani talli wrew ospitalità lil Eliżew!

6, 7. Nagħman x’eżempju ħalla, u dan kif jorbot maʼ li nibqgħu ħajjin f’“jum il-​Mulej”?

⁶ L-​umiltà hi meħtieġa sabiex naċċettaw direzzjoni bbażata fuq il-​Bibbja mingħand ‘ħut’ Kristu bit-​tama li nibqgħu ħajjin f’jum Jehovah. Nagħman, il-​kap lebbruż taʼ l-​armata Sirjana, kellu juri umiltà biex isegwi s-​suġġeriment taʼ tifla Iżraelita fil-​jasar u jfittex fejqan billi jmur Iżrael biex isib lil Eliżew. Minflok ma ħareġ minn daru biex jilqaʼ lil Nagħman, Eliżew bagħatlu dan il-​messaġġ: “Mur inħasel sebaʼ darbiet fil-​Ġordan, u ġismek jerġaʼ jindaflek.” (2 Slaten 5:10) Il-​kburija taʼ Nagħman ġagħlitu jħossu mweġġaʼ, u rrabja, imma wara li bl-​umiltà mar u ntefaʼ fl-​ilma tal-​Ġordan sebaʼ darbiet, “ġismu raġaʼ sarlu qisu l-​ġisem taʼ tfajjel żagħżugħ, u ndaf mill-​ġdiem tiegħu.” (2 Slaten 5:14) Qabel ma mar lura d-​dar, Nagħman ivvjaġġa t-​triq kollha lura lejn is-​Samarija biex jirringrazzja lill-​profeta taʼ Jehovah. Determinat li ma jagħmilx qligħ materjali minn qawwiet mogħtija minn Alla, Eliżew ħareġ biex jiltaqaʼ maʼ Nagħman imma ma ried jaċċetta l-​ebda rigal. Nagħman b’umiltà qal lil Eliżew: “Il-​qaddej tiegħek m’huwiex se jagħmel iżjed sagrifiċċji tal-​ħruq u offerti lil allat oħra, jekk mhux lill-​Mulej.”—2 Slaten 5:17.

⁷ Billi b’umiltà jsegwu l-​pariri Skritturali t’uħud midlukin, miljuni qegħdin jiġu mberkin bil-​kbir illum. Iktar minn hekk, billi jeżerċitaw fidi fis-​sagrifiċċju bħala rahan taʼ Ġesù, dawn l-​uħud taʼ qalb onesta ġew imnaddfin spiritwalment. Issa huma jgawdu l-​privileġġ taʼ li jkunu ħbieb t’Alla Jehovah u taʼ Ġesù Kristu. (Salm 15:1, 2; Luqa 16:9) U d-​devozzjoni tagħhom lejn Alla u lejn is-​servizz tiegħu se tiġi ppremjata billi huma jinħelsu mill-​qerda eterna li dalwaqt se tiġi fuq midinbin kburin u bla ndiema f’“jum il-​Mulej” li qed joqrob bil-​għaġla.—Luqa 13:24; 1 Ġwanni 1:7.

“Min Hawn Miegħi? Min?”

8. (a) Dawk li se jibqgħu ħajjin f’“jum il-​Mulej” x’attitudni għandhom lejn it-​twettiq tar-​rieda divina? (b) Ġeħu liema inkarigu ngħata? (ċ) X’kellu jiġrilha Ġeżabel?

⁸ Dawk li jittamaw li jibqgħu ħajjin f’“jum il-​Mulej” iridu wkoll ikunu deċiżi f’li jagħmlu r-​rieda divina. Elija bil-​qlubija bassar il-​qerda tal-​familja qattiela tas-​Sultan Aħab, li kienet tadura lil Bagħal. (1 Slaten 21:17-26) Qabel ma twettqet din l-​esekuzzjoni, madankollu, Eliżew, is-​suċċessur t’Elija kellu bżonn jispiċċa xi xogħol mhux mitmum. (1 Slaten 19:15-17) Meta wasal iż-​żmien maħtur taʼ Jehovah, Eliżew inkariga lil wieħed qaddej biex imur u jidlek lil Ġeħu, il-​kap taʼ l-​armata, bħala s-​sultan il-​ġdid taʼ Iżrael. Wara li ferraʼ ż-​żejt fuq ras Ġeħu, il-​messaġġier qallu: “Dan jgħid il-​Mulej, Alla taʼ Iżrael: ‘Jien dliktek sultan fuq il-​poplu tal-​Mulej, fuq Iżrael. Int tidrob lil dar Aħab, sidek, u hekk nitħallas tad-​demm tal-​qaddejja tiegħi l-​profeti, u tad-​demm tal-​qaddejja kollha tal-​Mulej minn id Ġeżabel. Id-​dar kollha taʼ Aħab tinqered.’” Ir-​Reġina mill-​agħar Ġeżabel kellha tintefaʼ lill-​klieb u ma jkollhiex difna diċenti.—2 Slaten 9:1-10.

