Neżerċitaw Fidi għall-​Ħajja taʼ Dejjem

“Għandna fidi li żżomm lir-​ruħ ħajja.”—EBREJ 10:39.

1. Enċiklopedija Kattolika x’tirrikonoxxi dwar l-​użu mill-​Bibbja tal-​kelma “ruħ”?

IL-​BIBBJA mkien ma tgħid li l-​bnedmin għandhom ruħ immortali li tibqaʼ ħajja wara l-​mewt tal-​ġisem u tibqaʼ tgħix għal dejjem fil-​qasam tal-​ispirti. Saħansitra n-​New Catholic Encyclopedia tirrikonoxxi: “L-​ideja li r-​ruħ tibqaʼ ħajja wara l-​mewt ma tagħrafhiex faċilment fil-​Bibbja. . . . Ir-​ruħ fit-​T[estment il-​]Q[adim] ma tfissirx parti mill-​bniedem, imma l-​bniedem kollu kemm hu—il-​bniedem bħala ħlejqa ħajja. B’mod simili, fit-​T[estment il-​]Ġ[did] tissinjifika l-​ħajja umana: il-​ħajja taʼ individwu.” Mela l-​bnedmin m’għandhomx erwieħ, huma erwieħ.

2. (a) Fejn oriġina t-​twemmin tar-​ruħ immortali? (b) X’inhi l-​verità dwar il-​kundizzjoni tal-​bniedem wara l-​mewt?

² Kif wera l-​artiklu taʼ qabel, it-​twemmin fir-​ruħ immortali hu kunċett pagan li jistaʼ jiġi segwit lura lejn żminijiet storiċi bikrin. L-​awtur tiegħu hu dak il-​wieħed li kkontradixxa d-​dikjarazzjoni ċara t’Alla li l-​bniedem kien ‘żgur li jmut’ minħabba d-​diżubbidjenza. (Ġenesi 2:17) Kien l-​opponent, Satana x-​Xitan, li qal: “Intom żgur li ma tmutux.” (Ġenesi 3:4) U dik kienet gidba. (Ġwann 8:44) Iktar tard, Satana avanza d-​duttrina tal-​immortalità tar-​ruħ umana. Imma l-​verità dwar il-​kundizzjoni tal-​bniedem wara l-​mewt hi bħalma tinnota l-​Kelma mnebbħa t’Alla f’Ekkleżjasti 9:5: “Il-​mejtin . . . m’huma konxji taʼ xejn affattu.”−Ara wkoll Rumani 5:12.

It-​Tama taʼ Ħajja Eterna

3. Rigward liema tama l-​Bibbja għandha ħafna xi tgħid?

³ Fil-​waqt li l-​Bibbja turi b’mod ċar li ma hemmx ruħ immortali, hi għandha ħafna xi tgħid dwar ħajja eterna. It-​tama taʼ ħajja bla tmiem kienet tagħlim fundamentali taʼ Ġesù. Hu qal: “Dan ifisser il-​ħajja taʼdejjem, li jieħdu għarfien dwarek, l-​uniku veru Alla, u dwar dak li inti bgħatt, Ġesù Kristu.” (Ġwann 17:3) Rigward dawk li jeżerċitaw fidi f’Alla u fi Kristu, Ġesù stqarr: “Jien nagħtihom il-​ħajja taʼ dejjem.” (Ġwann 10:28) B’fiduċja assoluta, hu qal: “Dak li jemmen għandu l-​ħajja taʼ dejjem. . . . Se jgħix għal dejjem.” (Ġwann 6:47, 51) U ddikjara wkoll: “Alla tant ħabb lid-​dinja li ta l-​Iben uniġenitu tiegħu, sabiex kulmin jeżerċita fidi fih jistaʼ ma jinqeridx imma jkollu l-​ħajja taʼ dejjem.”−Ġwann 3:16.

4. Ġesù x’qal dwar it-​tama għall-​futur?

