Ibqaʼ Sħiħ, u Irbaħ it-​Tellieqa għall-​Ħajja

KIEKU jkollok tivvjaġġa fuq il-​baħar f’maltempata kbira, liema tip taʼ bastiment kont tippreferi? Tkun trid dgħajsa żgħira u mhux b’saħħitha jew vapur mibni tajjeb u b’saħħtu? Bla dubju kont tagħżel il-​vapur, ladarba dan jistaʼ jikkumbatti aħjar mal-​mewġ vjolenti.

Waqt li għaddejjin minn din is-​sistema dinjija mqallba u perikoluża, aħna niffaċċjaw ċerti sfidi li jbeżżgħuna. Per eżempju, iż-​żgħażagħ kultant jistgħu jħossuhom konfużi u inċerti minħabba l-​ideat u x-​xejriet imħawdin taʼ din id-​dinja. Individwi li reċentement saru Kristjani forsi għadhom iħossuhom xi ftit inċerti. Anki xi wħud sodi li ilhom jaqdu lil Jehovah bil-​lealtà għal bosta snin jistgħu jġarrbu provi minħabba li t-​tamiet tagħhom ikunu għadhom ma twettqux kompletament.

Mhix xi ħaġa ġdida li xi ħadd iħossu hekk. Qaddejja leali taʼ Jehovah, bħal Mosè, Ġob, u David, kultant ħassewhom inċerti. (Numri 11:​14, 15; Ġob 3:​1-4; Salm 55:5 [55:​4, NW]) Madankollu, fil-​ħajja tagħhom kienet tispikka d-​devozzjoni sħiħa lejn Jehovah. L-​eżempju mill-​aqwa tagħhom jinkuraġġina nżommu sħaħ bħalhom, imma Satana x-​Xitan irid jiżvijana mit-​tellieqa għall-​ħajja taʼ dejjem. (Luqa 22:31) Għalhekk, aħna kif nistgħu nibqgħu sodi, “sħaħ fil-​fidi”? (1 Pietru 5:9) Kif nistgħu nsaħħu lil sħabna fit-​twemmin?

Jehovah Iridna Nżommu Sħaħ

Jekk aħna leali lejn Jehovah, hu dejjem se jkun lest biex jgħinna nibqgħu sodi. Is-​salmista David iffaċċja ħafna sitwazzjonijiet diffiċli, imma dejjem ittama f’Alla, u b’hekk setaʼ jkanta: “[Jehovah] minn bir waħxi tellagħni, minn qalb il-​ħama u t-​tajn; fuq il-​blat qegħedli riġlejja, u saħħaħli l-​mixi tiegħi.”—Salm 40:3 (40:2, NW).

Jehovah jagħtina s-​saħħa biex niġġieldu “it-​taqbida t-​tajba tal-​fidi” ħalli nkunu nistgħu ‘nirbħu l-​ħajja taʼ dejjem.’ (1 Timotju 6:12) Hu jipprovdi wkoll il-​mezz biex aħna nibqgħu sodi u nirbħu l-​ġlieda spiritwali tagħna. L-​appostlu Pawlu ħeġġeġ lill-​Kristjani sħabu biex ‘jitwettqu fil-​Mulej u jissaħħu bil-​qawwa tiegħu,’ u biex ‘jilbsu l-​armatura t’Alla biex ikunu jifilħu jieqfu għat-​tnassis tax-​Xitan.’ (Efesin 6:​10-17) Imma x’jistaʼ jtellfilna l-​istabbilità? U kif nistgħu nirreżistu dawn l-​influwenzi perikolużi?

