Dinja Mingħajr Faqar fil-​Qrib

STAMPI tal-​Ġenna taʼ l-​art bħalma hemm fuq il-​qoxra taʼ din ir-​rivista, jolqtuhom lil dawk li jgħixu fil-​faqar. Il-​Ġenna taʼ l-​art kienet realtà għall-​ewwel koppja umana, Adam u Eva. Id-​dar tagħhom kienet il-​ġnien taʼ l-​Għeden. (Ġenesi 2:​7-23) Għalkemm din il-​Ġenna taʼ l-​art intilfet, it-​twemmin li fil-​futur għad ikun hawn waħda bħalha—dinja ġdida mingħajr faqar—m’hijiex biss ħolma. Dan it-​twemmin huwa bbażat b’mod sod fuq il-​wegħdi li jinsabu fil-​Bibbja.

Ikkunsidra l-​wegħda li Ġesù Kristu għamel fl-​aħħar ġurnata tiegħu fuq l-​art. Wieħed mill-​irġiel ħżiena li mietu maʼ Ġesù kellu fidi li Alla hu kapaċi jsolvi l-​problemi tal-​bniedem. Hu qal: “Ġesù, ftakar fija meta tidħol fis-​saltna tiegħek.” Dan il-​kliem juri li dan ir-​raġel ħażin emmen li Ġesù kien se jsaltan bħala Sultan u li l-​mejtin kienu se jerġgħu jqumu mill-​mewt. Ġesù wieġeb: “Tassew ngħidlek illum, Int tkun fil-​Ġenna miegħi.”​—Luqa 23:​42, 43.

Meta titkellem dwar dawk li se jgħixu fil-​Ġenna taʼ l-​art, il-​Bibbja tgħid: “Huma għad jibnu djarhom u jgħammru fihom, iħawwlu d-​dwieli u jieklu frotthom.” (Isaija 65:21) Iva, “kull wieħed jinsab taħt id-​dielja tiegħu, u taħt is-​siġra tat-​tin tiegħu; u ma jkunx hemm min iwerwirhom, għax fomm il-​Mulej taʼ l-​eżerċti tkellem.”​—Mikea 4:4.

Imma l-​faqar għala qed jitħalla jeżisti bħalissa? Alla liema għajnuna jagħti lil dawk li huma milqutin mill-​faqar? Il-​faqar meta se jispiċċa?

Il-​Faqar Għala Tħalla Jeżisti?

Il-​Ġenna taʼ l-​art li Adam u Eva tqiegħdu fiha ntilfet minħabba r-​ribelljoni li beda anġlu mill-​agħar, Satana x-​Xitan. Billi uża lis-​serpent bħala l-​kelliemi tiegħu, Satana ħajjar lil Eva biex tikser il-​liġi li Alla kien tahom biex ma jiklux mill-​frotta taʼ siġra partikulari. Hu qarraq biha billi ġagħalha temmen li jekk tkun indipendenti minn Alla ħajjitha kienet se tkun aħjar. Meta Eva offriet il-​frotta projbita lil Adam, hu kiel ukoll, u b’hekk ta dahru lil Alla biex jismaʼ minn martu.​—Ġenesi 3:​1-6; 1 Timotju 2:14.

Il-koppja ribelluża bix-​xieraq intefgħet ’il barra mill-​Ġenna taʼ l-​art u minn dakinhar ’il quddiem kellhom jissieltu biex jgħixu. Sal-​ġurnata taʼ llum, Ġeħova ppermetta lil Satana biex jaħkem fuq l-​umanità midinba, u b’hekk deher ċar ir-​riżultat li ġġib id-​diżubbidjenza lejn Alla. L-​istorja tal-​bniedem tat prova li l-​umanità ma tistax iġġib Ġenna fuq l-​art. (Ġeremija 10:23) Minflok, l-​indipendenza minn Alla rriżultat fi problemi diżastrużi, inkluż il-​faqar.​—Koħèlet 8:9.

Madankollu, dawk li huma fqar m’humiex bla għajnuna f’din id-​dinja kollha inkwiet. Il-​Kelma ispirata t’Alla, il-​Bibbja, fiha gwida tajba għalihom.