⁴ Ladarba m’hemmx ruħ immortali li tibqaʼ ħajja wara l-​mewt, kif se titwettaq il-​wegħda tal-​Bibbja taʼ ħajja eterna? Ġesù ta iżjed informazzjoni dwar dan meta hu żar lil Marta u Marija wara li ħuhom Lażżru kien miet. Hu qal lil Marta: “Jien hu l-​irxoxt u l-​ħajja. Min jeżerċita fidi fija, saħansitra għalkemm imut, se jieħu l-​ħajja.” Hu staqsa lil Marta: “Temmnu dan?” Hi wieġbet: “Iva, Mulej; jien emmint li inti l-​Kristu l-​Iben t’Alla.”−Ġwann 11:25-27.

5, 6. X’wera l-​qawmien taʼ Lażżru lura għall-​ħajja minn Ġesù?

⁵ Biex juri li hu, bħala l-​Iben t’Alla, kien ġie mogħti l-​qawwa biex iqajjem lill-​mejtin lura għall-​ħajja, Ġesù mar fejn il-​qabar taʼ Lażżru. Lażżru kien ilu mejjet erbat ijiem, u ġismu kien beda jitħassar. Minkejja dan “[Ġesù] għajjat b’leħen qawwi: ‘Lażżru, oħroġ!’ Ir-​raġel li kien mejjet ħareġ b’saqajh u jdejh marbutin bil-​faxex, u wiċċu kien marbut b’ċarruta. Qalilhom Ġesù: ‘Ħolluh u ħalluh imur.’” (Ġwann 11:43, 44) Il-​mejjet Lażżru kien inġab lura għall-​ħajja!

⁶ Lażżru ma nġabx lura mis-​sema jew minn xi mkien ieħor fil-​qasam tal-​ispirti. Ma kienx mar fil-​qasam tal-​ispirti meta miet imma kien bla ħajja fil-​qabar, fejn jinsabu l-​mejtin kollha. (Salm 146:4; Ġwann 3:13; Atti 2:34) Ma jagħmilx sens li taħseb li r-​ruħ immortali taʼ Lażżru kienet qed tgawdi hena tas-​sema u mbagħad dik ir-​ruħ inħatfet mis-​sema biex tiġi magħquda mill-​ġdid mal-​ġisem imperfett tiegħu fuq l-​art biex igħix għal darb’oħra f’dinja mimlija bi tbatija, mard, u mewt. Imma ladarba ma kienx fis-​sema, ir-​restawrazzjoni tiegħu għall-​ħajja kienet milqugħa, għax kienet tfisser iżjed snin taʼ eżistenza għalih u li jingħaqad mill-​ġdid mal-​maħbubin tiegħu. Iktar tard, kien se jmut għal darb’oħra.

7, 8. (a) F’liema okkażjonijiet oħra Ġesù qajjem lill-​mejtin? (b) Ġesù għala wettaq dawk il-​mirakli taʼ restawrar taʼ persuni għall-​ħajja?

⁷ Meta Ġesù qajjem tifla żgħira li kienet mejta, il-​ġenituri tagħha “ntilfu f’estasi kbir.” (Mark 5:42) Madankollu, dik it-​tifla wkoll eventwalment reġgħet mietet. Meta Ġesù qajjem l-​iben mejjet tal-​armla taʼ Najin, “il-​biżaʼ ħakimhom ilkoll, u huma bdew jigglorifikaw lil Alla.” (Luqa 7:16) Imma dak ir-​raġel ukoll miet eventwalment. Rigward dawn il-​mirakli, The New International Dictionary of New Testament Theology jafferma: “Dawk li ġew imqajmin minn Kristu fil-​ministeru tiegħu fuq l-​art kellhom imutu, għax dawn il-​qawmiet ma tawx l-​immortalità.”

⁸ Ġesù għala qajjem lil dawn l-​uħud mill-​mewt? Mhux biex jagħtihom ħajja taʼ dejjem f’dak iż-​żmien, imma biex juri li kien il-​Messija u biex juri x’qawwa kien tah Alla biex jagħmel. Dan bena fidi fit-​tama tal-​irxoxt u taʼ ħajja eterna taħt it-​tmexxija futura tas-​Saltna tas-​sema t’Alla f’idejn Kristu.—Mattew 6:9, 10; Ġwann 11:41, 42.

