X’Jemmnu?

IX-​XHIEDA TAʼ JEHOVAH jemmnu f’Alla li Jistaʼ Kollox, Jehovah, il-​Ħallieq tas-​sema u l-​art. L-​univers taʼ madwarna huwa mimli b’għeġubijiet magħmulin b’tant preċiżjoni. Bir-​raġun, l-​eżistenza tagħhom tindika li Ħallieq intelliġenti u setgħan għamel dan kollu. Sewwa sew bħalma x-​xogħlijiet taʼ rġiel u nisa jirriflettu l-​kwalitajiet li għandhom, hekk ukoll jagħmlu dawk taʼ Alla Jehovah. Il-​Bibbja tgħidilna li “l-​kobor [“kwalitajiet,” New World Translation] tiegħu li ma jidhirx, . . . huma setgħu jagħrfuh sa mill-​ħolqien tad-​dinja, permezz tal-​ħlejjaq.” Bl-​istess mod, mingħajr leħen jew kliem, “is-​smewwiet ixandru l-​glorja taʼ Alla.”—Rumani 1:20; Salm 19:2-5 (19:1-4, NW).

In-nies ma jagħmlux reċipjenti tal-​fuħħar jew settijiet tat-​televixin u kompjuters mingħajr skop. L-​art u l-​ħolqien li fiha taʼ pjanti u annimali huma bil-​wisq iktar meraviljużi. Il-​bniedem għadu ma bediex jifhem l-​istruttura tal-​ġisem uman bit-​triljuni taʼ ċelluli li fih. Anki l-​moħħ li naħsbu bih huwa taʼ l-​għaġeb u lanqas biss nifhmu kif jaħdem! Jekk il-​bniedem ikollu skop meta jagħmel xi invenzjoni, li hi insinifikanti ħdejn l-​għeġubijiet tal-​ħolqien, żgur li Alla Jehovah kellu skop meta għamel il-​ħolqien taʼ l-​għaġeb tiegħu! Qwiel 16:4 (Saydon) jgħid li: “Kollox għamel il-​Mulej għal skop.”

Jehovah għamel l-​art għal skop, bħalma qal lill-​ewwel koppja umana: “Nisslu u oktru, u imlew l-​art, u aħkmuha; u saltnu fuq il-​ħut tal-​baħar u t-​tajr taʼ l-​ajru u l-​ħlejjaq kollha li jitkaxkru fuq l-​art.” (Ġenesi 1:28) Peress li m’obdewx, l-​ewwel raġel u mara naqsu li jimlew l-​art b’familji taʼ tjieba li kienu se jħobbu u jieħdu ħsieb l-​art u l-​pjanti u l-​annimali taʼ ġo fiha. Imma l-​fatt li naqsu ma jfissirx li Jehovah fallielu l-​iskop li kellu. Eluf taʼ snin wara nkiteb: “Alla, li sawwar l-​art, . . . ma ħalaqhiex għall-​baħħ.” Hu “sawwarha biex jgħammru fiha.” Din m’hijiex se tinqered, imma “l-​art tibqaʼ għal dejjem.” (Isaija 45:18; Koħèlet 1:4) L-​iskop taʼ Jehovah għall-​art se jitwettaq: “Il-​ħsieb tiegħi għad iseħħ, u nagħmel kull ma rrid.”—Isaija 46:10.

Għaldaqstant, ix-​Xhieda taʼ Jehovah jemmnu li l-​art se tibqaʼ għal dejjem. In-​nies kollha, kemm il-​ħajjin u kemm dawk li mietu, li jimxu fi qbil maʼ l-​iskop taʼ Jehovah li jagħmel l-​art sabiħa u abitabbli, ikunu jistgħu jgħixu fuqha għal dejjem. Il-​bnedmin kollha wirtu l-​imperfezzjoni mingħand Adam u Eva, u għaldaqstant, huma midinbin. (Rumani 5:12) Il-​Bibbja tgħidilna: “Il-​ħlas tad-​dnub hu l-​mewt.” “Il-​ħajjin, għallinqas, jafu li għad imutu, iżda l-​mejtin ma jafu xejn.” “Ir-​ruħ li tidneb, tmut.” (Rumani 6:23; Koħèlet 9:5; Eżekjel 18:4, 20, KŻ) Mela allura kif jistgħu jerġgħu jgħixu biex igawdu mill-​barkiet li se jkun hawn fuq l-​art? Dan huwa possibbli biss permezz tas-​sagrifiċċju taʼ fidwa taʼ Kristu Ġesù, għax hu qal: “Jien hu l-​qawmien u l-​ħajja. Kull min jemmen fija, ukoll jekk imut, jgħix.” “Dawk kollha li jkunu fl-​oqbra jisimgħu leħnu u joħorġu.”—Ġwann 5:28, 29; 11:25; Mattew 20:28.

Dan kif se jseħħ? Dan insibuh spjegat fl-​“Evanġelju [“aħbar tajba,” NW] tas-​Saltna,” li Ġesù beda jxandar meta kien fuq l-​art. (Mattew 4:17-23) Imma llum ix-​Xhieda taʼ Jehovah qed ixandru l-​aħbar tajba b’mod tassew speċjali.

[Tabella f’paġna 13]

X’JEMMNU X-​XHIEDA TAʼ JEHOVAH

Twemmin Raġuni Skritturali

[Stampa f’paġna 12]

L-​ART . . . maħluqa minn Jehovah . . . jieħu ħsiebha l-​bniedem . . . abitata għal dejjem