Is-swar taʼ Ġerusalemm

Issa, ejja mmorru lura għaż-​żmien taʼ qabel ma reġgħu nbnew is-​swar taʼ Ġerusalemm. Neħemija, qaddej tas-​Sultan Artaserse, kien raġel Iżraeli li għex fil-​belt Persjana taʼ Susan. Ħu Neħemija ġie minn Ġuda b’din l-​aħbar ħażina: ‘In-​nies li marru lura Ġerusalemm huma fil-​periklu. Is-​swar u l-​bibien tal-​belt li l-​Babiloniżi kissru, qatt ma reġgħu nbnew.’ Neħemija ħassu mdejjaq. Hu ried imur Ġerusalemm biex jgħinhom, u għalhekk talab lil Ġeħova biex is-​sultan ikun jistaʼ jħallih imur.

Darba waħda, is-​sultan induna li Neħemija kien imdejjaq, u qallu: ‘Qatt ma rajtek hekk. Xi ġralek?’ Neħemija wieġbu: ‘Kif nistaʼ ma nkunx imdejjaq meta l-​belt tiegħi, Ġerusalemm, tinsab ħerba?’ Is-​sultan staqsieh: ‘X’nistaʼ nagħmel biex ngħinek?’ Neħemija mill-​ewwel qal talba f’qalbu. Imbagħad hu qal: ‘Jekk jogħġbok, ħallini mmur Ġerusalemm biex nerġaʼ nibni s-​swar.’ Is-​Sultan Artaserse qallu li jistaʼ jmur, u għamel ċert li Neħemija ma jkunx fil-​periklu matul il-​vjaġġ twil tiegħu. Ukoll, is-​sultan għamlu gvernatur taʼ Ġuda u tah l-​injam għall-​bibien tal-​belt.

Meta Neħemija wasal Ġerusalemm, hu mar jara kif kienu s-​swar. Imbagħad laqqaʼ l-​qassisin u l-​mexxejja, u qalilhom: ‘Qegħdin f’sitwazzjoni kerha ħafna. Hemm bżonn li nibdew ix-​xogħol.’ In-​nies qablu, u reġgħu bdew jibnu s-​swar.

Imma xi għedewwa tal-​Iżraelin bdew iwaqqgħuhom għaċ-​ċajt, u qalulhom: ‘Anki volpi kapaċi jwaqqaʼ s-​sur li qed tibnu.’ Il-​ħaddiema ma tawx kashom u baqgħu jibnu. Is-​sur baqaʼ tielaʼ iktar ’il fuq u jsir iktar b’saħħtu.

L-​għedewwa ppjanaw li jiġu minn naħat differenti u jaqbdu u jattakkaw lil Ġerusalemm. Meta l-​Lhud semgħu dwar il-​pjan tagħhom bdew jibżgħu. Imma Neħemija qalilhom: ‘Tibżgħux. Ġeħova hu magħna.’ Hu poġġa għassiesa biex jipproteġu lill-​ħaddiema, u b’hekk l-​għedewwa ma setgħux jattakkaw.

Fi żmien 52 ġurnata biss, is-​swar u l-​bibien tal-​belt tlestew. Neħemija ġab il-​Leviti kollha f’Ġerusalemm biex jiċċelebraw flimkien. Hu qasamhom f’żewġ korijiet. Huma telgħu fuq il-​ħajt mit-​taraġ tal-​Bieb l-​Għajn u mbagħad imxew lejn in-​naħat opposti madwar il-​belt. Daqqew it-​trumbetti, l-​arpi, u strumenti oħrajn u kantaw lil Ġeħova. Esdra mar maʼ grupp wieħed, u Neħemija m’ieħor, sakemm imbagħad iltaqgħu ħdejn it-​tempju. In-​nies kollha—irġiel, nisa, u tfal—offrew sagrifiċċji lil Ġeħova u ċċelebraw flimkien. Il-​kant ferrieħi tagħhom kien jinstemaʼ mill-​bogħod ħafna.