9. Marta u Pawlu kif fehmu b’mod korrett it-​tagħlim taʼ Ġesù dwar it-​tama tal-​irxoxt?

⁹ Marta kienet taf dwar dik it-​tama mis-​sħubija tagħha maʼ Ġesù, għax hi qabel kienet qaltlu rigward Lażżru: “Naf li se jqum fl-​irxoxt fl-​aħħar jum.” (Ġwann 11:24) Hi kienet taf li l-​irxoxt kellu jsir, mhux fl-​aħħar jum tiegħu (taʼ Lażżru), imma fil-​futur, f’“l-​aħhar jum”−Jum il-​Ġudizzju, meta l-​mejtin se jiġu mqajmin taħt it-​tmexxija tas-​Saltna t’Alla. L-​appostlu Pawlu dan kien jafu wkoll, għax hu qal: “[Alla] waqqaf jum li fih bi ħsiebu jiġġudika lill-​art abitata fit-​tjieba.” (Atti 17:31) Pawlu qal ukoll: “Se jkun hemm irxoxt kemm tat-​twajbin u kemm taʼ dawk li m’humiex twajbin.” (Atti 24:15) Hu ma qalx li l-​irxoxt kien diġà qed iseħħ imma li “se jkun hemm” fil-​futur—taħt tmexxija tas-​Saltna.

10. X’kumment jagħmel professur Franċiż fuq it-​twemmin tal-​Kristjaneżmu dwar l-​irxoxt kif jiġi mqabbel mat-​tagħlim ċar tal-​Bibbja?

¹⁰ Fil-​ktieb Immortality of the Soul or Resurrection of the Dead? il-​professur Protestant Franċiż Oscar Cullmann jikteb: “Hemm differenza radikali bejn l-​istennija Kristjana tal-​irxoxt tal-​mejtin u t-​twemmin Grieg fl-​immortalità tar-​ruħ. . . . Għalkemm il-​Kristjanità iktar tard stabbiliet rabta bejn dawn iż-​żewġ twemmin, u llum il-​Kristjan komuni jħawwadhom għalkollox, jien ma nara l-​ebda raġuni biex naħbi dak li jien u l-​maġġoranza tal-​istudjużi nikkunsidraw li hi l-​verità. . . . Il-​ħajja u l-​ħsieb tat-​Testment il-​Ġdid huma totalment iddominati minn fidi fl-​irxoxt. . . . Il-​bniedem sħiħ, li hu verament mejjet, jinġab lura għall-​ħajja b’att kreattiv ġdid t’Alla.”

Irxoxt—Fejn?

11, 12. (a) X’inhu l-​għan t’Alla għall-​bnedmin u għal din l-​art? (b) Ġesù kif wera li l-​għan t’Alla għall-​art ma tbiddilx?

¹¹ Meta Alla ħalaq il-​bnedmin, hu tahom l-​art bħala d-​dar eterna tagħhom u kellu l-​iskop li jimla din il-​pjaneta b’razza taʼ nies twajbin. (Ġenesi 1:26-28; Salm 115:16) Il-​Bibbja titkellem dwar Jehovah bħala “Dak li sawwar l-​art u Dak li għamilha, Hu Dak li waqqafha fis-​sod, li ma ħalaqhiex sempliċement għal xejn, li sawwarha saħansitra biex tkun abitata.”−Isaija 45:18.

¹² Minkejja eluf taʼ snin taʼ imperfezzjoni u mewt mill-​irvell tal-​bniedem ’il hawn, xorta waħda għadu l-​iskop t’Alla li l-​art tkun id-​dar eterna tal-​bniedem: “It-​twajbin infushom se jkollhom l-​art, u se jgħammru għal dejjem fuqha.” (Salm 37:29) “Henjin huma l-​kalmi, ladarba se jirtu l-​art.” (Mattew 5:5) B’hekk, meta Ġesù ġab lura wħud mejtin lejn il-​ħajja, hu qajjimhom hawn stess fuq l-​art, u mill-​ewwel intgħarfu minn oħrajn bħala l-​individwi li kienu mietu. Dan ikkonferma li taħt tmexxija tas-​Saltna l-​mejtin se jinġiebu lura għall-​ħajja fuq l-​art biex ikollhom l-​opportunità biex igħixu fuqha għal dejjem. (Rivelazzjoni 20:12, 13) Dan se jwettaq il-​għan t’Alla għall-​bnedmin u għall-​art.—Isaija 46:9-11; 55:11; Titus 1:1, 2.

