Xiehda Ċara taʼ Mħabba, Fidi, u Ubbidjenza

FL-​GĦODWA tas-​16 taʼ Mejju, 2005, il-​jum kien frisk u x-​xemx bdiet tiddi fil-​Watchtower Farms f’Wallkill, New York. Il-​ħaxix maqtugħ pulit u l-​fjuri miżrugħin bdew ileqqu minħabba x-​xita li niżlet qabel is-​sebħ. Papra u tmien flieles warajha bdew jgħumu bil-​mod fl-​ilma kalm mat-​truf taʼ l-​għadira. Dawk li kienu qed iżuru l-​post baqgħu affaxxinati bis-​sbuħija. Huma bdew jitkellmu bil-​mod, donnhom biex ma jiksrux il-​ħemda taʼ fil-​għodu.

Il-viżitaturi kienu Xhieda taʼ Ġeħova li ġew minn xi 48 pajjiż differenti madwar id-​dinja. Imma dawn ma ġewx biex jaraw ix-​xenarju. Huma kienu interessati f’dak li kien qed jiġri f’binja spazjuża magħmula minn brikks taʼ lewn aħmar, l-​iktar kumpless reċenti tal-​Betel f’Wallkill, l-​Istati Uniti. Meta daħlu f’dan il-​bini, reġgħu baqgħu meraviljati, għalkemm din id-​darba la kien hemm paċi u lanqas kwiet.

Minn pjan f’nofs il-​binja, il-​mistidnin bdew jittawlu lejn sistema komplikata taʼ magni. Ħames stamperiji enormi kienu mifruxin fuq art lixxa tal-​konkos li hija akbar minn disaʼ grawnds tal-​futbol. Huwa f’dan il-​post li jiġu stampati l-​Bibbji, il-​kotba, u r-​rivisti. Rombli kbar ħafna tal-​karti, li jiżnu 1,700 kilogramma kull wieħed, iduru qishom roti taʼ trakk jiġri. Kull romblu, li hu twil 23 kilometru, jinħall u jgħaddi kollu mill-​istamperija f’25 minuta biss. F’dak il-​ħin, l-​istamperija tqiegħed u tnixxef il-​linka u tkessaħ il-​karta ħalli tkun tistaʼ tiltewa f’rivisti u l-​makkinarju fl-​għoli jibgħathom bil-​ħeffa biex jiġu ppakkjati fil-​kaxxi ħalli jintbagħtu lill-​kongregazzjonijiet. Stamperiji oħra jinsabu okkupati jistampaw karti kbar li jifformaw partijiet minn kotba, li jittieħdu bil-​ħeffa f’maħżen li jimtela sas-​saqaf sakemm jintbagħtu biex jiġu llegati. Din il-​biċċa xogħol fiha preċiżjoni armonjuża mmexxija minn kompjuter.

Wara li telqu mill-​istamperija, il-​viżitaturi marru jżuru l-​post fejn jiġu llegati l-​kotba. Hawnhekk, il-​magni jipproduċu kotba bil-​qoxra iebsa u Bibbji deluxe b’rata taʼ xi 50,000 kopja kuljum. Il-​partijiet differenti tal-​kotba jinġabru fl-​ordni li suppost, jiġu llegati, u jinqatgħulhom it-​truf. Imbagħad, titwaħħlilhom il-​qoxra. Wara dan, mazez taʼ kotba li jkunu lesti jitpoġġew fil-​kaxxi. B’mod awtomatiku, il-​kaxxi jiġu siġillati, titwaħħlilhom tabella, u jitpoġġew fuq pjattaforma taʼ l-​injam. Barra minn hekk, il-​kotba bil-​qoxra tal-​karti jinġabru f’ringiela u dawn jiġu ppakkjati sa 100,000 ktieb kuljum. Din hija wkoll sistema taʼ makkinarji—muturi bla għadd, makkinarji li jmexxu l-​kotba, roti għall-​ingranaġġ, roti oħrajn, u ċinturini—kollha għaddejjin b’ħeffa li ma bħalha biex jipproduċu l-​letteratura Biblika.

Din l-​istamperija li taħdem bi preċiżjoni t’arloġġ mill-​aqwa għandha makkinarju b’veloċità qawwija u taʼ l-​aħħar teknoloġija, u b’hekk hija tassew meravilja tat-​teknoloġija moderna. Bħalma se naraw, din hija wkoll xiehda ċara taʼ l-​imħabba, il-​fidi, u l-​ubbidjenza tal-​poplu t’Alla. Imma l-​istamperiji għala ttieħdu minn Brooklyn, New York, għal Wallkill?

