Nistinkaw Biex Nuru Qalb Tajba f’Dinja Ostili

“Dak li hu mixtieq fi bniedem hi t-​tjieba [jew, il-​qalb tajba bl-​imħabba] tiegħu.”—PROVERBJI 19:22, KŻ.

1. Għala jistaʼ jkun diffiċli li turi qalb tajba?

TAĦSEB li int qalbek tajba? Jekk inhu hekk, jistaʼ jkun diffiċli li tgħix fid-​dinja taʼ llum. Veru, fil-​Bibbja, il-​qalb tajba hi identifikata bħala waħda mill-​“frott taʼ l-​Ispirtu,” imma għala hu daqshekk diffiċli li turi qalb tajba, saħansitra fl-​hekk imsejħa pajjiżi Kristjani? (Galatin 5:22, NW) Bħalma rajna fl-​artiklu taʼ qabel, it-​tweġiba nistgħu nsibuha, sa ċertu punt, f’dak li kiteb l-​appostlu Ġwanni—id-​dinja kollha hi kontrollata minn spirtu bla qalb, Satana x-​Xitan. (1 Ġwanni 5:19) Ġesù Kristu identifika lil Satana bħala “l-​Prinċep tad-​dinja.” (Ġwanni 14:30) Għalhekk, din id-​dinja għandha t-​tendenza li tkun tixbah lill-​ħakkiem ribelluż tagħha, li l-​attitudni tiegħu hi karatterizzata minn imġiba kiefra.—Efesin 2:2.

2. Liema sfidi jistgħu jeffettwawna meta niġu biex nuru qalb tajba?

² Meta ma niġux trattati b’qalb tajba, ħajjitna tiġi effettwata ħażin. Din l-​imġiba bla qalb tistaʼ tintwera minn ġirien inkejjużi, stranġieri li ma jkunux dħulin, u saħansitra minn ħbieb u membri tal-​familja li kultant jaġixxu b’nuqqas taʼ ħsieb. Taʼ spiss, il-​pressjoni li tinħoloq meta jkollok tħabbat wiċċek maʼ nies maledukati li jgħajtu u joffendu wieħed lil ieħor iġġagħlek tħossok skuraġġit. Dan it-​trattament bla qalb minn ħaddieħor jistaʼ jġagħalna nħossuna ostili, u nibdew naħsbuha jekk irroddux kattiverija b’kattiverija. Din l-​attitudni tistaʼ anki twassal għal problemi spiritwali jew fiżiċi.—Rumani 12:17.

3. In-​nies jiffaċċjaw liema problemi serji li jagħmluhielhom diffiċli biex juru qalb tajba?

³ Il-​kundizzjonijiet tad-​dinja, li tant joħolqu stress, ukoll jistgħu jagħmluhielna diffiċli biex nuru qalb tajba. Per eżempju, il-​maġġuranza tal-​bnedmin iħossuhom stressati minħabba t-​theddid u l-​attakki terroristiċi, kif ukoll minħabba l-​possibbiltà li jintużaw armi bijoloġiċi jew nukleari minn diversi gruppi nazzjonali. Iżjed minn hekk, miljuni taʼ nies waqgħu fil-​faqar u m’għandhomx biżżejjed ikel, ilbies, kura medika, u fejn joqogħdu. Meta s-​sitwazzjoni tkun tidher bla tama, hija verament sfida li turi qalb tajba.—Koħèlet 7:7.

4. Liema konklużjoni ħażina jistgħu jaslu għaliha xi wħud meta jaħsbu dwar li juru qalb tajba m’oħrajn?

⁴ Wieħed malajr jistaʼ jikkonkludi li m’huwiex daqshekk importanti li juri qalb tajba, u li dan hu saħansitra sinjal taʼ dgħjufija. Jistaʼ jħossu trattat inġustament, speċjalment meta oħrajn jinjoraw is-​sentimenti tiegħu. (Salm 73:2-9) Madankollu, il-​Bibbja tagħtina d-​direzzjoni t-​tajba meta tgħid: “Tweġiba ħelwa ttaffi l-​korla, kelma iebsa tqajjem l-​għadab.” (Proverbji 15:1) Il-​ħlewwa u l-​qalb tajba huma żewġ aspetti tal-​frott taʼ l-​ispirtu li jmorru id f’id u huma effettivi f’ċirkustanzi diffiċli.