13. Xi problema tiffaċċja lill-​knejjes tal-​Kristjaneżmu, u kif jippruvaw isolvuha?

¹³ Madankollu, ladarba l-​knejjes tal-​Kristjaneżmu jemmnu fl-​immortalità tar-​ruħ, dan jippreżentalhom problema: Kif jistgħu jirrikonċiljaw l-​irxoxt tal-​“bniedem sħiħ,” kif intwera minn Ġesù, mat-​twemmin tagħhom f’ruħ immortali li diġà teżisti fis-​sema jew fl-​infern? The Catholic Encyclopedia tinsisti: “Ir-​Rabaʼ Konċilju Lateran igħallem li l-​bnedmin kollha, kemm magħżulin jew ikkundannati, ‘se jqumu mill-​ġdid bl-​istess iġsma tagħhom li issa jġorru magħhom.’” Hija żżid: “Ladarba l-​ġisem huwa l-​imsieħeb tal-​atti kriminali tar-​ruħ, u l-​ħabib tal-​virtujiet tagħha, il-​ġustizzja t’Alla donnha li titlob li l-​ġisem jieħu sehem fil-​kastig u fil-​premju tar-​ruħ.” Skond dan it-​twemmin, il-​ġisem se jingħaqad mill-​ġdid mar-​ruħ fis-​sema jew fl-​infern. Għal kemm żmien? “L-​iġsma mqajmin kemm tal-​qaddisin kif ukoll tal-​midinbin se jitlibbsu bl-​immortalità,” jistqarr dak is-​sors.

14. Kittieb Ġiżwita kif jipprova jiċċara l-​ħarsa tal-​Kristjaneżmu dwar l-​irxoxt tal-​ġisem?

¹⁴ Fil-​ktieb The Future Life, mill-​Ġiżwita J. C. Sasia, naqraw: “Il-​ħajja fis-​sema għalhekk se tkun waħda taʼ pjaċiri wkoll permezz tas-​sensi gglorifikati [tal-ġisem li jerġaʼ jingħaqad mar-​ruħ].” Rigward iġsma li jerġgħu jingħaqdu mal-​erwieħ tagħhom fl-​infern, dak is-​sors igħid: “Fl-​infern, wara l-​irxoxt [tal-ġisem], kull wieħed mis-​sensi tal-​ġisem uman se jkollu l-​kastig partikulari tiegħu . . . Is-​sens tal-​mess se jiġi b’mod speċjali tturmentat, għaliex huwa b’mod partikulari bid-​dnubiet tal-​laħam li l-​ikkundannati offendew lil Alla. . . . L-​isħubija tagħhom mal-​iġsma tagħhom se tkun għalihom kawża taʼ turmenti u miżerji miżjudin.”

15. Għala hija dawgħa li tgħallem li Alla jittortura lin-​nies fl-​infern għal dejjem?

¹⁵ B’hekk, li aċċetta l-​kunċett pagan tal-​immortalità tar-​ruħ ħejja t-​triq għall-​Kristjaneżmu biex jaċċetta wkoll il-​kunċett pagan tat-​tortura taʼ moħqrija tal-​erwieħ—u anki l-​iġsma—fl-​infern għal dejjem. Madankollu, rigward id-​drawwa antika li jaħarqu t-​tfal bħala sagrifiċċju lil allat foloz Jehovah stqarr: “Huma . . . jaħarqu lil uliedhom subien fin-​nar bħala offerti maħruqin sħaħ lil Baal, xi ħaġa li jien ma kkmandajtx jew tkellimt dwarha, u li ma telgħetx f’qalbi.” (Ġeremija 19:5) Mela hija dawgħa li tgħallem li Alla jittortura lin-​nies għall-​eternita, meta l-​Kelma tiegħu stess turi b’mod ċar li dawk li jagħmlu l-​ħażen bla ma jindmu se jiġu meqrudin, ma jibqgħux jeżistu. “Kull ruħ li ma tismax minn dak il-​Profeta [Ġesù] se tħun meqruda għalkollox.”−Atti 3:23; ara wkoll Mattew 10:28; Luqa 17:27. Ġwann 3:16; 2 Pietru 2:12; Ġuda 5.

