Viżjonijiet tas-​Saltna t’Alla Jsiru Realtà

“Qed tagħmlu sew li tagħtu kasha [il-kelma profetika] bħallikieku kienet fanal jiddi f’post mudlam.”​—2 PIETRU 1:​19.

1. Liema kuntrast insibu fid-​dinja taʼ llum?

KRIŻI wara kriżi​—din hi tema prinċipali fid-​dinja taʼ llum. Minn diżastri ekoloġiċi għal terroriżmu globali, il-​problemi tal-​bniedem donnhom ma jispiċċaw qatt. Saħansitra r-​reliġjonijiet tad-​dinja ma kinux kapaċi jkunu t’għajnuna. Fil-​fatt, spiss huma jkomplu jgħarrqu l-​affarijiet billi jħeġġu l-​fanatiċiżmu, il-​mibegħda, u n-​nazzjonaliżmu li jifirdu lin-​nies. Iva, bħalma tbassar, is-​“sħab iswed” kesa “l-​popli.” (Isaija 60:2) Iżda, fl-​istess ħin, hemm miljuni li jħarsu b’fiduċja lejn il-​futur. Għala? Għax huma jagħtu kas il-​kelma profetika t’Alla “bħallikieku kienet fanal jiddi f’post mudlam.” Qed iħallu “l-​kelma,” jew il-​messaġġ, t’Alla, li issa nsibuha fil-​Bibbja, tiggwidalhom ħajjithom.​—2 Pietru 1:​19.

2. Skond il-​profezija taʼ Danjel rigward “iż-​żmien taʼ l-​aħħar,” min biss jingħata l-​fehma spiritwali?

² Rigward “iż-​żmien taʼ l-​aħħar,” il-​profeta Danjel kiteb: “Ħafna bnedmin għad jifluh sewwa u jikbru fl-​għaqal. Ikunu ħafna dawk li jintgħażlu mill-​bqija, jindafu u jissaffew; imma l-​ħżiena jibqgħu jagħmlu l-​ħażin, u ebda wieħed minnhom ma jifhem xejn, jifhmu biss dawk li jkunu bil-​għaqal.” (Danjel 12:​4, 10) Il-​fehma spiritwali hija biss għal dawk li b’mod sinċier ‘jiflu sewwa,’ jew jistudjaw bir-​reqqa, il-​Kelma t’Alla kif ukoll joqogħdu għal-​livelli tiegħu, u jistinkaw biex jagħmlu r-​rieda tiegħu.​—Mattew 13:​11-​15; 1 Ġwanni 5:​20.

3. Sa mill-​1870 ’il quddiem, liema verità importanti fehmu l-​ewwel studenti tal-​Bibbja?

³ Sa mill-​1870 ’il quddiem, qabel ma bdew “l-​aħħar jiem,” Alla Ġeħova beda jixħet iktar dawl fuq “is-​sigrieti sagri tas-​saltna tas-​smewwiet.” (2 Timotju 3:​1-5; Mattew 13:11) F’dak iż-​żmien, grupp taʼ studenti tal-​Bibbja fehmu​—kontra l-​opinjoni komuni​—li r-​ritorn taʼ Kristu kien se jkun wieħed inviżibbli. Wara li jingħata t-​tron fis-​sema, Ġesù kien se jirritorna fis-​sens li kien se jiffoka l-​attenzjoni tiegħu fuq l-​art bħala s-​Sultan tagħha. Sinjal viżibbli u kompost minn diversi affarijiet kellu jwissi lid-​dixxipli tiegħu li l-​preżenza inviżibbli tiegħu kienet bdiet.​—Mattew 24:​3-​14.

Meta Viżjoni Ssir Realtà

4. Ġeħova kif saħħaħ il-​fidi tal-​qaddejja tiegħu taʼ llum?

