Jistaʼ l-​Bniedem Iġib Tmiem għall-​Faqar?

MILJUNI taʼ nies kibru mingħajr m’esperjenzaw il-​faqar. Huma qatt ma kellhom għalfejn jidħlu fis-​sodda bil-​ġuħ jew jorqdu jtertru bil-​bard. Minkejja dan, ħafna minn dawn in-​nies jiddispjaċihom għall-​fqar u joħorġu barra minn triqithom biex jgħinuhom.

Madankollu, il-​faqar għadu realtà ħarxa li jesperjenzaw ħafna nies li jgħixu f’pajjiżi mifluġin bi gwerer ċivili, għargħar, nixfa, u problemi oħra. Dawn il-​fatturi jagħmlu l-​ħajja diffiċli għall-​bdiewa Afrikani li jaħdmu biex imantnu lilhom infushom. Ħafna ġew imġagħlin jitilqu minn djarhom u jmorru joqogħdu fi bliet kbar jew jgħixu bħala refuġjati f’pajjiżi oħra. Oħrajn li qabel kienu jgħixu f’postijiet rurali marru joqogħdu fil-​bliet minħabba li tħajru minn wegħdi li se jsibu ħajja aħjar.

Ħafna drabi, bliet li huma popolati żżejjed isiru l-​post ideali fejn jiżdied il-​faqar. Art biex tħawwel xi prodotti ftit ikun hemm, jekk ikun hemm. Ġeneralment ikun diffiċli biex issib xogħol. Minħabba d-​disprament kbir li jħossu, ħafna jispiċċaw jgħixu ħajja kriminali. Dawk li jgħixu fil-​bliet jgħajtu għall-​għajnuna, imma l-​gvernijiet umani ma jistgħux isolvu l-​problema li dejjem qed tikber tal-​faqar. Meta The Independent taʼ Londra rreferiet għar-​rapport li ħarġet il-​Ġnus Magħquda f’Novembru taʼ l-​2003, qalet li fid-​dinja hemm iktar u iktar nies bil-​ġuħ. Hi kompliet: “Illum fid-​dinja hemm madwar 842 miljun ruħ li m’humiex jiġu mitmugħin biżżejjed​—u din iċ-​ċifra se terġaʼ tiżdied b’5 miljun ruħ oħra bil-​ġuħ kull sena.”

L-​uffiċċju tal-​fergħa tax-​Xhieda taʼ Ġeħova fl-​Afrika t’Isfel ġieli jirċievi ittri minn uħud li huma milquta mill-​faqar. Per eżempju, raġel minn Bloemfontein kiteb: “Ninsab bla xogħol, u kulmeta jkolli l-​opportunità nisraq mill-​belt. Kieku ma nagħmilx hekk, nibqgħu bil-​ġuħ għal ġranet sħaħ​—biex ma nsemmix il-​kesħa tremenda li nħossu. Assolutament m’hawnx xogħol. Ħafna nies jiġġerrew fit-​toroq jipprovaw isibu xogħol u xi ħaġa x’jieklu. Naf b’uħud li jqallbu fiż-​żibel biex isibu x’jieklu. Xi wħud ineħħu ruħhom b’idejhom. Ħafna li huma bħali jinsabu dipressi u bla tama. Jidher li m’hemm ebda tama għall-​futur. Ma jarax dan Alla, li wara kollox ħalaqna bil-​bżonn li nieklu u nilbsu?”

Hemm tweġibiet mimlijin faraġ għat-​tħassib taʼ dan ir-​raġel. Bħalma se juri l-​artiklu li jmiss, dawn it-​tweġibiet jinsabu fil-​paġni tal-​Kelma t’Alla, il-​Bibbja.