9, 10. Il-​kelma t’Elija kif twettqet fil-​każ taʼ Ġeżabel?

⁹ L-​irġiel taʼ Ġeħu rrikonoxxew il-​validità tad-​dlik tiegħu u pproklamawh bħala s-​sultan il-​ġdid taʼ Iżrael. Billi aġixxa b’mod deċiżiv, Ġeħu telaq bil-​ħeffa lejn Ġeżragħel biex jibda x-​xogħol tiegħu t’esekuzzjoni tal-​mexxejja apostati tal-​qima taʼ Bagħal. L-​ewwel wieħed li ħass il-​vleġġa t’esekuzzjoni mingħand Ġeħu kien bin Aħab, is-​Sultan Ġeħoram. Hu saq ’il barra mill-​belt biex jistaqsi jekk Ġeħu kienx ġie fuq missjoni taʼ paċi. “Xi sliem, sakemm idumu ż-​żína taʼ ommok Ġeżabel u l-​qabda sħarijiet tagħha?” wieġeb Ġeħu. Kif qal dan, il-​vleġġa taʼ Ġeħu nifdet qalb Ġeħoram.—2 Slaten 9:22-24.

¹⁰ Nisa li għandhom il-​biżaʼ t’Alla jevitaw li jkunu bħal Ġeżabel jew xi ħadd ieħor bħalha. (Apokalissi 2:18-23) Sakemm Ġeħu wasal Ġeżragħel, hi pprovat tirranġa ruħha biex tidher attraenti. Waqt li ttawlet minn tieqa, hi laqgħetu b’theddida moħbija. Hu staqsa lill-​qaddejja tagħha: “Min hawn miegħi? Min?” Immedjatament, tnejn jew tliet uffiċjali rjali ttawlu ’l isfel. Kienu dawn fuq in-​naħa taʼ Ġeħu? “Waddbuha għal isfel!” ħeġġiġhom. Għal dan, aġixxew b’mod deċiżiv, billi waddbu lill-​ħażina Ġeżabel mit-​tieqa għal isfel. Hi x’aktarx ġiet mgħaffġa taħt saqajn iż-​żwiemel. Meta ġew biex jidfnuha, “ma sabu xejn minnha ħlief il-​qorriegħa, riġlejha u keffejn idejha.” Xi twettiq drammatiku dak tal-​kliem t’Elija: “Laħam Ġeżabel jikluh il-​klieb”!—2 Slaten 9:30-37.

Appoġġ Mill-​Qalb Għall-​Qima Vera

11. Min kien Ġeħonadab, u kif wera l-​appoġġ tiegħu għall-​qima vera?

¹¹ Dawk li jittamaw li jibqgħu ħajjin f’“jum il-​Mulej” u li jgħixu għal dejjem fuq l-​art iridu jappoġġjaw b’qalbhom kollha l-​qima vera. Iridu jkunu bħal Ġeħonadab, jew Ġonadab, adoratur taʼ Jehovah li ma kienx Iżraelit. Hekk kif Ġeħu kompla jwettaq l-​inkarigu tiegħu b’żelu, Ġeħonadab ried juri l-​approvazzjoni u l-​appoġġ tiegħu. Għalhekk ħareġ biex jiltaqaʼ mas-​sultan il-​ġdid taʼ Iżrael, li kien sejjer lejn is-​Samarija biex joqtol lill-​bqija taʼ dar Aħab. Meta ra lil Ġeħonadab, Ġeħu staqsieh: “Qalbek sinċiera miegħi bħalma qalbi hi maʼ qalbek?” It-​tweġiba pożittiva taʼ Ġeħonadab qanqlet lil Ġeħu biex jestendi idu u jistieden lil Ġeħonadab biex jitlaʼ fuq il-​karru tiegħu tal-​gwerra waqt li qallu: “Ejja miegħi, u tara l-​ħeġġa tiegħi għall-​Mulej.” Bla dewmien, Ġeħonadab aċċetta l-​privileġġ li juri l-​appoġġ tiegħu għall-​esekutur midluk taʼ Jehovah.—2 Slaten 10:15-17.

