Bijografija
Nota li Biddlitli Ħajti
KIF RAKKONTATA MINN IRENE HOCHSTENBACH
Kien it-Tlieta fil-għaxija tas-sena 1972. Kelli 16-il sena u kont mort mal-ġenituri tiegħi għal laqgħa reliġjuża f’Eindhoven, belt fil-provinċja taʼ Brabant, fl-Olanda. Ħassejtni mbeżżaʼ u xtaqt li kont qiegħda xi mkien ieħor. Imbagħad, żewġ tfajliet tawni nota żgħira li fiha kitbuli: “Għażiża Irene, verament nixtiequ ngħinuk.” Ma rrealizzajtx kemm dik in-nota kienet se tbiddilli ħajti. Iżda qabel ma nsemmi x’ġara wara dan, ħalli nirrakkonta xi ħaġa dwari.
TWELIDT fil-gżira taʼ Belitung, fl-Indoneżja. Għadni niftakar xi ftit mill-ħsejjes li kont nismaʼ fuq dik il-gżira tropikali—it-tħaxwix tas-siġar tal-palm fir-riħ, il-ħoss ħlejju taʼ xmara li kienet fil-qrib, id-daħq tat-tfal jilagħbu madwar id-dar, kif ukoll il-ħoss tal-mużika li kien jimla d-dar tagħna. Fl-1960, meta kelli erbaʼ snin, jien u l-familja tlaqna mill-Indoneżja u morna ngħixu l-Olanda. Għamilna vjaġġ twil bil-vapur, u l-ħoss li għadni niftakar b’mod speċjali huwa dak tal-ġugarell favorit tiegħi li kont inġorr miegħi—buffu żgħir b’tanbur. Meta kelli sebaʼ snin tlift is-smigħ, u minn dak inhar ma bqajt nismaʼ xejn mill-ħsejjes taʼ madwari. Kulma baqagħli huwa l-memorji.
Nikber Bħala Truxa
Minħabba li l-ġenituri tiegħi ħadu ħsiebi bl-imħabba, għall-ewwel ma rrealizzajtx kompletament x’konsegwenzi kien se jħalli fuqi l-fatt li jien truxa. Bħala tifla, kont nara l-apparat tas-smigħ enormi li kelli bħala xi ħaġa taʼ gost, għalkemm bih u mingħajru kien kważi xorta. Sabiex jikkomunikaw miegħi, it-tfal tal-ġirien kienu jiktbuli konversazzjoni sħiħa bil-ġibs fuq il-bankina, u jien kont inweġibhom, avolja ma stajtx nismaʼ leħni stess.
Meta bdejt nikber, bdejt nirrealizza li kont differenti min-nies taʼ madwari. Ukoll, innotajt li xi nies kienu jwaqqgħuni għaċ-ċajt minħabba li jien truxa, waqt li oħrajn kienu jċaħħduni mill-kumpanija tagħhom. Bdejt inħossni mwarrba u waħdi. Bdejt nirrealizza xi jfisser li tkun truxa, u iktar ma bdejt nikber, iktar bdejt nibżaʼ mid-dinja tan-nies li jisimgħu.
Sabiex stajt nattendi skola speċjali għat-torox, il-ġenituri tiegħi ddeċidew li bħala familja nitilqu minn villaġġ fil-provinċja taʼ Limburg għall-belt taʼ Eindhoven. Hemmhekk, missieri pprova jsib xogħol, u ħija u ħuti l-bniet attendew skola ġdida. Jien grata ħafna għall-aġġustamenti li għamlu minħabba fija. Fl-iskola ġejt mgħallma naddatta l-volum taʼ leħni u nesprimi ruħi b’mod iktar ċar. U għalkemm l-għalliema ma kinux jużaw il-lingwa tas-sinjali, sħabi tal-klassi għallmuni nużaha.
