Tkun Int Minn taʼ Quddiem Biex Tonora lil Oħrajn?

“Kunu minn taʼ quddiem biex tonoraw lil xulxin.”—RUM. 12:10.

1. X’m’għadux komuni f’ħafna partijiet tad-​dinja?

F’XI partijiet tad-​dinja hija drawwa li t-​tfal żgħar jinżlu għarkopptejhom b’rispett biex jonoraw lill-​adulti meta jkunu fil-​kumpanija tagħhom. B’dan il-​mod, ma jkunux jidhru itwal minn dawk li huma akbar minnhom. F’dawn il-​komunitajiet, jitqies ukoll bħala diżrispett jekk tifel jew tifla tagħti daharha lil xi adult. Għalkemm f’diversi kulturi r-​rispett jintwera b’modi differenti, dan il-​wiri taʼ rispett ifakkarna fil-​Liġi Mosajka. Din inkludiet il-​kmand: “Quddiem ix-​xagħar griż għandek tqum [b’rispett], u uri konsiderazzjoni lejn il-​persuna taʼ raġel xiħ.” (Lev. 19:32) B’sogħba, f’ħafna postijiet m’għadux komuni li jintwera unur lil oħrajn. Fil-​fatt, id-​diżrispett huwa komuni llum.

2. Il-​Kelma t’Alla lil min tgħidilna biex nonoraw?

² Il-​Kelma t’Alla tqisha bħala xi ħaġa prezzjuża ħafna li nonoraw lil oħrajn. Tgħidilna biex nonoraw lil Ġeħova u lil Ġesù. (Ġw. 5:23) Niġu kmandati wkoll biex nonoraw lill-​membri tal-​familja u lil sħabna fit-​twemmin kif ukoll lil xi wħud barra l-​kongregazzjoni. (Rum. 12:10; Efes. 6:1, 2; 1 Pt. 2:17) X’inhuma xi modi li bihom nuru li nonoraw lil Ġeħova? Kif nonoraw, jew nirrispettaw b’mod profond, lil ħutna Kristjani rġiel u nisa? Ejja nikkunsidraw dawn il-​mistoqsijiet u xi mistoqsijiet oħrajn relatati magħhom.

Onora lil Ġeħova u lil Ismu

3. Liema hu mod importanti wieħed kif nonoraw lil Ġeħova?

³ Mod importanti wieħed kif nonoraw lil Ġeħova hu billi nuru rispett xieraq lejn ismu. Wara kollox, aħna “poplu għal ismu.” (Atti 15:14) Huwa verament unur li nġorru l-​isem taʼ Ġeħova, l-​Alla li Jistaʼ Kollox. Il-​profeta Mikea qal: “Il-​popli kollha, min-​naħa tagħhom, se jimxu kull wieħed f’isem l-​alla tiegħu; imma aħna, min-​naħa tagħna, se nimxu f’isem Ġeħova Alla tagħna għal żmien indefinit, saħansitra għal dejjem.” (Mik. 4:5) Aħna “nimxu f’isem Ġeħova” billi nistinkaw biex ngħixu kull ġurnata b’tali mod li jirrifletti tajjeb fuq l-​isem li nġorru. Bħalma Pawlu fakkar lill-​Kristjani f’Ruma, jekk ma ngħixux fi qbil maʼ l-​aħbar tajba li nippridkaw, l-​isem t’Alla jiġi “mkasbar,” jiġifieri, inġibu fuqu fama ħażina.—Rum. 2:21-24.

4. Kif tqisu l-​privileġġ li tagħti xiehda dwar Ġeħova?

⁴ Aħna nonoraw ukoll lil Ġeħova bix-​xogħol tax-​xandir tagħna. Fil-​passat, Ġeħova stieden lill-​membri tal-​ġens taʼ Israel biex ikunu x-​xhieda tiegħu, imma huma ma wettqux dan l-​irwol. (Is. 43:1-12) Huma spiss taw daharhom lil Ġeħova u “weġġgħu lill-​Qaddis taʼ Israel.” (Salm 78:40, 41) Eventwalment, il-​ġens tilef il-​favur taʼ Ġeħova kompletament. Iżda, illum aħna grati għall-​privileġġ li nagħtu xiehda dwar Ġeħova u li ngħarrfu lil ismu. Nagħmlu hekk għaliex inħobbuh u nixxennqu li jitqaddes ismu. Kif nistgħu ma nippridkawx meta nafu l-​verità dwar Missierna tas-​sema u l-​iskopijiet tiegħu? Inħossuna bħalma ħassu l-​appostlu Pawlu meta qal: “Il-​bżonn iġegħelni. Tassew, gwaj għalija jekk ma nxandarx l-​aħbar tajba!”—1 Kor. 9:16.

