Kif Tilqaʼ l-​Isfida Morali taʼ li Tkun Fqir

“IN-​NIES huma foqra għaliex huma għażżenin,” sostna ċertu tabib Afrikan. “Il-​belt hija mimlija b’nies għażżenin. Li kieku verament iridu x-​xogħol, jistgħu jsibuh. M’hemm l-​ebda ħtieġa li xi ħadd ikun fil-​faqar illum.”

M’hemm l-​ebda dubju li xi nies huma għażżenin u li l-​għażż jistaʼ jwassal għall-​faqar. Il-​Bibbja tgħid: “Ftit irqad, ftit ngħas, ftit irbit tal-​idejn biex timtedd, u bħal ħalliel fit-​triq il-​faqar tiegħek ċertament li se jiġi u l-​istat taʼ bżonn tiegħek bħal raġel armat.” (Proverbji 24:33, 34) Madankollu, ħafna nies fqar huma ’l bogħod milli jkunu għażżenin. Per eżempju, ikkunsidra r-​raġel li kiteb: “Sa din is-​siegħa stess inkomplu bil-​ġuħ u wkoll bil-​għatx u li nkunu lebsin ħafif u mħabbtin ’il hawn u ’l hemm u mingħajr dar.” (1 Korintin 4:11) Bniedem għażżien li taqtaʼ qalbek minnu? Dażgur li le. Dawk il-​kelmiet kienu miktubin mill-​appostlu Pawlu. Hu għażel li jgħix ħajja taʼ mezzi ekonomiċi limitati sabiex ikun jistaʼ jsegwi aħjar il-​ministeru Kristjan. Xi wħud miċ-​ċaħdiet tiegħu kienu wkoll minħabba ċirkustanzi li ma kellux kontroll fuqhom, bħalma hi l-​persekuzzjoni reliġjuża.

Illum, ħafna mill-​foqra tad-​dinja huma vittmi taʼ ċirkustanzi li m’għandhomx kontroll fuqhom—forsi nuqqas taʼ skola, falliment fl-​ekonomija lokali, jew irvell politiku. Ħafna jaħdmu minn fil-​għodu kmieni sa tard bil-​lejl u bil-​kemm jaqilgħu l-​għixien. L-​opportunitajiet biex jaqilgħu finanzjarjament permezz taʼ mezzi diżonesti b’hekk jistgħu jidhru sbieħ, saħansitra bżonnjużi. Saħansitra, xi wħud jistgħu jirraġunaw li l-​Bibbja tiġġustifika waqgħa morali taʼ kultant. Wara kollox, tgħid: “In-​nies ma jistmerrux lil wieħed ħalliel sempliċement għaliex ikkommetta s-​serq biex jimla ruħu meta hu bil-​ġuħ.” U raġel għaref darba talab: ‘Jalla ma niġix fil-​faqar u attwalment nisraq.’—Proverbji 6:30; 30:8, 9.

L-​Onestà—Il-​Pożizzjoni tal-​Bibbja

Dawn it-​testi Bibliċi verament jimplikaw li d-​diżonestà hija approvata? Sewwa, ejja neżaminawhom fil-​kuntest tagħhom. Wara li tgħid li n-​nies ma jistmerrux ħalliel li jisraq biex jimla stonku vojt, Proverbji 6:31 ikompli: “Imma, meta jinstab, hu se jagħmel tajjeb b’sebaʼ darbiet iktar; l-​affarijiet kollha li jiswew taʼ daru hu se jagħti.” Fi kliem ieħor, meta l-​ħalliel jinqabad, hu jiffaċċja l-​kastig sħiħ tal-​liġi. Hu jħallas għad-​delitt tiegħu! Minflok ma jinkuraġġixxu s-​serq, għalhekk, dawn il-​kelmiet iwissu lil nies foqra li s-​serq jistaʼ jirriżulta f’iktar telf ekonomiku, diżunur għalihom infushom u għall-​familji tagħhom, u telf taʼ rispett tagħhom infushom.

Imma xi ngħidu għat-​talba taʼ dak ir-​raġel għaref? Hu talab biex ma jiġix fil-​faqar u ‘attwalment jisraq u jkasbar l-​isem taʼ Alla tiegħu.’ (Proverbji 30:9) Iva, id-​diżonestà min-​naħa taʼ persuna li tgħid li qed taqdi lil Jehovah tistaʼ ġġib tmaqdir fuq l-​isem t’Alla, u fuq il-​kongregazzjoni tal-​poplu Tiegħu. L-​appostlu Pawlu kiteb: “Int, dak li tippriedka, ‘Tisraqx,’ tisraq int?” Jekk xi wħud li jgħidu li huma Kristjani jisirqu, dan jistaʼ jikkaġuna li ‘l-​isem t’Alla jiġi mkasbar fost il-​ġnus.’—Rumani 2:21, 24.