“Qatt Tkunu Ansjużi”

Meta kien qed jitkellem m’udjenza kbira li inkludiet lil ħafna nies fqar, Ġesù qal: “Osservaw bir-​reqqa l-​għasafar tas-​sema, għax huma la jiżirgħu, la jaħsdu, u lanqas jiġbru fl-​imħażen; imma Missierkom tas-​sema xorta waħda jitmagħhom. Ma tiswewx intom iktar minnhom? . . . Għalhekk, qatt tkunu ansjużi u tgħidu, ‘X’se nieklu?’ jew, ‘X’se nixorbu?’ jew, ‘X’se nilbsu?’ Għax dawn kollha huma l-​affarijiet li l-​ġnus qed ifittxu bil-​ħerqa. Għax Missierkom tas-​sema jaf li teħtieġu dawn l-​affarijiet kollha. Mela, ibqgħu fittxu l-​ewwel is-​saltna u s-​sewwa tiegħu, u dawn l-​affarijiet l-​oħrajn kollha se jiżdidulkom.”—Mattew 6:​26-33.

Individwu li hu fqir m’għandux għalfejn jisraq. (Proverbji 6:​30, 31) Jekk ipoġġi lil Alla l-​ewwel f’ħajtu se jingħatalu dak li għandu bżonn. Ikkunsidra l-​każ taʼ Tukiso, raġel minn Lesotho li jgħix fin-​nofsinhar taʼ l-​Afrika. Fl-​1998, truppi barranin daħlu Lesotho sabiex iwaqqfu r-​rewwixta li kienet qamet kontra l-​gvern. Minħabba din il-​gwerra, il-​ħwienet kienu qed jiġu misruqa, in-​nies tilfu xogħolhom, u kien hemm nuqqas kbir taʼ ikel.

Tukiso kien jgħix fl-​iktar parti fqira tal-​belt kapitali. Ħafna mill-​ġirien tiegħu kienu serqu l-​ħwienet biex jirnexxilhom jgħixu. Meta Tukiso mar lura lejn il-​kamra fejn kien jgħix, sab li Maseiso, il-​mara li kien qed jgħix magħha, kellha ħafna ikel li kienet serqet. “Oħroġ dan l-​ikel kollu ’l barra,” qalilha Tukiso filwaqt li spjegalha l-​liġi t’Alla kontra s-​serq. Maseiso obdiet. Il-​ġirien bdew iwaqqgħuhom għaċ-​ċajt u bdew jieħdu mill-​ikel misruq.

Tukiso ħa din il-​waqfa minħabba dak li kien tgħallem mill-​istudju tiegħu tal-​Bibbja max-​Xhieda taʼ Ġeħova. Baqaʼ hu bil-​ġuħ għax obda mil-​liġi t’Alla? Le. Ftit żmien wara, l-​anzjani tal-​kongregazzjoni tax-​Xhieda taʼ Ġeħova fejn hu kien jattendi kkuntattjaw lil Tukiso u ġabulu xi ikel. Fil-​fatt, ix-​Xhieda taʼ Ġeħova mill-​pajjiżi taʼ l-​Afrika t’Isfel li kienu fil-​viċin bagħtu iktar minn żewġ tunnellati taʼ provvisti għal ħuthom il-​Kristjani f’Lesotho. L-​ubbidjenza li Tukiso wera lejn Alla u l-​għajnuna mimlija mħabba li wriet il-​kongregazzjoni impressjonawha lil Maseiso. Hi wkoll bdiet tistudja l-​Bibbja. Eventwalment, it-​tnejn li huma żżewġu legalment, u b’hekk ikkwalifikaw biex jitgħammdu bħala Xhieda taʼ Ġeħova. Huma għadhom jaqdu lil Alla lealment.

Alla Ġeħova jimpurtah mill-​fqar. (Ara lkaxxa intitolata “Alla Kif Iqishom lill-​Fqar?”) Bi mħabba hu pprovda għajnuna lil uħud bħal Tukiso u Maseiso sabiex ikunu jistgħu jitgħallmu iktar dwaru. Fil-​Kelma tiegħu, hu pprovda pariri prattiċi kif ngħixu l-​ħajja taʼ kuljum.

