Tfittex Int Teżori Moħbija?

“Jalla l-​qalb tajba mhix mistħoqqa u l-​paċi jiżdidulkom b’għarfien eżatt t’Alla u taʼ Ġesù l-​Mulej tagħna.”—2 PIETRU 1:2.

1, 2. Liema fatturi jagħmlu d-​deheb taʼ valur għoli?

ID-​DEHEB għala jiswa tant flus? Mhux għajr metall artab, madankollu l-​valur tiegħu jitlaʼ għal mijiet taʼ dollari kull uqija. Veru, jistaʼ jinħadem faċilment u jifforma f’ornament attraenti fil-​għamla taʼ xi ċurkett jew brazzuletta. (1 Timotew 2:9; Ġakbu 2:2) Iżda, jekk tkun mitluf f’xi deżert, mejjet bil-​ġuħ u bil-​għatx, ma tistax tieklu jew tixorbu. F’dik iċ-​ċirkostanza ħobża jew platt ross b’xarba ilma jkunu jiswew bil-​wisq iżjed mid-​deheb.

² Għala, mela, id-​deheb għandu tant valur għoli? Ħaġa waħda hi għax hu rari u diffiċli biex jinkiseb. Per eżempju, meta l-​minjiera tad-​deheb Empire fit-​tramuntana tal-​California għalqet fl-​1957 għax ma baqgħetx tagħti profitt, il-​ħaddiema tal-​minjiera kienu qed iħaffru f’fond vertikali taʼ iktar minn 5,OOO pied iżda kellhom jinżlu żewġ mili djagonalment biex isibu d-​deheb. Sa dak il-​punt, il-​prezz għoli tad-​deheb kien jagħmel taʼ siwi l-​isforz kbir biex jibqgħu jfittxu għalih.

3. Liema teżor nistgħu nfittxu?

³ Aħna, iżda, nistgħu nħaffru għal xi ħaġa bil-​wisq iżjed taʼ valur mid-​deheb. X’inhi? Il-​għaref Sultan Salamun ta tweġiba xi 3,OOO sena ilu: “Jekk, iktar minn hekk, int issejjaħ għall-​fehma nfisha u int tagħti leħnek għad-​dehen innifsu, jekk int tibqaʼ tfittex għalih bħal kieku għall-​fidda, u bħal kieku għal teżori moħbija int tibqaʼ tfittex għalih, f’dak il-​każ int se tifhem il-​biżaʼ taʼJehovah, u int se ssib il-​għarfien innifsu t’Alla.” Immaġina bnedmin insinjifikanti jistgħu jsibu “l-​għarfien innifsu t’Alla”!—Proverbji 2:3-5.a

Għala Lkoll Ninħtieġu Għarfien Eżatt

4. L-​għarfien eżatt taʼ Kristjan x’għandu jinkludi?

⁴ Minn żmien Kristu, dak il-​għarfien essenzjali kiber biex jinkludi ħafna iżjed milli kien hemm disponibbli għal irġiel u nisa Ebrej lejali tal-​qedem. Bħalma esprimieha Pawlu: “Biex dak Alla tal-​Mulej tagħna Ġesù Kristu, il-​Missier tal-​glorja, jistaʼ jagħtikom spirtu taʼ ferħ u taʼ rivelazzjoni fil-​għarfien eżatt tiegħu; billi l-​għajnejn taʼ qalbkom ġew imdawlin, biex tistgħu tkunu tafu x’inhi t-​tama li għaliha sejħilkom, x’inhuma r-​rikkezzi glorjużi li hu jżomm bħala wirt għall-​qaddisin.”−Efesin 1:17, 18.

