Kunu Mlibbsin il-​Ħlewwa!

“Bħala l-​uħud magħżulin t’Alla, qaddisin u maħbubin, tlibbsu bl-​affezzjonijiet teneri taʼ mogħdrija, qalb tajba, umiltà tal-​moħħ, ħlewwa, u sabar fit-​tul.”−KOLOSSIN 3:12

1-3. F’​Kolossin 3:12-14, x’qal l-​appostlu Pawlu dwar il-​ħlewwa u kwalitajiet taʼ tjieba oħrajn?

JEHOVAH jagħti lill-​poplu tiegħu l-​aqwa lbies figurattiv. Fil-​fatt, dawk kollha li jixtiequ li jkollhom il-​favur tiegħu jridu jkunu mlibbsin b’libsa li jkollha ħjut b’saħħithom taʼ ħlewwa. Din il-​kwalità hija taʼ faraġ għaliex tnaqqas it-​tensjoni f’sitwazzjonijiet taʼ stress. Hija wkoll taʼ protezzjoni, għaliex tbiegħed il-​ġlied.

² L-​appostlu Pawlu ħeġġeġ lill-​Kristjani sħabu midlukin: “Bħala l-​uħud magħżulin t’Alla, qaddisin u maħbubin, tlibbsu bl-​affezzjonijiet teneri taʼ mogħdrija, qalb tajba, umiltà tal-​moħħ, ħlewwa, u sabar fit-​tul.” (Kolossin 3:12) It-​temp tal-​kelma Griega tradotta “tlibbsu” jindika azzjoni li trid tittieħed b’sens taʼ urġenza. Uħud midlukin, li kienu magħżulin, qaddisin, u maħbubin minn Alla, ma kellhomx jittnikkru biex ilibbsu lilhom infushom bi kwalitajiet bħalma hi l-​ħlewwa.

³ Pawlu żied: “Komplu ssaportu lil xulxin u aħfru lil xulxin liberament jekk xi ħadd għandu x’jilmenta kontra ieħor. Saħansitra bħalma Jehovah ħafer lilkom liberament, hekk agħmlu intom ukoll. Imma, barra minn dawn l-​affarijiet kollha, tlibbsu bl-​imħabba, għax hi rabta perfetta taʼ għaqda.” (Kolossin 3:13, 14) L-​imħabba, il-​ħlewwa, u kwalitajiet taʼ tjieba oħrajn jagħmluha possibbli għax-​Xhieda taʼ Jehovah biex “igħammru flimkien f’għaqda.”−Salm 133:1-3.

Ragħajja Kalmi Meħtieġa

4. Il-​Kristjani veri jilbsu libsa figurattiva minsuġa b’liema kwalitajiet?

⁴ Kristjani veri jistinkaw biex ‘imewtu lill-​membri taʼ ġisimhom rigward iż-​żina, in-​nuqqas taʼ ndafa, l-​aptit sesswali, ix-​xewqa li tweġġaʼ, u x-​xenqa,’ u huma jaħdmu biex ineħħu kwalunkwe lbies qadim li fih drapp taʼ korla, rabja, ħażen, kliem taʼ abbuż, u kliem oxxen. (Kolossin 3:5-11) Huma jinżgħu “l-​personalità l-​qadima” (litteralment, “il-​bniedem il-​qadim”) u jilbsu “l-​personalità l-​ġdida” (jew, “il-​bniedem il-​ġdid”), ilbies xieraq. (Efesin 4:22-24, Kingdom Interlinear) Il-​libsa ġdida tagħhom, minsuġa b’mogħdrija, qalb tajba, umiltà tal-​moħħ, ħlewwa, u sabar fit-​tul, tgħinhom biex isolvu problemi u jgħixu ħajjiet taʼ tjieba.—Mattew 5:9; 18:33; Luqa 6:36; Filippin 4:​2, 3.

