Min Hu l-​Aħjar Mexxej għal-​Lum?

Fl-​1940 kien hemm kriżi taʼ tmexxija fil-​Parlament Ingliż. David Lloyd George, li dak iż-​żmien kellu 77 sena u li kien qed jismaʼ d-​dibattitu, kien mexxa lill-​Britannja lejn rebħa fl-​ewwel gwerra dinjija, u l-​ħafna snin li għamel fil-​politika għenuh jiżen sew ix-​xogħol taʼ l-​uffiċjali għoljin. F’taħdita li ta fil-​Kamra tal-​Komuni fit-​8 taʼ Mejju, hu qal: “In-​nazzjon huwa preparat li jagħmel kull sagrifiċċju, l-​aqwa li jkollu tmexxija, li l-​Gvern juri biċ-​ċar x’inhuma l-​iskopijiet tiegħu, u li n-​nazzjon ikun kunfidenti li dawk li qed imexxuh qed jagħmlu l-​aħjar tagħhom.”

IL-​KLIEM taʼ Lloyd George juri biċ-​ċar li n-​nies jistennew li l-​mexxejja tagħhom ikunu kapaċi u jipprovaw sinċerament itejbu l-​affarijiet. Waħda li taħdem fil-​kampanji elettorali tgħid hekk: “Meta n-​nies jivvotaw għal xi president, huma jkunu qed jivvotaw għal xi ħadd li se jafdawlu ħajjithom, il-​futur tagħhom, u ’l uliedhom.” Hemm biċċa xogħol enormi involuta biex tara li ma titlifx fiduċja bħal din. Għala?

Id-dinja tagħna hija miżgħuda bi problemi li jidhru li huma impossibbli biex jissolvew. Per eżempju, liema mexxej wera li hu tant għaref u qawwi li kapaċi jelimina għalkollox il-​kriminalità u l-​gwerer? Min fost il-​mexxejja llum għandu biżżejjed riżorsi u mogħdrija biex jipprovdi ikel, ilma safi, u saħħa għal kull persuna? Min għandu għarfien u determinazzjoni biex jipproteġi u jirranġa l-​ambjent? Min hu kapaċi u qawwi biżżejjed biex ikun ċert li l-​umanità kollha tgawdi ħajja twila u ferħana?

Il-​Bnedmin M’Humiex Kapaċi

Huwa fatt li xi mexxejja kellhom ammont taʼ suċċess. Però, huma jistgħu jmexxu biss għal ftit għexur taʼ snin—imbagħad min se jmexxi warajhom? Is-​Sultan Salamun taʼ Iżrael tal-​qedem, wieħed mill-​iktar mexxejja kapaċi li qatt eżistew, ħaseb fuq din il-​mistoqsija. Hu wasal għal din il-​konklużjoni: “Stmerrejt ukoll ix-​xogħol kollu taħt ix-​xemx li fih tħabatt u li jkolli nħallih għal min jiġi warajja. U dan min jaf ikunx għaref inkella iblah? Ikun xi jkun hu jsir is-​sid taʼ xogħli kollu, li fih ħlejt saħħti u għaqli taħt ix-​xemx. Dan ukoll hu frugħa.”—Koħèlet 2:18, 19.

Salamun ma kienx jaf jekk is-​suċċessur tiegħu kienx se jkompli fix-​xogħol tajjeb tiegħu jew jekk kienx se jġib kollox fix-​xejn. Għal Salamun, il-​fatt li l-​mexxejja jinbidlu maʼ wħud ġodda kien “frugħa,” jew bla sens.

Kultant, tintuża l-​vjolenza biex xi ħakkiema jinbidlu. Xi mexxejja li kienu kapaċi nqatlu waqt li kienu qegħdin fil-​kariga tagħhom. Abraham Lincoln, president rispettat ferm taʼ l-​Istati Uniti, darba qal lill-​udjenza tiegħu: “Jien ġejt magħżul għal kariga importanti għal perijodu qasir taʼ żmien, u issa, f’għajnejkom, ngħatali poter li dalwaqt se jgħaddi.” Is-​servizz tiegħu kien tabilħaqq qasir. Minkejja dak kollu li għamel u x-​xewqa tiegħu biex jagħmel iktar għall-​poplu, il-​President Lincoln mexxa lil pajjiżu għal erbaʼ snin biss. Fil-​bidu tat-​tieni perijodu tiegħu fil-​kariga, hu nqatel minn raġel li ried bidla fit-​tmexxija.