5. Il-​midlukin għala għandhom jagħtu attenzjoni kontinwa lill-​għarfien tagħhom dwar ir-​rieda t’Alla?

⁵ Lura f’dak iż-​żmien, dan kien parir dirett għall-​aħwa qaddisin u midlukin taʼ Kristu, u għadu hekk illum. Bħala l-​parti sekondarja taż-​“żerriegħa” tal-​wegħda, uħud bħal dawn huma miri speċjali għal twaqqiegħ spiritwali minn Satana. (Galatin 3:26-29; Efesin 6:11, 12) Uħud midlukin, b’mod speċjali, iridu jagħmlu s-​sejħa tagħhom ċerta billi ma jittraskurawx il-​għotja b’xejn tal-​ħniena mhix mistħoqqa t’Alla. Huwa għalhekk li huma jridu kontinwament isaħħu r-​riżorsi spiritwali tagħhom billi jġeddu l-​għarfien eżatt tagħhom dwar ir-​rieda u l-​Kelma t’Alla.—Efesin 3:7; Ebrej 6:4-6; 2 Pietru 1:9-12.

6. (a) Għala Ikoll kemm aħna ninħtieġu għarfien eżatt, minkejja jekk għandniex it-​tama għas-​sema jew għall-​art? (b) X’inhu meħtieġ biex takkwista għarfien eżatt?

⁶ Xi ngħidu dwar dawk li t-​tama tagħhom hi ħajja taʼ dejjem fuq

l-​art? Il-​għarfien eżatt għala hu vitali għalihom? Għaliex m’hemmx xi gradi differenti għall-​integrità Kristjana, bħal li kieku hemm xi livell ogħla għall-​midlukin, li għandhom it-​tama għas-​sema, minn dak għan-​ngħaġ oħra, li għandhom it-​tama għall-​art. (Ġwann 1O:16; 2 Pietru 3:13) Prinċipji Kristjani japplikaw ugwalment għal kulħadd. Minħabba f’dan, ilkoll kemm aħna għandna bżonn niċċarġjaw mill-​ġdid il-​batteriji spiritwali tagħna bil-​għarfien eżatt fuq bażi regulari. Iżda ħin u sforz huma nvoluti. Aħna rridu nieħdu sehem fi tħaffir spiritwali, bħal li kieku għal teżori moħbija.—Salm 105:4, 5.

Nixtru l-​Ħin Biex Inħaffru

7. (a) X’diffikultajiet jeżistu li jistgħu jżommuna lura milli nakkwistaw għarfien eżatt? (b) X’jistgħu jkunu l-​konsegwenzi taʼ traskuraġni spiritwali?

⁷ Il-​biċċa l-​kbira tan-​nies illum igħixu

ħajja mgħaġġla, u bħala Kristjani aħna nidhru li għandna iżjed x’nagħmlu minn oħrajn bl-​iskedi tagħna għal-​laqgħat tal-​Bibbja, servizz tal-​għalqa, xogħol sekulari, xogħol tad-​dar, xogħol tal-​iskola, u affarijiet oħra. Iżda, bħalma nsibu ħin kuljum biex nieklu, bl-​istess mod irridu nwarrbu ħin biex nitimgħu lil moħħna u lill-​ispiritwalità tagħna. Ma kinetx sempliċement xi rimarka vojta li għamel Ġesù meta kkwota Dewteronomju 8:3: “Hu miktub, ‘Il-​bniedem irid igħix mhux fuq il-​ħobż biss, iżda fuq kull ħaġa mitkellma li toħroġ minn fomm Jehovah.’” (Mattew 4:4) Jekk nittraskuraw l-​ispiritwalità tagħna, aħna nittraskuraw il-​valuri spiritwali tagħna u t-​tama tagħna għall-​futur. Imbagħad nistgħu nibdew niżolqu u nitħarrku. Għalhekk kif nistgħu nagħmlu l-​ħin għal studju persunali u regulari tal-​Bibbja?