5. Il-​fidi f’Ġeħova kif inhi relatata maʼ li jkollna rispett lejh?

⁵ Is-​salmista David stqarr: “Dawk li jafu ismek jafdaw fik, għax int żgur ma titlaqx lil dawk li jfittxuk, O Ġeħova.” (Salm 9:10) Jekk aħna verament nafu lil Ġeħova u nuru rispett lejn ismu minħabba dak li jirrappreżenta, se nafdaw fih sewwasew bħalma fdaw fih il-​qaddejja leali tiegħu tal-​qedem. Il-​fatt li jkollna din il-​fiduċja u l-​fidi f’Ġeħova jerġaʼ hu mod ieħor kif nonorawh. Innota kif il-​Kelma t’Alla tagħmel konnessjoni bejn li nafdaw f’Ġeħova u li nirrispettawh. Meta Israel tal-​qedem naqas li jafda Fih, Ġeħova staqsa lil Mosè: “Kemm se jdumu dawn in-​nies ma jurunix rispett, u kemm se jdumu jirrifjutaw li jpoġġu l-​fidi fija minkejja s-​sinjali kollha li wettaqt fosthom?” (Num. 14:11) Min-​naħa l-​oħra, rispett lejn Ġeħova jindika fidi fih. Billi nafdaw f’Ġeħova biex jipproteġina u jwiżinna saħansitra matul il-​provi, aħna nuru li nirrispettawh.

6. Xi jqanqalna biex nuru rispett profond lejn Ġeħova?

⁶ Ġesù indika li r-​rispett lejn Ġeħova jrid jiġi mill-​qalb. Meta kellem lil dawk li l-​qima tagħhom ma kinitx sinċiera, Ġesù kkwota lil Ġeħova bħala li qal: “Dan il-​poplu jonorani b’xofftejh, iżda qalbu mbiegħda minni.” (Mt. 15:8) Ir-​rispett sinċier lejn Ġeħova jinbet minn imħabba mill-​qalb lejh. (1 Ġw. 5:3) U aħna nżommu wkoll f’moħħna l-​wegħda taʼ Ġeħova: “Dawk li jonorawni nonorahom.”—1 Sam. 2:30.

Dawk li Qed Imexxu Juru Rispett Lejn Oħrajn

7. (a) Aħwa li għandhom pożizzjonijiet taʼ responsabbiltà għala għandhom jonoraw lil dawk li tqiegħdu taħt il-​ħarsien tagħhom? (b) Pawlu kif wera rispett lejn sħabu fit-​twemmin?

⁷ L-​appostlu Pawlu wissa lil sħabu fit-​twemmin: “Kunu minn taʼ quddiem biex tonoraw lil xulxin.” (Rum. 12:10) Aħwa rġiel li għandhom pożizzjonijiet taʼ responsabbiltà fil-​kongregazzjoni għandhom jagħtu l-​eżempju—‘ikunu minn taʼ quddiem’—f’li jonoraw lil dawk li tqiegħdu taħt il-​ħarsien tagħhom. F’dan ir-​rigward, dawk li għandhom responsabbiltajiet kbar jagħmlu sew li jsegwu l-​eżempju li ta Pawlu. (Aqra l-​1 Tessalonikin 2:7, 8.) L-​aħwa rġiel fil-​kongregazzjonijiet li żar Pawlu kienu jafu li qatt ma kien se jitlobhom jagħmlu affarijiet li hu stess ma kienx lest li jagħmilhom. Pawlu wera rispett lejn sħabu fit-​twemmin, u mill-​banda l-​oħra hu kiseb ir-​rispett tagħhom. Meta Pawlu qal: “Għaldaqstant nitlobkom bil-​ħrara: imitaw lili,” nistgħu nkunu ċerti li ħafna wieġbu favorevolment minn jeddhom minħabba l-​eżempju mill-​aħjar li tahom.—1 Kor. 4:16.

8. (a) Liema hu mod importanti wieħed kif Ġesù wera rispett lejn id-​dixxipli tiegħu? (b) Illum, l-​indokraturi kif jistgħu jsegwu l-​eżempju taʼ Ġesù?