5. X’hemm dwar kif tiffunzjona l-​kongregazzjoni Kristjana li jagħmilha taʼ ferħ kbir li tkun parti minnha.

⁵ Nies meqjusin bħala li rnexxew f’did-dinja huma taʼ spiss żorri, saħansitra kefrin. (Proverbji 29:22) Kemm hu differenti b’mod riffreskanti fost il-​poplu taʼ Jehovah! Il-​kongregazzjoni Kristjana ma tiffunzjonax bl-​istess mod bħalma xi nies imexxu negozju—b’manjiera effiċjenti imma ħarxa li tistaʼ tagħmel lin-​nies imdejqin. Minflok, hu taʼ ferħ li tkun parti mill-​kongregazzjoni. Raġuni waħda hi għaliex temperament kalm hu fattur tal-​għerf muri mill-​Kristjani inġenerali u b’mod speċjali minn irġiel ikkwalifikati biex igħallmu lil sħabhom li jemmnu. Iva, il-​ferħ jirriżulta minn struzzjonijiet u pariri mogħtijin minn anzjani maħturin li jgħallmu “bi ħlewwa li tappartjeni lill-​għerf.”−Ġakbu 3:13.

6. Anzjani Kristjani għala jridu jkunu kalmi?

⁶ L-​ispirtu, jew l-​attitudni dominanti, tal-​poplu t’Alla tirrikjedi li rġiel fdati bl-​indokrar fil-​kongregazzjoni jkunu kalmi, raġonevoli, u taʼ dehen. (1 Timotew 3:1-3) Il-​qaddejja taʼ Jehovah huma bħal ngħaġ ġentili, mhux bħal mogħoż stinati, bgħula b’rashom iebsa, jew ilpup imġewħin. (Salm 32:9; Luqa 10:3) Billi huma bħal ngħaġ, huma jridu jiġu stmati bil-​ħlewwa u bit-​tenerezza. (Atti 20:28, 29) Iva, Alla jistenna li l-​anzjani juru ħlewwa, qalb tajba, imħabba, u paċenzja man-​ngħaġ tiegħu.—Eżekjel 34:17-24.

7. L-​anzjani kif għandhom jistruwixxu lil oħrajn jew jgħinu lil uħud morda spiritwalment?

⁷ Bħala “rsir tal-​Mulej,” anzjan “għandu bżonn ikun ġentili maʼ kulħadd, ikkwalifikat biex igħallem, iżomm lilu nnifsu mrażżan taħt il-​ħażen, igħallem bil-​ħlewwa lil dawk li m’humiex disposti b’mod favorevoli; għax forsi Alla jistaʼ jagħtihom indiema li twassal għal għarfien eżatt tal-​verità.” (2 Timotew 2:24, 25) Ragħajja Kristjani għandhom juru konsiderazzjoni tenera meta jippruvaw igħinu lil uħud morda spiritwalment, għax in-​ngħaġ jappartjenu lil Alla. L-​anzjani m’għandhomx jittrattawhom bħalma kieku jagħmel wieħed li jaħdem biss għall-​flus imma jridu jkunu kalmi, bħar-​Ragħaj mill-​Aħjar, Ġesù Kristu.—Ġwann 10:11-13.

8. Xi ġralu Mosè li kien kalm, u għala?

⁸ Anzjan jistaʼ xi drabi jsibha diffiċli li jżomm spirtu kalm. “Mosè kien bil-​wisq l-​iktar wieħed ġwejjed mill-​irġiel kollha li kienu fuq wiċċ l-​art.” (Numri 12:3) Iżda, meta l-​Iżraeliti ffaċċjaw skarsezza t’ilma f’Kadex, huma tlewmu maʼ Mosè u waħħlu fih talli ħariġhom mill-​Eġittu għal ġo xagħri għeri. Minkejja dak kollu li Mosè kien issaporta b’mod ġwejjed, hu tkellem mingħajr ma qagħad jaħseb u b’mod aħrax. Hu u Aronne waqfu quddiem il-​poplu u dderiġew l-​attenzjoni lejhom infushom, fil-​waqt li Mosè qal: “Isimgħu, issa, ja ribellużi! Huwa minn din il-​blata li se noħorġu l-​ilma għalikom?” Mosè mbagħad ħabbat fuq il-​blata bil-​bastun tiegħu darbtejn, u Alla ġiegħel li joħroġ “ħafna ilma” għall-​poplu u għall-​annimali tagħhom. Jehovah ma ħax pjaċir li Mosè u Aronne ma kinux qaddsu Lilu, u għalhekk Mosè ma kienx ipprivileġġjat li jdaħhal lill-​Iżraeliti ġol-​Art Imwiegħda.—Numri 20:1-13; Dewteronomju 32:50-52; Salm 106:32, 33.

