It-​Tjubija Abbundanti taʼ Jehovah

“Kemm hi abbundanti t-​tjubija tiegħek, li int żammejtha bħal teżor għal dawk li qed jibżgħu minnek!”−SALM 31:19.

1, 2. (a) Liema xogħol immens daħal għalih Jehovah f’xi żmien fil-​passat imbiegħed? (b) Jehovah kif iddeskriva r-​riżultat tal-​attivitajiet kreattivi tiegħu?

KIEN hemm żmien meta Alla beda joħloq ‘is-​smewwiet bħala t-​tron tiegħu u l-​art bħala l-​banketta għal siequ.’ (Isaija 66:1) Ir-​rakkont divin ma jirrivelax meta seħħ dan. Jingħad biss: “Fil-​bidu Alla ħalaq is-​smewwiet u l-​art.” (Ġenesi 1:1) Matul il-​perijodu tal-​ħolqien, miljuni mingħajr għadd taʼ galassi ġew ifformati, b’ħafna minnhom li fihom eluf taʼ miljuni taʼ stilel. Lejn it-​tarf taʼ barra taʼ galassa waħda minnhom kien hemm kewkba mdawla li madwarha kienu jduru għadd taʼ sferi mudlama u relattivament żgħar. Waħda minnhom saret tissejjaħ l-​art. Meta tqabbilha mal-​kwiekeb kbar li jiddu, l-​art kienet insinjifikanti. Iżda, din kienet dik li Jehovah kellu l-​għan li tkun il-​banketta għal siequ.

² Jehovah b’hekk dawwar l-​abbiltajiet kreattivi tiegħu lejn il-​pjaneta Art. “L-​ewwel imwieled tal-​ħolqien kollu” kien maʼ ġenbu bħala Mgħallem waqt li din il-​massa żgħira u mudlama nbidlet matul medda taʼ sitt “ijiem” kreattivi twal. Saret, b’mod fiġurattiv, post xieraq taʼ mistrieħ għal saqajn Alla. (Kolossin 1:15; Eżodu 20:11; Proverbji 8:30) Hawn kien fejn Alla kellu l-​għan li jpoġġi forma ġdida taʼ ħajja intelliġenti: il-​bniedem. L-​ewwel koppja umana, maħluqin minn elementi li jinstabu fl-​art, tqiegħdu f’ambjent sabiħ bħal ġenna. (Ġenesi 1:26, 27; 2:7, 8) Tant kien perfett, tant kien sabiħ ir-​riżultat finali taʼ dan l-​att taʼ ħolqien li jispikka, li l-​Bibbja tirrivela kif ħassu Alla fil-​għodwa—il-​parti finali—tas-​sitt jum kreattiv: “Alla ra kull ħaġa li kien għamel u, ħares! kienet tajba ħafna.”−Genesi 1:31.

It-​Tjubija t’Alla

3. Liema kwalità li tispikka t’Alla hi rrivelata fil-​ħolqien?

³ Eluf taʼ snin wara, wieħed dixxendent taʼ dik l-​ewwel koppja umana ħares lura lejn iż-​zmien tal-​ħolqien u kiteb: “Il-​kwalitajiet inviżibbli [t’Alla] jidhru ċari mill-​ħolqien tad-​dinja ’l quddiem, għaliex jintgħarfu mill-​affarijiet li ntgħamlu, saħansitra l-​qawwa eterna u d-​Divinità tiegħu.” (Rumani 1:20) Iva, l-​eċċellenza tal-​għaġeb tal-​art u tal-​ħlejjaq taʼ fuqha kienet tabilħaqq riflessjoni meraviljuża tal-​kwalitajiet inviżibbli t’Alla—mhix l-​inqas minnhom hi t-​tjubija abbundanti t’Alla. Kemm hu xieraq, allura, li Alla ppronunzja li kollox li kien ħalaq kien tajjeb!—Salm 31:19.

4, 5. X’inhi t-​tjubija?