Raġuni ewlenija kienet biex l-​istampar u l-​mod kif tintbagħat il-​letteratura jiġu simplifikati billi kollox jibda jsir minn post wieħed. Għal bosta snin, il-​kotba kienu jiġu stampati u mibgħuta minn Brooklyn, u r-​rivisti kienu jiġi stampati u mibgħuta minn Wallkill. Jekk dawn ix-​xogħlijiet jingħaqdu fi proċess wieħed, ikun hemm bżonn inqas nies għax-​xogħol, u l-​fondi dedikati għas-​servizz t’Alla jintużaw aħjar. Iktar minn hekk, minħabba li l-​istamperiji fi Brooklyn bdew jiqdiemu, ġew ordnati żewġ stamperiji ġodda MAN Roland Lithoman mill-​Ġermanja. Dawn l-​istamperiji kienu kbar wisq biex joqogħdu fil-​bini taʼ l-​istamperija taʼ Brooklyn.

Ġeħova Jappoġġa x-​Xogħol

L-​iskop taʼ l-​istampar dejjem kien għall-​avanz taʼ l-​aħbar tajba tas-​Saltna t’Alla. Kien evidenti li Ġeħova kien qed ibierek ix-​xogħol mill-​bidunett. Mill-​1879 sa l-​1922, il-​kotba kienu jiġu stampati minn stabbilimenti kummerċjali taʼ l-​istampar. Fl-​1922, binja taʼ sitt sulari li kienet tinsab fi 18, Concord Street, fi Brooklyn, ġiet mikrija u nxtara l-​apparat għall-​istampar tal-​kotba. Dak iż-​żmien, kien hemm min iddubita dwar jekk l-​aħwa kinux kapaċi jagħmlu din il-​biċċa xogħol.

Wieħed minn dawn kien il-​president tal-​kumpanija li kien stampa l-​biċċa l-​kbira mill-​kotba tagħna. Waqt żjara f’Concord Street, hu qal: “Sewwa, għandkom f’idejkom stabbiliment mill-​aqwa taʼ l-​istampar, u m’għandkom lil ħadd fil-​post li jaf kif iħaddmu. Fi żmien sitt xhur se jkollkom qabda magni mkissrin; u se tindunaw li l-​aħjar nies biex jagħmlulkom l-​istampar huma dawk li dejjem ħadulkom ħsiebu, u li jagħmluh bħala n-​negozju tagħhom.”

L-indokratur taʼ l-​istamperija dak iż-​żmien, Robert J. Martin, osserva: “Dak li qal kien jidher loġiku, imma hu ħalla barra lill-​Mulej; u hu minn dejjem kien magħna. . . . Ma tantx domna ma bdejna nipproduċu l-​kotba.” Matul it-​80 sena li ġew wara, ix-​Xhieda taʼ Ġeħova stampaw biljuni taʼ biċċiet taʼ letteratura fl-​istamperiji tagħhom stess.

Imbagħad fil-​5 t’Ottubru, 2002, fil-​laqgħa annwali tal-​Watch Tower Bible and Tract Society of Pennsylvania, ġie mħabbar li l-​Ġemgħa li Tiggverna kienet approvat li l-​istampar tal-​fergħa taʼ l-​Istati Uniti jittieħed Wallkill. Kienu ġew ordnati żewġ stamperiji ġodda, u kellhom jaslu fi Frar taʼ l-​2004. L-​aħwa riedu jiddisinjaw u jespandu l-​istamperija u riedu jkunu lesti fi 15-il xahar ħalli jirċievu l-​istamperiji l-​ġodda. Imbagħad, fi żmien disaʼ xhur kellha titpoġġa sistema ġdida biex jiġu llegati l-​kotba u tiġi trasportata l-​letteratura. Xi wħud setaʼ kellhom xi dubji meta semgħu bl-​iskeda—din il-​biċċa xogħol dehret kważi impossibbli. Madankollu, l-​aħwa kienu jafu li bil-​barka taʼ Ġeħova dan setaʼ jitwettaq.