Għassu Kontra Affarijiet li Jtellfuna milli Nibqgħu Sodi

Huwa għaqli li niftakru dan il-​fatt vitali: Id-​deċiżjonijiet li nieħdu eventwalment għandhom effett għat-​tajjeb jew għall-​ħażin fuq jekk nibqgħux Kristjani sodi jew le. Iż-​żgħażagħ jiffaċċjaw deċiżjonijiet rigward affarijiet bħall-​karriera, l-​edukazzjoni supplimentari, u ż-​żwieġ. L-​adulti forsi jkollhom jiddeċiedu jekk imorrux jgħixu f’xi post ieħor jew jekk ikollhomx iktar minn impjieg wieħed. Aħna kuljum nieħdu deċiżjonijiet rigward kif nużaw il-​ħin u ħafna affarijiet oħra. X’se jgħinna nieħdu deċiżjonijiet għaqlin li se jikkontribwixxu biex aħna nibqgħu sodi bħala qaddejja taʼ Jehovah? Kristjana li ilha taqdi għal żmien twil qalet: “Jien nitlob l-​għajnuna taʼ Jehovah meta jkolli nieħu xi deċiżjonijiet. Jien nemmen li huwa importanti li taċċetta u tapplika l-​pariri li jingħataw mill-​Bibbja, fil-​laqgħat Kristjani, mill-​anzjani, u fil-​pubblikazzjonijiet ibbażati fuq il-​Bibbja.”

Meta nkunu se nieħdu xi deċiżjonijiet, nagħmlu tajjeb li nistaqsu lilna nfusna: ‘Ħames jew għaxar snin oħra, se nkun kuntent bid-​deċiżjonijiet li qed nieħu issa, jew se jiddispjaċini? Qiegħed jien nagħmel l-​almu tiegħi biex inkun żgur li d-​deċiżjonijiet li nieħu mhux se jtellfuni milli nibqaʼ sod spiritwalment imma li se jikkontribwixxu għall-​progress spiritwali tiegħi?’—Filippin 3:16.

Xi wħud li huma mgħammdin u li jċedu għat-​tentazzjonijiet jew iħallu lilhom infushom jaslu qrib li jiksru l-​liġi t’Alla jgħixu ħajja xejn m’hi stabbli. Xi wħud li tkeċċew mill-​kongregazzjoni minħabba li ma ddispjaċihomx li qabdu ħajja midinba ħadmu iebes biex jerġgħu jiġu aċċettati bħala parti mill-​kongregazzjoni, biex imbagħad reġgħu ġew maqtugħin mis-​sħubija—xi drabi ftit żmien biss wara—minħabba l-​istess dnub. Jistaʼ jkun li huma ma talbux għall-​għajnuna divina biex ikunu jistgħu ma ‘jaħmlux il-​ħażen u jżommu mat-​tajjeb.’ (Rumani 12:9; Salm 97:10) Ilkoll kemm aħna jeħtieġ li ‘naqbdu triq dritta għal riġlejna.’ (Lhud 12:13) Għalhekk, ejja nikkunsidraw xi ftit punti li jistgħu jgħinuna nibqgħu sodi spiritwalment.

Ibqaʼ Sħiħ Permezz t’Attivitajiet Kristjani

Mod wieħed kif nistgħu nibqgħu sħaħ fit-​tiġrija tal-​ħajja tagħna huwa li jkollna ħafna x’nagħmlu fix-​xogħol taʼ l-​ippridkar tas-​Saltna. Iva, il-​ministeru Kristjan tagħna huwa għajnuna imprezzabbli biex inżommu qalbna u moħħna ffokati fuq li nagħmlu r-​rieda t’Alla u fuq ir-​rigal taʼ ħajja taʼ dejjem. Fi qbil maʼ dan, Pawlu ħeġġeġ lill-​Korintin: “Għalhekk, ħuti għeżież, żommu sħiħ, titħarrkux; ħabirku dejjem fil-​ħidma tal-​Mulej. Kunu afu li l-​ħidma tagħkom fil-​Mulej m’hijiex għalxejn.” (1 Korintin 15:58) Li ‘nżommu sħaħ’ ifisser li ‘ma niċċaqalqux.’ “Titħarrkux” tistaʼ tfisser ‘li ma tħallix lilek innifsek titlef id-​direzzjoni.’ B’hekk, li jkollna ħafna x’nagħmlu fil-​ministeru tagħna jistaʼ jkollu effett li jgħinna nibqgħu sodi fil-​ħajja Kristjana tagħna. Il-​fatt li ngħinu lil ħaddieħor isir jaf lil Jehovah jagħtina skop fil-​ħajja u jġibilna l-​ferħ.—Atti 20:35.