⁴ It-​tjubija hija s-​sitt aspett tal-​frott tal-​ispirtu t’Alla deskritt mill-​appostlu Pawlu f’​Galatin 5:22. Studji li dehru fil-​harġiet taʼ qabel tar-​rivista It-​Torri tal-​Għassa ddiskutew l-​ewwel ħames frottiet tal-​ispirtu, billi wrew l-​importanza taʼ dawn fl-​ikkultivar taʼ personalità Kristjana sħiħa u kompluta.a Kemm hu vitali, iżda, li ma ninsewx it-​tjubija! B’mod xieraq, issa nagħtu l-​attenzjoni tagħna lil din il-​kwalità.

⁵ X’inhi t-​tjubija? Hija l-​kwalità jew l-​istat taʼ li tkun tajjeb. Hija eċċellenza morali, virtù. B’hekk, hija kwalità pożittiva li tesprimi ruħha fit-​twettieq taʼ atti tajbin u taʼ ġid lejn oħrajn. Kif nistgħu nuruha din il-​kwalità li taʼ min igħożżha? Bażikament, billi nimitaw lil Jehovah. B’hekk, qabel ma niddiskutu iktar kif aħna bħala Kristjani individwali nistgħu nuru t-​tjubija, ejjew neżaminaw it-​tjubija li wera l-​maħbub Alla tagħna, Jehovah, f’li pprovda għall-​familja umana u aġixxa magħha.

It-​Tjubija Murija fil-​Ħolqien

6. X’qanqal lil Jehovah biex joħloq forom intelliġenti oħrajn taʼ ħajja?

⁶ X’qanqal fil-​bidunett lil Missierna tas-​sema biex jaqsam it-​tgawdija tieġħu tal-​ħajja maʼ ħlejjaq ħajjin intelliġenti? L-​appostlu Ġwanni jwieġeb dik il-​mistoqsija meta jgħid: “Alla hu mħabba.” (1 Ġwann 4:8) Iva, l-​imħabba bla egoiżmu qanqlet lis-​Sors il-​kbir tal-​ħajja biex joħloq forom ħajjin oħrajn, billi pprovda lil xi wħud dar fis-​sema u lil oħrajn dar fuq l-​art. M’għandniex xi ngħidu, ftit nafu kif inhuma s-​sema jew il-​ħlejjaq tas-​sema. Huma spirti—inviżibbli għall-​għajnejn umani—u d-​dar tagħhom hi fil-​qasam tal-​ispirti. Imma ħares madwarek lejn l-​art li Jehovah ipprovda bħala dar għall-​ulied umani tiegħu. U kkunsidra lill-​umanità nfisha. Imbagħad se tibda tara b’għajnejk stess evidenza qawwija tat-​tjubija t’Alla.

7-9. It-​tjubija t’Alla kif tidher fil-​mod kif hu ħalaq l-​art u lill-​bniedem fuqha?

⁷ Jehovah lill-​ewwel ġenituri tagħna tahom il-​ħajja. Iktar minn hekk, hu għamilha possibbli għall-​ħajja li tkun pjaċevoli ferm, taʼ tgawdija. L-​ewwelnett, hu ħalaq id-​dar tagħhom, l-​art, b’tidwir, b’temperatura, u b’atmosfera li kienu sewwa sew tajbin. Hu ta bidu għal ċikli taʼ ilma, nitroġenu, u ossigenu li kienu jaħdmu perfettament għall-​ġid u għall-​kumdità tal-​bnedmin. Kesa l-​wiċċ tal-​art b’tapit taʼ eluf taʼ tipi taʼ ħxejjex, xi wħud biex jikolhom il-​bniedem u xi wħud li kienu b’mod speċjali taʼ pjaċir għall-​għajnejn. Mela s-​smewwiet b’agħsafar li jagħtu gost kbir bil-​kuluri tagħhom u bil-​għanjiet tagħhom. Mela l-​ibħra bi qtajjiet taʼ ħut u l-​art b’ħafna tipi t’annimali, xi wħud selvaggi u xi wħud li jistgħu jiġu mmansati. X’ġenerożita kbira ferm dik! U x’evidenza dik tat-​tjubija fil-​qalb t’Alla!—Salm 104:24.