⁸ Mod ieħor kif ħu responsabbli juri rispett lejn dawk li tqiegħdu taħt il-​ħarsien tiegħu hu billi jagħtihom raġunijiet għal dak li qed jitlob minnhom jew għad-​direzzjonijiet li jagħtihom. Billi jagħmel hekk, hu jkun qed jimita lil Ġesù. Per eżempju, meta qal lid-​dixxipli tiegħu biex jitolbu għal iktar ħaddiema biex jintbagħtu fil-​ħsad, Ġesù qalilhom għala. Hu qal: “Il-​ħsad hu kbir, imma l-​ħaddiema huma ftit. Għalhekk, itolbu bil-​ħrara lil Sid il-​ħsad biex jibgħat il-​ħaddiema fil-​ħsad tiegħu.” (Mt. 9:37, 38) Bl-​istess mod, meta qal lid-​dixxipli tiegħu biex ‘jibqgħu għassa,’ hu tahom raġuni. Hu qal: “Għax ma tafux f’liema jum ġej il-​Mulej tagħkom.” (Mt. 24:42) Għal darba wara l-​oħra, lid-​dixxipli tiegħu, Ġesù ma qalilhomx biss x’għandhom jagħmlu imma wkoll għala għandhom jagħmluh. B’dan il-​mod, hu wriehom rispett u dinjità. X’eżempju mill-​aħjar biex isegwuh l-​indokraturi Kristjani!

Irrispetta l-​Kongregazzjoni taʼ Ġeħova u d-​Direzzjoni Tagħha

9. Lil min nonoraw ukoll meta nuru rispett lejn il-​kongregazzjoni Kristjana madwar id-​dinja u lejn ir-​rappreżentanti tagħha? Spjega.

⁹ Biex nonoraw lil Ġeħova għandna bżonn ukoll nonoraw il-​kongregazzjoni Kristjana madwar id-​dinja, flimkien mar-​rappreżentanti tagħha. Meta nagħtu kas il-​pariri Skritturali li jiġu mill-​klassi taʼ l-​ilsir leali, aħna nkunu qed nuru rispett lejn l-​arranġament taʼ Ġeħova. Fil-​kongregazzjoni Kristjana taʼ l-​ewwel seklu, l-​appostlu Ġwanni ra li kellu bżonn jesprimi d-​diżapprovazzjoni tiegħu lejn dawk li wrew nuqqas taʼ rispett lejn uħud maħturin. (Aqra t-​3 Ġwanni 9-11.) Il-​kliem taʼ Ġwanni juri li ma kienx hemm biss nuqqas taʼ rispett lejn l-​indokraturi individwali imma wkoll lejn it-​tagħlim u d-​direzzjoni tagħhom. B’ferħ, il-​biċċa l-​kbira mill-​Kristjani ma kinux hekk. Waqt li l-​appostli kienu ħajjin, il-​fratellanza in ġenerali b’mod evidenti wriet rispett profond lejn dawk li kienu qed imexxu.—Flp. 2:12.

10, 11. Spjega mill-​Iskrittura għala hu xieraq li xi wħud jingħataw awtorità fil-​kongregazzjoni Kristjana.

¹⁰ Xi wħud irraġunaw li ladarba Ġesù qal lid-​dixxipli tiegħu “intom ilkoll aħwa,” m’għandux ikun hemm pożizzjonijiet t’awtorità fil-​kongregazzjoni Kristjana. (Mt. 23:8) Madankollu, kemm l-​Iskrittura Ebrajka u kemm l-​Iskrittura Griega fihom għadd t’eżempji taʼ rġiel li eżerċitaw l-​awtorità mogħtija lilhom minn Alla. L-​istorja tal-​patrijarki, l-​imħallfin, u s-​slaten fost l-​Ebrej tal-​qedem tipprovdi ħafna evidenza li Ġeħova jagħti direzzjoni permezz taʼ rappreżentanti umani. Meta n-​nies m’onorawx b’mod xieraq lill-​individwi maħturin, huma ġew dixxiplinati minn Ġeħova.—2 Slat. 1:2-17; 2:19, 23, 24.

