Il-​Prezz tal-​Fidwa li Ħallas Kristu—It-​Triq t’Alla għas-​Salvazzjoni

“Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.”—ĠWANN 3:16.

1, 2. Iddeskrivi s-​sitwazzjoni diffiċli li żviluppat rigward ir-​razza umana.

IMMAĠINA li qed issofri minn marda li żgur toqtlok jekk ma tiġix operat. Kif kont tħossok li kieku l-​prezz taʼ l-​operazzjoni kien ferm iżjed milli stajt taffordja? Xi ngħidu jekk lanqas saħansitra r-​riżorsi tal-​familja tiegħek u dawk taʼ ħbiebek flimkien ma jistgħu jħallsu għaliha? Li tkun iffaċċjat minn dilemma bħal din, fejn ħajtek tkun mhedda, ikun ferm frustranti!

² Dan jagħti stampa taʼ sitwazzjoni li żviluppat rigward ir-​razza umana. L-​ewwel ġenituri tagħna, Adam u Eva, inħolqu perfetti. (Dewteronomju 32:4) Kellhom il-​prospett li jgħixu għal dejjem u li jwettqu l-​iskop t’Alla: “Nisslu u oktru, u imlew l-​art, u aħkmuha.” (Ġenesi 1:28) Madankollu, Adam u Eva rribellaw kontra l-​Ħallieq tagħhom. (Ġenesi 3:1-6) Id-​diżubbidjenza tagħhom ġabet id-​dnub mhux biss fuq Adam u Eva nfushom imma wkoll fuq nisilhom li kien għadu ma twelidx. Ir-​raġel leali Ġob qal iktar tard: “Xi ħadd, mela, jistaʼ jislet is-​safi mill-​imniġġes? Ħadd!”—Ġob 14:4.

3. Il-​mewt kif infirxet fuq il-​bnedmin kollha?

³ Id-​dnub huwa għalhekk bħal marda li infettat lil kull wieħed u waħda minna, għax il-​Bibbja tgħid li “il-​bnedmin kollha dinbu.” (Korsiv tagħna.) Din il-​kundizzjoni għandha konsegwenzi li jheddu l-​ħajja. Tabilħaqq, “Il-​ħlas tad-​dnub hu l-​mewt.” (Rumani 3:23; 6:23) Ħadd minna ma jistaʼ jiskappa. Il-​bnedmin kollha jidinbu, u għalhekk il-​bnedmin kollha jmutu. Bħala dixxendenti taʼ Adam, aħna twelidna f’din il-​qagħda mwiegħra. (Salm 51:7 [Salm 51:5, NW]) “Kien permezz taʼ bniedem wieħed,” kiteb Pawlu, “li fid-​dinja daħal id-​dnub, u permezz tad-​dnub il-​mewt, u hekk il-​mewt laħqet il-​bnedmin kollha għax kollha dinbu.” (Rumani 5:12) Iżda dan ma jfissirx li aħna m’għandna ebda tama għas-​salvazzjoni.