5. Liema huma xi sitwazzjonijiet tal-​ħajja fejn hi meħtieġa l-​qalb tajba?

⁵ Ladarba għalina l-​Kristjani hu importanti ferm li nuru l-​frott taʼ l-​ispirtu qaddis t’Alla, nagħmlu tajjeb li nikkunsidraw kif nistgħu nuru waħda minn dawn il-​kwalitajiet—il-​qalb tajba. Huwa possibbli li nibqgħu nuru qalb tajba f’dinja ostili? Jekk iva, liema huma xi sitwazzjonijiet fejn nistgħu nuru bil-​provi li aħna ma nħallux l-​influwenza taʼ Satana toħnoq il-​qalb tajba tagħna, speċjalment f’ċirkustanzi stressanti? Ejja nikkunsidraw kif nistgħu nibqgħu nuru qalb tajba fil-​familja, fuq il-​post tax-​xogħol, fl-​iskola, fil-​ministeru tagħna, u fost sħabna fit-​twemmin.

Qalb Tajba fil-​Familja

6. Il-​qalb tajba għala hi tant importanti fil-​familja, u kif tistaʼ tintwera?

⁶ Il-​frott taʼ l-​ispirtu hu vitali jekk irridu nirċievu l-​barka u d-​direzzjoni taʼ Jehovah, u għalhekk għandna bżonn niżviluppawh bis-​sħiħ. (Efesin 4:32) Ejja nitfgħu l-​attenzjoni tagħna fuq il-​bżonn li l-​membri tal-​familja juru qalb tajba maʼ xulxin. Kuljum, fir-​relazzjoni taʼ bejniethom, ir-​raġel u l-​mara għandhom juru spirtu taʼ qalb tajba u konsiderazzjoni maʼ xulxin u maʼ wliedhom. (Efesin 5:28-33; 6:1, 2) Din il-​qalb tajba għandha tkun evidenti fil-​mod kif il-​membri tal-​familja jkellmu lil xulxin, billi t-​tfal jonoraw u jirrispettaw lill-​ġenituri tagħhom u l-​ġenituri jittrattaw lil uliedhom b’mod xieraq. Kun ħafif biex tfaħħar, tqil biex tikkundanna.

7, 8. (a) X’tip taʼ mġiba għandna nevitaw jekk irridu nuru qalb tajba vera fil-​familja? (b) Komunikazzjoni tajba kif tgħin biex issaħħaħ ir-​rabta tal-​familja? (ċ) Kif tistaʼ turi qalb tajba fil-​familja tiegħek?

⁷ Il-​fatt li nkunu qalbna tajba mal-​membri tal-​familja tagħna jinvolvi li nagħmlu dak li ħeġġeġ l-​appostlu Pawlu: “Ħallu kollox: korla, passjoni, ħażen, dagħa, u l-​kliem mhux xieraq warrbuh minn fommkom.” Kuljum, il-​familji Kristjani għandhom jikkomunikaw bejniethom b’mod li juri rispett. Għala? Għax komunikazzjoni tajba hi l-​ingredjent essenzjali għal familji sodi u b’saħħithom. Meta jinqalaʼ xi nuqqas taʼ qbil, jekk trid tberred il-​qiegħa, ipprova solvi l-​problema, mhux tirbaħ l-​argument. Membri tal-​familja henjin jistinkaw iżjed bil-​ħerqa biex juru qalb tajba u konsiderazzjoni maʼ xulxin.—Kolossin 3:8, 12-14.

