Ħarsa bir-​Reqqa Lejn Xagħrek

“FI KWALUNKWE żmien u kultura, ix-​xagħar jirrivela xi ħaġa dwar l-​individwu,” jinnota ktieb taʼ referenza. Mhux taʼ b’xejn, mela, li l-​biċċa l-​kbira tan-​nies huma interessati ferm f’li jżommu xagħarhom b’saħħtu u attraenti.

Stenbaħ! staqsa xi mistoqsijiet komuni lil erbaʼ esperti fl-​istil tax-​xagħar dwar minn xiex inhu magħmul ix-​xagħar u kif tieħu ħsiebu. Kif se naraw, xagħrek huwa iktar komplikat milli jidher.

Kif Jitlaʼ u Jaqaʼ x-​Xagħar

M: Minn xiex inhu magħmul ix-​xagħar?

T: Ix-​xagħar fih il-​keratina, proteina fformata minn ħjut irqaq. Kull xagħra toħroġ minn toqba fil-​ġilda tar-​ras imsejħa follikulu. Taħt kull follikulu hemm il-​papilla, li jkun fiha ħafna vini u arterji. Il-​papilla tipproduċi ċ-​ċelluli tax-​xagħar li mbagħad joħorġu mill-​follikulu, u b’hekk tifforma x-​xagħra.

M: Huwa maħsub li x-​xagħar jikber iktar malajr meta taqtgħu. Veru dan?

T: Le. Xi nies jaħsbu li x-​xagħar huwa sostnut mill-​ġisem l-​istess bħalma l-​friegħi taʼ siġra jiġu sostnuti miz-​zokk. Imma ladarba x-​xagħar joħroġ mill-​ġilda tar-​ras, dan ikun bla ħajja. Għalhekk, il-​qtugħ tax-​xagħar ma jeffettwax kemm jikber.

M: Ix-​xagħar għala jibjad?

T: Is-​saff taʼ ġewwanett tax-​xagħra fih materjal, li jissejjaħ pigment, li jagħti l-​kulur lix-​xagħar. Hekk kif iċ-​ċelluli tal-​pigment imutu, ix-​xagħar jibjad; dan huwa parti mill-​proċess tax-​xjuħija. Meta x-​xagħar jibjad kmieni, dan jistaʼ jkun minħabba xi ħaġa ġenetika jew minn xi mard. Madankollu, mhux veru li x-​xagħar jibjad mil-​lum għal għada. Il-​kulur tax-​xagħar joħroġ minn taħt il-​ġilda tar-​ras. Għalhekk, jeħtieġ iż-​żmien biex jitlaʼ x-​xagħar abjad (madwar 1.25 ċentimetru kull xahar) u jibda jidher fuq barra.

M: X’inhuma xi raġunijiet għala jaqaʼ x-​xagħar?

T: Hija ħaġa normali li x-​xagħar jaqaʼ. Bejn wieħed u ieħor, kulħadd jaqagħlu minn madwar 50 sa 80 xagħra kuljum. Imma meta raġel jitfartas mad-​dawra tal-​qorriegħa, din hija xi ħaġa ereditarja u mid-​dehra tiġri minħabba żbilanċ taʼ l-​ormoni. Dan jirriżulta f’li x-​xagħar jaqaʼ u ma jerġax jitlaʼ. Meta jaqaʼ x-​xagħar b’mod mhux normali, dan jissejjaħ alopeċja.a

M: Xi wħud jgħidu li x-​xagħar jirrifletti s-​saħħa taʼ persuna. Hija minnha din il-​ħaġa?

T: Iva. Taħt il-​ġilda tar-​ras, id-​demm jagħti n-​nutriment lix-​xagħar. Għalhekk, xagħar b’saħħtu juri li hemm provvista taʼ demm sostnut sew. Madankollu, wieħed nieqes minn ikel sustanzjuż jew li jabbuża mix-​xorb alkoħoliku jistaʼ jsib li xagħru ma jibqax sabiħ u b’saħħtu, ladarba l-​provvista taʼ demmu ma tkunx tistaʼ ssostnilu xagħru sew. Meta jaqaʼ x-​xagħar jew ma jkunx b’saħħtu jistaʼ saħansitra jkun sinjal taʼ bidu taʼ xi marda jew tqala.

Kif Iżżomm il-​Ġilda taʼ Rasek u Xagħrek b’Saħħithom

M: Iddeskrivi kif naħslu x-​xagħar u l-​ġilda tar-​ras.