Pauline, mara Kristjana li ilha iktar minn 30 sena taqdi bħala missjunarja u f’aspetti oħra tal-​ministeru full-time, tgħid: “Il-​ministeru huwa protezzjoni minħabba li meta nagħti xiehda lil ħaddieħor inkun qed nikkonferma miegħi nnifsi li jien għandi l-​verità.” Konvinzjoni simili tirriżulta minn sehem regulari f’attivitajiet Kristjani oħra, bħal li nattendu l-​laqgħat għall-​qima u nħabirku biex nagħmlu studju persunali tal-​Bibbja.

Nibqgħu Sodi Permezz taʼ l-​Imħabba taʼ l-​Aħwa

Li nkunu parti mill-​organizzazzjoni taʼ qaddejja veri madwar id-​dinja jistaʼ jkollu effett kbir fuqna biex nibqgħu sodi. X’barka hi li nagħmlu parti minn fratellanza globali kollha mħabba! (1 Pietru 2:17) U nistgħu wkoll ngħinu lill-​Kristjani sħabna biex jibqgħu sodi.

Ikkunsidra l-​azzjonijiet tar-​raġel rett Ġob li huma t’għajnuna għalina. Saħansitra, Elifaż il-​ħabib falz taʼ Ġob kellu jammetti: “Min kien jogħtor kien iqajjmu kliemek, u l-​irkubbtejn mitruħa jsaħħaħlu.” (Ġob 4:4) Qegħdin aħna nkunu t’għajnuna għal oħrajn b’dan il-​mod? Individwalment, aħna għandna r-​responsabbiltà li ngħinu lil ħutna spiritwali biex jibqgħu sħaħ fis-​servizz t’Alla. Meta nkunu magħhom, nistgħu naġixxu bl-​istess spirtu tal-​kliem: “Qawwu l-​idejn mitruħa; saħħu l-​irkubbtejn imriegħda.” (Isaija 35:3) Għala ma tagħmilhiex il-​mira tiegħek li ssaħħaħ u tħeġġeġ xi wieħed jew tnejn mill-​Kristjani sħabek kulmeta tiltaqaʼ magħhom? (Lhud 10:​24, 25) Kliem inkuraġġanti taʼ tifħir u gratitudni għall-​isforzi kontinwi tagħhom biex jogħġbu lil Jehovah jistaʼ tassew jgħinhom jibqgħu sħaħ bil-​prospett li joħorġu rebbiħin fit-​tellieqa għall-​ħajja.

L-anzjani Kristjani jistgħu jagħmlu ħafna ġid jekk jinkuraġġixxu lil uħud ġodda. Dan jistaʼ jkun possibbli billi joffru suġġerimenti t’għajnuna u pariri Skritturali f’lokhom kif ukoll billi jaħdmu magħhom fil-​ministeru. L-​appostlu Pawlu kien jaħtaf kull opportunità biex isaħħaħ lil oħrajn. Hu kellu sebaʼ mitt sena sakemm jara lill-​Kristjani f’Ruma biex ikun jistaʼ jgħinhom jissaħħu spiritwalment. (Rumani 1:11) Hu kkunsidra lil ħutu l-​għeżież ġo Filippi bħala l-​“ferħ u kuruna” tiegħu u ħeġġiġhom biex ‘iżommu sħaħ fil-​Mulej.’ (Filippin 4:1) Meta semaʼ bit-​tbatijiet li kienu qed jiffaċċjaw ħutu fit-​Tessalonika, Pawlu bagħat lil Timotju biex ‘iwettaqhom u jagħmlilhom il-​qalb sabiex ħadd minnhom ma jitħarrek fost it-​tiġrib.’—1 Tessalonikin 3:​1-3.