⁸ Il-​qalb tajba hi kwalità pożittiva u ġġagħalna nkunu rridu nagħmlu l-​ġid lill-​oħrajn. Għaldaqstant nipprovaw li bil-​ħlewwa nkunu utli u t’għajnuna u nuru konsiderazzjoni lejn il-​membri l-​oħra tal-​familja. Hemm bżonn kemm taʼ sforz individwali kif ukoll taʼ sforz kollettiv biex tintwera qalb tajba b’mod li jirrifletti tajjeb fuq il-​familja. U r-​riżultat ma jkunx biss li jkollhom il-​barka t’Alla imma wkoll li b’dan jonoraw lil Jehovah, l-​Alla tal-​qalb tajba, kemm fil-​kongregazzjoni u kemm fil-​komunità.—1 Pietru 2:12.

Qalb Tajba Fuq il-​Post tax-​Xogħol

9, 10. Iddeskrivi xi problemi li jistgħu jinqalgħu fuq il-​post tax-​xogħol, u ikkummenta dwar kif jistgħu jiġu trattati b’qalb tajba.

⁹ Għall-​Kristjan, ir-​rutina taʼ kuljum tax-​xogħol tistaʼ tkun taʼ sfida biex juri qalb tajba maʼ sħabu l-​ħaddiema. Ir-​rivalità, jew l-​għira, bejn l-​impjegati tistaʼ twassal biex tipperikola l-​impjieg taʼ dak li jkun. Dan għaliex xi ħadd mill-​ħaddiema jistaʼ jaġixxi bil-​qerq jew bil-​makakkerija, u b’hekk iħassarlu r-​reputazzjoni li jkollu maʼ min jimpjegah. (Koħèlet 4:4) M’huwiex faċli li turi qalb tajba f’mumenti bħal dawn. Madankollu, filwaqt li jżomm f’moħħu li l-​aħjar ħaġa ġeneralment tkun li juri qalb tajba, qaddej taʼ Jehovah għandu jagħmel ħiltu kollha biex jirbaħ lil dawk li huma diffiċli biex tingwalaha magħhom. Il-​fatt li ninteressaw ruħna fil-​persuna jistaʼ jgħinna nagħmlu dan. Forsi tistaʼ tieħu interess f’sieħbek taʼ fuq ix-​xogħol jekk dan jimrad jew inkella jkollu lil xi ħadd tal-​familja marid. Anki mistoqsija dwar is-​saħħa taʼ dak li jkun jistaʼ jkollha effett pożittiv fuq il-​persuna l-​oħra. Iva, sakemm ikun jiddependi minnhom, il-​Kristjani għandhom jipprovaw iħeġġu l-​armonija u l-​paċi. Kultant, kelma li tingħad b’qalb tajba u li turi ħsieb u interess tkun t’għajnuna fis-​sitwazzjoni.

¹⁰ Xi drabi oħra, min jimpjega jkun irid jimponi l-​opinjoni tiegħu fuq l-​impjegati tiegħu u jkun iridhom jieħdu sehem f’xi okkażjoni nazzjonali jew xi ċelebrazzjoni li ma jkollhiex bażi Skritturali. Meta l-​kuxjenza tal-​Kristjan ma tħallihx jieħu sehem, jistaʼ jinqalaʼ konflitt. Dak il-​ħin forsi ma jkunx għaqli li toqgħod tispjega bid-​dettall dwar kemm hu żbaljat li tagħmel dak li jixtieq l-​imgħallem tiegħek. Wara kollox, għal dawk li m’għandhomx l-​istess twemmin Kristjan, dak li jkun qed isir forsi jidher li hu tajjeb. (1 Pietru 2:21-23) Forsi b’qalb tajba tistaʼ tispjega r-​raġunijiet tiegħek għala ma tiħux sehem. Tpattix kummenti sarkastiċi b’kummenti sarkastiċi. Ikun jaqbel li l-​Kristjan jimxi fuq il-​parir eċċellenti taʼ Rumani 12:18: “Jekk jistaʼ jkun, sakemm ikun ġej minnkom, għixu fil-​paċi maʼ kulħadd.”

