Fejn Tistaʼ Ssib Gwida Li Tafdaha?

“JIEN naf sewwa, O Jehovah, li għall-​bniedem taʼ l-​art il-​mogħdija tiegħu ma tappartjenix lilu. Ma jappartjenix lill-​bniedem li miexi saħansitra li jidderieġi l-​pass tiegħu. Ikkorreġini, O Jehovah.”—Ġeremija 10:23, 24.

Il-kittieb tal-​Bibbja Ġeremija kiteb dak il-​kliem xi 25 seklu ilu. Il-​kundizzjoni tal-​biki taʼ l-​umanità wara eluf taʼ snin taʼ applikar taʼ gwida umana tagħti prova tal-​verità li ma tistax tiċħadha taʼ din l-​istqarrija. Imma forsi tistaqsi, ‘Gwida taʼ min jafdaha fejn tistaʼ tinstab?’

L-iskrittura kkwotata hawn fuq tindika sors taʼ gwida u direzzjoni taʼ min jorbot fuqhom li huwa bil-​wisq akbar mill-​bniedem​—il-​Ħallieq tal-​bniedem, Alla Jehovah. Żgur li ħadd ma jaf kif inhu magħmul il-​bniedem u l-​ħtiġijiet tiegħu iktar mill-​Ħallieq tagħna. Madankollu, huwa Alla interessat f’li jipprovdilna gwida u direzzjoni bħal dawn? Kif jagħmlu dan? Huwa dan prattiku għaż-​żminijiet tagħna?

Iddisinnjati Biex Nirċievu Gwida Divina

Huwa fatt magħruf tajjeb li differenza prinċipali li tissepara lill-​bniedem mill-​annimali tiċċentra fuq l-​istruttura, il-​kapaċità, u l-​funzjonijiet tal-​moħħ uman. Fl-​annimali kważi l-​funzjonijiet ċerebrali kollha ġew ipprogrammati f’dak li ġie msejjaħ għerf istintiv. Dan ma jiġrix fil-​każ tal-​bnedmin.—Proverbji 30:24-28.

Differenti mill-​imħuħ taʼ l-​annimali, parti kbira mill-​moħħ uman hija ħielsa minn programmi fissi. Alla żejjen lill-​bnedmin bil-​fakultà taʼ rieda ħielsa, li tagħmilhom kapaċi sabiex jieħdu deċiżjonijiet intelliġenti u biex juru kwalitajiet superjuri, bħalma huma l-​imħabba, il-​ġenerożità, in-​nuqqas taʼ egoiżmu, il-​ġustizzja, u l-​għerf.

Huwa loġiku li taħseb li Alla kien se joħloq lill-​bniedem b’kapaċità mentali bħal din mingħajr ma jipprovdi xi xorta taʼ gwida dwar kif l-​aħjar tistaʼ tiġi wżata? Alla ta gwida diretta lill-​ewwel bnedmin. (Ġenesi 2:15-17, 19; 3:8, 9) Saħansitra wara l-​waqgħa tal-​bniedem fid-​dnub, Jehovah kompla jiggwida lil irġiel u nisa leali, b’mod l-​iktar notevoli permezz tal-​Kelma mnebbħa tiegħu stess, il-​Bibbja. (Salm 119:105) Dan ippermetta lill-​bnedmin biex jiffaċċjaw b’suċċess il-​problemi taʼ kuljum tal-​ħajja hekk kif jużaw ir-​rieda ħielsa tagħhom bil-​għaqal.

L-​Oriġini Divin Tal-​Kitba Tal-​Bibbja

X’inhu dak li jagħmel lill-​Bibbja sors taʼ gwida taʼ min jafdaha? L-​ewwel ħaġa, tippreżenta informazzjoni li l-​Ħallieq biss jistaʼ jipprovdiha. Hi tiddeskrivi fil-​qosor l-​istorja taʼ ġrajjiet li seħħew ferm qabel il-​bidu tal-​ħajja umana. Per eżempju, tipprovdi l-​istorja taʼ kif l-​art ġiet ippreparata fi stadji suċċessivi sakemm saret addattata biex issostni l-​ħajja umana. (Ġenesi, kapitli 1, 2) Għalkemm dan ġie mniżżel fil-​Bibbja iktar minn 3,000 sena ilu, huwa fi qbil mal-​konċetti xjentifiċi moderni.

Ħafna qabel ma l-​umanità inġenerali aċċettat li l-​art kienet tonda, il-​Bibbja ddikjarat: “[Alla] qiegħed jifrex it-​Tramuntana fuq il-​post vojt, billi jdendel l-​art fuq xejn.” (Ġob 26:7) Iktar minn hekk, il-​Bibbja tirrivela li “hemm Wieħed li qiegħed jgħammar ’il fuq miċ-​ċirku taʼ l-​art, li dawk li jgħammru fiha huma bħal ġradijiet.” (Isaija 40:22) Alla, il-​Ħallieq, biss setaʼ jipprovdi dan id-​dettall.