9. Kif tistaʼ tiġi pprovata l-​ħlewwa taʼ wieħed anzjan?

⁹ Il-​ħlewwa taʼ anzjan Kristjan tistaʼ tiġi pprovata wkoll b’diversi modi. Per eżempju, Pawlu wissa lil Timotew li setaʼ jqum xi ħadd “minfuħ bil-​kburija” u “marid mentalment fuq iddomandar u dibattiti dwar kliem.” Pawlu żied: “Minn dawn l-​affarijiet iqumu l-​għira, il-​ġlied, kliem t’abbuż, suspetti mill-​agħar, tħaqqiq vjolenti dwar ħmerijiet min-​naħa taʼ rġiel korrotti fil-​moħħ u misruqin il-​verità.” L-​indokratur Timotew ma kellux jaġixxi bi ħruxija imma kellu “[j]aħrab minn dawn l-​affarijiet,” u kellu “[j]iġri wara t-​tjieba, id-​devozzjoni lejn Alla, il-​fidi, l-​imħabba, is-​sabar, it-​temperament kalm.”—1 Timotew 6:​4, 5, 11.

10. Titus dwar liema ħaġa kellu jfakkar lill-​kongregazzjonijiet?

¹⁰ Għalkemm l-​anzjani jridu juru ħlewwa, huma jridu jkunu sodi għal dak li hu sewwa. Titus hekk kien, billi fakkar lil dawk assoċjati mal-​kongregazzjonijiet fi Kreta biex “ma jitkellmu b’mod inġurjuż dwar ħadd, biex ma jkunux ġellidin, biex ikunu raġonevoli, billi juru kull ħlewwa lejn il-​bnedmin kollha.” (Titus 3:​1, 2) Billi wera għala l-​Kristjani għandhom ikunu kalmi lejn kulħadd, Titus kellu jindika kemm Jehovah kien qalbu tajba u taʼ mħabba. Alla ma kienx salva lil dawk li jemmnu minħabba xi egħmejjel taʼ tjieba li kienu wettqu imma skond il-​ħniena tiegħu permezz taʼ Ġesù Kristu. Il-​ħlewwa u l-​paċenzja taʼ Jehovah ifissru salvazzjoni għalina wkoll. Bħal Titus, għalhekk, anzjani tal-​preżent għandhom ifakkru lill-​kongregazzjonijiet biex ikunu sottomessi lejn Alla, billi jimitaw Lilu f’li jistmaw lil oħrajn b’mod taʼ ħlewwa.—Titus 3:3-7; 2 Pietru 3:​9, 15.

Il-​Ħlewwa Tiggwida lill-​Wieħed Għaref li Jagħti Parir

11. Skond Galatin 6:​1, 2, kif għandu jingħata l-​parir?

¹¹ Xi ngħidu jekk nagħġa figurattiva tkun żballjat? Pawlu qal: “L-​aħwa, saħansitra jekk raġel jieħu xi pass ħażin qabel ma jinduna bih, intom li għandkom kwalifiki spiritwali ppruvaw irranġaw lil raġel bħal dan fi spirtu taʼ ħlewwa, fil-​waqt li kull wieħed minnkom iżomm għajn fuqu nnifsu, minħabba l-​biżaʼ li inti wkoll tistaʼ tiġi ttantat. Komplu ġorru t-​tagħbijiet taʼ xulxin, u b’hekk wettqu l-​liġi tal-​Kristu.” (Galatin 6:1, 2) Il-​parir ikun iżjed effettiv jekk jingħata fi spirtu taʼ ħlewwa. Saħansitra jekk l-​anzjani qed jipprovaw jagħtu parir lil xi ħadd irrabjat, huma għandhom juru kontroll fuqhom infushom, billi jirrealizzaw li “lsien ħelu nnifsu jistaʼ jkisser għadma.” (Proverbji 26:15) Xi ħadd iebes daqs għadma jistaʼ jitrattab bi stqarrija taʼ ħlewwa, u l-​ebusija tiegħu tistaʼ titkisser.