Qalb Tajba fl-​Iskola

11. Liema sfidi jiffaċċjaw iż-​żgħażagħ meta jiġu biex juru qalb tajba maʼ sħabhom taʼ l-​iskola?

¹¹ Tistaʼ tkun verament sfida għaż-​żgħażagħ li juru qalb tajba maʼ l-​istudenti sħabhom. Taʼ spiss, iż-​żgħażagħ ikunu jixtiequ li jiġu aċċettati minn sħabhom tal-​klassi. Sabiex jiksbu l-​ammirazzjoni taʼ studenti oħrajn, xi tfal subien jaġixxu b’mod aggressiv u saħansitra jagħmluha taʼ bulijiet u jittrattaw ħażin lil oħrajn fl-​iskola. (Mattew 20:25) Xi żgħażagħ oħrajn iħobbu jimpressjonaw bl-​abbiltajiet skolastiċi, sportivi, jew xi abbiltajiet oħrajn li jkollhom. Sabiex juru kemm jafu, ħafna drabi jkunu kattivi maʼ sħabhom tal-​klassi jew maʼ studenti oħrajn, għax b’mod żbaljat jaħsbu li l-​fatt li għandhom xi talent jew xi abbiltà jagħmilhom superjuri. Iż-​żgħażagħ Kristjani jridu joqogħdu attenti li ma jimitawx lil individwi bħal dawn. (Mattew 20:26, 27) L-​appostlu Pawlu qal li “l-​imħabba taf tistabar u tħenn [“qalbha tajba,” NW]” u li l-​imħabba “ma tintefaħx biha nfisha, ma titkabbarx fuq l-​oħrajn.” Għaldaqstant, l-​obbligu tal-​Kristjan hu li fir-​relazzjonijiet maʼ sħabu taʼ l-​iskola jimxi u jżomm maʼ dak li tħeġġeġ l-​Iskrittura mhux jimita l-​eżempju ħażin taʼ dawk li ma jaġixxux b’qalb tajba.—1 Korintin 13:4.

12. (a) Għala tistaʼ tkun sfida għaż-​żgħażagħ biex juru qalb tajba maʼ l-​għalliema tagħhom? (b) Iż-​żgħażagħ lejn min jistgħu jduru għall-​għajnuna meta jħossuhom pressati biex ma jaġixxux b’qalb tajba?

¹² Iż-​żgħażagħ għandhom ukoll jittrattaw lill-​għalliema tagħhom b’qalb tajba. Ħafna studenti jieħdu pjaċir idejqu lill-​għalliema tagħhom. Jaħsbu li jkunu qed jagħmluha tal-​bravi jekk ma jagħtux lill-​għalliema tagħhom ir-​rispett mistħoqq billi jieħdu sehem f’attivitajiet li jiksru r-​regoli taʼ l-​iskola. Jistgħu jużaw ukoll l-​intimidazzjoni biex iġagħlu lil oħrajn jingħaqdu magħhom. Meta Kristjan żagħżugħ jirrifjuta li jkompli magħhom, hu jistaʼ jitwaqqaʼ għaċ-​ċajt jew jiġi mgħajjar. Sitwazzjonijiet bħal dawn matul is-​sena skolastika jkunu taʼ prova għall-​Kristjan u juru kemm ikun determinat li juri qalb tajba. Madankollu, tinsiex kemm hu importanti li tkun qaddej leali taʼ Jehovah. Ibqaʼ ċert li f’dawn il-​mumenti diffiċli taʼ ħajtek hu se jwieżnek permezz taʼ l-​ispirtu tiegħu.—Salm 37:28.

Qalb Tajba mal-​Ġirien

13-15. X’jistaʼ jżommna milli nuru qalb tajba mal-​ġirien tagħna, u kif nistgħu niffaċċjaw dawn l-​isfidi?

¹³ Tgħix fejn tgħix, f’dar, f’appartament, f’karavan, jew xi mkien ieħor, tistaʼ taħseb f’modi kif tistaʼ turi qalb tajba mal-​ġirien u turi interess fil-​benesseri tagħhom. Dan ukoll ma jkunx dejjem faċli.