⁴ Il-​viżjoni tat-​trasfigurazzjoni kienet dehra bil-​quddiem brillanti taʼ Kristu fil-​glorja tas-​Saltna. (Mattew 17:​1-9) Dik il-​viżjoni saħħet il-​fidi taʼ Pietru, Ġakbu, u Ġwanni fi żmien meta kien hemm ħafna li ma baqgħux mexjin wara Ġesù, peress li hu ma wettaqx l-​istennijiet mhux Skritturali tagħhom. Bl-​istess mod, f’dan iż-​żmien taʼ l-​aħħar, Ġeħova saħħaħ il-​fidi tal-​qaddejja tiegħu taʼ llum billi xeħet iżjed dawl fuq it-​twettiq taʼ dik il-​viżjoni taʼ l-​għaġeb kif ukoll fuq ħafna profeziji oħra relatati magħha. Issa ejja nikkunsidraw ftit minn dawn ir-​realtajiet spiritwali li jsaħħu l-​fidi.

5. Min kien il-​Kewkba taʼ fil-​Għodu, u meta u kif ‘telaʼ’?

⁵ Waqt li kien qed jirreferi għat-​trasfigurazzjoni, l-​appostlu Pietru kiteb: “Għaldaqstant għandna l-​kelma profetika magħmula iktar ċerta; u qed tagħmlu sew li tagħtu kasha bħallikieku kienet fanal jiddi f’post mudlam, sakemm iżernaq il-​jum u titlaʼ l-​kewkba taʼ fil-​għodu, fi qlubkom.” (2 Pietru 1:​19) Il-​Kewkba taʼ fil-​Għodu figurattiva, jew “il-​kewkba tiddi taʼ fil-​għodu,” hija Ġesù Kristu glorifikat. (Rivelazzjoni 22:16) Hu ‘telaʼ’ fl-​1914 meta s-​Saltna t’Alla twieldet fis-​sema, u b’hekk ġie mmarkat il-​bidu t’era ġdida. (Rivelazzjoni 11:15) Fil-​viżjoni tat-​trasfigurazzjoni, Mosè u Elija dehru ħdejn Ġesù, jitkellmu miegħu. Taʼ min jagħtu stampa?

6, 7. Min huma rappreżentati minn Mosè u Elija fit-​trasfigurazzjoni, u liema dettalji importanti tagħtina l-​Iskrittura dwar dawk li huma rappreżentati minnhom?

⁶ Ladarba Mosè u Elija kellhom sehem mill-​glorja taʼ Kristu, dawn iż-​żewġ xhieda leali jirrappreżentaw lil dawk li jaħkmu maʼ Ġesù fis-​Saltna tiegħu. Il-​fehma li hemm oħrajn jaħkmu maʼ Ġesù hi fi qbil mal-​viżjoni tal-​Messija fuq it-​tron li l-​profeta Danjel ngħata bil-​quddiem. Danjel ra “bħal iben taʼ bniedem” jirċievi “ħakma għal dejjem” mingħand ix-​“Xiħ fl-​għomor,”Alla Ġeħova. Imma innota x’jintwera lil Danjel ftit wara. Hu jikteb: “Is-​saltna u s-​setgħa u l-​kobor tas-​saltniet taʼ taħt is-​smewwiet kollha jingħataw lill-​poplu tal-​qaddisin taʼ Alla l-​Għoli.” (Danjel 7:​13, 14, 27) Tassew, iktar minn ħames sekli qabel it-​trasfigurazzjoni, Alla rrivela li ċerti wħud “qaddisin” kellu jkollhom sehem fil-​kobor irjali taʼ Kristu.