12. Spirtu taʼ ħlewwa kif igħin lil wieħed li jagħti parir.

¹² Jehovah huwa Għalliem kalm, u l-​mod tiegħu kif igħallem bil-​ħlewwa huwa effettiv fil-​kongregazzjoni. Dan hu hekk b’mod speċjali meta l-​anzjani jkollhom bżonn jagħtu parir lil dawk li jinħtieġu għajnuna spiritwali. Id-​dixxiplu Ġakbu kiteb: “Min hu għaref u li jifhem fostkom? Ħa juri bl-​imġieba mill-​aħjar tiegħu xogħlijietu bi ħlewwa li tappartjeni lill-​għerf.” Il-​ħlewwa tirriżulta minn rispett u gratitudni lejn “għerf minn fuq,” flimkien maʼ rikonoxximent modest tal-​limitazzjonijiet tagħna nfusna. Spirtu umli u taʼ ħlewwa jipproteġi lill-​wieħed li jagħti parir milli jagħmel rimarki u żballji taʼ ħsara u jagħmel lill-​parir tiegħu eħfef li taċċettah.—Ġakbu 3:13, 17.

13. “Ħlewwa li tappartjeni lill-​għerf” kif teffettwa l-​mod kif jingħata parir?

¹³ “Ħlewwa li tappartjeni lill-​għerf” teskludi lil wieħed li jagħti parir milli bla ma jqisha jkun goff jew aħrax fi kliemu. Iżda, tħassib dwar ħbiberija jew dwar l-​approvazzjoni taʼ xi bniedem m’għandux iqanqal lil anzjan li jgħid affarijiet imfasslin biex jogħġbu minflok li bil-​ħlewwa jippreżenta parir ċar ibbażat fuq il-​Kelma t’Alla. (Proverbji 24:24-26; 28:23) Il-​parir li rċieva Amnon mingħand kuġinuh issodisfa x-​xewqa tiegħu, imma swielu ħajtu. (2 Samwel 13:​1-19, 28, 29) Anzjani tal-​preżent, għalhekk, ma jridux idgħajfu l-​prinċipji tal-​Bibbja biex jakkomodaw il-​kuxjenza taʼ ħaddieħor, għax li jagħmlu dan jistaʼ jkun taʼ periklu għal ħajtu. Bħal Pawlu, l-​anzjani m’għandhomx iżommu lura milli jgħidu lill-​oħrajn “il-​parir kollu t’Alla.” (Atti 20:​26, 27; 2 Timotew 4:1-4) Kristjan matur li jagħti parir juri biżaʼ t’Alla u jagħti parir taʼ tjieba bi ħlewwa li tappartjeni lill-​għerf.

14. Anzjan għala għandu joqgħod attent biex ma jiħux deċiżjonijiet li oħrajn għandhom jieħdu huma stess?

¹⁴ Il-​ħlewwa flimkien maʼ għerf mis-​sema se jżommu lura lil anzjan milli jkun aħrax. Hu għandu jirrealizza wkoll li mhux għaqli u mhux xieraq li hu jieħu deċiżjoni li għandha tittieħed minn ħaddieħor. Anzjan se jkun responsabbli għar-​riżultati jekk hu ħa deċiżjonijiet għal oħrajn, u se jieħu sehem fil-​ħtija taʼ xi riżultat ħażin. Anzjan jistaʼ jiġbed l-​attenzjoni lejn dak li tgħid il-​Bibbja, imma jekk ma hemm ebda liġi Skritturali fuq il-​kwistjoni, il-​ġudizzju u l-​kuxjenza tal-​individwu nnifsu jridu jiddeterminaw x’se jagħmel jew ma jagħmilx. Bħalma qal Pawlu: “Kull wieħed se jerfaʼ t-​tagħbija tiegħu stess.” (Galatin 6:5; Rumani 14:12) Madankollu, min jistaqsi jistaʼ jiġi mgħejjun biex jieħu deċiżjoni tajba billi anzjan jistaqsi mistoqsijiet li jgħinu lil dak li jkun biex jirraġuna fuq l-​iskritturi marbutin maʼ toroq taʼ għażla li jistgħu jkunu miftuħin quddiemu.