Lanqas l-​aqwa mexxejja ma jistgħu jiggarantixxu l-​futur tagħhom stess. Għalhekk, għandek int tafdahom li se jiggarantixxu l-​futur tiegħek? Il-​Bibbja tgħid: “La tittamawx fil-​kbarat, għax il-​bniedem ma jsalvakomx. Malli toħroġ ruħu, lejn l-​art jerġaʼ jmur; jintemmu dakinhar ħsibijietu.” It-​traduzzjoni taʼ Saydon tgħid hekk fl-​aħħar parti taʼ vers 4: “Dak in-​nhar jisfaw fix-​xejn il-​ħsebijiet tiegħu.”—Salm 146:3, 4.

M’huwiex faċli taċċetta l-​parir biex ma tafdax il-​mexxejja umani. Madankollu, il-​Bibbja ma tgħidx li l-​umanità qatt m’hu se jkollha tmexxija tajba u stabbli. “Araw, sultan għad isaltan bil-​ġustizzja,” jgħid Isaija 32:1. Alla Ġeħova, il-​Ħallieq tal-​bniedem, ipprepara “sultan,” Mexxej, li dalwaqt se jkollu kontroll sħiħ fuq l-​affarijiet tad-​dinja. Min hu? Il-​profeziji tal-​Bibbja juru dan min hu.

Wieħed Verament Kwalifikat biex Imexxi

Elfejn sena ilu, anġlu qal lil mara żagħżugħa Lhudija jisimha Marija: “Int tnissel f’ġufek u tiled iben, u ssemmih Ġesù. Dan ikun kbir u jissejjaħ Bin l-​Iktar Għoli; u Alla Ġeħova jagħtih it-​tron taʼ David missieru, u jsaltan fuq dar Ġakobb għal dejjem, u ma jkunx hemm tmiem għal saltnatu.” (Luqa 1:31-33) Iva, Ġesù taʼ Nazaret hu s-​Sultan identifikat mill-​profezija tal-​Bibbja.

Il-pitturi reliġjużi ħafna drabi jpinġu lil Ġesù bħala tarbija, bħala raġel dgħajjef u malnutrit, jew bħala raġel li jgħix ħajja taʼ ċaħda li joqgħod għal kulma jiġrilu. Dawn il-​pitturi ma jġagħlukx ikollok fiduċja fih bħala Ħakkiem. Madankollu, il-​veru Ġesù Kristu tal-​Bibbja, sar raġel mimli entużjażmu, matur, kollu żelu u inizjattiva. Barra minn hekk, kellu kwalitajiet oħra li għamluh jikkwalifika biex jaħkem. (Luqa 2:52) Dawn li ġejjin huma xi aspetti fil-​personalità li tispikka tiegħu.

Ġesù wera integrità assoluta. Tant kellu kondotta onesta u tajba li hu sfida pubblikament lill-​għedewwa tiegħu sabiex jippreżentaw akkużi validi kontrih. Huma ma setgħux. (Ġwanni 8:46) It-​tagħlim tiegħu mingħajr ipokrisija pperswada lil uħud sinċieri sabiex isiru segwaċi tiegħu.—Ġwanni 7:46; 8:28-30; 12:19.

Ġesù ddedika ruħu kompletament lil Alla. Hu tant kien determinat li jispiċċa x-​xogħol li tah Alla li l-​ebda opponent—kemm bniedem u kemm demonju—ma setaʼ jwaqqfu. L-​attakki vjolenti ma beżżgħuhx. (Luqa 4:28-30) L-​għeja u l-​ġuħ ma skuraġġewhx. (Ġwanni 4:5-16, 31-34) Avolja ħbiebu telquh, hu qatt ma naqas milli jilħaq il-​mira li kellu.—Mattew 26:55, 56; Ġwanni 18:3-9.