L-abbiltà biex wieħed jara bil-​quddiem x’se jiġri m’huwiex għotja li ngħatat lill-​bniedem. Minflok, il-​Ħallieq ibassar il-​futur permezz tal-​paġni tal-​Bibbja. Alla nebbaħ lill-​profeta Isaija biex jikteb Dwaru: “Jiena l-​Wieħed Divin u ma hemm ebda Alla ieħor, lanqas ħadd bħali; il-​Wieħed li qiegħed iħabbar mill-​bidu l-​final, u minn żmien twil ilu l-​affarijiet li ma ntgħamlux.”—Isaija 46:9, 10.

Il-Bibbja wriet li hi tistaʼ tbassar il-​final mill-​bidu b’eżattezza taʼ l-​għaġeb. Per eżempju, bassret il-​qawmien, il-​waqgħa, u l-​karatteristiċi tal-​qawwiet dinjin prinċipali matul l-​eluf taʼ snin taʼ storja umana. Dawn il-​profeziji straordinarji kienu miktubin sekli qabel it-​twettieq tagħhom, f’xi każi eluf taʼ snin qabel. B’hekk il-​Bibbja tbassar b’eżattezza ġrajjiet taʼ llum, kif ukoll ir-​riżultat finali tagħhom. Il-​Bibbja hija unika wkoll għaliex tindika l-​mod taʼ salvazzjoni matul il-​qerda taʼ gvernijiet imperfetti magħmulin mill-​bniedem f’Armageddon, “[il]-gwerra tal-​jum il-​kbir t’Alla li Jistaʼ Kollox.” Is-​Saltna t’Alla f’idejn Ibnu, Ġesù Kristu, se twettaq dak l-​att hekk kbir.—Rivelazzjoni 16:14, 16; 17:9-18; Danjel, kapitli 2, 8.

Dejjem Taʼ Benefiċċju​—Qatt Taʼ Ħsara

Is-​sempliċi għerf uman huwa imperfett; għalhekk, il-​parir tal-​bniedem m’huwiex dejjem taʼ benefiċċju, saħansitra għalkemm jistaʼ jingħata b’intenzjonijiet tajbin. Dan ma jiġrix fil-​każ tal-​parir tal-​Bibbja. Alla nnifsu jgħid: “Jien, Jehovah, jien . . . il-​Wieħed li qiegħed jgħallmek biex tibbenefika lilek innifsek, il-​Wieħed li qiegħed iġiegħlek tirfes fil-​mogħdija li fiha għandek timxi. O kieku biss tagħti kas attwalment il-​kmandamenti tiegħi! Imbagħad il-​paċi tiegħek kieku ssir sewwa sew bħal xmara, u t-​tjieba tiegħek bħall-​mewġ tal-​baħar.”—Isaija 48:17, 18.

Gwida divina tgħinna biex nistabbilixxu l-​prijoritajiet u nżommu mal-​valuri superjuri fil-​ħajja. Waqt li s-​soċjetà moderna tpoġġi enfasi fuq kisbiet u miri materjali, il-​Bibbja tenfasizza kemm hu taʼ valur għalina li “nżommu għajnejna, mhux fuq l-​affarijiet li jidhru, imma fuq l-​affarijiet li ma jidhrux. Għax l-​affarijiet li jidhru huma temporanji, imma l-​affarijiet li ma jidhrux huma għal dejjem.” (2 Korintin 4:18) B’dan il-​mod aħna niġu inkuraġġiti biex ikollna l-​aqwa miri fil-​ħajja, jiġifieri, miri spiritwali f’konnessjoni maʼ li nagħmlu r-​rieda t’Alla, billi l-​mira aħħarija tkun dik taʼ ħajja eterna f’sistema ġdida taʼ ġustizzja.

Hekk kif il-​Kristjan jitħabat biex jiġri wara dawn il-​miri taʼ livell għoli, il-​parir tal-​Bibbja jgħinu biex jgħix l-​aqwa xorta taʼ ħajja possibbli f’din is-​sistema mill-​agħar taʼ affarijiet. L-​għerf uman modern għandu t-​tendenza li jinkuraġġixxi l-​filosofija taʼ li taħdem mill-​inqas u taqlaʼ l-​iktar li tistaʼ. Mill-​banda l-​oħra, il-​Bibbja tgħidilna li “dak li qiegħed jaħdem b’id merħija ma tantx se jkollu biex jgħix, imma id il-ħabrieki hija dik li tagħmlu għani.” L-​appostlu Pawlu kiteb lill-​Kristjani Ebrej: “Aħna fiduċjużi li għandna kuxjenza onesta, billi nixtiequ nġibu rwieħna bl-​onestà fl-​affarijiet kollha.”—Proverbji 10:4; Ebrej 13:18.