¹¹ Bl-​istess mod, il-​Kristjani taʼ l-​ewwel seklu rrikonoxxew l-​awtorità taʼ l-​appostli. (Atti 2:42) Per eżempju, Pawlu ta direzzjoni lil ħutu. (1 Kor. 16:1; 1 Tess. 4:2) Minkejja dan, hu wkoll issottometta ruħu lejn dawk li kellhom l-​awtorità fuqu. (Atti 15:22; Gal. 2:9, 10) Tabilħaqq, Pawlu kellu l-​ħarsa xierqa lejn l-​awtorità fil-​kongregazzjoni Kristjana.

12. Liema lezzjoni li għandha żewġ aspetti rigward l-​awtorità nistgħu nitgħallmu mill-​eżempji Bibliċi?

¹² Il-​lezzjoni li nitgħallmu għandha żewġ aspetti. L-​ewwel, huwa Skritturali li l-​“ilsir leali u għaqli” permezz tal-​Ġemgħa li Tiggverna tiegħu jaħtar irġiel għal pożizzjonijiet taʼ responsabbiltà, u xi rġiel jinħatru biex jeżerċitaw awtorità fuq irġiel maħturin oħrajn. (Mt. 24:45-47; 1 Pt. 5:1-3) It-​tieni, ilkoll kemm aħna, inkluż l-​irġiel maħturin, għandna nonoraw lil dawk li għandhom awtorità fuqna. Allura, x’inhuma xi modi prattiċi kif nistgħu nonoraw lil dawk li għandhom pożizzjonijiet taʼ indokrar fil-​kongregazzjoni Kristjana madwar id-​dinja?

Nuru Rispett Lejn l-​Indokraturi li Jivvjaġġaw

13. Illum, kif nistgħu nuru rispett lejn ir-​rappreżentanti tal-​kongregazzjoni Kristjana?

¹³ Pawlu stqarr: “Nitolbukom, aħwa, biex tistmaw lil dawk li qegħdin jaħdmu iebes fostkom u jippresiedu fuqkom fil-​Mulej u jwissukom; u turuhom konsiderazzjoni kbira bl-​imħabba għax-​xogħol tagħhom. Żommu l-​paċi bejnietkom.” (1 Tess. 5:12, 13) Żgur li l-​indokraturi li jivvjaġġaw għandhom jingħaddu fost “dawk li qegħdin jaħdmu iebes.” Għalhekk, ejja nuruhom “konsiderazzjoni kbira.” Mod wieħed kif nagħmlu dan huwa billi nwieġbu b’qalbna kollha għall-​pariri u l-​inkuraġġiment tagħhom. Meta indokratur bħal dan jagħtina direzzjoni mingħand il-​klassi taʼ l-​ilsir leali, “l-​għerf li ġej minn fuq” iqanqalna biex inkunu ‘lesti li nobdu.’—Ġak. 3:17.

14. Il-​kongregazzjoni kif tagħti evidenza taʼ rispett mill-​qalb lejn l-​indokraturi li jivvjaġġaw, u xi jkun ir-​riżultat?

¹⁴ Iżda, xi ngħidu jekk jgħidulna biex nagħmlu l-​affarijiet b’mod differenti minn dak li mdorrijin nagħmlu? Kultant, li nuru rispett jirrikjedi li niġġieldu kontra t-​tendenza li noġġezzjonaw, “L-​affarijiet ma nagħmluhomx hekk hawnhekk” jew, “Dan forsi jaħdem f’postijiet oħrajn imma mhux fil-​kongregazzjoni tagħna.” Minflok, nistinkaw biex nobdu. Il-​fatt li nżommu qrib f’moħħna li l-​kongregazzjoni hi taʼ Ġeħova u li Ġesù hu l-​Kap tagħha se jgħinna nagħmlu dan. Meta d-​direzzjoni minn indokratur li jivvjaġġa tintlaqaʼ bil-​ferħ u tiġi obduta mill-​kongregazzjoni, ikun evidenti li hemm rispett mill-​qalb. L-​appostlu Pawlu faħħar lill-​aħwa f’Korintu għall-​ubbidjenza b’rispett li wrew lejn id-​direzzjoni li ngħatat minn Titu, l-​anzjan li kien qed iżurhom. (2 Kor. 7:13-16) Illum, nistgħu bl-​istess mod inkunu ċerti li l-​fatt li nkunu lesti li napplikaw il-​gwida li nirċievu mingħand l-​indokraturi li jivvjaġġaw jikkontribwixxi bil-​kbir għall-​ferħ li nesperjenzaw fix-​xogħol taʼ l-​ippridkar tagħna.—Aqra t-​2 Korintin 13:11.