15. X’għandu jsir jekk wieħed anzjan ma jafx it-​tweġiba għal xi mistoqsija?

¹⁵ Jekk xi anzjan ma jafx it-​tweġiba għal xi mistoqsija, m’għandux jagħti risposta sempliċement biex ma jaqax għaċ-​ċajt. Il-​ħlewwa li tappartjeni lill-​għerf se żżommu lura milli jipprova jaqtaʼ u forsi b’hekk jagħti tweġiba ħażina li iktar tard tistaʼ tikkaġuna niket. Hemm “ħin biex toqgħod kwiet u ħin biex titkellem.” (Ekkleżjasti 3:7; qabbel Proverbji 21:23.) Anzjan għandu ‘jitkellem’ biss meta hu jaf it-​tweġiba għal xi mistoqsija jew ikun għamel biżżejjed riċerka biex jagħti risposta eżatta. Huwa għaqli li tħalli mistoqsijiet spekulattivi bla tweġiba.—Proverbji 12:8; 17:27; 1 Timotew 1:3-7; 2 Timotew 2:14.

Valur taʼ Kotra taʼ Wħud li Jagħtu Pariri

16, 17. Għala huwa xieraq li l-​anzjani jikkonsultaw bejniethom?

¹⁶ It-​talb u l-​istudju se jgħinu lill-​anzjani biex iwieġbu mistoqsijiet u biex jittrattaw problemi diffiċli, imma għandu jiġi mfakkar li “fil-​kotra taʼ wħud li jagħtu pariri hemm twettieq.” (Proverbji 15:22) Li jiġu kkonsultati anzjani oħrajn jirriżulta f’ġabra imprezzabbli taʼ għerf. (Proverbji 13:20) Mhux l-​anzjani kollha għandhom esperjenza jew għarfien tal-​Bibbja ugwali. Għaldaqstant, il-​ħlewwa li tappartjeni lill-​għerf għandha tqanqal lil anzjan taʼ inqas esperjenza biex jikkonsulta maʼ anzjani li għandhom iktar għarfien u iktar esperjenza, b’mod speċjali meta trid tiġi trattata xi kwistjoni serja.

¹⁷ Meta jintgħażlu xi anzjani biex jittrattaw xi kwistjoni serja, huma xorta waħda jistgħu b’mod kunfidenzjali jfittxu l-​għajnuna. Biex igħinuh jiġġudika lill-​Iżraeliti, Mosè għażel “[i]rġiel kapaċi, li jibżgħu minn Alla, irġiel li tistaʼ tafdahom, li jobogħdu l-​qligħ inġust.” Għalkemm kienu anzjani, huma ma kellhomx daqstant għarfien u esperjenza daqs kemm kellu Mosè. Għalhekk, “każ iebes kienu jġibuh għand Mosè, imma kull każ żgħir huma nfushom kienu jimmaniġġjawh bħala mħallfin.” (Eżodu 18:13-27) Jekk ikun hemm bżonn, allura, anzjani li jkunu qegħdin jittrattaw xi każ iebes illum jistgħu b’mod xieraq ifittxu l-​għajnuna taʼ indokraturi taʼ esperjenza, għalkemm id-​deċiżjoni finali jeħduha huma stess.

18. F’li jiġu trattati kwistjonijiet ġudizzjarji, x’inhuma l-​fatturi deċisivi li jiżżguraw deċiżjonijiet xierqa?

¹⁸ Il-​Mixna Lhudija tgħid li f’Iżrael dawk li kienu jiffurmaw qrati tal-​irħula kienu jvarjaw fil-​għadd skond il-​gravità tal-​każ. Hemm valur veru fil-​kotra taʼ wħud li jagħtu pariri, għalkemm il-​għadd taʼ nies fih innifsu ma jiggarantix is-​sewwa, għax maġġoranza tistaʼ tkun fl-​iżball. (Eżodu 23:2) Il-​fatturi deċiżivi li jiżżguraw li jittieħdu deċiżjonijiet xierqa huma l-​Iskrittura u l-​ispirtu t’Alla. Il-​għerf u l-​ħlewwa se jqanqlu lill-​Kristjani biex jissottomettu rwieħhom lejn dawn.