¹⁴ Xi ngħidu jekk il-​ġirien li joqogħdu bieb maʼ bieb miegħek ikunu preġudikati kontrik minħabba r-​razza, in-​nazzjonalità, jew ir-​reliġjon tiegħek? U xi ngħidu jekk xi drabi jaġixxu taʼ maledukati jew inkella jinjorawk kompletament? Bħala qaddej taʼ Jehovah, l-​aħjar hu li tkun qalbek tajba kemm tistaʼ. B’dan il-​mod tispikka bħala persuna differenti u mill-​aħjar, u ġġib verament tifħir lil Jehovah li hu l-​aqwa eżempju taʼ qalb tajba. Ma tistax tgħid jekk il-​ġâr tiegħek jibdilx l-​attitudni tiegħu minħabba l-​qalb tajba tiegħek. Forsi anki jsir wieħed li jfaħħar lil Jehovah.—1 Pietru 2:12.

¹⁵ Kif tistaʼ tintwera l-​qalb tajba? Qabel xejn, bl-​imġiba eżemplari fil-​familja hekk kif il-​membri kollha juru l-​frott taʼ l-​ispirtu. Il-​ġirien għandhom mnejn jinnotawh dan. Minn żmien għal żmien, forsi lill-​ġâr tkun tistaʼ tagħmillu xi pjaċir. Ftakar li biex tkun qalbek tajba trid tinteressa ruħek fil-​benesseri taʼ ħaddieħor.—1 Pietru 3:8-12.

Qalb Tajba fil-​Ministeru Tagħna

16, 17. (a) Għala hu importanti li nkunu qalbna tajba fil-​ministeru pubbliku tagħna? (b) Kif nistgħu nuru qalb tajba fid-​diversi aspetti tal-​ministeru taʼ l-​għalqa?

¹⁶ Il-​qalb tajba għandha tkun karatteristika tal-​ministeru Kristjan tagħna hekk kif, b’determinazzjoni u b’mod organizzat, nagħmlu sforz biex nilħqu n-​nies fi djarhom, fejn jaħdmu, u f’postijiet pubbliċi. Irridu niftakru li aħna nirrappreżentaw lil Jehovah, li dejjem juri qalb tajba.—Eżodu 34:6.

¹⁷ X’jinkludu l-​isforzi tiegħek biex turi qalb tajba fil-​ministeru? Per eżempju, waqt li tkun qed tagħti xiehda fit-​toroq, tistaʼ turi qalb tajba billi meta tkellem lin-​nies ma tiħux ħafna ħin u turihom konsiderazzjoni. Ġeneralment, ikun hemm ħafna nies fuq il-​bankini, u għalhekk oqgħod attent li tħalli biżżejjed wisaʼ minn fejn jgħaddu. Ukoll, meta tkun qed tagħti xiehda f’territorju tan-​negozju, żomm f’moħħok li tal-​ħwienet iridu jaqdu lill-​klijenti, u għalhekk tkun qed turi qalb tajba billi ma tiħdilhomx ħafna ħin.

18. Liema rwol għandu l-​għaqal meta niġu biex nuru qalb tajba fil-​ministeru tagħna?

¹⁸ Uża l-​għaqal fil-​ministeru minn dar għal dar. Iddumx titkellem, speċjalment jekk it-​temp ma jkunx sabiħ. Kapaċi tinduna int meta persuna tkun qed tiddejjaq jew saħansitra qed titlef il-​paċenzja bil-​preżenza tiegħek? Forsi fejn toqgħod int, ix-​Xhieda taʼ Jehovah spiss iżuru lin-​nies. Jekk inhu hekk, uri konsiderazzjoni speċjali, u kun dejjem qalbek tajba u dħuli. (Proverbji 17:14) Ipprova ifhem għala l-​inkwilin ma jkunx jistaʼ joqgħod jisimgħek dakinhar. Ftakar, x’aktarx li fi żmien qasir xi ħadd minn ħutek il-​Kristjani se jerġaʼ jżur dik id-​dar. Jekk tiltaqaʼ maʼ xi ħadd li jkun maledukat, agħmel iżjed sforz biex turih qalb tajba. Tgħollix leħnek u tqarrasx wiċċek, imma tkellem b’mod kalm. Kristjan li juri qalb tajba ma jkunx irid iqajjem xi ġlieda bil-​kliem maʼ l-​inkwilin. (Mattew 10:11-14) Għandu mnejn li xi darba dik il-​persuna toqgħod tismaʼ l-​aħbar tajba.