Provvediment taʼ Ġid

Ix-​Xhieda taʼ Ġeħova minn dejjem ipprovaw jimitaw l-​interess li Alla għandu fil-​fqar. (Galatin 2:10) Ħafna drabi meta jseħħ xi diżastru u l-​Kristjani veri jiġu effettwati, isiru arranġamenti sabiex tingħata l-​għajnuna li jkun hemm bżonn. Iktar importanti minn hekk, ix-​Xhieda juru interess fil-​bżonnijiet spiritwali taʼ kulħadd, inkluż taʼ dawk li huma fqar. (Mattew 9:​36-38) Matul dawn l-​aħħar 60 sena, eluf taʼ ministri mħarrġin ivvolontarjaw sabiex jaqdu bħala missjunarji f’pajjiżi barranin. Per eżempju, koppja missjunarja mill-​Finlandja tgħallmu l-​lingwa Sesotho, u b’hekk setgħu jgħallmu lil Tukiso u lil Maseiso sabiex ikunu jistgħu jsiru dixxipli taʼ Ġesù. (Mattew 28:​19, 20) Ħafna drabi, xogħol missjunarju bħal dan jirrikjedi li tissagrifika li tgħix f’pajjiż sinjur u tmur tgħix f’pajjiż fqir.

Il-Kristjani veri ma jqisux is-​serq bħala għażla biex ikun jistaʼ jirnexxilhom jgħixu. Minflok, huma fiduċjużi li Alla Ġeħova kapaċi jipprovdilhom. (Ebrej 13:​5, 6) Mod wieħed kif Ġeħova jipprovdi lill-​poplu tiegħu hu permezz taʼ l-​organizzazzjoni t’aduraturi tiegħu madwar id-​dinja li jieħdu ħsieb xulxin.

Mod ieħor kif Ġeħova jgħin lill-​fqar hu billi jagħtihom pariri prattiċi dwar kif jgħixu l-​ħajja taʼ kuljum. Per eżempju, il-​Bibbja tikkmanda: “Min kien jisraq ħa ma jisraqx iktar, imma minflok ħa jaħdem iebes u jagħmel b’idejh xogħol tajjeb, biex ikollu xi ħaġa x’jagħti lil min hu fil-​bżonn.” (Efesin 4:28) Ħafna wħud li jinsabu bla xogħol irnexxielhom joħolqu xogħol għalihom infushom. Billi jaħdmu iebes huma jagħmlu xogħol bħal li jiżirgħu u jieħdu ħsieb ħxejjex fil-​ġnien tagħhom. Il-​Bibbja wkoll tgħin lil dawk li huma foqra jġemmgħu l-​flus billi tgħallimhom jevitaw vizzji ħżiena bħalma hu l-​abbuż taʼ l-​alkoħol.​—Efesin 5:18.

Dinja Mingħajr Faqar​—Meta?

Il-​Bibbja tindika li qed ngħixu “fl-​aħħar jiem” tal-​ħakma taʼ Satana. (2 Timotju 3:1) Dalwaqt, Alla Ġeħova se jibgħat lil Ġesù Kristu sabiex jiġġudika lill-​umanità. X’se jiġri f’dak iż-​żmien? Ġesù ta t-​tweġiba f’waħda mit-​tixbihat tiegħu. Hu qal: “Meta Bin il-​bniedem jasal fil-​glorja tiegħu, u l-​anġli kollha miegħu, imbagħad joqgħod bil-​qiegħda fuq it-​tron glorjuż tiegħu. U l-​ġnus kollha jinġabru quddiemu, u hu jifred lin-​nies, wieħed mill-​ieħor, bħalma ragħaj jifred in-​nagħaġ mill-​mogħoż.”​—Mattew 25:​31-33.

In-nagħaġ taʼ din it-​tixbiha huma dawk li jissottomettu ruħhom għas-​saltna taʼ Ġesù. Ġesù xebbahhom maʼ nagħaġ għax jimxu warajh billi jqisuh bħala r-​Ragħaj tagħhom. (Ġwanni 10:16) Dawn l-​uħud bħal nagħaġ se jiksbu l-​ħajja taħt il-​ħakma perfetta taʼ Ġesù. Din se tkun ħajja ferħana f’dinja ġdida ħielsa mill-​faqar. Uħud li huma bħal mogħoż, dawk li jirrifjutaw il-​ħakma taʼ Ġesù, se jinqerdu darba għal dejjem.​—Mattew 25:46.

Is-​Saltna t’Alla se ttemm il-​ħażen. Il-​faqar se jkun xi ħaġa tal-​passat. Minflok, l-​art se tkun abitata minn uħud li jħobbu u jieħdu ħsieb xulxin. Meta nħarsu lejn il-​fratellanza internazzjonali tax-​Xhieda taʼ Ġeħova kollha mħabba, nistgħu nibqgħu ċerti li dinja ġdida bħal din hija possibbli. Fi qbil maʼ dan, Ġesù qal: “B’dan ikun jaf kulħadd li intom dixxipli tiegħi, jekk ikollkom l-​imħabba bejnietkom.”​—Ġwanni 13:35.