12. Jehovah għala bi dritt jesiġi devozzjoni esklussiva?

¹² Appoġġ mill-​qalb għall-​qima vera ċertament li hu xieraq, għax Jehovah hu l-​Ħallieq u s-​Sovran Universali, li bid-​dritt jesiġi u jixraqlu d-​devozzjoni esklussiva tagħna. Hu kkmanda lill-​Iżraeliti: “La tagħmilx għalik suriet minquxa u ebda xbieha taʼ ebda ħaġa li hemm fl-​għoli tas-​sema, jew isfel fl-​art, jew fil-​baħar taħt l-​art. La tmilx quddiemhom: La tadurahomx għaliex jiena hu l-​Mulej Alla tiegħek, Alla għajjur [“nesiġi devozzjoni esklussiva,” NW].” (Eżodu 20:4, 5) Dawk li jittamaw li jibqgħu ħajjin f’“jum il-​Mulej” għandhom iqimu lilu biss, billi dan jagħmluh “fl-​ispirtu u l-​verità.” (Ġwanni 4:23, 24) Iridu jkunu sodi għall-​qima vera, bħal Elija, Eliżew, u Ġeħonadab.

13. Bħalma qalb Ġeħonadab kienet maʼ Ġeħu, min huma dawk li jirrikonoxxu lis-​Sultan Messjaniku, u dan kif juruh?

¹³ Wara l-​esekuzzjoni tad-​dar taʼ Aħab, is-​Sultan Ġeħu ħa passi oħrajn biex jidentifika lill-​adoraturi taʼ Bagħal u jelimina din ir-​reliġjon falza f’Iżrael. (2 Slaten 10:18-28) Illum, is-​Sultan tas-​sema Ġesù Kristu ġie maħtur biex jesegwixxi lill-​għedewwa taʼ Jehovah u jivvindika s-​sovranità Tiegħu. Bħalma qalb Ġeħonadab kienet maʼ Ġeħu, illum il-​“kotra kbira” taʼ “nagħaġ oħra” taʼ Ġesù b’qalbhom kollha jirrikonoxxu lil Kristu bħala s-​Sultan Messjaniku u jikkoperaw maʼ ħutu spiritwali fuq l-​art. (Apokalissi 7:9, 10; Ġwanni 10:16) Huma jagħtu evidenza taʼ dan billi jipprattikaw r-​reliġjon vera u billi jieħdu sehem żeluż fil-​ministeru Kristjan, biex tingħata twissija lill-​għedewwa t’Alla dwar kemm “jum il-​Mulej” qed joqrob bil-​għaġla.—Mattew 10:32, 33; Rumani 10:9, 10.

Ġrajjiet Drammatiċi Se Jseħħu Dalwaqt!