Ġesù kien konċernat profondament dwar in-​nies. Hu pprovda ikel għal dawk li kienu bil-​ġuħ. (Ġwanni 6:10, 11) Farraġ lil uħud li kienu dipressi. (Luqa 7:11-15) Reġaʼ ta d-​dawl lill-​għomja u s-​smigħ lit-​torox, u ta s-​saħħa lil dawk lil kellhom bżonn fejqan. (Mattew 12:22; Luqa 8:43-48; Ġwanni 9:1-6) Inkuraġġixxa lill-​appostli li kienu jaħdmu tant iebes. (Ġwanni, kapitli 13-17) B’dan, hu wera li kien “ir-​ragħaj mill-​aħjar” li ħa ħsieb in-​nagħaġ tiegħu.—Ġwanni 10:11-14.

Ġesù kien lest li jaħdem. Hu ħasel saqajn l-​appostli sabiex jgħallimhom lezzjoni importanti. (Ġwanni 13:4-15) Saqajh stess kienu jitħammġu meta kien ikun qed jippriedka l-​aħbar tajba qalb it-​toroq mimlijin trab taʼ Iżrael. (Luqa 8:1) Anki meta ppjana biex jistrieħ “f’post imwarrab,” hu xorta għallem lin-​nies li ġew għandu għal iktar istruzzjonijiet. (Marku 6:30-34) Għalhekk, hu ta eżempju taʼ bżulija lill-​Kristjani kollha.—1 Ġwanni 2:6.

Ġesù temm l-​inkarigu tiegħu u telaq minn fuq l-​art. Bħala premju għal-​lealtà tiegħu, Alla Ġeħova tah saltna u ħajja immortali fis-​sema. Il-​Bibbja tgħid dan dwar Ġesù rxoxtat: “Issa li ġie mqajjem mill-​imwiet, Kristu ma jmutx iktar; il-​mewt m’għadhiex tiddominah.” (Rumani 6:9) Tistaʼ tibqaʼ ċert li hu l-​aqwa Mexxej possibbli għall-​umanità. Ladarba Kristu Ġesù jkollu kontroll sħiħ fuq l-​art, ma jkunx hemm bżonn li jinħatar xi ħaddieħor, u lanqas m’hu se jkun hemm bżonn li tinbidel it-​tmexxija. Hu qatt m’hu se jinqatel waqt li jkun fil-​kariga tiegħu, u x-​xogħol tiegħu mhux se jkun irvinat jew mitmum minn xi suċċessur li ma jkunx kapaċi. Imma x’se jagħmel speċifikament għall-​benefiċċju taʼ l-​umanità?

Dak li Se Jagħmel il-​Mexxej il-​Ġdid

Salm 72 jagħtina xi dettalji profetiċi dwar kif dan is-​Sultan perfett u immortali se jaħkem. F’versi 7 u 8 naqraw: “Tħaddar f’jiemu l-​ġustizzja, u sliem kotran sa ma jintemm il-​qamar. Isaltan minn baħar sa baħar, u mix-​Xmara sa truf l-​art.” Taħt il-​ħakma mimlija benefiċċji tiegħu, l-​abitanti taʼ l-​art se jgawdu sigurtà dejjiema li ma tispiċċa qatt. Hu se jeqred l-​armamenti kollha li jeżistu u saħansitra se jneħħi x-​xewqa għall-​ġlied minn qalb il-​bniedem. Dawk li llum il-​ġurnata jattakkaw lil oħrajn bħal iljuni mġewħin jew jaġixxu bħal orsijiet irrabjati mal-​ġirien tagħhom se jkunu biddlu l-​attitudnijiet tagħhom għalkollox. (Isaija 11:1-9) Il-​paċi se tkun abbundanti.

Salm 72 ikompli jgħid hekk f’versi 12 sa 14: “Hu jeħles lill-​fqir li jsejjaħlu, u lill-​imsejken li m’għandux min jgħinu. Iħenn għad-​dgħajjef u għall-​fqajjar; il-​ħajja tal-​fqajrin isalva. Jeħlishom mill-​qerq u mill-​moħqrija; demmhom għażiż quddiem għajnejh.” Il-​fqar, l-​imsejkna, u d-​dgħajfin se jsiru parti minn familja umana perfetta, magħqudin flimkien taħt it-​tmexxija tas-​Sultan Ġesù Kristu. Ħajjithom se tkun mimlija ferħ, u mhux mimlija wġigħ u disperazzjoni.—Isaija 35:10.