Id-​Dnub u l-​Mewt Eliminati

4. Il-​bnedmin għala ma jistgħux waħedhom jeliminaw il-​mard u l-​mewt?

⁴ X’hemm bżonn biex jiġu eliminati d-​dnub u l-​konsegwenza tiegħu, il-​mewt? Żgur li xi ħaġa ferm iżjed milli jistaʼ jipprovdi kwalunkwe bniedem. Is-​salmista ilmenta: “Għoli wisq il-​prezz taʼ ħajtu, qatt ma jkun biżżejjed, biex wieħed jgħix għal dejjem u ma jara qatt il-​qabar.” (Salm 49:9, 10 [Salm 49:8, 9, NW]) Veru, forsi nistgħu ntawlu ħajjitna bi ftit snin permezz taʼ dieta tajba u kura medika, iżda ħadd minna ma jistaʼ jfejjaq il-​kundizzjoni midinba li writna. Ħadd minna ma jistaʼ jreġġaʼ lura l-​effetti li jdgħajfu li ġġib magħha x-​xjuħija u jirrestawra l-​ġisem tagħna għall-​perfezzjoni li Alla riedu li jkollu oriġinalment. Pawlu żgur li ma kienx qed jesaġera meta kiteb li minħabba d-​dnub taʼ Adam, il-​ħolqien uman “jinsab taħt il-​frugħa”​—jew kif tittraduċiha The Jerusalem Bible, “ma tħalliex jilħaq l-​iskop tiegħu.” (Rumani 8:​20) B’ferħ, iżda, il-​Ħallieq ma abbandunaniex. Għamel provvediment biex ineħħi d-​dnub u l-​mewt darba għal dejjem. Kif?

5. Il-​Liġi li ngħatat lil Iżrael kif kienet tirrifletti stima kbira lejn il-​ġustizzja?

⁵ Jehovah “jħobb id-​dritt u s-​sewwa.” (Salm 33:5) Il-​kodiċi tal-​Liġi li ta lil Iżrael tirrifletti stima qawwija għall-​bilanċ u l-​imparzjalità fil-​ġustizzja. Per eżempju, ġewwa din il-​ġabra taʼ liġijiet, naqraw li ‘ħajja titħallas b’ħajja.’ Fi kliem ieħor, li kieku Iżraelit qatel lil xi ħadd, kien ikollu jħallas b’ħajtu stess għal dik il-​ħajja li jkun neħħa. (Eżodu 21:23; Numri 35:21) B’hekk dan kien jibbilanċja l-​miżien tal-​ġustizzja divina.—Qabbel Eżodu 21:30.

6. (a) Adam f’liema sens setaʼ jissejjaħ qattiel? (b) Adam liema xorta taʼ ħajja tilef, u liema xorta taʼ sagrifiċċju kien meħtieġ biex jibbilanċja l-​miżien tal-​ġustizzja?

⁶ Meta Adam dineb, hu sar qattiel. F’liema sens? Fis-​sens li kien se jgħaddi l-​kundizzjoni midinba tiegħu​—u għalhekk il-​mewt—​lid-dixxendenti kollha tiegħu. Huwa minħabba d-​diżubbidjenza taʼ Adam li f’dan l-​istess waqt, ġisimna qed jiddeterjora, u miexi pass wara l-​ieħor lejn il-​qabar. (Salm 90:10) Id-​dnub taʼ Adam għandu saħansitra implikazzjoni iżjed serja. Ftakar, dik li Adam tilef għalih innifsu u għal nislu ma kinitx ħajja ordinarja taʼ xi 70 jew 80 sena. Tilef ħajja perfetta​—fil-​fatt, ħajja taʼ dejjem. Mela jekk ‘ħajja trid titħallas b’ħajja,’ liema xorta taʼ ħajja trid titħallas biex tissodisfa l-​ġustizzja f’dan il-​każ? Loġikament, trid tkun ħajja umana perfetta​—ħajja li, bħal dik taʼ Adam, kellha l-​potenzjal li tipproduċi nisel uman perfett. Jekk kellha tiġi offruta bħala sagrifiċċju, ħajja umana perfetta mhux biss kienet se tibbilanċja l-​miżien tal-​ġustizzja imma wkoll kienet se tagħmel possibbli t-​tneħħija għalkollox tad-​dnub u l-​konsegwenza tiegħu, il-​mewt.

