Il-​Kelma taʼ Ġeħova Hi Ħajja

Punti Prinċipali mill-​Ittri lit-​Tessalonikin u lil Timotju

IL-​KONGREGAZZJONI l-​ġdida f’Tessalonika esperjenzat oppożizzjoni ħarxa minn mindu ġiet ifformata meta l-​appostlu Pawlu mar hemmhekk. Għalhekk, meta Timotju—li forsi għandu fuq l-​20 sena—imur lura b’rapport tajjeb, Pawlu jitqanqal biex jikteb ittra lit-​Tessalonikin sabiex ifaħħarhom u jinkuraġġihom. Din l-​ittra, li wisq probabbli nkitbet lejn l-​aħħar tas-​sena 50 E.K., hija l-​ewwel waħda mill-​kitbiet ispirati taʼ Pawlu. Ftit wara, hu jikteb it-​tieni ittra lill-​Kristjani f’Tessalonika. Din id-​darba, hu jikkoreġi idea żbaljata li għandhom xi wħud u jħeġġeġ lill-​aħwa jieqfu sodi fil-​fidi.

Madwar għaxar snin wara, Pawlu jinsab fil-​Maċedonja u Timotju f’Efesu. Pawlu jikteb lil Timotju u jinkuraġġih jibqaʼ f’Efesu u jkompli jitqabad ġlieda spiritwali kontra għalliema foloz fil-​kongregazzjoni. Meta tqum mewġa taʼ persekuzzjoni fuq il-​Kristjani wara li nar għamel ħerba f’Ruma fis-​sena 64 E.K., Pawlu jikteb it-​tieni ittra tiegħu lil Timotju. Din hi l-​aħħar ittra mill-​kitbiet ispirati tiegħu. Aħna llum nistgħu nibbenefikaw mill-​inkuraġġiment u l-​pariri li ngħataw f’dawn l-​erbaʼ ittri taʼ Pawlu.—Ebr. 4:12.

‘IBQAʼ MQAJJEM’

(1 Tess. 1:1–5:28)

Pawlu jfaħħar lit-​Tessalonikin għall-​‘għemil tagħhom li ġej mill-​fidi, it-​taħbit tagħhom bl-​imħabba, u s-​sabar tagħhom.’ Hu jgħidilhom li huma ‘t-​tama u l-​ferħ u l-​kuruna taʼ l-​hena’ tiegħu.—1 Tess. 1:3; 2:19.

Wara li jinkuraġġixxi lill-​Kristjani f’Tessalonika biex ifarrġu lil xulxin bit-​tama taʼ l-​irxoxt, Pawlu jgħid: “Jum Ġeħova ġej eżattament bħal ħalliel bil-​lejl.” Hu jagħtihom il-​parir biex ‘jibqgħu mqajmin’ u f’sensihom.—1 Tess. 4:16-18; 5:2, 6.

Mistoqsijiet Skritturali Mweġbin:

4:15-17—Min ‘ittieħed fis-​sħab biex jiltaqaʼ mal-​Mulej fl-​ajru,’ u dan kif jiġri? Dawn huma Kristjani midlukin li qed jgħixu matul il-​preżenza taʼ Kristu fil-​qawwa tas-​Saltna. Huma ‘jiltaqgħu mal-​Mulej’ Ġesù fil-​qasam inviżibbli tas-​sema. Iżda, biex jesperjenzaw dan, l-​ewwel jeħtieġ li jmutu u jiġu rxoxtati bħala ħlejjaq spirti. (Rum. 6:3-5; 1 Kor. 15:35, 44) Il-​preżenza taʼ Kristu diġà bdiet, u għalhekk il-​Kristjani midlukin li jmutu llum ma jibqgħux mejtin. Huma ‘jittieħdu,’ jew jiġu mqajmin mill-​ewwel.—1 Kor. 15:51, 52.