Il-Ħajja fid-Dinja Tiegħi
Meta kont qed nikber, il-ġenituri pprovaw ħafna jikkomunikaw miegħi, iżda kien hemm ħafna affarijiet li ma kontx nifhem. Per eżempju, ma kontx nifhem għala l-ġenituri tiegħi kienu qed jistudjaw il-Bibbja max-Xhieda taʼ Jehovah. Iżda niftakar li darba minnhom, jien u l-familja żorna post fejn ħafna nies kienu bil-qiegħda fuq is-siġġijiet. Ilkoll kienu jħarsu ’l quddiem, xi drabi jċapċpu, u kultant żmien iqumu bil-wieqfa—iżda għala kienu jagħmlu dawn l-affarijiet, ma kontx naf. Ħafna iktar tard sirt naf li kont attendejt konvenzjoni tax-Xhieda taʼ Jehovah. Il-ġenituri tiegħi kienu wkoll jiħduni f’sala żgħira fil-belt taʼ Eindhoven. Kont inħossni komda hemmhekk għax kulħadd kien qalbu tajba u l-familja tiegħi kienet tidher kuntenta, iżda għala konna mmorru hemm, ma kontx naf. Issa naf li s-sala żgħira kienet is-Sala tas-Saltna tax-Xhieda taʼ Jehovah.
B’dispjaċir, ma kien hemm ħadd preżenti f’dawn il-laqgħat li setaʼ jinterpreta l-programm għalija. Issa nirrealizza li dawk preżenti riedu jgħinuni iżda ma kinux jafu kif għandhom jagħmlu minħabba li jien truxa. Wara dawn il-laqgħat kont inħossni mwarrba u kont naħseb, ‘Aħjar kont l-iskola milli hawn.’ Iżda eżatt malli għaddewli dawk il-ħsibijiet minn moħħi, żewġ tfajliet ħarbxu xi ħaġa fuq biċċa karta u għaddewhieli. Din kienet in-nota li semmejt fil-bidu. Lanqas biss irrealizzajt li din in-nota kienet se tkun il-bidu taʼ ħbiberija prezzjuża li kienet se teħlisni mid-dinja iżolata tiegħi.
Niżviluppa Ħbiberija Prezzjuża
Colette u Hermine, li għaddewli n-nota, kellhom ftit iktar minn 20 sena. Iktar tard, sirt naf li kienu ġew fil-kongregazzjoni tax-Xhieda taʼ Jehovah li jien kont qed inżur sabiex jaqdu bħala pijunieri regulari, jew ministri full-time. Għalkemm Colette u Hermine ma kinux jafu sew il-lingwa tas-sinjali, irnexxieli naqralhom xofftejhom huma u jkellmuni, u b’dan il-mod stajna nikkomunikaw mhux ħażin.
Il-ġenituri tiegħi tgħidx kemm ħadu gost meta Colette u Hermine staqsewni biex jistudjaw il-Bibbja miegħi, iżda dawn it-tfajliet għamlu ħafna iktar minn hekk. Huma għamlu dak kollu li setgħu biex jinterpretaw il-laqgħat għalija fis-Sala tas-Saltna kif ukoll għenuni nissieħeb m’oħrajn fil-kongregazzjoni. Huma pprattikaw miegħi preżentazzjonijiet mill-Bibbja biex nużahom fix-xogħol taʼ l-ippridkar, u wkoll għenuni nipprepara t-taħditiet għall-Iskola tal-Ministeru Teokratiku. Immaġina ftit, issa saħansitra kelli l-kuraġġ nagħti taħdita quddiem grupp taʼ nies li jisimgħu!
Iktar minn hekk, Colette u Hermine ġagħluni nħoss li nistaʼ nafdahom. Kienu paċenzjużi miegħi u kienu jisimgħuni. Għalkemm spiss konna nidħqu bl-iżbalji tiegħi, huma qatt ma waqqgħuni għaċ-ċajt; lanqas ma kienu jistħu għax kont inkun magħhom. Huma pprovaw jifhmu kif inħossni u ttrattawni qisni kont bħalhom. Dawn it-tfajliet taʼ qalb tajba tawni rigal mill-isbaħ—l-imħabba u l-ħbiberija tagħhom.