Titħallas l-​Ispiża tad-​Dnub

7. Iddeskrivi xi tfisser il-​frażi “prezz li tħallas għall-​fidwa.”

⁷ Il-​prezz meħtieġ biex jifdina mid-​dnub huwa magħruf fil-​Bibbja bħala “l-​prezz tal-​fidwa.” (Salm 49:8 [Salm 49:7, NW]) Bil-​Malti dan it-​terminu jistaʼ jirreferi għall-​ħlas li jintalab biex jinħeles xi ħadd li jkun ġie maħtuf. M’għandniex xi ngħidu, il-​ħlas għall-​fidwa li pprovda Jehovah ma jinvolvi l-​ebda ħtif. Il-​konċett li jitħallas prezz jibqaʼ l-​istess. Fil-​fatt, il-​forma tal-​verb tal-​kelma Ebrajka tradotta “prezz tal-​fidwa” litteralment tfisser “jgħatti.” Biex ipatti għad-​dnub, il-​prezz tal-​fidwa jrid jaqbel preċiż maʼ dak li suppost jgħatti​—il-​ħajja umana u perfetta taʼ Adam.

8. (a) Iddeskrivi l-​prinċipju taʼ xiri lura. (b) Il-​prinċipju taʼ xiri lura kif inhu rrelatat magħna bħala midinbin?

⁸ Dan huwa fi qbil maʼ prinċipju li nsibu fil-​Liġi Mosajka​—il-​prinċipju taʼ xiri lura. Jekk wieħed Iżraelit kien jaqaʼ fil-​faqar u jbigħ lilu nnifsu fil-​jasar lil xi ħadd mhux Iżraelit, qarib setaʼ jixtrih lura (jew, jifdih) billi jħallas prezz li kien jitqies bħala taʼ valur daqs l-​irsir. (Levitiku 25:47-49) Il-​Bibbja tgħid li bħala bnedmin imperfetti aħna “lsiera tad-​dnub.” (Rumani 6:6; 7:14, 25) X’kien hemm bżonn biex aħna ninxtraw lura? Bħalma rajna, it-​telfien taʼ ħajja umana perfetta kien jirrikjedi li titħallas ħajja umana perfetta​—xejn iżjed u xejn inqas.

9. Jehovah kif għamel provvediment biex jitgħatta d-​dnub?

⁹ M’għandniex xi ngħidu, aħna l-​bnedmin nitwieldu imperfetti. Ebda wieħed minna m’hu daqs Adam; ebda wieħed minna ma jistaʼ jħallas il-​prezz tal-​fidwa li titlob il-​ġustizzja. Bħalma ssemma fil-​bidu, huwa bħallikieku għandna marda li thedded il-​ħajja u ma nistgħux naffordjaw inħallsu għall-​operazzjoni li tistaʼ tfejjaqna. F’sitwazzjoni bħal din, ma konniex inkunu grati kieku xi ħadd jidħol għalina u jħallsilna l-​ispiża? Dan hu preċiż dak li għamel Jehovah! Hu għamel provvediment biex jifdina mid-​dnub, darba għal dejjem. Iva, hu lest li jagħtina dak li aħna qatt ma stajna niksbu bis-​saħħa tagħna nfusna. Kif? “Id-​don li tana Alla,” kiteb Pawlu, “huwa l-​ħajja taʼ dejjem fi Kristu Ġesù Sidna.” (Rumani 6:23) Ġwanni ddeskriva lil Ġesù bħala “l-​Ħaruf taʼ Alla, li jneħħi d-​dnub tad-​dinja.” (Ġwann 1:29) Ejjew naraw kif Jehovah uża lil Ibnu l-​maħbub biex iħallas il-​prezz tal-​fidwa.

“Fidwa [li Tikkorrispondi] għal Kulħadd”

10. Profeziji rigward “żerriegħa” kif waslu li jiffokaw fuq Ġużeppi u Marija?

¹⁰ Preċiż wara r-​ribelljoni f’Għeden, Jehovah ħabbar l-​iskop tiegħu li jipproduċi żerriegħa, jew ‘nisel,’ li kellu jħallas biex jifdi lill-​umanità mid-​dnub. (Ġenesi 3:15) Permezz taʼ serje taʼ rivelazzjonijiet divini, Jehovah identifika l-​linja tal-​familja li kellha tipproduċi din iż-​żerriegħa. Maż-​żmien dawn ir-​rivelazzjonijiet iffokaw fuq Ġużeppi u Marija, koppja għarajjes li kienu jgħixu fil-​Palestina. F’ħolma, intqal lil Ġużeppi li Marija kienet tqila permezz taʼ l-​ispirtu qaddis. L-​anġlu qal: “Hi se jkollha iben, u inti ssemmih Ġesù, għax hu jsalva l-​poplu tiegħu minn dnubiethom.”—Mattew 1:20, 21.