Vers 16 iwiegħed: “Ikun kotran il-​qamħ fuq l-​art, jogħla sal-​qċaċet taʼ l-​għoljiet.” Il-​ġuħ huwa aspett komuni fil-​ħajja taʼ miljuni taʼ nies illum. Għalkemm hawn biżżejjed ikel, ħafna drabi l-​politika u r-​regħba jġagħlu li dan jitqassam b’mod inġust, u għalhekk ħafna nies, speċjalment it-​tfal, imutu bil-​ġuħ. Iżda, taħt il-​ħakma taʼ Ġesù Kristu, din il-​problema se tispiċċa. L-​art se titbierek bi provvisti tajbin taʼ ikel delizzjuż. L-​umanità kollha se tkun mitmugħa tajjeb.

Tixtieq li tgawdi dawn il-​barkiet li jiġu minn tmexxija tajba? Jekk iva, ninkuraġġuk titgħallem dwar il-​Mexxej li dalwaqt se jkollu kontroll sħiħ fuq l-​art kollha. Ix-​Xhieda taʼ Ġeħova se jgħinuk tagħmel dan minn qalbhom. M’intix se tkun diżappuntat, għax Alla Ġeħova nnifsu qal dwar Ibnu: “Jien għamiltu s-​sultan tiegħi, fuq Sijon, l-​għolja mqaddsa tiegħi!”—Salm 2:6, 12.

[Kaxxa f’paġna 5]

F’DAQQA WAĦDA BLA POTER

Jekk mexxej jagħti ammont raġunevoli taʼ paċi u kundizzjonijiet taʼ ħajja mimlijin sigurtà, ġeneralment jistaʼ jibqaʼ ċert mir-​rispett u l-​appoġġ tas-​sudditi tiegħu. Madankollu, jekk għal xi raġuni n-​nies jitilfu l-​fiduċja fih, malajr jistaʼ jkun hemm ħaddieħor li jibda jaħkem minfloku. Dawn li ġejjin huma eżempji taʼ kundizzjonijiet li f’daqqa waħda ġagħlu lil ħakkiema b’saħħithom jitilfu l-​poter.

Kundizzjonijiet ħżiena t’għajxien. Sa l-​aħħar tat-​18-il seklu, ħafna ċittadini Franċiżi kienu mġagħlin iħallsu ħafna taxxi filwaqt li kellhom ftit ikel. Dawn il-​kundizzjonijiet wasslu għar-​Rivoluzzjoni Franċiża, li fl-​1793 issarrfet fil-​qtil tas-​Sultan Lwiġi XVI permezz tal-​giljottina.

Gwerer. L-​ewwel gwerra dinjija temmet il-​ħakma taʼ wħud mill-​iktar imperaturi potenti fl-​istorja tal-​bniedem. Per eżempju, fl-​1917 minħabba l-​gwerra kien hemm nuqqas taʼ ikel f’San Pietruburgu, ir-​Russja, u dan wassal għar-​Rivoluzzjoni taʼ Frar. F’dan l-​irvell, il-​Kżar Nikola II tneħħa minn fuq it-​tron u bdiet il-​ħakma Komunista. F’Novembru taʼ l-​1918, il-​Ġermaniżi riedu l-​paċi imma l-​Alleati ma ridux jieqfu jiġġieldu sakemm kien hemm bidla fit-​tmexxija. Bħala riżultat, l-​Imperatur Ġermaniż Guliermu II kien eżiljat fl-​Olanda.

Xewqa għal sistemi differenti taʼ gvern. Fl-​1989 tneħħiet il-​Purtiera tal-​Ħadid. Ir-​reġimi li kienu jidhru b’saħħithom daqs il-​blat spiċċaw fix-​xejn hekk kif is-​sudditi tagħhom irrifjutaw il-​Komuniżmu u stabbilew tipi differenti taʼ ħakma.

[Stampi f’paġna 7]

Ġesù temaʼ lil dawk li kienu bil-​ġuħ, fejjaq il-​morda, u ta eżempju tajjeb lill-​Kristjani kollha

[Sors tal-​Istampa f’paġna 4]

Lloyd George: Photo by Kurt Hutton/Picture Post/Getty Images