“Spirtu Hieni taʼ Kooperazzjoni”

Peress li kienu jafu li l-​poplu taʼ Ġeħova joffri ruħu minn rajh, l-​aħwa bdew il-​proġett. (Salm 110:​3, Saydon) Minħabba l-​kobor tal-​proġett, kien hemm bżonn ħafna iktar ħaddiema minn dawk disponibbli fid-​dipartimenti tal-​bini li kien hemm Betel. Mill-​Istati Uniti u l-​Kanada, iktar minn 1,000 ħu u oħt bis-​sengħa tal-​bini offrew ruħhom biex jaqdu minn ġimgħa sa tliet xhur bħala parti mill-​programm tal-​volontieri temporanji. Oħrajn minn programmi tal-​qaddejja u volontiera internazzjonali ġew mistiedna biex jieħdu sehem fil-​proġett. Il-​Kumitati Reġjonali tal-​Bini wkoll ikkontribwew bil-​kbir.

Għal ħafna, li jaqdu bħala volontiera fuq il-​proġett f’Wallkill kien ifisser nefqa mhux ħażin fl-​ivvjaġġar u żmien ’il bogħod mix-​xogħol sekulari. Però, huma għamlu dawn is-​sagrifiċċji bil-​ferħ. Minħabba li dawn il-​volontiera kellhom bżonn fejn joqogħdu u riedu jiġu mitmugħin, il-​membri tal-​familja taʼ Betel kellhom opportunità biex jaħdmu iebes ħalli jappoġġaw il-​proġett. Iktar minn 535 membru tal-​familja taʼ Betel fi Brooklyn, Patterson, u Wallkill offrew ruħhom biex jaqdu fuq il-​proġett nhar taʼ Sibt, minbarra l-​inkarigi normali tagħhom matul il-​ġimgħa. L-​appoġġ tant kbir li l-​poplu t’Alla ta għal din il-​biċċa xogħol storika kien possibbli biss minħabba li Ġeħova kien qed jappoġġa l-​proġett.

Oħrajn ikkontribwew finanzjarjament. Per eżempju, l-​aħwa rċivew ittra mingħand Abby li għandha disaʼ snin. Hi kitbet: “Jien tassew grata għax-​xogħol kollu li tagħmlu—għal dawn il-​kotba meraviljużi kollha. Ma ndumx ma niġi narakom. Missieri qalli s-​sena d-​dieħla! Se nilbes beġġ ħalli tkunu tafu min jien. Qed nibgħat 20 dollaru għall-​istamperija l-​ġdida! Dawn huma l-​flus li ġemmajt jien, imma nixtieq nagħtihom lilkom ħuti.”

Waħda oħt kitbet: “Jekk jogħġobkom aċċettaw l-​għotja tiegħi taʼ brieret magħmulin bil-​ganċ li għamilt bl-​idejn ċkejknin tiegħi stess. Nixtieq li dawn il-​brieret jingħataw lill-​ħaddiema li qed jaħdmu fuq il-​proġett taʼ Wallkill. Il-​kalendarju tat-​temp qal li din ix-​xitwa se tkun qalila mhux ħażin. Ma nafx jekk dan huwiex minnu. Imma naf li ħafna mix-​xogħol f’Wallkill se jsir fuq barra, u nixtieq inkun naf li ħuti rġiel u nisa se jżommu rashom sħuna. M’għandix xi sengħa li l-​aħwa qed ifittxu, imma naf naħdem bil-​ganċ, allura ddeċidejt li nuża s-​sengħa tiegħi biex nagħti sehmi kif nistaʼ.” Maʼ l-​ittra bagħtet 106 brieret maħdumin bil-​ganċ!

L-​istamperija tlestiet fil-​ħin. John Larson, l-​indokratur taʼ l-​istamperija, qal: “Kien hemm spirtu tassew hieni taʼ kooperazzjoni. Min setaʼ jiddubita l-​fatt li Ġeħova kien qed ibierek ix-​xogħol? L-​affarijiet tant imxew bil-​ħeffa. Għadni niftakarni bil-​wieqfa fit-​tajn f’Mejju taʼ l-​2003, inħares lejn l-​aħwa jqiegħdu l-​pedament tal-​bini. Inqas minn sena wara, sibt ruħi wieqaf fl-​istess post nosserva l-​istamperija waqt li kienet qed taħdem.”