11. (a) Jehovah kif irranġa biex Ibnu jitwieled bħala bniedem perfett? (b) Ġesù għala setaʼ jipprovdi ‘fidwa li tikkorrispondi’?

¹¹ Din bl-​ebda mod ma kienet xi tqâla ordinarja, għax Ġesù kellu eżistenza fis-​sema qabel ma sar bniedem. (Proverbji 8:22-31; Kolossin 1:15) Il-​qawwa mirakoluża taʼ Jehovah ttrasferiet il-​ħajja taʼ Ġesù għal ġol-​ġuf taʼ Marija, u b’hekk sar possibbli li dan l-​Iben maħbub t’Alla jitwieled bħala bniedem. (Ġwann 1:1-3, 14; Filippin 2:6, 7) Jehovah mexxa l-​affarijiet b’tali mod li Ġesù ma ċċappasx bid-​dnub taʼ Adam. Għall-​kuntrarju, Ġesù twieled perfett. Għalhekk, kien jippossiedi dak li tilef Adam​—ħajja umana perfetta. Finalment, bniedem li setaʼ jħallas l-​ispiża tad-​dnub! U dak hu preċiż li għamel Ġesù fl-​14 taʼ Nisan, tas-​sena 33 E.K. F’dak il-​jum storiku, Ġesù ħalla lilu nnifsu jingħata l-​mewt mill-​avversarji tiegħu, u b’hekk ipprovda “fidwa [li tikkorrispondi] għal kulħadd.”—1 Timotju 2:6.

Il-​Valur taʼ Ħajja Umana Perfetta

12. (a) Iddeskrivi d-​differenza kruċjali bejn il-​mewt taʼ Ġesù u dik taʼ Adam. (b) Ġesù kif sar “Missier għal dejjem” għall-​bnedmin ubbidjenti?

¹² Hemm differenza bejn il-​mewt taʼ Ġesù u dik taʼ Adam​—differenza li tenfasizza l-​valur tal-​prezz li tħallas għall-​fidwa. Il-​mewt taʼ Adam kienet mistħoqqa, għax hu m’obdiex apposta lill-​Ħallieq tiegħu. (Ġenesi 2:16, 17) B’kuntrast, il-​mewt taʼ Ġesù kienet totalment mhix mistħoqqa, għax “ma kien għamel ebda dnub.” (1 Pietru 2:22) Għalhekk, meta miet Ġesù, kellu xi ħaġa taʼ valur enormi li l-​midneb Adam ma kellux f’mewtu​—id-​dritt għal ħajja umana perfetta. B’hekk, il-​mewt taʼ Ġesù kellha valur sagrifikali. Meta telaʼ s-​sema bħala persuna spirtu, hu ppreżenta lil Jehovah l-​valur tas-​sagrifiċċju tiegħu. (Lhud 9:24) Billi għamel dan, Ġesù xtara lill-​umanità midinba u sar il-​Missier il-​ġdid tagħhom, wieħed li ħa l-​post taʼ Adam. (1 Korintin 15:45) Bix-​xieraq, Ġesù jissejjaħ “Missier għal dejjem.” (Isaija 9:5 [Isaija 9:6, NW]) Aħseb ftit x’ifisser dan! Adam, missier midneb, firex il-​mewt fuq id-​dixxendenti kollha tiegħu. Ġesù, Missier perfett, juża l-​valur tas-​sagrifiċċju tiegħu biex jagħti l-​ħajja taʼ dejjem lill-​bnedmin ubbidjenti.