Immortalità

16. X’tgħallem il-​Bibbja dwar l-​immortalità?

¹⁶ Madankollu, ma tgħallimx il-​Bibbja li bnedmin se jittieħdu fis-​sema biex igħixu ħajjiet immortali hemm? Iva, veru. Imma dan m’għandux x’jaqsam maʼ erwieħ umani immortali. L-​immortalità tirriżulta milli persuna tiġi rxoxtata bħala ħolqien spirtu (bħalma kien Ġesù) u mhux għax wieħed għandu ruħ immortali li baqgħet tgħix wara l-​mewt. Il-​premju futur tal-​immortalità ġie offrut lil xi bnedmin lejali, li huma bħal Kristu, u kellu jinkiseb biss meta Kristu jieħu l-​qawwa tas-​Saltna fis-​sema, mhux immedjatament wara li Kristu telaʼ fis-​sema fl-​ewwel seklu.—Salm 110:1; 1 Korintin 15:53, 54.

17. Kemm hemm li se jiksbu l-​immortalità, u x’parti għandhom fil-​għan t’Alla għall-​art?

¹⁷ Barra minn dan, dik it-​tama ġiet offruta lil relattivament ftit mill-​familja umana. Ġesù sejjaħ lil dawn “merħla ċkejkna.” (Luqa 12:32) Dan il-​grupp, 144,000 fil-​għadd, jiġi rxoxtat għal ħajja fis-​sema bħala ħlejjaq spirti immortali biex imexxu għal fuq l-​art maʼ Kristu fis-​Saltna tas-​sema tiegħu. (2 Pietru 3:13; Rivelazzjoni 7:4; 14:1, 4; 20:4) L-​art li se jaħkmu għal fuqha se tkun abitata, maż-​żmien, minn bnedmin li jkunu ntgħamlu perfetti, bla dubju eluf taʼ miljuni minnhom. Ħafna minn dawk il-​bnedmin se jkunu dawk li jiġu lura fuq l-​art fl-​“irxoxt kemm tat-​twajbin u kemm taʼ dawk li m’humiex twajbin.” (Atti 24:15) Madankollu, se jkun hemm oħrajn li jaqilgħu l-​ħajja fid-​dinja l-​ġdida minbarra dawk irxoxtati mill-​mewt. Min huma dawn l-​oħrajn?

“Ma Se Jmutu Qatt Assolutament”

18. Minbarra t-​tama tal-​irxoxt għal nies mejta liema ħaġa tal-​għaġeb bassar Ġesù?

¹⁸ Fil-​waqt li t-​tama żgura għal bnedmin mejta hija l-​irxoxt, hemm tama meraviljuża oħra fi żmienna. Għandha x’taqsam maʼ dak li Ġesù issokta jgħid lil Marta. Wara li qal: “Min jeżerċita fidi fija, saħansitra għalkemm imut, se jieħu l-​ħajja [fl-irxoxt],” Ġesù żied, “u kulmin qiegħed igħix u jeżerċita fidi fija ma se jmut qatt assolutament.” (Ġwann 11:25, 26) F’din l-​istqarrija taʼ l-​aħħar, Ġesù ħabbar ħaġa tal-​għaġeb: Kellu jiġi żmien meta nies li jkunu qed igħixu mhux se jkollhom għalfejn imutu! Imma meta kellu jiġri dan?