Bir-raġun, mela, il-​Bibbja tgħid: “Aħjar wieħed taʼ ftit mezzi li miexi fl-​integrità tiegħu minn wieħed imgħawweġ f’mogħdijietu, għalkemm huwa sinjur.” (Proverbji 28:6) Għalkemm huwa nnifsu xi drabi ma tantx kellu provisti, l-​appostlu Pawlu qatt ma ħallieha tgħaddi jew waqaʼ fid-​diżonestà. Minflok, hu kiteb: “Ħalli l-​ħalliel ma jisraqx iktar, imma minflok ħa jagħmel xogħol iebes, billi jagħmel b’idejh dak li hu xogħol tajjeb, biex jistaʼ jkollu xi ħaġa xi jqassam lil xi ħadd fil-​bżonn.”—Efesin 4:28.

Is-​Soluzzjoni: Li Tafda f’Alla

X’ingħidu għal dawk li qed jaħdmu iebes imma ma jistgħux jaqilgħu biżżejjed biex jieħdu ħsieb tal-​familji tagħhom stess? Huma d-​diżonestà jew is-​serq iġġustifikati fil-​każ tagħhom, speċjalment fil-​każ li xi mard jolqot lil xi membru tal-​familja jew tiġri xi emerġenza oħra? Xi nies hekk jaħsbu. Qal ċertu resident f’art Afrikana: “Fil-​pajjiż tagħna, jekk tkun onest, mhux se tgħix. Jekk trid tibqaʼ ħaj bil-​fors trid tixxellef xi naqra f’ħajtek.”

Iżda, mal-​Afrika kollha wieħed spiss jara l-​kelmiet “Afda f’Alla” miktubin fuq trakkijiet, impenġijin fuq kartelluni mwaħħlin mal-​ħajt, u stampati fuq ‘transfers’ u ‘stickers’ fuq il-​karozzi. Il-​Bibbja nfisha tgħid: “Afda f’Jehovah b’qalbek kollha.” (Proverbji 3:5) Id-​diżonestà qatt ma tistaʼ taqbel maʼ dik it-​twissija tal-​Bibbja. Imma li tafda f’Alla huwa verament it-​tweġiba prattika għall-​isfida morali taʼ li tkun fqir?

Bħala ministru t’Alla, l-​appostlu Pawlu għadda minn żminijiet iebsa bħalma hu ‘ġuħ u għatx, astinenza mill-​ikel, kesħa, u nuqqas taʼ ħwejjeġ.’ (2 Korintin 11:27) Żgur li Pawlu bil-​fors tħasseb dwar kif kien se jibqaʼ ħaj! Imma wara xi 25 sena taʼ esperjenza Kristjana, hu setaʼ jikteb: “Jien naf tabilħaqq kif inkun baxx fi proviżjonijiet, naf tabilħaqq kif ikolli abbundanza. F’kollox u fiċ-​ċirkustanzi kollha jien tgħallimt is-​sigriet kemm taʼ kif inkun mimli u kemm taʼ kif inkun bil-​ġuħ, kemm kif ikolli abbundanza u kemm kif inbati l-​bżonn. Għall-​affarijiet kollha għandi s-​saħħa bis-​saħħa taʼ dak li jagħtini l-​qawwa.” (Filippin 4:12, 13) Iva, Pawlu fada f’Alla.

Pawlu rrealizza li prinċipji Skritturali m’humiex kelmiet vojta, idealistiċi. Huma struzzjonijiet minn Alla ħaj li ħerqan biex igħin u jappoġġja lil dawk li qed ifittxu li japplikawhom. Profeta tal-​qedem qal: “Inkwantu għal Jehovah, għajnejh qed iżebbġu mal-​art kollha biex juri saħħtu f’isem dawk li qalbhom hija sħiħa lejh.”−2 Kronaki 16:9.

