Kapitlu 17

Jgħallem lil Nikodemu

WAQT li qed jattendi l-​Qbiż tas-​sena 30 E.K., Ġesù jwettaq sinjali tal-​għaġeb, jew mirakli. Bħala riżultat, ħafna nies ipoġġu l-​fidi tagħhom fih. Nikodemu, membru tas-​Sinedriju, il-​qorti superjuri tal-​Lhud, jimpressjona ruħu u jrid jitgħallem iktar. Mela hu jżur lil Ġesù fis-​satra tal-​lejl, probabbilment għax kien jibżaʼ li r-​reputazzjoni tiegħu fost il-​mexxejja Lhud kienet se titħassar jekk jarawh.

“Rabbi,” jgħid hu, “aħna nafu li inti bħala għalliem ġejt mingħand Alla; għax ħadd ma jistaʼ jwettaq dawn is-​sinjali li twettaq int jekk Alla ma jkunx miegħu.” Bi tweġiba, Ġesù jgħid lil Nikodemu li sabiex jidħol fis-​Saltna t’Alla, wieħed irid ‘jitwieled mill-​ġdid.’

Iżda, kif jistaʼ wieħed jitwieled mill-​ġdid? “Ma jistax jidħol ġol-​ġuf t’ommu t-​tieni darba u jitwieled, hux tassew?” jistaqsi Nikodemu.

Le, li tkun imwieled mill-​ġdid ma jfissirx hekk. “Jekk xi ħadd ma jitwelidx mill-​ilma u mill-​ispirtu,” jispjega Ġesù, “ma jistax jidħol ġos-​saltna t’Alla.” Meta Ġesù tgħammed u niżel fuqu l-​ispirtu qaddis, hu b’hekk twieled “mill-​ilma u mill-​ispirtu.” Bid-​dikjarazzjoni li ġiet dak il-​ħin mis-​sema, ‘Dan hu ibni li lilu jien approvajt,’ Alla ħabbar li hu kien welled iben spiritwali bil-​prospett taʼ li jidħol fis-​Saltna tas-​sema. Iktar tard, f’Pentekoste tas-​sena 33 E.K, uħud oħrajn li jitgħammdu se jirċievu l-​ispirtu qaddis u b’hekk ukoll se jitwieldu mill-​ġdid bħala wlied spiritwali t’Alla.

Imma r-​rwol tal-​Iben uman speċjali t’Alla huwa vitali. “Sewwa sew bħalma Mosè għolla s-​serpent fix-​xagħri,” igħid Ġesù lil Nikodemu, “hekk irid jiġi mgħolli Bin il-​bniedem, biex kulmin qed jemmen fih jistaʼ jkollu l-​ħajja taʼ dejjem.” Iva, bħalma dawk l-​Iżraeliti migdumin mis-​sriep velenużi kellhom iħarsu lejn is-​serpent tar-​ram biex jiġu salvati, hekk il-​bnedmin kollha jinħtieġu li jeżerċitaw fidi fl-​Iben t’Alla biex jiġu salvati mill-​qagħda moribonda tagħhom.

Biex jenfasizza r-​rwol taʼ mħabba taʼ Jehovah f’dan, Ġesù mbagħad igħid lil Nikodemu: “Alla tant ħabb lid-​dinja li ta l-​Iben uniġenitu tiegħu, sabiex kulmin jeżerċita fidi fih jistaʼ ma jinqeridx imma jkollu l-​ħajja taʼ dejjem.” B’hekk, hawn f’Ġerusalemm sitt xhur biss wara li beda l-​ministeru tiegħu, Ġesù jagħmilha ċara li hu l-​mezz taʼ Alla Jehovah biex isalva lill-​umanità.

Ġesù jissokta jispjega iktar lil Nikodemu: “Għax Alla bagħat lil Ibnu ’l quddiem fid-​dinja, mhux biex hu jiġġudika lid-​dinja,” jiġifieri, mhux biex jagħtiha ġudizzju taʼ kontra, jew jikkundannaha, billi jissentenzja lir-​razza umana għall-​qerda. Minflok, bħalma jgħid Ġesù, hu ġie mibgħut “biex id-​dinja tiġi salvata permezz tiegħu.”

Nikodemu ġie għand Ġesù bil-​biżaʼ fis-​satra tal-​lejl. Mela huwa interessanti li Ġesù jagħlaq il-​konversazzjoni tiegħu miegħu billi jgħid: “Issa dan hu l-​bażi għall-​ġudizzju, li d-​dawl [li Ġesù ppersonifika fil-​ħajja u t-​tagħlim tiegħu] ġie fid-​dinja imma l-​bnedmin ħabbew id-​dlam minflok id-​dawl, għax xogħlijiethom kienu mill-​agħar. Għax dak li jipprattika affarijiet vili jobgħod id-​dawl u ma jiġix għad-​dawl, sabiex ix-​xogħlijiet tiegħu jistgħu ma jiġux imċanfrin. Imma dak li jagħmel dak li hu veru jiġi għad-​dawl, sabiex ix-​xogħlijiet tiegħu jistgħu jintgħamlu jidhru bħala li ġew maħduma fi qbil maʼ Alla.” Ġwann 2:23​–3:21; Mattew 3:​16, 17; Atti 2:​1-4; Numri 21:9.

▪ X’iqanqal iż-​żjara taʼ Nikodemu, u għala jiġi bil-​lejl?

▪ Xi jfisser li tkun ‘imwieled mill-​ġdid’?

▪ Ġesù kif jagħti stampa tar-​rwol tiegħu fis-​salvazzjoni tagħna?

▪ X’ifisser li Ġesù ma ġiex biex jiġġudika lid-​dinja?