T: L-​esperjenza wriet li l-​biċċa l-​kbira tan-​nies li għandhom problemi bil-​ġilda tar-​ras xotta jaħslu xagħarhom taʼ spiss iżżejjed. M’għandniex xi ngħidu, iż-​żejt f’xagħrek iżomm it-​trab u l-​brija, u dan jistaʼ jsodd il-​pori li jwasslu għall-​follikuli. Għalhekk, ikun meħtieġ li taħsel rasek regolarment. Imma dawn iż-​żjut naturali jżommu l-​ġilda ratba u jipproteġuhielek ukoll minn batterji li jagħmlu l-​ħsara. Meta taħsel xagħrek taʼ spiss iżżejjed, int tkun qed ittellef il-​ġilda taʼ rasek milli żżomm dan is-​saff protettiv u toħloq problemi bħal ġilda xotta. Ħafna esperti dwar il-​kura tax-​xagħar jirrikkmandaw li taħsel rasek meta l-​ġilda tar-​ras jew ix-​xagħar ikun maħmuġ. Nies b’xagħarhom żejtni għandhom jaħsluh iżjed drabi minn dawk li għandhom xagħarhom normali jew xott.

Meta taħsel xagħrek, ogħrok il-​ġilda taʼ rasek. B’hekk, tkun qed tneħħi ċ-​ċelluli mejtin u tgħin biex ikollok ċirkulazzjoni tajba tad-​demm, li jagħti nutriment lil xagħrek. Ftakar biex tlaħlaħ xagħrek sew! Jekk ma tlaħlaħx idejk wara li tkun ħsilthom bis-​sapun, il-​ġilda tiegħek tixxotta u tinqasam. Bl-​istess mod, jekk ma tlaħlaħx xagħrek sew, il-​ġilda taʼ rasek issir xotta u bil-​brija.

M: Kif tistaʼ tikkura ġilda tar-​ras xotta?

T: Ixrob ħafna ilma, u kul ikel sustanzjuż. B’hekk, trattab il-​ġilda tiegħek u ssostni l-​provvista tad-​demm. Uża shampoo li ma jkunx qawwi ħafna, u ogħrok il-​ġilda taʼ rasek regolarment. Xi nies jużaw ukoll conditioners li jitħallew fuq ix-​xagħar u żjut li jrattbu l-​ġilda tar-​ras.

L-​Istil taʼ Xagħrek

M: Dak li jkun x’għandu jżomm f’moħħu meta jmur għand stilista tax-​xagħar?

T: Jekk tkun trid tbiddel l-​istil taʼ xagħrek, ħu miegħek stampa taʼ l-​istil li trid u forsi taʼ l-​istil li ma tridx. Kun ċar meta tesprimi dak li tixtieq u kemm ħin lest li tqattaʼ biex tieħu ħsieb xagħrek kuljum, ladarba ċerti stili tax-​xagħar jeħtieġu iktar attenzjoni minn oħrajn. Żomm f’moħħok li normalment ikun hemm bżonn tmur għand l-​istilista darbtejn jew tlieta qabel ma jidra sew it-​tip taʼ xagħar li għandek u jsir midħla tiegħek. Għalhekk, taqtax qalbek u tbiddilx l-​istilista tiegħek malajr!

Dak li Xagħrek Jgħid Dwarek

Il-​kura u l-​istil tax-​xagħar huma modi taʼ kif tesprimi ruħek. Ix-​xagħar ġie maqtugħ, imtawwal, illixxat, innokklat, miżbugħ, u magħmul fi stili differenti biex jinżamm mal-​moda, mat-​twemmin reliġjuż, u saħansitra maʼ l-​ideat soċjali u politiċi. Ħares ħarsa bir-​reqqa lejn xagħrek. X’jirrivela dwarek? Xagħar b’saħħtu bi stil pulit iżejjen lil dak li jkun u jaqlaʼ l-​ammirazzjoni taʼ oħrajn.

[Nota taʼ taħt]

[Stampi f’paġna 18]

Jekk tiekol ikel sustanzjuż u tixrob ħafna ilma tistaʼ tfejjaq ġilda tar-​ras xotta

[Stampa f’paġna 18]

Li taħsel xagħrek taʼ spiss iżżejjed jistaʼ jtellef il-​ġilda taʼ rasek milli żżomm iż-​żjut protettivi

[Stampa f’paġna 18]

Li x-​xagħar jibjad huwa parti normali mill-​proċess tax-​xjuħija