5:23—Pawlu x’ried ifisser meta talab biex ‘l-​ispirtu u r-​ruħ u l-​ġisem taʼ l-​aħwa jkunu sħaħ’? Pawlu kien qed jirreferi għall-​ispirtu, ir-​ruħ, u l-​ġisem tal-​kongregazzjoni Kristjana, magħmula minn ħafna membri, li kienet tinkludi l-​Kristjani midlukin bl-​ispirtu f’Tessalonika. Minflok ma sempliċement talab li dik il-​kongregazzjoni tkun sħiħa, hu talab biex l-​“ispirtu,” jew id-​dispożizzjoni mentali, tagħha jkun sħiħ. Hu talab ukoll għar-​“ruħ,” il-​ħajja, jew l-​eżistenza, tagħha, u għall-​“ġisem” tagħha—il-​Kristjani midlukin bħala ġemgħa. (1 Kor. 12:12, 13) B’hekk, it-​talba turi kemm Pawlu kien konċernat dwar il-​kongregazzjoni.

Lezzjonijiet Għalina:

1:3, 7; 2:13; 4:1-12; 5:15. Mod effettiv kif nagħtu parir huwa billi nfaħħru lil dak li jkun u ninkuraġġuh biex imur aħjar.

4:1, 9, 10. L-​aduraturi taʼ Ġeħova għandhom jibqgħu jagħmlu progress spiritwali.

5:1-3, 8, 20, 21. Hekk kif joqrob jum Ġeħova, għandna “nibqgħu f’sensina u nilbsu l-​kurazza tal-​fidi u l-​imħabba u bħala elmu t-​tama tas-​salvazzjoni.” Iktar minn hekk, għandna nagħtu kas bis-​serjetà l-​Kelma profetika t’Alla, il-​Bibbja.

‘ŻOMM SOD’

(2 Tess. 1:1–3:18)

Xi wħud fil-​kongregazzjoni jgħawġu dak li qal Pawlu fl-​ewwel ittra tiegħu u mid-​dehra jibdew isostnu li “l-​preżenza tal-​Mulej” hi fil-​qrib. Sabiex jikkoreġi din l-​idea, Pawlu jirrakkonta x’għandu ‘jiġi l-​ewwel.’—2 Tess. 2:1-3.

Pawlu jħeġġeġ: “Żommu sod u ibqgħu fit-​tradizzjonijiet li kontu mgħallmin.” Hu jagħtihom ordnijiet ‘biex iwarrbu minn kull ħu li hu miexi bid-​diżordni.’—2 Tess. 2:15; 3:6.

Mistoqsijiet Skritturali Mweġbin:

2:3, 8—Min hu l-​“bniedem bla liġi,” u kif se jinġieb fix-​xejn? Dan “il-​bniedem” huwa magħmul mill-​klassi tal-​kleru tal-​Kristjaneżmu. Il-​wieħed li għandu l-​awtorità biex jiddikjara l-​ġudizzji t’Alla kontra l-​ħżiena u jagħti l-​ordnijiet biex issirilhom l-​esekuzzjoni hu “l-​Kelma”—Ġesù Kristu, il-​Kelliemi Ewlieni t’Alla. (Ġw. 1:1) Għalhekk, jistaʼ jingħad li Ġesù se jeqred lill-​bniedem bla liġi “bl-​ispirtu [il-forza li timmotiva] taʼ fommu.”

2:13, 14—Il-​Kristjani midlukin kif ġew ‘magħżulin mill-​bidu għas-​salvazzjoni’? Il-​midlukin bħala klassi ġew determinati minn qabel meta Ġeħova għamel arranġamenti biex nisel il-​mara jisħaq ras Satana. (Ġen. 3:15) Ġeħova ddikjara wkoll liema ħtiġijiet għandhom jilħqu, ix-​xogħol li kellhom jagħmlu, u l-​provi li kellhom jgħaddu minnhom. B’hekk, hu sejħilhom “għal dan l-​għan.”

Lezzjonijiet Għalina:

1:6-9. Ġeħova jagħżel fuq min jesegwixxi ġudizzju.