8. Liema parir Skritturali jagħtina perspettiva xierqa rigward studju persunali?

⁸ Il-​kliem tal-​appostlu Pawlu kien xieraq ħafna: “Żommu għassa stretta li kif timxu ma hux bla għaqal imma bħal persuni għaqlin, billi tixtru ż-​żmien opportun għalikom infuskom, għaliex il-​jiem huma mill-​agħar. Minħabba f’dan ieqfu milli ssiru bla raġuni, imma ibqgħu araw x’inhi r-​rieda taʼ Jehovah.” Aħna nistgħu naraw x’inhi r-​rieda taʼ Jehovah biss jekk nagħtu kas tal-​Kelma tiegħu permezz tal-​istudju persunali tagħna. U dak ifisser li aħna rridu ‘nixtru ż-​żmien opportun’ jew‘nagħmlu l-​aħjar użu mill-​ħin tagħna.’—Efesin 5:15-17; Phillips.

9. Fejn nistgħu qed nitilfu l-​ħin li jistaʼ jinfeda għal studju persunali? Agħti xi esperjenzi persunali.

⁹ Jekk nanalizzaw l-​attivitajiet tagħna li m’humiex essenzjali taʼ kuljum, kif insibu li nqattgħu l-​biċċa l-​kbira mill-​ħin liberu tagħna? Huwa quddiem is-​sett tat-​televiżjoni? Dak l-​apparat li jippnotizza jistaʼ jisirqilna xejn anqas minn tnejn sa’ ħames sigħat kull fil-​għaxija minn ħajjitna! Kemm-il siegħa kuljum tqattaʼ int personalment tara t-​televiżjoni? Taʼ spiss, dak li jiġi ppreżentat, bl-​enfasi tiegħu fuq il-​vjolenza u s-​sess, hu degradanti. U taʼ spiss huwa mfassal biex jappella għax-​“xewqa tal-​laħam u x-​xewqa tal-​għajnejn u li wieħed jiffanfra bil-​mezzi tal-​ħajja.” (1 Ġwann 2:15-17) Iżda, ħafna jonqoshom il-​kontroll fuqhom infushom biex jitfu t-​televiżjoni. Iva, din l-​invenzjoni moderna tistaʼ taħlilna l-​iktar oġġett prezzjuż tagħna, il-​ħin.

10. Għala hu daqstant importanti llum li nużaw il-​ħin tagħna bil-​għaqal?

¹⁰ Jekk inkunu onesti magħna nfusna, nagħrfu li normalment huwa possibbli li nifdu xi ħin għal attivitajiet essenzjali bħalma hu l-​istudju tal-​Bibbja. U studju persunali tal-​Bibbja li jwassal għal għarfien eżatt huwa essenzjali għal Kristjan f’dawn iż-​żminijiet kritiċi. Iżda, b’iktar minn 41,000 uħud li ġew maqtugħin mis-​sħubija fl-​1988, huwa ċar li ħafna aħwa rġiel u nisa ttraskuraw l-​ispiritwalità tagħhom. Li nilbsu u nżommu “l-​libsa tal-​ħadid sħiħa mingħand Alla” mhux sempliċement xi eżerċizzju taʼ kafkaf. Saħansitra bħal fil-​każ taʼ suldat liebes armar litterali, huwa dover taʼ kuljum.—Efesin 6:10-18; Rumani 1:28-32; 2 Timotew 3:1.

11. Liema eżempju tforni l-​familja Betel f’li tkun organizzata għal studju tal-​familja?

¹¹ Madwar id-​dinja l-​iktar minn 9,000 membri tal-​95 familji Betel fl-​uffiċċji tal-​fergħat tal-​Watch Tower Society ikollhom l-​istudju tal-​familja kull nhar taʼ Tnejn fil-​għaxija. Huma jistudjaw it-​Torri tal-​Għassa bi tħejjija għal-​laqgħat taʼ tmiem il-​ġimgħa, u f’ħafna okkażjonijiet ikollhom ukoll xi taħdita fuq il-​Bibbja jew xi sessjoni bħala klassi għall-​membri ġodda tal-​familja. Iva, nhar taʼ Tnejn tinżamm il-​lejla taʼ studju tal-​familja Betel madwar id-​dinja. Meta hu l-​perijodu taʼ studju persunali jew tal-​familja tiegħek?—Ebrej 10:24, 25.