Nagħtu Xiehda bil-​Ħlewwa

19. Il-​ħlewwa kif tgħin lin-​nies taʼ Jehovah biex jagħtu xiehda lill-​oħrajn?

¹⁹ Il-​ħlewwa tgħin ukoll lill-​qaddejja taʼ Jehovah biex jagħtu xiehda lil nies taʼ dispożizzjonijiet varji. (1 Korintin 9:22, 23) Peress li Ġesù għallem bil-​ħlewwa, uħud umlin ma beżgħux minnu, bħalma kienu jagħmlu mill-​mexxejja reliġjużi ħorox. (Mattew 9:36) M’għandniex xi ngħidu, il-​modi tiegħu taʼ ħlewwa kienu jattiraw “ngħaġ,” mhux “mogħoż” mill-​agħar. (Mattew 25:31-46; Ġwann 3:16-21) Għalkemm Ġesù kien juża termini qawwijin meta kien jittratta maʼ ipokriti bħal mogħoż, ix-​Xhieda taʼ Jehovah iridu juru ħlewwa meta jiddikjaraw il-​messaġġi taʼ ġudizzju t’Alla llum għaliex huma m’għandhomx l-​istess dehen u awtorità li kellu Ġesù. (Mattew 23:13-36) Meta jisimgħu l-​messaġġ tas-​Saltna ppridkat bil-​ħlewwa, ‘dawk li huma disposti sewwa għall-​ħajja taʼ dejjem isiru jemmnu,’ bħalma għamlu wħud bħal ngħaġ li semgħu lil Ġesù.—Atti 13:48.

20. Student tal-​Bibbja kif jibbenefika meta jiġi mgħallem bil-​ħlewwa?

²⁰ Riżultati tajbin jinkisbu milli nagħtu xiehda u struzzjoni lill-​oħrajn bil-​ħlewwa u billi nappellawlhom fuq il-​bażi tal-​loġika, taʼ prinċipji Bibliċi, u tal-​verità. “Qaddsu lill-​Kristu bħala Mulej fi qlubkom,” kiteb Pietru, “dejjem lesti biex tagħmlu difiża quddiem kulmin jitlobkom raġuni għat-​tama fikom, imma billi tagħmlu hekk bil-​ħlewwa u b’rispett profond.” (1 Pietru 3:15) Student li qed jiġi mgħallem b’mod taʼ ħlewwa jistaʼ jikkonċentra fuq il-​materjal minflok ma jiġi distratt jew possibilment saħansitra mfixkel minn manjiera ħarxa u argumentattiva. Bħal Pawlu, ministri li jagħtu struzzjoni bil-​ħlewwa jistgħu jgħidu: “Bl-​ebda mod ma qegħdin aħna nagħtu raġuni għal għoti taʼ gambetta, biex il-​ministeru tagħna ma jinstabx żball fih.” (2 Korintin 6:3) Saħansitra opponenti xi drabi jirreaġixxu b’mod favorevoli għal dawk li jistruwixxu bil-​ħlewwa.

Il-​Ħlewwa Meħtieġa minn Kulħadd

21, 22. Il-​ħlewwa kif tibbenefika lill-​poplu kollu taʼ Jehovah?

²¹ Il-​ħlewwa Kristjana ma tridx tintlibes biss biex timpressjona lil dawk barra mill-​organizzazzjoni taʼ Jehovah. Din il-​kwalità hija vitali wkoll f’relazzjonijiet fost il-​poplu t’Alla. (Kolossin 3:12-14; 1 Pietru 4:8) Il-​kongregazzjonijiet jinbnew spiritwalment meta anzjani u qaddejja ministerjali kalmi jaħdmu flimkien f’armonija. Li juri ħlewwa u kwalitajiet taʼ tjieba oħrajn huwa importanti għal kull wieħed mill-​poplu taʼ Jehovah għaliex hemm “liġi waħda” għal kulħadd.—Eżodu 12:49; Levitiku 24:22.

²² Il-​ħlewwa tikkontribwixxi għall-​paċi u l-​hena tal-​poplu t’Alla. Għalhekk hija trid tkun parti mid-​drapp taʼ kwalitajiet li jiffurmaw il-​libsa milbusa mill-​Kristjani kollha fid-​dar, fil-​kongregazzjoni, u bnadi oħrajn. Iva, il-​qaddejja kollha taʼ Jehovah iridu jitlibbsu bil-​ħlewwa.

Int Kif Twieġeb?

◻ Anzjani Kristjani għala jridu jkunu kalmi?

◻ Il-​ħlewwa kif tiggwida lill-​wieħed għaref li jagħti pariri?

◻ X’inhu l-​valur taʼ kotra taʼ wħud li jagħtu pariri?

◻ Għala huwa taʼ benefiċċju li tagħti xiehda bil-​ħlewwa?

[Stampa f’paġna 15]

In-​nies taʼ Jehovah huma bħal ngħaġ u hemm bżonn li jiġu stmati bil-​ħlewwa