Uġigħ Kbir u Dejjiemi

REĊENTEMENT, wieħed raġel għamel riċerka dwar kif iż-​żmien jeffettwa s-​sentimenti taʼ dawk li qed jitnikktu minħabba t-​telfa taʼ wħud maħbubin fil-​mewt. Hu bagħat xi kwestjonarji lil numru taʼ ġenituri li mitulhom it-​tfal xi snin qabel. Mhux il-​ġenituri kollha wieġbu. Wieħed missier jismu Vladimir, li tilef lil ibnu fil-​mewt ħames snin qabel, spjega li għadu jsibha diffiċli wisq biex jitkellem dwar ibnu.a

Diqa dejjiema bħal din hija komuni fost il-​ġenituri mnikktin minħabba l-​mewt taʼ wliedhom. William tilef lil ibnu taʼ 18-il sena fil-​mewt meta dan għereq għaxar snin ilu. William jikteb, “Għadni nħoss l-​uġigħ taʼ dik it-​telfa, u se nibqaʼ nħossu sakemm indum ħaj.” Ħames snin wara li iben Lucy miet minħabba marda mhix mistennija, hi kitbet: “Għall-​ewwel ftit ġranet bqajt naħseb, ‘Ma jistax ikun.’ Ħassejtni bħallikieku qed noħlom ħolma kerha u li malajr se nistenbaħ. Wara ftit żmien bdejt nirrealizza li kien veru, li ma kienx se jiġi lura d-​dar. Ibni miet ħames snin ilu, imma xi drabi, meta nkun waħdi, xorta għadni nibkih.”

Għala ġenituri mnikktin, bħal Vladimir, William, u Lucy, iħossu tant uġigħ kbir u dejjiemi? Ejja nikkunsidraw xi raġunijiet.

Għala Daqstant Diqa?

Meta fil-​familja titwieled tarbija, il-​ġenituri jesperjenzaw emozzjonijiet li huma uniċi meta tqabbilhom maʼ xi relazzjoni umana oħra. Il-​fatt li sempliċement iħaddnu liż-​żgħir tagħhom, iħarsu lejh waqt li jkun rieqed, jew jaraw it-​tbissima kbira tiegħu jġibilhom ferħ u sodisfazzjon kbir. Ġenituri kollhom imħabba jgħożżuhom lil uliedhom. Huma jħarrġuhom biex iġibu ruħhom sew u jkunu edukati. (1 Tessalonikin 2:​7, 11) Hekk kif it-​tfal jikbru filwaqt li jirreaġixxu għal dawn l-​isforzi, il-​ġenituri jħossuhom kburin u jibdew jiżviluppaw stennijiet kbar għalihom.

Ġenituri li jimpurtahom minn uliedhom jaħdmu iebes biex jipprovdu l-​bżonnijiet tagħhom. Huma għandhom mnejn iwarrbu xi flus jew affarijiet materjali sabiex ikunu jistgħu jgħinu lil uliedhom jibdew familja tagħhom stess fil-​futur. (2 Korintin 12:14) Il-​fatt li jinvestu daqshekk emozzjoni, ħin, sforz, u flus jipponta lejn konklużjoni waħda​—il-​ġenituri jrabbu lil uliedhom biex jgħixu, mhux biex imutu. Meta xi ħadd mill-​ulied imut, ix-​xogħol tat-​trobbija ma jkunx komplut, u t-​tamiet li kellhom il-​ġenituri għalih ikunu sfaw fix-​xejn. L-​imħabba mill-​qalb u l-​affezzjoni li l-​ġenituri jgħaddu lil uliedhom ikunu spiċċaw, bħallikieku nħoloq ħajt bejniethom. Il-​post li binhom jew binthom xi darba kienet tokkupa fi qlubhom issa huwa vojt. Il-​ġenituri jħossu diqa kbira li ma tmurx faċilment.

Il-Bibbja tikkonferma li l-​ġenituri mnikktin ikollhom uġigħ kbir u kontinwu. Waqt li tiddeskrivi x’ġara meta l-​patrijarka Ġakobb semaʼ li ibnu Ġużeppi ġie maqtul, il-​Bibbja tgħid: “Ġakobb ċarrat ilbiesu u geżwer xkora maʼ qaddu u għamel vistu għal ibnu għal żmien twil. U wliedu, subjien u bniet, qamu biex ifarrġuh, imma hu ma riedx jaf b’faraġ, u qal: ‘Mnikket sa ninżel taħt l-​art [jew, fil-​qabar] ħdejn ibni.’” Snin wara, Ġakobb kien għadu mnikket għal ibnu, li mingħalih kien mejjet. (Ġenesi 37:​34, 35; 42:​36-​38) Eżempju Bibliku ieħor jinvolvi lil mara leali jisimha Nagħomi li esperjenzat il-​mewt taż-​żewġ uliedha subien. Minħabba n-​niket kbir li kellha, hi riedet tbiddel isimha minn Nagħomi, li jfisser “Ħelwa,” għal Mâra, li jfisser “Morra.”​—Rut 1:​3-5, 20, 21, nota taʼ taħt.

Madankollu, il-​Bibbja mhux biss tirrikonoxxi n-​niket li jesperjenzaw il-​ġenituri. Tindika wkoll kif Ġeħova jagħti s-​saħħa lil dawk li qed jitnikktu. Fl-​artiklu li jmiss, se nikkunsidraw ftit mill-​modi fejn Alla jipprovdi l-​faraġ lil dawk imnikktin.

[Nota taʼ taħt]