Għodod u Kif Tużahom

12. Liema huma xi ftit mill-​fatturi taʼ studju li jispikkaw fin-​New World Translation of the Holy Scriptures—With References?

¹² Bħalma ħaddiem tal-​minjieri għandu għodod għas-​sengħa tiegħu, l-​istess aħna għandna għodod li bihom inħaffru fil-​minjiera tad-​deheb tal-​Kelma t’Alla. Ikkunsidra, per eżempju, lin-​New World Translation of the Holy Scriptures—With References. Fil-​preżent hija ppubblikata bl-​Olandiż, bl-​Ingliż, bil-​Franċiż, bil-​Ġermaniż, bil-​Ġappuniż, bil-​Portugiż, u bl-​Ispanjol. Għalhekk, il-​biċċa l-​kbira mix-​Xhieda taʼ Jehovah għandhom disponibbli għodda meraviljuża biex jakkwistaw għarfien eżatt tal-​veru Alla. Din l-​edizzjoni tal-​Bibbja tinkludi eluf taʼ referenzi marġinali u noti taʼ taħt abbundanti. Għandha wkoll appendiċi taʼ 36 paġna b’informazzjoni dettaljata dwar varjetà taʼ mistoqsijiet Bibliċi importanti.b

13. Liema fatti interessanti huma ppreżentati rigward l-​użu taʼ “għarfien” u “għarfien eżatt” fl-​Iskrittura Ebrajka u fl-​Iskrittura Griega?

¹³ Fuq wara, ir-​Reference Bible għandha lista taʼ kliem prinċipali, “Bible Words Indexed.” Kif nistgħu nużaw dan? Jekk tiċċekkja l-​kopja tiegħek għall-​espressjoni “accurate knowledge” (“għarfien eżatt”), int se ssib għaxar testi fil-​lista. Iżda l-​ebda wieħed minn dawn ma hu mill-​Iskrittura Ebrajka. Ifisser dan li l-​Iskrittura Ebrajka ma tenfasizzax il-​ħtieġa għal għarfien bħal dan? Le. Għax taħt il-​kelma “knowledge” (“għarfien”), hemm 24 referenza, inklużi 18 mill-​Iskrittura Ebrajka. Madankollu, il-​lingwa Ebrajka m’għandhiex kelma speċjali għal “għarfien eżatt.” Mela, kif se tara mir-​referenzi, hija xi drabi tenfasizza l-​bżonn għal iktar minn sempliċi għarfien ġenerali billi tgħaqqad “għarfien” maʼ kelmiet bħal “dehen” (“discernment,” “insight”) jew titkellem dwar il-​għarfien bħala li hu “abbundanti.”−Danjel 1:4; 12:4; Ġeremija 3:15.

14. X’punti interessanti hemm fl-​Insight on the Scriptures taħt “għarfien”?

¹⁴ Kif tgħallimna fl-​artiklu taʼ qabel, il-​Grieg Bibliku kien iġorr differenza sottili bejn iż-​żewġ gradi taʼ għarfien. U jekk inħaffru, aħna rridu nafu iżjed dwar id-​differenza bejn dawn iż-​żewġ espressjonijiet hekk kif japplikaw għall-​Kristjani. Għala l-​għarfien, gno’sis, u l-​għarfien eżatt, e·pi’gno·sis, huma essenzjali għall-​Kristjani? Fejn nistgħu nsibu t-​tweġiba? Fl-​enċiklopedija Biblika Insight on the Scriptures. X’kamra taʼ teżor huma dawn il-​volumi! Fittex għat-​titlu “Għarfien.” Hemm se ssib artiklu komplet dwar it-​termini li qed nikkunsidraw u dwar l-​attributi relatati għerf, fehma, dehen, u abbiltà tal-​ħsieb. U sibna dan id-​“deheb” kollu, din l-​informazzjoni, sempliċement billi wżajna ftit għajnuniet taʼ studju Bibliku! Iżda hemm iżjed.—Salm 19:9, 10.