⁸ Ħares, issa, lejn il-​mod kif Alla għamel lill-​bniedem. Dirgħajh, riġlejh, u jdejh huma sewwa sew dak li hu meħtieġ biex ikun jistaʼ jżomm il-​bilanċ tiegħu u jitħarrek faċilment. B’hekk, mill-​materjali li jinstabu b’mod tant abbundanti fuq l-​art madwaru, hu jistaʼ jikseb l-​ikel u neċessitajiet oħrajn għalih innifsu. Jehovah ipprovda t-​togħma biex l-​ikel u x-​xorb ma jkunux biss atti mekkaniċi mwettqin biex wieħed jikseb l-​enerġija—bħal meta tqabbad xi ħaġa mal-​elettriku llum. Le, l-​ikel u x-​xorb kienu mfasslin biex jagħtu pjaċir, għax mhux biss jimlew l-​istonku imma jagħtu eċċitament lis-​sens tat-​togħma. Jehovah taħ widnejn ukoll lill-​bniedem u għamel madwaru kotra taʼ ħsejjes li jagħtu gost lil dawn il-​widnejn. Xi pjaċir li tismaʼ t-​tgelgil li jserraħ taʼ għajn taʼ ilma ġieri, it-​tgemgim tal-​ħamiem, jew id-​daħq ħelu taʼ tarbija! Iva, grazzi għat-​tjubija t’Alla, minkejja l-​affarijiet ħżiena kollha li ġraw mill-​ħolqien ’il hawn, xorta għadha ħaġa taʼ ferħ li tkun ħaj.

⁹ Ħares, ukoll, lejn is-​sensi l-​oħrajn tagħna. Kemm jeżistu bosta kuluri varji u sbieħ biex jogħġbu lil għajnejna! U kemm hu sodisfaċenti li xxomm il-​fwieħa delikata taʼ fjura! Mhux taʼ b’xejn li s-​salmista esklama lil Jehovah: “Jien se nfaħħrek għaliex b’mod li jqanqal il-​biżaʼ jien magħmul b’mod tal-​għaġeb. Xogħlijietek huma tal-​għaġeb”!—Salm 139:14.

Il-​Waqgħa tal-​Bniedem u l-​Ħelsien

10. Il-​biċċa l-​kbira tal-​bnedmin kif wieġbu għat-​tjubija t’Alla, u madankollu kif ikomplu jibbenefikaw minnha?

¹⁰ B’niket, maż-​żmien l-​ewwel ġenituri tagħna wrew nuqqas taʼ apprezzament għat-​tjubija kollha t’Alla lejhom. Dan urewh meta m’obdewx il-​kmandi taʼ Jehovah u kisru l-​unika restrizzjoni li hu kien impona. Bħala riżultat, huma u n-​nisel tagħhom saru jafu x’inhu n-​niket, is-​sofferenza, u l-​mewt. (Ġenesi 2:16, 17; 3:16-19; Rumani 5:12) Matul il-​millennji li għaddew mindu sar dak l-​att taʼ diżubbidjenza, il-​biċċa l-​kbira tal-​bnedmin urew indifferenza lejn jew nuqqas taʼ apprezzament għat-​tjubija t’Alla. Minkejja dan, iżda, in-​nies li ma japprezzawx u li ma jiżżux ħajr xorta qed igawdu mit-​tjubija t’Alla. B’liema mod? L-​appostlu Pawlu spjega lill-​abitanti taʼ Listra fil-​Lvant Nofsani: “[Alla] ma ħalliex lilu nnifsu mingħajr xiehda billi għamel it-​tajjeb, billi takom ix-​xita mis-​sema u staġuni taʼ frott, billi mlielkom qlubkom sax-​xifer bl-​ikel u bil-​ferħ.”−Atti 14:17.