⁷ Min huma l-​qaddisin fil-​viżjoni taʼ Danjel? B’referenza għal dawn l-​individwi, l-​appostlu Pawlu jgħid: “L-​ispirtu nnifsu jixhed maʼ l-​ispirtu tagħna li aħna wlied Alla. Mela, jekk aħna wlied, aħna wkoll werrieta: iva, werrieta t’Alla, imma werrieta bi sħab maʼ Kristu, dment li nsofru flimkien biex inkunu wkoll glorifikati flimkien.” (Rumani 8:​16, 17) Il-​qaddisin m’huma ħadd ħlief id-​dixxipli taʼ Ġesù midlukin bl-​ispirtu. Fir-​Rivelazzjoni, Ġesù jgħid: “Lil min jirbaħ nagħtih li joqgħod bil-​qiegħda miegħi fuq it-​tron tiegħi, bħalma jien irbaħt u qgħadt bil-​qiegħda maʼ Missieri fuq it-​tron tiegħu.” Dawn ‘ir-​rebbieħa’ rxoxtati, li jammontaw għal 144,000, se jsaltnu maʼ Ġesù fuq l-​art kollha.​—Rivelazzjoni 3:​21; 5:​9, 10; 14:​1, 3, 4; 1 Korintin 15:53.

8. Id-​dixxipli midlukin taʼ Ġesù kif ħadu sehem f’xogħol simili għal dak taʼ Mosè u Elija, u x’kienu r-​riżultati?

⁸ Imma l-​Kristjani midlukin għala huma rappreżentati minn Mosè u Elija? Ir-​raġuni hi li dawn il-​Kristjani, waqt li għadhom bnedmin fuq l-​art, jagħmlu xogħol simili għal dak li wettqu Mosè u Elija. Per eżempju, huma jaqdu bħala xhieda taʼ Ġeħova, anki meta jiġu persegwitati. (Isaija 43:10; Atti 8:​1-8; Rivelazzjoni 11:​2-​12) Bħal Mosè u Elija, huma jikxfu b’kuraġġ ir-​reliġjon falza waqt li jħeġġu lin-​nies sinċieri biex jagħtu devozzjoni esklużiva lil Alla. (Eżodu 32:​19, 20; Dewteronomju 4:​22-​24; 1 Slaten 18:​18-​40) Ħalla frott ix-​xogħol tagħhom? Iva, ħafna! Minbarra li għenu biex jinġabar l-​għadd sħiħ tal-​midlukin, huma għenu miljuni taʼ “nagħaġ oħrajn” biex minn qalbhom jissottomettu ruħhom lejn Ġesù Kristu.​—Ġwanni 10:16; Rivelazzjoni 7:4.

Kristu Jtemm ir-​Rebħa Tiegħu

9. Rivelazzjoni 6:2 kif jiddeskrivi lil Ġesù bħalma hu llum?

⁹ Issa Ġesù m’għadux sempliċi bniedem riekeb fuq felu taʼ ħmara, imma Sultan qawwi. Hu jiġi deskritt bħala li riekeb fuq żiemel​—simbolu Bibliku tal-​gwerra. (Proverbji 21:31) “Ara, żiemel abjad,” jgħid Rivelazzjoni 6:​2, “u dak li kien riekeb fuqu kellu qaws; u ngħatatlu kuruna, u ħareġ jirbaħ u jtemm ir-​rebħa tiegħu.” Iktar minn hekk, rigward Ġesù, is-​salmista David kiteb: “Ix-​xettru tal-​qawwa tiegħek jibgħat il-​Mulej minn Sijon: aħkem f’nofs l-​għedewwa tiegħek.”​—Salm 110:2.

10. (a) Ġesù kif beda r-​rikba tar-​rebħa tiegħu b’mod glorjuż? (b) L-​ewwel rebħa taʼ Kristu kif effettwat id-​dinja in ġenerali?