15. X’għodod oħra taʼ riċerka għandna, u kif jistgħu jintużaw?

¹⁵ Jekk irridu nsegwu studju iżjed estensiv dwar il-​“għarfien” u termini relatati, nistgħu nużaw l-​Indiċi tal-​pubblikazzjonijiet tal-​Watch Tower Society, li huma disponibbli f’għadd taʼ lingwi. U bħalma segwejna t-​tema taʼ għarfien, int tistaʼ ssegwi l-​istess proċedura għal mijiet taʼ suġġetti oħra. Immaġina x’għana taʼ informazzjoni taħt isem Jehovah! X’abbundanza taʼ għarfien eżatt hemm dwar il-​Mulej Sovran tal-​univers!—Salm 68:19, 20; Atti 4:24.

16. X’tgħid l-​Iskrittura rigward tfittix?

¹⁶ Permezz taʼ dawn u għajnuniet taʼ studju oħra ppubblikati mill-​Watch Tower Bible and Tract Society, xi ġmiel taʼ “teżori moħbija” nistgħu nsibu! Tridu int id-​“deheb”? Tqisu int bħala li hu taʼ siwi? Se tagħmel il-​ħin biex tħaffer għalih?—Proverbji 2:1-5.

Min Jieħu l-​Inizzjattiva fit-​Tħaffir Spiritwali?

17. X’għandna nagħmlu biex nakkwistaw għarfien dwar Alla u Kristu?

¹⁷ X’inhu l-​muftieħ biex jinkiseb dan il-​għarfien prezzjuż dwar Alla u Kristu? Il-​motivazzjoni—xenqa biex ikollok qagħda approvata maʼ Jehovah u Ibnu u xewqa biex tirċievi r-​rigal taʼ ħajja taʼ dejjem. Ġesù poġġieha hekk: “Ibqgħu staqsu, u se jingħatalkom; ibqgħu fittxu, u se ssibu; ibqgħu ħabbtu, u se jinfetħilkom. Għax kulmin jistaqsi jirċievi, u kulmin ifittex isib, u lil kulmin iħabbat se jinfetaħlu.” Iżda nnota l-​kundizzjoni. Ġesù qal,‘Ibqgħu staqsu, fittxu, u ħabbtu.’ Mhix xi ħaġa taʼ darba. It-​tfitxija għal għarfien trid tkun persistenti.—Mattew 5:6; 7:7, 8.

18. Ġo familja, min għandu jieħu l-​inizzjattiva f’li jfittex għarfien eżatt, u għala?

¹⁸ Ġo familja Kristjana, min għandu jieħu l-​inizzjattiva f’li jħaffer għal għarfien eżatt? Pawlu jwieġeb: “Intom, missirijiet, toqogħdux iddejqu lil uliedkom, imma ibqgħu rabbuhom fid-​dixxiplina u r-​regolar mentali taʼ Jehovah.” Iva, il-​ġenituri, b’mod speċjali l-​missier, għandhom jieħdu l-​inizzjattiva f’li juru apprezzament għal valuri spiritwali. U dak ifakkarna għal darb’oħra dwar il-​bżonn għal arranġament regulari li l-​familja tistaʼ tistenna u tfittex għalih bil-​ħerqa.—Efesin 6:4.