11. It-​tjubija t’Alla b’liema mod tmur iktar ’il bogħod minn li jipprovdi dar sabiħa għall-​bnedmin?

¹¹ Imma t-​tjubija t’Alla ma kinetx illimitata għal li hu jkompli jipprovdi provvedimenti li jagħtu pjaċir u li jsostnu l-​ħajja li bihom l-​art hija miżgħuda. Le, hu mar iktar ’il bogħod. Jehovah wera ruħu lest li jaħfer id-​dnubiet tan-​nisel t’Adam u li jkompli jrawwem relazzjonijiet maʼ wħud leali minn fost il-​bnedmin. Dan l-​aspett tat-​tjubija t’Alla inġieb għall-​attenzjoni taʼ Mosè meta Jehovah wiegħed li jġiegħel ‘it-​tjubija kollha tiegħu tgħaddi minn quddiem wiċċ Mosè.’ Mosè mbagħad samaʼ d-​dikjarazzjoni: “Jehovah, Jehovah, Alla kollu ħniena u taʼ grazzja, idum biex jirrabja u abbundanti fil-​qalb tajba bl-​imħabba u l-​verità, jerfaʼ qalb tajba bl-​imħabba għal eluf, jaħfer l-​iżball u n-​nuqqas u d-​dnub.”—Eżodu 33:19; 34:6, 7.

12. Liema provvedimenti tal-​Liġi Mosajka wrew it-​tjubija taʼ Jehovah?

¹² Fi żmien Mosè, Jehovah stabbilixxa sistema legali għall-​ġens il-​ġdid taʼ Iżrael li biha dawk li jidinbu mhux apposta setgħu jiksbu maħfra proviżorja, jew simbolika, tad-​dnub. Permezz tal-​patt tal-​Liġi li tiegħu Mosè kien il-​medjatur, l-​Iżraeliti saru l-​ġens speċjali t’Alla u kienu mgħallmin biex joffru lil Jehovah diversi sagrifiċċji tal-​annimali li setgħu jgħattu d-​dnubiet u l-​atti mhux nodfa tagħhom. B’hekk, minkejja n-​naturi imperfetti tagħhom, Iżraeliti niedma setgħu jkomplu jersqu lejn Jehovah b’mod aċċettabbli u jkunu jafu li l-​qima tagħhom kienet togħġbu. Is-​Sultan David, membru taʼ dak il-​ġens taħt il-​Liġi, esprima l-​għarfien tiegħu dwar it-​tjubija t’Alla f’dan ir-​rigward: “Id-​dnubiet taʼ żgħożiti u l-​irvellijiet tiegħi o tiftakarhomx. Skond il-​qalb tajba bl-​imħabba tiegħek ftakarni int innifsek, minħabba fit-​tjubija tiegħek, O Jehovah.”—Salm 25:7.

13. Jehovah kif ipprovda mod iktar effettiv mis-​sagrifiċċji tal-​annimali għall-​maħfra tad-​dnubiet?

¹³ Maż-​żmien it-​tjubija taʼ Jehovah qanqlitu biex jipprovdi mod iktar effettiv u permanenti għall-​maħfra tad-​dnubiet. Dan kien permezz tas-​sagrifiċċju taʼ Ġesù, li kien dixxendent tas-​Sultan David. (Mattew 1:6-16; Luqa 3:23-31) Jesu ma dinibx. B’hekk, meta miet, ħajtu mogħtija bħala sagrifiċċju kellha valur kbir, u Alla aċċettaha bħala rahan li setaʼ jkopri lin-​nisel midneb kollu taʼ Adam. L-​appostlu Pawlu kiteb: “Kollha dinbu u ma jilħqux il-​glorja t’Alla, u huwa bħal għotja b’xejn li qed jiġu ddikjarati twajbin bil-​qalb tajba mhix mistħoqqa tiegħu permezz tal-​ħelsien bir-​rahan imħallas minn Kristu Ġesù. Alla qiegħdu bħala offerta għat-​tpattija permezz tal-​fidi f’demmu.”−Rumani 3:23-26.