L-appostli Pawlu u Pietru għarfu u apprezzaw l-​isforzi leali taʼ sħabhom fit-​twemmin. (Kolossin 2:5; 1 Tessalonikin 3:​7, 8; 2 Pietru 1:12) L-​istess aħna, ejja niffokaw mhux fuq in-​nuqqasijiet taʼ ħutna imma fuq il-​kwalitajiet mill-​aqwa tagħhom u s-​suċċess tagħhom fil-​ġlieda li qed jiġġieldu biex jibqgħu sħaħ u jonoraw lil Jehovah.

Jekk inkunu negattivi jew noqogħdu nikkritikaw nistgħu mingħajr ma nkunu nafu nagħmluha iktar diffiċli għal xi wħud biex jibqgħu sħaħ fil-​fidi. Kemm hu xieraq li niftakru li ħutna jħossuhom “imdejjqa u mitluqa” f’din is-​sistema dinjija! (Mattew 9:36) Fil-​kongregazzjoni Kristjana, huma jistennew li jsibu faraġ u serħan. B’hekk, jalla lkoll kemm aħna nagħmlu l-​aħjar tagħna biex nibnu lil sħabna fit-​twemmin u ngħinuhom jibqgħu sħaħ.

Kultant ikun hemm min jittrattana b’tali mod li jistaʼ jġagħalna ma nibqgħux sħaħ daqskemm konna. Se nħallu aħna xi kumment aħrax jew att nieqes mill-​imħabba jġagħalna nnaqqsu l-​pass tagħna fis-​servizz taʼ Jehovah? Mela jalla qatt ma nħallu lil ħadd iwaqqafna milli nibqgħu sħaħ!—2 Pietru 3:17.

Il-​Wegħdi t’Alla Jgħinuna Nkunu Sodi

Il-​wegħda taʼ Jehovah għal futur meraviljuż taħt il-​ħakma tas-​Saltna tagħtina tama li tgħinna nibqgħu nżommu sħaħ. (Lhud 6:19) U l-​konvinzjoni li Alla dejjem iwettaq il-​wegħdi tiegħu timmotivana biex ‘nishru u nżommu sħaħ fil-​fidi.’ (1 Korintin 16:13; Lhud 3:6) Il-​fatt li forsi xi wħud mill-​wegħdi t’Alla jidhru li se jdumu biex jitwettqu jistaʼ jittestja l-​fidi tagħna. Għalhekk, huwa importanti ħafna li ngħassu kontra li niġu żvijati minn tagħlim falz u nitilfu t-​tama tagħna.—Kolossin 1:23; Lhud 13:9.

L-eżempju ħażin taʼ l-​Iżraelin li mietu minħabba li ma kellhomx fidi fil-​wegħdi taʼ Jehovah għandu jservi taʼ twissija għalina. (Salm 78:37) Minflok ma nkunu bħalhom, jalla nkunu sħaħ, u naqdu lil Alla b’sens t’urġenza f’dawn il-​jiem tat-​tmiem. Wieħed anzjan taʼ l-​esperjenza qal: “Jien ngħix kull ġurnata daqslikieku l-​jum kbir taʼ Jehovah ġej għada.”—Ġoel 1:15.

Iva, il-​jum il-​kbir taʼ Jehovah dalwaqt se jiġi. Madankollu, m’għandniex minn xiex nibżgħu jekk nibqgħu qrib t’Alla. Jekk inżommu sodi mal-​livelli ġusti tiegħu u nibqgħu sħaħ, aħna nistgħu niġru b’suċċess it-​tellieqa għall-​ħajja eterna!—Proverbji 11:19; 1 Timotju 6:​12, 17-19.

[Stampa f’paġna 23]

Qiegħed int tagħmel kulma tistaʼ biex tgħin lill-​Kristjani sħabek jibqgħu sħaħ?

[Sors tal-​Istampa f’paġna 21]

The Complete Encyclopedia of Illustration/J. G. Heck