13. (a) Agħti tixbieha taʼ kif Ġesù kkanċella d-​dejn miġjub minn Adam. (b) Is-​sagrifiċċju taʼ Ġesù għala ma jgħattix id-​dnub taʼ l-​ewwel ġenituri tagħna?

¹³ Iżda, kif setgħet il-​mewt taʼ raġel wieħed tgħatti d-​dnubiet taʼ ħafna? (Mattew 20:28) F’artiklu taʼ ftit tas-​snin ilu, tajna din it-​tixbieha dwar il-​ħlas għall-​fidwa: “Immaġina fabbrika kbira b’mijiet taʼ impjegati. Manager diżonest ifalli n-​negozju; il-​fabbrika tagħlaq il-​bibien tagħha. Mijiet issa huma bla xogħol u ma jistgħux iħallsu l-​kontijiet tagħhom. Sħabhom fiż-​żwieġ, uliedhom, u, iva, il-​kredituri, kollha se jbatu minħabba l-​korruzzjoni taʼ dak ir-​raġel wieħed! Imbagħad jiġi benefattur tat-​tajjeb li jħallas id-​dejn tal-​kumpanija u jerġaʼ jiftaħ il-​fabbrika. It-​tneħħija taʼ dak id-​dejn wieħed, mill-​banda l-​oħra, iġġib serħan sħiħ għall-​ħafna impjegati, għall-​familji tagħhom, u għal dawk il-​kredituri. Imma l-​manager li kien hemm se jkollu sehem mill-​prosperità l-​ġdida? Le, hu qiegħed il-​ħabs u b’hekk b’mod permanenti bla xogħol! Bl-​istess mod, it-​tneħħija tad-​dejn wieħed taʼ Adam iġġib benefiċċji għal miljuni mid-​dixxendenti tiegħu​—imma mhux lil Adam.”

14, 15. Adam u Eva għala jistgħu jissejħu midinbin apposta, u s-​sitwazzjoni tagħna kif inhi differenti minn tagħhom?

¹⁴ Dan huwa ġust. Ftakar, Adam u Eva dinbu apposta. Għażlu li ma jobdux lil Alla. B’kuntrast, aħna nitwieldu bid-​dnub. M’għandniex għażla. Minkejja kemm naħdmu iebes, ma nistgħux nevitaw kompletament li nidinbu. (1 Ġwann 1:8) Xi drabi għandna mnejn inħossuna bħal Pawlu li kiteb: “Meta rrid nagħmel it-​tajjeb, ifeġġ quddiemi l-​ħażin. Skond il-​bniedem taʼ ġewwa togħġobni l-​liġi taʼ Alla; iżda nilmaħ fil-​membri taʼ ġismi liġi oħra titqabad kontra l-​liġi taʼ moħħi u tjassarni taħt il-​liġi tad-​dnub li hemm ġo ġismi. Msejken bniedem li jien!”—Rumani 7:21-24.

¹⁵ Madankollu, minħabba l-​prezz li tħallas għall-​fidwa, aħna għandna t-​tama! Ġesù hu ż-​żerriegħa li permezz tiegħu, bħalma wiegħed Alla, ‘se jitbierku l-​ġnus kollha taʼ l-​art.’ (Ġenesi 22:18; Rumani 8:20) Is-​sagrifiċċju taʼ Ġesù jiftaħ il-​bieb għal opportunitajiet meraviljużi għal dawk li jeżerċitaw fidi fih. Ejjew nikkunsidraw xi ftit minnhom.

Nibbenefikaw mill-​Prezz tal-​Fidwa li Ħallas Kristu

16. Minkejja l-​kundizzjoni midinba tagħna, liema benefiċċji nistgħu ngawdu issa minħabba l-​prezz tal-​fidwa li ħallas Ġesù?