¹⁰ L-​ewwel rebħa taʼ Ġesù kienet fuq l-​akbar għedewwa tiegħu​—Satana u d-​demonji. Hu keċċiehom mis-​sema u tefagħhom lejn l-​art. Billi jafu li ma tantx għad baqgħalhom żmien, dawn l-​ispirti mill-​agħar sfogaw ir-​rabja vjolenti tagħhom fuq l-​umanità u ħolqu gwaj kbir. Fir-​Rivelazzjoni, dan il-​gwaj hu simbolizzat minn tliet rikkieba oħra fuq iż-​żwiemel. (Rivelazzjoni 6:​3-8; 12:​7-​12) Fi qbil mal-​profezija taʼ Ġesù dwar “is-​sinjal tal-​preżenza [tiegħu] u taʼ tmiem is-​sistema,” ir-​rikba tagħhom ikkaġunat gwerer, ġuħ, u mard li jġib il-​mewt. (Mattew 24:​3, 7; Luqa 21:​7-​11) Bla dubju, dan “l-​uġigħ, bħall-​uġigħ tal-​ħlas” se jkompli jiżdied sakemm Kristu “jtemm ir-​rebħa tiegħu” billi jeqred kull traċċa taʼ l-​organizzazzjoni viżibbli taʼ Satana.a​—Mattew 24:8.

11. L-​istorja tal-​kongregazzjoni Kristjana kif tixhed dwar l-​awtorità rjali taʼ Kristu?

¹¹ L-​awtorità rjali taʼ Ġesù hija evidenti wkoll mill-​fatt li hu żamm il-​kongregazzjoni Kristjana sħiħa sabiex tkun tistaʼ twettaq l-​inkarigu tagħha li tippriedka l-​messaġġ tas-​Saltna mad-​dinja kollha. Minkejja oppożizzjoni brutali minn Babilonja l-​Kbira​—l-​imperu dinji taʼ reliġjon falza​—u minn gvernijiet ostili, ix-​xogħol taʼ l-​ippridkar mhux biss kompla imma wkoll laħaq skala li qatt ma kien hawn bħalha qabel fl-​istorja tad-​dinja. (Rivelazzjoni 17:​5, 6) Kemm hi xiehda qawwija din li Kristu qed isaltan!​—Salm 110:​3, Saydon.

12. Il-​biċċa l-​kbira min-​nies għala ma jagħrfux il-​preżenza inviżibbli taʼ Kristu?

¹² B’sogħba, iżda, il-​biċċa l-​kbira min-​nies, inkluż miljuni taʼ wħud li jgħidu li huma Kristjani, jonqsu li jagħrfu li l-​ġrajjiet kruċjali li qed jiġru fuq l-​art ifissru r-​realtajiet inviżibbli. Huma saħansitra jwaqqgħu għaċ-​ċajt lil dawk li jħabbru s-​Saltna t’Alla. (2 Pietru 3:​3, 4) Għala? Għax Satana għema l-​imħuħ tagħhom. (2 Korintin 4:​3, 4) Infatti, sa minn ħafna sekli ilu hu beda jixħet velu taʼ dlam spiritwali fuq dawk li jgħidu li huma Kristjani u saħansitra wassalhom biex jabbandunaw it-​tama prezzjuża tas-​Saltna.

It-​Tama tas-​Saltna Tiġi Abbandunata

13. Għal xiex wassal il-​velu taʼ dlam spiritwali?

¹³ Ġesù bassar li l-​apostati, bħal sikrana miżrugħa qalb il-​qamħ, kellhom jindiehsu fost il-​kongregazzjoni Kristjana u jiżvijaw lil ħafna. (Mattew 13:​24-​30, 36-​43; Atti 20:​29-​31; Ġuda 4) Maż-​żmien, dawn l-​hekk imsejħin Kristjani adottaw festi, prattiċi, u tagħlim pagan u saħansitra ttimbrawhom bħala affarijiet “Kristjani.” Per eżempju, il-​Milied għandu l-​oriġini tiegħu f’riti li jinvolvu l-​qima taʼ l-​allat pagani Mitra u Saturnu. Imma x’wassal lil dawk li jgħidu li huma Kristjani biex jadottaw dawn iċ-​ċelebrazzjonijiet mhux Kristjani? The New Encyclopædia Britannica (1974) tgħid: “Il-​Milied, il-​festa tat-​twelid taʼ Ġesù Kristu, ġie stabbilit hekk kif bdiet tmut l-​istennija li r-​ritorn taʼ Kristu kien fil-​qrib.”

