Għalfejn Din is-​Segretezza Kollha?

“XEJN m’huwa taʼ piż daqs sigriet.” Jew għall-​inqas hekk isostni proverbju Franċiż. Jistaʼ dan jispjega għala nħossuna tajjeb meta nkunu nafu xi sigriet imma xi kultant frustrati meta ma nistgħux nitkellmu dwaru? Madankollu, matul is-​sekli ħafna nies għoġbithom is-​segretezza, billi ngħaqdu flimkien fi gruppi sigrieti fit-​tfittxija għal għan komuni.

Fost l-​iktar bikrin minn dawn is-​soċjetajiet sigrieti kien hemm il-​kulti misterjużi misjubin fl-​Eġittu, fil-​Greċja, u f’Ruma. Iktar tard xi wħud minn dawn il-​gruppi tbiegħdu mill-​influwenza reliġjuża tagħhom u adottaw xejriet politiċi, ekonomiċi jew soċjali. Per eżempju, meta ġew ifformati għaqdiet fl-​Ewropa Medjevali, il-​membri tagħhom irrikorrew għas-​segretezza primarjament għall-​protezzjoni ekonomika tagħhom infushom.

Għaqdiet sigrieti fiż-​żminijiet moderni taʼ spiss ġew ifformati għal raġunijiet xi ftit jew wisq onorabbli, possibbilment għal “skopijiet soċjali u benevolenti,” skond l-​Encyclopædia Britannica, u “biex iwettqu programmi karitattivi u edukattivi.” Xi organizzazzjonijiet fraterni, klabbijiet taż-​żgħażagħ, klabbijiet soċjali, u gruppi oħrajn huma wkoll sigrieti, jew għall-​inqas sigrieti parzjalment. Ġeneralment, dawn il-​gruppi ma jkollhomx intenzjoni li jagħmlu d-​deni, ladarba l-​membri tagħhom sempliċement isibu s-​segretezza eċċitanti. Ir-​riti sigrieti tal-​bidu għandhom appell emozzjonali qawwi u jsaħħu l-​għaqda taʼ sħubija u l-​unità. Il-​membri jakkwistaw sentiment taʼ li jappartjenu lil xi ħaġa u sens taʼ skop. Soċjetajiet sigrieti taʼ din ix-​xorta normalment m’humiex taʼ theddida għal dawk li m’humiex membri. Dawn taʼ l-​aħħar ma jkunu qegħdin jitilfu xejn għax ma jkunux jafu s-​sigrieti.

Meta S-​Segretezza Tindika L-​Periklu

Mhux il-​gruppi sigrieti kollha huma sigrieti sa l-​istess grad. Imma dawk li għandhom “sigrieti ġewwa sigrieti,” bħalma tesprimiha l-​Encyclopædia Britannica, huma taʼ periklu partikulari. Din tispjega li “bl-​użu taʼ ismijiet speċjali, provi jew rivelazzjonijiet,” membri fl-​ogħla gradi jirnexxilhom “jinqatgħu għalihom infushom,” u b’hekk jistimulaw “lil dawk tal-​gradi iktar baxxi ħalli jagħmlu l-​isforz neċessarju biex jilħqu l-​gradi iktar għoljin.” Il-​periklu inerenti fi gruppi bħal dawn huwa ovvju. Dawk fil-​gradi iktar baxxi għandhom mnejn ikunu kompletament fl-​għama taʼ l-​objettivi reali taʼ l-​organizzazzjoni, billi ma jkunux għadhom ipprogressaw għal dak il-​livell taʼ rivelazzjoni. Huwa faċli li tiġi involut fi grupp li l-​għanijiet u l-​metodi tiegħu taʼ kif jilħaqhom, huma magħrufin minnek parzjalment u, tabilħaqq, forsi lanqas saħansitra ma tkun informat għalkollox bihom. Imma l-​persuna li tkun ġiet introdotta fi grupp bħal dan għandha mnejn issibha diffiċli li tillibera lilha nfisha; hi tkun, biex ngħidu hekk, marbuta bil-​ktajjen tas-​segretezza.

Is-segretezza turi saħansitra periklu akbar, madankollu, meta grupp isegwi għanijiet illegali jew kriminali u għalhekk jipprova jaħbi l-​istess eżistenza tiegħu. Jew jekk l-​eżistenza u l-​miri ġenerali tiegħu jiġu magħrufin, għandu mnejn li jipprova jżomm lill-​membri tiegħu u l-​pjani tiegħu għall-​futur qarib, sigrieti. Dan huwa veru dwar gruppi terroristiċi b’motivazzjoni qawwija u li perjodikament jaħsdu d-​dinja bl-​attakki terroristiċi tagħhom.

Iva, is-​segretezza tistaʼ tkun perikoluża, kemm għal individwi u kemm għas-​soċjetà inġenerali. Aħseb ftit dwar il-​gruppi sigrieti taʼ żgħażagħ li b’mod vjolenti jaħbtu għal vittmi innoċenti, l-​assoċjazzjonijiet kriminali bħall-​Mafja sigrieta, il-​gruppi li jippromwovu s-​supremazija tal-​bojod bħall-​Ku Klux Klan,a biex ma nsemmux il-​ħafna gruppi terroristiċi madwar id-​dinja li jkomplu jfixklu l-​isforzi biex jiġu milħuqin il-​paċi u s-​sigurtà dinjin.

X’Inhuma Jagħmlu Issa?

Matul is-​snin ħamsin, bħala riżultat tal-​Gwerra Bierda, gruppi sigrieti ġew organizzati f’diversi pajjiżi fl-​Ewropa tal-​Punent biex jaqdu bħala l-​bażi għall-​movimenti tar-​reżistenza, li ma jmorrux xi darba s-​Sovjetiċi jipprovaw jikkonkwistaw lill-​Ewropa tal-​Punent. Skond ir-​rivista taʼ l-​aħbarijiet Ġermaniża Focus, per eżempju, “79 maħżen sigriet taʼ l-​armi” ġew stabbiliti fl-​Awstrija matul dan il-​perijodu. Mhux il-​pajjiżi Ewropej kollha kienu saħansitra konxji taʼ dawn il-​gruppi. Rivista taʼ l-​aħbarijiet b’mod realistiku rrapportat fil-​bidu tas-​snin disgħin: “Għadu mhux magħruf kemm għad baqaʼ minn dawn l-​organizzazzjonijiet illum u x’setgħu kienu qegħdin jagħmlu dan l-​aħħar.”

Iva, tabilħaqq. Min jistaʼ tassew ikun jaf kemm-il grupp sigriet għandhom mnejn f’dan il-​mument stess qegħdin jikkaġunaw theddida akbar milli qatt nistgħu nimmaġinaw?

(w97 6/1)

[Nota taʼ taħt]