14. Liema tamiet tal-​għaġeb jintgħamlu possibbli għall-​bnedmin permezz tas-​sagrifiċċju bħala rahan?

¹⁴ Il-​fidi fis-​sagrifiċċju taʼ Ġesù bħala rahan twettaq ħafna għall-​Kristjani, ferm iktar minn kemm għamlu għall-​Iżraeliti dawk is-​sagrifiċċji tal-​annimali taħt il-​patt tal-​Liġi. Wasslet biex numru limitat taʼ Kristjani jiġu ddikjarati twajbin u adottati mill-​ispirtu t’Alla biex isiru wliedu. Huma b’hekk saru ħut Ġesù u kisbu t-​tama taʼ li jkunu rxoxtati bħala ħlejjaq spirti biex jaqsmu miegħu fis-​Saltna tiegħu tas-​sema. (Luqa 22:29, 30; Rumani 8:14-17) Immaġina li Alla kellu jiftaħ prospetti bħal dawn għas-​sema għal ħlejjaq li jgħixu fuq din il-​pjaneta żgħira, l-​art! Għad hawn grupp żgħir li jħaddnu din it-​tama. Imma għal miljuni taʼ Kristjani oħrajn, li jeżerċitaw fidi fir-​rahan jiftaħ it-​triq biex igawdu dak li tilfu Adam u Eva—ħajja taʼ dejjem f’ġenna, bħal ġnien, fuq l-​art. Il-​patt tal-​Liġi waħdu la kien kapaċi jipprovdi prospetti għas-​sema u lanqas prospetti futuri fuq l-​art għal dawk li kienu jimxu miegħu.

15. X’inhu inkluż fl-​aħbar tajba?

¹⁵ Kemm hu xieraq li dak il-​messaġġ dwar l-​arranġamenti l-​ġodda li Alla ta bidu għalihom permezz taʼ Ġesù Kristu jissejjaħ “aħbar tajba,” għax dan jirrifletti t-​tjubija t’Alla. (2 Timotew 1:9, 10) Fil-​Bibbja, l-​aħbar tajba xi drabi tissejjaħ l-​“aħbar tajba tas-​saltna.” Illum tiċċentra fuq il-​verità li s-​Saltna ġiet stabbilita taħt il-​ħakma taʼ Ġesù rxoxtat. (Mattew 24:14; Rivelazzjoni 11:15; 14:6, 7) Madankollu, l-​aħbar tajba tinvolvi iktar. Bhalma jindikaw il-​kelmiet taʼ Pawlu lil Timotew li għadna kemm ikkwotajna, tinkludi l-​għarfien li Ġesù offra sagrifiċċju bħala rahan għalina. Mingħajr dak is-​sagrifiċċju, ir-​relazzjoni tagħna m’Alla, is-​salvazzjoni nfisha tagħna—biex ma nsemmux is-​Saltna taʼ Ġesù u l-​144,000 qassisin u slaten meħudin mill-​art—ma kinetx tkun possibbli. X’manifestazzjoni tal-​għaġeb tat-​tjubija t’Alla huwa r-​rahan!

It-​Tjubija t’Alla Llum

16, 17. Ħosegħa 3:5 kif twettaq (a) fis-​sena 537 Q.E.K.? (b) fl-​1919 E.K.?

¹⁶ Waqt li ħares ’il quddiem lejn “l-​aħhar jiem,” l-​appostlu Pawlu wissa: “Il-​bnedmin se jkunu . . . mingħajr imħabba għat-​tjubija.” (2 Timotew 3:1-3) Saħansitra manifestazzjonijiet normali taʼ tjubija, bħalma hi l-​ġenerożità u li tkun ħbieb mal-​ġar tiegħek, ma kellhomx ikunu apprezzati. Kemm hi nkuraġganti, allura, il-​profezija li tqanqal il-​qalb taʼ Ħosegħa 3:5: “Ulied Iżrael se jiġu lura u ċertament ifittxu lil Jehovah Alla tagħhom, u lil David is-​sultan tagħhom; u ċertament li se jiġu jirtogħdu lejn Jehovah u lejn it-​tjubija tiegħu fil-​parti finali tal-​jiem.”