14. It-​tagħlim t’Oriġene u Wistin kif irrappreżenta ħażin il-​verità tas-​Saltna?

¹⁴ Ikkunsidra wkoll it-​tgħawwiġ fit-​tifsira tal-​kelma “saltna.” Il-​ktieb The Kingdom of God in 20th-Century Interpretation jgħid: “Oriġene [teologu tat-​tielet seklu] biddel l-​użu Kristjan taʼ ‘saltna’ għat-​tifsira interna li Alla jaħkem fil-​qalb.” Oriġene fuqiex ibbaża t-​tagħlim tiegħu? Mhux fuq l-​Iskrittura, imma fuq “l-​istruttura taʼ filosofija u opinjoni dinjija li hi differenti sew mill-​mod taʼ ħsieb taʼ Ġesù u l-​knisja tal-​bidu.” Fix-​xogħol tiegħu De Civitate Dei (Il-Belt t’Alla), Wistin taʼ Ħippo (354-​430 E.K.) qal li l-​knisja nfisha hija s-​Saltna t’Alla. Dan il-​ħsieb mhux Skritturali ta lill-​knejjes tal-​Kristjaneżmu bażi teoloġika biex jibda jkollhom poter politiku. U huma żammew dan il-​poter għal sekli sħaħ, u spiss dan għamluh bi brutalità.​—Rivelazzjoni 17:​5, 18.

15. Kif ġie mwettaq Galatin 6:7 fejn għandhom x’jaqsmu ħafna mill-​knejjes tal-​Kristjaneżmu?

¹⁵ Iżda llum il-​knejjes qed jaħsdu dak li żergħu. (Galatin 6:7) Ħafna jidhru li mal-​poter qed jitilfu wkoll il-​parruċċani tagħhom. Din it-​tendenza tidher sew fl-​Ewropa. Skond il-​ġurnal Christianity Today, “il-​katidrali kbar taʼ l-​Ewropa issa [jservu] mhux bħala djar għall-​qima imma bħala mużewijiet li jżuruhom biss it-​turisti.” Din l-​istess tendenza tistaʼ tiġi notata wkoll f’postijiet oħrajn fid-​dinja. Dan x’juri rigward ir-​reliġjon falza? Se tiġi din fix-​xejn sempliċement minħabba n-​nuqqas t’appoġġ finanzjarju jew taʼ membri? U l-​qima vera kif se tiġi effettwata?

Kun Lest għall-​Jum il-​Kbir t’Alla

16. Il-​mibegħda li dejjem qed tikber lejn Babilonja l-​Kbira għala hija sinifikanti?

¹⁶ Meta minn vulkan li jkun ilu inattiv għal xi żmien jibdew ħerġin id-​duħħan u l-​irmied, dan jistaʼ jkun sinjal li l-​vulkan mhux se jdum ma jiżbroffa. Bl-​istess mod, il-​mibegħda li dejjem qed tikber lejn ir-​reliġjon f’ħafna partijiet tad-​dinja hija sinjal li r-​reliġjon falza qed toqrob lejn tmiemha. Ftit żmien ieħor u Ġeħova se jqanqal lill-​elementi politiċi dinjin biex jingħaqdu fl-​isforzi tagħhom ħalli jikxfu l-​prostituta spiritwali, Babilonja l-​Kbira, u jagħmluha ħerba. (Rivelazzjoni 17:​15-​17; 18:21) Għandhom il-​Kristjani veri jibżgħu minn din il-​ġrajja u l-​aspetti l-​oħra tat-​“tribulazzjoni kbira” li jiġu wara? (Mattew 24:21) Lanqas xejn! Fil-​fatt, huma jkollhom għalxiex jifirħu meta Alla jaġixxi kontra l-​ħżiena. (Rivelazzjoni 18:20; 19:​1, 2) Ikkunsidra l-​eżempju taʼ Ġerusalemm taʼ l-​ewwel seklu u l-​Kristjani li kienu jgħixu hemmhekk.