Il-Bibbja tagħti wkoll parir prattiku fuq l-​arranġament tal-​familja. Hija tistabbilixxi speċifikament l-​irwol kemm tal-​mara kif ukoll tar-​raġel fl-​arranġament taż-​żwieġ, kif ukoll il-​mod korrett kif trabbi u teduka lit-​tfal. Hija tgħid: “L-​irġiel miżżewġin għandhom iħobbu lin-​nisa tagħhom bħal ġisimhom stess. . . . Mill-​banda l-​oħra, il-​mara għandha jkollha rispett profond lejn żewġha. Tfal, kunu ubbidjenti lejn il-​ġenituri tagħkom . . . Intom, missirijiet, tkunux qegħdin tirritaw lil uliedkom, imma ibqgħu rabbuhom fid-​dixxiplina u r-​regular mentali taʼ Jehovah.” Li wieħed isegwi l-​parir superjuri tal-​Ħallieq jikkontribwixxi bil-​kbir għall-​istabbilità u l-​hena tal-​familji.—Efesin 5:21–6:4.

Futur Fiż-​Żgur Għal Dawk Li Jsegwu L-​Gwida T’Alla

Il-​Kelma miktuba t’Alla tindika s-​soluzzjoni li Alla għandu għall-​problemi kollha taʼ l-​umanità. Fil-​qrib ferm Alla Jehovah se jelimina lis-​sistema preżenti taʼ affarijiet, bl-​uġigħ, bl-​inġustizzja u bit-​tbatijiet kollha tagħha, u minflokha se jdaħħal is-​sistema ġdida tiegħu taʼ tjieba. Il-​Bibbja tiddeskrivi dan fit-​2 Pietru 3:7-10, billi żżid fil-​vers 13: “Hemm smewwiet ġodda u art ġdida li aħna qegħdin nistennew skond il-​wegħda tiegħu, u f’dawn it-​tjieba għandha tgħammar.” Dan jikkostitwixxi bil-​kbir l-​aqwa aħbar tajba li qatt tistaʼ tingħata lill-​familja umana. Huwa preċiżament il-​messaġġ li l-​Bibbja tippreżenta u li x-​Xhieda taʼ Jehovah jippridkaw f’iktar minn 200 art u gżira tal-​baħar.

Meta r-​rieda t’Alla tiġi pprattikata fuq l-​art kollha, il-​familja umana kollha kemm hi se tibbenefika billi ssegwi l-​gwida eċċellenti tal-​Ħallieq tagħha, Jehovah. Qatt iktar ma se jkun hemm problemi taʼ faqar, kriminalità, u drogi. L-​umanità qatt iktar ma se tiġi mifluġa bil-​mard, xjuħija, u mewt. Il-​familja umana se tkun mgħollija għall-​perfezzjoni li l-​ewwel ġenituri tagħna kellhom qabel ma rribellaw kontra l-​gwida t’Alla.

L-aħħar ktieb tal-​Bibbja kemm jiġborha fil-​qosor b’mod tajjeb il-​kundizzjoni taʼ dawk li jpoġġu l-​fiduċja tagħhom fil-​gwida divina! Rivelazzjoni 21:4, 5 jgħid: “[Alla] se jimsaħ għalkollox kull demgħa minn għajnejhom, u l-​mewt mhix se tkun iżjed, u la għali u la għajjat u lanqas uġigħ ma jkunu iżjed. L-​affarijiet taʼ qabel għaddew.” Il-​Ħallieq tagħna ggarantieh dak, billi jgħid: “Ħares! Qiegħed nagħmel l-​affarijiet kollha ġodda.” Hu jżid: “Dawn il-​kelmiet huma leali u veri.”

Jekk aħna se nirċievu dawn il-​barkiet, Alla x’jistenna minna? L-​appostlu Pawlu jispjega li r-​rieda t’Alla hi li “kull xorta taʼ nies għandhom jiġu salvati u jiġu għal għarfien eżatt tal-​verità.” (1 Timotew 2:4) Ix-​Xhieda taʼ Jehovah b’mod kordjali jistednuk biex tikseb dak l-​għarfien eżatt tal-​verità permezz taʼ studju bir-​reqqa tal-​Bibbja. Billi b’mod diliġenti titgħallem dwar ir-​rieda divina, inti wkoll tistaʼ ssib permezz taʼ l-​esperjenza li l-​għerf divin huwa l-​uniku gwida taʼ min joqgħod fuqha f’dawn iż-​żminijiet perikolużi. L-​urġenza taż-​żminijiet jagħmilha iktar imperattiva minn qatt qabel biex issegwiha! (w94 4/15)