¹⁶ Ġakbu, wieħed mill-​kittieba tal-​Bibbja, jirrikonoxxi li “aħna lkoll niżbaljaw, u taʼ sikwit.” (Ġakbu 3:2) Madankollu, minħabba l-​prezz tal-​fidwa li ħallas Kristu, l-​iżbalji tagħna jistgħu jinħafru. Ġwanni jikteb: “Jekk xi ħadd jidneb, aħna għandna Difensur quddiem il-​Missier, lil Ġesù Kristu, il-​ġust. U hu jħallas għal dnubietna.” (1 Ġwann 2:1, 2) M’għandniex xi ngħidu, m’għandniex inħarsu lejn id-​dnub b’mod indifferenti. (Ġuda 4; qabbel l-1 Korintin 9:27.) Madankollu, jekk niżbaljaw, nistgħu niftħu qalbna maʼ Jehovah, fiduċjużi li hu ‘lest li jaħfer.’ (Salm 86:5; 130:3, 4; Isaija 1:18; 55:7; Atti 3:19) B’hekk, il-​prezz li tħallas għall-​fidwa jgħinna naqdu lil Alla b’kuxjenza safja u jagħmilha possibbli għalina li navviċinawh fit-​talb f’isem Ġesù Kristu.—Ġwann 14:13, 14; Lhud 9:14.

17. Minħabba l-​prezz li tħallas għall-​fidwa, liema barkiet futuri huma possibbli?

¹⁷ Il-​prezz tal-​fidwa li ħallas Kristu jiftaħ it-​triq għat-​twettiq taʼ l-​iskop t’Alla​—li bnedmin ubbidjenti jgħixu għal dejjem fil-​Ġenna fuq l-​art. (Salm 37:29) Pawlu kiteb: “Fih [f’Ġesù] il-​wegħdiet taʼ Alla kollha saru ‘iva’.” (2 Korintin 1:20) Veru, il-​mewt “saltnet.” (Rumani 5:17) Il-​prezz li tħallas għall-​fidwa jipprovdi bażi biex Alla jeqred lil dan “l-​aħħar għadu.” (1 Korintin 15:26; Apokalissi 21:4) Il-​prezz tal-​fidwa li ħallas Ġesù jistaʼ jkun taʼ benefiċċju saħansitra għal dawk li mietu. “Tiġi siegħa,” qal Ġesù, “meta dawk kollha li jkunu fl-​oqbra jisimgħu leħnu [leħen Ġesù] u joħorġu.”—Ġwann 5:28, 29; 1 Korintin 15:20-22.

18. Id-​dnub liema effett traġiku kellu fuq il-​bnedmin, u dan kif se jitreġġaʼ lura fid-​dinja l-​ġdida t’Alla?

¹⁸ Aħseb ftit x’għaxqa tkun li nesperjenzaw il-​ħajja kif suppost li kellha tkun​—ħielsa mill-​ansjetajiet li tant jgħakksuna llum! Id-​dnub tellfilna l-​armonija, mhux biss m’Alla, imma wkoll maʼ moħħna, qalbna, u ġisimna stess. Madankollu, il-​Bibbja twiegħed li fid-​dinja l-​ġdida t’Alla, “ħadd minn min jgħammar hemm ma jgħid: ‘Jien marid.’” Iva, mard fiżiku u emozzjonali qatt iktar ma jibqaʼ jgħakkes lill-​umanità. Għala? Isaija jwieġeb: “Il-​poplu li hemm fiha tinħafirlu ħżunitu.”—Isaija 33:24.

