Id-​Dinjità tal-​Bniedem—Dritt li Spiss Ma Jiġix Rispettat

“Kulma tistaʼ ssemmi dwar il-​ħajja fil-​kampijiet kien dejjem iktar iżidilna l-​umiljazzjoni u n-​nuqqas taʼ dinjità.”—MAGDALENA KUSSEROW REUTER, WAĦDA MINN DAWK LI SALVAW MILL-​KAMP TAL-​KONĊENTRAMENT TAN-​NAZI.

KIENU kemm kienu tal-​biżaʼ l-​atroċitajiet tal-​kampijiet tal-​konċentrament tan-​Nazi matul it-​tieni gwerra dinjija, la kienu l-​bidu u lanqas it-​tmiem taʼ l-​attakk fuq id-​dinjità tal-​bniedem. Kemm jekk neżaminaw il-​passat jew il-​preżent, il-​verdett hu ċar: Għal żmien twil, ħafna wħud sofrew ‘dejjem iktar umiljazzjoni u nuqqas taʼ dinjità.’

Madankollu, il-​fatt li d-​dinjità tal-​bniedem ġiet abbużata m’huwiex limitat għall-​għemejjel barbari li tebbgħu l-​istorja tal-​bniedem. Spiss id-​dinjità tal-​bniedem tiġi abbużata b’modi iktar sottili. Aħseb dwar tifel li jiġi mwaqqaʼ għaċ-​ċajt minħabba karatteristika fiżika. Jew l-​immigrant li jiġi ridikolat minħabba ċerti drawwiet “barranin.” Jew individwu li jbati minn diskriminazzjoni minħabba l-​kulur tal-​ġilda jew in-​nazzjonalità tiegħu. Dawk li jabbużaw minn ħaddieħor iħarsu lejn il-​kwistjoni bħala xi ħaġa tad-​daħq, imma l-​uġigħ u l-​umiljazzjoni li jħossu dawk li jiġu abbużati m’humiex tad-​daħq.​—Proverbji 26:​18, 19.

X’Inhi d-​Dinjità tal-​Bniedem?

Dizzjunarju wieħed jispjega d-​dinjità bħala ‘l-​kwalità jew l-​istat taʼ li wieħed ikun denju, onorat, jew stmat.’ Għalhekk, id-​dinjità umana tinvolvi kemm il-​mod kif inħarsu lejna nfusna kif ukoll il-​mod kif jittrattawna oħrajn. Waqt li hemm diversi affarijiet li jistgħu jeffettwaw il-​mod kif inħossuna dwarna nfusna, il-​mod kif jarana jew jittrattana ħaddieħor jeffettwa ħafna l-​istima persunali tagħna nfusna fil-​ħajja taʼ kuljum.

Kull soċjetà għandha settur li jinkludi l-​foqra, dawk li huma bla difiża, u dawk li huma vulnerabbli. Madankollu, is-​sens taʼ dinjità taʼ individwu mhux bilfors għandu jonqos għax ikollu dawn iċ-​ċirkustanzi. Huma l-​attitudni u r-​reazzjoni taʼ l-​oħrajn li jistgħu jagħmlu ħsara lid-​dinjità taʼ l-​individwu. B’dispjaċir, ir-​realtà hi li individwi f’sitwazzjonijiet taʼ żvantaġġ ġeneralment huma dawk li jiġu trattati b’nuqqas taʼ dinjità li jġagħalhom iħossuhom umiljati jew offiżi. Kemm-il darba nisimgħu kliem bħal “bla siwi,” “mhux denju,” u “mingħajr dinjità” meta jiġu abbużati x-​xjuħ, il-​foqra, jew dawk li għandhom diżabilità mentali jew fiżika!

In-nies għala jumiljaw lil xulxin? Qatt se naraw id-​dritt bażiku tal-​bnedmin li jkollhom id-​dinjità jsir realtà? L-​artiklu li jmiss se jipprovdi t-​tweġiba sodisfaċenti mill-​Kelma t’Alla, il-​Bibbja.