¹⁷ Din il-​profezija twettqet għall-​ewwel fis-​sena 537 Q.E.K. meta l-​Lhud reġgħu lura lejn l-​Art Imwiegħda mill-​eżilju f’Babilonja. Fiż-​żminijiet moderni, bdiet titwettaq fis-​sena 1919 meta l-​fdal taʼ Iżrael spiritwali ħarġu mill-​organizzazzjoni taʼ Satana u bdew bil-​ħerqa jfittxu lil Jehovah u t-​tjubija tiegħu. Huma sabu li “David is-​sultan tagħhom” kien ilu jsaltan fil-​persuna taʼ Ġesù Kristu fil-​qawwa tas-​sema mill-​1914. Taħt is-​superviżjoni tiegħu mis-​sema, huma ħadu f’idejhom b’entużjażmu x-​xandir taʼ din l-​aħbar tajba lill-​ġnus. B’hekk bdew iwettqu l-​kariga mnizzla f’​Mattew 24:14: “Din l-​aħbar tajba tas-​saltna [stabbilita] se tkun ippridkata fl-​art abitata kollha għal xiehda lill-​ġnus kollha; u mbagħad se jiġi t-​tmiem.”

18. Min ingħaqad mal-​fdal taʼ Iżrael spiritwali f’li jiddikjaraw l-​aħbar tajba?

¹⁸ Illum, mal-​fdal taʼ wħud midlukin in-​għaqdet il-​“folla kbira,” li bl-​istess mod qed jagħtu merħba lit-​tjubija taʼ Jehovah. (Rivelazzjoni 7:9) Issa, iktar minn erbaʼ miljuni jidwu leħen l-​anglu li lilu l-​appostlu Ġwanni ra f’dehra hekk kif iħabbru lill-​ġnus kollha: “Ibżgħu minn Alla u agħtuh glorja, għaliex is-​siegħa tal-​ġudizzju minnu waslet, u mela qimu lil Dak li għamel is-​sema u l-​art u l-​baħar u n-​nixxigħat taʼ ilmijiet.”−Rivelazzjoni 14:7.

19. Semmi waħda mill-​akbar evidenzi tat-​tjubija t’Alla.

¹⁹ Waħda mill-​akbar evidenzi tat-​tjubija t’Alla hi li ħalla lilna nkunu ħaddiema bi sħab miegħu f’dan ix-​xogħol li riesaq lejn il-​quċċata. Xi privileġġ hu li niġu fdati bl-​“aħbar tajba glorjuża taʼ dak Alla hieni”! (1 Timotew 1:11) Billi nippridkaw u ngħallmu din lil oħrajn, aħna qegħdin nuru bi grad għoli dik il-​frotta importanti tal-​ispirtu t’Alla, it-​tjubija. B’hekk, għandna l-​attitudni taʼ David, il-​qaddej tal-​qedem t’Alla, li qal: “Meta tissemma l-​abbundanza tat-​tjubija tiegħek se jogħxew, u minħabba fit-​tjieba tiegħek se jgħajtu bil-​ferħ.”−Salm 145:7.

20. Liema informazzjoni oħra rigward it-​tjubija se tiġi diskussa fl-​artiklu li jmiss?

²⁰ Madankollu, huwa li naqsmu fl-​ippridkar tal-​aħbar tajba l-​uniku mod kif nuru t-​tjubija fil-​ħajjiet tagħna? Żgur li le! Ahna nkuraġġiti biex insiru “imitaturi t’Alla bħala tfal maħbubin.” (Efesin 5:1) It-​tjubija t’Alla tidher b’diversi modi. B’hekk, it-​tjubija tagħna wkoll għandha teffettwa lil ħafna aspetti tal-​ħajjiet tagħna. Xi wħud minn dawn se jiġu kkunsidrati fl-​artiklu li jmiss.

[Nota taʼ taħt]

Tistaʼ Int Twieġeb

◻ Il-​ħolqien b’liema mod jirrifletti t-​tjubija t’Alla?

◻ Liema arranġamenti għamel Jehovah biex jaħfer id-​dnubiet taʼ bnedmin niedma?

◻ Bi twettieq taʼ Ħosegħa 3:5, il-​fdal midlukin meta ġew għand ◻ Jehovah u t-​tjubija tiegħu, u dan wassal għal liema ħaġa?

◻ Liema hi waħda mill-​akbar evidenzi tat-​tjubija t’Alla llum?

[Stampa f’paġna 8]

Il-​ħolqien jagħti xiehda tat-​tjubija abbundanti t’Alla

[Stampa f’paġna 9]

Li aħna tħallejna nieħdu sehem fix-​xogħol tal-​ippridkar hija prova li tispikka tat-​tjubija t’Alla