Imberkin talli Jafdaw f’Alla

Għala huwa iebes għall-​biċċa l-​kbira tan-​nies biex jafdaw f’Alla? Bla dubju minħabba li r-​reliġjon tagħhom naqset li tagħtihom raġuni suffiċjenti biex jagħmlu dan. Il-​knejjes għamlu lil Alla jidher bla isem, astratt, impersunali, li ma jistaʼ jifhmu ebda bniedem. Imma permezz taʼ studju tal-​Bibbja, ix-​Xhieda taʼ Jehovah saru jafu lil Alla, mhux bħala forza astratta, imma bħala Persuna li għandu isem. (Salm 83:18; Ebrej 9:24) Huma tgħallmu li hu għandu kwalitajiet li juru li jixraqlu l-​fiduċja tagħna. Per eżempju, skond Eżodu 34:6, Jehovah huwa “Alla kollu ħniena u twajjeb, idum biex jirrabja u abbundanti fil-​qalb tajba u l-​verità.” Ix-​Xhieda jafdaw f’Alla u jirrealizzaw li huwa ‘abbundanti fil-​verità.’ B’hekk, huma għandhom fiduċja sħiħa fil-​wegħda tiegħu biex idaħħal dinja ġdida ħielsa mill-​faqar li qed igħakkes u jaħqar parti kbira mir-​razza umana.—2 Pietru 3:13.

Miljuni taʼ Xhieda taʼ Jehovah għalhekk taw prova li huwa prattiku li tafda f’Alla. Per eżempju, Rosaline, Xhud fi Sierra Leone, taħdem iebes mill-​ħamsa taʼ fil-​għodu sa tard bil-​lejl biex tipprovdi l-​ikel u l-​ilbies għaliha nfisha u għas-​sitt itfal tagħha. Hi tistqarr: “Ħafna nies igħidu li m’huwiex possibbli li tgħix ħajja onesta, imma jiena naf li dan m’huwiex veru. Xi drabi jien ikolli problemi u ma nkunx naf kif se jiġu solvuti. Imma naf li jekk ingħix ħajja onesta, kollox se jmur sewwa għalija. Għalhekk nagħmel l-​aħjar tiegħi biex nogħġob lil Jehovah.”

Kittieb wieħed qal: “Raġel fqir b’żaqqu vojta jeħtieġ tama . . . iktar milli ħobż.” Iva, li ma jkollokx tama, li tkun iddisprat, u mdejjaq b’mod kroniku huma moħqrijiet li jistgħu jkunu iktar taʼ wġigħ mill-​ġuħ. Imma wieħed li jsir jaf u jafda lil Alla ma jkollux bżonn jaqaʼ f’disprament. “Jien naħdem iebes issa,” iżżid Rosaline, “imma għandi l-​ferħ minħabba li naf li ż-​żmien ġej fejn mhux se jkolli nbati b’dan il-​mod. Issa naħdem biex naqlaʼ x’niekol għalija u għall-​familja tiegħi, imma fid-​dinja ġdida t’Alla, se jkun hemm abbundanza taʼ ikel. Mela, issa jien għandi tama u ferħ li qatt ma kelli qabel ma kont naf lil Jehovah.”—Qabbel Isaija 25:6; Rivelazzjoni 21:3, 4.

Veru, dawk li jafdaw f’Alla xorta jistgħu jgħaddu minn pressjonijiet ekonomiċi, bħalma għamel l-​appostlu Pawlu. Imma qatt ma se jkollhom bżonn jaslu biex jiksru l-​liġijiet t’Alla sabiex jibqgħu ħajjin ekonomikament. Qal is-​salmista David: “Raġel żagħżugħ jien kont, jien ukoll xjaħt, u madankollu ma rajt lil ħadd twajjeb mitluq għalkollox, lanqas in-​nisel tiegħu jfittex il-​ħobż.” (Salm 37:25) Iva Alla jieħu ħsieb u jbierek lil dawk li jpoġġu l-​interessi tiegħu l-​ewwel f’ħajjithom.—Mattew 6:25-33.

Mela jekk inti fqir, ‘taqtax qalbek f’li tagħmel is-​sewwa.’ (2 Tessalonkin 3:13) Qatt m’għandek taqaʼ għall-​kompromess morali. Ibni relazzjoni maʼ Alla u afda fih biex igħinek tlaħħaq mal-​problemi u t-​tbatijiet tal-​ħajja. Dawk li jaqdu lil Jehovah u jafdaw fih b’għajnejhom magħluqa huma mħeġġin: “Umiljaw ruħkom . . . taħt l-​id setgħana t’Alla, biex hu jistaʼ jgħollikom fiż-​żmien xieraq; waqt li titfgħu l-​anzjetà kollha tagħkom fuqu, għaliex hu jimportah minnkom.”—1 Pietru 5:6, 7.

[Kumment f’paġna 5]

“Raġel fqir b’żaqqu vojta jeħtieġ tama . . . iktar milli ħobż”

[Stampa f’paġna 6]

Ix-​Xhieda taʼ Jehovah igħinu lin-​nies biex ipoġġu l-​fiduċja tagħhom f’Alla