Il-​Programm tad-​Dedikazzjoni

Il-​programm biex tiġi dedikata l-​istamperija l-​ġdida, flimkien maʼ tliet binjiet oħra taʼ residenzi, sar f’Wallkill nhar it-​Tnejn, 16 taʼ Mejju, 2005. Il-​kumplessi taʼ Betel f’Patterson u Brooklyn, kif ukoll il-​Betel tal-​Kanada, ngħaqdu mal-​programm permezz taʼ sistema elettronika bil-​vidjo. B’kollox, 6,049 ruħ gawdew il-​programm. Theodore Jaracz, membru tal-​Ġemgħa li Tiggverna tax-​Xhieda taʼ Ġeħova, kien iċ-​chairman u ta sommarju fuq fuq dwar l-​istorja tax-​xogħol taʼ l-​istampar. Permezz taʼ intervisti u preżentazzjonijiet bil-​vidjo, il-​membri tal-​Kumitat tal-​Fergħa John Larson u John Kikot għamlu reviżjoni taʼ l-​istorja kemm tal-​proġett tal-​bini kif ukoll tax-​xogħol taʼ l-​istampar li saru fl-​Istati Uniti. John Barr mill-​Ġemgħa li Tiggverna ta l-​aħħar taħdita, u ddedika l-​istamperija l-​ġdida u t-​tliet kumplessi taʼ residenza lil Alla Ġeħova.

Fil-ġimgħa taʼ wara, Beteliti minn Patterson u Brooklyn ngħataw l-​opportunità li jmorru jżuru l-​faċilitajiet il-​ġodda. B’kollox, kien hemm 5,920 ruħ li żaruhom matul dan iż-​żmien.

Kif Inħarsu Lejn l-​Istamperija?

Fit-​taħdita tad-​dedikazzjoni, Ħuna Barr fakkar lis-​semmiegħa tiegħu li l-​istamperija, hi kemm hi impressjonanti, m’hijiex importanti minħabba l-​enfasi li saret fuq il-​makkinarju li għandha. Hija importanti minħabba l-​enfasi fuq in-​nies. Il-​letteratura li nistampaw għandha effett qawwi fuq il-​ħajja tan-​nies.

Kull waħda mill-​istamperiji l-​ġodda tistaʼ tistampa miljun fuljett fi ftit iktar minn siegħa! Però, fuljett wieħed jistaʼ jagħmel effett tassew kbir fuq il-​ħajja taʼ individwu. Per eżempju, fl-​1921 grupp taʼ rġiel li jieħdu ħsieb il-​linji tal-​ferrovija fl-​Afrika t’Isfel kienu għaddejjin fil-​ħidma tagħhom fuq linja twila tal-​ferrovija. Wieħed minnhom, raġel li jismu Christiaan, innota biċċa karta mgħaffġa taħt waħda mil-​linji. Kienet wieħed mill-​fuljetti tagħna. Christiaan qrah b’interess kbir. Hu ġera lejn ħatnu u qallu b’entużjażmu kbir: “Illum sibt il-​verità!” Ftit wara, huma kitbu għal iktar informazzjoni. Il-​fergħa taʼ l-​Afrika t’Isfel bagħtet iktar letteratura bbażata fuq il-​Bibbja. Iż-​żewġt irġiel studjaw, tgħammdu, u qasmu l-​verità tal-​Bibbja m’oħrajn. B’riżultat taʼ dan, ħafna aċċettaw il-​verità. Fil-​fatt, sal-​bidu tas-​snin 90, iktar minn mija mid-​dixxendenti tagħhom kienu Xhieda taʼ Ġeħova—dan kollu minħabba li raġel sab fuljett wieħed f’linja tal-​ferrovija!

Ħuna Barr qal li l-​letteratura li nistampaw iġġib lin-​nies fil-​verità, iżżommhom fil-​verità, tqanqalhom ikollhom iktar żelu, u tgħaqqad lill-​fratellanza. U iktar minn dan kollu, il-​letteratura, li lkoll għandna sehem fit-​tqassim tagħha, tigglorifika lill-​Alla tagħna, Ġeħova!

Ġeħova Kif Iħares Lejn l-​Istamperija?