L-iktar ħaġa importanti hi li Colette u Hermine għallmuni li kelli nsir naf ’l Alla, Jehovah, bħala ħabib li nistaʼ nafdah. Huma spjegawli li Jehovah kien rani bil-qiegħda fis-Sala tas-Saltna u li hu fehem xi jfisser għalija l-fatt li jien truxa. Kemm jien grata li l-imħabba tagħna t-tlieta għal Jehovah ġibditna lejn xulxin bħala ħbieb! Ġejt imqanqla mill-fatt li Jehovah kien jieħu ħsiebi, u sforz l-imħabba tiegħi lejh, issimbolizzajt id-dedikazzjoni tiegħi lilu permezz tal-magħmudija bl-ilma f’Lulju taʼ l-1975.
Nakkumpanja lil Ħabib Speċjali
Fis-snin taʼ wara, sirt naf iktar u iktar aħwa Kristjani. Ħu wieħed sar ħabib speċjali ferm għalija, u żżewwiġna fl-1980. Ftit wara dan, bdejt naqdi bħala pijuniera, u fl-1994 żewġi, Harry, u jien ġejna inkarigati naqdu bħala pijunieri speċjali fl-għalqa tal-Lingwa tas-Sinjali bl-Olandiż. Is-sena taʼ wara, kelli niffaċċja inkarigu taʼ sfida. Kelli nakkumpanja lil żewġi, li m’huwiex nieqes mis-smigħ, hekk kif iżur kongregazzjonijiet differenti bħala sostitut għall-indokratur tas-circuit.
Dan huwa kif inkampa. Meta nżuru lkongregazzjoni għall-ewwel darba, mill-ewwel immur inkellem lil kemm jistaʼ jkun aħwa u nintroduċi lili nnifsi. Ngħidilhom li jien truxa u nitlobhom iħarsu lejja waqt li jkellmuni bil-mod. Ukoll nipprova nwieġeb mill-ewwel fil-laqgħat tal-kongregazzjoni. U nistaqsi jekk xi ħadd jixtieqx jagħmilha taʼ interpretu għalija fil-laqgħat u s-servizz taʼ l-għalqa għal dik il-ġimgħa.
Dan il-metodu tant jirnexxi li kultant ħuti jinsew li ma nismax, u għalhekk nispiċċaw f’xi sitwazzjoni tad-daħq. Per eżempju, huma jgħiduli li meta jarawni miexja fil-belt, idoqquli l-ħorn tal-karozza tagħhom biex isellmuli, imma ovvjament, jien ma nagħmel l-ebda reazzjoni. Kultant anki jien stess ninsa l-limitazzjonijiet tiegħi—bħal meta nipprova npespes xi ħaġa kunfidenzjali f’widnejn żewġi. Meta f’salt wieħed narah jiħmar, ninduna li t-“tpespisa” tiegħi kienet għolja wisq.
It-tfal jgħinu b’mod li ma tistenniehx. F’kongregazzjoni li konna żorna għall-ewwel darba, tifel taʼ disaʼ snin innota li xi wħud fis-Sala tas-Saltna bdew jistħu ftit biex ikellmuni, u hu ddeċieda li jagħmel xi ħaġa dwar dan. Ġie fuqi, qabadli idi, ħadni fin-nofs tas-Sala tas-Saltna, u għajjat kemm felaħ, “Nixtieq nintroduċilkom lil Irene—hija truxa!” Dawk li kienu preżenti ġew fuqi u introduċew ruħhom.
Hekk kif nakkumpanja lil żewġi fix-xogħol tas-circuit, il-ħbieb tiegħi jkomplu jiżdiedu. Kemm hi differenti ħajti llum mis-snin meta kont inħossni mwarrba u iżolata! Minn dakinhar fil-għaxija li Colette u Hermine għaddewli dik in-nota żgħira f’idejja, esperjenzajt il-qawwa tal-ħbiberija u ltqajt maʼ nies li saru speċjali ferm għalija. Fuq kollox, sirt naf lil Jehovah, l-iktar Ħabib prezzjuż minnhom kollha. (Rumani 8:38, 39) Kif biddlitli ħajti dik id-daqsxejn taʼ nota!
[Stampa f’paġna 24]
Għadni niftakar il-ħoss tal-ġugarell favorit tiegħi
[Stampi f’paġna 25]
Fil-ministeru u maʼ żewġi Harry