Il-​Prezz li Tħallas għall-​Fidwa​—Espressjoni taʼ Mħabba

19. Kif għandna nirreaġixxu individwalment għall-​prezz tal-​fidwa li ħallas Kristu?

¹⁹ L-​imħabba qanqlet lil Jehovah biex jibgħat lil Ibnu l-​maħbub. (Rumani 5:8; 1 Ġwann 4:9) Mill-​banda l-​oħra, l-​imħabba qanqlet lil Ġesù biex ‘iduq il-​mewt għal kulħadd.’ (Lhud 2:9; Ġwann 15:13) Bir-​raġun kollu, Pawlu kiteb: “L-​imħabba taʼ Kristu ġġegħelna . . . Miet għal kulħadd biex dawk li jgħixu ma jgħixux għalihom infushom, imma għal dak li miet u rxoxta għalihom.” (2 Korintin 5:14, 15) Jekk aħna napprezzaw dak li Ġesù għamel għalina, se nirreaġixxu. Wara kollox, il-​prezz li tħallas għall-​fidwa jagħmilha possibbli għalina li ninħelsu mill-​mewt! Żgur li ma nkunux irridu li bl-​azzjonijiet tagħna nimplikaw li nqisu s-​sagrifiċċju taʼ Ġesù bħala li hu taʼ valur ordinarju.—Lhud 10:29.

20. Liema huma xi modi li bihom nosservaw ‘kelmet’ Ġesù?

²⁰ Kif nistgħu nuru apprezzament mill-​qalb għall-​prezz li tħallas għall-​fidwa? Ftit qabel ma ġie arrestat, Ġesù qal: “Jekk xi ħadd iħobbni, iħares kelmti.” (Ġwann 14:23) ‘Kelmet’ Ġesù tinkludi l-​kmand tiegħu li aħna nieħdu sehem b’żelu biex inwettqu l-​inkarigu: “Morru, mela, agħmlu dixxipli mill-​ġnus kollha, u għammduhom.” (Mattew 28:19) Ubbidjenza lejn Ġesù tirrikjedi wkoll li aħna nuru mħabba għal ħutna spiritwali.—Ġwann 13:34, 35.

21. Għala għandna nattendu għaċ-​ċelebrazzjoni tal-​Mafkar fl-​1 t’April?

²¹ Wieħed mill-​aħjar modi kif aħna nistgħu nuru apprezzament għall-​prezz li tħallas għall-​fidwa huwa billi nattendu l-​Mafkar tal-​mewt taʼ Kristu, li din is-​sena se jinżamm fl-​1 t’April.a Dan ukoll huwa parti minn ‘kelmet’ Ġesù, għax meta waqqaf din iċ-​ċelebrazzjoni, Ġesù kkmanda lis-​segwaċi tiegħu: “Agħmlu dan b’tifkira tiegħi.” (Luqa 22:19) Bl-​attendenza tagħna għal dan l-​iktar avveniment importanti u billi noqogħdu attenti b’mod ħerqan għal dak kollu li kkmanda Ġesù, aħna se nuru l-​konvinzjoni soda tagħna li l-​prezz tal-​fidwa li ħallas Ġesù hu t-​triq t’Alla għas-​salvazzjoni. Verament, “f’ħadd ħliefu ma hemm salvazzjoni.”—Atti 4:12.

[Nota taʼ taħt]

Tiftakar Int?

◻ Il-​bnedmin għala ma jistgħux ipattu għall-​kundizzjoni midinba tagħhom?

◻ Ġesù b’liema mod hu “fidwa [li tikkorrispondi] għal kulħadd”?

◻ Ġesù kif uża d-​dritt li kellu għal ħajja umana perfetta għall-​vantaġġ tagħna?

◻ Liema barkiet jiġu fuq l-​umanità minħabba l-​prezz tal-​fidwa li ħallas Kristu?

[Stampa f’paġna 15]

Bniedem perfett biss​—l-​ekwivalenti taʼ Adam—​setaʼ jibbilanċja l-​miżien tal-​ġustizzja

[Stampa f’paġna 16]

Ladarba Ġesù kellu d-​dritt għal ħajja umana perfetta, il-​mewt tiegħu kellha valur sagrifikali