19. Perijodi taʼ studju mal-​familja kif jistgħu jintgħamlu interessanti? X’inhi l-​esperjenza tal-​familja tiegħek?

¹⁹ Perijodi taʼ studju mal-​familja jistgħu jintgħamlu interessanti. Per eżempju, jekk għandek it-​tfal, għala ma ġġagħalhomx jagħżlu tema u mbagħad tqabbadhom jagħmlu riċerka f’pubblikazzjonijiet differenti skond l-​età u l-​abbiltà tagħhom. Imbagħad wara xi nofs siegħa, inġabru flimkien u araw kull wieħed x’ikun sab fuq is-​suġġett magħżul. Jekk għandkom Concordance, wieħed żgħir jistaʼ jgħodd kemm-il darba ċerta kelma tidher fl-​Iskrittura Ebrajka u fl-​Iskrittura Griega. Forsi tfajjel akbar jistaʼ jfittex xi ġemmi mill-​volumi tal-​Insight. Il-​ġenituri jafu sa fejn kapaċi jaslu wliedhom u l-​firxa tal-​attenzjoni tagħhom u għandhom jibnu s-​sessjoni madwar dawn il-​fatturi. Kun flessibbli u uri apprezzament. Inkuraġġixxi lill-​familja tiegħek fit-​tħaffir spiritwali tagħhom—u żomm il-​mottiv xieraq.

Thaffir bil-​Mottiv Xieraq

20. Liema mottiv żbaljat għandna nevitaw fl-​istudju persunali tagħna?

²⁰ Il-​modestja hija virtù Kristjana. (Proverbji 11:2; 1 Timotew 2:9) Għandna, mela, nistudjaw biex niftaħru b’dak li tgħallimna? Jew għandna nagħmlu wirja pubblika tal-​għarfien tagħna u forsi nimbarazzaw lil oħrajn għax huma injoranti? Jew għandna nipproklamaw l-​interpretazzjonijiet u l-​ispekulazzjonijiet tagħna stess? Pawlu wissa: “Għax permezz tal-​ħniena mhix mistħoqqa mogħtija lili jiena ngħid lil kull wieħed li hemm fostkom biex ma jaħsibx fuqu nnifsu iktar milli hu meħtieġ li jaħseb; imma jaħseb biex ikollu moħħ f’siktu, kull wieħed bħalma Alla qassamlu qies tal-​fidi.”−Rumani 12:3.

21, 22. Kif għandu jeffettwana l-​għarfien eżatt tagħna?

²¹ Sforz ħerqan u li napplikaw il-​għarfien eżatt jistaʼ jwassal għal fidi, virtù, rażna tagħna nfusna, sabar fit-​tul, devozzjoni lejn Alla, affezzjoni lejn ħutna, u mħabba. Pietru wera l-​importanza taʼ dawn meta kiteb: “Għax jekk dawn l-​affarijiet jeżistu fikom u jfuru, mhux se jħallukom tkunu bla xogħol jew bla frott dwar il-​għarfien eżatt tal-​Mulej tagħna Ġesù Kristu.”—2 Pietru 1:2-8.

²² Il-​għarfien tagħna għandu jeffettwa lill-​qalb. Għandu jqanqalna biex nuru mħabba lejn Alla u lejn għajrna u biex insiru Kristjani produttivi fil-​kondotta u fil-​ministeru tagħna. Dan se jirriżulta f’għaqda u fehma iktar bis-​sħiħ tal-​eżempju taʼ Kristu. (Efesin 4:13) Xi premju mill-​aħjar talli nfittxu teżori moħbija!

[Noti taʼ taħt]

Mistoqsijiet Biex Tirrifletti Fuqhom

◻ Skond is-​Sultan Salamun, x’inhu iżjed taʼ valur minn teżori moħbija?

◻ Għarfien eżatt għala huwa vitali għall-​midiukin u għan-​ngħaġ l-​oħra?

◻ Kif nistgħu nixtru l-​ħin għal studju persunali?

◻ Liema għodod speċjali għandna biex inħaffru għal għarfien eżatt?

◻ Min għandu jieħu l-​inizzjattiva fl-​istudju mal-​familja, u b’liema mottiv għandna nistudjaw?