17. Il-​qaddejja leali taʼ Ġeħova għala jistgħu jħarsu lejn it-​tmiem taʼ din is-​sistema b’fiduċja?

¹⁷ Meta l-​armati Rumani assedjaw lil Ġerusalemm fis-​sena 66 E.K., il-​Kristjani li kienu mqajmin spiritwalment la nħasdu u lanqas twerwru. Ladarba kienu jistudjaw il-​Kelma t’Alla bir-​reqqa, huma kienu jafu ‘li kienet qorbot il-​ħerba tagħha.’ (Luqa 21:20) Huma kienu jafu wkoll li Alla kien se jiftħilhom triq biex jaħarbu ’l bogħod mill-​periklu. Meta dan seħħ, il-​Kristjani ħarbu. (Danjel 9:​26; Mattew 24:​15-​19; Luqa 21:21) B’mod simili llum, dawk li jafu lil Alla u jobdu lil Ibnu jistgħu jħarsu lejn it-​tmiem taʼ din is-​sistema b’fiduċja. (2 Tessalonikin 1:​6-9) Fil-​fatt, meta tibda t-​tribulazzjoni l-​kbira, huma bil-​ferħ ‘iqumu dritti u jgħollu rashom ’il fuq, għax ikunu jafu li qorob il-​ħelsien tagħhom.’​—Luqa 21:28.

18. X’se jkun ir-​riżultat taʼ l-​attakk dirett li Gog se jagħmel fuq il-​qaddejja taʼ Ġeħova?

¹⁸ Wara l-​qerda taʼ Babilonja l-​Kbira, fl-​irwol tiegħu bħala Gog taʼ Magog, Satana se jagħmel l-​aħħar attakk dirett kontra x-​Xhieda paċifiċi taʼ Ġeħova. Il-​qtajjaʼ taʼ Gog jitilgħu bħal “sħaba [li] tgħatti l-​art” u jistennew li jkollhom rebħa faċli. Imma x’xokk ikollhom jistenniehom! (Eżekjel 38:​14-​16, 18-​23) L-​appostlu Ġwanni jikteb: “Rajt is-​sema jinfetaħ, u, ara, żiemel abjad. U dak li kien riekeb fuqu kien jismu Leali u Veru . . . Minn fommu kien ħiereġ sejf twil li jaqtaʼ, biex bih jidrob lill-​ġnus.” Dan is-​“Sultan tas-​slaten” invinċibbli se jeħles lill-​aduraturi leali taʼ Ġeħova u jeqred għalkollox l-​għedewwa kollha tagħhom. (Rivelazzjoni 19:​11-​21) X’quċċata se tkun din tat-​twettiq tal-​viżjoni tat-​trasfigurazzjoni!

19. Ir-​rebħa totali taʼ Kristu kif se teffettwa lid-​dixxipli leali tiegħu, u dawn x’għandhom jistinkaw li jagħmlu issa?

¹⁹ Ġesù “f’dak il-​jum [se] jitqies b’ammirazzjoni maʼ dawk kollha li eżerċitaw fidi.” (2 Tessalonikin 1:​10) Trid tkun fost dawk li f’dak iż-​żmien se juru riverenza profonda lejn l-​Iben rebbieħ t’Alla? Mela kompli saħħaħ il-​fidi tiegħek u ‘kun lest, għax f’siegħa li ma tistennihiex ġej Bin il-​bniedem.’​—Mattew 24:​43, 44.