[Kaxxa/Stampi f’paġna 6, 7]

ALLA KIF IQISHOM LILL-​FQAR?

Il-​Bibbja tiddeskrivi lill-​Ħallieq taʼ l-​umanità bħala l-​wieħed li “jagħti l-​ħobż lill-​imġewwħin.” (Salm 146:7) Fiha nsibu ’l fuq minn mitt vers li jenfasizzaw l-​interess li Alla għandu fil-​fqar.

Per eżempju, meta Ġeħova ta l-​Liġi tiegħu lill-​ġens taʼ Iżrael tal-​qedem, hu kkmanda lill-​bdiewa Iżraelin sabiex ma jaħsdux kompletament sat-​truf taʼ l-​għelieqi tagħhom. Huma ma kellhomx jiġbru l-​frott kollu billi jerġgħu jduru għat-​tieni darba xi siġra taż-​żebbuġ jew dielja. Dawn il-​liġijiet kienu provvediment mimli mħabba għall-​barranin, l-​orfni, ir-​romol, u l-​magħkusin.​—Levitiku 19:​9, 10; Dewteronomju 24:​19-​21.

Iktar minn hekk, Alla kkmanda lill-​Iżraelin: “La taħqrux l-​armla jew l-​iltim; għax jekk taħqruhom, u huma jsejjħuli, jien żgur nismagħha l-​għajta tagħhom; u l-​qilla tiegħi tixgħel, neqridkom bix-​xabla; u n-​nisa tagħkom jormlu u wliedkom jisfaw iltiema.” (Eżodu 22:​21-23 [22:​22-24, NW]) B’dispjaċir, ħafna Iżraelin għonja injoraw dan il-​kliem. Minħabba dan u ħażen ieħor, Alla Ġeħova ta lill-​Iżraelin diversi twissijiet permezz taʼ profeti. (Isaija 10:​1, 2; Ġeremija 5:28; Għamos 4:​1-3) Eventwalment, Alla ġiegħel lill-​Assirjani u iktar tard lill-​Babiloniżi jirbħu t-​territorju taʼ Iżrael. Ħafna Iżraelin ġew maqtula, u dawk li salvaw ittieħdu bħala lsiera f’pajjiżi barranin.

L-​Iben maħbub t’Alla, Ġesù Kristu, irrifletta l-​interess mimli mħabba li għandu Missieru fil-​fqar. Meta kien qed jispjega l-​iskop tal-​ministeru tiegħu, Ġesù qal: “L-​ispirtu taʼ Ġeħova qiegħed fuqi, għax Hu dilikni biex inxandar l-​aħbar tajba lill-​foqra.” (Luqa 4:18) Dan ma jfissirx li l-​ministeru taʼ Ġesù kien biss għal dawk li kienu fqar. Hu bi mħabba għen lil dawk li kienu għonja wkoll. Madankollu, meta għamel dan, Ġesù taʼ spiss wera interess fil-​fqar. Per eżempju, hu ta dan il-​parir lil wieħed ħakkiem sinjur: “Bigħ kulma għandek u qassam lill-​foqra, u jkollok teżor fis-​smewwiet; u ejja kun segwaċi tiegħi.”​—Luqa 14:​1, 12-14; 18:​18, 22; 19:​1-10.

Alla Ġeħova u Ibnu jinteressahom ferm mill-​fqar. (Marku 12:​41-44; Ġakbu 2:​1-6) Ġeħova jżomm fil-​memorja tiegħu l-​miljuni taʼ wħud li mietu u li kienu fqar, u dan jirrifletti l-​interess li hu għandu f’persuni bħal dawn. Uħud bħal dawn se jiġu rxoxtati f’dinja ġdida ħielsa mill-​faqar.​—Atti 24:15.

[Stampi]

Il-​fratellanza internazzjonali tax-​Xhieda taʼ Ġeħova turi li d-​dinja ġdida hi possibbli

[Stampa f’paġna 5]

Tukiso u Maseiso mal-​missjunarju li studja l-​Bibbja maʼ Tukiso

[Stampa f’paġna 5]

Maseiso fil-​bieb tad-​dar tagħha mal-​missjunarja li studjat il-​Bibbja magħha