Qalb Tajba fil-​Laqgħat tal-​Kongregazzjoni

19, 20. Il-​qalb tajba għala hi meħtieġa fil-​kongregazzjoni, u kif tistaʼ tintwera?

¹⁹ Hu daqstant importanti li nuru qalb tajba maʼ sħabna fit-​twemmin. (Lhud 13:1) Ladarba nagħmlu parti minn fratellanza globali, hu essenzjali li nittrattaw lil xulxin b’qalb tajba.

²⁰ Jekk iktar minn kongregazzjoni waħda tuża s-​Sala tas-​Saltna, hu importanti li nittrattaw b’qalb tajba u b’dinjità lil dawk fil-​kongregazzjonijiet l-​oħrajn. Ir-​rivalità ma twassalx għall-​kooperazzjoni meta jkun hemm bżonn isiru arranġamenti għall-​ħinijiet tal-​laqgħat u għal xi bżonnijiet bħat-​tindif jew il-​manutenzjoni. Uri qalb tajba u konsiderazzjoni anki jekk ikun hemm opinjonijiet differenti. B’dan il-​mod il-​qalb tajba dejjem tittrijonfa, u Jehovah ibierek tassew l-​interess li turi fil-​benesseri taʼ l-​oħrajn.

Ibqaʼ Uri Qalb Tajba

21, 22. Fi qbil maʼ Kolossin 3:12, x’għandha tkun id-​determinazzjoni tagħna?

²¹ Il-​qalb tajba hi kwalità li tant teffettwa u tinkludi affarijiet li tolqot kull aspett taʼ ħajjitna. Għalhekk, għandna nagħmluha parti integrali mill-​personalità Kristjana tagħna. Għandna niħduha drawwa li nuru qalb tajba m’oħrajn.

²² Jalla lkoll kemm aħna nuru qalb tajba m’oħrajn kuljum, u b’hekk kull wieħed minna japplika l-​kliem taʼ l-​appostlu Pawlu: “Intom il-​magħżulin taʼ Alla, il-​qaddisin u l-​maħbubin tiegħu. Ilbsu mela sentimenti taʼ ħniena, tjieba [“qalb tajba,” NW], umiltà, ħlewwa u sabar.”—Kolossin 3:12.

X’Tiftakar?

• X’jagħmilha diffiċli għall-​Kristjan biex juri qalb tajba?

• Għala hu importanti li wieħed juri qalb tajba fil-​familja tiegħu?

• X’jagħmilha diffiċli biex turi qalb tajba fl-​iskola, fuq ix-​xogħol, u mal-​ġirien?

• Spjega kif il-​Kristjani jistgħu juru qalb tajba fil-​ministeru pubbliku tagħhom.

[Stampa f’paġna 18]

Meta kulħadd fil-​familja juri qalb tajba jkun hemm iżjed għaqda u kooperazzjoni

[Stampa f’paġna 19]

Int tistaʼ turi qalb tajba meta jimrad xi ħadd minn sħabek taʼ fuq ix-​xogħol jew xi membru tal-​familja tiegħu

[Stampa f’paġna 20]

Jehovah jappoġġa lil min lealmentjuri qalb tajba minkejja t-​twaqqigħ għaċ-​ċajt

[Stampa f’paġna 21]

Meta tagħti daqqa t’id lil xi ġâr fil-​bżonn tkun qed turi qalb tajba