Ibqaʼ f’Sensik

20. (a) Kif nistgħu nuru l-​apprezzament tagħna lejn il-​provvediment t’Alla taʼ l-​“ilsir leali u għaqli”? (b) X’mistoqsijiet għandna nistaqsu lilna nfusna?

²⁰ “L-​ilsir leali u għaqli” jħeġġeġ regolarment lin-​nies t’Alla biex jibqgħu għassa spiritwalment u jibqgħu f’sensihom. (Mattew 24:​45, 46; 1 Tessalonikin 5:6) Tapprezzahom int dawn it-​tfakkiriet f’waqthom? Tużahom biex tistabbilixxi l-​prijoritajiet f’ħajtek? Għala ma tistaqsix lilek innifsek: ‘Għandi ħarsa spiritwali ċara li biha nistaʼ nara l-​Iben t’Alla jaħkem fis-​sema? Narah jien lest biex jesegwixxi ġudizzju divin kontra Babilonja l-​Kbira u l-​bqija tas-​sistema taʼ Satana?’

21. Xi wħud għala għandhom mnejn ħallew il-​ħarsa spiritwali tagħhom tiċċajpar, u x’għandhom jagħmlu mill-​iktar fis?

²¹ Xi wħud li jissieħbu man-​nies taʼ Ġeħova ħallew il-​ħarsa spiritwali tagħhom tiċċajpar. Jistaʼ jkun li dawn tilfu l-​paċenzja jew is-​sabar, bħalma ġralhom xi wħud mill-​ewwel dixxipli taʼ Ġesù? Ġew huma effettwati mill-​ansjetajiet tal-​ħajja, mill-​materjaliżmu, jew mill-​persekuzzjoni? (Mattew 13:​3-8, 18-​23; Luqa 21:​34-​36) Forsi xi wħud sabu ċerta informazzjoni pubblikata mill-​“ilsir leali u għaqli” diffiċli biex jifhmuha. Jekk tinsab f’xi waħda minn dawn is-​sitwazzjonijiet, inħeġġuk biex tistudja l-​Kelma t’Alla b’ħeġġa akbar u titlob bil-​ħrara lil Ġeħova sabiex jerġaʼ jkollok relazzjoni b’saħħitha u mill-​qrib miegħu.​—2 Pietru 3:​11-​15.

22. Kif ġejt effettwat billi kkunsidrajt il-​viżjoni tat-​trasfigurazzjoni u profeziji oħrajn relatati magħha?

²² Il-​viżjoni tat-​trasfigurazzjoni ngħatat lid-​dixxipli taʼ Ġesù meta dawn kellhom bżonn l-​inkuraġġiment. Illum għandna xi ħaġa ferm akbar biex issaħħaħna​—it-​twettiq taʼ dik il-​viżjoni spettakolari u taʼ ħafna profeziji oħra relatati magħha. Hekk kif nimmeditaw dwar dawn ir-​realtajiet glorjużi u dak li jfissru għall-​futur, jalla aħna wkoll nesprimu b’qalbna kollha s-​sentimenti taʼ l-​appostlu Ġwanni meta qal: “Amen! Ejja, Mulej Ġesù.”​—Rivelazzjoni 22:20.

[Nota taʼ taħt]

Tiftakar Int?

• Sa mill-​1870, x’beda jifhem grupp żgħir taʼ studenti tal-​Bibbja dwar ir-​ritorn taʼ Kristu?

• Kif twettqet il-​viżjoni tat-​trasfigurazzjoni?

• Liema effett kellha fuq id-​dinja u fuq il-​kongregazzjoni Kristjana r-​rikba rebbieħa taʼ Ġesù?

• X’għandna nagħmlu jekk irridu nkunu fost dawk li se jibqgħu ħajjin meta Ġesù jtemm ir-​rebħa tiegħu?

[Stampi f’paġna 17]

Viżjoni ssir realtà

[Stampi f’paġna 18]

Taf x’ġara meta Kristu beda r-​rebħa tiegħu?