“Onoraw lil Kull Xorta taʼ Bnedmin”

15. X’inhuma xi modi li bihom nuru rispett lejn sħabna fit-​twemmin?

¹⁵ Pawlu kiteb: “Tikkritikax bl-​aħrax lil raġel xiħ. Għall-​kuntrarju, wissih bħala missier, irġiel żgħażagħ bħala aħwa, nisa xjuħ bħala ommijiet, nisa żgħażagħ bħala aħwa bis-​safa kollu. Onora lir-​romol li huma romol tassew.” (1 Tim. 5:1-3) Iva, il-​Kelma t’Alla twissina biex nonoraw lil kulħadd fil-​kongregazzjoni Kristjana. Iżda, xi ngħidu jekk hemm differenza persunali bejnek u bejn ħuk jew oħtok? Iżommok lura dan milli twettaq l-​obbligu tiegħek biex tirrispetta lil Kristjan sieħbek? Jew tistaʼ taġġusta l-​attitudni tiegħek billi tirrikonoxxi l-​kwalitajiet spiritwali taʼ dak il-​qaddej t’Alla? Speċjalment dawk li għandhom l-​awtorità għandhom dejjem iqisu lil ħuthom bir-​rispett—qatt ma ‘jiddominaw fuq il-​merħla.’ (1 Pt. 5:3) Tabilħaqq, fil-​kongregazzjoni Kristjana, li hi identifikata mill-​imħabba mill-​qalb li teżisti fost il-​membri tagħha, għandna għadd t’opportunitajiet biex nonoraw lil xulxin.—Aqra Ġwanni 13:34, 35.

16, 17. (a) Għala hu importanti li nirrispettaw mhux biss lil dawk li nippridkawlhom imma wkoll lil dawk li jopponuna? (b) Kif ‘nonoraw lil kull xorta taʼ bnedmin’?

¹⁶ Naturalment, aħna ma nurux rispett biss lejn dawk li huma parti mill-​kongregazzjoni Kristjana. Pawlu kiteb lill-​Kristjani taʼ żmienu: “Dment li għandna ż-​żmien favorevoli għal dan, ħa nagħmlu t-​tajjeb maʼ kulħadd.” (Gal. 6:10) M’għandniex xi ngħidu, jistaʼ jkun taʼ sfida li napplikaw dan il-​prinċipju jekk seħibna fuq ix-​xogħol jew fl-​iskola jittrattana ħażin. F’mumenti bħal dawn, jeħtieġ li niftakru l-​kliem: “Titbaqbaqx minħabba dawk li jagħmlu l-​ħażen.” (Salm 37:1) Il-​fatt li napplikaw dan il-​parir jgħinna nwieġbu bir-​rispett saħansitra lil min jopponina. B’mod simili, meta nieħdu sehem fil-​ministeru pubbliku, jekk inqisu lilna nfusna bl-​umiltà nistgħu niġu megħjunin biex inwieġbu lil kulħadd “bil-​ħlewwa u b’rispett profond.” (1 Pt. 3:15) Anki d-​dehra u l-​ilbies tagħna jistgħu jindikaw li aħna nirrispettaw lil dawk li nippridkawlhom.

¹⁷ Tabilħaqq, kemm jekk qed nittrattaw maʼ sħabna fit-​twemmin u kemm jekk maʼ dawk taʼ barra l-​kongregazzjoni, aħna rridu nistinkaw biex napplikaw it-​twissija: “Onoraw lil kull xorta taʼ bnedmin, ħobbu l-​fratellanza kollha, ibżgħu minn Alla, onoraw lis-​sultan.”—1 Pt. 2:17.

Kif Twieġeb?

Kif tistaʼ turi rispett xieraq lejn:

• Ġeħova?

• L-​anzjani tal-​kongregazzjoni u l-​indokraturi li jivvjaġġaw?

• Kull membru tal-​kongregazzjoni?

• Dawk li tippridkalhom?

[Stampa f’paġna 23]

Il-​Kristjani taʼ l-​ewwel seklu rrispettaw l-​indokrar tal-​ġemgħa li tiggverna

[Stampa f’paġna 24]

L-​anzjani f’kull pajjiż jonoraw lill-​indokraturi li jivvjaġġaw, li jinħatru mill-​Ġemgħa li Tiggverna