19. (a) Matul liema perijodu taʼ żmien kellha titwettaq it-​tama taʼ li ma tmut qatt? (b) Il-​Bibbja kif tiddeskrivi lil dawk li għandhom it-​tama li ma jmutu qatt?

¹⁹ Issa—fi żmienna—hu ż-​żmien meta dik il-​wegħda se titwettaq! L-​evidenza kollha turi li aħna qegħdin qrib ħafna tat-​tmiem taʼ din id-​dinja mill-​agħar. (Mattew 24:3-14; 2 Timotew 3:l-5, 13) B’hekk, nies li llum jeżerċitaw fidi f’Alla u f’Ibnu għandhom it-​tama eċċitanti li jibqgħu ħajjin fit-​tmiem taʼ din is-​sistema u jibqgħu jgħixu għal ġod-​dinja l-​ġdida t’Alla—billi ma jmutu qatt! Dawn jissemmew f’Rivelazzjoni 7:9, 14 bħala “folla kbira, li l-​ebda bniedem ma setaʼ jgħodd, mill-​ġnus u t-​tribujiet u l-​popli u l-​ilsna kollha . . . li joħorġu mit-​tribulazzjoni l-​kbira,” imħarsa minn Alla għaliex eżerċitaw fidi. Ġesù tkellem dwar il-​qerda li ġejja taʼ din is-​sistema preżenti mill-​agħar bħala “tribulazzjoni kbira li bħalha ma ġratx sa mill-​bidu tad-​dinja s’issa, le, lanqas ma se terġaʼ tiġri.”−Mattew 24:21; ara wkoll Proverbji 2:21, 22; Salm 37:10, 11, 34.

20, 21. Miljuni llum kif qed jeżerċitaw fidi f’Alla u fi Kristu, u ħafna minnhom x’mhux se jkollhom bżonn?

²⁰ Mad-​dinja kollha, miljuni mill-​folla kbira li jridu jgħixu għal dejjem fuq l-​art diġà qed jeżerċitaw fidi fil-​wegħdiet t’Alla u f’dak il-​wieħed li hu awtorizza biex ikun “l-​irxoxt u l-​ħajja,” Ġesù Kristu. U huma ddedikaw lilhom infushom lil Alla, billi ssimbolizzaw dan bil-​magħmudija tal-​ilma. (Mattew 28:19, 20) Huma jirrikonoxxu li jafu s-​salvazzjoni tagħhom kompletament “lil Alla . . . , li qiegħed bil-​qiegħda fuq it-​tron, u lill-​Ħaruf,” Ġesù Kristu.—Rivelazzjoni 7:10.

²¹ Dawk mill-​folla kbira li jibqgħu ħajjin fit-​tmiem taʼ din id-​dinja ma jkollhomx bżonn taʼ rxoxt mill-​imwiet għaliex “ma se jmutu qatt assolutament”! Qiegħed int tieħu passi biex tkun wieħed minn dan il-​grupp? Jekk iva, xi privileġġ uniku u tal-​għaġeb hu miftuħ għalik—dak li tibqaʼ ħaj fit-​tmiem tas-​sistema mill-​agħar taʼ Satana u tiġi mdaħħal ġo era ġdida taʼ tjieba li se ġġiblek saħħa perfetta u ħajja taʼ dejjem f’art ġenna! (Luqa 23:43; Rivelazzjoni 21:4, 5) Billi titgħallem x’inhi r-​rieda t’Alla u tippersevera f’li tagħmilha, int tistaʼ turi li ‘m’intix ix-​xorta li tinxtorob lura għall-​qerda.’ Int ukoll jistaʼ ‘jkollok fidi li żżomm lir-​ruħ ħajja.’—Ebrej lO:39; 1 Ġwann 2:15-17; Rivelazzjoni 7:15.

Mistoqsijiet għal Reviżjoni

◻ X’inhi l-​vera tama għall-​mejtin?

◻ It-​twemmin tal-​Kristjaneżmu fl-​irxoxt tal-​ġisem għala hu insult għal Alla?

◻ X’tgħallem il-​Bibbja dwar l-​immortalità?

◻ Liema tama tal-​għaġeb jistaʼ jkollhom in-​nies illum?