Ħuna Barr staqsa wkoll lill-​udjenza biex tikkunsidra kif Ġeħova jħares lejn l-​istamperija. Hu żgur li ma jiddependix minnha. Hu jistaʼ jagħmel lill-​ġebel jippriedka l-​aħbar tajba! (Luqa 19:40) Iktar minn hekk, hu ma jimpressjonax ruħu mill-​komplessità, id-​daqs, il-​veloċità, jew l-​abbiltajiet tal-​magni. Hu stess ħalaq l-​univers! (Salm 147:​10, 11) Ġeħova jaf b’metodi ħafna iktar avanzati kif jipproduċi l-​letteratura, metodi li la għadhom ġew disinjati u lanqas immaġinati mill-​bnedmin. Allura, x’inhu tassew taʼ valur għal Ġeħova? Żgur li f’din l-​istamperija hu jara l-​kwalitajiet prezzjużi tan-​nies tiegħu—l-​imħabba, il-​fidi, u l-​ubbidjenza tagħhom.

Sabiex tintwera kif inhi involuta l-​imħabba f’dan ix-​xogħol, ngħatat tixbiha. Waħda tifla taħmi kejk għall-​ġenituri tagħha. Probabbilment, il-​ġenituri se jifirħu bih. Iva, jiġi kif jiġi l-​kejk, dak li jferraħ lill-​ġenituri hu l-​imħabba tat-​tifla, kif tintwera mill-​għemil ġeneruż tagħha. B’mod simili, meta Ġeħova jħares lejn din l-​istamperija, hu ma jarax sempliċi bini u makkinarju. Primarjament, hu jara espressjoni taʼ l-​imħabba għal ismu.—Ebrej 6:10.

Iktar minn hekk, l-​istess bħalma Ġeħova ħares lejn l-​arka bħala mod kif Noè wera l-​fidi tiegħu, hu jħares lejn l-​istamperija bħala xiehda ċara tal-​fidi tagħna. Fidi fiex? Noè kellu fidi li dak li bassar Ġeħova kien se jseħħ fir-​realtà. Aħna għandna fidi li qed ngħixu fl-​aħħar jiem, li l-​aħbar tajba hija l-​iktar messaġġ importanti li qed jingħata fid-​dinja, u li hu vitali li n-​nies jisimgħuh. Aħna nafu li l-​messaġġ tal-​Bibbja jistaʼ jsalva l-​ħajjiet.—Rumani 10:​13, 14.

Żgur li Ġeħova jara wkoll li din l-​istamperija hija mod kif nuru l-​ubbidjenza tagħna. Kif nafu, hija r-​rieda tiegħu li l-​aħbar tajba tiġi pridkata mad-​dinja kollha qabel ma jiġi t-​tmiem. (Mattew 24:14) Din l-​istamperija, flimkien maʼ dawk fir-​reġjuni l-​oħra kollha tal-​globu, se jkollha rwol fit-​twettiq taʼ dan l-​inkarigu.

Iva, l-​imħabba, il-​fidi, u l-​ubbidjenza li ntwerew fil-​ġbir tal-​fondi neċessarji, il-​bini, u x-​xogħol f’dawn il-​faċilitajiet jidhru wkoll fl-​attività żeluża tal-​poplu taʼ Ġeħova kullimkien hekk kif ikompli jipproklama l-​verità lil kulmin jixtieq jismaʼ.

[Kaxxa/Stampi f’paġna 11]

TKABBIR TAʼ L-​ISTAMPAR FL-​ISTATI UNITI

1920: Ir-​rivisti stampati bl-​ewwel magna taʼ l-​istampar, f’numru 35 f’Myrtle Avenue, Brooklyn.

1922: L-​istamperija tittieħed f’binja taʼ sitt sulari f’numru 18 f’Concord Street. Jibdew jiġu stampati l-​kotba.

1927: L-​istamperija tittieħed f’binja ġdida li nbniet f’numru 117 f’Adams Street.

1949: Binja taʼ disaʼ sulari tirdoppja d-​daqs taʼ l-​istamperija.

1956: L-​istamperija f’Adams Street terġaʼ tirdoppja meta l-​binja l-​ġdida tinbena f’numru 77 f’Sands Street.

1967: Jinbena post t’għaxar sulari, u jagħmilha possibbli li jkun hemm stamperija konnessa mal-​binjiet l-​oħra għaxar darbiet akbar mill-​binja oriġinali.

1973: Żjieda taʼ stamperija li tinbena f’Wallkill, primarjament għall-​produzzjoni tar-​rivisti.

2004: L-​istampar, l-​illegar tal-​kotba, u t-​trasport tal-​letteratura fl-​Istati Uniti jittieħdu kollha lejn Wallkill.