3:8-12. Il-​fatt li jum Ġeħova huwa qrib m’għandux jintuża bħala skuża biex ma naħdmux sabiex nipprovdu għall-​bżonnijiet tagħna u mmantnu lilna nfusna fil-​ministeru. Jekk ma jkollna xejn x’nagħmlu nistgħu naqgħu fl-​għażż, u dan iġegħelna nsiru ‘wħud li jindaħlu fi ħwejjeġ ħaddieħor.’—1 Pt. 4:15.

“GĦASSES DAK LI ĠEJT FDAT BIH”

(1 Tim. 1:1–6:21)

Pawlu jistruwixxi lil Timotju biex ‘ikompli jitqabad fil-​gwerra t-​tajba; u jżomm il-​fidi u kuxjenza tajba.’ L-​appostlu juri x’inhuma l-​kwalifiki għall-​irġiel maħturin fil-​kongregazzjoni. Pawlu jgħid ukoll lil Timotju biex iwarrab “l-​istejjer foloz li jipprofanaw dak li hu qaddis.”—1 Tim. 1:18, 19; 3:1-10, 12, 13; 4:7.

“Tikkritikax bl-​aħrax lil raġel xiħ,” jikteb Pawlu. Hu jħeġġeġ lil Timotju: “Għasses dak li ġejt fdat bih u tbiegħed mid-​diskors vojt li jipprofana dak li hu qaddis u mill-​kontradizzjonijiet taʼ dak li b’mod falz jissejjaħ ‘għarfien.’”—1 Tim. 5:1; 6:20.

Mistoqsijiet Skritturali Mweġbin:

1:18; 4:14—Liema “tbassir” sar dwar Timotju? Jistaʼ jkun li dan it-​“tbassir” kien jirreferi għal ċerti profeziji dwar l-​irwol futur taʼ Timotju fil-​kongregazzjoni Kristjana li Pawlu lissen taħt ispirazzjoni meta żar Listra matul it-​tieni vjaġġ missjunarju tiegħu. (Atti 16:1, 2) Billi bbażaw fuq dan it-​“tbassir,” ix-​xjuħ tal-​kongregazzjoni ‘qiegħdu idejhom’ fuq iż-​żagħżugħ Timotju u għażluh għal servizz speċifiku.

2:15—Mara kif “tinżamm salva billi tiled it-​tfal”? Jekk mara jkollha t-​tfal u tieħu ħsieb lilhom u d-​dar tistaʼ tinżamm “salva” milli ssir persuna li ‘sseksek u tindaħal fi ħwejjeġ ħaddieħor’ għax ma ssib xejn x’tagħmel.—1 Tim. 5:11-15.

3:16—X’inhu s-​sigriet sagru tad-​devozzjoni lejn Alla? Jekk l-​ubbidjenza perfetta lejn is-​sovranità taʼ Ġeħova hijiex possibbli għall-​bnedmin jew le kien sigriet għal żmien twil. Ġesù pprovda t-​tweġiba billi żamm integrità perfetta lejn Alla sa mewtu.

6:15, 16—Dan il-​kliem japplika għal Alla Ġeħova jew għal Ġesù Kristu? Dan japplika għal Ġesù Kristu, il-​wieħed li dan il-​kliem jiddeskrivi l-​manifestazzjoni tiegħu. (1 Tim. 6:14) Meta mqabbel mal-​bnedmin li jaħkmu bħala slaten u bħala sidien, Ġesù huwa ‘l-​uniku Setgħan,’ u hu biss għandu l-​immortalità. (Dan. 7:14; Rum. 6:9) Minn meta telaʼ fis-​smewwiet inviżibbli, ħadd fuq l-​art ma ‘jistaʼ jarah’ b’għajnejn letterali.

Lezzjonijiet Għalina:

4:15. Kemm jekk sirna Kristjani dan l-​aħħar u kemm jekk ilna, għandna nistinkaw biex nagħmlu progress u nkomplu mexjin ’il quddiem spiritwalment.

6:2. Jekk aħna impjegati maʼ xi ħadd taʼ l-​istess twemmin, minflok ma nieħdu vantaġġ minnu, għandna naqduh saħansitra iktar minn qalbna milli kieku qed naħdmu għal xi ħadd li m’huwiex fil-​kongregazzjoni.