14. X’hemm maħżun għar-​reliġjon falza?

¹⁴ Ġeħu ħa azzjoni biex itemm il-​qima taʼ Bagħal f’Iżrael. Fi żmienna, permezz taʼ Ġeħu Akbar, Ġesù Kristu, Alla se jwettaq il-​qerda taʼ Babilonja l-​Kbira, l-​imperu dinji taʼ reliġjon falza. Dalwaqt se naraw it-​twettiq tal-​kliem li l-​anġlu qal lill-​appostlu Ġwanni: “L-​għaxart iqrun u l-​Bhima li rajt, dawn ikollhom mibegħda għall-​Mara żienja [Babilonja l-​Kbira], jagħmluha bħal deżert u jneżżgħuha, u jiklulha laħamha u jaħarquha bin-​nar. Għax Alla webbilhom biex jagħmlu l-​fehma tiegħu, ħalli huma wkoll fehma waħda jkollhom, li jagħtu s-​saltna tagħhom lill-​Bhima, sa ma l-​kliem taʼ Alla jkun seħħ.” (Apokalissi 17:16, 17; 18:2-5) “L-​għaxart iqrun” jiffiguraw lill-​qawwiet politiċi mmilitarizzati li jaħkmu fuq l-​art. Għalkemm issa għandhom relazzjoni spiritwalment adulteruża maʼ Babilonja l-​Kbira, din ftit baqgħalha ħajja. L-​element politiku taʼ din id-​dinja se jeqred lir-​reliġjon falza, u l-​“Bhima”​—il-​Ġnus Magħquda—​se jkollha rwol prinċipali maʼ l-​“għaxart iqrun” f’li jħarbtuha.b X’okkażjoni din biex infaħħru lil Jehovah!—Apokalissi 19:1-6.

15. X’se jiġri meta jsir attentat biex tiġi meqruda l-​organizzazzjoni t’Alla fuq l-​art?

¹⁵ Wara l-​attakk qawwi tas-​Sultan Ġeħu kontra l-​qima taʼ Bagħal, id-​dar irjali tiegħu dawret l-​attenzjoni tagħha lejn l-​għedewwa politiċi taʼ Iżrael. Is-​Sultan Ġesù Kristu se jieħu azzjoni simili. Qawwiet politiċi se jkunu għadhom hawn wara l-​qerda tar-​reliġjon falza bħal taʼ Bagħal. Taħt l-​influwenza taʼ Satana x-​Xitan, dawn l-​għedewwa tas-​sovranità taʼ Jehovah se jagħmlu attakk aħrax f’attentat biex jeqirdu l-​organizzazzjoni t’Alla fuq l-​art. (Eżekjel 38:14-16) Imma Jehovah se jġiegħel lis-​Sultan Ġesù Kristu jidrobhom billi jeqridhom f’Ħarmagedon, il-​“gwerra taʼ nhar il-​Jum il-​kbir taʼ Alla li jistaʼ kollox,” u b’hekk itemm l-​ivvindikar tas-​sovranità taʼ Jehovah.—Apokalissi 16:14, 16; 19:11-21; Eżekjel 38:18-23.

Naqdu Biż-​Żelu T’Eliżew

16, 17. (a) Kif nafu li Eliżew kien żeluż sa l-​aħħar taʼ ħajtu? (b) X’għandna nagħmlu bil-​vleġeġ taʼ verità?

¹⁶ Sakemm “jum il-​Mulej” iġib fi tmiem lis-​sistema t’affarijiet mill-​agħar taʼ Satana kollha kemm hi, il-​qaddejja t’Alla se jkunu kuraġġużi u żelużi daqs Eliżew. Minbarra xogħlu bħala l-​qaddej t’Elija, Eliżew qeda waħdu bħala l-​profeta taʼ Jehovah għal iktar minn 50 sena! U Eliżew kien żeluż sa l-​aħħarnett tal-​ħajja twila tiegħu. Eżatt qabel mewtu, mar iżuru n-​neputi taʼ Ġeħu, is-​Sultan Ġowas. Eliżew qallu biex jispara vleġġa ’l barra mit-​tieqa. Il-​vleġġa ġriet lejn il-​marka tagħha, u Eliżew esklama: “Dik hi vleġġa taʼ rebħa mingħand il-​Mulej, u vleġġa taʼ rebħa fuq Aram [Sirja]; għax int għad tidrob lil Aram f’Afek sakemm teqirdu.” Fuq ir-​rikjesta t’Eliżew, Ġowas imbagħad darab l-​art bil-​vleġeġ tiegħu. Imma dan għamlu b’nuqqas taʼ żelu, billi darab tliet darbiet biss. Eliżew imbagħad qal li, bħala riżultat, Ġowas kien se jingħata tliet rebħiet biss fuq is-​Sirja, u dak hu li ġara. (2 Slaten 13:14-19, 25) Is-​Sultan Ġowas ma darabx lis-​Sirjani b’mod sħiħ, ‘sakemm qeridhom.’

