L-​Ivvjaġġar bl-​Ajru Għadu Ħieles mill-​Periklu?

INĦATFU erbaʼ ajruplani tal-​passiġġieri. L-​erbgħa li huma kkraxxjaw. Il-​qerda taʼ bini storiku magħruf. L-​immaġni taʼ l-​ajruplan tal-​passiġġieri bin-​numru 767 jitkisser f’wieħed mit-​Twin Towers murija għal darba wara l-​oħra fuq it-​televixin.

L-attakki tal-​11 taʼ Settembru, 2001, ġabuna f’era ġdida tal-​biżaʼ f’dik li hi vjolenza terroristika. Il-​linji taʼ l-​ajru saru mezz użat biex iwassal għall-​qtil, u l-​ajruplani saru apparat li jisplodi u jikkaġuna nar qawwi.

Minħabba f’hekk, inħoloq tip ġdid taʼ wħud beżgħanin li jivvjaġġaw bl-​ajru: Dawk li kienu jħossuhom fis-​sigurtà, iżda issa jinsabu mwerwrin minħabba l-​possibbiltà li jseħħu xi attakki terroristiċi. Iktar minn hekk, serje taʼ inċidenti bl-​ajruplani li ma kellhomx x’jaqsmu mat-​terroriżmu wara l-​11 taʼ Settembru żiedet il-​biżaʼ taʼ ħafna li jivvjaġġaw bl-​ajru.

Huwa minnu li l-​ivvjaġġar bl-​ajru huwa lussu li miljuni taʼ nies madwar id-​dinja lanqas biss joħolmu li jagħmluh. Madankollu, għal oħrajn l-​ivvjaġġar bl-​ajru huwa xi ħaġa li għandhom bżonn jagħmluha fuq bażi regulari. Għal dawk li jaħdmu f’xogħlijiet li jirrikjedu safar spiss minħabba n-​negozju, il-​fatt li jitilgħu fuq ajruplan huwa inevitabbli. Il-​missjunarji u l-​ministri Kristjani spiss ikollhom jagħmlu titjiriet twal lejn l-​inkarigi tagħhom u lura. Anki għan-​nies foqra, l-​ajruplan kultant ikun l-​uniku mezz taʼ trasport addattat waqt emerġenza medika. U eluf taʼ piloti u ekwipaġġi tat-​titjiriet jaqilgħu l-​għajxien tagħhom billi jivvjaġġaw bl-​ajru.

Ħafna minn dawn l-​uħud li jivvjaġġaw bl-​ajru, għalkemm forsi jkunu mbeżżgħin huma stess, qed ikollhom jikkalmaw l-​ansjetà tas-​sieħeb jew is-​sieħba tagħhom jew il-​biżaʼ tat-​tfal qabel ma jitilqu mid-​dar. U hekk kif it-​titjiriet li darba kienu rutina saru esperjenzi diffiċli, dawk li jivvjaġġaw qed jitħassbu dwar jekk l-​ajru għadux il-​mod kif jippreferu jivvjaġġaw.

Biex jiddiskuti din il-​kwistjoni, Stenbaħ! ikkonsulta maʼ xi esperti tas-​sigurtà, maʼ wħud li jaħdmu fl-​ajruporti, maʼ uffiċjali tal-​linji taʼ l-​ajru, u maʼ wħud li jaħdmu fil-​manutenzjoni taʼ l-​ajruplani. Ilkoll jidhru li jaqblu dwar dan: Għalkemm l-​ivvjaġġar bl-​ajru baqaʼ wieħed mill-​iktar mezzi taʼ vvjaġġar ħieles mill-​periklu, theddid ġdid jirrikjedi miżuri ġodda sabiex tiżdied is-​sigurtà għall-​pubbliku li jivvjaġġa.

L-artikli li jmiss se jiddiskutu l-​isfidi involuti u x’tista tagħmel int personalment sabiex iżżid is-​sigurtà u l-​kumdità tiegħek waqt li tkun qiegħed fuq xi titjira.