“Fissazzjoni” fuq it-​Telefons Ċellulari

MINN KITTIEB GĦAL STENBAĦ! FIL-​ĠAPPUN

“LEBLIEBA għat-​Telefons Ċellulari Qed Issir Kważi Fissazzjoni,” qal titlu t’artiklu f’gazzetta fil-​Ġappun, The Daily Yomiuri. Fissazzjoni? “Iż-​żgħażagħ donnhom li jqisu t-​telefons ċellulari tagħhom bħala parti minnhom stess u saħansitra ġieli jibdew jippanikkjaw jekk ma jkollhomx it-​telefon ċellulari magħhom,” spjegat il-​gazzetta. Maħkumin minn biżaʼ li jinqatgħu minn oħrajn, ħafna jħallu t-​telefon ċellulari mixgħul il-​ħin kollu, kullimkien. Jekk “ma jirċivux messaġġi fuq it-​telefon ċellulari tagħhom, iħossuhom ansjużi u nervużi, u jibdew jaħsbu li m’huma maħbubin minn ħadd.” Din l-​ansjetà ġġagħalhom iwieġbu l-​messaġġi li jirċievu mill-​ewwel, xi ħaġa li spiss ma tkunx neċessarja.

M’għandniex xi ngħidu, it-​telefons ċellulari jistgħu jkunu siewja. Fil-​fatt, dawn taʼ spiss kienu t’għajnuna kbira f’sitwazzjonijiet t’emerġenza. Anki l-​użu ġenerali tat-​telefon ċellulari m’huwiex neċessarjament ħażin, sakemm dan isir b’mod bilanċjat. Imma xi awtoritajiet jgħidu li l-​“fissazzjoni” fuq it-​telefon ċellulari tistaʼ tħassar il-​kapaċitajiet normali tal-​komunikazzjoni. Għalliema taʼ l-​iskola sekondarja f’Osaka tinsab inkwetata għaliex minħabba t-​telefons ċellulari “t-​tfal qed jitilfu l-​abbiltà li jinterpretaw l-​espressjoni tal-​wiċċ, l-​imġiba, u t-​ton tal-​vuċi t’oħrajn. Minħabba dan, qed tiżdied l-​aggressività fost it-​tfal kif ukoll l-​indifferenza lejn is-​sentimenti t’oħrajn,” qalet il-​gazzetta.

L-artiklu kkonkluda: “Jidher inevitabbli li fil-​futur id-​dipendenza tat-​tfal fuq it-​telefon ċellulari se tiżdied. L-​uniku mod kif jistgħu jitnaqqsu l-​effetti negattivi taʼ din it-​tendenza hu billi l-​adulti jagħtu eżempju tajjeb lit-​tfal fl-​użu tat-​telefon ċellulari.”