¹⁷ B’żelu bħal dak t’Eliżew, madankollu, il-​fdal midluk ikompli fil-​ġlieda kontra l-​qima falza. L-​imseħbin tiegħu b’tamiet għall-​art qed jagħmlu l-​istess ħaġa. Iktar minn hekk, dawk kollha li jittamaw li jibqgħu ħajjin f’“jum il-​Mulej” jagħmlu tajjeb li jżommu f’moħħhom il-​kliem taż-​żeluż Eliżew rigward li jolqtu b’saħħa lill-​art. Ħalli naqbdu l-​vleġeġ taʼ verità u b’mod żeluż nidorbu bihom​—darba wara l-​oħra—​iva, sakemm Jehovah jgħid li xogħolna bihom tlesta.

18. Kif għandna nwieġbu għall-​kliem tat-2 Pietru 3:11, 12?

¹⁸ “Jum il-​Mulej” dalwaqt se jġib fi tmiem lil din is-​sistema t’affarijiet preżenti mill-​agħar. Ejjew mela nħallu lilna nfusna niġu stimulati mill-​kliem li jqawwi l-​qalb taʼ l-​appostlu Pietru. “Ladarba hekk kollox għandu jintemm,” esklama Pietru, “araw daqsxejn kif għandkom iġġibu ruħkom, kemm għandha tkun qaddisa u tajba ħajjitkom, waqt li tistennew b’ħerqa kbira l-​miġja tal-​Jum taʼ Alla.” (2 Pietru 3:11, 12) Meta kull parti taʼ din is-​sistema ddub bin-​nar tal-​qilla t’Alla espress permezz taʼ Ġesù Kristu, dawk biss li għandhom rekord taʼ kondotta retta u taʼ devozzjoni lejn Alla se jaħarbu. Safa morali u spiritwali hija essenzjali. Hekk ukoll hi l-​imħabba għal bnedmin sħabna, murija billi nwieġbu għall-​bżonnijiet tagħhom, speċjalment b’mod spiritwali permezz tal-​ministeru Kristjan tagħna.

19. X’għandna nagħmlu biex nibqgħu ħajjin f’“jum il-​Mulej”?

¹⁹ Jidentifikawk il-​kliem u l-​għemejjel tiegħek bħala qaddej leali u żeluż t’Alla? Jekk inhu hekk, int tistaʼ tħaddan it-​tama li tibqaʼ ħaj f’“jum il-​Mulej” għal ġod-​dinja ġdida mwiegħda t’Alla. Iva, is-​sopravivenza tistaʼ tkun l-​esperjenza tiegħek jekk int tagħmel it-​tajjeb maʼ l-​aħwa spiritwali taʼ Kristu għaliex dawn huma s-​segwaċi tiegħu, bħalma l-​koppja Sunamija kienet ospitabbli m’Eliżew. Biex tibqaʼ ħaj trid ukoll tkun bħal Nagħman, li umilment aċċetta istruzzjoni divina u sar adoratur taʼ Jehovah. Jekk tixxennaq biex tgħix għal dejjem f’ġenna taʼ l-​art, trid turi li tappoġġja b’qalbek kollha ’l-qima vera, bħalma għamel Ġeħonadab. Imbagħad tistaʼ tkun fost il-​qaddejja leali taʼ Jehovah, li dalwaqt se jesperjenzaw it-​twettiq tal-​kliem taʼ Ġesù: “Ejjew, mberkin minn Missieri, ħudu b’wirt tagħkom is-​Saltna li tħejjiet għalikom sa mill-​ħolqien tad-​dinja.”—Mattew 25:34. (w97 9/15)

[Noti taʼ taħt]

Kif Twieġeb Int?

◻ Liema huma xi kwalitajiet meħtieġa sabiex nibqgħu ħajjin f’“jum il-​Mulej”?

◻ Liema eżempju ħallietilna l-​koppja Sunamija fi żmien Eliżew?

◻ Liema lezzjoni nistgħu nitgħallmu minn Nagħman?

◻ Kif nistgħu nsegwu l-​eżempju taʼ Ġeħonadab?

◻ It-​Tieni Pietru 3:11, 12 kif għandu jeffettwana?