“IPPRIEDKA L-​KELMA U AGĦMEL DAN B’URĠENZA”

(2 Tim. 1:1–4:22)

Sabiex jipprepara lil Timotju għaż-​żminijiet diffiċli li kellu quddiemu, Pawlu jikteb: “Alla ma taniex spirtu beżżiegħ, imma spirtu taʼ qawwa u taʼ mħabba u taʼ moħħ f’loku.” Timotju jingħata l-​parir: “Ilsir tal-​Mulej m’għandux għalfejn jiġġieled, imma għandu jkun ġentili maʼ kulħadd, kwalifikat biex jgħallem.”—2 Tim. 1:7; 2:24.

“Kompli f’dak li tgħallimt u li emmint għax sirt konvint li hu minnu,” Pawlu jħeġġeġ lil Timotju. It-​tagħlim apostata kien qed jinfirex, u għalhekk l-​appostlu jagħti parir lill-​indokratur iżgħar minnu: “Ippriedka l-​kelma u agħmel dan b’urġenza . . . , widdeb, ċanfar, ħeġġeġ.”—2 Tim. 3:14; 4:2.

Mistoqsijiet Skritturali Mweġbin:

1:13—X’inhu “l-​mudell taʼ kliem mimli saħħa”? Il-​“kliem mimli saħħa” huwa “dak tal-​Mulej tagħna Ġesù Kristu”—it-​tagħlim Kristjan veru. (1 Tim. 6:3) Dak li Ġesù għallem u għamel kien fi qbil mal-​Kelma t’Alla, u għalhekk l-​espressjoni “kliem mimli saħħa” tistaʼ tirreferi wkoll għat-​tagħlim kollu tal-​Bibbja. Dan it-​tagħlim jistaʼ jgħinna naraw dak li Ġeħova jeħtieġ minna. Aħna nibqgħu nżommu maʼ dan il-​mudell billi nipprattikaw dak li tgħallimna mill-​Bibbja.

4:13—X’kienu “l-​parċmini”? Il-​kelma “parċmini” tirreferi għall-​ġilda li kienu jużaw biex jiktbu fuqha. Huwa possibbli li Pawlu kien qed jitlob xi porzjonijiet taʼ l-​Iskrittura Ebrajka biex ikun jistaʼ jistudjahom waqt li kien priġunier f’Ruma. Xi ftit mir-​rombli setgħu kienu magħmulin mill-​papiru imma xi oħrajn mill-​parċmina.

Lezzjonijiet Għalina:

1:5; 3:15. Ir-​raġuni fundamentali għala Timotju kellu fidi fi Kristu Ġesù, jiġifieri, fidi li kienet tinfluwenza dak kollu li Timotju kien jagħmel, kienet it-​tagħlim mill-​Iskrittura li rċieva minn mindu kien tarbija. Kemm huwa vitali li l-​membri tal-​familja jaħsbu bis-​serjetà dwar kif qed iwettqu din ir-​responsabbiltà li għandhom lejn Alla u t-​tfal tagħhom!

1:16-18. Meta sħabna fit-​twemmin jgħaddu minn provi, jiffaċċjaw persekuzzjoni, jew jintefgħu l-​ħabs, ejja nitolbu għalihom u nagħmlu dak kollu li nistgħu biex ngħinuhom.—Prov. 3:27; 1 Tess. 5:25.

2:22. Il-​Kristjani, speċjalment iż-​żgħażagħ, m’għandhomx ikunu tant preokkupati bil-​bodybuilding, bl-​isports, bil-​mużika, bid-​divertiment, bil-​passatempi, bl-​ivvjaġġar, b’konversazzjonijiet bla skop, u b’affarijiet bħal dawn, li ma jibqgħalhomx ħin għall-​attivitajiet spiritwali.

[Stampa f’paġna 31]

Liema waħda mill-​ittri ispirati li kiteb Pawlu nkitbet l-​aħħar?